香港新浪網 MySinaBlog
« 上一篇 | 下一篇 »
*♡♡小肥豬♡♡* | 9th Apr 2017 | 小小豬篇 | (80 Reads)
9 APRIL 2017(SUN)

今日我地約埋姨姨同表姨一行五人齊齊嚟搵米奇食BUFFET,除左食大餐之外,仲可以參加CUPCAKE工作坊,學整靚靚DUFFY & SHELLIEMAY CUPCAKE,當然仲有我至愛嘅一環節集郵啦~

 

 

嚟米奇廚師餐廳食BUFFET都應該係我嘅第二次,對上一次印象都係同老公拍拖時入嚟慶祝生日節目。其實我都好想嚟,但作為一名集郵愛好者(指限同公仔集郵..呵呵呵),所以我地大多數都係去翠樂庭嗰邊,原來依家米奇廚師餐廳都有廚師MICKEY出嚟同大家影相,另外係5月嘅星期日,小朋友都可以免費參加CUPCAKE工作坊,所以就嚟食+玩一轉啦! 

 

不過話時話,今次都係小小豬第一次入嚟迪士尼好萊塢酒店呀~

 

我地一行五人都早左少少嚟,所以就周圍行下先啦~ 

 

原本打算係草地休息一下,感受春日氣息,點知小小豬見到個小公園,佢就要去放玩一番。個小公園咁靚,俾佢去玩下都係唔錯呀~

 

玩到夠鐘就可以去開餐啦~ 

 

我地一入座職員哥哥就為我地預約好整CUPCAKE同埋與廚師MICKEY影相時間,咁就一定可以做到依兩個重要活動啦~

 

嚟食BUFFET當然就係最關心有咩正嘢食,估唔到佢嘅種類都真係好多,而且仲添置都好快,總之行出去拎嘢食每一次都係齊齊整整,超快手呀~

 

我都唔可能全部都影晒出嚟,所以只能分享一部分,不過食物種類唔止多,而且個味道都真係唔錯呀~

 

作為女仕嘅我,當然係著眼去啲甜品度啦!嘩...超靚嘅美女與野獸甜品,絕對吸睛之選~ 

 

男孩子就有IRON MAN甜品,型呀~

 

食左半飽,就到我地預約好時間,去學整今個月主題嘅DUFFY & SHELLIEMAY CUPCAKE~

 

其實我地都係只係做後期製作嘅部分,因為廚師們一早就為我地準備好啦~

 

先嚟睇下廚師哥哥示範~

 

然後就好努力咁整三粒小玫瑰~ 

 

仲有為兩個CUPCAKE做好佈置~ 

 

小小豬嘅DUFFY & SHELLIEMAY CUPCAKE完成啦~  

 

後面嗰個就係廚師哥哥整嘅,都唔係相差好遠呀...哈哈哈~

 

整完CUPCAKE就唔少得集郵時間啦~   

 

雖然我地入場時表明BUFFET只可以食兩小時,不過我地今日都應該唔超過兩小時。緊係啦...又食又玩又集郵,真係快樂不知時日過,我地大家都食到飽飽咁離開呀~ 

 

今日相信最開心嗰個一定係小小豬,因為有佢最愛嘅表姨同姨姨嚟陪佢(有表姨在場,小小豬真係連我地都唔要呀),佢地兩個都係好錫小小豬,仲間中幫我湊佢,所以開心玩樂時間又點可以少得佢地呢。

 

小小豬仲已經講話下次又要齊齊入嚟食BUFFET,因為佢話啲食物真係好好食,尤其係個豬豬飽哦!

 

哈哈哈...我當然都係非常樂意再帶佢嚟,不過相信都係要等啲乜乜慶祝日先得啦!

 

 

 

**我地的FACEBOOK PAGE,齊齊來交流親子。育兒。烹飪啦**https://www.facebook.com/kinseymama/