香港新浪網 MySinaBlog
*♡♡小肥豬♡♡* | 31st Jul 2012 | 小小豬篇 | (14 Reads)
30 JULY 2012(MON) 

其實我一向都冇買開BABY雜誌嘅習慣,不過八月號嘅
《Baby-mo》我就由上星期開始,日日LUNCH都行入7仔睇吓出左未,終於等到今日,我買到啦~


點解我咁緊張........知唔係因為有小小豬係入面嘛!

事緣早係好上個月前,我收到《Baby-mo》嘅電郵,話我入圍左佢地八月份嘅「Super親子餅印大比併」,叫我分別再SEND我同小小豬嘅細細個相再去比賽。雖然我都知勝出嘅機會唔大,不過有得玩當然都SEND去玩吓,睇吓有冇機會係雜誌出現嘛!

終於都有我地份啦~


哈哈哈...似唔似樣呢~


雖然贏唔到,不過可以入圍都已經好開心,起碼證明我同小小豬係餅印嘛...呵呵呵!(其實一直我都覺得我同小小豬係好似樣呀)

原本都以為小小豬只係依個部分出現,不過睇睇吓...原來仲係一個叫『趣緻寫真 - 天才音樂家』部分,有小小豬份呀~


哈哈哈...依張相其實係我N個月前,貪鬼意SEND去投稿。不過,SEND左咁耐都一直冇回音,都以為冇份。估唔到上個月收到編輯E-MAIL,問我多啲資料話會刊登,不過就需要因應刊登排位,未能確定到係邊期。

估唔到原來又係刊登係依一期,即一本雜誌就有兩個小小豬啦!

雖然都係兩張小小嘅相仔,不過見到小小豬張相係雜誌出現,個心都有一種莫名嘅興奮咁.....哈哈哈!

唔知幾時再有機會係雜誌出現呢?


Photobucket 

*♡♡小肥豬♡♡* | 30th Jul 2012 | 小小豬篇 | (62 Reads)
29 JULY 2012(SUN) 

由當初好擔心小小豬冇得讀PN,都終於有學校收佢(仲要係上午班..YEAH!!),唔覺唔覺原來仲有半個月小小豬就要開始返學生涯啦! 

其實我嘅心情都真係好矛盾,有得返學過啲群體生活,等小小豬學多啲嘢名識多啲朋友當然係一件好事,不過我又真係好擔心。小小豬返學嘅時候,都只係剛剛好足兩歲,所以真係好擔心佢返學會唔習慣,唔適應咁狂喊又扭計,仲要咁細個人仔就要搭校車返學,所以都真係好緊張。不過....我都應該要相信小小豬嘅適應能力,加上又有老師嘅幫助教導,我應該要放鬆啲。

雖然仲有半個月就返學,不過原來我係未為小小豬準備啲返學用品,所以就趁今日有時間加上吉吉島又有開學特價,同大肥豬去幫小小豬準備吓啲返學用品先。

先嚟一對黑色皮鞋,雖然個款就麻麻(唉....男仔又點會有好多選擇呀!),不過位SALES姐姐聲稱係真皮嚟哦~

波鞋仔~

白襪仔,我都曾經搵個好多地方,都買唔到咁細隻嘅純白襪仔。不過原來吉吉島就有,早知唔行咁多地方啦~

 
茶點用品,點解買紅色.....原因只得一個,就係紅色+兔仔係旺小小豬嘅,所以雖然比較似女仔都照買,等小小豬返學都可以旺一旺嘛~
 
除左去吉吉島買嘢之後,之後係網上訂左啲『姓名名貼』都係今日收到~


一種係熨係衫內嘅衫貼,另一種就係鞋貼,貼好一定唔會同其他小朋友攪亂啦!

今日都可算話買得七七八八,不過其實....最重要嗰樣校服我都仲未有時間去買,應該要等下個星期日先再出去買,到時就真真正正了左件事,開開心心等返學啦!

 

Photobucket 



*♡♡小肥豬♡♡* | 29th Jul 2012 | 小小豬篇 | (14 Reads)
28 JULY 2012(SAT)

整個星期天氣都唔好,小小豬都冇出過街,難得今日天氣好好,雖然我返左成日工都攰攰地,不過都要帶小小豬去玩吓放放電,順便等大肥豬試吓支新鏡。

我地出發時都已經差唔多六點,所以都係近近地左觀塘海濱公園。其實依個
海濱公園都去幾次,不過次次都係早上去(貪佢冇咁晒同冇咁多人),今次黃昏去到,真係另一個景象,有好多人係度好熱鬧,不過都依一樣咁舒服,所以話依度真係一個幾好嘅地方呀!

搵到個好位,小小豬就開始走..走..走...啦~

我同小小豬玩得幾開心~


望海嘅小小豬~


小小豬都識玩飄浮呀~

睇吓佢地兩父子幾溫馨~

當然唔少得玩BUBBLES啦~


開心走走一輪,回復文靜行吓草地先~




其實我地附近都有一班年輕朋友係度跳街舞,係強勁嘅音樂之下,小小豬都跳返隻先~


我地玩左都有差唔多一個鐘,黃昏依個時候真係好有FEEL呀~


支新鏡真係好重,拎住佢影左成個鐘都真係手都軟埋呀~


今日除左俾小小豬放電之外,另一個目的就係試鏡。整體上依支鏡影出嚟嘅相都真係好正,影出嚟仲好有FEEL(尤其係黃昏嗰幾張),同埋真係幾啱用嚟影小小豬,因為隻豬仔成日都走嚟走去,有左依支鏡我就唔洗追住佢嚟影,坐定定係度影佢地兩父子啦!

大肥豬今次真係冇買錯,唯一就係真係好重手,我影完之後手腕都冇晒力呀...哈哈哈!



Photobucket 

*♡♡小肥豬♡♡* | 25th Jul 2012 | 小小豬篇 | (15 Reads)
25 JULY 2012(WED)

今日LUNCH之後,收到小豬媽WHATAPP嚟幾張相,睇到嘅時候都真係勁SWEET,亦令我非常羨慕!

睇吓個為食擦鞋豬,為咗食小豬媽碗飯,真係叫佢做乜都得,犧牲色相佢都完全唔介意啦~


睇吓個傻仔食得幾狼C~

個傻仔真係笑得好開心(雖然張相係檬檬地,不過影得佢真係好開心呀!見到張相又令我好想買部好少少,快門可以快啲嘅傻瓜機添,唉...又要發吓夢先得啦...因為大肥豬成日都話有單反已經足夠,唔建議我買呀!! )~


食飽飽又嚟CHOK過~

哈哈哈....依個小小豬真係越大越古靈精怪,仲好似滿腦子計仔咁,不過亦都係咁,令我地成日都好開心,真係我地嘅開心果!

唔知幾時我又可以同小小豬嚟個咁溫馨嘅時光呢?


Photobucket 

*♡♡小肥豬♡♡* | 24th Jul 2012 | 生活點滴 | (30 Reads)
24 JULY 2012(TUE)

講真....真係完全冇諗過今次依場風會打得成,加上次次晚上掛嘅風球都一定唔會維持好耐,所以都完全冇期望,昨晚乖乖咁去瞓覺,預左今日要繼續努力工作。

不過原來一覺醒來,我已錯過了十號風球。其實唔係今朝睇新聞報導,都唔知掛過
十號風球咁誇張,只係知道昨晚啲風吹得好勁,呼呼聲咁...攪到我都瞓得唔好呀。

等到十點幾,知道改掛三號後,即刻開始換衫返工。但真係好黑仔咁,等左成十部有多嘅小巴都係冇位,巴士又冇...的士都冇...幾時先有車呀?最後我係條街度等左成個鐘先有巴士,仲要迫到C咁上車,
真係好討厭打風後返工呀!

雖然返工過程都真係唔係幾開心,不過都有另一件事令我非常開心呀!

事緣當天文台話十點後會考慮改掛三號時,小豬媽就入廚房煮左一盒飯俾我,話剛剛打完風唔好周圍去,所以整左個愛心炒飯俾我地(大肥豬都有份呀!),就係咁我今日就有依盒勁溫暖嘅LUNCH BOX~

請容許我晒一晒,我真係
覺得超幸福,只能唱一句:世上只有媽媽好



PhotobucketPhotobucket

*♡♡小肥豬♡♡* | 23rd Jul 2012 | 生活點滴, 小小豬篇 | (24 Reads)
22 JULY 2012(SUN)

今日真係開心,點解?因為突然有兩份禮物收嘛!

首先第一份就係來自台灣手信~


依份係大肥豬姨甥考完試後,同班同學仔一齊去台灣旅行回來買給我地的手信,當然包鐵蛋就唔係小小豬啦。不過估唔到姨甥仔只是一名中學生,係冇人提及嘅情況下,他都懂得買衫送俾小小豬,就是依份心意令人感到特別高興。

第二份禮物就係~

原本都有打算去書展睇吓有冇啲書啱小小豬,不過最後大肥豬都唔建議,所以今年我如常冇機會入書展睇書,不過好在LULU妹會入場買書同搵作著簽名,所以就係咁....我都有馬仔新書睇,最好就係本書係LULU妹送俾我嘛....哈哈哈!

*♡♡小肥豬♡♡* | 22nd Jul 2012 | 小小豬篇 | (16 Reads)
21 JULY 2012(SAT)

今日大肥豬要OT,所以可以做就左個機會俾我,等我可以獨霸小小豬啦....哈哈哈!

雖然可以獨霸小小豬同佢玩係一件非常開心嘅事,不過真係跟少一眼都唔得。

就好似我入一入廚房睇吓煲粥個火時,時間都唔算耐,不過依個小小豬就可以趁我入廚房嗰一陣,就玩成咁,真係俾個百厭仔激親~


 
隻豬仔仲“叻”到識得用隻手推張椅子令到個碌碌膠盒向前行,真係唔知讚佢好定話佢好,都唔知佢係邊度學返嚟,真係唔知好嬲定好笑啦~


唉....真係一名爛玩豬,所以話真係睇少佢一眼都唔得呀!(不過...其實小小豬都唔算係嚴重破壞王,所以偶然一次半次,都隨佢啦)

玩完百厭嘢,係未食粥粥前,就同佢嚟個小食先,今日有好靚嘅黑提子。

睇吓個為食小小豬,有得食就肯乖乖食定定,仲特別古靈精怪添~
 



食完生果,就嚟學習時候。原本係打算教小小豬塗顏色劃線條,不過劃左幾吓之後佢就唔劃,因為佢自己停係度ONE...TWO...THREE...一支一支咁邊數邊讀,數到TEN之後又再放低啲顏色筆再數過。之後又依住啲顏色咁讀RED...GREEN...BLUE....BROWN....等,基本上都識讀晒枱上面啲顏色,聽到時個心都真係超興奮呀~


原本都想拍條片俾大家睇,不過我一轉拍短片時,小小豬就開始唔合作要玩其他嘢,所以等有機會再拍低佢同大家分享啦!

*♡♡小肥豬♡♡* | 19th Jul 2012 | 生活點滴, 小小豬篇 | (23 Reads)
18 JULY 2012(WED)

今日放工,大肥豬拎左一盒嘢返嚟,原來佢買左支大炮呀~


見到個實物真係嚇左一跳,洗唔洗咁大支....咁長呀~

連埋部機身,真係好似幾有型(夠大部),不過就好重手呀~


加埋個遮光罩就仲勁,好似好專業咁哦~

其實我開頭都唔係好明點解大肥豬會買依支鏡返嚟,講真.....我地又唔會去打雀(只會去打豬....即係影小小豬..呵呵呵),所以咁長嘅鏡暫時對我地係冇乜用。

不過,大肥豬話自小小豬開始準備返學時,都已經開始計劃買支長...長...長鏡,買定嚟等小小豬返學時,一有機會上禮堂去參加表演或者領獎時,就算我地坐唔近個舞台,都可以影到小小豬係台上面嘅樣。(好明顯.....大肥豬真係一名廿四孝Daddy啦)....嘩.....咁咪即係有排先用得。

不過,大肥豬都建議,如果我地再去沙灘時,都可以帶埋去,等我可以係岸邊影佢地在水中央個開心樣。哈哈哈...咁重又大部,所以要帶去沙灘,都真係要諗諗先呀!

BTW....我想大肥買部可換鏡頭嘅機仔俾我先囉,等我可以依家開始用嘛!!(唉...發吓夢啦!)

*♡♡小肥豬♡♡* | 18th Jul 2012 | 小小豬篇, 好友與我 | (27 Reads)
18 JULY 2012(WED)

八月都未到,小小豬就已經收到兩歲仔嘅第一份生日禮物啦~

係小小豬至愛嘅MICKEY塗顏色嚟用品~

除左小小豬之外,我都有禮物收呀~


其實依兩份禮物係學校一位老師(當然係少少少部分對我好嘅老師嚟啦)送俾我,因為佢開始送暑假,但又唔想過左生日先送俾我地,所以就提早送俾我地啦!

哈哈哈...有禮物收我當然唔介意啦,加上佢又咁有我地心,我應該開心感動就真。

*♡♡小肥豬♡♡* | 17th Jul 2012 | 好友與我 | (28 Reads)
16 JULY 2012(MON)

今日又嚟拋父棄子一晚,因為約左好友CARMEN食飯,同佢慶祝生日。

其實都真係唔係幾好意思,原本係約好左係CARMEN生日前同佢食生日飯兼送禮物俾佢,不過因為約好左嗰日突然有事,所以唯有改係今日先同佢慶祝啦!

今日我地個開心飯局就係和民~


睇吓我地個豐富晚餐,樣樣都幾好食呀~


啲餸就幾好食,不過個甜品就差少少,入面太多脆脆,好似食緊早餐咁,所以真係麻麻地~


開心時刻仲有禮物收,因為CARMEN送左份禮物俾我同小小豬添(當然啲零食係冇小小豬份啦)~


今日真係傾得好開心,仲要傾都成九點幾先識走,哈哈哈...真係快樂不知時日過!

期待下次再一齊出嚟傾過同笑過,我地仲要搵個好日子一齊入迪迪尼飛返轉呀!

*♡♡小肥豬♡♡* | 11th Jul 2012 | 小小豬篇 | (26 Reads)
10 JULY 2012(TUE)

話咁快....小小豬又大一個月,已經係23個月。下個月就係兩歲生日,又係時間開始PLAN吓啲慶祝活動啦!(其實係有個貪玩嘅媽咪又想去玩...呵呵呵)

話晒都係重要日子,冇理由困住小小豬係屋企成日,所以今放工之後,就同埋LULU妹帶左小小豬落公園玩一陣,等佢放放電!

一知道有得去公園玩嘅小小豬真係好開心,仲第一時間爬上去玩個呔盤呀~


仲CHOK住嚟玩添~


小小豬一開心就會做啲古靈精怪樣,見到人都會開心呀~


佢同LULU妹玩得幾開心~


睇吓個百厭仔玩滑梯個曳樣~


我地仲玩埋泡泡添~


小小豬見LULU妹吹泡泡,佢又要玩埋一份,就係咁我地就教佢自己玩泡泡啦~


唔知係小小豬真係大個左,定係因為剪左個頭髮影響,佢真係已經唔似一個BB,成個返學嘅小朋友咁嘅樣!(當然仍然係好可愛...唔係老千積啦)

希望小小豬可以KEEP住日日都開心快樂咁長成長,當然最好就係唔好咁百厭啦...呵呵呵!

*♡♡小肥豬♡♡* | 9th Jul 2012 | 小小豬篇 | (16 Reads)
9 JULY 2012(MON)

依家嘅天氣實在太熱,加上小小豬又係一個勁怕熱嘅豬仔,少少晒加玩一陣,佢就已經會成頭出晒汗,變返一隻濕水豬咁。

雖然都知道小小豬頭髮都算長,不過我開頭都打算等八月初先同佢去剪,咁樣到八月中返學時都可以KEEP到。不過自上星期六入左迪迪尼之後,我發覺真係唔可以再等,因為啲頭髮真係又長又厚,我見到佢都覺得辛苦,所以今日放約左小豬媽一齊帶小小豬去剪頭髮,實行嚟個短髮消暑迎夏天啦!

小小豬一見到個髮型屋就好似心知不妙咁,不停捉實我,一見到個
髮型師就已經開始失控,開始狂喊,唔可以乖乖咁坐定定剪啦。最後我地就用少少強硬手段,終於幾經辛苦,都可以話完成到,剪到一個勁型仔髮型。

返到屋企,洗白白之後,就可以同小小豬影吓個新LOOK啦~




哈哈哈...係唔係好型仔呢?真係第一次鏟到咁短,不過見到都覺得爽左好多,起碼條頸仔唔會出晒汗咁,熱C人嘛!

不過,小小豬剪依個頭除左因為太熱之外,都仲有另一個原因,就係因為大肥豬早前都剪左個差唔多嘅頭,所以成日都就有意冇意間叫同小小豬剪依款頭。既然佢想,又可以令小小豬冇咁熱,當然好啦....就係咁,佢地就嚟左個父子LOOK啦~


某程度上....小小豬剪左個頭髮之後,又好似似多左大肥豬,成個男仔樣,應該唔會再俾人認錯做女仔啦(係少少呀...因為佢係似我多啲呀...哈哈哈)!

*♡♡小肥豬♡♡* | 8th Jul 2012 | 小小豬篇 | (9 Reads)
7 JULY 2012(SAT)

哈哈哈....我地今日下午個重要節目,知唔係入迪迪尼去參加AP灰熊山谷預演日啦~


未夠鐘入灰熊山谷,所以又做我地嘅指定動作,去同MICKEY影相。睇吓個忠實FANS,痴到MICKEY實一實呀~

好耐都冇見過DONALD啦~

同公仔影完相,我地就休息一陣,同小小豬食完粥粥,就夠鐘可以向灰熊山谷進發啦~


灰熊山谷周圍環境~




當然唔少得重點環節....過山車啦~


因為我地帶住小小豬,所以開頭都以為冇得玩,到最後...經曾掙扎,終於都係決定自己一個飛返一轉(如果今次唔飛,下次再入就已經係公開左,到時一定多人排到呢..嚇親呀)。由於我係去排單人座位,所以都可以即排即玩。可能我都有玩開過山車,所以我又唔覺得特別驚,仲覺得好正,尤其退後行之前後嗰一後極速快車,真係好正。如果唔係唔想小小豬等我咁耐,我都好想玩多次呀!

另一個遊戲區就係小嘖泉位置~


仲有個地方俾小朋友玩水,不過因為怕濕身,所以我地冇俾小小豬入去玩~


小小豬唔玩,就大肥豬入去行個圈啦~

YEAH....彩虹呀~

原本想排隊影西部版MICKEY&MINNIE,不過勁多人同埋排隊嗰位勁晒,所以影唔到呀~


行左一個圈,因為地方實在勁晒,所以先嚟休息一陣先~


抖夠就俾小小豬周圍走活動一吓啦~




勁鐘意依兩張,好似好有FEEL咁呀....哈哈哈~


睇個傻豬仔周圍走...跑到嚇C人呀~


原本打算去排CHIP & DALE,點知行左兩次都係話已經截左....激氣,所以最後我地就係入口條樓梯俾小小豬玩,邊玩邊等。估唔到小小豬係條樓梯勁多表情,好攪笑呀~


全日最後一個節目就係同新人物....兩隻大灰熊影相啦~


今日有得優先試玩真係好正,係就真係熱左啲同晒左啲,返到屋企真係成個人都散晒,不過最好就係冇啲不守規矩嘅人影響,舒服好多呢!

*♡♡小肥豬♡♡* | 7th Jul 2012 | 小小豬篇 | (9 Reads)
7 JULY 2012(SAT)

今日下午我地有重要節目,所以一早唔敢周圍走(唔好浪費啲精力嘛)。

留左係屋企當然唔會悶啦,因為今日大肥豬又要培養小小豬嘅藝術細胞,同佢玩顏料呀~


唔知點解依支同上次係小豬媽屋企玩嗰隻好唔同,上次嗰支係比較杰啲,所以落到紙就好似唔多上色咁。不過今次依隻就好好多,一唧一掃就好多顏色,所以小小豬玩得特別興奮呀(真係唔明,兩隻都係同一個牌子,點解會咁呢)~


睇吓佢個專心樣~


哈哈哈...仲玩到成隻污糟豬添~


依個大作真係何其有藝術,勁驚嚇呀....呵呵呵!

大家唔好俾個場景嚇親,因為依一隻係好易水洗,所以閃一眼,小小豬返面仔同手仔,仲有張枱就已經清潔返晒啦!

*♡♡小肥豬♡♡* | 6th Jul 2012 | 小小豬篇 | (14 Reads)
6 JULY 2012(FRI)

上嗰兩次去沙灘都冇同小小豬搽防晒,所以攪到佢依家變左一隻黑豬仔。

其實我都唔係唔記得,只不過屋企支防晒係上年用剩,我怕開左一年之後會變壞,所以唔敢再用。幾次都行萬記屈記嗰啲地方又成日唔見有FOR BABY用嘅,所以攪攪吓就上兩次去沙灘都冇得用。

最後,經朋友仔PING PING通知,原來化妝品公司都有得買,就係咁我今日就買到支俾小小豬啦~


依支防晒係有埋防沙功效,咁下次去沙灘咪可以好安全,唔洗變炭豬仔啦!

BTW....其實我覺得依家大白天出街玩都應該搽一搽,因為啲陽光真係好勁呀!

除左防晒之外,其實夏天都一樣係好需要防蚊貼,今日冇意中係萬記見到依款,當然唔洗諗即買啦~



哈哈哈....有MICKEY隨身,睇吓啲衰蚊點埋身!

*♡♡小肥豬♡♡* | 5th Jul 2012 | 靚太廚房 | (93 Reads)
5 JULY 2012(THU)

因為今晚我細路返嚟食飯,所以比平日煮多左幾樣,睇吓我地是日豐富的晚餐~


先嚟下火嘅芫茜皮蛋魚片湯~

細路ORDER嘅白切雞~


蒸魚~

蕃茄午餐肉
~

青瓜炒蝦球~

最後依一個真係要特別介紹一吓.....蜜糖豬頸肉~

依個豬頸肉真係簡單得嚟又易煮,仲要係勁好味,真係要極力同大家推薦一吓。有興趣嘅朋友都要試吓呀!



蜜糖豬頸肉

材料: 
豬頸肉   兩塊
蜜糖 
   適量
蒜茸     少許

製法:
1.豬頸肉打斜切薄片, 之後用蠔油、酒、少少糖醃20分鐘
2.用蒜茸爆再將豬頸肉煎熟,之後再加入蜜糖(多少除你個人口味, 我落左大湯匙)
3.快手兜勻就得啦(真係要快手,因為蜜糖係好易燶呀)

*♡♡小肥豬♡♡* | 4th Jul 2012 | 小小豬篇 | (15 Reads)
4 JULY 2012(WED)

依個小小豬真係越嚟越百厭,佢啲脾氣真仲越嚟越大,尤其係近依一個月,情緒先開始轉變得咁大,好易發忟憎,有時真係都幾頭痛呀!

就好似今日咁,個
百厭仔做錯事俾小豬媽罵之後,佢就發脾氣走入房喊(仲要係喪喊)。原本小豬媽都唔理佢,不過因為肉赤嘅小豬爸忍唔住,終於入房救起個百厭仔~



唉...依個小小豬脾氣真係越來越大,有時一見佢做啲唔啱嘅嘢,當我地話佢時,佢都會即刻發忟憎,表現出好唔鐘意咁。嗰一刻我地一定會即刻罵佢或者罰佢同埋唔彩佢,一定唔會退讓,要俾佢知咁發脾氣係唔啱。

依個仔條頸真係好硬,仲要極度有性格,所以都真係幾頭痕。
有時都真係唔知點教好,同佢講佢道理又好似唔明我講乜,但佢做嘅表現又好似知你想點咁。但每一次罵完佢之後,個傻豬仔又會好醒咁知你嬲完之後又會痴實你,做啲行為出嚟冧返你,好似想錫返你咁,所以有時都唔知點對佢好呀

不過,我都真係寧願依家做晒衰人,對佢嚴啲,加多幾錢肉緊同狠心,紏正返佢。如果依家唔教,到佢大個時啲衰脾氣仲勁,仲難教呀!

唉...我都知教小朋友係需要好大耐性同愛心,所以我會慢慢教,希望到佢返左學之後,有埋老師幫手教會好啲啦!

其實小小豬咁表現都係証明佢已經大個仔,開始有自己思想,已經唔再係之前嘅一舊飯,唔通依家就係傳說中嘅
Trouble Two?

*♡♡小肥豬♡♡* | 3rd Jul 2012 | 靚太廚房 | (76 Reads)
3 JULY 2012(TUE)

今日為齋期,所以就準備左一個素晚餐俾大家~


蒸水蛋~


勝瓜炒素火腿~


冬瓜素魚肉湯~


齋期都真係唔知煮乜好,不過好在小豬媽前排行商場時入定啲素肉返嚟,咁先可以叫做有啲肉落肚,唔洗只係食菜咁DRY。雖然明知道嗰啲素肉都係用豆類製成,不過唔只個味似就連啲外貌都好似,所以都叫做OK,有啲肉落肚就有返啲飽肚感(好明顯我係一名食肉獸,要食肉先會有飽嘅感覺...突然間覺得自己好唔神心添,罪過...罪過)

成日見其他朋友煮嘅都好多唔同種類,就連煮齋我都見佢地好多花款,不過我自己就總係煮嚟煮去都係嗰啲,有時我唔覺悶,都怕你地睇到悶,所以有時都唔會POST出嚟。

我真係要再繼續努力,睇多啲食譜,學煮多啲嘢,有多啲唔同口味先得。

如果大家見到有啲正嘅食譜,最好就係方便、簡單、易煮(特別係煮齋菜方面),記得通知我,等我可以學習一吓呀!

*♡♡小肥豬♡♡* | 2nd Jul 2012 | 小小豬篇 | (16 Reads)
2 JULY 2012(MON)

今日小小豬真係有口福,因為小豬媽買左啲又大粒又紅卜卜嘅車厘子俾小小豬作飯後甜品。

一向為食嘅小小豬見到啲車厘子當然急不及待咁即刻開始食,真係俾佢嚇親,食到成隻污糟豬咁呀!(以下圖片或可引起不安,請見諒!)

好一隻污糟豬嚟啦~



 
睇吓食得幾滋味,就連條紗巾都唔放過呀~



 
對住依隻為食豬都真係唔知好嬲定好笑,次次食嘢都一定食都污糟豬咁,因為佢係將每一樣食物都好滋味咁慢慢『昧..昧.. 昧』咁食,口水就自自然然咁出晒嚟,攪到啲周圍都係。

雖然就真係污糟左啲,不過依個都係小小豬鐘意食嘅表現,加上佢個食嘢衰豬樣又真係幾攪笑,見到都嬲唔落。

小朋友就係咁,慢慢嚟啦..相信小小豬好快就可以做返愛吃但又唔污糟嘅豬豬啦!

*♡♡小肥豬♡♡* | 1st Jul 2012 | 生活點滴 | (29 Reads)
1 JULY 2012(SUN)

今日大肥豬拎左一封信俾我睇,就係咁就有一個驚喜,就係.......我地已經加入宣明會,成為助養孩子嘅一份子啦~


依個就係我地所助養嘅小朋友~


依一個小朋友係大肥豬以我嘅名義嚟助養,事前我都全不知情。佢話我地嘅生活都可以應乎到,加上小小豬出世之後又覺得一個小朋友嘅生活係好重要,所以就不如付出少少,去幫助有需要的人,亦都可以為我地積少許福澤,為小小豬做一個好榜樣嘛!

其實依件事都係一件好事,我又點會反對,亦非常支持添啦!雖然所助養嘅費用唔多,不過都好希望依小小嘅付出,可以幫助到佢有好既生活,有一個好好讀書嘅機會啦!

原來除左每月俾助養費之後,我地仲可以同佢地有書信來往呀~


我會同我個助養小朋友書信來往,等過多幾年,小小豬大個識寫字之後,依個任務就會轉交俾小小豬,等佢可以學習大肥豬依一份善心同愛心,學懂去關心人呀!(好似講到好長遠添...哈哈哈)