香港新浪網 MySinaBlog
*♡♡小肥豬♡♡* | 30th Jun 2013 | 生活點滴 | (37 Reads)
27 JUNE 2013(THU)

繼上一年六月大肥豬俾左個驚喜,以我名義加入宣明會助養活動,今日又俾多一個小驚喜我,就係又以我名義助養,參加左聖基道兒童院嘅助養活動。

事前大肥豬都係一樣冇同我講佢又計劃助養,到今日收到一個郵包,我先知道呀~



送上『樂樂』、『遙遙』作為紀念品,就係因為咁,小小豬又多兩個朋友仔陪佢玩啦~


依家我地除左助養宣明會海外嘅小朋友之外,亦都會助養一個香港小朋友。其實有時會諗相比需要起助養小朋友,有父母係身邊嘅小朋友真係特別幸福,可以係一個優質嘅環境下成長。所以如果可以出少少力(其實都係可能每個月外出食一餐豐富嘅晚餐價值),讓佢地可以改善生活環境,都真係要大力支持呀!

雖然聖基道兒童院唔係固定助養一個小朋友,所以都唔知我所助養嘅小朋友係點樣。不過只要幫助到小朋友們可以係一個健康的環境成長,咁已經就係最足夠啦!

*♡♡小肥豬♡♡* | 29th Jun 2013 | 小小豬篇 | (19 Reads)
27 JUNE 2013(THU)

我成日都講小小豬係一名超級為食豬,一有嘢俾佢食呢,就會超級興奮又緊張咁,有時都真係俾佢個為食樣笑C呀!

其實因為小小豬細細個就有濕疹關係,所以我俾嘢佢食時都會好小心,基本上都係返左學之後先開始有糖食,朱古力同埋一啲唔健康嘅食物,佢真係到依家都未食過。我都係想佢身體健康啲,所以先對佢食依一方面著緊啲。

可能小小豬隨著食嘅嘢越來越多,食飯嘅時候就開始唔乖。之前為左想佢食多啲飯,所以基本上都係餵佢食多(唔係講笑...真係餵嘅時候隨時係可以食兩碗飯呀),尤其係小豬媽同大肥豬在場,依個小小豬都一定要佢地餵先食,只係間唔中先可以自己食。

不過,小小豬都開始大個仔,再係咁餵飯落去,咁咪隨時變港孩。所以要開始進行地獄式訓練,佢要係冇電視音樂嘅情況下,自己專心咁食晒碗飯。

其實都已經開始左成個幾月,當然有咁大既轉變,依個小小豬又點會習慣,所以好多時都係扭扭計計,要罰要罵先肯食,我嘅EQ唔高,所以有時都攪到我忟忟憎憎。不過.....教小朋友就係咁,所以我都要強硬啲,唔可以退讓,因為咁都係為小小豬好嘛!

依排小小豬都算好左啲啲,都唔算扭得多,但始終我都係想佢開開心心咁食飯,係心情唔好情況下食,又點會吸收呢?

就係依個時間,我醒起之前託好友CARMEN係迪迪尼全年証買嘢有優惠時,買左幾隻米奇頭碗。之前係打算買嚟食甜品用,不過見MICKEY又係小小豬至愛,所以就打算試吓等小小豬用佢至愛嘅米奇頭碗食飯,睇吓會唔會好啲。

小小豬一見到我拎住個米奇頭碗,都不知幾興奮,仲不停話要食飯。

真係講都唔信,一坐低就不停食,完全唔洗我勞氣呀~



仲食得幾得戚~


食都出埋招牌笑容添~

今日食兩餐都係用米奇頭碗食,兩餐都係食得好爽手又快手,MICKEY嘅魔力真係強勁,早知就一早拎過秘密武器出嚟,咁就唔洗咁勞氣啦!

希望小小豬唔係三分鐘熱度,KEEP住都係食得咁好啦!

*♡♡小肥豬♡♡* | 28th Jun 2013 | 小小豬篇 | (24 Reads)
24 JUNE 2013(MON)

有成日嚟探我地嘅朋友仔都應該知道,我係一個親子裝發燒友,買買埋埋都真係好多套親子裝,真係買到連大肥豬都叫停一停,因為真係著唔切呀!

我覺得一家人去玩時齊齊整整咁著住親子裝,真係特別溫馨,但冇理由次次都係嗰幾套嘛!所以呢.....我都會考慮聽少少大肥豬話,之後盡量買少啲啦!(如果好靚嘅話真係除外呀...哈哈哈)

係我未減少買嘅時候,原來就係依一個六月,我地都已經多左幾套親子裝啦!

首先新鮮熱辣嘅,就係今日同小豬媽行UNIQLO入手嘅。依期怪獸大學咁HIT,當然要買返套嚟襯吓熱鬧,下次要著左迪迪尼搵毛毛影相~

另一套親子裝就係託朋友係迪迪尼用優惠價買嘅MIKE眼睛(又係怪獸大學),如果小小豬嗰件都係同大人一樣,咁就係十足十嘅親子裝啦!不過依家咁都幾好睇呀,我打算留返遲少少去影樓影相時著呀~


見朋友可以優惠價買嘢,所以我又買多一套同大肥豬嘅著蛋頭情侶裝。我真係好鐘意依套著蛋頭衫,所以冇小朋友嘅SIZE我都照買。希望遲少少迪迪尼會出埋小朋友版嘅著蛋頭,到時就可以襯返啦~

之後嗰啲就唔係我買嘅,係小豬媽送俾大肥豬嘅驚喜生日禮物呀!

首先就係一套親子褲~


哈哈哈.....衫我就買得多,不過親子褲都係第一次,真係好期待佢地兩父子著埋一樣嘅衫褲,我想一定好攪笑呀!

另一份禮物就係跳跳虎衫仔~



其實依一套係可以自己DIY嘅衫,用佢地附送嘅油彩,咁就可以上顏色啦~


依個小小豬嘅畫功真係仍需進步,所以都應該唔會同佢一齊親子油。等我有心機同時間嘅時候,先慢慢油啦!不過......好可能下一次大家見到我都著時,都係仍然KEEP住係黑白色,因為我真係對藝術方面唔大興趣呀!(唔通係我遺存左依個壞缺點俾小小豬,攪到佢都依家仍然係唔鐘意油顏色!)

某程度上覺得自己好敗家添,一個月就添置左咁多嘢,所以真係要學大肥豬話,買少啲親子裝啦!(始終都係嗰句:盡量啦....哈哈哈)

同場加映:

今日小小豬午睡我睡姿~


最早期嘅時候就只有MICKEY陪,之後就多埋MINNIE,到最近就霸埋我隻DUFFY,可憐我DUFFY仲要俾小小豬夾住。真係冇佢收,越攬越多,攪到我就嚟冇位瞓啦!

*♡♡小肥豬♡♡* | 27th Jun 2013 | 小小豬篇, 靚太廚房 | (189 Reads)
23 JUNE 2013(SUN)

除左波蒜蓉蝦之外,其實今日亦都煮左另一個新菜式,就係蟲草花雲耳荷葉蒸雞~

其實依個餸小豬媽都係睇《美味娘娘食譜》學返嚟呀!

材料~

蟲草花、雲耳、杞子及蝦乾以凍水浸軟~

荷葉浸軟,汆水30秒~

將雞件、蟲草花、雲耳等加入調味料拌勻,醃大約半小時~

荷葉放碟上,將醃好的雞件包裹~

荷葉包蒸十五分鐘~


打開荷葉包,放入葱段即成~


味道真係唔錯,啲雞好滑,但個荷葉味就好似唔太出,食唔出啲荷葉味。小豬媽話佢會諗諗計仔,希望可以改善一吓,如果有埋好香嘅荷葉味,咁就十個讚啦!

同場加映:

係我準備緊餸嘅時候,小小豬剛好又洗完白白,好奇心極大嘅佢見到我放滿晒啲餸係皮枱上面,又嚟八卦一吓啦~


估佢唔到,教左佢一次啲材料名稱之後,佢竟然記得晒啲名,仲話要幫手添呀~


仲識得依我指示放入大碗呀~


依個傻豬仔......佢唔百厭唔扭計嘅時候,都真係好抵錫呀!

*♡♡小肥豬♡♡* | 26th Jun 2013 | 靚太廚房 | (157 Reads)
23 JUNE 2013(SUN)

今日又用左左光波機整左個簡易又易整嘅新菜式啦~


哈哈哈...個賣相係唔係好吸引呢?唔係得個樣,個味都真係唔錯呀!

材質都係好簡單,蝦我原本都打算買急凍嗰啲,不過小豬媽話買新鮮會好食啲,起碼都鮮甜啲嘛~

先將剪頭及腳及挑腸,我係蝦嘅背脊位剪開,咁就會入味啲呀~

蒜蓉、牛油及豉油撈好~


然後放入蝦醃一小時~


光波爐配低架235度光5分鐘,未開爐前落少少蒜鹽在蝦上~

反另一邊時落少蒜鹽再用260度光多2分鐘~


開餐啦~

光波之後,蝦殼既味道完全滲落啲蝦肉到,外表睇就好似好乾,不過一打開蝦,其實係好多汁,加埋蒜蓉同牛油嘅味道,真係勁好食呀!

光波爐真係勁方便,簡單又易用,完全令一個唔太叻煮嘢食嘅我,都煮到啲特別嘅餸菜,越嚟越鐘意光波呀!

*♡♡小肥豬♡♡* | 25th Jun 2013 | 博客分享 | (9 Reads)
22 JUNE 2013(SAT)

多謝PR姐姐,六月號嘅《樂活。家 FAM》收到啦~


講起今期本雜誌,我都差少少收唔到。因為原來派信嘅時間,可以郵差叔叔一見忙亂,所以派錯去同層另一個單位。好在有心的鄰居俾返管理處,先可以轉移返到我手呀!依一個轉動,就令我遲左一個多星期先收到。不過,遲收到好過收唔到,我又可以同大家嚟個小分享啦!

六月係父親節月,所以封面故事就訪問左三位爸爸~



好鐘意今期其中一篇專欄『育兒別要開壊頭』~


教育小朋友真係第一步係好重要,當有個好頭嘅時候,自自然然就會好容易教落去,相反如果開錯頭,想教返好就真係好困難,要用多幾倍時間同心血先可以慢慢教返好。

今期仲有教嬰兒按摩的八種功效~


雖然小小豬都已經適合按摩的階段,不過間唔中同佢玩吓,都係另一種親子活動呀!

下個月就係暑假啦,所以今期都刊登左一啲暑期戶外活動資料可作參考呀~


有興趣知多啲《樂活。家 FAM》嘅內容,可以去佢地網址睇吓:http://famworld.com.hk/ 或者FACEBOOK專頁https://www.facebook.com/famworldhk

*♡♡小肥豬♡♡* | 24th Jun 2013 | 小小豬篇 | (17 Reads)
22 JUNE 2013(SAT)

自從屋企附近開左間圖書館之後,我地去圖書館嘅機會就多左,亦都因為咁,我地依家成日都可以借圖書返屋企等小小豬進行睡前活動時間。

我地都借過好多唔同種類圖書俾小小豬睇,不過有一個系列小小豬就特別鐘意,基本上每次問佢想聽咩故事,佢都一定係揀嗰幾本套書。就連我兩次返學校講故事,都係利用依一套數嘅故事。

既然小小豬鐘意又熱充,我地都當然係會支持佢啦!不過,始終係圖書館借,都唔可以借得好多本,有時想借同系統嘅其他故事,都係外借左,所以大肥豬就有一念頭,就係買晒成套書俾小小豬,等佢可以係屋企慢慢睇,我地又可以慢慢講多啲唔同種類嘅,咁就唔洗日日都係嗰個故事啦!

開頭我都以為大肥豬係諗吓,點知原來佢真係行動左,仲即刻打電話去出版社訂晒成套36本圖書呀~


幼兒心理系列,我去學校講故事就係講左迷路同不偏食啦~


生活安全系列~

德育系列~

禮貌系列~


幼兒好行為系列,不過依一套圖書係需要訓練埋反思能力,所以小小豬未啱睇住呀~


其實我都覺得依一系列圖書真係唔錯,又簡單易明,最重要係每一個主題都係環繞日常生活,如果小小豬學識晒,咁就係好啦!大家有興趣都可以去圖書館借嚟睇吓啦!

唔好睇依啲書仔薄薄咁,一本書仔都要成廿幾蚊,依度買左..............雖然係貴左小小,不過睇圖書係長期性,加上如果真係啱小小豬,又可以培養到小小豬,都係值得呀!

真係不得不讚揚吓大肥豬,為左培養小小豬有良好閱讀習慣,佢真係完全唔手軟咁買圖書俾小小豬,反而買自己嘢佢就真係唔捨得,真係一個廿四孝DADDY嚟呀!


*♡♡小肥豬♡♡* | 23rd Jun 2013 | 小小豬篇, 博客分享 | (15 Reads)
21 JUNE 2013(FRI)

話說之前小小豬第一次去做小MODEL@the mini way,佢地嘅BLOG POST已經出左啦!(其實早係上星期已經出左,不過我唔記得POST出嚟同大家分享...哈哈哈!)

原來依一期係介紹Summer Picnic Style~

雖然上次個POST都已經睇左小小豬著住四套型仔靚衫嘅LOOK,依家就等我轉載小小豬嘅MODEL相俾大家睇下先啦~


鬆身低襠褲,型仔又舒適,最o岩郊遊蹦蹦跳~


美式校園派的T恤,襯恤衫當作外套,感覺很寫意~


男仔不能穿粉紅色?唔係呢,你睇小小豬著得幾有型! 穿上亮眼的鮮色,出外Picnic時更加醒神~


格仔恤衫襯晒野餐的格仔布! 幾清爽~


如果大家有興趣知多啲the mini way,可以去佢地個網址http://www.theminiway.com/同FACEBOOK專頁https://www.facebook.com/TheMiniWay

另外,或有興趣讓仔仔或女女一嘗小model的滋味,都可以send email到info@theminiway.com給佢地呀!

*♡♡小肥豬♡♡* | 22nd Jun 2013 | 博客分享 | (26 Reads)
21 JUNE 2013(FRI)

首先要多謝PR姐姐邀請,參加今日係荷里活廣場舉行嘅香港Q嘜35周年慶典。

活動地點都近近地,所以都打算帶埋小小豬一家三口咁去依個活動(想俾小小豬見識多啲大場面嘛!)。

不過,今日突然小小豬發燒,加上小豬媽身體又唔太舒服,所以我唔可以出席,要留守大本營看住佢地。正當我打算搵PR姐姐講嚟唔到嘅時候,LULU妹就自告奮勇咁話代我去。既然LULU願意,PR姐姐又話可以,所以LULU妹就做左今日我嘅特派記者去參加依個活動啦~



係活動未開始之前,都有個小型雞尾酒,都有好多嘢食呀~


活動開始,先係各位嘉賓致歡迎辭~


成日都聽Q嘜,其實Q嘜係啲乜呢?係由工總轄下的香港優質標誌局專責營辦的「香港Q嘜優質標誌計劃」,於1978年7月依法建立,分別有三個不同的計劃,按照業務性質劃分,分別是「香港Q嘜優質產品計劃」、「香港Q嘜優質服務計劃」和「香港Q嘜環保管理計劃」,為區內一個品質認證計劃 。即係話如果品牌係有Q嘜標誌嘅商品,都係信心保證啦!

今日慶典最主要活動就係頒發有關Q嘜證書啦~


最後嚟個大合照~


慶典後半部就係表現節目,先嚟鐘舒漫唱同玩遊戲~


另一位就係羅力威~


玩埋遊戲之後,成個活動就完結。LULU妹話整體上都OK,係早段嘅各位嘉賓致辭就比較悶。(哈哈哈....細路女當然係對依啲致辭活動唔太喜歡啦!)

活動後亦收到一袋禮物包呀~


除左香港Q嘜35周年慶典之外,佢地仲係六月二十至二十三日有Q嘜優質生活嘉年華,現場有多個Q嘜認證品牌展銷攤位,包括:金至尊珠寶、香港中華媒氣有限公司等!另外,同場亦有展覽區、Q嘜益智趣味遊戲區及Q嘜卡通公仔影相區,可以慢慢玩呀!

仲有一個重點節目,就係六月二十三日下午三點半,會舉行Q嘜寶寶選舉,有二十位入圍可愛的Q嘜寶寶上台行CATWALK。雖然小小豬冇份參加,不過咁多小朋友行CATWALK應該會好得意,所以有時間路經都可以去睇吓呀!

想了解多啲Q嘜嘅資料,可以去以下網址:www.industryhk.org / www.facebook.com/qmarkhongkong

*♡♡小肥豬♡♡* | 21st Jun 2013 | 靚太廚房 | (285 Reads)
20 JUNE 2013(THU)

尋日係FACEBOOKB見朋友仔整左一個啫喱卷,見好靚又得意,所以就請教左朋友仔,今日買整材料就開工整啦!

依個就係我嘅製成品....士多啤梨啫喱卷~


材料~

我今次先整士多啤梨味啫喱粉~


再加入一湯匙魚膠粉~


加入一杯水拌勻(量米用的SIZE)~


用最細火煲至完全溶晒~


準備一杯細棉花糖~


之後倒埋落去~


煮至完全溶晒~

倒入玻璃器皿之後用手提打蛋器打约三分鐘~


最好就打到起多啲泡泡,因為泡泡越多,啫喱卷就會越靚~

等待五分鐘~


用長形盛載器放上保鮮紙~

倒下啫喱放入雪櫃雪至凝固~

開始卷啦~


如果想切得靚啲,可以利用牙線界開~


就係咁....好靚啫喱卷就完成啦~


開頭都好驚整唔到,不過我都算卷得幾靚呀,只係厚度方面就唔係掌握得好好,有啲大又細咁,不過見到咁靚,都已經好有成功感呀!

*♡♡小肥豬♡♡* | 20th Jun 2013 | 小小豬篇 | (28 Reads)
20 JUNE 2013(THU)

今日送完小小豬入課室之後,班主任老師就叫我唔好走住,當時心諗:C 啦..小小豬又係學校做左啲咩衰乜,等老師又嚟大投訴!

點知....原來老師唔係投訴,佢拎依份小禮物出嚟,話係送俾小小豬呀~

老師話由小小豬入學時係一個BB,到依家唔可以話學識左好多嘢,不過就有好明顯嘅好大嘅進步,加上小小豬K1又會轉校,老師好唔捨得佢,所以就送依份小禮物做一個記錄。

依個係一塊水松板,老師話等小小豬掛係屋企,可以貼啲手工上去呀~

收到禮物嘅時候真係開心都唔識形容,仲要老師話只係小小豬先有,嗰一刻真係勁感動,雖然都只係一份小禮物,不過依一份心意真係無價,原來係老師心目中,依個百厭又攪事嘅小小豬都有一個小位置,老師真係好錫小小豬,相信小小豬嘅進步好大機會都係老師耐心咁教佢先可以成功呀!

依一刻攪到我都真係好唔想轉校,唔想小小豬離開一個咁錫佢嘅老師呀!

某程度上我亦都有為小小豬自豪,都係因為佢越來越進步,老師先會越來越鍚佢。希望依個百厭豬豬可以KEEP住慢慢有改善,咁就可以繼續做一個人見人愛嘅好寶寶啦!

*♡♡小肥豬♡♡* | 19th Jun 2013 | 靚太廚房 | (262 Reads)
18 JUNE 2013(TUE)

尋日係FACEBOOK光波食譜群組見到有朋友仔整左個光波骨,剛好今日行百佳時見到有幾條豬骨好新鮮,肥厚度又適中,所以今日又嚟整個新攪作.....光波蒜香金沙骨~


材料都係好簡單,只需要食三樣材料~


用左半個蒜頭啄成蒜蓉~

再加一包美味醬~


拌勻之後醃兩小時~


我用250度每邊光10分鐘~


簡簡單單又完成左一個新餸啦~


味道就真係唔錯,大肥豬同小豬爸都邊食邊讚。不過我就覺得燶左少少,要努力改善一下控火技巧。

之後我去返群組問啲波友意見,佢地都教我要教低少少個溫度,寧願時間長少少,都好過OVER左呀!哈哈哈....等我下次再試吓先,到時應該係會靚仔啲啦!

*♡♡小肥豬♡♡* | 18th Jun 2013 | 好友與我 | (40 Reads)
18 JUNE 2013(TUE)

今日送完小小豬返學之後,就去左好姊妹糖糖公司附近等佢,因為佢有份小禮物俾我呀!

嘩.....咪就係佢自家品牌嘅鴨仔馬卡龍啦~


啲鴨仔真係好得意呀~


唔止得個樣,個味道都真係唔錯,我覺得個甜度都可以接受,加埋個士多啤梨醬一齊食,我覺得個味道又真係幾MATCH,整體嚟講係......好正呀~


不過講起.都真係有啲唔開心,因為其實.....原本我都係可以自己去整呀!

事緣我之前整完光波蛋糕之後,都有去過吓網上食譜,打算自己自學整啲馬卡龍,點知試過我都係失敗左,整左出嚟完全同馬卡龍係兩回事,所以都開始放棄唔再整。

就係我想放棄之際,見到有團購開班教整馬卡龍,咁就叫埋糖糖一齊去學,我地仲已經BOOK埋16號去學添。正當我地滿心期待咁等去學整鴨仔時,糖糖突然醒起16號係父親節,真係大件事,雖然我係好想去學,不過我要同老爺食飯嘛,想打去改期時,原來我地買團購時已經講明BOOK左係唔可以改,就係咁......我就去唔到,要糖糖一個人去學,我都真係好唔好意思添呀!

依家糖糖學識左,咁就可以捉佢上嚟我屋企教我整啦!希望好快就可以POST我自家製成品啦!

*♡♡小肥豬♡♡* | 17th Jun 2013 | 小小豬篇 | (30 Reads)
15 JUNE 2013(SAT)

繼尋日係小豬媽生日之後,今日就到大肥豬牛一啦!

原本一早PLAN好左入迪迪尼玩加食HIGH TEA慶祝,不過天公真係不造美,整天都係天陰陰又間唔中落雨,所以有咁好節目都係要取消,邊度都冇得去,留左係屋企休息...休息....再休息。

始終今日都算係重要日子,又點可以隨便過呢,所以我買左小蛋糕返屋企同大肥豬慶祝啦~


一見到個蛋糕,最興奮嘅當然又係依個為食嘅小小豬!我地未唱生日歌佢已經急住足蠟燭啦~



蛋糕都未切就已經開始偷食啦~

最後乖乖同大肥豬一齊切蛋糕啦~


哈哈哈....今日得三口子慶祝,所以冇人同我地影合照,不過大肥豬就建議拎部DV出嚟拍低小小豬唱生日歌時個樣,就係因為佢有用DV拍片,所以係DV度就可以影左我地三口子嘅開心相呀~


雖然係濛左啲啲,但真係可以睇得出我地三口子嘅開心樣,尤其係第一張小小豬隻手V個POSE,真係好得意,都係第一次見佢咁整呀!

今日就簡單咁慶祝,不過大肥豬話都已經好開心,因為有我同小小豬陪佢一齊過嘛.....哈哈哈!

*♡♡小肥豬♡♡* | 16th Jun 2013 | 小小豬篇 | (23 Reads)
14 JUNE 2013(FRI)

今日係小豬媽新曆生日,過多幾日又係父親節,所以我地一家人開開心心去食自助餐,同小豬媽慶祝生日兼同小豬爸預祝父親節。

上年父親節都係去北角城巿花園食Buffet,雖然食物種類唔算多,又冇生蠔食,不過啲食物都算新鮮,回得都快,最好就係近我地,唔洗周圍去嘛~

今日都算多嘢食呀~

係未開始食之前,小小豬都好乖乖咁坐定定~

不過...開始食之後,睇下佢食得幾滋味。我地有我地影,佢有佢食,真係激C人啦~

原本都買個小蛋糕俾小豬媽切下,不過小豬媽話農曆已經切左蛋糕,加上帶埋個蛋糕去食食自助餐好唔抵,所以就拎左個小蛋糕,再問職員拎支小蠟燭,嚟個簡單又隆重嘅慶祝生日活動啦~

小小豬陪小豬媽吹蠟燭,SO SWEET~

再嚟KISS KISS續格睇,真係羡慕C人啦~

一個開心嘅慶祝晚上就係愉快中渡過了!祝小豬媽日日都KEEP住開開心心,所以煩惱事都遠離,最重要係身體健康!

*♡♡小肥豬♡♡* | 15th Jun 2013 | 小小豬篇 | (23 Reads)
13 JUNE 2013(THU)

經過上星期家長講故事之後,今日我又再返學校同小朋友講故事啦!

不過,今日因為小豬媽有事做,唔可以陪我一齊去,所以就冇人同我影低我講故事嘅情況。

可能我已經係第二次去講故事,所以我一入課室好多小朋友都已經認得我,好大聲咁叫AUNTIE...AUNTIE,令我覺得一份好親切感覺呀!

今日講左一個關於偏食嘅故事,小朋友們都好留心聽,仲同我有好多互動,我問佢地問題時,佢地又好熱烈咁回答,答案又真係出乎意料,好攪笑呀!

今次由於係關於偏食嘅故事,所以我準備左每人一個小蘋果俾佢地作為一個小禮物。開頭我都好驚佢地會即刻拎嚟食,不過好在每個小朋友都好乖好聽話,話返到屋企先食。如果唔係到時加添老師工作量,又真係唔好意思啦!

活動完結前,係影大合照時個個小朋友都話要同我坐,嗰個滿足感真係令我勁興奮呀~

其實....我覺得依個活動真係好有意思,除左可以同小朋友分享故事之外,另一方面對我地大人都係有得著,有時佢地諗啲嘢好似係天馬行空,但其實都係同個故事有關聯,真係可以訓練埋我個腦筋呀!

相信係依間學校都未必會再有機會,如果小小豬學校再有依啲活動,真係要再參加先得呀!

*♡♡小肥豬♡♡* | 14th Jun 2013 | 小小豬篇 | (11 Reads)
11 JUNE 2013(TUE)

係未講今個暑期有什麼節目之前,先同大家分享今日影嘅一張小小豬型照先。

嘩哈哈...COOL到爆嘅浴照呀~


見小小豬今日洗白白時玩水玩得好開心,咁我咪拎部相機入去,諗住影佢啲開心樣。點知小小豬一見到我部相機就即刻收埋佢嘅笑容,擺出一個COOL樣望住我,真係俾佢激C呀!

不過,平日見得佢開心笑樣多,間唔中睇吓佢個CHOK樣,都幾好呀!小小豬依個樣真係好有型呀.....哈哈哈!

講返正題,今年可以算係小小豬正正式式嘅第一個暑假,為左唔想佢留係屋企成個幾月,所以都有諗過搵啲暑期班俾佢去玩吓。一嚟可以唔洗成日係屋企,有啲嘢學吓都係好事,二嚟又可以識多啲朋友仔。

原本佢依家讀緊PN幼稚園都有開班,要抽籤之餘仲要比依家返學交嘅學費貴好多,返六個星期就相等於交兩個月嘅學費,我地都覺得唔太值得,所以就冇報,打算搵啲外面機構嘅暑期班。

不過,原來都唔易搵,好多都係由三歲開始,終於俾大肥豬係屋企附近嘅社區中心搵到啲啱小小豬嘅活動,所以小小豬暑期有得去玩啦~


哈哈哈...兩個都係有關啲唱歌跳舞班,因為始終覺得依家嘅小小豬都係適合依啲活動,太過學術性反而怕佢唔鐘意又唔吸收,到時返暑期班又會唔乖啦!

*♡♡小肥豬♡♡* | 13th Jun 2013 | 小小豬篇 | (14 Reads)
10 JUNE 2013(MON)

小小豬又大一個月......34個月啦,過多兩個月就三歲,又係時候開始PLAN定點同佢慶祝生日啦!

因為前幾日同小豬媽慶祝農曆生日食過蛋糕,所以今個月慶就唔買蛋糕,改請小小豬食佢近期至愛OREO啦!

其實我地都冇刻意俾佢食OREO,不過早排大肥豬教小小豬睇報紙時,係報紙上面介紹過一次OREO,開頭我地都冇為意,點知有一次行超市時經過餅乾部,小小豬就好大聲咁話:OREO餅乾...OREO餅乾。

見佢咁好記性,又俾我搵到唔係朱古力味嗰款(因為到依家我都係唔俾小小豬食朱古力),所以就買左一盒等佢乖乖時,作為一個小獎勵俾佢食。

睇吓佢...一見到OREO個樣幾古惑~


仲識得檸開嚟食添~

嘩...好滋味嘅樣,歎到呢~

食食吓仲傻左咁大笑添~


依個為食仔真係冇佢收,真係為食到冇朋友,一有得食就乜都得,一包少少嘅餅仔都可以食得咁滿足又開心,依啲亦都係小朋友童珍嘅一面,有自己鐘意食嘅嘢就開心啦!

*♡♡小肥豬♡♡* | 12th Jun 2013 | 小小豬篇 | (132 Reads)
9 JUNE 2013(SUN)

繼早前母親節親子勞作之後,今個星期小小豬學校又有功課做,咪就係父親節親子勞作啦~


哈哈哈....今次依個任務就交由我負責,等我同小小豬親子一吓啦!我就負責諗整乜同剪剪剪嘅部分,小小豬就負責貼貼啦~


之前我地係屋企做手工,都係用漿糊。不過大肥豬話等小小豬學習用唔同嘅物料,所以就第一次用膠水啦~


可能膠水使用個方法比漿糊好,所以小小豬好快就唔洗我幫手,自己一手一腳貼啲圖案,睇吓佢幾專心~


等我完成埋最後一個步驟~


我同小小豬合力整嘅父親節禮物就完成啦~


哈哈哈...點解整個車手工?咪就係因為大肥豬成日都話要買車,咁就可以車我地周圍去玩。不過,買車都仍然係十畫都未得,所以整個小手工,滿足一吓大肥豬先啦!

*♡♡小肥豬♡♡* | 11th Jun 2013 | 小小豬篇 | (11 Reads)
9 JUNE 2013(SUN)

早前大肥豬見有優惠,所以就送左兩張全年証俾我,話可以成日帶我去玩哦!不過....我知道其實佢最主要目的都係想帶小小豬去睇多啲動物,等佢可以多啲靜態活動!

今日見都冇乜特別嘢做,所以就入去行返轉啦~


上次入場小小豬都好留心睇熊貓,所以第一個目的地就去睇熊貓啦!點知........熊貓影都唔見,睇吓小小豬幾失望~


熊貓就冇,等左好耐先見到一隻小熊貓~


不過,小小豬好似對啲熊貓教具有興趣啲哦~


離開熊貓館,見到有水瀨表演呀~


行去兒童王國時,剛好係威威劇場有表演,所以又去睇啦~


小小豬睇得幾專心~


小小豬一見到小火車,就急急腳行去排隊上車玩啦~


玩完又渣一陣車仔先~


哈哈哈...幸福摩天輪,不過第一次玩小小豬好似驚驚咁,唔太ENJOY咁呀~

全日唯一的三口子合照~


玩完又有表演睇~

又係睇表演~



不過小小豬好似唔太鐘意啲雀仔,睇嘅時候唔算\專心,仲驚驚地添~

玩完兒童王國準備上山繼續玩之際,就落左一場大雨,為免小小豬淋雨,最後等細雨啲就走人,真係掃興。不過,依家有全年證,可以幾時入嚟都得啦!

話時話,今日都真係唔多人,內地人又唔算多,我地玩嘅活動又唔洗排隊,所以都算玩得舒服。如果次次入嚟都係咁就好啦!

Next