香港新浪網 MySinaBlog
« 上一篇 | 下一篇 »
*♡♡小肥豬♡♡* | 1st Sep 2017 | 靚太廚房 | (133 Reads)

22 AUGUST 2017(TUE)

 

尋日去同小小豬玩野外定向比賽,雖然係好有挑戰的嚟又幾好玩,不過係大熱天加上又悶焗天氣,其實都有點辛苦。所以就即刻去藥材店執返一份消暑湯包,煲返個靚湯同小小豬齊齊解暑啦~

 

今次煲依個黃瓜荷葉粟米鬚素湯都係店員介紹嘅,除左可以清暑之外,仲對健脾同祛濕好有幫助。一聽到店主咁講,加上又真係唔難,當然要即刻煲小小豬同自己飲啦!

黃瓜1個、荷葉1/2塊、粟米鬚半兩、炒白扁豆半兩、熟薏米約2湯匙、果皮1角、蜜棗2粒(一兩相等於 37.5g)~

 

黃瓜去籽切塊,切大舊啲都唔怕,因為太細煲完湯就冇得食啦~

 

果皮浸透去囊;藥材就浸洗一陣~  

 

煲內放約2L水,然後加入果皮~ 

 

待水滾後再放入其他材料~  

 

 繼續用大火加蓋煲約15分鐘~

 

之後就轉用慢火加蓋煲約1小時~

 

加入少少鹽調味就飲得(我真係落左好少少咋,始終都唔太習慣素湯加鹽...哈哈哈)~

 

可能本身我地一家都幾鐘意飲黃瓜湯,所以今次用黃瓜嚟煲素湯,飲落個瓜味仲重左,而且仲好清甜添。認真的....我同老公飲完之後都覺得內裡冇咁滾熱,就好似有一種好消暑感覺,所以都會再煲多幾次飲先得啦! 

 

唉...都唔明白....已經到左立秋,點解天氣仲咁悶熱呢!天呀....地球先生真係好病啦,快啲要諗辨法幫幫佢先得啦!  

 

 

 

溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!