香港新浪網 MySinaBlog
*♡♡小肥豬♡♡* | 30th Apr 2013 | 博客分享 | (26 Reads)
28 APRIL 2013(SUN)

首先要多謝PR姐姐邀請,等我可以試用佢地嘅新產品- SEXYLOOK極美肌純棉黑面膜。近期真係好HIT黑面膜,真係好想知道同平時用開嗰啲係有乜分別。依此黑面膜共有3款不同功效,我所試用嘅係深層水潤。我覺得包裝好有日本少女feel,都幾靚呀~


一盒有五塊~

每塊都含美容液28ml~


台灣出品兼有正貨保證,真係放心使用呀~

原來黑面膜是因為黑曜石萃取和活性炭織入了純棉布膜所致,且質地棉柔舒適,適合肌膚親合真係有姿勢又有實際!活性炭是可以控油、平衡油脂,鼻子、額頭容易出油的女生很適合使用~


將面膜打開,沒有水滴滴的感覺~


用上面部,面膜紙柔軟貼面,黑色的面膜好像跟日常用的差不多,大概是因為成份的關係才會變成黑色的~


敷上十五分鐘之後,整個面部都感覺到水潤度有所提升,而且它的補水效果都不錯,蘋果肌都變得很飽滿,脫水的感覺都減少了~


第一次使用黑色的面膜,覺得此黑面膜不算是一款很滋潤的面膜,它補水的效果是大於滋潤的效果,所以都比較適合依家這個天氣使用!





**我的微博..關注吧**


*♡♡小肥豬♡♡* | 29th Apr 2013 | 小小豬篇 | (17 Reads)
27 APRIL 2013(SAT)

上星期先入過迪迪尼玩,真係冇諗過咁快又可以入去玩呢!哈哈哈...今朝一早起身,大肥豬就主動話想帶小小豬入去樂園玩,一向勁愛迪迪尼嘅我當然一定唔會有任何意見。就係咁,我用左最快速度煮好小小豬個午餐,執整行裝就出發啦!

不過,今日真係勁多人(尤其係強國人),大街嘅MICKEY & MINNIE影相真係好長龍,所以唯有放棄,打算轉移入幻想世界先同佢地影,點知又係勁多人。不過好奇怪,其他朋友仔影相又唔算多人,所以我地今次就唔同MICKEY & MINNIE影相先啦!

第一次同POOH POOH影,先嚟個KISS KISS先~


今日POOH POOH好熱情,同小小豬玩得好開心呀~



之後就到同GOOFY影~


不過係排隊影GOOFY時有一個小插曲,就係依個百厭嘅小小豬唔肯企定定排隊,周身郁之餘又要走嚟走去,最後要我好大聲咁罵佢,先肯乖返少少企定定一陣。唉...真係失禮C人啦!

所以當影完GOOFY之後,我就坐埋一旁同小小豬講道理,又罰佢坐底冷靜一陣。冷靜過後就去做嗲嗲豬,要大肥豬錫返~


係我地準備離開之際,見到Donald出嚟,所以又影吓啦!

小小豬已經急不及待衝去搵Donald啦~


玩左一陣就影相,不過全程都只係掛住摸啲Donald啲毛毛(大家留意吓小小豬隻左手..哈哈哈)~


影完公仔都去TOYSTORYLAND行吓間新SHOP(其實都唔係新,只係我上兩次入嚟冇行去嗰邊)~


小小豬問姐姐拎貼紙,真係老實不客氣呀~


之後我地就去灰熊谷,我就單拖去飛返轉,大肥豬就陪小小豬食少少茶點。玩完行返出大街就剛好巡遊,依個小小豬都係仍然唔肯出去跳舞,真係冇佢收,不過佢都係好投入咁睇巡遊呀!唉...慢慢嚟啦,我相信總有一次小小豬係會好主動咁跟埋啲表演嘅哥哥姐姐一齊玩呀!

係臨走時,我又地去玩一轉飛碟,小小豬已經唔驚,仲識得玩嗰支控制棒啦!

係飛碟附近有個MAGICAL MOMENT,玩巴士光年遙控車,我地當然又去玩,不過一向唔精玩車嘅我,同小小豬一齊揸到部車完全唔跟線路,好在最後職員姐姐都算我地玩到,俾左個大貼紙我地呀~

今日小小豬貼紙收獲,有咁多又有排玩啦~


題外話:係玩MAGICAL MOMENT巴士光年遙控車嗰度,原來其中有一位姐姐都有睇我個BLOG,佢認得我之餘,仲話小小豬大個仔左好多添!原來係街上聽到有朋友仔話有睇自己個BLOG,又認得我地三口子,真係一件好開心呀!雖然姐姐話佢因為最近好忙少左嚟探我地,但我都好多謝她來我個BLOG探我地三口子呀!





**我的微博..關注吧**

*♡♡小肥豬♡♡* | 28th Apr 2013 | 靚太廚房 | (165 Reads)
26 APRIL 2013(FRI)

早幾日小豬媽睇完MAY姐有請之後,依MAY姐個食譜整左個電飯煲焗雞,佢話小豬爸同LULU妹食完之後都讚口不絕,所以攪到我都勁想食呀!

今日趁細路同嘉汶表妹都返嚟食飯,所以我又跟小豬媽一齊整左隻電飯煲焗雞。

首先洗淨隻雞,瀝乾,然後先在雞身塗上調味~


幫隻雞雞按摩吓先~


醃大約三小時(時間長啲就入味啲)~


將蔥及乾蔥平放於電飯煲底~

將雞放面~

最後淋上約兩飯碗嘅紹興酒~


以電飯煲煮20-25分鐘就得啦~


電飯煲內嘅汁唔好倒,食之前煮熱少少,之後淋上雞上面就仲好味呀~


待涼後斬件就可以食啦~


哈哈哈...講真我真係好驚雞雞,所以斬件同洗內時我都唔敢做,要交俾小豬媽代勞呀!

原來都真係勁簡單,其實如果唔整全隻雞,我想用依個做法嚟整雞脾或雞翼,都一樣得,真係唔叻煮餸都可以整到呀!





**我的微博..關注吧**


*♡♡小肥豬♡♡* | 27th Apr 2013 | 生活點滴 | (34 Reads)
26 APRIL 2013(FRI)

上次去參加雪糕鑑賞會,識左兩位新朋友,亦都係佢地教識我一樣新嘢,原來依家寫BLOG都要派咭片呀!

有張咭片係介紹自己時就會方便啲,同埋過左個活動之後,都可以KEEP住聯絡,互相交流吓BLOG嘛!

見佢地有咭片派,所以我又心思思考慮整唔整好,最後大肥豬幫我搵左一間整咭片嘅公司,$100就有成300張。大肥豬仲話又唔係貴,叫我想整就整啦,所以終於都貪得意咁整返啲張啦~


單雙面都係一樣價錢,當然兩面都印晒啦~


唔知係唔係平左少少,所以我地都覺得個色比較淡,如果實色返啲一定仲靚呀!
呵呵呵....下次再去活動時,就可以有得派啦!!

當然如果大家都想要的話,我好歡迎大家問我拎張嚟留念,有成三百張,都唔知幾時先派得晒呀.....哈哈哈!





**我的微博..關注吧**

*♡♡小肥豬♡♡* | 26th Apr 2013 | 生活點滴 | (31 Reads)

26 APRIL 2013(FRI)

今日陪小豬媽去做針灸,之後我就去SOGO超市買嘢。係我地行超市時,見到有一間SHOP有好多好靚嘅蛋糕,所以就行埋去八卦一吓!原來係日本人氣甜品店Patisserie Mon cher嘅旗下品牌 baby Mon cher,係首間海外分店嚟呀~


啲蛋糕真係勁靚,忍唔到手要影低佢呀~

當然,我地唔係只識倒亂,小豬媽買左兩件請我同LULU妹食呀~


我嘅~


LULU妹嘅~


啲蛋糕唔係只得個樣,個味都真係唔錯。我嗰件HELLO KITTY係朱古力慕絲,好重朱古力味但又唔甜,食完都唔會覺得好濟呀~


係就係好好食,不過就真係貴左少少,一件都要成四十幾蚊,所以都真係有啲唔捨得食呀!





**我的微博..關注吧**

*♡♡小肥豬♡♡* | 25th Apr 2013 | 小小豬篇 | (28 Reads)
24 APRIL 2013(WED)

早排同小豬媽一齊睇電視時,剛好節目就介紹HIGH-TAE,小豬媽話佢都未試過去食HIGH-TEA,好想去感受一吓!

既然小豬媽想去,加上我都想帶小小豬去玩吓,所以就叫大肥豬PLAN吓依個咁開心嘅節目。 最後大肥豬就揀左今日帶我地去洲際Harbourside Cafe,去嘆返個HIGH-TEA呀~


哈哈哈...終於有機會叫佢地著依套父未裝啦~


個環境真係好正,對住星光大道,加上今日天氣真係好好,所以成個VIEW都好好呀!食物未到就先影吓啦~


嘩...好靚嘅AFTERNOON SET嚟啦~


我地都好大鄉理咁,不停影影影呀~



睇吓個為食小小豬,有得食即刻唔理我呀~


仲流晒口水添~


邊食邊玩嘅可愛小小豬~


我覺得依間酒店嘅BABY CHAIR真係幾好,佢以安全為由,一定要小朋友用吊帶式咁扣住。我覺得依個設計都真係唔錯,既可以令小朋友有保護咁唔會跌落地,但又唔係箍到實,等小朋友又可以活動自如~


大肥豬嘅Earl Grey~

我同LULU妹SHARE 嘅Strawberry Mango Tea~


食完蛋糕再配合一杯靚茶,真係RALAX呀~


小小豬都有份飲Strawberry Mango Tea,仲係度攪攪陣添~


又嚟做一名擦鞋豬,冧C小豬媽啦~

古靈精怪~


蛋糕真係好好食,個味唔會太濃,又唔算太甜。不過因為大肥豬係唔"好"蛋糕,加上小豬媽又唔食得甜嘢,所以我都地係ORDER左一SET。

不過食嘢都係其次,感受吓個氣氛,輕輕鬆鬆咁嘆左兩個幾鐘下午茶,人都開心啲呀!

整體上都真係好好,唯一缺憾就係我地個坐位,唔係話唔舒服,只係外面天氣實在太好,我地坐近玻璃影相真係好唔方便,影相背晒光,所以攪到好多相都好黑呀!





**我的微博..關注吧**

*♡♡小肥豬♡♡* | 24th Apr 2013 | 博客分享 | (137 Reads)
24 APRIL 2013(WED)

首先要多謝Beauty Tech公關送俾我嘅小禮物,等我有機會可以試到佢地皇牌產品 - 雪糕修護遮瑕霜~


我收到嘅係 - B05自然膚色,個色都好接近我皮膚呢~


此雪糕修護遮瑕霜是以專利高溫急凍技術將遮瑕霜以高溫煮溶再急凍,令其邊緣自然貼服,質地貼薄而遮瑕度高,塗上後能100%遮蓋瑕疵,達到修護及遮瑕效果。

先用自己的BASE打好個底,之後用手指沾一點遮瑕霜,再以輕輕印壓,再慢慢推開遮瑕霜,平均地塗在面上暗瘡印同斑斑的位置。我面珠的紅印位都比較嚴重,所以我都加強依個位置~


慢慢推開後,之後再上碎粉同塗上口紅,就可以出街啦~

睇近啲,面上的紅印位同毛孔都可以完全遮到,而且唔會覺得好厚粉添~


由於質地比較厚重,所以剛剛開時會覺得比較乾,建議用暖的手指續少慢慢咁塗在面上,咁就會易推好多啦!

雖然質地厚重,但於臉上慢慢推開後,就不會有厚粉或乾涸的感覺,而且遮瑕度十分高,而且相當貼面,持久度都不錯,所以就算近看都不會覺得像用了遮瑕霜。

唯一就是在有點難卸除,我用了兩次卸妝油才可完全切底卸除。或許就是因為它遮瑕度高,才需要加強清洗呢!





**我的微博..關注吧**

*♡♡小肥豬♡♡* | 23rd Apr 2013 | 小小豬篇 | (12 Reads)
21 APRIL 2013(SUN)

我地今日又入迪迪尼搵MICKEY啦!哈哈哈...有左全年証總係要一個月入去玩一次先覺得抵呀!

一如我地過往行程,先去BABY ROOM同小小豬食個午餐先,之後先開始我地嘅玩樂行程。當我地食完飯仔之後,一出嚟就做緊巡遊,見小小豬睇得咁留心,所以就停底俾佢睇一陣啦~


之後我地就去左排隊玩飛碟,入嚟咁多次,今次先係小小豬第一次玩。對於陌生事,依個小小豬就即刻變成細膽豬,當知道要玩飛碟時,佢就不停話"唔玩...唔玩",仲係度扭計要離開添。不過我地都係為左訓練小小豬個膽仔,當然係繼續同佢去排隊玩啦!到我地玩嘅時候,初時小小豬都係好緊張咁攪到大肥豬實一實,到差唔多完時就開始放鬆,仲肯周圍望嘢添。其實小小豬嘅表現都比我預期嘅好,起碼佢都冇大叫大喊啦。等我地玩多幾次,到時小小豬一定唔再驚,可以放膽咁玩呀!

上幾次入嚟都冇係城堡影相,今日決定係我發"鵝功"之後,大肥豬都怕左我,同我去城堡影相啦~
'

小小豬仲情緒極度高漲,超開心咁影左好多靚相呀~


好鐘意依張相,小小豬真係笑得好燦爛呀~


當然唔少得三口子合照,好耐都冇正正經經咁影合照,如果小小豬多啲啲笑容,咁就正晒啦~


搵MICKEY&MINNIE啦~


MICKEY仲主動錫錫添~


行左一陣SHOP,我地就搵位坐定定睇巡遊啦~


到左跳舞環節,原本小小豬都肯行出去一齊玩~


點知行到一半,佢又開始驚驚唔肯行,最後就由大肥豬抱住佢行去人群中睇吓其他小朋友點玩!不過比起上次,小小豬肯行過去都已經有進度,慢慢嚟啦,希望下次可以一齊跳舞啦~


驚青完又繼續乖乖坐定定睇~



睇完巡遊,見個天色都開始暗暗地驚會落雨,所以我地就走啦!嚟緊會有VIP免費帶人入場,又可以優惠價帶,所以依兩個月都仲有好多機會可以入去玩呢!

題外話:早前即將開嘅迷離莊園有得俾全年証抽籤入去試玩,不過好不幸地我今次抽唔中,冇得優先入去玩。上次灰熊山谷同TOY STORY LAND我地可以抽中有得優先玩,點知今次無,真係好失望呀!不過其實都一早估抽唔到,咁多人有金咭同白金咭,但都只係得一個星期六可以入去優先玩,又點會抽到呀!!其實都唔明白佢地,上兩個LAND新開都係成日都送飛俾人入去玩,但我地就要抽籤,點解唔先照顧我地全年証用戶先呢?





**我的微博..關注吧**


*♡♡小肥豬♡♡* | 22nd Apr 2013 | 博客分享 | (426 Reads)
20 APRIL 2013(SAT)

《iMORE.hk》全港最強 iTRiAL試用專區登記,抽中左可以試用《VitaLab MGF 賦活舒緩晶凍》~


MGF賦活舒緩晶凍係來自台灣,功效都好全面,具超凡的修復能力,迅速改善膚質,撫平肌膚瑕疵。補濕鎖水同時激活細胞增生,促進肌膚更新,全面提升彈滑度。配方溫和鎮靜和舒緩敏感肌,減輕對術後肌膚的 刺激。利用嶄新吸收技術,特強滲透力,凝膠觸感豐潤而無重輕盈。強效改善發炎或受創後的皮膚問題,如粉刺、油脂粒、暗瘡、傷口後留下的凹凸不平疤印、曬後 紅腫脫皮、濕疹。而且用途都好廣,適合任何皮膚人仕用呀~


質地呈透明狀,感覺都好水潤~


按摩很快便吸收了~


我於每日早晚於臉部清潔之後,早上會當面霜使用,一泵份量就已經可以全面塗勻。晚上亦會冷凍後當保濕面膜,我於紅印位置再厚敷,以作加強修護~


用左一星期左右,其中有兩晚以保濕面膜用,我面上的紅印雖未完全消失,但都已經開始變淡了~


我覺得整體上效果都唔錯,係改善毛孔同減退紅印方面,都有明顯改善,粉刺粒粒少左,而且面色都冇咁暗黃啦!我個人鍾意厚敷作保濕面膜用,敷上有冰涼既感覺,冰冰涼涼感覺好舒服,感覺到皮膚舒緩了不少。我覺得依支真係可以話係懶人恩物,因為既可以用作面霜,又可以作保濕面膜用,真係好方便呢!唯一味道方面則比較為敏感,氣另味是清草味般的,或可因我有鼻敏感關係,初初聞就會比較刺鼻,所以初敷時我的鼻子都有少許不適,但時間一過,待氣味散開後,便回覆正常了!





**我的微博..關注吧**

*♡♡小肥豬♡♡* | 21st Apr 2013 | 小小豬篇 | (22 Reads)
20 APRIL 2013(SAT)

今日大肥豬帶左我地九龍城行街,行到入商場時見到冒險樂園入面有個波波池,見唔算太多人,又做緊特優惠,所以就俾小小豬入去玩一轉啦!

話時話,小小豬咁大個仔都係第一次去波波池玩,開頭都仲好擔心佢會好驚唔敢入去玩,點知佢入面都玩得不知幾開心,仲周圍走呀~


雖然都只係短短二十分鐘,不過小小豬都真係玩到好開心。不過都算佢好乖仔,夠鐘就好乖乖咁跟我走,完全冇扭計呀!

玩完波波池,就去玩保齡球~


又玩火車~


最後去拎棉花糖食呀~

不過,個為食豬竟然唔鐘意食哦~

玩左咁多樣嘢,都係$40,真係好抵玩呀~


開開心心咁就過左一個下午,見小小豬玩波波池玩得咁開心,雖然依度就細細地,不過就唔算多人(我地玩嘅時候加埋都只係有五個小朋友),所以如果有時間,都會帶小小豬嚟玩多啲呀!





**我的微博..關注吧**

*♡♡小肥豬♡♡* | 20th Apr 2013 | 小小豬篇 | (26 Reads)
19 APRIL 2013(FRI)

今日係小小豬學校嘅家長觀課日,我嘅心情都真係既開心又擔心!

開心嘅就係可以知道小小豬平日上課嘅情況,可以更加了解小小豬。擔心就係.....
小小豬一向係學校算係攪事份子,成日都唔肯坐定定聽故事,又唔肯乖乖咁做手工。加上今日我又係度,好怕個百厭仔會更加扭計!

其實今日都唔可以話係觀課,只可以話係同親子返學日,因為我地係同小朋友一齊上堂,老師叫我地坐係佢地身邊同佢地一齊做活動!

一如我預期,係上
半場聽老師講故事同埋做手工環節,都係唔肯坐定定,勁扭計要我抱,真係勁失禮。相信佢嘅表現可以話係全班最百厭嘅小朋友呀!

不過一到下半場,真係180度轉變,冇再扭計之餘,可以坐定定聽老師教書,又識得回答老師問題,可以依照老師指示同同學仔一齊做活動(類似尋寶找相同物件),小小豬仲好叻咁可以做對晒呀!見到佢依個好表現,我又覺得小小豬好似大個仔左好多呀!

事後老師都同我講,雖然平日小小豬都係有百厭,不過就冇今日咁嚴重,可能我今日同佢一齊,所以特別扭計啦!老師仲安慰我話,小小豬係班上最細嘅一個,所以表現係冇其他同學仔咁好,不過佢比初初返學時都已經好有進步,叫我唔洗太擔心。

原來觀課後我地家長都要做功課,都唔知點寫好,真係要落多啲心機寫好佢先得~

唉....雖然老師都話左好說話,不過今日觀課見到小小豬啲百厭事,都真係好激氣,點解佢咁唔乖乖呢?唔肯坐定定呢?真係要係屋企同佢做多啲訓練,等佢可以返學乖啲,唔好加添老師工作量呀!





**我的微博..關注吧**

*♡♡小肥豬♡♡* | 19th Apr 2013 | 小小豬篇 | (11 Reads)
16 APRIL 2013(TUE)

由我地買左『娃娃』返屋企之後,每晚都係臨瞓時俾小小豬玩,等『娃娃』陪小小豬一齊聽故事,怕佢玩得太多真係好易變女仔呀!

今晚小小豬話要餵
『娃娃』飲奶呀~


好專心咁哦~

真係好似模似樣呀~


仲同『娃娃』傾密計添~


最後嚟多個情深的一吻~

唔知關唔關事,小小豬同『娃娃』玩左幾日之後,我覺得佢專心同耐性依兩方面好似好左啲,起碼係餵飲奶奶時佢可以好專心咁望實『娃娃』,又可以拎住支奶奶好耐都唔放手(係我地話『娃娃』飽飽先收手)。俾著之前嘅佢,拎唔夠三分鐘就放手唔玩啦!

雖然我都仍然好疑惑點解男仔都要玩公仔,不過睇依幾日小小豬表現,又真係好似好啲哦,所以都KEEP住等小小豬同
『娃娃』玩一排先啦!(當然都係只限瞓覺前啦!)





**我的微博..關注吧**

*♡♡小肥豬♡♡* | 18th Apr 2013 | 靚太廚房 | (69 Reads)
16 APRIL 2013(TUE)

尋日係朋友仔個BLOG度見到有個好靚嘅甜品,見好似好易整咁,所以今日就買齊材料試吓整,嚟個好味下午茶啦~


其實朋友仔都係用焗爐嚟整,不過我見光波機同焗爐原理都係相同,所以我就試用光波機嚟整啦!

先在一面的吐司片上搽上牛油~

放入光波機(200度),底面各焗3分鐘~

之後放上9個半顆的棉花糖後~

再放入機焗3分鐘(視乎你鐘唔鐘意食燶啦)~


最後淋上朱克力味的練奶~

唔係自己讚自己,真係勁好味呀!我同LULU妹都食得津津有味呀~


依個真係簡單又好味,有興趣嘅朋友仔都可以試吓呀!





**我的微博..關注吧**

*♡♡小肥豬♡♡* | 17th Apr 2013 | 博客分享 | (20 Reads)
15 APRIL 2013(MON)

今日真係好榮幸,因為得到Häagen-Dazs的公關邀請,出席參加佢地嘅Häagen-Dazs™尊貴雪糕鑑賞會~


今次活動係IFC嘅The Box舉行,環境真係非常優雅~


一入場就先收到份禮物,就係Häagen-Dazs™ 18k 金卡入場劵,好專貴嘅感覺呢~


話明係鑑賞會,當然要鑑賞一下食材的分別,所以係未開始之前,大會俾左個小遊戲我地玩,要我地選出較高品質嘅食品~

等左一陣,活動開始啦!

今次活動司儀就係李壁琦~


先同大家揭曉剛才嘅試食遊戲答案。雖然味覺一向都唔係太強,不過都好在我今次都唔差,只係答錯左一個,都算係咁啦...哈哈哈!

玩左一陣,就由Häagen-Dazs的代表為大家介紹Häagen-Dazs的歷史~


唔講都唔知,原來Häagen-Dazs都有成差唔多一百年歷史,係1921年,當時Reuben Mattus(Häagen-Dazs之創辦人),驅着馬車幫助母親銷售雪糕。後來Mr Mattus擁有他第一部生產設施。直至1950年代,Mr Mattus知道市面上很多雪糕製造商為了減低成本而加入穩定劑,添加劑和防腐劑,他明白品質對顧客的重要性,不會隨波逐流,因此就創立Häagen-Dazs品牌。由開始到現在,一直都以嚴謹、簡約的理念作為品牌的立足點, 致力尋找世界各地品質最好的百分百原材料,包括馬達加斯加的呍呢嗱、純正可可豆、以及來自法國的牛奶及忌廉,製造至臻完美的雪糕。

其後,代表亦同我地分享左兩個有關食材故事。原來士多啤梨味的Häagen-Dazs當然推出市面前,係用左六年時間來研發,先搵到一種士多啤梨果肉嘅色、香、味配合嚟做雪糕。另外,綠茶雪糕亦都唔係咁簡單,因為綠茶是很易氧化,一旦變了就影響了整杯雪糕,所以為了保持綠茶雪糕的色澤和味道,Häagen-Dazs在杯的周邊加上了防UV的鍚紙層,可以減慢綠茶的氧化速度。

之後就到今日嘉賓謝婷婷同大家分享佢一啲對生活嘅小分享~


婷婷仲即場鑑賞優質雪糕添~


另一位嘉賓甜品大師Chef Koo~


合力以Häagen-Dazs朱古力、士多啤梨和夏威夷果仁雪糕炮製一道甜品~


完成啦~


之後,另一位Häagen-Dazs的代表為大家介紹五大簡單天然材料~


採用五大簡單天然材料,包括 :100%鮮牛奶、鮮忌廉、雞蛋、糖及天然食材配製,執意完美,絕對不含人造香料、人造乳化劑或人造色素,約有20% 之超低雪糕空氣含量,用心釀製頂級雪糕,以致每一口雪糕均是質感豐厚、細滑及香濃,讓您留下一個最完美、最柔滑的雪糕甜蜜回憶。

席間還播放了一件短片,等大家可以看見Häagen-Dazs雪糕的鮮牛奶來源~

剛才Chef Koo同婷婷所做嘅甜品,我地都可以試到啦!真係色、香、味都齊晒,好味呀~


活動過後,Häagen-Dazs仲送左好多禮物俾我地呀~


最特別就係送左一個小士多啤梨盤栽,唔知係唔係佢地研發左六年嗰一種呢~


真係有士多啤梨呀,等我努力淋水,成熟後就可以俾小小豬自己摘嚟食啦~


再一次多謝邀請,等我可以對Häagen-Dazs有好深入的認識,亦令我知道佢地對材料嘅執著。就係有佢嘅執著,先可以做出咁天然冇添加嘅雪糕,我亦都可以更加放心俾小小豬食Häagen-Dazs雪糕啦!





**我的微博..關注吧**

*♡♡小肥豬♡♡* | 16th Apr 2013 | 小小豬篇 | (17 Reads)
14 APRIL 2013(SUN)

事緣因為上次去做檢查時,小小豬係玩情景玩具方面表現得非常弱,尤其係同公仔玩嘅時候,佢都真係完全唔識玩,唔識得同公仔著衫之餘,又唔識同公仔蓋披瞓覺。其實我地都冇俾過依啲玩具小小豬玩,佢唔識玩都情有可原呀!

所以今日下午我地去就去左反斗城,買個玩具娃娃返嚟,等我地邊教邊玩咁,令小小豬做多啲情景方面嘅事情~


今晚係臨瞓前同小小豬玩,依個小小豬好似好鐘意,一拎上手就錫錫佢,仲幫個公仔改左個名叫『娃娃』呀~


教左佢玩一次之後,大致都識得玩,俾奶咀『娃娃』食呀~


同『娃娃』蓋披之後槑瞓覺呀~


眼都唔轉陪『娃娃』瞓覺呀~


今日睇小小豬同『娃娃』玩又真係唔覺佢有問題,都唔似醫生講到咁大問題,可能之前佢玩過,加上嗰日又係生保地方,所以小小豬就表現差啲啦!

雖然係冇問題,不過我地都會同
『娃娃』一齊玩多啲,等小小豬訓練多啲都係好嘛!但從今日第一次玩,最驚喜就係......估唔到小小豬對住『娃娃』真係可以咁溫柔,完全好似好鐘意佢咁,我地見到都覺得好好笑呀!





**我的微博..關注吧**

*♡♡小肥豬♡♡* | 15th Apr 2013 | 小小豬篇 | (15 Reads)
13 APRIL 2013(SAT)

見上次同小小豬去沙灘玩得好開心,所以今日咁好天氣,當然唔好浪費,帶小小豬去玩多轉啦!

今日我地去左石澳玩啦!戴住頂熊仔帽,真係好可愛呀~


玩左一陣沙,我地就帶小小豬去海邊行吓,睇吓佢幾興奮,衝住跑去呀~

先睇定海邊個情況先~


去玩水啦~


成功拎到水啦~


不過,小小豬對海水都仲係驚驚地(可能仲記得上年係泳池浸過),所以我地都係玩左一陣水,之後就返去玩波波啦~


個傻仔玩得開心,又爬係啲沙上面啦~



唔知點解總係覺得小小豬今次冇上次玩得咁開心,成日都話要走返屋企,仲攪笑到攬起晒我地啲行裝走,攪到到成個袋都入左沙,真係俾佢激C呀!

不過,另一個角度睇,小小豬依家認得表達佢嘅所想,以行動話我地知佢想點,所以都未嘗唔係一件好事嚟呀!





**我的微博..關注吧**






*♡♡小肥豬♡♡* | 14th Apr 2013 | 生活點滴, 小小豬篇 | (27 Reads)
12 APRIL 2013(FRI)

依排日本匯率好低,所以好多朋友仔都去左日本唔同地方旅行。雖然我冇份去,不過睇佢地FACEBOOK嘅靚相,都已經眼睛去旅行啦!

有朋友去旅行就即係我有手信收,哈哈哈.....真係開心啦!

好友A小姐早排去左日本旅行,所以就托佢幫我買少少特色嘢返嚟,等我可以送俾朋友。估唔到佢幫我買嘢之餘,仲買左好多禮物俾我,約左我今日出去拎呀!

首先係最新出嘅DUFFY電話繩~


仲有一件好靚嘅外套呀~


係好靚嘅DUFFY+MICKEY嘅圖案嚟呀~


除左我之外,小小豬都有兩條靚靚手巾呀~


條毛巾仔真係好靚,個質量又好,真係靚到唔捨得用呀!不過,我打算留待等小小豬返K1時用呀...哈哈哈!

再一次多謝好友A小姐,啲禮物真係好鐘意,好窩心呀!





**我的微博..關注吧**

*♡♡小肥豬♡♡* | 13th Apr 2013 | 博客分享 | (16 Reads)
11 APRIL 2013(THU)

新一期嘅《樂活。家 FAM》收到啦,再一次多謝PR姐姐~


今期個專題係講公主病,唔好以為小小豬係男仔就唔啱睇,其實入面教點樣打走公主病啲內容,我覺得有啲招數對男仔都一樣係WORK,因為改變習慣係冇分男仔同女仔嘛~

另外,今期『不一樣的父母』訪問左BILLIE,佢嗰套"蘑菇成長哲學",我都真係覺得幾有道理 - 教小朋友要像蘑菇一樣粗養~

當然仲唔少得我至鐘意睇嘅醫學專題啦!一講到病....我真係好驚呀,尤其依家啲病毒咁利害,真係要知多啲依方面資料,好作預防呀~


有興趣知多啲《樂活。家 FAM》嘅內容,可以去佢地網址睇吓:http://famworld.com.hk/ 或者FACEBOOK專頁https://www.facebook.com/famworldhk





**我的微博..關注吧**

*♡♡小肥豬♡♡* | 12th Apr 2013 | 小小豬篇 | (28 Reads)
10 APRIL 2013(WED)

今日係小小豬32個月,我地去做左一件好特別嘅事,就係帶小小豬去到政府兒童醫院做評估。

事緣係小小豬返左兩星期學之後,老師就同我地講佢嘅言語及理解能力都好似比較較弱,叫我地多加留意。

當然我地係知道因為我地平日同小小豬係屋企講英文多,所以佢對講同聽廣東話係差啲,英文就完全冇問題。不過返學校係用廣東話上堂,所以老師就覺得有問題出現。

雖然我地都唔覺得小小豬係有問題,不過既然老師叫我地留意,所以就帶小小豬去到健康院作評估。其實小小豬係健康院初步評估話大致上都沒問題,不過我同佢講話老師有問題,所以醫生就話幫他排政府做詳細檢討,但有可能要排九個月左右先可以做到。

我本着「有事治療、冇事補身」的心態,我就讓慢慢排啦!

終於係上星期收到電話,叫我地帶小小豬去做檢查。真係如果唔係佢打嚟,我都已經忘記左依件事啦!不過都已經算快左,我地排左八個月就有啦!

今日我同大肥豬帶小小豬去大口環兒童醫院做評估啦~


當日就有兒科醫生同言語治療師為小小豬做評估,開頭都以為係好簡單嘅,不過原來成個過程都長達兩小時。由最衫嘅量高磅重,護士同言語治療師分別同小小豬玩遊戲及問問題,又做一啲大肌肉活動,之後醫生同我傾吓小小豬嘅日常生活。

經過一輪觀察同玩遊戲之後,兒科醫生同言語治療師都認為小小豬智力係完全冇問題,仲讚佢好叻仔添!有啲唔應該係依個年齡識嘅,佢又會識。好似識分晒啲顏色同圖形(當然係英文講啦);隨意抽A-Z都認到個字母;只係見到成組英文字會識讀嗰個英文(如:APPLE、DOG、UMBRELLA.....等)

不過,有一啲係佢依個年齡應該識嘅,佢又唔可以做到。好似係玩情景玩具方面就非常弱,完全唔識得以正確方法嚟玩。另外,眼神接觸方面亦都比較差,同埋有些情況比較固執。

說話方面都唔係太好,同言語治療師玩時都經常以中英混合一齊回答,有時言語治療師用中文同佢講時,小小豬都好似唔明白,要治療師用英文問佢先可以答到。

最後評估結果:小小豬言語發展較慢,社交溝通方面都比較弱,建議都從依兩方面接受治療。兒科醫生都俾左好多服務俾小小豬,嚟緊就先返去再做測試聽力,之後就排期做言語治療同早期訓練,希望可以幫到小小豬。

講真,我真係唔覺得小小豬係有問題,都係因為我地同佢講英文多先會係咁,只要係屋企講少啲,加強返佢講中文,就可以得啦!當佢講嘢叻啲,自自然然就同人溝通得好啲,社交方面亦都唔會有問題啦!不過,玩情景玩具方面我地又真係忽略左,因為我地都好似冇乜點買依方面玩具俾佢,等我地同小小豬換一換啲玩具,希望可以改善一吓佢依個弱項啦!

我依然係會持着「有事治療、冇事補身」的心態,我都會如常帶小小豬去做訓練,做多啲訓練都唔錯嘛!當排到期做言語治療同早期訓練時,就當帶小小豬去玩PLAYGROUP啦!





**我的微博..關注吧**



*♡♡小肥豬♡♡* | 11th Apr 2013 | 生活點滴, 小小豬篇 | (22 Reads)
10 APRIL 2013(WED)

今日買餸路經7仔見到笨NANA出新嘢,見都幾得意,所以就買返屋企準備做今晚嘅甜點啦~


得意之處就係有三種驚喜味等我地抽嚟買~


我地四個人食,大肥豬同嘉汶表妹就抽中左蜜瓜味~


我同LULU妹就係提子味~


見我地食得咁開心,依個為食嘅小小豬又點會唔嚟食呀!大肥豬話見佢為食樣,所以就俾少少佢食啦!睇佢食得幾滋味~


我食嘅提子味就覺得個味唔夠濃,不過味道都算OK。嘉汶表妹就話蜜瓜味都幾好食,唔會太甜呀!

四支入面都抽唔到香蕉味,冇得試添,希望下次買時可以抽到等我試埋啦!





**我的微博..關注吧**

Next