香港新浪網 MySinaBlog
« 上一篇 | 下一篇 »
*♡♡小肥豬♡♡* | 7th Jan 2017 | 小小豬篇, 靚太廚房 | (208 Reads)

6 JANUARY 2017(FRI)

唔知幾時應承過小小豬,2017年開始就會為佢準備愛心飯盒做午餐,原本都打算不了了之,但小小豬一向記性好,佢又點會放過我呢。睇左好多討論區媽媽們嘅意見(真係。。升小學我都冇去刨啲論壇), 終於買到個啱心水嘅保溫飯盒,2017年首要任務就係做送飯媽媽~
Picture

依個小小豬仲過份到,要我每日整靚靚便當俾佢做午餐,唔通佢真係認為我好得閒。平日教小小豬都係要盡力去做每件事,所以既然答應左,我就要努力做好。一向冇乜藝術天份,要整個便當都有點困難,不過我都要用我最大嘅努力去整啦!

第一日嘅整愛心便當就當然要穩陣為主,所以就整左個BEAR BEAR飯團,然後加上西蘭花配上粟米肉碎,簡單得嚟都幾健康,感覺都唔錯呀~
Picture

第二日就係以三文魚飯為主,再配西蘭花同埋一啲獅子狗腸仔,原本都冇打算整公仔,不過當小小豬臨入學校門口之前,佢都千叮萬囑我一定要整隻小白兔俾佢,既然佢咁想,咁我就整一隻三文魚小白兔。不過,可能我握得唔夠實,所以效入飯盒時就有點鬆,所以小兔仔都唔係好靚........失敗了,不過我唔會放棄,一定我會再戰小白兔~
Picture

日日食飯都悶啦,所以第三日就整一個雞絲炒烏冬,烏冬又點可以整唔公仔呢?但小小豬又一定要求有公仔喺入邊,所以我就唯有用火腿印兩個馬仔圖案。點知呢隻要求高嘅豬仔話「用火腿整唔算數!」真係俾佢激C~
Picture

星期五就搞搞新意思,幫佢準備個壽司便當。啲小卷就係我自己捲嘅,好耐冇捲都總算成功, 捲得都幾靚啦。不過嗰兩舊大嘅玉子壽司就係買現成,原本係打算去吉之島買腐皮嚟整腐皮壽司,點知係吉之島都搵唔到腐皮買,最後見店員姐姐推出新鮮整好嘅玉子壽司,所以就買兩粒偷雞少少啦~
Picture

不過真係估唔到依個壽司便當有好大反應,首先小小豬一打開便當就已經不停偷笑,之後好多同學仔見到小小豬便當又充滿羨慕嘅眼神,真係搞到我有啲唔好意思,真係要諗諗下次帶唔帶壽司.....哈哈哈哈!

雖然依家為小小豬帶飯都真係幾頭痕,每日諗佢食啲乜,又要預備煮啲乜,送完飯又要係街流連等到接放學,其實都真係有點辛苦。不過見到小小豬食得咁開心又爽手,加上自己煮又係會健康啲嘅, 所以我都要有依個恒心,要繼續KEEP住為小小豬準備健康午餐!

當務之急就係要諗下點整啲靚靚愛心便當,日日都要整公仔便當...我嘅存貨唔係好多咋……哈哈!

 

**我地的FACEBOOK PAGE,齊齊來交流親子。育兒。烹飪啦**
Picture