香港新浪網 MySinaBlog
« 上一篇 | 下一篇 »
*♡♡小肥豬♡♡* | 14th Aug 2017 | 小小豬篇, 博客分享 | (133 Reads)

2 AUGUST 2017(WED)

 

上次同小小豬嚟Q立方王國玩時(按此重溫),係戶外見到個巨型海盜船,小小豬都已經好想去玩,但由於當時因天氣關係冇開放,所以小小豬就冇得去玩。

 

今次嚟澳門正值炎夏時間,咁就最啱去玩水,所以就嚟一個玩轉巴黎人水世界啦~

小小豬玩樂短片~>
https://www.youtube.com/watch?v=qV4D2Gnaf9A

 

巴黎人住客就可以免費玩水世界,但好似我地非住客想玩又可以點,咁就可以俾每位$160入場,如果好似我地3點後入場仲可以半價玩啦~

 

貪玩嘅小小豬就九秒九換好晒衫,準備落水啦。不過入場前都有一個安全提示,身高1.4米或以下嘅小朋友必須係玩嘅全程穿著救生衣呀~

 

一見到泳池就唔放過嘅小小豬就先去幼小朋友專區,簡簡單單瀡下小滑梯先啦~

 

之後轉戰泳池游下水先,其實係因為天氣太熱,浸係水入面就係最舒服嘅時刻~

 

望住巴黎鐵塔下玩水,其實個FEEL都真係唔錯呀~

 

整個水世界皇牌活動就一定係依個巨型螺旋滑水梯,一共有兩條,長一條就係12米,短嘅都有4.7米。唉....小小豬想玩又如何,因為佢唔夠1.22米,所以就只係得個望字啦~

 

巨型螺旋滑水梯就冇份玩,不過小小豬都唔會覺得可惜,因為佢可以玩依個刺激嘅海盜船~

 

睇就好似冇乜特別,不過一上到船就發現大件事,因為上面有好多噴水位,而且仲有一個大水涌定時將滿瀉嘅水倒向甲板,各位大小朋友為左避開啲水就左閃右避(包括我在內),都真係幾好玩呀~

 

海盜船上仲有2條唔同程度嘅小滑梯,唔好以為小兒科,佢嘅衝力都幾大,瀡得都幾快,小小豬都不知玩得幾開心,瀡完一次又一次~

 

開心嘅時光過得特別快,一轉眼就到左17:45,職員叫我地上水先知夠鐘要離場。原來佢地會係17:45開始清場,所有設施都會關閉,雖然玩得未夠喉,不過小小豬都只係乖乖上水,返入更衣室洗身了。 

 

其實我都地玩左差唔多兩個鐘,小小豬都仍然話未玩夠(我自己就已經攰到冇朋友),不過小朋友就係咁,有得玩就一定係充滿精力,小小豬係離開時都不停叫我再帶佢嚟,又話DADDY今次冇嚟玩唔到,一定要快啲帶DADDY嚟玩咁好玩嘅水世界哦。

 

玩緊嘅時候又唔見佢話掛住DADDY,為左快啲可以再去玩,又好似幾乖仔哦...哈哈哈!