香港新浪網 MySinaBlog
*♡♡小肥豬♡♡* | 31st May 2013 | 靚太廚房 | (207 Reads)
30 MAY 2013(THU)

芒果小丸子一向都係我至愛,每一次去糖食店我都一定會點依一樣甜品。自從成功整左兩次雪葩之後,我就開始諗其實都可以係屋企自己整,諗左好耐終於今日落手,整左個好好味嘅芒果小丸子啦~


材料就只需要依兩樣咁簡單~


其實開頭我都一直搵緊啲小丸子可以係邊度買,當然係搵左好耐都搵唔到啦!最後都決定自己搓,其實都唔係好難,個做法都係同整湯圓咁,糯米粉加暖水搓,之後搓成細細粒。不過我嘅搓功唔係太好,所以就粒大粒細...哈哈哈~


之後就煲滾水,落小丸子,滾到滾啲小丸子浮面就即係熟啦~


用凍水浸住,等啲小丸子可以彈牙啲。再連水一齊放入雪櫃雪一陣備用~

先將一粒半嘅芒果切粒粒,放入雪櫃雪一陣備用~


再將兩個半嘅芒果用果汁機打成芒果漿,放入雪櫃雪一陣備用~

最後,將芒果漿放在碗上,再放啲小丸子同埋芒果粒,就係咁一個好好味嘅芒果小丸子就完成啦~


除左其中一個芒果酸左少少之外,整體都真係好好味,好有滿足感呀....呵呵呵!


*♡♡小肥豬♡♡* | 30th May 2013 | 生活點滴 | (43 Reads)
29 MAY 2013(WED)

話說小豬媽係我二十歲嘅時候,送左一隻玉鈪俾我,咁我就由嗰時開始戴住,大大話話都可以講陪左我十N年。因時間嘅洗禮,我都手鈪位置都已經俾我戴到有兩節色同埋嗰個位已經笠左啦~

陪我經歷咁多風風雨雨,玉鈪依然都係冇事。係我上次搬屋時都只係撞裂左少少,不過都仍然係可以戴到依家。不過點都估唔到,最終都係敵唔過我嘅肥肉。

因為玉鈪已經係我手碗上郁唔到,只係勉強咁可以向前移少少。不過依排天氣熱到C,係我啲肥肉再加冷縮熱脹影響下,玉鈪啜到隻手碗骨好痛。

其實都已經痛左好幾日,都打算繼續忍落好,因為始終都係好唔捨得。不過到左今日,真係痛得好利害,痛到舊骨好似發炎般脹左。終於係小豬媽嘅建議之下,要扑爛佢啦~

當然係由媽咪操刀~

就係小豬媽一扑,玉鈪就同我SAY GOODBYE啦~

講真,扑落去嗰吓真係好肉痛呀!

雖然已經舊左,不過我都已經將依四節好好收藏,因為小豬媽話可以拎去金鋪鑲返好佢,整過其他玉墜俾小小豬戴,都可以留一個紀念呀!

*♡♡小肥豬♡♡* | 29th May 2013 | 靚太廚房 | (172 Reads)
28 MAY 2013(TUE)

開始踏入夏天,真係熱到胃口都冇晒,都係時候要煮返啲開胃嘅餸先得。所以小豬媽今日就係美味娘娘度學左一個好啱夏天食,又有我至愛嘅咸菜同蜆肉,就係好吸引嘅....咸菜韮菜炒蜆肉~


哈哈哈...睇賣相都已經覺得好吸引呢!其實煮嘅都唔難,都可以算OK易啦!

主角之一...咸酸菜~

先將咸酸菜洗淨切片,用鹽水浸約兩小時,令啲咸味減少啲啲~


另一主角...蜆肉,我地買嘅係新鮮即開嘅,所以特別大粒同鮮甜呀~

洗淨後抹乾水份,鑊中燒開水落少許鹽,大滾後熄火,放下蜆肉約2分鐘,備用~


韭菜同薑片洗後切好備用~

準備好晒材料就可以開始煮啦!

燒熱油鑊,放下蒜蓉炒香後加入咸菜,加入糖和蠔油,再放入蜆肉炒一陣,加入韭菜同炒約2-3分鐘,最後埋一個生粉芡,就咁就完成啦~


依個餸真係好開胃醒胃,加上又簡單易整,真係可以係夏天煮多啲,醒醒胃呀!

*♡♡小肥豬♡♡* | 28th May 2013 | 生活點滴, 小小豬篇 | (59 Reads)
28 MAY 2013(TUE)

今日依篇BLOG係叫做擔心,咁我擔心啲咩呢?

係未講我擔心咩事之前,等我先嚟分享一吓小小豬嘅攪笑相先啦~


依個小小豬,依排到唔知仲乜,成日都都好鐘意攬實。之前就鐘意無端端攪實我地,不過我地覺得咁做法都唔係太好。雖然佢攬實我地時都真係幾冧(因為佢真係好嗲咁抱到你實一實),不過我地唔想養成痴身習慣,所以依排佢要攬實嘅時候,我地都同佢講話要做家務,盡量唔俾佢攬我地。

唔知幾時開始,佢就轉移攬其他嘢,先嚟攬佢至愛嘅公仔,前幾日就開始攬RODY。雖然都唔係啲什麼壤事,不過始終都唔想小小豬養成習慣,所以真係要慢慢開始教佢唔好成日無端端攬嘢啦!

始終係男仔嚟嘛,成日都無端端攬嘢,好似唔多MAN呀!

好啦!講返正題。我擔心啲乜,咪就係個YAHOO BLOG呀!

其實自從升級之後,好多BLOGGER都已經冇寫,我亦都同好多聯絡開嘅BLOOGER失散左。不過依一個BLOG大大話話我都寫左六年有多,由我拍拖寫到結婚,再寫到依家小小豬就嚟三歲,好多點點滴滴都係網誌上同大家分享。有時自己睇返啲舊POST,都會回想起當時嘅回憶,係一件好開心嘅事,所以到依家我地KEEP住繼續寫,希望一路寫落去,等到小小豬大個時可以自己睇返,睇吓佢啲百厭事。

雖然一路寫嘅時候,都會遇到啲小問題,甚至係復活節時段都曾經話我BLOG遺失左,要停幾日等小小編幫我維修好先可以繼續。

不過,今日就發現左另一個問題,就係限字數,文章字限為16,000字元(包括HTML編碼),我亦都試過因為多相,係發表之後就冇左一部分,又要重新打過篇BLOG(真係一番心機冇晒..嗰吓真係好唔開心呀)。雖然我唔識HTML編碼,不過睇返啲BLOG友仔講,其實即係唔可以POST好多相同好多字。

平日寫啲我都唔算多,不過真係好鐘意同大家分享小小豬嘅開心攪笑相,所以一聽到話唔可以放多相,都真係有啲唔開心呀!

我一直都對YAHOO BLOG充滿信心,因為我次次出問題時,小小編都好快同我維修。不過,今次限字數都係大圍數,唔知幾時先可以整返好。希望可以快啲有好消息,等我地繼續可以放心又安心咁繼續寫BLOG呀!

雖然依家有一個小問題,不過我對我對YAHOO BLOG都仍然係不離不棄,我會繼續寫,直至唔可以再寫嘅時候,因為寫BLOG已經變成我生活中一件重要嘅事嘛!

係有信心,不過我都擔心YAHOO BLOG始終會有壞/唔可以再寫嘅一日,咁大家就唔可以繼續見證小小豬成長。所以......如果大家有興趣,可以去我微博、同FACEBOOK,我會成日更新小小豬靚相呀!(如想FACEBOOK上ADD我,請話俾我知你係BLOG友仔,等我可以即刻ADD你地呀)

MY FACEBOOK~


MY WEIBO~


*♡♡小肥豬♡♡* | 27th May 2013 | 小小豬篇 | (27 Reads)
26 MAY 2013(SUN)

想睇Rubber Duck真係可以話一波幾節,首先係第一次PLAN好行程嘅時候,巨鴨就病左要休息。到巨鴨病好左,就到旁邊嘅小鴨,其中一組被收起等周圍環境可以做檢查。到齊晒鴨仔,就嚟黑雨去唔到。

開頭都以為我地同鴨仔冇緣份,不過今日一切都好順利,所以我地終於都可以去見到Rubber Duck啦~


Rubber Duck真係好得意,睇吓我地幾興奮~

當然唔少得同啲小鴨影啦~


大家放心,我地係好愛錫依啲可愛嘅小鴨,所以小小豬同鴨仔影嗰啲相,都係我地抱住小小豬嚟影,絕對冇企上鴨仔度呀!不過見好多人(尤其係大人)又企又踏又坐上鴨仔上,都真係覺得小鴨好慘呀!

影完依個位置,我地就轉戰停車場上面睇鴨仔,咁可以全面啲!睇吓....真係勁多人呀~


不過依個位置真係勁大風,所以影少少就走啦~


最後去返海港城樓梯影側面~


其實依個位置影係仲靚呀~


依一隻鴨仔真係好利害,可以吸引到咁多人嚟同佢影相。其實我地都算遲嚟影,一心諗住都唔會咁多人,點知真係多人都嚇親,每一張相都係好辛苦咁迫入去影,所以話鴨仔嘅魔力真係好大,全城為鴨瘋狂呀(當然...我地係其中一份子啦...哈哈哈)!

*♡♡小肥豬♡♡* | 26th May 2013 | 靚太廚房 | (38 Reads)
25 MAY 2013(SAT)

今日口痕痕,所以就整左個既簡單又方便嘅涼拌小食俾自己食,過下口癮啦~


哈哈...其實依個蒜蓉拍青瓜材料都係一樣咁簡單,基本上屋企都齊晒材料,我都只係買左青瓜返嚟就做得啦~


先將青瓜洗乾淨去頭尾,然後用刀將青瓜拍散切段,加入少少鹽,放入雪櫃嘅下格雪三十分鐘左右~


將醋、糖、魚露、麻油及蒜蓉攪拌好。份量都係因人已異,不過我覺得加多啲醋同蒜蓉就仲好味啲呀~


取出青瓜,倒水後再用紙抺乾水,之後放入去個調味料再拌勻~


再放入雪櫃雪凍啲啲,咁就食得啦~


簡簡單單又做到一個小食,就係咁又過左一個滿足嘅下午茶啦!

*♡♡小肥豬♡♡* | 25th May 2013 | 小小豬篇 | (17 Reads)
24 MAY 2013(FRI)

之前係SHEMOM見到有一個叫做「Think Blue. 藍‧創未來海洋公園之夜」抽獎活動,師奶仔嘅我當然都玩埋一份。好好彩我抽到四張入場卷,不過因為係平日關係,大肥豬就唔方便請假同我地去,所以就係小豬媽、小豬爸同埋LULU妹一齊帶埋小小豬入去玩返一個下午啦~

第一個目的地,當然係最新開嘅懐舊街啦(其實都唔係新,只係我地真係NNNNNNNN年冇入過嚟海洋公呀)~


第二個目的地就係去睇熊貓,不過今日真係唔係幾好日,得返一隻熊貓(仲要瞓左覺覺豬)出嚟同大家見面~


雖然係咁,小小豬都好留心咁睇住隻熊貓~


一場嚟到,當然都影吓相,到此一遊嘛~



睇埋魚仔,我地就去SHOP攪攪陣吓先~


之後就入兒童王國俾小小豬玩一陣啦~


搭火車上山繼續玩啦~


當然即刻去搵企鵝啦~



第一次見啲企鵝,真係好可愛呀!不過場內真係好冷,所以我地都係睇左一陣之後就走啦~


再嚟攪攪震~

就係依個時候,小豬媽都攰攰地,所以我地係時候搵個地方俾大家休息一吓,原本都想入企篤餐廳,不過見啲食物都好似唔太啱小豬媽。最後竟然係啲小店見到有啲湯麵,所以決定係依度開餐啦!

就係我去買嘢食啲時候,小小豬唔知點解可以問到個姐姐送個氣球俾佢(係攤位姐姐送俾佢呀),所以就同LULU妹玩到傻左啦~


開餐了~


睇吓個為食豬,食得好狼C呀~

休息過後,我地去埋熱帶區睇動物,之後就搭返火車落山準備睇水龍表演啦~


夢幻水都個「雙龍奇緣」表現真係好正,不過依個細膽嘅小小豬一見啲火噴出嚟嘅時候,佢就開始驚驚,之後全程都要攬到實一實,真係冇用豬呀!

原本我地係可以玩到十點呀,不過有小小豬同行,又點可以玩到咁夜呢!所以我地睇完水龍表演,去睇埋個水族館,之後就走啦!

睇吓...小小豬已經謝晒啦,緊係啦...一早就返學,放左學就即刻入嚟玩,冇晒能量啦~

其實我地今日都仲有好多地方未行,不過時間關係,我地都係集中去睇動物。雖然小小豬都係第一次嚟,我覺得佢都幾鐘意睇動物,去到每一個館都好留心咁睇,所以都應該會帶多啲佢入嚟玩,等佢認識多啲唔同種類嘅動物,都係一種好好嘅教學呀! 

*♡♡小肥豬♡♡* | 24th May 2013 | 小小豬篇 | (18 Reads)
23 MAY 2013(THU)

今日天氣都真係唔錯,所以係又時候帶小小豬去放一放電啦!

不過,今日依一個公園放電,小小豬玩嘅嘢好似唔同左,已經不咁於玩滑梯,開始玩啲大個仔玩意,亦即係開始做一個百厭大膽豬啦!

大膽事件一:睇吓佢...揸實個扶手,遙遙遙,仲要笑到咁開心,真係冇佢收呀~


大膽事件二:之前都曾經教過小小豬行依個繩網,不過都總係驚驚慌慌咁,唔肯嘗試。點知今日突然間肯行過嚟,開頭都係驚驚慢慢行~


行左兩次之後,開始好順暢,行得都好好呀~

最後仲得得戚咁單手行,真係冇佢收呀~

個傻仔真係行得好快...哈哈哈~

大膽事件三:今日都係第一次教佢爬依個,點知教左一次之後,就已經識得爬,都爬得好好呀~

哈哈哈...個傻仔真係爬得好快呀~

雖然小小豬識玩多幾樣大個仔玩意都係一件好事,起碼證明佢已經大個仔,唔再係BB嘛!不過亦都因為咁,下次去公園玩都真係要加倍眼力去睇住佢,始終都依啲玩意都係比較危險嘛!

唉...又要辛苦多啲睇住隻百厭大膽豬啦!

*♡♡小肥豬♡♡* | 23rd May 2013 | 好友與我, 靚太廚房 | (125 Reads)
19 MAY 2013(SUN)

依排Rubber Duck可以話係全香港嘅熱點,真係每個人嘅話題都係離唔開依隻黃色巨鴨。我原本都打算係上星期帶小小豬去同鴨仔玩,不過鴨仔就休息緊。希望鴨仔快啲好返,等小小豬可以見吓佢啦!

未可以會一會Rubber Duck,就等我先嚟個自家鴨仔飯啦~


哈哈哈...係唔係好似呢?事緣早幾日睇BABY KINGDOM,見到有位媽媽教整鴨仔飯,我見好似都係好簡單咁,所以又買齊啲材料打算今日整。見糖糖又冇節目,所以就叫埋佢一齊嚟整鴨仔啦!

其實啲材料真係好簡單,最難買嘅都可以話係依個黃薑粉,因為用左佢之後就可以令到啲飯變成黃色呀!我行左好幾間店都買唔到,最後係買印尼食品店先買到呀~


將二杯珍珠米洗乾淨,香茅一條切段及拍扁~


放入一罐小椰漿~

黃薑粉1.5湯匙~


加入適量水,好似平日煲飯一樣~


飯好就開始整造型啦~


紫菜做眼睛,沙津醬做眼珠,紅蘿蔔做咀~


用保鮮紙包住啲飯嚟整,好努力猜..猜...猜呀~


開始成形啦~


哈哈哈....當睇見隻鴨仔成左型,真係有一種勁興奮嘅感覺,勁開心呀~


最後加埋咖哩汁,就完成啦~


糖糖嘅傑作~


我嘅傑作~


唔係自己讚自己,真係好靚呀~

哈哈哈...整嘅過程都真係好好玩,仲極度興奮添,一見鴨仔成左個型,都叫做算似樣時,嗰一種滿足感真係難以形容。

不過.....可能係我地食唔慣嗰一種黃薑味,所以只可以話味道麻麻地。其實如果需要將啲飯變成黃色的話,可以試吓用咖哩粉,相信都一樣可以有依個效果,同埋都應該個味道係會好啲,等我下次再試吓先得!





**我的微博..關注吧**



*♡♡小肥豬♡♡* | 22nd May 2013 | 博客分享, 好友與我 | (43 Reads)
19 MAY 2013(SUN)

話說之前得到香港醫學抗衰老中心邀請,免費試做四次療程,體驗一吓佢地最新出的MediLASE 755nm無痛激光永久脫毛。

繼早前參加左拍攝宣傳照之後,今日約埋好姊妹糖糖一齊去位於尖沙咀嘅店舖,進行首次療程啦~

到達後,先簡單填寫個人資料,之後等多一陣,就可以入房進行首次激光脫毛。 療程房間十分乾淨整潔,各樣設備都好齊全~


今次做機嘅係用MediLASE引入既革新激光脫毛技術 Candela GentleLase,它榮獲美國鐳射醫學會評鑑為 "最佳脫毛科技" 及美國Golden Standard "激光脫毛的黃金標準"。

Candela GentleLase使用之治療放射機頭為18mm,可大範圍覆蓋肌膚,同時輸出更高能量激光, 加快療程速度。755nm波長激光,只被皮膚毛囊吸收,瓦解黑色素,安全無副作用,不會損及周邊肌膚。此外,而獨有Dynamic Cooling Device專利智慧型動態冷卻系統,放激光發射前後均發放-20度霧態水感冷凍劑, 冷凍和鎮靜肌膚,提供額外舒緩和保護,可以減低表皮被灼傷的機會。

我今次的位置是前手臂,睇吓我啲手毛真係好多呀~


係未開始正式做療程時,治療師就幫我先做一件事,就係幫我先剃走手臂上的毛毛。其實應該係要前事剃好晒先去做療程,不過我自己就冇留意,所以要麻煩治療師,真係唔好意思啦!

做激光脫毛前,治療師先在上手臂試下,俾我試下個感覺和皮膚對激光反應,試完沒有任何不紅腫,就可以正式進行療程。

療程進行前,需帶上眼罩,以確保眼睛嘅安全~


其實當治療師幫我做療程時,就好似俾氣槍射左一下咁。雖然療程係話無痛,不過可能係我第一次接觸,加埋我啲緊張,唔多唔少都有啲唔自然嘅感覺。治療師見我緊張,就慢慢幫我一吓一吓咁做,等我可以適應~

成個過程大約十五分鐘左右,因為我緊張關係,兩隻前手臂都係慢慢嚟打,仲要係全手360度都要打,所以其實都唔算耐啦!

最後,治療師會搽上LOTIO,保護皮膚~

完成後,皮膚有少許紅,不過都係正常現象~


我做完療程之後,就到糖糖。就係等糖糖嘅時候,分區經理Maggie同我傾左一陣,仲好詳細講解療程所注意的事項呀!

六星期後會再去做第二次療程,不過到時就唔可以約埋糖糖一齊去,因為我地所選擇嘅位置唔同。下次自己一個人去仲會緊張啲添,到時再同大家分享啦!

想了解更多有關佢地療程的資料,可以登入MediLASE網址:http://www.medilase.com.hk/home.html








**我的微博..關注吧**


*♡♡小肥豬♡♡* | 21st May 2013 | 小小豬篇 | (65 Reads)
18 MAY 2013(SAT)

今日我地又去左個新地方玩,就係去左油塘大本營入面個J-PLUS玩啦!其實都唔係一個新地方,依個場都開左大半年,只係我地今日先第一次去玩呀!

入J-PLUS玩,當然最主要目的就係去個波波池。$40一節二十分鐘,不過今次我地俾多左一個成人費用($30),兩個人一齊入去陪小小豬玩呀!

依個波波池真係好大,都有好多嘢玩,不過小小豬都係至愛玩波波,睇佢玩得幾開心~


玩啲波波真係開心到傻左呀~


由於我地都只係買左一節時間,所以20分鐘轉眼就過左啦,又係時候BYEBYE呀~

小小豬都好乖,雖然佢玩得好開心,不過走嘅時候都冇話唔肯走,好乖乖咁同個波波池講BYEBYE呀!都算佢係GOOD BOY啦,依個場都算近我地,所以我應該會成日帶小小豬嚟依度玩呀!





**我的微博..關注吧**

*♡♡小肥豬♡♡* | 20th May 2013 | 小小豬篇 | (18 Reads)
14 MAY 2013(TUE)

今日一早起身,真係衫都未換,小小豬又嚟做左啲攪笑事。

嘩...仲乜坐都咁醜樣呀!大家睇埋佢啲腳指,真係俾佢激C我啦~


都唔明白佢,一本食譜都可以睇得咁專心,真係好似睇得明咁哦~


仲跟住嚟讀添....當然只係讀啲數字啦~


扮可愛嘅樣~


好似好多嘢諗哦~


自己睇仲唔止,仲要叫埋大肥豬一齊睇。個傻豬仔仲要大肥豬讀啲食譜步驟俾佢聽,睇吓佢聽得幾興奮呀~


依一本都係食譜,對佢嚟講都真係唔知有乜好睇(可以係睇啲公仔啦),小小豬竟然可以睇住依本小食譜成大半個鐘,平日睇佢啲小圖書又唔見可以睇咁耐,真係唔知好嬲定好笑!

不過,小小豬肯主動咁拎本書仔好乖乖坐定定,好專心咁閱讀都係一件好事。算啦,依家小小豬都算仲細,所以先就等佢鐘意睇書先,培養佢閱讀習慣,到佢愛上閱讀之後,慢慢再教佢睇書嘅種類啦!





**我的微博..關注吧**

*♡♡小肥豬♡♡* | 19th May 2013 | 博客分享 | (17 Reads)
13 MAY 2013(MON)

多謝PR姐姐,五月號嘅《樂活。家 FAM》收到啦~


今期主題係《成就右腦孫子》,其實就即係協助小朋友如何走過讀寫障礙的辛酸路~


仲有為家長提供量表,從日常生活中初步辨識孩子是否存在學習障礙的問題~


其實都仲有四個個案分享,我睇完之後都對讀寫障礙有更多嘅認識。雖然小小豬暫時都應該未有依個問題(相信都應該唔會有),不過佢地嘅分享,我亦都吸收左少少教學心態,希望到大個少少教小小豬讀書時,可以留意一吓啦!

好鐘意睇『不一樣父母』,因為可以睇多啲人地嘅教小朋友方法從中偷師,希望可以用佢地嘅好方法嚟教好小小豬~

『樂遊悠』一欄走訪台灣藝術館、博物館,體驗藝術,親子旅行啦~


話時話,我都真係好想帶小小豬一齊去台灣玩,唔知幾時先可以有機會呢?哈哈哈!

有興趣知多啲《樂活。家 FAM》嘅內容,可以去佢地網址睇吓:http://famworld.com.hk/ 或者FACEBOOK專頁https://www.facebook.com/famworldhk





**我的微博..關注吧**

*♡♡小肥豬♡♡* | 18th May 2013 | 靚太廚房 | (157 Reads)
11 MAY 2013(SAT)

自大肥豬睇完肥媽教煮炒飯嗰一集之後,成日都叫整炒飯佢食。雖然炒飯都係一件好似好易整嘅事,不過總係覺得好似好難,但其實我都幾怕。一嚟炒嘅時候要不停炒,真係會炒到手都軟,二嚟我真係好怕控制個火,因為都曾經炒燶過一次,真係唔多敢再試。所以之前係屋企食嘅炒飯,都係大肥豬負責,我.......怕怕啦!

雖然係怕,不過既然大肥豬又鐘意食,所以我點都要學再試吓。

今早買餸時係壽司店見到剛剛新鮮出嘅三文魚骨,所以我就買左兩份,係小豬媽教路之下,整左個勁足料三文魚炒飯啦~


話明係足籵,當然係要好多餸啦~


先將啲三文魚骨煎香之後拆肉(我覺得成個炒飯最花心機就係依個步驟),切左粒嘅午餐肉同火腿都要煎熟先呀~


由於大部分餸都已經炒熟,所以主要都係炒飯。先燒紅個鑊,等啲油熱左之後,就落飯炒勻,炒到啲飯冇一舊舊嘅時候,就落蛋汁。依個時候一定要快炒,因為等啲蛋可以均勻啲同埋唔好燶。最後放入栗米、三文魚肉、午餐肉、火腿及菜絲,再加少少鹽,炒至所有餸都均勻之後,咁就完成啦~


可能係曾經失敗過,所以見到依碟咁靚嘅炒飯,加上大家食得咁滋味個樣,真係特別有滿足感呀!





**我的微博..關注吧**

*♡♡小肥豬♡♡* | 17th May 2013 | 靚太廚房 | (148 Reads)
10 MAY 2013(FRI)

早幾日整左個好味嘅番石榴雪葩之後,成日都好想用其他生果再整。剛好今日買左個小蛋糕同小小豬嚟個小慶祝,我地又叫埋嘉汶表妹一齊返嚟食蛋糕,所以就有個動力再ENCORE,整俾嘉汶表妹試吓。

今日整嘅就係士多啤梨雪葩,我用左四盒士多啤梨,我估約有六十粒呀~


做法其實係完成一樣,先將士多啤梨放入雪櫃雪半日,雪到好硬先可以用嚟打。因為士多啤梨個SIZE都已經細粒,可以唔洗再細切啦!

根據上次個經驗,今次我地將士多啤梨個葉椗部分都切埋,等食嘅時候完全冇硬嘅感覺,口感會好啲呀~


就可以即刻打半個檸檬汁同半碗糖嚟打啦~


用手動攪拌器打至漿糊狀~



打至漿糊狀後就可以放入盒~


入雪櫃雪兩小時就食得啦~


不過,可能係啲生果嘅性質唔同,士多啤梨水份比較重,所以汁多啲,要雪多少少時間,同埋會快溶啲呀!

可能我地都係鐘意食士多啤梨,加上又揀啱啲又熟又香又甜嘅士多啤梨,所以真係好食到唔識形容,我覺得比上次個番石榴仲好食呀!不過,依家啲士多啤梨已經係屬於季尾,下次都應該未必會再買到啲咁靚嘅士多啤梨,所以士多啤梨雪葩可能要等下年先可以再食到呀!




**我的微博..關注吧**


*♡♡小肥豬♡♡* | 16th May 2013 | 小小豬篇 | (18 Reads)
10 MAY 2013(FRI)

小小豬仔又大一個月啦...已經係33個月人仔啦!

今日同小豬媽去針灸後,入SOGO超市買啲嘢,就係咁.....小豬媽係baby Mon cher見到一個叫『我的最愛』嘅蛋糕,小豬媽話個蛋糕名出好代表小小豬係佢至愛,再加上又係小小豬至愛嘅士多啤梨,所以就二話不說買左佢同佢最愛嘅HONEY嚟個小慶祝呀~


睇吓小小豬見到個蛋糕幾開心~


許個願先~


急不及待要偷食啦~


依個為食仔一見到個蛋糕都不知幾開心,真係好難先可以捉到佢乖乖影相呀~


大家睇相都知佢係幾唔耐煩,所以都只係簡簡單單咁影幾張,之後就開餐啦!當然蛋糕就冇佢份啦,食佢至愛嘅士多啤梨都可以食到津津有味呀~

哈哈哈...可能係小小豬鐘意切蛋糕嘅過程,所以不其然咁每個月都總係有一次切蛋糕活動。其實都唔係專登為小小豬已設,只係切蛋糕過程,小小豬係會特別開心同興奮。大家一見到佢開心又古靈精怪個為食樣,都會開心起嚟,所以話呢....小小豬真係幾重要,可以一家人開開心心嘛!

為左令大家可以更加多歡樂時光,所以都可以考慮買多啲蛋糕俾小小豬切啦!(哈哈哈...好明顯係有人想食蛋糕嘅藉口啦!)

講返個蛋糕先,之前都試過佢嘅HELLO KITTY卷蛋糕,都已經覺得好好食。依個蛋糕靚就唔在講,真都係好好味,啲CREAM一啲都唔甜,仲好滑添。個蛋糕又鬆軟,總之一個字形容.....正!





**我的微博..關注吧**

*♡♡小肥豬♡♡* | 15th May 2013 | 靚太廚房 | (203 Reads)
9 MAY 2013(THU)

哈哈哈...今日我依個靚太廚房又學識多一樣我好鐘意食嘅餸,就係豉椒炒蜆~


一直都以為豉椒炒蜆係好難煮嘅,所以都係唔敢自己煮,想食嘅時候就出街食啦!不過係上星期睇都市閒情時,有位廚師都煮依個餸,原來都唔係太難,所以都好想試吓。剛好今日見到啲蜆大大粒,仲要都係廿幾蚊一斤。見咁抵又咁靚,所以就買左斤半嚟自己試吓啦!

材料真係唔係好多,都只係用四樣(仲有加蒜頭我唔記得影埋相)呀~

先蜆放入大盆加1茶匙鹽,注水至蓋過蜆,最少浸一個鐘,等蜆吐沙出嚟,咁食嘅時候就唔會成口沙啦~

將半個蒜頭剁成蒜蓉,青椒切條~


先用油爆香啲青椒,備用~

大火燒鑊後落油,油熱後下蒜蓉及約兩湯匙的豆豉醬,一齊爆香~

然後下蜆,快手兜勻~


加少少水及鹽,之後轉中火繼續炒,炒至全部蜆開口~

最後用生粉埋個芡汁,加入已爆香嘅青椒絲,兜勻後就完成啦~


第一次煮都算係成功啦,食落都有坊間嘅七八成味道,不過我就覺得喊左少少,可能係落豆豉醬時重手左少少,下次減少少個分量,一定仲好味呀!





**我的微博..關注吧**

*♡♡小肥豬♡♡* | 14th May 2013 | 小小豬篇 | (12 Reads)
9 MAY 2013(WED)

哈哈哈...今日小小豬真係開心,因為又有新嘢玩呀!

事緣早排屋企個FAX機壞左,所以買左一個新嘅。用左七日都冇問題,個包裝盒可以唔要啦!

不過,正當我地以為小豬爸準備拋棄個箱時,佢就好細心咁先清除晒所以配件同廢紙,又拎塊布好小心咁將個箱嘅內內外外都抺乾淨。原來係為左小小豬,小豬爸話見個箱大大個又好實淨,所以話俾小小豬玩一陣啦!又一件寵孫事件...哈哈哈!

有新嘢玩,小小豬當然係好開心,仲唔洗我地講,一見到個箱就即刻要入去玩啦~


仲將佢啲寶貝玩具拎埋入去玩添~


依個小小豬仲好大膽,已經可以自由出入啦~


哈哈哈...大家放心,係玩依個箱嘅時候,我地係會小心睇住小小豬,唔會有危險。既然係小豬爸一份心意,所以俾小小豬玩多幾日啦!

今日溫馨事又何止依一件啦!

玩完個箱之後,小小豬就轉玩遙控車,睇佢可以控制到車仔行時,個樣幾得戚~


佢真係好專心咁玩呀~


自己玩完就去左嗲大肥豬一齊玩~


深情的對望...SO SWEET~


雖然都只係簡簡單單嘅兩件事,不過都可以表現出小豬爸係幾愛錫小小豬,凡事都會考慮小小豬先。大肥豬亦都係幾愛小小豬(睇佢同小小豬玩個笑容,完全係慈父FEEL呀)!

小小豬真係可以話係集眾人的愛,希望小小豬都會好好記住依份愛,直到大個仔都唔好激親所有愛佢嘅人呀!





**我的微博..關注吧**

*♡♡小肥豬♡♡* | 13th May 2013 | 博客分享 | (52 Reads)
8 MAY 2013(WED)

哈哈哈...真開心,係《iMORE.hk》全港最強 iTRiAL試用專區登記,今次又抽中左,可以試用《O'slee 紅石榴鮮奶布丁面膜》呀~
   
依款新出嘅O’slee『紅石榴鮮奶布丁面膜』,其主要成份紅石榴,含豐富的紅石榴多酚和花青素,抗氧化效果是綠茶的3倍!能有效消除自由基對皮膚的傷害。此外,紅石榴籽和肉含有韖花酸、維他命C、植物荷爾蒙,發揮極佳美白、抗氧化及延緩肌膚老化效果。

最好就係一瓶含有五大功效:抗氧化、美白、保濕、緊緻毛孔及深層清潔,真係一次過可以俾皮膚有多重保護呀~

隨內附送面膜捧及潔面海綿~

玻璃樽裝像布丁般的包裝,唔講真係唔知係面膜嚟呀~

面膜在開封後的9個月內要使用完~

用面膜捧取出面膜,以防止沾到水氣~

面膜為CREAM狀,質地超水潤呀~

塗在手背上試試,超易推開,而且很滑,仲有淡淡青香味添~

厚厚平均地敷在臉上~


面膜敷約15分鐘後,依然帶有水分,不會變乾。用附送的海綿沾水,便可以輕輕地把面膜洗走~

洗完臉完全沒有蹦緊感覺,感覺皮膚很潔淨添~

整體上我覺得效果都唔錯,七天內敷了兩次,用後皮膚都唔會覺得乾,都覺得好溫和舒服,皮膚都很乾淨,都好似飲飽水。在去黃功效及收細毛孔方面,亦覺得比之前係有明顯改善,不過美白方面就暫時未可以呈現係我面上,或許只是用了兩次,未能深入感受啦!





**我的微博..關注吧**

*♡♡小肥豬♡♡* | 12th May 2013 | 小小豬篇, 靚太廚房 | (147 Reads)
8 MAY 2013(WED)

整左又有新攪作,就係整左早幾日肥媽教嘅番石榴雪葩呀~

其實都冇專登打算今日整,不過係買餸時,係生果店見到啲又香又靚嘅番石榴,仲要係胭脂紅種,所以就買左少少試吓整啦~


做法真係勁簡單,先將蕃石榴放入雪櫃雪半日,因為要雪到啲生果好硬先可以用嚟打,所以我就放左上冰格。不過...因為各人嘅雪櫃都唔同,所以係雪嘅過程你都要留意住,小心睇住唔好雪到凍傷呀,到開始做時就切粒粒~

加半個檸檬揸汁


再加半碗砂糖~


用手動攪拌器打至漿糊狀~

就係我用緊攪拌器時,小小豬就即刻走過嚟,又話要幫手整。我見都係啲簡單嘅工作,所以就俾小小豬幫吓手啦,嚟個親子整甜品時間嘛!小小豬都算合作,叫都係幫我扶實支攪拌器同埋個盤,都算佢可以幫到手啦~


打至漿糊狀後就可以放入盒~

放入雪櫃雪約兩小時~

就係咁...一個簡單又好靚嘅雪葩就完成啦~

個味道真係唔錯,勁香番石榴味但又唔太甜。不過可能係加埋啲核一齊整,啲核又比較硬,所以食嘅時候會感覺到好多粒粒。所以我就覺得如果係切粒粒時將啲蕃石榴去埋啲核,咁食起嚟個個口感會好啲,咁就應該會仲好呀!

雖然一向我都唔多俾凍嘢小小豬食,不過大肥豬話與其俾小小豬食雪糕,不如整多啲雪葩俾佢食,可以食得健康又安心啲嘛!

我覺得自家制嘅雪葩係健康啲,起碼冇落任何色素或者防腐劑,甜度又可以自己控制,所以都真係幾啱小朋友食呢!其實唔止係番石榴,用其他生果都可以做到雪葩,所以等我時候,整多啲唔同味道嘅雪葩,等小小豬一飽口福!





**我的微博..關注吧**

Next