香港新浪網 MySinaBlog
« 上一篇 | 下一篇 »
*♡♡小肥豬♡♡* | 8th Jul 2017 | 小小豬篇 | (158 Reads)

5 JULY 2017(WED)

 

暑假前學校都只係返半日,多左咁多時間就緊係要去玩,俾機會小小豬放下電。有咩開心過得過有朋仔仔陪玩,所以就約埋SY哥哥同子子齊齊去海洋公園玩夏水禮啦~

為左爭取時間,所以放左學之後就即刻出發去玩(好在...依家返學唔洗帶大書包,咁去玩都方便好多....哈哈哈)~

 

話個小小豬開心玩樂短片~
https://www.youtube.com/watch?v=m8J6AIXoYIA

話個小秘密俾大家知,小小豬每次浸浴洗白白都會同佢啲鴨仔朋友一齊玩,所以我地第一個目的地就係去兒童王國探小小豬嘅鴨仔呀~

 

搖控船換上左鴨仔做駕駛員,可愛度爆登呀~

 

今個夏水禮其中一個重點,就係依個鴨仔池,睇住啲四千幾隻鴨仔係度游游游,都真係幾治癮。點解係四千幾?宣傳又話6500隻?職員哥哥話如果放晒6500隻鴨仔入池,就游唔到水,所以就只有四千幾隻。

 

依度都有一個考眼力小遊戲,因為係咁多大大細細鴨仔中,其中一隻條尾唔同嘅,不過掛住心急去玩嘅小男孩就冇心機搵啦...哈哈哈~

 

玩左一陣我地就去海龍王餐廳吃個午餐先~ 

 

小小豬都係第一次嚟海龍王餐廳,我地仲安排坐係玻璃窗前,可以邊食邊睇咁多魚係枱前游來游去,未食都已經覺得好興奮,個環境真係勁正呀~

 

小朋友就緊係食兒童餐~ 

 

但其實我地嘅目的就係........「冰凍芭菲鴨」...哈哈哈~

 

開開心心又食左一個午餐~


食飽飽就到左去玩時間,第一站就係去玩「勁爆夏日障礙賽」,不過....小小豬因為未可夠1.2米,所以只可以睇住SY哥哥玩呀~


換好泳裝,就向「激FUN玩沙大派對」出發啦~

 

趁唔多人小朋友們就先去玩「泡泡狂熱」~ 

 

原本以為三小朋友可以齊齊係泡泡池激戰一返,不過原來係有高度限制,SY哥哥屬於大哥哥組別,所以佢只可以自己玩,幸好小小豬同子子可以同場,大家都有個伴~ 

 

雖然場地同往年差唔多,不過小朋友們一見泡泡就發狂,小小豬仲成日將啲泡泡放上頭,佢話係洗頭哦....真係俾佢激C~

 

泡泡柱又嚟啦,唔好話小朋友,我地旁邊睇嘅家長都好興奮。小小豬直頭企定定係泡泡位,要令全身都係泡泡呀~ 

 

不得不讚在場工作人員,佢見小小豬全身係泡泡,就主動叫行過去,用水幫佢即時沖走啲泡泡呀~

 

之後就轉戰「童樂水隧道」,小朋友由左跑到右,又係個噴水圈不停跑,佢地就玩得開心,難為了我地家長,因為佢地跑跑下就衝埋嚟我地度,就係咁.....我地都濕晒啦~

 

終於嚟到重頭環節「超級巨沖」,上年要我捉小小豬去佢先肯玩,原本以為今年有SY哥哥陪佢就安心玩,但依個越大越細膽嘅小小豬始終唔肯,無論SY哥哥點叫,佢都唔肯玩依個"兜頭淋"~

 

係又想玩但又驚情況下,小小豬只好企係兩旁嘅菇柱下靜待傾盆一刻。大膽嘅SY哥哥玩左總共23次,仲帶點意猶未盡添~ 

 

今年除左玩水之外,另一主題就玩沙。在場有一位大師即場為我地展示沙雕塑,唔知佢依家雕緊咩動物呢~

 

「奇趣沙灘創作區」可以有工作人員教小朋友玩沙雕塑,不過兩小男孩都鐘情於玩水,所以就交俾子子同魚子媽努力堆沙啦~

 

當然唔少得兩幅6米高嘅奇趣沙雕,每一隻動物都雕得好仔細,像真度都真係勁高,健力士世界紀錄雕塑大師團隊真係好利害呀~

 

小朋友們玩得極度盡興,估唔到夏水禮都玩足兩個幾鐘,如果唔係六點海洋公園要關門,我估仲可以繼續玩呀! 

 

我地走嘅時候先聽到工作人員話原來山上仲有一場「水戰大激鬥」,可以齊齊玩掟水彈大戰,仲有大批「動感水兵團」用特製水槍係地上畫出得意圖案。

 

唉呀....原來MISS左兩個遊戲,好似蝕左啲啲添不過唔緊要夏水禮至八月廿七日,等我生日時,到時只買一張兒童票,就可以兩母子入嚟再玩過,抵呀....哈哈哈(師奶仔又嚟啦)

 

 

 

https://www.facebook.com/kinseymama/