香港新浪網 MySinaBlog
« 上一篇 | 下一篇 »
*♡♡小肥豬♡♡* | 10th Jan 2017 | 靚太廚房 | (6237 Reads)

10 JANUARY 2017(TUE)

依排天氣都真係唔知想點,上星期就好似夏天熱熱的,今日又開始翻風,星期六仲話會得十幾度,真係天氣過山車,所以大家都要小心身體,新年將至...千其唔可以病呀!

小小豬依排都有幾聲痰咳聲(我估都係早前為食之過,食左好多雪糕啦!),有朋友仔知道小小豬咳就俾左一個古方我,話佢個囡囡飲左兩次之後就止晒啲咳,佢叫我試下整俾小小豬飲。

有佢嘅成功經驗,再加上屋企又有齊晒三樣材料,所以就試下依個洋蔥蘋果蒜頭水啦~
Picture

其實只係三樣材料就可以止咳,聽落又真係好似好神奇,不過其實洋蔥水之前都有好多朋友介紹過話係好有效,就連嚴浩都有介紹過。今次朋友仔依個古方就加左同樣可以殺菌嘅蒜頭,同埋又有蘋果嘅甜味,咁就即係變左勁易入口嘅甜水啦!

其實之前一直唔試整洋蔥水,不過就好怕個味小小豬唔鐘意,煲左唔飲就即係浪費我啲心機,依家有左蘋果味,小小豬都應該唔抗拒,所以就試下。

一人份量就只係需要一個洋蔥、一個蘋果同埋三粒小蒜頭~
Picture

洋蔥去皮之後切細塊;蒜頭去皮後拍鬆~
Picture

蘋果去皮切細細塊,平日我都鐘意用埋蘋果皮煲湯,因為蘋果皮都一樣好有益,但今次係需要燉啲蘋果汁出嚟,冇皮係會多啲汁出嚟呀~
Picture

係燉盅內倒放一個碗,然係將所有材料鋪上去~
Picture

然後放入電子燉盅內燉45分鐘(如果用明火隔水蒸燉的話30分鐘就可以啦)~
PicturePicture

時間夠就可以將食材取出~
Picture

拎走個碗就可以見到製成品洋蔥蘋果蒜頭水,原來燉出嚟都唔係太多,真係滴滴住辛苦呀...哈哈哈~
Picture
Picture

係燉嘅過程,其實整個廚房(廳都有啲)都充滿洋蔥味,所以都有丁點擔心唔知係咩味,小小豬唔肯飲。當然我都有試返啖,原來個味道又真係唔差,甜甜地又幾易入口哦,唔怪之得小小豬飲得咁合作啦~
Picture

咁止咳方面又點呢?小小豬飲左又真係好似咳少左啲啲,就算咳嘅時候痰聲都少左,我估唔多唔少都同飲左依個洋蔥蘋果蒜頭水有關,等我聽日再燉多一次俾小小豬飲,睇下可唔可以止晒啲咳先。

依個古方對小小豬起到小小效用(小小豬似係寒咳,因為入夜後先會咳),但亦有可能未必適合所有人,因為咳都有分寒咳同熱咳,雖然洋蔥就係屬較中性,不過大家係試之前都係要了解自己體質先呀!

 

**我地的FACEBOOK PAGE,齊齊來交流親子。育兒。烹飪啦**
Picture