香港新浪網 MySinaBlog
« 上一篇 | 下一篇 »
*♡♡小肥豬♡♡* | 22nd Aug 2017 | 小小豬篇, 博客分享 | (87 Reads)

今次我地嘅澳門之旅可以話有一個新嘗試,絕對係可以用藝高人膽大嚟形容小小豬,因為小小豬體驗左一個難能可貴嘅機會,可以深入舞台表演場地嘅後台攪攪陣,仲學做一特技人添~

小小豬玩樂短片~>https://www.youtube.com/watch?v=-21rXC2yD64

由於澳門喜來登酒店正值舉行全球最大型嘅室內舞台《西遊記》,所以公關姐姐就帶我地去同西遊記演員見面。


坦白講,初時我都以為只係影啲合照就完事,點知我地跟住慢慢行,最後目的地就係深入去表演場地睇部分綵排呀~

 

有得睇綵排都已經覺得好特別,但原來之後仲有驚喜,就係小小豬可以踏上台板,同啲表演哥哥姐姐一齊玩呀! 

 

睇哥哥姐姐綵排時都睇到我同小小豬都嘩..嘩聲,當大會職員問小小豬想唔想一試時,我都以為小小豬會驚,點知佢九秒九唔洗就衝左上舞台,二話不說走左去哥哥身旁,準備升上天啦~

 

玩一次仲唔夠,佢來來回回都好似升左兩次上半空,最後一次仲同哥哥係天空上打圈添(我想大家睇短片可以更加清楚升上半空係有幾高)~

 

其實我係台下睇都真係有點高,雖然我都係信得過哥哥嘅功力,不過媧終都擔心小小豬會驚到發傻。點知佢同哥哥玩左好幾次,仲話一啲都唔驚,仲不知幾投入想玩多好幾次。我想如果唔係有下一個環節要綵排,我想小小豬一定轉到哥哥頭暈都唔肯走呀! 

 

下一個環節就係睇姐姐利用平衡車跳舞,當然小小豬都有份去試,不過佢今次就唔成功啦~

 

之後就跟美猴王學耍金剛棒,估唔到小小豬都有少少天份,連美猴王都讚佢啦~

 

仲有跟哥哥玩人肉盪鞦韆,依隻大膽豬玩到最後仲雙手唔捉住哥哥,有冇咁大膽小朋友呀~

 

一眾哥哥仲為我地表演跳彈床,佢地彈彈下睇到我地個個嘩嘩聲,真係好利害呀~

 

小小豬當然唔放過機會,佢又嚟彈下啦。原來哥哥係想抱住小小豬係假山頂上彈落嚟,依隻豬仔終於識驚了,哥哥點引佢都唔肯,只顧自己周圍彈~

 

唔覺唔覺我地都玩成成個鐘,真係多謝各位哥哥姐姐陪小小豬玩,最後佢地仲做左好朋友,一眾哥哥仲捉住小小豬不停傾計(好在佢地都明小小豬嘅國語..哈哈哈)。 最後當然唔少得同一眾演出者影相留念啦~

 

唔係經過今次後台攪攪陣,我都估唔到小小豬原來係大膽成咁,佢真係好似唔識個驚字點寫,咩都要試去玩,仲完全唔捨得離開個舞台,係離開時仲問我幾時可以再同哥哥玩轉轉轉。

 

睇完後台綵排,真係覺得好吸引(可能睇見小小豬咁興奮投入參與就覺得更正),好想完完整整咁睇晒整套舞台劇。不過因為我地之後節目都好豐富,所以時間唔容許我地去睇表演,雖然係有啲可惜,不過就等下次再嚟澳門時先再嚟睇,唔知到時小小豬記唔記得自己曾經參與過啲表演綵排呢!

 

佢一定記得啦....因為到依家都仍然問我幾時再去搵美猴王,完全感受到佢真係好鐘意依個體驗呀