香港新浪網 MySinaBlog
*♡♡小肥豬♡♡* | 31st Aug 2013 | 小小豬篇 | (46 Reads)
25 AUGUST 2013(SUN)

成個月天氣都唔係咁好,一係就太熱,再唔係就落雨,所以都成個月冇入過嚟迪迪尼。不過,八月係生日月,AP迪迪尼有小禮物同生日COUPON,所以今日就入去玩返轉啦!

之後幾次入嚟迪迪尼都唔見毛毛,今日終於都可以同到毛毛影相啦!雖然小小豬比較鐘意大眼,不過佢對毛毛都好鐘意,睇佢同毛毛玩得幾開心就知啦~


雖然入左迪迪尼,不過我地今日最主要行程唔係入嚟玩,係去酒店食HIGH-TAE,見未夠鐘所以就同小小豬去佢至鐘意嘅地方玩,就係玩水啦!

個傻豬仔真係玩得好開心又興奮呀~


玩到成身濕晒,又頭濕到落街,明乎其實係濕水豬呀~


玩到夠鐘,我地就轉戰去酒店嗰邊準備食HIGH-TEA,因為AP有可以有買一送一優惠,所以大肥豬就建議同我去享受一吓!

等食的兩母子~


食物就未到,先嚟食杯靚茶毛~

人飲佢又飲...不過小小豬只係飲水,哈哈哈~


嘩....好靚嘅HIGH-TAE嚟啦~


真係件件都好靚呀~


當然唔少得三口子嚟張靚相啦~


扮吓闊太先~


睇吓小小豬食得幾肉緊~


好乖乖嘅小小豬仲餵我食添,真係冧C左啦~


不過....叫佢同影相就掛住食,真係激C呀~


哈哈哈...個傻豬仔見大肥豬飲咖啡又要飲,只係輕輕一點就變晒樣,相信同我一樣都係唔"好"依啲杯中物啦~


我地享受左個幾鐘HIGH-TEA之後,就去酒店周圍行吓~


仲係個迷宮度玩得不知幾開心~


見小小豬玩得興起,所以我地又行埋去碼頭嗰邊散吓步~


碼頭嗰邊個FEEL真係唔錯,加埋啲海風吹埋嚟,感覺好舒服,好RELAX呀!

就係依個時候,同場有位伯伯係度做運動,依個小小豬就有樣學樣,學伯伯做運動,佢啲動作真係勁攪笑呀~

開開心心又輕鬆咁就過左一個同我預祝生日嘅下午,入迪迪尼咁多次,今日真係可以話最舒服同享受嘅一次。

*♡♡小肥豬♡♡* | 30th Aug 2013 | 小小豬篇 | (45 Reads)
24 AUGUST 2013(SAT)

之前係SHEMON參加左個抽獎遊戲,好幸運都抽中左去MESSY Jam玩Art jamming,所以今日我地三口子又有得去玩啦~

今日總共有七位小朋友一齊參加,係未開始前影返張相先~


係屋企玩油彩就玩得多,不過Art jamming都係第一次玩,所以開初時就好緊張,都唔知從何入手好呀~


後來其中一位導師過嚟,好有耐性咁教小小豬玩,先用手指仔嚟畫畫~


小小豬好快就投入起上嚟,自己發揮啦~


之後就教用掃仔油啦~


用畫筆點綴吓先~



哈哈哈...幾有大師風範~


再用試吓用其他工具嚟畫~


貼啲小佈置先~


最後一個步驟,就係撤金粉啦~


鄧...鄧...鄧....鄧...小小豬嘅作品完成啦~


靚唔靚呢?好明顯係抽象派嚟啦~

原來今日除左有得玩之後,七位小朋友仲有比賽,要選出三名勝出圖畫。小小豬都算叻仔,因為佢得到第二名,贏左張半價COUPON呀~


今日真係好好玩,小小豬嘅表現都VERY GOOD,完全冇扭計又肯專心咁玩,畫得又有文有路,所以真係要俾個叻叻佢呀!


*♡♡小肥豬♡♡* | 29th Aug 2013 | 博客分享 | (342 Reads)
23 AUGUST 2013(FRI)

早前係Lady Qooza登記參與試用活動,好開心咁又抽到有得參加試用啦!

今次試用嘅係Mane 'n Tail 美國箭牌洗護系列~


之前都聽朋友介紹過依一隻洗頭水,最大賣點就係可以令頭髮快啲長。其實我都好想留返長頭髮,不過唔知點解啲頭髮只係會越嚟越厚但又好似唔識長,所以真係好想試吓,睇吓可唔可以快啲令頭髮快長啲呀!

依個品牌其實都有出幾種洗護系列,俾唔同髮質嘅人仕用。我今次所試用嘅亦都係非常適合我髮質嘅深層保濕系列~


* 含水解蛋白, 維他命原B5, 維他命E等護髮精華元素
* 提升角質層的鎖水力, 24小時保持柔軟易梳
* 改善乾燥易斷及髮色暗啞
* 令髮絲強韌有彈性

我本身嘅髮質都唔係咁好,厚就唔在講,仲要又堅韌又乾旱同埋無咩光澤~


藍色乳液狀帶著清香甜味,沾水後很容易起出泡泡來。雖然比較多泡泡,但清洗時亦都很方便,一洗便可~

同為藍色的乳霜質地,氣味跟洗髮露差不多。加水後,不會起出太多的泡泡,感覺十分水潤,容易塗在髮絲末段及按摩頭皮~


使用一星期後~

可能只是用了一星期,所以長度方面就未有明顯嘅增長。不過整體上效果都不錯,摸上手感覺頭髮輕盈左及順滑左,梳起來的時間打結的情況改善了,髮絲亦明顯整齊左呀!

如果有興想知道更多Mane'n Tail,可以瀏覽佢地網址:http://www.manentail.hk/ 或者Mane'n Tail facebook專頁:www.facebook.com/manentail

*♡♡小肥豬♡♡* | 28th Aug 2013 | 好友與我 | (73 Reads)
23 AUGUST 2013(FRI)

今日我又拋父棄子去,因為CARMEN約左我食生日飯呀!

今次都仍然係又係要CARMEN就我,要佢放工之後過嚟觀塘食,所以我地去左APM間COCO壹番屋食咖哩食呀~


其實依間都開左好耐,聽朋友介紹過啲咖哩都好好食,所以之前幾次行過都好想入去試吓。不過次次都係帶住小小豬,一次都冇試過,終於今次有得試啦!

原本打算我早少少落去搵位,咁CARMEN嚟到就可以有位座。點知原來今日撞正APM有夜書展,所以多左好多人要等位呀~

最後我地都要等左大半個鐘先有位呀~

經CARMEN介紹,我就ORDER左咖哩吉列豬扒奄列飯,我地仲加左$18要左個餐湯同飲品呀~

咖哩汁個辣度係可以揀,唔食得辣嘅我當然係食唔辣啦!真係冇介紹錯,豬扒炸得好鬆軟,奄列蛋又夠滑,總之就真係好好味啦~

食左一個豐富嘅晚餐之後,就到甜品時間,去食我地嘅至愛哈根大師啦!話事話,依家真係冇乜可以堂食HäagenDazs嘅地方,好多都變左做外賣位,所以真係少左啲可以舒服嘆雪糕地方啦~


CARMEN仲送左好大份嘅生日禮物俾我同小小豬添!

小小豬依份真係好合用,因為姑娘話小小豬要玩多啲泥膠訓練多啲手力,加上又有MICKEY工具,真係啱晒呀~


我份生日禮物,可以用個驚喜嚟形容,因為係我想買好耐嘅即影即有嚟呀~

之前都係因為小小豬唔可以用到即影即有(因為小小豬都仲未可以好乖乖擺POSE影,怕佢浪費相紙嘛),雖然依家小小豬都開始定,不過我都打算訓練多幾個月,先買嚟同佢玩,依家收到依份咁正嘅禮物,我仲唔係超越興奮!

今日開開心心傾左一晚,真係有少少RE-CALL返中學時代嘅生活,其實都有少少想見吓中學啲同學仔,唔知知有冇機會可以攬一次大型啲嘅中學聚會呢?不過又怕到時冇乜話題,所以都應用係只有空想啦...哈哈哈!

最後,再一次多謝CARMEN請我食生日飯同送咁豐富禮物俾我同小小豬呀!


*♡♡小肥豬♡♡* | 27th Aug 2013 | 小小豬篇, 博客分享 | (19 Reads)
22 AUGUST 2013(THU)

今日真係好開心,因為我地三口子齊齊去參加IKEA 2014年新品預覽會~


大肥豬一直都係IKEA嘅忠實FANS,一有時間就會提議帶我同小小豬去MEGA BOX行IKEA,屋企好多大大少少嘅傢俱都係IKEA買。所以當收到PR姐姐邀請時,大肥豬都不知幾興奮。

係未正式開始介紹2014年新品傢俱前,大會先安排我地享用一頓豐富嘅晚餐,大部分菜式都係剛剛或者準備推出,所以我地可以話係先食為快呀!我地一邊食仲有IKEA其中一位主廚ALBERT向我地介绍每個菜式嘅特點呀!

有汽蘋果及啤梨果汁,味道唔錯呀~


肉丸可以話係IKEA嘅主打,加上芝士及酸瓜,變成一個迷你肉丸漢堡飽,食出另一種味道呀~


睇吓小小豬個為食樣就知幾好味啦~


去左咁多次IKEA食嘢,都唔知原來每一間IKEA餐廳都有口水肩提供。雖然係免費,不過個質地都真係唔錯呀~


香草煙三文魚,與之前所推出嘅唔同,加多左沙律菜做伴碟,即刻健康左好多呀~

新推出嘅蘑菇湯,係用新鮮蘑菇打碎做成,所以啖啖都係磨菇粒,好香口呀~


雞肉忌廉汁蕃茄菠菜麵,啲麵同出面食嘅有少少唔同,好彈牙呀~


三文魚菠菜千層麵,一向我地唔太好食千層麵,感覺會好"漏",不過依款又幾易入口哦~


新出嘅無骨版豬手,好味之餘,仲食得可以更方便呀~


燒羊架,味道唔錯呀~


不過各位小朋友都係對個伴碟薯蓉鐘情啲,睇吓為食小小豬又嚟啦~


一向IKEA CAFE都比較少推出蔬菜,依家開始都會推出一啲合時蔬菜,等我地食得更健康呀~

除左早前嘅有汽果汁之外,PR姐姐仲為我地嘅小朋友準備左有機紅果子汁同接骨木花果汁~


小小豬就揀左紅果子汁,我都有試到,味道真係幾合小朋友飲,因為唔係好甜,而且細細包,唔洗一次過飲咁多嘛~


最後就係甜品時間,紅果子芝士餅~


熱愛唱生日歌嘅小小豬一見到個蛋糕,又嚟自動開SHOW啦~


食飽飽就係時間去參觀啦~


由於主題係『活出趣味親子空間』,所以所有佈置擺設都係以小朋友為主。

先睇吓個客廳,主打就係依張梳化,低座椅及加深座位就可以俾小朋友輕易爬上梳化,啱晒親子時候呀~


角几可以因應小朋友嘅使用,四腳可以加高呀~


我自己就比較鐘意依個茶几,可以將啲雜物好有系統咁整齊排好,用嘅時候會更加方便呢~

小小豬又嚟攪攪陣啦~


一個小朋友最鐘意嘅地方,可以I俾佢地作角色扮演之外,亦學習照顧其他小朋友呀~

這個新推出嘅兒童攤位,讓小朋友扮演購物,真係幾好玩呀~


新推出嘅餐具有防滑底部及可防止食物溢出的設計,可以好好訓練小朋友自己進食呀~

另一個我比較鐘意嘅,就係依啲門掛架。設計都色彩之餘仲非常安全,加上係黏貼的,貼係任何地方都可以,方便小朋友拎嘢之外,大人亦很合用呀~


新出嘅書檯係可以較高矮嘅檯,可以因應小朋友成長嚟調教高度,咁就可以用耐啲,環保得嚟我地又可以慳啲啲嘛~

一張好特別嘅兒童床,其實係同一張床架嚟,將床上下倒轉擺放,就可以由矮床變成高床,等唔同階段小朋友用呀~


雙面設計嘅 被套枕袋裝,所用嘅質料係柔軟嘅棉,唔會刺激小朋友肌膚又可以等小朋友經常有新鮮感~

成日聽到佢地嘅創新低價,其實係咩嚟呢~

其實係佢地研究點樣節省成本,好似床單咁,更改個由大變細包裝,就可以令運輸成本減低,減低左個成本,就可以平價賣俾我地,成為左個創新低價啦~

除左傢俱外,IKEA都有推出一些文具讓小朋友使用,新出嘅水彩筆十分安全,除左可以用手清洗同埋筆頭會防乾之外,最緊要顏料非常安全,就算小朋友不小心將顏料畫入口,亦都唔會有問題呀!PR 姐姐仲即場為我地作出示範添~

IKEA仲推出左一個IKEA app,只要利用Catalogue ,就可以開啟傢俱嘅3D模擬影像,咁就可以知道件傢俱同屋企係唔係合襯啦~


今日活動真係豐富,除左有得玩同食左個好好味晚餐之後,仲收到一份好特別禮物,就係宜家家居團隊為我地每位BLOGGRT設計嘅小屋,每間設計都係因應BLOGGER嘅特色嚟設計,獨一無二呀~


其實仲有好多新產品,所以如果大家有興趣,就去IKEA網址睇吓啦:WWW.IKEA.COM.HK

*♡♡小肥豬♡♡* | 26th Aug 2013 | 生活點滴 | (45 Reads)
26 AUGUST 2013(MON)

終於嚟到八月另一個我期待嘅日子,咪就係我生日啦!(哈哈哈...其實生日即係又老一歲,都唔應該期待,不過亦都因為係我生日,又可以搵個藉口去玩嘛!)

今個生日雖然過得簡單,又冇生日蛋糕切,不過就非常充實又開心!

去影樓影相~

一家人去海灘玩~


食左一個豐富晚餐,仲收到爸爸同媽咪嘅大利是添~

平淡是福,不過一家人陪我一齊慶祝又玩左成日,依個生日我真係過得好開心呀!

希望之後每一個生日,都可以一家人開開心心咁同我一齊玩去慶祝,咁我就滿足啦!

哈哈哈...其實今日真係影左好多相,等我整理吓先,慢慢再同大家分享啦!

*♡♡小肥豬♡♡* | 25th Aug 2013 | 小小豬篇 | (52 Reads)
20 AUGUST 2013(TUE)

仲有一個星期多啲啲,就到九月,亦都係另一個新挑戰嘅開始,因為小小豬會開始返K1啦!

就嚟返學,當然要買啲新用品啦!

買齊晒啲教科書,係我印象中都只有中學先要自己出去買書,但原來依間新學校都係要自己去書店買書呀!我嘅下一個工作就係包書,真係好耐都冇試過包書啦,突然間好似自己回到中學時代添~

LULU妹送嘅開學孖寶,等近期小小豬至愛大眼陪佢返學呀~


當然唔少得新鞋仔啦~

雖然話小小豬都曾經經歷過一年PN生涯,不過K1佢就轉左間新學校,一切都係要重新開始過,尤其係小小豬都算係一個勁慢熱嘅小朋友,加上上課語言又唔同左,課室內嘅同學仔又會多左,所以面對一個新環境,恐怕又要重新新適應過。

希望小小豬快啲啲可做適應,順順利利咁開學,每日都開開心心返學啦!

*♡♡小肥豬♡♡* | 24th Aug 2013 | 小小豬篇 | (15 Reads)
20 AUGUST 2013(TUE)

今日下午我地陪完小豬媽去睇中醫之後,食完個下午茶出嚟,見到對面某銀行門口有一隻麥兜公仔企左係度,一向貪玩嘅我地當然即刻走埋去八卦一吓啦!其實我地都唔係想知佢做啲乜宣傳,只係想知道可唔可以同麥兜影相。

哈哈哈....原來係可以影,當然即刻影影影啦~


原本影完幾張就打算走,不過小小豬完全唔捨得麥兜,不停話想同豬豬影。見佢咁難分難捨樣,加上又冇其他途人係度影,所以我地就行返轉頭,等小小豬同麥兜影吓啦~


小小豬都不知幾肉緊,仲差啲推跌麥兜添!我地平時都冇乜係小小豬面前提起過麥兜,又估佢唔到咁鐘意麥兜哦!

不過,我相信都係因為小小豬入迪迪尼見得公仔多,所以佢一見到差唔多嘅公仔,就識得走埋去影相啦!

哈哈哈...唔知下次有冇機會見吓其他公仔呢?

*♡♡小肥豬♡♡* | 23rd Aug 2013 | 小小豬篇 | (18 Reads)
19 AUGUST 2013(MON)

話說有一晚我約左好友食生日飯,留左佢地兩父子係屋企博鬥。

據大肥豬講,嗰日小小豬係窗望到樓下有好多人排隊,所以佢地又落去八卦埋一份。原來嗰日屋苑樓下有得影証件相,九蚊影一打相,大肥豬話見留係屋企又冇嘢做,加上見樓下又有好多小朋友排隊影相,所以就同小小豬排隊影埋一份,等小小豬練習一吓排隊之餘,又可以同小朋友玩吓啦!

聽大肥豬講,係影嘅過程三分鐘都冇,加上又係隨意咁去影(相信都係冇著靚仔啲啦),所以對依啲証件相我都冇期望。

終於等到今日可以去拎相,點知一睇,真係有少少驚喜,小小豬影得又唔錯哦~

只係三分鐘時間,就影到小小豬咁正經醒目,又肯望鏡頭,好利害呀!不過,其實我有少少疑問,張相有冇執過呢?因為真係得小小豬特別靚仔呀....哈哈哈~


專業即係專業,都唔知點解之前係屋企同小小豬影成個鐘都冇乜啱用,三分鐘就可以咁好。最衰校服未有得拎,如果嗰日著埋校服影,咁就真係FIT晒,到時唔洗要煩過啦!

不過話時話,唔知點解訂左套校服要成八月二十八日先可以返去拎,拎完校服過幾日就要返學,都真係幾急,唔知洗唔洗得切添呀!

*♡♡小肥豬♡♡* | 22nd Aug 2013 | 小小豬篇, 博客分享 | (19 Reads)
17 AUGUST 2013(SAT)

今日我地三口子去參加左一個好特別嘅節目,就係去美食博覽會參加2013 Q嘜親子廚神大賽決賽啦!

小小豬都未夠年齡參加,所以我地唔係去比賽。好榮幸得到PR姐姐邀請成為BLOGGERS評判團之一,負責選出最合拍親子組合呀~


哈哈哈...咁大個女都係第一次做評判,所以都有少少緊張添~


乖乖的小小豬同大肥豬坐係後排,一齊欣賞比賽~

活動開始時,大會先播放準決賽的片段~


十強隊伍在台上準備製作Q嘜CUPCAKE~

「Q嘜烹飪大使」果醬女王Bonnie同大家傾吓入廚心得~


比賽開始啦,各位大小朋友都好努力為自己的CUPCAKE做好靚靚裝飾呀~


其實每隊嘅作品都好可愛,相信評審都會好傷腦筋呀~

大會評審俾分中~


比賽完成晒,係時間頒獎啦!

『網上最受歡迎親子美食照』得獎隊伍~

『最合拍親子組合』得獎者都係我心水之選嚟呀~


『最佳賣相獎』~

2013 Q嘜親子廚神出爐啦~


恭喜所有得獎嘅家庭,不過其他其實參加者都已經係好叻,因為要在短短十五分鐘時間為「Q嘜Cupcake」裝飾及伴碟,需要好好的創意之外,亦係講求親子之間合作,所以就算得唔獎,那份親子感情可以話更深厚了!

最後嚟張大合照,整個活動就完結了~


活動過後,小小豬又上台攪攪陣,仲扮參加者想比賽添~


哈哈哈...出年啦,到時小小豬夠四歲,我地就可以參加,希望有機會再上依個台,到時就係我地比賽啦!

香港Q嘜會間唔中舉行啲活動或者比賽,想了解多啲,可以去以下網址:www.industryhk.org 或者去FACEBOOK專頁 www.facebook.com/qmarkhongkong



*♡♡小肥豬♡♡* | 21st Aug 2013 | 小小豬篇 | (20 Reads)
13 AUGUST 2013(TUE)

哈哈哈...我都話我地八月多生日蛋糕切啦,繼前幾日小小豬生日之後,今日就到小豬爸生日,所以又有機會切蛋糕,俾小小豬開心吓啦~


其實一向小豬爸都係做農曆生日,嗰日會約埋親友一齊去酒樓開開心心咁食餐晚飯慶祝。不過當知道小小豬極度熱愛唱生日歌同吹蠟燭嘅時候,每當有喜慶節日,我地都會買個小蛋糕返屋企慶祝,最主要目的當然係等小小豬開心啦!

睇吓小小豬見到個蛋糕幾開心~


極度興奮地唱生日歌,逗得小豬爸幾開心,真係好少見小豬爸笑到見牙唔見眼呀~


依隻擦鞋豬永遠同小豬爸小豬媽影相都係笑得咁燦爛,睇吓佢地幾SWEET~


又霸左個主角位嚟吹蠟燭~


小豬爸冧到暈左啦...哈哈哈~



冧完小豬爸又點少得小小豬至愛嘅小豬媽呢~


真係只有小小豬先可以逗到小豬爸同小豬媽咁開心,睇佢地嘅笑容就知佢地都係一樣勁愛小小豬啦!

依個小小豬就嚟冧暈左佢地啦!唔知幾時先可以到我呢....真係有少少妒意添.....哈哈哈!

*♡♡小肥豬♡♡* | 20th Aug 2013 | 小小豬篇 | (14 Reads)
12 AUGUST 2013(MON)

哈哈哈...一個好有自信嘅側面,係唔係成個運動健將咁呢~


小小豬自上次用左LULU套羽毛球拍試玩之後,我地一直都好想買套BB SIZE嘅俾佢,不過搵左好耐都係搵唔到,終於上星期LULU妹係一間報紙店舖見到,所以就買左俾小小豬啦~


就係我地勁想搵嘅時候,搵左好耐先買到。不過,一當知道LUUL妹買左之後,唔同種類嘅BB SIZE羽毛球拍就成日係我地面前出現,真係激C人啦!世事就係咁啦,當你想搵就一定搵唔到,反而當係擁有時,就會成日係你面前出現啦!

好啦!講返正題先,買左套羽毛球拍都冇玩過,見今日個天氣都幾好,加上屋企樓下又裝修嘈到都小小豬都唔可以午睡,所以就帶小小豬落樓下公園空地玩吓羽毛球,順便放放電啦!

有屬於自己嘅羽毛球拍真係唔同啲,玩特別出力,仲識得開波呀~


幾有自信嘅表情~


個傻仔玩玩吓都掛住小豬媽,話要打電話俾小豬媽呀~

暫時睇小小豬都真係幾鐘意打羽毛球,等我地多啲同佢玩,睇吓佢係唔係三分鐘熱度先。如果真係鐘意,都可以發掘一吓小小豬依方面嘅興趣,加以培養,話唔埋NNNNN年之後,小小豬真係會成為羽毛球健將呀!(哈哈哈...又有個MaMi發夢中)


*♡♡小肥豬♡♡* | 19th Aug 2013 | 博客分享 | (28 Reads)
12 AUGUST 2013(MON)

早排收到PR姐姐送嚟嘅一份好貼心嘅試用禮物,來自韓國YEJIMIIN嘅女性衛生用品啦~

坦白講,之前真係對YEJIMIIN完全沒有認識,所以當得到PR姐姐邀請後,我都上網做功課,睇吓有關依個品牌嘅介紹。

YEJIMIIN禮知美人於2002年成立,係韓國 No.1漢方衛生巾用品品牌。最特別係產品中含有五種優質韓國藥材成分的漢方衛生巾,包括有艾草、魚腥草、益母草、薄荷、當歸。100%韓國藥材,98%有效舒緩經痛、除去異味!

好多人都話生完小朋友之後,經痛嘅情況就係減少。好不幸地,我都應該係少數分子,因為我生完小小豬之後,經痛情況都沒有減少到,所以當知道依個產品可以改善經痛問題,我都好期望試用呢!

經典淡香護【純棉】~


觸感非常綿細,感覺非常精緻,用起黎非常舒服,乾爽透氣的感覺, 透氣度是如此地完美。由於是純棉面層,唔會令敏感地方因為磨擦而有不適感,所以絕對適合每天使用。另外,貼力非常好,基本上都唔會走位,完全放心使用呀!

經典淡香日用型【絲綢】~

我之前都曾經用過其他品牌嘅網面衛生用品,但大多數都會因邊位太硬了,會令皮膚痕癢敏感。用此產品時,令我最驚喜是,我完全沒有拮肉的感覺,使用時都好舒服。一打開包裝袋就聞到淡淡的藥材味道,應該是草本植物的氣味。由於絲綢網面是採用柔軟的表層織法,所以吸收力都很好,可以做到瞬速吸收,此外使用時亦能保持清爽。

經典淡香日用型【純棉】~


經典淡香特長夜用型【純棉】~

可能我一向都比較喜歡用棉質的衛生用品,所以對純棉的日用裝及夜用裝都非常喜愛。兩款同樣採用特殊極細絲技術,所以特別平滑同時亦不會感到焗促,所以用起上嚟都好舒服。以花型導流層壓邊設計,全方位防漏。整體上吸收力很強,最重要的是護翼貼得很實,不會因活動而導致扭曲變形,及溢到邊位。

夜用裝特有40CM長,完全感受到那份安全感,可以安心入睡,不用擔心起床時令床單污濁呀!

艾草熱薰暖墊~

這產品就另我最驚及期待,因為是全球首創用艾草和漢方的熱熏暖敷墊,在和暖溫度加上漢方草本配方,可以幫助女生們有效抑菌殺菌及舒緩調理經痛問題減輕痛經等症狀,特別適合於對一般衛生用品容易敏感及產後的女性使用~

用法簡單,只需取出熱熏暖敷搖晃5-10秒後就會發熱,然後把它貼於護墊的下方,再將護墊貼於內補底側就可以了~



哈哈哈...主要就係靠依一包熱熏暖敷墊,覺得真的很似暖包呀~

介紹話係月事前三日或後兩日使用,我覺得都好特別,那種熱都不尚太利害,不是冬天用那些暖包咁,只是微微的熱量,所以都不會感到不適,感覺都覺得幾舒服哦!

整體上,以上產品我都覺得好合用,透氣絕對不錯,用後一點都不會焗而且非常透氣。防漏方面亦很全面,可以令我地安全感。最特別就係那陣淡淡的中藥味,有效掩蓋生理期時產生的氣味,所以除去異味功效真係要俾個LIKE呀!

其實YEJIMIIN仲推出左其他衛生用品,如果大家有興趣知多啲,可以瀏覽Yejimiin嘅Facebook專頁呀:https://www.facebook.com/YejimiinHK

YEJIMIIN已經正式進入香港巿場,由韓國直接入口,大家可以去以下經銷商買到呀!Yejimiin 悅姿然 購買地點:

紫語﹣銅鑼灣店 - 東角LAFORET
地址 : 銅鑼灣東角道24-26東角LAFORET 2/F, 231舖

紫語﹣旺角總店 - 信和
地址 : 九龍旺角彌敦道582-592信和中心705室

紫語﹣旺角分店 - 新之城
地址 : 旺角彌敦道 688 號新之城 3 樓 330 舖

貝詩美化妝品
新界 葵涌 大連排道 42–46 號 貴盛工業大廈二期1 樓 H38 室

MAKE UP HOUSE
香港中環機利文街 48-50號德享大廈1樓

千色 CITISTORE 荃灣店
新界荃灣地段301號荃灣城市中心II期

千色 CITISTORE 將軍澳店
九龍將軍澳新都城中心商場II期2樓

千色 CITISTORE 元朗店
新界元朗地段464號教育路1號千色廣場3樓及4樓

千色 CITISTORE 大角咀店
九龍大角咀福利街8號港灣豪庭廣場地下及1樓

千色 CITISTORE 馬鞍山店
新界沙田馬鞍山鞍祿街18號新港城中心3樓

千色 CITISTORE 屯門店
新界屯門時代廣場北翼3樓

Online Shop:http://www.blossome.com.hk/

*♡♡小肥豬♡♡* | 18th Aug 2013 | 小小豬篇, 博客分享 | (15 Reads)
11 AUGUST 2013(SUN)

早係小小豬生日前,我幫佢收左一份好大嘅禮物,係一個好豐富嘅上學用品呀~


其實依啲都係PR姐姐嘅安排,因為玩具“反”斗城舉辦左「校園萬歲」上學用品試用活動,邀請小小豬試用嘅產品嚟。PR姐姐仲好貼心,知道小小豬生日將至,所以就提早SEND依啲產品俾小小豬,等小小豬可以係生日前一日收到,真係好多謝PR姐姐嘅邀請同埋佢嘅細心安排呀!

可能係PR姐姐知小小豬近期至愛大眼,所以送左兩件用具都係怪獸公司嚟呀!

怪獸大學卡套~


一見到大眼就已經愛不釋手,即刻拎嚟睇呀~


個卡套設計都好好,一邊可以擺放八達通,另一邊就係一個小拉鏈位,可以用嚟放少許錢幣,返學同去街用都好方便呀~

小小豬話要戴住去街街搭車"啫"車費呀~

怪獸大學文件袋~


雙拉鏈位可以將唔同大少嘅通告及工作紙分開擺放,都好方便哦~

哈哈哈...小小豬專心練習開拉鏈,等返學時就可以自己放通告落個文件袋啦~

Crayola 色雙頭水筆~


相信唔洗我介紹,好多朋友仔都有用緊依個牌子,我自己都有買依個牌子嘅蝋筆同水彩俾小小豬用。當然係最大原因係依個牌子係WASHABLE,就係畫到手仔同枱面都好污濁時,一洗就即刻甩,完全係方便又安全呀!

雙頭水筆我都係第一次用,依SET筆有一個好處,一筆兩用,可以有唔同效果嘅色系,可以多啲顏色俾小朋友選擇呀~


筆頭大小適中~


小小豬一見到顏色就要開始畫啦~


好專心哦~


筆蓋都唔算好難開,小小豬都可以自己打開同自己蓋返好呀~


畫圖畫係一個好好嘅親子活動嚟,睇吓佢地兩父子幾投入~


Planes筆袋~


筆袋個容量都好大,可以放好多文具。不過小小豬暫時唔需要用其他文具,所以就用嚟放Crayola水筆啦~

最後一件試用產品,亦都係我覺得最好玩嘅,就係  Leap Reader點讀寫字筆套裝~


點讀寫電子筆套裝其實係一個多元既英文電子學習工具,利用電子筆同圖書套裝既應用,希望小朋友可以無論係聆聽、閱讀同書寫方面都有進步。配合唔同故事既形式,加上可以俾小朋友同家長互動地參與既元素則令到英語學習更加富有趣味,從小培養番學習既興趣~


套裝入面嘅配件都好齊全呀~

小小豬一見到個新玩具幾興奮~


主要都係利用支電子點讀筆同圖書進行活動,依本圖書都係範本,當中有好多唔同故事同,唔同種類嘅題材,等小朋友有初步嘅認識~


小小豬開始試玩啦!其實依一SET教材主要係俾四歲以上小朋友,所以有部分教材對小小豬都會比較深。不過勝在有唔同迪士尼卡通配合支點讀筆,所以都可以引起小小豬學習興趣,仲玩得好興奮仲好投入呀~



除左可以點讀文章之外,電子筆仲可以教小朋友學寫字呀!雖然小小豬未需要學寫字,不過可以利用依支筆筆,俾啲簡單嘅線條等佢多開始對寫字,加多少少書寫興趣先~

PR姐姐仲送多一套練習俾我地,不過暫時就未適合小小豬用,為免浪費所以我好好收藏先,等小小豬再叻仔啲時,慢慢咁拎出嚟俾小小豬深化依套教材啦~

其實Leappad LeapReader 點讀寫電子筆仲因應小朋友唔同嘅學習需要,利用好多不同嘅迪士尼人物,出左好多唔同種類嘅電子書,如果大家想知多啲Leappad LeapReader嘅詳細資料,可以瀏覽以下網址:http://www.leapfrog.com/en/landingpages/leapreader.html

依家係 玩具“反”斗城購買 LeapReader 點讀寫電子筆套裝,即可以優惠價港幣 $100 換購 LeapReader 電子書一部 (原價︰$179.9),讓小朋友透過有趣的電子系統學習,全面點讀出趣味!

「校園萬歲」嘅產品又點止依幾樣咁少呢?玩具“反”斗城特於即日起至9月2日期間推出「校園萬歲」活動,搜羅一系列最新最型的開學產品,包括書包、背包、文具以至電子學習工具均一應俱全,一定令小朋友愛不釋手,為新學年的校園生活增添無限趣味。詳情可以瀏覽 www.toysrus.com.hk 或者去Facebook 專頁 http://www.facebook.com/toysrushongkong

*♡♡小肥豬♡♡* | 17th Aug 2013 | 小小豬篇 | (21 Reads)
11 AUGUST 2013(SUN)

依兩日太陽伯伯真係好勤力,真係可以話係超量工作,所以真係熱到冇朋友。天氣咁好,當然要搵啲好好嘅消暑活動,係依個時間最好不過就係去游水,浸係啲水入面,會舒服好多呢,所以我地今日就去左佐敦谷嬉水池游水啦!

可能已經今個暑假第三次去游水,所以小小豬完全適應個環境,完全唔洗WARM-UP就已經即刻落水玩。今日小小豬仲好叻,已經可以自己係游泳池入面行嚟行去,去玩滑梯又完全唔洗我地扶住,真係一個好大嘅進步,相信下次開始可以唔只係嬉水池玩,可以嘗試過大人池試吓啦!

今日我覺得小小豬做得最乖就係懂得自律,今日小朋友都算多,小小豬每一次玩滑梯時都會自動自覺去排排隊,仲等前面小朋友"SIR"完之後,離開左滑梯先"SIR"落嚟,真係一個大個仔嘅表現。睇見小小豬咁乖仔,都有少少安慰添。

我都知道公眾泳池係唔可以影相,不過上兩次睇見小小豬玩得咁開心,我實在忍唔住,一個為左個仔乜都敢嘅我,今日就帶左大肥豬部壊壞地嘅影相手機,諗住偷偷地影低小小豬個開心樣啦!

哈哈哈.....其實影嘅時間都真係幾驚,好驚俾救生員哥哥話,所以我都係等臨收場冇咁多人嘅時候,先快快手手影幾張。

雖然係急急影,估唔到又影得幾全神哦~

我都知唔應該偷影,但我實在真係忍唔住,好想影低小小豬個開心玩水樣,加上我都係影返自己仔仔,所以相信大家係唔會怪我呀!

不過,我都好自律,偷影一次就夠,應承大家下次唔會再影啦!

*♡♡小肥豬♡♡* | 16th Aug 2013 | 小小豬篇 | (14 Reads)
11 AUGUST 2013(SUN)

話說係小小豬大約八個月嘅時候,我地有一日係屋企冇乜嘢做,就同小小豬簡簡單單咁影左一輯都幾滿意嘅HOME STUDIO。不過之後都冇機會再影,因為我都已經成日拎住部相機影住小小豬嘛!

不過見尋生日會嗰波波花都冇乜點影相,我地三口子套大眼親子裝又影得唔多靚相,所以大肥豬就建議操刀,幫我地影輯HOME STUDIO啦!

先嚟我地兩母子溫馨一吓先~


依張好鐘意呀,好有自信(樣)嘅小小豬呀~

到小小豬個人SOLO~


古靈精怪嘅小小豬呀~


最後,當然唔少得我地三口子啦!

上次我同小小豬SET自拍影都可以影到啲靚相,所以今日又再試過,希望可以影到啲靚靚嘅三口子。

影嘅時候我都期望唔高,但求有一兩張影得靚我就已然心滿意足。點知睇返啲相,估唔到效果都好好,仲有啲驚喜,小小豬真係非常合作,有好幾張我都好鐘意呀~


雖然都唔係啲咩專業相,不過依一輯相我都好鐘意,間唔中係屋企SET吓機嚟影相,又真係幾好玩,影得我地又幾溫馨,所以真係要多啲叫大肥豬同我地影多啲HOME STUDIO先得呀!

*♡♡小肥豬♡♡* | 15th Aug 2013 | 小小豬篇, 靚太廚房 | (119 Reads)
10 AUGUST 2013(SAT)

終於到左小小豬三歲生日嘅日子,今年都打算只係一家人簡簡單單係屋企開個小PARTY,一齊開心玩一晚啦~


話晒都係一個小生日會,雖然我都冇乜預備做佈置,不過大肥豬就為小小豬準備左一個好靚靚嘅汽球花花,小小豬都一見到個花花,都不知幾開心呀~


今日除左我地一家開生日會之外,仲邀請左芯芯表表姐(我表弟個女...簡稱表表姐)一齊玩呀~


原本我都好想同小小豬係花花度影相,不過我實在太多嘢整,躲埋係廚房努力工作,所以.....影唔到呀!

經過我一輪努力,我地個生日大食會開始啦!

光波BB乳鴿~

光波炸BB乳鴿~

光波蒜蓉芝士生蠔~

光波蒜香金沙骨~

鹵水雞翼~

肉醬意粉~

蒜蓉西蘭花~

鮮什果沙津(依個真係切粒粒切到我傻左呀)~

生日就一定唔少得生日蛋糕,今年依個生日係嘉汶表妹專登訂,個圖仲係嘉汶表妹搵嘅,用左小小豬嘅新寵- 大眼呀!個蛋糕真係好靚,唔好話小小豬,我地在場每個人都好鐘意,個大眼真係好似,做得好靚呀!除左靚之外,個蛋糕都唔係好甜,味道仲唔錯呀~


小小豬見到個蛋糕真係好開心,仲急不及待要偷食呀~


就係因為大眼蛋糕關係,我地三口子齊齊變身做大眼呀~


唱生日歌啦~


嚟張大合照先~


所以八月壽星一齊切蛋糕(原來我地屋企真係幾多人八月生日哦)~


小小豬唔捨得切個大眼蛋糕呀~


玩左咁耐,終於可以開餐啦~


食飽飽之後就同小豬媽玩波波~


甜品時間...士多啤梨雪葩~


話晒都係小小豬生日,所以我整左一杯細細嘅,等佢自己食開心吓~


今日小小豬都收到好多禮物呀!

多謝小豬爸同小豬媽嘅生日大利是~

嘉汶表妹除左送個靚靚蛋糕之外,仲送多一份好玩玩具,啱晒依期鐘意玩彈波波嘅仔仔呀~

LuLu妹知道小小豬鐘意小豬爸車,所以專登搵部Mini版送俾小小豬,等佢可以成日見到小豬爸部車呀~

仲有芯芯表表姊送嘅靚衫~


整體上今日小小豬三歲生日會都係玩得開心,不過要自己煮咁多嘢就比較辛苦少少,好在有小豬媽同LULU妹幫我手煮同洗,所以都OK啦!我覺得只要係一家人開開心心食飯,辛苦少少都係值得,更何妨係為小小豬做生日,我當然係非常樂意啦!

不過,今日都有少少美中不足,就係同個大眼蛋糕影得唔夠多相,小小豬都好似冇乜點一個人影,真係覺得有少少浪費左個靚蛋糕添(好在雖然係影得少,不過都算影得幾好)!希望下次再有機會可以訂到依啲靚靚蛋糕,到時一定會大影特影呀!

*♡♡小肥豬♡♡* | 14th Aug 2013 | 靚太廚房 | (352 Reads)
8 AUGUST 2013(THU)

終於嚟到光波三部曲嘅最後一激,就係光波多春魚~


其實想整光波多春魚好耐,不過係街市凍肉鋪見到都好似唔係咁新鮮,唔係咁靚嘅多春魚我又唔想買嚟整,所以一直都只係得個想字。

不過今日小豬媽去吉吉島買生蠔時,見到個樣都好似幾靚嘅多春魚,所以就可以整啦~


先落啲胡椒粉同海鹽調味先~


因為我怕啲多春魚會爆肚同會痴住個架,所以就先係多春魚上一層炸粉~


高架250度預熱10分鐘,之後光5分鐘就完成啦~

脆卜卜多春魚,個肚完全冇爆開,就連魚頭都脆脆地,真係勁好食,勁香口呀!

*♡♡小肥豬♡♡* | 13th Aug 2013 | 靚太廚房 | (1506 Reads)
8 AUGUST 2013(THU)

今晚光波三部曲之第二激,咪就係光波南乳吊燒雞~

其實依個餸材料都唔算多,不過係需要花少少時間係醃嘅過程,因為醃夠味先好食呀~

將南乳一磚、乾蔥蓉、蒜蓉、薑蓉、鹽、玫瑰露酒混好~

之後幫雞做吓按摩,搽滿啲醬在雞上,之後醃兩小時或以上~

醃完後,燒熱一鍋水,汆水10秒 (只需表皮收緊即可),之後要風乾~

用低架,預熱光波爐200度3分鐘,之後用220度光15分鐘~

反轉之後再光多10分鐘~

等涼左之後,切開就可以開餐啦~

整體上我覺得味道都算OK,可能係我醃嘅時間唔夠耐,所以就唔係太重南乳味。不過咁都錯有錯著,因為我唔太喜歡南乳味,所以依個味就最啱我啦!

*♡♡小肥豬♡♡* | 12th Aug 2013 | 靚太廚房 | (1082 Reads)
8 AUGUST 2013(THU)

嘩...今晚好好餸,有好大隻生蠔,成隻手掌咁大,真係勁肥美又鮮甜,真係冇得頂呀~


事緣早幾日小豬媽係屋企冇嘢做,開左之後買光波機送嘅DVD食譜,就係咁佢就光波引起,買好晒啲材料,等我今日返嚟一齊整光波三部曲啦!

先介紹.....光波蒜蓉芝士焗生蠔,係唔係好吸引呢~

始終都係第一次整,所以原本打算用急凍生蠔,正當小豬媽去吉吉島買時,竟然冇晒啲急凍生蠔,不過小豬媽又勁想整,所以就貴貴地買左啲可以生食嘅肥美生蠔嚟整啦~


整光波蒜蓉芝士焗生蠔材料~


洗乾淨啲生蠔~

爆香蒜蓉加煮熟啲牛油整個汁先~

將牛油蒜蓉汁平均放係生蠔面~

將芝士碎鋪上生蠔上面~

再加入芝士粉~

先200度預熱光波爐,之後將生蠔200度焗五分鐘,可以視在乎芝士燶度多焗幾分鐘~


好美味嘅光波蒜蓉芝士焗生蠔出爐啦~


真係唔係自己讚自己,啲生蠔真係好好食,啖啖肉又勁香蒜蓉芝士味,好味都唔停得口呀!

Next