香港新浪網 MySinaBlog
« 上一篇 | 下一篇 »
*♡♡小肥豬♡♡* | 20th Jan 2017 | 小小豬篇, 靚太廚房 | (154 Reads)

20 JANUARY 2017(FRI)

經過上星期教師發展日小小豬放早唔洗係學校食午餐,我休息左一星期之後,今日又再開妝始我嘅工作,為小小豬繼續準備愛心便當啦~
Picture

星期一就簡單少少,主力煮左個蕃茄肉醬通心粉,冇公仔小小豬又點會放過我呢,所以就用芝士片印左一隻小白兔俾佢~
Picture

雖然小小豬都對依片芝士兔仔有所不滿,不過唔理咁多,最重要就係佢都食晒成碗通粉嘛....哈哈哈!

星期二就整返個飯團人仔俾佢啦~
Picture

主菜就係南瓜加上肉餅,之後整個波波餅團做頭,蟹柳做身體,再用紫菜做頭髮,雖然就係簡單左啲啲,不過都算叫做一個卡通便當呀!

都總叫做小小豬鐘意,佢一打開就細細聲話(當然我偷偷地望到佢係開心樣):嘩...係我地三口子便當呀!睇見佢咁個樣,即係我又PASS了!

星期三就整左個壽司便當~
Picture

其實小小豬早幾日都已經話好想食蛋壽司卷卷,不過我又真係唔係好識整日式甜蛋,所以不嗰幾日就不停上網搵個整法,最後就俾我搵左一個好簡單嘅做法,之後就用BRUNO嚟煎,終於成功整到比較靚嘅甜蛋整壽司啦!

星期四就整左一個心心便當~
Picture

唔好睇少依兩粒心心就以為係好少飯,其實都係小小豬平日嘅飯量嚟,因為個心心都有一定高度,所以看似細粒但其實份量好足呀。

今日主菜就係南瓜炒肉片,見屋企有兩粒餃子就煎埋佢。雖然個賣相都唔係滿分,不過小小豬都收貨,放學時仲扮晒嬌咁問我係咪因為好愛佢,所以整個心心俾佢食。真係....所以我成日都話,依隻衰豬唔激嬲我嘅時候又真係逗C人呀!

星期五就到肉粒通粉加三文治~
Picture

嗱...唔係懶惰整咁簡單,只係小小豬見到學校訂飯張通告見到同學仔食依兩樣,所以佢又話想跟住食。既然佢要求,我就當然作出配合啦!

無驚無險又成功完成一星期便當,其實諗煮乜又真係好頭痛,因為我唔想用太多加工食品嚟整午餐,用新鮮食材好似健康啲,同時又要諗整咩圖案,真係少啲腦力都唔得。

我會繼續努力,務求小小豬食多啲,咁就可以快啲肥肥白白啦!

**我地的FACEBOOK PAGE,齊齊來交流親子。育兒。烹飪啦**
Picture