香港新浪網 MySinaBlog
*♡♡小肥豬♡♡* | 31st Mar 2012 | 生活點滴 | (19 Reads)
28 MARCH 2012(WED)
早前有朋友仔問我訂唔訂HELLO KITTY黑超,我見都幾得意,所以就訂左兩副。等左一個星期多少少,終於今日到我手啦~

哈哈...急不及待要試吓,戴起嚟又真係幾可愛呀~

雖然兩副都幾好,不過我就比較鐘意黑色嗰副多啲啲...HEE HEE!
嚟緊夏天就可以帶住去同小小豬去沙灘玩啦!



*♡♡小肥豬♡♡* | 30th Mar 2012 | 小小豬篇 | (15 Reads)
25 MARCH 2012(SUN)
上幾個月唔係因為有事做,或者小小豬唔舒服,就係天氣唔好,所以計計吓都有成三個月冇入迪迪尼。雖然我地去嘅次數都已經回本,不過有AP又點可以蝕呢,當然要密密去先得嘛!
終於今日有盡天時、地利同人和,可以再入迪迪尼玩啦!最主要俾小小豬見吓佢個偶像....當然係MICKEY啦!
原本打算一入都去就搵MICKEY,不過因為剛好係休息時間,所以就轉行入SHOP,搵吓小MICKEY先。小小豬一見到啲MICKEY都不知幾開心呀~
見到啲泡泡幾開心~

終於等到夠鐘影MICKEY,小小豬一見到MICKEY都不知幾開心,即刻走埋去同MICKEY玩呀~

原本打算影完依個之後,就休息一吓。不過小小豬實在太愛MICKEY,所以係走嘅時候就好唔捨得咁不停叫MICKEY...MICKEY,大肥豬見佢咁唔開心,所以就建議入去幻想世界,再搵MICKEY玩啦~

影完之後,都係時候休息一吓。我地靜靜地帶左粒橙俾小小豬食,睇佢食得幾滋味~

休息過後,我地就去小小豬第二個至愛地方,就係TOY STORE LAND,因為有佢至愛嘅ABC~

睇小小豬行得幾得戚,就知佢有幾開心啦~
玩左一陣,我地就打算帶小小豬入去睇GOLDEN MICKEY,係排隊入場時,睇吓佢兩父子幾SWEET SWEET~

因為之前都睇過獅子王,所以都以為小小豬唔會驚。點知....當場地黑晒又加埋啲比較大聲嘅音響,小小豬都開始有啲不安,不過最攪笑就當有MICKEY出場時,佢又可以好安靚咁留心睇,MICKEY一走又開始不安。見到小小豬咁不安,所以我地都中途離場,唔好嚇親佢,等有機會先再去睇過啦!
最後我地行多一陣SHOP,買左少少嘢咁就走人。其實今日玩嘅活動唔算多,所以都可以用個HEA字形容。今日就HEA住先,嚟緊幾次就會用佢個VIP推廣優惠,免費帶埋小豬媽同LULU妹一齊入去玩,人多啲仲好玩呀!






*♡♡小肥豬♡♡* | 25th Mar 2012 | 小小豬篇 | (14 Reads)
22 MARCH 2012(THU)
今日小豬媽whatapp左一張相俾我睇,睇左真係超爆笑!
原來我生左一對龍鳳胎呀~
 
嘩哈哈....小小豬個樣真係又可以男仔樣,又可以女仔樣。
唔通依啲就係叫做男生女相,好多人都話男生女相嘅,大個左一定會好靚仔,希望小小豬都係一樣,大個左都係一名靚仔啦!

*♡♡小肥豬♡♡* | 24th Mar 2012 | 小小豬篇 | (11 Reads)
22 MARCH 2012(THU)

特別新聞報告:

今日接到小豬媽嘅舉報,發現屋企唔見左一袋麵包,我地一齊去案發現場睇吓!

有一個小BABY入廚房見到婆婆個買餸袋就打開嚟睇吓~


嘩...發現到啲好嘢哦...大力大力拎出嚟先~


拎到啦....拎到啦...快呀...走呀~


行到去梳化就開始拎飽飽出嚟先~


嘩...好味嘅飽飽呀...等我坐定定食先~

大啖大啖咬落去....真係好好味~


就係咁....依一個為食嘅小小豬就變身小偷阿椗。

都唔知點解佢會識得走入麼房,又識得找小豬媽個買餸袋去搵嘢食,都真係唔知俾佢笑C好呀...定激C好,真係真係一名為食百厭豬。

不過另一想法就係,佢咁鐘意食嘢都係一件好事。唯一就係要教返佢唔可以自己入去拎,我地都已經決定左唔可以再俾小小豬再偷嘢食,今次就俾佢過份一次,下一次我地再見到就一定會阻止佢,唔可以養成習慣呀!

*♡♡小肥豬♡♡* | 23rd Mar 2012 | 小小豬篇 | (13 Reads)
21 MARCH 2012(WED)

尋日幫依個長髮小小豬扮完女仔之後,今日都係時候帶佢去剪頭髮,等佢做返個型仔先得啦!

今次都係去小豬媽朋友嘅髮型屋剪呀~

 
開始剪嘅時候都好似好好地~


 
剪剪吓就唔對路,開始扭計,最後用刨機時就已經失控,扭爆又勁喊,人地唔知以為我係拐帶..哈哈哈。

經過一輪努力(我指係我地,因為要防止小小豬周圍郁,要狼心少少按實佢個頭仔),終於剪好左個頭,我地即刻飛返屋企同小小豬洗白白(因為成身都係頭髮毛呀)。

小小豬嘅新LOOK,加埋佢啲古靈精怪動作,再加著埋小豬媽之前買嗰件型仔恤衫,真係勁型仔呀~



 
依一個髮型,再加埋依個表情,真係好似大肥豬細個時個樣呀~


哈哈...冇得扮女仔,小小豬依個新LOOK好似唔多似我添。 
 


*♡♡小肥豬♡♡* | 22nd Mar 2012 | 小小豬篇 | (17 Reads)
20 MARCH 2012(TUE)

相信好多媽咪都會趁仔仔長頭髮嘅時候,幫佢札吓辮仔,扮吓女仔。小小豬有一個貪玩嘅媽咪同婆婆,佢又點可以走得甩呀!

我地見小小豬啲頭髮已經好長,加上下星期又要扮禮服朦面俠,冇個靚仔LOOK點襯套衫呢?所以我地就決定左過兩日帶小小豬去剪頭髮。 趁依家啲頭髮長長地,屋企又搵到啲夾仔,所以就由小豬媽動手,幫小小豬扮吓女仔先。

先嚟孖辮LOOK,似女仔指數真係可以講話爆燈,勁可愛呀~


我都忍唔住要同女女影返張相,小豬媽話依個LOOK真係同我有99.9%似樣呀~


之後嚟個噴水池LOOK,加埋依個攪笑表情...哈哈哈~


最後嚟多個夾仔LOOK~


其實除左依幾張相之外,我地仲影左好多張靚女相,好多都好攪笑,不過為免小小豬大個知道我將佢啲咁靚嘅相同大家分享,所以嗰啲就留嚟我地珍藏,留返俾佢大個睇啦!(PS: 依啲造型係小豬媽攪,唔關我事呀,小小豬大個見到,唔好嬲我呀...哈哈哈哈!)

小小豬又真係勁似女仔,咁都好證明係似我嘛...哈哈哈!

*♡♡小肥豬♡♡* | 21st Mar 2012 | 生活點滴, 小小豬篇 | (24 Reads)
20 MARCH 2012(TUE)

華星冰室依個名聽到聽左好耐,亦都知道佢地已經開多左幾間分店,其中有一間仲係小豬媽屋企附近。想就想過好多次,每一次路過都話要入去試吓,不過一直都冇機會,大鄉理嘅我到左今日終於都可以試到啦!

事緣今朝早起身啲燒仲未退,所以就請多一日病假,唔好返去傳染其他同事。

食完藥繼續瞓,瞓到差唔多十二點幾先識起身。之後見都冇再燒,又在返啲啲精神,所以小豬媽就建議落街食個LUNCH,行吓精神啲咁話,就係咁...我地一行四人就有得去試吓華星冰室啦~

可能就係因為有名氣,所以我地都排左一陣先有位。一座落就即刻周圍睇,真係好多華星嘢呀~

睇吓小小豬個古靈精怪樣,可能知道就嚟有嘢食,所以就特別攪笑呀~

依度食物類型真係唔算太多,所以我地三人最後ORDER左三客常餐~

我地三個人一致都覺得啲嘢食係幾好味,尤其係個炒蛋,滑得嚟又唔“鞋”口,仲好 JUICE添。

唔止我地,就連小小豬都食得咁開心~

除左美道好之外,冰室入面啲工作人員都十分有禮貌又細心,知道我地有個BB同行,幫我地準備張卡位(我地冇要求的)。另外,我地所需要嘅碗仔(俾小小豬食粉時用),佢都幫我地用熱水滾過,依一點真係估佢唔到咁細心,真係抵讚呀!

雖然啲嘢食好味,服務態度又好,不過都有一個缺點,就係我地都覺得價錢貴左少少,我地食三個餐都成一百蚊呀!

當我地離開冰室嘅時候,在門口同小小豬坐返車仔時,俾我撞到EASON同另一位EO2成員(唔知佢叫乜名..哈哈),原來佢地都剛剛係入面食完嘢出嚟。嘩..我都係第一次咁近距離見到明星,EASEON同係電視見都冇乜分別,全程都笑笑口,好似幾NICE咁呀。

哈哈...唔知下次再嚟時有冇機會再見明星呢?

*♡♡小肥豬♡♡* | 20th Mar 2012 | 生活點滴 | (22 Reads)
19 MARCH 2012(MON)

今日係我同大肥豬拍拖N週年紀念,原本都PLAN好左嚟個小型慶祝活動,出街食餐好嘅,不過依家真係乜地方都唔洗去。

因為今日一早起身準備返工之際,全身都唔舒服,原來係發燒,唯有請假去睇醫生。就係咁....我今年拍拖週年禮物就係依啲啦...真掃興~

不過,都唔知係真唔係,點解有咁多種藥,仲要有啲係四個鐘一次,有啲就只係食三次,真係記食藥都有排記。有種感覺醫生好似魚翁撇網咁,樣樣藥都開俾我食,其實係唔係真係要食咁多呢?相信我又係時候轉過另一個醫生啦!

唉..雖然真係好唔鐘意食邊個叫我咁水皮又打敗仗,又要食藥呀!

可能瞓左成日,所以依家真係好精神瞓唔著,不過
....食左藥之後,好似好返少少,不過都總係燒吓唔燒吓咁,好討厭依種感覺呀!

*♡♡小肥豬♡♡* | 19th Mar 2012 | 小小豬篇 | (15 Reads)
18 MARCH 2012(SUN)

今日天氣真係十分之好,當然唔好浪費,要去玩吓。近日嘅好節目,一定係去維園花展啦,所以就約埋小豬媽同LULU妹一齊去行吓影相啦!

可能係第一個星期日,加上又好好天,所以真係勁多人,好多地方都好難行到入,只可以遠望,所以我地都只係可以係幾個景點影相~


好耐冇影單人照啦~

行左一陣,小小豬都已經面仔紅卜卜,加上又真係好迫人,所以我地只好行一個圈就走啦!

雖然唔係影得好多相張,不過除左小小豬唔笑之外,好多張都好靚,所以都算啦,下年小小豬再大個啲先再影多啲啦!


*♡♡小肥豬♡♡* | 18th Mar 2012 | 博客分享 | (26 Reads)
15 MARCH 2012(THU)

感謝 she.com及
SOFINA讓我有機會試用SOFINA最新推出嘅Primavista Liquid Foundation 柔亮持久粉底液 SPF25 PA++,而左邊那盒是 Primavista Face Powder 柔滑細緻蜜粉~

基本上我都已經轉用左SOFINA粉餅,覺得真係唔錯,簡單方便得嚟又好用,所以我都一直KEEP住有用。今次依個試用嘅新版本的粉底液的粉體經改良後,更加容易平均分佈在狀態不佳的皮膚上,令生理期前後、睡眠不足等肌膚狀態不穩定的日子,也能更容易上妝,妝容更貼服;而且新版本對油脂固定的能力更佳,控油的效果更好。加上佢嘅賣點是「讓肌膚回復幼嫩光感,年輕5歲的肌膚」,所以都幾期待。

Primavista Liquid Foundation 柔亮持久粉底液 SPF25 PA++,化妝姐姐為我選是中間色05號~

隨粉底附上專用粉樸及粉樸盒,可令粉樸保持乾爽,防止細菌滋生~

質感很輕盈,一點也不厚,而且很柔滑又不會太乾,水潤感真不錯。此外,遮瑕度亦不錯,輕易平伏凹凸毛孔、修飾色斑及暗瘡印~

Primavista Face Powder 柔滑細緻蜜粉~

使用時只需按住粉撲,將粉盒倒轉輕搖,就可以倒出適量蜜粉了~

蜜粉是透明色,質地很幼細,掃開後有很自然的光澤感,細微的凹凸部位也能修飾到,用後臉部皮膚好像平滑了~

使用前後,希望唔好嚇親大家(影極都係咁醜樣,影唔出佢地分別之處,可能係我唔識影啦)~

使用了差不多一星期,皮膚都沒有暗粒或敏感的情況出現,此產品都應該幾溫和。整體妝感是自然貼面、透明光澤感,面色都好啲。返工一整天都唔需要作任何補妝,回家後發覺個妝仍然KEEP到之後,更沒有出面油光及間啞。遮瑕方面亦不錯,毛孔可以修飾到之外,我的黑眼圈亦減少了。

某程度我用完這個試用產品之後都會回購,因為都真係唔錯。不過唯一考慮係.....依個新產品同用開嘅SOFINA粉餅都一樣咁好,你一SET個遮瑕度就比較好,各有各好唔知KEEP住用邊個好呢?哈哈哈....可以選擇兩個一齊用啦,趕時間嘅嘅時間就用粉餅,去隆重啲/要靚啲嘅時候就用依SET啦!

*♡♡小肥豬♡♡* | 17th Mar 2012 | 小小豬篇 | (10 Reads)
15 MARCH 2012(THU)

今期OK便利店有得儲印花換DINSEY公仔之後,我就想儲夠100FUN,換隻MICKEY俾小小豬玩。不過一向黑仔王嘅我,唔好話隻JUMBO MICKEY,次次都係只抽到5FUN,攪到我都仲未可以換到,仲開始已經冇左個心去換添!

雖然未有細MICKEY,不過我小小豬終於都擁有到隻大MICKEY啦~


哈哈哈....當然唔係我呁好彩抽中啦,其實係我一位好朋友抽到,佢又知道小小豬鐘意MICKEY,所以就轉贈左俾小小豬啦!

可能同佢玩開嗰隻MICKEY唔多似樣,所以暫時小小豬對佢都未係太喜好,不過...都識得叫佢做MICKEY。

有左依隻JUMBO MICKEY,我真係可以放棄儲夠100FUN換細嗰隻啦!

最後....都要同依位有心朋友仔(佢唔俾我公開佢個名呀..哈哈) SAY THANK YOU!!! 

*♡♡小肥豬♡♡* | 16th Mar 2012 | 小小豬篇 | (277 Reads)
14 MARCH 2012(WED)

原本依支針係應該上個月打,不過因為打針嗰日剛剛係小小豬發燒後三日,所以姑娘唔俾打,要再約過時間。之後約好左嘅日子又因為小小豬傷風同嚴重流鼻水,所以又要改期。終於到今日,小小豬冇晒事,所以可以去打歲半針啦!

不過,因為之前請過假,加上月尾又要為屋企嘅喜事請假,為免請假太多,剛好LULU妹又放假,所以帶小小豬去打針依個重任就交左俾小豬媽同LULU妹啦!

LULU妹話因為依排有擬似拐子佬出現,佢好驚小小豬俾人捉走,就連話坐BB車就怕會俾人推走,所以就話要咩住去健康院咁先係最安全,所以依個重責就交左俾LULU啦~

唔怪得之LULU妹會驚,因為依個小小豬真係唔識停,一去到健康院放低條咩帶,佢嘅百厭本色又出晒嚟,真係要全程金精火眼睇實呀~

去到健康院第一個節目就當然係磅豬仔先,歲半大嘅小小豬體重11.05安士(即約24.4磅),雖然都唔太標青,不過始終佢都唔舒服左成個幾月,有依個磅數都叫做OK啦!

等左唔知幾耐,就可以見姑娘,姑娘先了解左小小豬嘅生活習慣,整體上小小豬都係可以依照正常咁生長。到睇磅數時,原來小小豬個體重生長線比原有嗰條係有上升,即話原來小小豬個生長係有進步,咁都冇浪費小豬媽嘅心思,不停整好嘢俾小小豬食。

到一個重要嘅測試環節,基本上好多指定動作小小豬都做到,不過就係疊積木就差少少,佢唔係唔識做,係屋企都做過無數咁多次。只不過近排睇得WORLD FAMILY多,佢每一次見到積木時,都會拎嚟SKAKE..SHAKE..SHAKE,今次都唔例外,叫左好多次都係唔肯做。最後姑娘就俾左啲紙筆叫小小豬寫字,嚟CHECK吓佢手仔嘅靈活性。當然係難唔到勁鐘意寫字嘅小小豬啦!

最後,姑娘就問小小豬講嘢方面有冇問題,姑娘問小小豬鐘意講乜,咁小豬媽就話佢鐘意ABC,就係依個時候,唔知小小豬係唔係見到姑娘本紀錄簿入面啲英文字,所以就慢慢自言自語咁讀晒A-Z出嚟,之後又繼續ONE – TEN,還未夠...繼續OCTAGON..SQUARE...CIRCLE(見到姑娘枱面嘅形狀嚟讀),係咁講...好似上癮咁將佢記得嘅嘢一次個連環砲硃咁講晒出黎。姑娘都勁讚小小豬叻叻呀!

見完晒姑娘就等打針。今次係打手臂,小小豬都算叻仔,只係姑娘打落去嗰吓喊左兩聲,離開個打針房之後都即刻收晒聲,仲識得笑番添!

今次健康院過後要等四歲先再返嚟做視力檢查,到小一先再打針啦!

*♡♡小肥豬♡♡* | 15th Mar 2012 | 小小豬篇, 博客分享 | (46 Reads)
13 MARCH 2012(TUE)

早係二月中時,收到維特健靈的PR姐姐嘅留言,邀請我地試用維特健靈「小兒靈芝蜜」。其實一向都有留意維特健靈,加上小豬爸都有食開佢地嘅產品,所以對佢地都幾有信心,加上睇埋佢地嘅介紹,知道「小兒靈芝蜜」可以增強抵抗力,所以都有興趣試埋一份。(唉...近依個幾月小小豬都成日唔舒服,增強抵抗力都係一件好事嘛!)

參加得試用,當然要先介紹吓「小兒靈芝蜜」:

維特健靈「小兒靈芝蜜」5大特點
1. 維持呼吸道健康 改善咳和鼻敏感 增強免疫力
2. 促進腦部發展 提升記憶力、專注力
3. 健脾開胃 改善偏食煩惱
4. 唯一含五色靈芝成份的兒童營養品
5. 品質保證 食得放心

維特健靈的PR姐姐真貼心,由我答應之後唔洗兩日,就派速遞公司送到屋企,真係既快捷又方便呀~
 
原本打算一收到就俾小小豬試飲,不過小小豬病左,仲要食晒個星期藥,所以都等到三月頭先開始俾小小豬試。

介紹話
「小兒靈芝蜜」有好多食法,可以倒於麥皮、塗在麵包,或倒於牛奶及果汁。不過我都係用最原始嘅兩種方法,就係直接飲用同埋沖水飲用。

可能小小豬依排用慣左小匙食藥,所以一見到隻透明匙就要拎住嚟自己飲啦~


每次飲少半匙啦(不過依次銷多左少少...哈哈)~

叻叻小小豬自己飲啦~

除左小小豬試之外,我地一家人都有一齊試用。

個味道都幾好易入口,個感覺同平時飲蜜糖差唔多,不過我就覺得略為甜左少少,但都叫做可以接受。

至於成效方面,由於都只係試左一個星期多啲啲,係小小豬身上就好似沒有明顯變化(不過冇反應都係一件好事哦)。不過我就覺得我嘅鼻敏感性嘅流鼻水就好似少左,一早起身少左好多可能都噴嚏,所以都應該係有啲成效開始啦!

整體上我都覺得幾好,等我再繼續留意吓小小豬個情況,如果好的話,我相信都會KEEP住飲。

想知更多有關維特健靈「小兒靈芝蜜」的資訊, 可以上以下網址:
http://www.vitagreen.com/zh/lingzhi-honey


*♡♡小肥豬♡♡* | 14th Mar 2012 | 小小豬篇 | (14 Reads)
12 MARCH 2012(MON)

今日小小豬心情大好又古靈精怪做左好多攪笑事,佢啲失驚冇神嘅攪笑,真係可以俾佢笑C,好在小豬媽成日電話跟身,所以就可以拍低俾我睇啦!
 
先嚟係佢食完午餐尾段,小豬媽拎左啲圖案併圖俾佢玩,係玩嘅途中又嚟整個CHOK樣,佢嘅表情加埋個坐姿,真係型到冇朋友,好似係度思考緊啲重要大事咁~

拎住啲併圖好似諗緊點放好哦~

哈哈...諗到攰就打喊露,要去瞓覺啦~ 

攪笑事又點止一件,型爆過後,小小豬瞓醒時又拎左佢甜睡孖寶(MICKEY&欖枕腸腸)坐係梳化度。目的都係一個,就係想小豬媽開套MICKEY CLUB HOUSE佢睇。

有得睇MICKEY,又有孖寶陪,當然係勁開心啦~


仲跟住電視入面個MICKEY做動作添~


哈哈...依個小小豬真係表情多多,又古靈精怪,真係殺C人呀!

*♡♡小肥豬♡♡* | 13th Mar 2012 | 生活點滴 | (22 Reads)
11 MARCH 2012(SUN)

今日終於留低大肥豬同小小豬係屋企,同小豬媽嚟個大SHOPPING,我地目的都係為月尾家中喜事去作好準備。 其實唔應該叫大SHOPPING,係叫大出血先真,因為真係買左好多嘢呀!

第一站就係去花墟嘅鑌紛,其實都冇諗過會嚟,不過因為我地落車地點就係對面,加上又落雨,所以我地就走入去避雨,之後就買左啲仿真度極高嘅生果俾
小小豬~

其實我我地都有係俾小小豬食生果時教佢認生果,不過因為種類唔多,加上小小豬次次一見到啲嘢食就急不及待要食,都俾唔夠時間我地慢慢教佢,所以大肥豬就建議買依啲俾小小豬,等佢可以邊學邊玩。

話時話,依啲仿生果都幾貴,依幾個生果就已經買左差唔多二百蚊,真係真嘅都唔洗咁多錢。不過為左小小豬學習,冇辦法啦!

之後,我地就去金都進發,先嚟幫小小豬搵套靚靚禮服。其實成個金都賣幼兒禮服嘅真係唔多,都係二樓得兩間,加上又係男仔,款式又唔多。不過我都好睇左好耐,最後就買左依一套長燕子尾嘅禮服~

依套衫要成五百蚊,都只係著一個晚上,所以都有少少肉赤。不過,依個質地都真係唔錯,好滑身又唔焗身,啱晒依個小小豬。最好就係小小豬著左上身真係FIT晒,勁有型,成個禮服朦面俠咁,所以貴少少都值。

不過..好似差一個小小小嘅襟花,等我搵機會買個俾小小豬,咁就完美啦!當日一定要叫大肥豬幫小小豬影勁多...勁多...勁多...相先得呀..哈哈哈!

買完小小豬禮服,就帶小豬媽去買當晚穿晚裝著嘅內衣。原本都唔打算係金都買,不過有一位朋友仔介紹,所以咪去睇吓。嗰位婆婆真係好細心咁幫手揀合身嘅內衣,所以真係冇介紹錯。(哈哈…內衣唔同大家分享啦~)

買齊晒需要嘅物品,又幫小豬爸鎖定買禮服裇衫嘅鋪頭,咁我地就離開金都。

我地先去食個下午茶,之後見仲有時間,就去啲商場行吓。原本都冇諗過會買到嘢,不過就係因為我地行一行,我地每人就買左套靚衫係當日上午著啦!

依套係我嘅,著左上身唔肥之餘,仲好高貴添~
 
依套就係小豬媽嘅~
  
好耐都未試過同一日內買咁多嘢,買咁多樣嘢加埋都冇左兩張金牛,真係大出血。不過依啲都係開心事,所以洗多少少錢都冇計啦!

*♡♡小肥豬♡♡* | 12th Mar 2012 | 小小豬篇 | (18 Reads)
10 MARCH 2012(SAT)

睇見今日小小豬係幼稚園玩得咁開心,佢都應該好鐘意,我都希望佢第日返學時都可以今日一樣咁開心,有一個愉快嘅幼兒學習生活。唔經唔覺又一個月,小小豬已經踏入等十九個月啦!

原本都想趁今日我同大肥豬放假帶小小豬去玩,不過無奈地個天氣真係唔多合作,凍凍地又落毛毛雨,所以最後都打消左個去玩念頭,等天氣好啲先,真係好想太陽伯伯快啲開工,咁我地先可以去玩過痛快呀!

雖然冇得出去戶外玩,不過我地都有一個少少地嘅節目,就係屋企附近間幼稚園舉行開放日,安排左啲攤位遊戲,玩具教材..。既然有得去玩,所以我地就帶左小小豬行吓,一嚟唔洗成日困係屋企,二嚟可以俾佢去啲幼稚園玩吓,感受吓返學嘅氣氛。

一入到學校,依個小小豬就俾啲車仔吸引住,睇佢玩得幾開心,不停換車車~

基本上我地想去玩啲攤位遊戲都冇時間,因為小小豬實在太鐘意啲車車,仲玩到唔願走添。最後我地都只係玩左兩個攤位,得到兩份小禮物(紫菜一片同擦膠一粒)
~

玩左一個鐘左右,因為小小豬夠鐘食飯飯,所以我地就走啦!

睇見今日小小豬係幼稚園玩得咁開心,佢都應該好鐘意,我都希望佢第日返學時都可以今日一樣咁開心,有一個愉快嘅幼兒學習生活。

我地返到屋企,打開信箱就見到有一份小郵包。原來係CARMEN姐姐送俾小小豬嘅小禮物,兩件好靚嘅小小豬至愛...米奇衫仔呀~


哈哈...其實可能係早幾日就收到,不過因為一直冇開信箱,所以今日先收到。不過咁都好,依兩件衫仔正好作為十九個月嘅小禮物。多謝..CARMEN姐姐!

*♡♡小肥豬♡♡* | 11th Mar 2012 | 小小豬篇 | (11 Reads)
9 MARCH 2012(FRI)

今日下午,小豬媽同LULU妹帶左小小豬去玩具反斗城行街街。

當佢地行到去買益智併圖板嘅地方,小小豬就已經急不及待咁拎住塊ABC板呀~


一塊都唔夠,佢見到圖案同數字嘅板都好興奮~


仲即刻坐左係地上面邊玩邊讀啲字出嚟添~


當小豬媽話走去俾錢時,小小豬竟然可以一手拎晒三塊板,唔洗人幫手添~


其實小豬媽帶小小豬出去反斗城,目的都係為左買依三塊益智玩具。雖然小小豬都已經算識晒依三板上面嘅智識,不過小豬媽話等小小豬多玩多學,溫習多啲,咁先可以繼續叻叻嘛!

既然小豬媽咁用心,我地都要加多幾錢肉緊,繼續教好小小豬,等佢越來越叻叻!

*♡♡小肥豬♡♡* | 10th Mar 2012 | 小小豬篇 | (11 Reads)
7 MARCH 2012(WED)

依個小小豬真係好勁愛MICKEY(冇錯....係要用個勁字嚟形容)。

事緣今日下午,小小豬瞓醒覺之後,
不停咁叫住MICKEY....MICKEY,又指住個電視機,小豬媽見小小豬今日都算乖,又食晒一碗大粥粥,所以就獎勵一吓,播套米奇妙妙屋俾小小豬睇啦!(我地一般都係俾PLAY ALONG嗰種DVD俾小小豬睇,卡通片真係好少)

不過正當小豬媽開始播嘅時候,小小豬突然跑入房,原來佢
入房拎埋陪佢瞓覺嘅MICKEY一齊睇。睇吓依個攪笑嘅傻豬仔,有MICKEY就開心到呢~

仲攬到MICKEY實一實添~

捉住MICKEY唔放手呀~

仲冇端端要錫錫MICKEY呀~


真係俾依個傻豬仔笑C呀!

*♡♡小肥豬♡♡* | 9th Mar 2012 | 小小豬篇 | (525 Reads)
7 MARCH 2012(WED)

係小小豬細細個嘅時候,小豬媽就已經買左個SINOMAX嬰兒枕俾小小豬用。我地都覺得用左好似幾好,不過奈何貴貴地,所以都只係買左一個俾小小豬係小豬媽屋企用,自己屋企就只係瞓普通款嘅枕頭(其實我都覺得小小豬係唔洗用枕頭,因為佢實在太爛瞓,次次見佢都唔係瞓係枕頭上面...哈哈)。

早排見萬寧有得儲印花換SINOMAX x HELLO KITTY枕頭,所以就心思思想換個小童枕俾小小豬係自己屋企用。雖然係冇嬰兒枕咁FIT,不過我去睇過個樣本,佢有一邊枕位係薄身啲,都覺得可以啱小小豬用,所以就係咁我就開始去儲印花啦!
 
當然我一個人嘅努力係唔成事(因為我都好少去萬寧買嘢),經朋友仔嘅奉獻,終於儲夠30個印花~
 
不過原來齊印花都唔夠,要分店有貨先換到,最後我行左四間先可以帶到佢返屋企呀~
 
 
哈哈....我自己就覺得幾好,不過唔知小小豬鐘唔鐘意用呢?其實除左小童枕之外,今次仲有大人枕頭換,所以如果有機會,我都打算換多個俾大肥豬,等佢可以瞓好啲,咁先有精神賺錢養我地嘛...哈哈哈!

*♡♡小肥豬♡♡* | 8th Mar 2012 | 生活點滴 | (20 Reads)
7 MARCH 2012(WED)

依幾日嘅天氣真係可以用變幻莫測,前日仲開始熱熱地,攪到我要搵啲短袖衫嚟著,點知今日又開始冷,真係俾依家啲天氣玩C,乍暖還寒咁,真係著衫都唔知點著好,唔小心啲都會中招,所以真係好唔鐘意依啲天氣,太陽伯伯快啲開工啦!

講起著乜衫,今日我都中左招,事緣尋日天氣都熱熱地,加上睇左天文台都話星期五先會轉冷,所以我咪著少左衫,只係著一條薄連身裙加一件薄褸仔。

點知一落到街車時就知大件事,好大風之餘又覺得凍凍地,不過因為夠晒鐘,為左唔遲到所以就冇返屋企拎衫,唯有頂住返工啦!好在公司都有一件厚身少少嘅褸仔,所以都叫做OK。

就係我差唔多LUNCH嘅時候,小豬媽打電話俾我,叫我五分鐘之後出學校門口拎嘢。

原來小豬媽知道我今早著少左衫,怕我冷親,所以就趁佢地帶小小豬去買餸嘅時候,叫小豬爸車佢地上嚟拎件褸俾我~

 
嘩...真係好暖,未著件褸都已經覺得好暖,係心暖嗰種。依一件褸除左俾我保暖之外,亦都足滿左父母對我嘅關懷,所以真係好感動呀!

老土啲講,我都覺得我係一個幸福嘅人,有一對好關心我嘅父母,有兩個都好照顧我嘅弟妹,有一個好錫我嘅老公,又有一個好可愛嘅仔仔,我都真係要好感恩。所以就算平日遇到唔如意嘅事,我都應該唔好睇得太著意,只要知道我有一個溫暖的家......就已經足夠了!

Next