香港新浪網 MySinaBlog
*♡♡小肥豬♡♡* | 31st Jul 2013 | 小小豬篇, 博客分享 | (21 Reads)
28 JULY 2013(SUN)

首先要多謝芝士餅媽媽介紹,我先可以應麥當勞/麥當勞公關公司邀請出席今次依個開心樂園餐博客歡樂聚餐~

今次主要是介紹開心樂園餐之外,亦都係介紹由8月2日起將會推出一系列共12隻藍精靈2嘅公仔。由於主題係藍精靈,所以成個場都有好多藍精靈呀~


當然唔少得率先欣賞嘅12款公仔啦~


小小豬一見到啲公仔都不知幾開心,仲睇到唔捨得走呀~


係活動未開始之前,麥當勞公關公司先送上精美小禮物,就是藍精靈2 Floder同磁石~

之後就先安排我地每人一份開心樂園餐,等我地可以邊食邊等大會安排的精彩活動。

開心樂園餐為了配合小朋友成長需要,仲提供了粟米杯、優品豆漿、高鈣低脂牛奶、荳奶、橙汁、熱朱古力、利賓納等...健康食品。更為小朋友設計『1+2+3開心樂園餐』,將套餐分為主餐、配餐同飲品三部分,等小朋友容易明白均衡飲食嘅概念,方便小朋友自己點餐~

哈哈哈.....咁簡單,小小豬都識得自己ORDER啦~

另外,原來消費者每購物一份『開心樂園餐』,麥當勞都會會捐出1亳子給『麥當勞叔叔之家慈善基金』,真係用餐之餘又可做善事呀!

小小豬ORDER嘅開心樂園餐嚟啦~


好一個為食嘅小小豬~


正當我地享受開心樂園餐嘅時候,麥當勞叔叔出嚟同我地打招呼,我當然唔放過同佢合照啦~


活動開始時,先由大會主持哥哥先作出介紹,之後我地就移到另一邊場地,去同麥當勞叔叔玩遊戲啦~


麥當勞叔叔仲帶領我地一齊跳舞,雖然小小豬唔敢出去一齊跳舞,不過佢都好乖乖咁坐定定欣賞其他小朋友跳舞呀~


玩完遊戲,麥當勞叔叔仲大派禮物添~


麥當勞叔叔真係可以帶俾人好多歡樂,在場每位朋友都玩得十分開心(包括我地三口子),我地仲一齊影相添~


係活動上見到芝士餅,即刻要同佢影相張,因為佢實在太可愛啦!不過因為場地比較窄,所以帶唔到小小豬去一齊玩,希望下次有機會可以再一齊玩啦~


剛才麥當勞叔叔送嘅其中一份小禮物係個筆盒,小小豬見到就即刻以為係鋼琴,仲即刻拎嚟邊彈邊唱,真係勁好想像力呀~


另一個開心時刻到啦,當然就係收禮物時間,小小豬對啲禮物好有興趣~


之後麥當勞姐姐仲嚟教小小豬玩,依個小小豬都不知玩得幾開心,仲唔捨得俾返姐姐添~


最後嚟張大合照,今日依個開心活動就完結了~

開開心心又過左一個下午,仲收到好多禮物添

啲藍精靈真係好得意,想換就要快手啲啦!由8月2日起分階段隨開心樂園就會附送,或可任何套餐(早餐及開心樂園除外)加8元換購一隻。

8月2日起:反一反阿威、氹氹轉精靈爸爸、 吹BB大想頭

8月9日起:跳跳紮為食鬼、閃閃請盡仔

8月16日起:圓波波百厭仔、 眼睩睩智多星、香噴噴檀餅仔

8月23日起:變變變美芝、抱抱大嚿、扭扭霸王妹、叻叻發明家

***活動中所享用的食物及飲品,獲取的禮物及活動中的特別節目是由麥當勞/麥當勞公關公司應是次活動特別安排予參加者的

*♡♡小肥豬♡♡* | 30th Jul 2013 | 好友與我 | (67 Reads)
26 JULY 2013(FRI)

今晚我又留低佢地兩父子係屋企,一個人去街街,目的就係同我嘅好友CARMEN車人食生日飯啦!

講起依餐生日飯都真係唔好意思,原本CARMEN係月頭生日,但到月尾先可以同佢食生日飯,都真係唔係幾好。冇辦法啦....月頭CARMEN又已經有幾個定好左嘅約會,到月中我又有事唔得,所以要到今日先可以同佢慶祝呀!

因為我要等大肥豬放工返嚟睇住小小豬先可以出去,所以CARMEN就我,去比較近我嘅MEGA BOX。

就係咁,我地今日個慶祝晚餐就去左IKEA食啦!平時去IKEA都係食下午茶多,食晚餐都係第一次,所以第一次係IKEA食到成枱餸,好在滿足感呀~


我嘅主菜....羊鞍扒,我覺得又幾好食,可啲都唔"騷",不過就係難切啲~


CARMEN嘅主菜...牛柳~


每次嚟IKEA必食嘅~

因為馬肉風波,所以停左一段時間嘅肉丸回來了,不過因為係牛肉整,所以我冇得食,但依個係CARMEN至愛嚟,揀嚟IKEA食都係因為佢呀~

新出嘅芝士波都幾好食,不過原來個汁係好辣,我第一啖唔知點左好多汁,真係辣C我呀~


其實我地揀係MEGA BOX食,除左就我之外,另一個目的就係去影POOH POOH呀~


原本以為我地咁晏去影唔會太多人,點知原來都仍然有好多大朋友小朋友係度影緊。冇法啦...因為啲公仔實在太可愛啦~


其實九樓仲有一個Q版佈置,不過我地行去上去時就剛剛欄左冇得影~


唔緊要啦,下次有機會就帶埋小小豬嚟依度影過啦!

CARMEN又請我同小小豬食零食啦,真係啱晒我地兩隻為食豬呀....哈哈哈~


有得去街街,食好嘢又影靚相,真係開開心心又過左一個晚上!


*♡♡小肥豬♡♡* | 29th Jul 2013 | 小小豬篇, 靚太廚房 | (90 Reads)
25 JULY 2013(THU)

小小豬食緊乜嘢,食到CHOK晒樣,擺埋咁嘅POSE,真係電C人啦~


哈哈哈...咪就係我自家制嘅番石榴雪葩啦!其實之前我都已經跟肥媽整過一次番石榴雪葩,不過嗰一次我覺得係半失敗。雖然係做到雪葩個感覺,不過可能係加埋啲核一齊整,啲核又比較硬,所以食嘅時候會感覺到好多粒粒,唔可以好ENJOY咁食,所以就話下次整時,將啲蕃石榴去埋啲核,咁食起嚟個個口感會好啲,咁就應該會仲好呀!

等左咁耐,終於今日係生果店見到啲又香又靚嘅胭脂紅番石榴,所以即刻買嚟整啦~


啲番石榴真係好靚,香味就唔在講,最好就係好多肉呀~

先將啲蕃石榴去埋啲核~


先將蕃石榴放入雪櫃冰格雪半日~


用手動攪拌器打~

由於今次啲蕃石榴已經好甜,所以我只係加左少半碗砂糖~

再加半個檸檬揸汁~

打至漿糊狀後就可以放入盒~

哈哈哈...今次小小豬都有份幫手整,就係佢負責用匙羹舀落各小杯仔,真係好少見小小豬咁專心又認真嘅樣呀~



小小豬嘅工作完成啦~


放入雪櫃雪約兩小時,就可以食啦~


上幾次我整雪葩小小豬都食唔到(因為小小豬都係一隻早瞓豬嚟呀),不過今次見佢咁乖幫手,所以就早少少食,等佢都可以享受吓啦!

睇佢食得幾滋味~


仲好乖仔咁主動餵大肥豬食呀~


睇佢地兩婆孫係度談心幾SWEET SWEET~


可以小小豬知道自己有份整,所以真係食得特別開心又興奮呀~


今次依個蕃石榴雪葩可以話係完全成功,去埋啲核先整,口感加埋味道好味好多,真係唔知醜咁都要讚一吓自己呀!

*♡♡小肥豬♡♡* | 28th Jul 2013 | 靚太廚房 | (199 Reads)
25 JULY 2013(THU)

嘩哈哈..今日我個光波爐又再開啟動,整左一個又好睇又好食嘅光波BB乳鴿~


原本都冇打算整乳鴿,不過小豬爸拎左啲BB乳鴿返嚟,正當我地仲諗緊點整嘅時候,小豬爸就講:不如光左佢啦!就因為小豬爸,我又開工啦!

其實整就真係好簡單,不過我覺得成個過程最難嘅就係洗,因為我真係好怕尤其係洗內腔,所以依個重要任務就交俾LULU妹幫我洗啦!

洗完之後先吊起,等乾身少少先醃~

用叉燒醬及少許老抽抹勻,醃約三小時~

燒熱一鍋水,將乳鴿汆水10秒 (只需表皮收緊即可)~

用低架,預熱光波爐200度3分鐘,先光胸部10分鐘~

掃上蜜糖~


之後反轉再掃~

再光多5分鐘~


好靚嘅BB乳鴿出爐啦~

等涼左之後,切開四件,就可以開餐啦~


可能醃得夠味,加上啲BB乳鴿又好嫩,所以真係好好食,仲好香添!所好好快手就已經清晒,睇見大家食得咁開心,真係勁有滿足感呢!

*♡♡小肥豬♡♡* | 27th Jul 2013 | 博客分享 | (41 Reads)
24 JULY 2013(TUE)

首先多謝MY BB.COM嘅試用小隊,今次又被選中左參加試用The Original Dooky奇幻天幕~

雖然小小豬都將近三歲,不過我仍然都係會用BB車(當然近嘅地方我就唔會帶,等小小豬可以自己行多啲)。但當一去遠啲嘅地方,尤其係去去迪迪尼或者海洋公園依啲玩全日嘅地方,我就一定帶BB車,可以等小小豬攰時有得休息之外,我地大人都可以方便啲,唔洗成日抱住咁辛苦嘛!

主辦機構真係好貼心,為免我地唔識用,所以就安排左一個簡介會,等我地對The Original Dooky奇幻天幕有更深入了解,係用嘅時候就可以更加得心應手。所以係今日我就去左葵芳0/3 baby 的客戶服務出席依個簡介會啦~

Dooky 是荷蘭品牌,今次試用嘅The Original Dooky奇幻天幕,其實係台灣已經有售,台灣就叫魔法斗篷。就係因為係台灣大賣,所以就開始引入嚟香港啦!
其實個名叫奇幻天幕,聽嘅時候又真係要諗一諗係代表啲乜,就正因為要思考吓係表達啲乜,亦都因此而有TALKING-POINT啦!

因為佢地有兩場簡介會,今日係平日關係,所以都係得我同另一位BLOGGER媽媽參加。不過人少有人少嘅好,我地可以傾耐啲嘛!

好啦...簡介會開始啦~

先向我地介紹0/3 baby公司~



The Original Dooky奇幻天幕的特點:100% 純棉製造,採用先進的抗 UV 材質 (SPF40+),防曬、防風、防光線、防嗓音;使用簡單,能搭配所有的提籃與BB車;可任意調整斗篷長度;輕巧、方便攜帶。可機洗、容易清潔保養~



除左天幕之外,同系列仲出左披仔添~



負責簡介會嘅哥哥仲即場示範俾我地睇添~


聽完成個簡介會之後,真係好有興趣即刻用,所以就趁要落街去超市SHOPPING,先俾小小豬感受一吓先!

包裝內有一塊布和 5 個開口環,把扣環扣到布上的圈圈再扣到 BB 車蓋就可以了~


唔好睇啲環好似好簡單,其實開嘅時候係需要啲力,不過當你用最大力量打開時,都唔會好易"拍斷"呀~


哈哈哈...扣左上車仔,好襯色呀~


布上有兩條魔術貼,可隨需要而調節布幕的長度,遮擋光線(一個等待去街街嘅心急豬,所以完全冇表情)~

需要用嘅時候,可以用繩子是把布固定在 BB 車~



有天幕保護住,但又可以保持BB車內的空氣流通~


整體上我都覺得幾合用,尤其係佢個魔術貼功效,可以因應我地需要自由調教,真係即可以用嚟擋太陽同風,仲可以用嚟擋住啲冷氣,唔洗一出一入冷氣地方,冷氣照頭吹,好易冷親呀!哈哈哈.....嚟緊入迪迪尼玩就真係大派用場啦!(不過,依排天氣咁差,都唔知幾時先可以入迪迪尼啦!)

有關了解更多 Dooky產品,可瀏覽 http://www.xplorys.com/en/products/dooky

想知多啲最新0/3baby資訊,快啲LIKE佢地FACEBOOK專業啦:https://www.facebook.com/pages/03-baby-collection

*♡♡小肥豬♡♡* | 26th Jul 2013 | 小小豬篇 | (27 Reads)
23 JULY 2013(TUE)

嘩哈哈...估唔到小小豬幼稚園都未讀就已經跳級入大學讀書,今日仲係第一日開始返學添~


自上次我地俾健康院醫生評為言語較弱之後,我地係屋企都針對做左少少調節(已經唔用英文溝通),加上PN班主任老師協助下,其實小小豬言語方面都已經有很大進步,進步到開始識得駁咀添(當然...駁得都算係好輕微嗰隻)。

雖然係有進步,不過始終都好似比同齡嘅小朋友講嘅嘢都唔算多,所以就同小小豬報左一個言語社交小組暑期班課程俾小小豬,希望可以透過同姑娘及小朋友嘅互動,可以對小小豬言語及社交方面都可以有得著!

所以嚟緊四個星期,每逢星期二同四,我地都要嚟依度上堂啦~


依個小組有四位小朋友一齊上,基本上年齡都係相約,小小豬係小組入面都算係第二細嘅一個。今日係第一堂,姑娘都主要係透過啲簡單遊戲,教小朋友講簡單句式,嚟睇吓各小朋友嘅特質。

課堂之後,姑娘都有俾練習,等我地返屋企可以同小朋友練習多啲呀~


係一個半鐘課堂入面,小小豬表現都算OK,冇扭計亦都冇唔合作,姑娘叫佢做嘅指示佢都可以做得到。唯一就係當其他小朋友做指令時,依個坐唔定嘅小小豬就會離開坐位,唔太專心咁留意其他小朋友做啲乜。

依一點亦都係姑娘話要留意嘅問題,要我地多點留意小小豬嘅專注。唉...其實依個問題由PN返學時都已經留意到,我地都係屋企不停訓練佢,叫小小豬做事要專心,我地覺得佢係都已經有左改善,不過始終都仍然係未係做得最好。

有冇朋友仔可以教吓我.....點先可以令小小豬專心呀!(不過,我地知係需要時間,我地會繼續努力,相信小小豬一定可以戒掉依個壞習慣。)

*♡♡小肥豬♡♡* | 25th Jul 2013 | 博客分享 | (47 Reads)
21 JULY 2013(SUN)

之前係MY BB.COM嘅MY BB.COM試用小隊都抽過幾種試用產品,不過嗰啲都係俾小小豬用嘅。

今次終於輪都有產品係啱我試用,就係ELANCYL 7日3D 無紋修身體驗瘦身孖寶啦~


ELANCYL係法國No.1纖體瘦身專家,經醫學証實有效直擊3重極頑固脂肪,先擊散、再燃燒、後排走,7日即能體驗“度”得到的速瘦效果。聽見介紹知道咁利害,加上見到周家蔚咁FIT,真係好想試呀~


第一寶:7日3D塑身纖體精華~


使用方法真係非常簡單,每日早上打圈按摩至完全吸收就得啦~


呈白色的乳液狀,仲有淡淡花香味添~


我雙手臂可以話係重災區,所以當然係先做手臂先啦!我覺得塗落又真係幾舒服,按摩幾分鐘之後便可以完全吸收,沒有笠嘅感覺,仲有潤膚感添,完全適合夏天使用呀~


第二寶:速效纖腰美體精華~


依支係主要針對肚腩脂肪,即係勁啱我用啦~


想打散脂肪,就要依住指示嚟同肚腩按摩啦~


綠色既乳液,仲有好香嘅草本香味~


哈哈哈...為免嚇親大家,所以只俾肚腩一少部分做示範。按摩幾下都已經覺得好快吸收,唔會令皮膚覺得乾乾的,都十分滋潤,最好就係按摩完之前唔會痴住件衫呀~


用好乖乖咁用左一星期左右,雖然冇明顯嘅改善,不過已經感覺手臂同肚腩都冇咁鬆泡泡,而且亦都覺得好似FIRM左啲啲。

除左有少少成效之外,我覺得依個產品另一好處,就係塗完按摩之後唔會有好火熱嘅感覺,基本上可以話同平時塗佢BODY LOTION冇乜分局,唔似平時其他瘦身產品會有火燒嘅唔舒服感覺。

不過減肥瘦身都係要有持久性,所以我都會KEEP住用,希望可以快啲瘦少少啦!

Elancyl香港代理既facebook,有興趣朋友都可以去睇下呀: http://www.facebook.com/Elancyl.hk

*♡♡小肥豬♡♡* | 24th Jul 2013 | 小小豬篇 | (20 Reads)
21 JULY 2013(SUN)

今日下午大肥豬帶左小小豬去附近個室內運動場做觀察,等小小豬睇吓其他朋友仔玩各種球類嘅情況,想俾小小豬感受吓運動係啲乜。根據大肥豬嘅觀察,小小豬對羽毛球就特別有興趣,可以比較專心咁望住在場者比賽。

就係因為小小豬嘅喜愛,加上原來LULU妹屋企都有一套羽毛球套裝,所以我地就落樓下小公園,俾小小豬親手感受吓羽毛球係點打。

一個簡單街坊羽毛球LOOK~

小小豬一知道可以去公園玩羽毛球,已經表現得好興奮,一落到公園就即刻走去搵位想打羽毛球啦~


哈哈哈...可能之前睇過人打,所以我地都冇教佢,就好似好識打咁啦~


仲似模似樣添~


有新嘢玩嘅小小豬就係最開心~



最後仲嚟個兩父子對打添~

依個小小豬真係好似好有姿勢咁,不過實際就........當然係完全打唔到個球啦!

始終都係第一次玩,加上對球拍又唔啱佢,所以今日都係俾佢接觸吓,等佢有個羽毛球印象,到遲少少就買對俾小朋友玩嘅,就正正經經教小小豬打羽毛球啦!

*♡♡小肥豬♡♡* | 23rd Jul 2013 | 生活點滴 | (22 Reads)
20 JULY 2013(SAT)

每一年書展我都話想入去行吓,睇吓有冇啲啱心水嘅書買嚟扮吓讀書人,又想去買啲圖書俾小小豬睇,總之就係想入去睇吓見識吓啦!

上兩年都因為小小豬都仲細,所以冇去到。原本諗住今年小小豬大個少少,可以帶埋佢入去玩吓。點知小小豬唔多舒服勁流鼻水,大肥豬就唔想帶佢入去迫同傳播細菌,所以今年都係冇得入場。

雖然我入唔到去睇書,不過因為LULU妹入左去兩日去等簽名會,所以今年書展我都有收獲呀~


每年必買嘅馬仔新書,上年個職員冇俾紀念品LULU妹,今年終於有紀念品收啦~


另一本就係怪獸家長系列~


其實今年書展我最有興趣嘅就係杜雯惠 - 等着和你聊聊天~

依本係佢地一家人嘅相處點滴,雖然小朋友係有自閉症,不過佢地兩夫妻對小朋友真係好有愛心、耐性,佢地對小朋友那種行為真係好值得我借鏡,所以我真係要加陪細心細看依本書呀!

最後一本就係熱愛煮餸嘅小豬媽~


講個秘密俾大家知,小豬媽其實係美味娘娘嘅FANS,成日都睇美味娘娘嘅FACEBOOK專頁,我地仲成日向佢偷師添。

見小豬媽鐘意,所以LULU妹仲搵埋美味娘娘簽名送俾小豬媽呀~


其實仲有幾本關於教小朋友嘅書我都想睇,不過依幾本都夠我睇住先,等我慢慢睇完先再去書局入手啦!

希望出年可以有機會帶埋小小豬一齊入場慢慢睇書啦!

*♡♡小肥豬♡♡* | 21st Jul 2013 | 生活點滴, 小小豬篇 | (25 Reads)
19 JULY 2013(FRI)

依排FACEBOOK睇到都有好多朋友仔去左睇LEGO,依期咁HIT又點少得我地,所以就係約埋LULU妹一齊去太古城睇LEGO展啦~


係咁多展覽當中,我就最鐘意依個法老王像,真係好莊觀,所以都忍唔住要捉小小豬同我影張合照呀!原來係有2200MM高,總共用左20日時間同20,000粒LEGO砌成~


小小豬對LEGO嘅興趣唔算太大,不過都好合作肯乖乖咁睇。由於小小豬唔夠高,所以全程都要我抱住嚟睇,所以影相依個重任就交左俾LULU妹啦!

依個天壇由十萬塊樂高顆粒砌建而成,係運用了最多樂高顆粒的展品,共花了約3個月來完成,所以亦是展覽中花費最長時間完成的展品,就係依份心思同精力,我都又點可以唔支持呀~


依個LEGO熊貓我都好鐘意,完全做到熊貓嘅神髓,遠睇都真係唔知係由LEGO砌成呀~


依個莫高窟都好特別,唔知入面個佛像係點砌呢~


除左以上我比較有印象深刻嘅古蹟之外,其實其他嘅都一樣係砂得好像似,每一個都好有特色呀~




除左依個主要展覽區之外,係二期商場地下近APITA,亦都有一個名「世界七大工程奇蹟」樂高展,小小豬見到依啲由LEGO砌成嘅大動物時,都不知幾興奮呀~


動 物之外,仲展出由香港樂高達人負責砌建,由近代至現代對人類影響最深遠的世界七大工程項目,展品包括「加拿大國家電視塔」、「帝國大廈」、「巴拿馬運 河」、「北海工程」、「伊泰普水霸」、「金門大橋」及「英法隧道」。可能依建築物比較貼近依家環境嘅,所以小小豬睇時都比較有興趣同興奮,不停咁講:火 車、車仔、船仔、飛機......~




整體嚟講啲LEGO都真係砌得好靚,因為真的唔係咁容易,要花上好多心機同時間,先可以做到與世界遺產嘅一樣,所以真係要俾多啲LIKE砌LEGO嘅朋友,就係因為佢地咁用心砌,先可以令我地大開眼界呀!

除 左以上兩個展覽區之外,其實都仲有幾個活動:「繽紛世界由你創」拼砌大賽 (商場地下近izzue)、「Build Your Style ─ 砌出『您』想國」(商場地下近永安百貨)、LEGO Friend Gallery (商場二樓東橋)、樂高神獸傳奇歷險賽(商場二樓近麥當勞)。展覽會做到七月三十一日,有興趣嘅朋友記得快啲去睇啦!

*♡♡小肥豬♡♡* | 20th Jul 2013 | 生活點滴, 小小豬篇 | (36 Reads)
16 JULY 2013(TUE)

今日開始小小豬就放暑假啦!

小小豬放假,亦都係我忙碌時間嘅開始。之前送左小小豬返學之後,我都有兩個幾鐘頭係FREE,可能做多啲自己嘢。依家真係可以話係全天候廿四小都貼身跟住我,所以都真係私人時間欠奉,就連落街買餸都要帶住小小豬。

雖然可能係辛苦左少少(同麻煩左少少),不過亦都係多左啲親子時間,可以同小小豬玩多啲,可以利用依啲時間同佢互動交流多啲,咁都未嘗唔係一件好事!希望可以過左一個暑期之後,小小豬會痴我多啲啦!(因為大肥豬係唔打佢、唔罵佢,仲會成日陪小小豬玩,所以依個百厭豬仔係勁痴大肥豬呀!)

不過,我都慶幸我有個絕頂好老公,佢一放工放嚟就會幫我手同小小豬玩遊戲,又幫我手做家務,我就有返多少少私人時間做自己嘢(即係仍然可以KEEP住寫BLOG同睇BLOG)。

今日第一日放假,當然唔可以留係屋企啦。所以就約左小豬媽同LULU妹一齊去飲茶、行街街SHOPPING。

今日路經品店,就係咁.....小小豬
又多一樣戰利品啦~

自從入迪迪尼同大眼影左兩次相之後,小小豬已經成為大眼仔Fans,每次行街一見到大眼,佢都會勁開心勁攪笑咁不停講:大眼.....大眼

其實我都真係唔係好捨得買,一對襪仔同件TEE差唔多價錢,好似唔多抵咁。不過小豬媽難得小小豬咁鐘意,係我想阻止都嚟唔切嘅時候,已經二話不說就買左俾小小豬,真係錫到依個小小豬燶呀!

*♡♡小肥豬♡♡* | 19th Jul 2013 | 小小豬篇 | (44 Reads)
15 JULY 2013(MON)

今日係小小豬PN學校生涯最後一日,亦都係依間學校最後一日返學日。其實回想返上年八月開學時,都真係唔似已經過左一年,依啲咪係快樂不知時日過啦!

原來學校都有為小朋友們舉行感恩散學禮,讓小朋友同老師影相留一個小紀念。最後一日返依間學校,所以唔洗做手腳,大家都可以知道小小豬PN係邊度讀書啦~

我地都有同老師們一齊影,不過唔太方便放上嚟,就等我地留嚟私人珍藏啦!

今日散學禮都係派返啲小朋友成績表同勞作~


估唔到平日成日攪事嘅小小豬,都可以有兩個獎,真係令我既驚喜又感動。

好孩子獎(不過相信依個都係啲豬肉獎嚟啦....哈哈哈)~


另一個就係進步獎~

依份禮物係一本圖書嚟呀~


我估依份都應該唔係豬肉獎嚟,小小豬可以拎到獎,尤其知道係進步獎,我都真係喜出望外呀!

小小豬既成績表都算唔錯啦~


我最期待嘅就係依本學生歷程檔案~


因為入面除左有每一單元嘅成績報告之外,亦都有小小豬係校園生活嘅相呀(不過因為好多都係同同學仔一齊影,所以唔方便係依伋度分享啦)~


睇見小小豬校園生活照,原來小小豬返學都係好開心,有好多互動時刻,唔係一舊飯嚟呀!

回想起小小豬由返學第一日到今日,雖然唔可以話有好大進步,不過係老師對小小豬嘅愛心同耐性影響下,真係有左小改善。起碼由開學初係一名百厭攪事份子,到依家可以乖乖坐定定聽老師講課,又可以同老師合作,相信老師們都對小小豬付出都不少,我實在好感恩有對小小豬愛護嘅老師,所以真係十萬個唔捨得呀!                      

三位班房老師中,其中一位助教許老師我真係最唔捨得,開學初開始時都已經都對小小豬嘅一舉一動都十分清楚,每日返學探熱時,佢都一定笑得好燦爛咁同小小豬傾吓計先入課室,成日都主動同我講返小小豬返學做得好同做得唔好地方,仲完全可以講到小小豬嘅內心性格,仲同我分享點可以教好小小豬。講真,一班有成二十個學生,老師又點可以咁清楚知得晒全部學生嘅缺點,所以許老師一定係非常留意小小豬,從佢每日向小小豬展示燦爛嘅笑容,我真係可以完全感受到佢係有幾愛錫小小豬呀!

今日許老師一見到小小豬,就已經即刻上前攬到小小豬實一實,唔想放手,仲不停講話好唔捨得小小豬,叫佢繼續要做好乖乖,睇見依個離別嘅情況,我都真係忍唔住眼濕濕,小小豬真係幸福有個咁愛佢嘅老師呀!

小小豬K1就要轉去另一間學校,希望佢轉校之後都可以KEEP住繼續進步,亦都可以得到更多更多老師嘅愛錫,最重要係繼續開開心心,好好享受校園生活呀!

*♡♡小肥豬♡♡* | 18th Jul 2013 | 小小豬篇 | (120 Reads)
14 JULY 2013(SUN)

之前都同大家提及過,同小小豬報名參加左由Yes-Parents舉辦嘅『兒童精英領袖暨親子歷奇日營』。其實由報名之後都開始擔心,唔知小小豬可唔可以應付得到啲活動。等左一個星期,都左今日活動舉行嘅日子,終於我可以知道原來小小豬係..........唔可以參加依啲活動,當日真係全場最失禮嘅一個,真係激都我呢..........。

先唔同大家講小小豬點失禮,俾小小豬小軍人LOOK大家睇吓先,型唔型仔呢~


當日主辦機構安排左旅遊巴由九龍塘接載我們去上水營地參加活動,係車上小小豬都仍然係開開心心,坐定定咁睇風景。不過一去到營地,可能見到咁多陌生嘅面孔,所以就開始不安,就連步入活動室都唔願意。用左好多時間先可以令佢安靜入活動室參與活動。

先由整個活動負責指揮官鄭SIR向我地講解整日活動流程~

依啲徽章就係受訓完畢,軍官會頒發給各出色嘅小學員嘅~


主辦機構就送了迷彩軍衣給各位小朋友,之後我地就自行購買左軍褲同帽,成套都可以自己擁有啦!不過,依個失禮嘅小小豬唔多願意穿上,好唔容易先可以幫小小豬換到整套衫呀~


第一個活動就係分組認識組員,同埋訓練各人的合拍。小小豬就唔多投入,不過大肥豬就好落力一齊玩呀~

小朋友們開始受訓,先嚟訓練列隊同報數,不過小小豬全程都唔肯自己做,要我地陪住又要抱住~

休息時間,負責帶領我地嘅林MADAM主動走嚟幫我地影合照,其實佢主要目的都係同小小豬傾計,嘗試叫佢一齊玩,不過依個勁怕羞又慢熱嘅小小豬仍然都未可以做到~


去另一個場地活動啦~


MADAM 教小朋友們玩傳送炸彈~


小小豬都肯一齊玩呀~

不過,當同其他小朋友一齊合力搬大炸彈時,佢又開始扭計唔肯參與,要在場社士MISS U同BOBO 姐姐過嚟逗佢,佢都係唔肯玩,真係失禮都頂點呀!

玩完大炸彈遊戲,就再入營地進行活動。其實依個遊戲都真係幾好玩,一個類似“踩地雷”。各小朋友分別拿住一把搶,係唔踩中地雷情況下,去到軍官指定嘅位置。當然,依個時候小小豬嘅情緒仍未平靜到,所以全程要大肥豬抱到實坐埋一邊睇小朋友玩啦!

午餐前最後一個活動,係兩隊家長同小朋友一齊合作,比賽運波波。小小豬終於都可以一齊玩,仲開始識笑添~


大會為我地準備嘅午餐,開餐啦~


有嘢食就係小小豬最安靜又合作嘅時候~


食完飯,補充左能量,小小豬態狀又好似好左啲,終於都同其他小朋友一齊玩波波啦(唔知其他朋友仔介唔介意出鏡,為安全都係只放小小豬嘅相啦)~


飯後第一個活動,就係軍官故戴帽子指令~


先唔好講佢早上唔乖嘅地方,戴埋帽嘅小小豬又真係幾有型呀~


雖然小小豬都係要我地陪住,不過都算肯參與,表演仲上早上好左好多啦~


最後一個活動就係兩隊家長同小朋友一齊進行歷奇活動,先由軍官示範~

其後當家長們傾談分工安排時,小小豬又開始活躍起嚟,對啲工具好有興趣呀~


開始啦....小小豬就係其中一個要運送嘅小朋友,好在佢都算合作,肯配合家長指示~

過左另一面,終於肯同其他小朋友一齊玩啦~


我覺得依個遊戲都係主要由家長們玩,不過大家都好投入,最後我地勝出左依次比賽呀~


活動完畢,大家分亨是次活動的心得。其中一位家長竟然讚賞小小豬為最進步學員,真係令我汗顏,依個百厭扭計豬都有人讚。不過,由早上完全唔肯參與,到下午開始可以一齊玩,又真係進步左少少。一聽到有人讚自己,睇吓小小豬幾開心~


MISS U請各位小朋友食糖糖,有得食嘅小小豬就最開心~


另一個活動就係讓小朋友貼貼紙,一個黃色貼紙就等如一個徽章,等小朋友學習互相欣賞。雖然小小豬唔多徽章,不過佢都肯去同其他小朋友進行互動,都係我另一件開心嘅事~


最後一個環節,就係鄭SIR為大家頒發獎狀和徽章嘅時候,估唔到依個百厭扭計唔服從嘅小軍人,都可以拎到徽章~

主辦單位好細心,係活動結束前,為各位小朋友準備茶點,等小朋友們充充電。有嘢食嘅小小豬就係最乖、最安靜同最古靈精怪嘅時候~


最後嚟張大合照先~


小小豬今天嘅戰利品~


玩左成日,唔好話小朋友,我自己都勁攰呀!先唔好講小小豬嘅表現,其實我覺得依個活動真係幾好,係一個好好的體驗,對訓練小朋友嘅服從同合群都好有在幫助。

不過,無奈我隻小小豬就係一個極度慢熱...怕羞嘅小朋友,所以都唔太ENJOY依次活動。雖然小小豬今日唔太參與活動,不過我都要多謝各位軍官、MISS U同埋BOBO姐姐,仲有其他家長,佢地見到小小豬扭計時,都主動行過嚟逗小小豬,真係多謝大家對小小豬嘅愛呀!

經過今次活動,我真係發覺小小豬嘅慢熱怕羞情況真係幾嚴重,真係要趁依個暑假帶多啲佢出去同其他小朋友玩,練大啲佢個膽仔先得呀!

*♡♡小肥豬♡♡* | 17th Jul 2013 | 小小豬篇, 博客分享 | (18 Reads)
13 JULY 2013(SAT)

首先要多謝美素住兒PR姐姐送俾我地嘅入場卷,我地又可以去玩啦~


其實除左我地三口子之外,我地仲同埋朋友仔一齊去。不過因為唔太方便出鏡,所以只能夠分享小小豬個人啲開心玩樂照呀!

入博覽館最好嘅交通工具當然係機鐵,我地都係第一次搭呀!估唔到真係咁快又舒服,由屋企出發,大約一個鐘左右就到左博覽館啦~

一入到場就俾啲大型吹氣遊戲吸引,所以去排隊玩啦~

其實今日都算多小朋友,好在各遊戲都只係排左十分鐘左右就可以玩。不過就係因為多人,所以每次都只可以玩三分鐘,所以好快就玩完啦!

玩左一陣,我地先去醫肚,之後就再繼續入場玩啦!

哈哈哈...拎住個竹籃都可以玩得一餐~



拋吓草先~


跑跑跳跳就最啱小小豬~


基本上全場最受歡迎嘅都係美素佳兒教整牛牛帽,我地當然唔執輸,係一入場就先排定隊拎定入場卷,所以又可以整帽帽啦~


好可愛嘅小牛呀~


玩滑梯就係小小豬至鐘意嘅活動~



活動其中一部分係動物農荘,當然要睇吓動物啦!不過其他動物小小豬就唔太感興趣,反而就鐘意睇海星,好專心咁聽姐姐介紹呀~


畫吓圖畫,塗吓顏色先~

之後我地又再去排隊玩多一陣吹氣遊戲,之後我地就踏上回家路程了。

其實仲有好幾個遊戲好想帶小小豬去玩,不過唔係太多人排隊,就係啲活動只限三歲以上先可以玩,原本我地都打算博吓,但係需要出示入場卷先可以玩,所以好多遊戲都玩唔到啦!

不過,整體上今日都算係好玩,小小豬都玩得好ENJOY,下年小小豬有自己嘅入場卷,又大個仔多一年,咁就可以玩多啲唔同種類嘅遊戲啦!

*♡♡小肥豬♡♡* | 16th Jul 2013 | 生活點滴 | (62 Reads)
12 JULY 2013(FRI)

其實我都好少係網誌上發"勞蘇",不過今日真係發生左一件不吐不快嘅事,所以請大家容許我發一發"勞蘇"啦!

事緣今朝要陪小豬媽去睇醫生,當我地去到銅鑼灣準備轉車時小豬媽話肚餓,見時間尚早,所以就係附近搵間餐廳食個早餐先再繼續行程。

我之前都已經食左少少嘢,我就唔肚餓,只係陪小豬媽食。

點知....我地一入到間餐廳先睇到佢地個牌話,人均消費要$20。就算小豬媽嗰杯飲品轉凍飲都係唔夠$40,但我又真係食唔落一個早餐,所以就只係散叫左杯凍檸茶俾自己。

點知一睇張單真係嚇C人呀~


嘩......真係冇飲過一杯要廿幾蚊嘅凍檸茶,佢個SIZE仲要俾出面嗰啲茶餐廳嘅細啲,真係有少少離譜呀~

其實佢俾我地睇嘅餐牌全部都係早餐SET好晒價錢,但就冇寫散收費,諗住最多都係十幾蚊,真係完成冇諗過要成廿幾蚊,仲要係咁細杯,真係勁嬲囉!

散叫收費高係一個問題,其次就係啲嘢係勁難食,小豬媽叫左個排骨番茄通粉,一粒排骨都冇都唔緊要,小豬媽食左一啖之後就唔再食。原來碗粉一啲番茄味都冇,只係得個甜味(仲要係甜到無朋友嗰隻),我真係以為食緊糖水呀!

小豬媽原本想倒左啲糖水出嚟用熱水冲過,諗住可以繼續食,點知過一過熱水都仍然係好甜,最終都係食唔到。(最衰當時自己太嬲,唔記得影低碗糖水同大家分享,相信大家見到都真係會食唔落呀!)

依間嘢已經俾我BLACK LIST左,相信亦都唔會再有下一次機會入去啦!

*♡♡小肥豬♡♡* | 15th Jul 2013 | 博客分享 | (18 Reads)
11 JULY 2013(THU)

再一次多謝PR姐姐,七月號嘅《樂活。家 FAM》收到啦~


今期封面故事 - 球場上學做人,分別邀請了張堅庭、溫冠麟及葉希活分享如何讓孩子「在球場上學做人」。原來運動本就跟自我形象掛鈎,孩子在隊制運動中的學習更是終身受用。當大家都期望孩子美音才藝樣樣全時,萬萬不可忽視運動,因為運動都係非常重要嘅一環呀~


另外,其中一篇專欄係講解蒙特梭利的訓練,其實係我幫小小豬報PN去聽其中一間學校簡介時,我都聽過依個名稱,覺得都係一種唔錯訓練。我自己都好想買依套教材同小小豬進行訓練,無奈都依家都未去實行。睇完依個專欄後,真係要的起心肝同小小豬做吓依個訓練先得呀!或者...有冇媽媽已經買左,可以介紹俾我呢~

今期仲有教點同嬰兒做伸展活動,等佢地更聰明呀!係小小豬細細個時,我都比較少同佢做依啲活動,雖然小小豬依家都叫做OK,不過如果我之前有同佢做多啲,依家可能會更更更加好,所以呢....各位媽媽記得同你地小朋友做多啲呀~

最後,醫學專欄講左依期都比較多小朋友有嘅手足口病同水痘~

此外,今期隨書附送左一本關於親子閱讀嘅小冊子,基本上我對依本書仔嘅興趣大少少,因為始終依家開始同小小豬進行多閱讀,等我地知道多啲有關親子閱讀技巧,咁係教小小豬閱讀時,就會更加完善啦~


每個階段所需要的閱讀都唔同,所以教我地點樣揀本啱睇嘅書~


仲有菜姨姨俾我地嘅親子閱讀心得~

其實唔止以上我介紹嘅部份,仲有好多專欄都好有意思呀!所以如果大家有興趣知多啲《樂活。家 FAM》嘅內容,可以去佢地網址睇吓:http://famworld.com.hk/ 或者FACEBOOK專頁https://www.facebook.com/famworldhk

*♡♡小肥豬♡♡* | 14th Jul 2013 | 小小豬篇 | (16 Reads)
10 JULY 2013(WED)

轉眼又過一個月,小小豬又大一個月,已經係三十五個月人仔,仲有一個月就三歲,又可以開始計劃吓下個月點慶祝三歲生日會啦!

哈哈哈...唔講咁長遠,講返今日先。今日我地有個好好嘅節目同小小豬慶祝係三十五個月,就係等小小豬放左學之後,同埋小豬爸、小豬媽,仲有LULU妹一齊入迪迪尼玩啦!點解又可以一齊入去玩,咪就係因為佢地都買左銀咭,加入左成為全年証人仕,嚟緊可以多啲一齊入去玩啦!

自從我上次同小小豬拍拖入去玩時,坐左兩次小小世界之後,個傻豬仔就已經愛上左,仲成日係屋企不停口唱,所以我地第一個目的地就係小小世界啦~


仍然仲係好新奇,睇得好專心呀~


好攪笑...個傻豬仔一入到黑漆漆嘅地方,就用手仔蓋眼呀~


坐完船仔,小豬爸指定動作...食雪糕,小小豬都有份食,仲食得好滋味呀~


原本打算影MICKEY,點知勁多人,最後影左PLUTO~


仲有高飛呀~


影完公仔原本去睇巡遊,點知我記錯時間MISS左冇得睇,最後去左排隊影大眼。上次影左大眼,原本係勁想同毛毛影,所以開頭都有少少失望。不過...原來小小豬係鐘意大眼多啲,佢同大眼影得幾開心~

影完大眼之後,我真係可以講小小豬已經深深愛上左大眼。同大眼影完相唔肯走,走時又成日轉頭望。小豬媽見佢咁唔捨得,所以都想買個大眼公仔俾小小豬,點知行晒成個樂園都買唔到,因為已經冇哂貨啦!估唔到大眼真係咁受歡迎,希望有機會可以帶佢返屋企同小小豬玩啦!

之後去左醫肚,跟住LULU妹就去左飛返轉太空山,我地就帶小小豬去左玩水啦~


玩到全身濕晒呀~


換晒衫又不停唱歌仔,唱得都不知幾投入呀~


又嚟SWEET SWEET 兩婆孫~


今次終於都唔多人,可以渣車車啦~


最後行多一陣SHOP就走啦~

今日係平日都算多人,仲多人過我上次星期六入嚟,可能已經係踏入暑假,所以多人啲啦!

不過亦都係因為多人,好多GAMES我地都冇玩。不過唔緊要,因為依家大家都有全年証,小豬爸渣車入嚟又好方便,所以真係可以多啲入嚟玩,實行密密入嚟玩餐飽呀!

*♡♡小肥豬♡♡* | 13th Jul 2013 | 生活點滴 | (22 Reads)
9 JULY 2013(TUE)

我都唔知幾耐冇入過戲院睇戲,對上一次入戲院睇都係幾年前嘅賀歲片。

今日終於都可以可以入戲睇啦!因為等左咁耐,終於都有一套電影係好有恨睇嘅感覺,依套咪就係我超級偶像主演嘅~

今日下午就同小豬媽一齊去睇啦~

睇戲最重要當然係爆谷加汽水啦~


開場啦~

先唔好理一啲不合邏輯嘅橋段,點解華仔係盲人,可以咁利害做到咁多嘢,又識得跟蹤人。成套電影由開頭至結尾都沒有悶場,可以話係由開場笑到散場,係好緊張嘅時候又會好好笑。尤其係案件重演嗰幾場,真係睇到好我都驚。SAMMI同華仔真係好合拍,整體上真係勁好睇,強力推介呀!

真係餓左SAMMI好耐啦,應該話係.......等左狀態回勇嘅SAMMI啦!成套SAMMI都做得好好,收放自如,尤其係賭場同捉變態佬嗰兩場,兩種唔同心情,都好吸引呀!

希望出年SAMMI可以憑依套電影拎到影后啦!

*♡♡小肥豬♡♡* | 12th Jul 2013 | 小小豬篇 | (61 Reads)
8 JULY 2013(MON)

係我尋日煲紅豆沙時,大肥豬叫我留起幾粒俾佢,教吓小小豬種紅豆,等小小豬可以學習種植物之餘,亦可以學習觀察。

咁好玩又有意思嘅活動我當然係支持啦,所以尋日就留起幾粒,浸多一晚水,等今日就可以同小小豬一齊種紅豆啦~


對啲紅豆好有興趣哦~


先整濕啲棉花先~


一粒一粒紅豆慢慢擺入杯仔~


好一個傻豬樣呀~


完成晒幾有滿足感~


小小豬仲將啲紅豆一杯杯好小心咁放係窗台~


仲估佢唔到,主動話要請佢對新朋友仔幫手照顧紅豆添~

其實自己小學時,學校都有種過綠豆,紅豆都係第一次,我估應係都係差唔多,應該都可以種到啲小葉出嚟。

依家已經教左小小豬每日都要佢同紅豆講早晨,睇紅豆生長情況同埋淋水。希望經過依個種紅豆,小小豬可以學識種植物,等佢對植物多一點認識啦!

*♡♡小肥豬♡♡* | 11th Jul 2013 | 小小豬篇 | (22 Reads)
7 JULY 2013(SUN)

小小豬食緊啲乜食到個樣咁古怪呢~


哈哈哈....知唔係我嘅自家制紅豆雪條啦!

早幾個星期,小豬媽煮左一次紅豆沙俾我地食,勁好味嘅紅豆沙實在太搶手,所以食左一碗之後就冇得ENCORE。今日見有時間,所以又煮番煲俾大肥豬食啦!大肥豬話佢細細個都有將啲紅豆沙雪成雪條,仲話係另一種風味。

既然大肥豬想食,我當然好樂意整俾佢食,等佢懷念吓那些年啦~


有雪條食....依個為食嘅小小豬又點會放過呀!一見到條雪條就即刻走埋嚟啦~


依個為食豬真係為食到呢...表情多多呀~

依條係自家制嘅雪條,因為要就小小豬唔食咁甜,所以我就落少左糖,不過亦都因為咁,大肥豬話唔夠甜呀!(哈哈哈...冇辦法啦...當然係小小豬嘅口味重要啲嘛!)

Next