香港新浪網 MySinaBlog
*♡♡小肥豬♡♡* | 29th Feb 2012 | 博客分享 | (14 Reads)
29 FEBRUARY 2012(WED)

好開心又得到PR姐姐嘅邀請,又有得試用產品。不過真係唔好意思,我又遲左先嚟作分享,希望PR姐姐唔好見怪啦!

今次依個產品都係俾我嘅,因為係可以減肥的烏龍茶「正統黒烏龍」。一聽到話可以減肥,當然唔執輸要試吓。

睇官方介紹,知道在於烏龍茶入面的茶多酚,可以燒脂同埋抗氧化,可以提昇新陳代謝同脂肪輸出,仲連皮膚都話可以受惠。有咁多好處,真係啱哂我依種懶人呀!

原本應該係一月尾新年後開始試飲,可能係PR姐姐知道我地新年食得多油膩嘢,所以俾我依段時間飲。不過因為嗰排唔係太舒服,又食緊西藥,所以等到上星期先開始試飲~

 

獨立包裝,一盒有16包。包裝講就每日飲3包,不過我一日一包飲半日~
 

唔洗幾秒,成杯都變晒黑色,真係名符其實嘅黒烏龍呀~

講真,初初見到杯茶咁黑,都會覺得好濃會好苦,不過飲落又完全冇苦澀味,仲有好香嘅茶味,質感係滑身而唔『鞋』,都幾易入口呀!

係飲左依一星期之後去,覺得去洗手間小便嘅次數多左,量都多左少少,期間都冇任何肚痛或者唔舒服嘅情況。同時飲左之後,都覺得少左啲飽飽滯滯嘅感覺。

致於有冇瘦到.....咁就暫時都未見有減磅,或者我都只係飲左一星期左右,所以未見有功效啦!

*♡♡小肥豬♡♡* | 28th Feb 2012 | 小小豬篇 | (10 Reads)
27 FEBRUARY 2012(MON)

返工返到屋企,已經見到小小豬有返啲精神,可以拎啲玩具嚟玩。雖然仲有鼻水,不過冇發燒我就真係放心晒!

每一個黃昏,當電視播著那條短片,小小豬都會好興奮咁停低所有玩具,企定定...有時又會依住個節拍左右搖擺咁跳舞。開頭以為佢今日唔舒服,對個音樂都冇咁靈敏。

點知...一如過往,一聽到時,又即刻唔玩,企起身又拍晒手,真係好攪笑呀(如可以的話,大家可以開埋聲音嚟睇依條片,應該會攪笑啲)~

哈哈哈...真係估唔到小小豬一聽到國歌就會咁大反應,我地都冇人教過佢,唔知點解佢好自自然然咁識得拍手同左右搖擺咁跳舞,最攪笑就係佢唔係首首歌都有依個反應,只係某幾首歌先係咁,不過對國歌就特別大,唔通小小豬係一個愛國嘅BABY!



*♡♡小肥豬♡♡* | 27th Feb 2012 | 小小豬篇 | (21 Reads)
27 FEBRUARY 2012(MON)

尋日放PLAYGROUP之後,即刻返屋企同小小豬探熱,雖然都係37.8邊沿位,所以都唔知俾唔俾小小豬食退燒水好,只好唯有好好睇住佢,KEEP住同佢探熱。

係準備食最後一餐奶之前,再幫小小豬探熱,已經去到38度,當然要即刻同佢食
退燒水啦!食左退燒水嘅小小豬可能受藥物影響,好快就瞓左,不過我就開始驚,因為真係好驚佢越嚟越高熱,所以成晚我都KEEP住同佢探熱,所以成晚都冇乜點瞓。

成晚小小豬都KEEP住冇乜燒,所以都開始放心少少,不過就係依個放心就係朝早起身時破滅左。

一起身就發覺小小豬全身又熱過,即刻同佢探熱,嘩...燒到39度,真係好驚....所以乜都唔諗,即刻請半日假同小豬媽一齊帶小小豬去醫院睇醫生。

可能一早嘅醫院唔多人,所以都唔洗點等就可以見到醫生。檢查之後,醫生話小小豬係流感,所以引致發燒同埋流鼻水。聽到醫生咁講都真係安心啲啲,起碼知道唔會燒壞腦嘛!

睇醫生就唔洗等,不過等交錢同取藥就要等好耐。係等嘅時候,小小豬都唔多願郁,只係爬係張梳化度,真係見到都心痛呀~


一係就企係窗前扮吓憂鬱~


俾小朋友食嘅藥真係特別鮮艷,成支果汁咁~


小小豬食左一次藥之後,都叫做已經退左燒,又冇再燒過,咁都真係放心晒。希望食完晒啲藥之後,快快變返個精靈嘅BB啦!

真係要再小心咁睇住小小豬,因為佢一病,真係冇晒精神,好心痛呀!




*♡♡小肥豬♡♡* | 26th Feb 2012 | 小小豬篇 | (18 Reads)
26 FEBRUARY 2012(SUN)

上兩星期都因為唔太精神所以冇返PLAYGROUP,再加上有一個星期校舍維修放假,所以加加埋埋都有成三個星期冇返PLAYGROUP啦!

為免小小豬因為幾個星期冇返已扭計,所以我地今次都早左少少上課室,等佢可以熟習吓個環境。

入到課室都算肯自己玩玩具~ 
 
仲同大肥豬一齊玩得好開心添~

不過.....一到上堂時,依個小小豬就開始扭計,唔知仲乜喊得好利害,我地抱住佢先叫做好啲啲。咁我地唯有全程抱住佢上堂啦!

第一個活動就係利用啲壓力膠,叫小朋友練習手力同埋啲刀功(即叫佢地切啲泥膠),之後又將啲好細粒嘅朱仔放入泥膠,叫小朋友搵返出嚟。雖然小小豬都扭扭地計,不過都算係做到。

第二個活動就係玩啲杯排大小,之後又將同顏色嘅積木放入去,小小豬都叫做可以做到,不過因為佢情緒唔係太好,所以我地都只係叫佢做一次,之後就讓佢自己發揮拎啲杯嚟玩。雖然小小豬冇再將啲杯疊高,不過就係度ONE..TWO…THERE…咁數啲杯同積木,都算佢係咁啦!

之後就食餅餅時間,依個為食豬情緒即刻高漲返,仲自動自覺咁要添食三次。

最後一PART就係大肋肉活動,同之前幾次都係一樣,都係地上面放唔同質地嘅物件,叫小朋友去行,不過今次就加埋要一步步咁推兩個大波波。

雖然仲有四堂先叫完成成個課程,不過相信今日應該係我地最後一堂返依度。我覺得依度嘅環境唔係太好,最大問題就係佢地嘅教具真係唔係咁乾淨,感覺仲有啲污穢。尤其係今堂用嘅壓力膠,當我地玩完之後放回個盒仔度,之後我見個助教姐姐係準備下一節課堂活動時,只係見佢將啲膠整回一塊長形。

嘩.....即係完全冇抺冇清潔嘅情況下就留俾下一節小朋友。一諗到依一點....我真係好驚,咁即話係小小豬玩之前都係冇清潔過? 個個小朋友都拎嚟猜,咁如果加埋啲口水...鼻水咁...之後下一個咪會好易中招。

我都明白可能每一節嘅時間都好趕,真係可以未必有時間可以清洗教具,不過就連係地上活動嘅膠墊都唔清潔,咁真係好似唔多衛生呢! 其實除左依件事之外,另一個最大原因唔再返去就係.......今日放學之後,小小豬成身都好熱,返到屋企探吓,原來佢發燒。

雖然未必因為上堂已感染到,不過為安全計,大肥豬都話唔俾小小豬再返。我地自己係屋企教,同佢玩,多啲帶小小豬去公園,都係一種學習呀!

*♡♡小肥豬♡♡* | 25th Feb 2012 | 小小豬篇 | (69 Reads)
25 FEBRUARY 2012(SAT)

一直我都冇打算安裝門欄,我同小豬媽屋企嗰邊都冇裝,即到依一刻都覺得好似冇咁嘅需要,因為小小豬都好少走入廚房攪攪陣。

不過自從小小豬識得自己去掉片片之前,就唔係咁講。雖然大部分時間佢都係掉完之後就走返出嚟,不過間唔中佢都會百厭豬豬咁要留係廚房八卦一返,特別鐘意開個雪櫃,可能係見我地成日開嚟拎嘢飲,所以佢又開埋一份啦!
 
雖然個情況都唔算嚴重,不過都係時候要考慮一吓安返個門欄。小豬媽話佢嗰邊暫時唔需要住,因為小豬媽話佢已經開始教導小小豬唔可以入廚房。不過就叫我地嗰邊試吓整,睇吓個成效咁話。

說時遲那時快,係今日起身嘅時間,就已經見到廚房放左塊木板係度欄住個入口。原來係大肥豬今日返工前,利用左佢一張已經爛左嘅書枱面嚟整成。仲話見有個位置剛剛好,所以整嚟試吓,點知真係WORK哦!(哈哈…睇嚟我都唔可以再話大肥豬成日收收埋埋啲我想掉嘅嘢,原來真係有用呀!)

俾人欄住左嘅小小豬冇因為咁扭計,仲好開心全程企定定係門外陪我煲粥粥添,真係好乖仔呀~


 





*♡♡小肥豬♡♡* | 24th Feb 2012 | 小小豬篇 | (14 Reads)
24 FEBRUARY 2012(FRI)

一向都有俾小小豬睇WORLD FAMILY嘅DVD,不過我地唔係佢地會員,係有朋友睇完借我地睇,所以我地都只係有DVD,嗰啲玩具教材就冇得玩。

不過成套嘅WORLD FAMILY都要成幾幾幾萬蚊,仲要計埋每一年嘅會費,個總額都真係不敢想像。雖然睇小小豬個表現都學得好似幾好,不過都真係唔捨得,所以一早都冇打算買,都係睇朋友仔嘅化算啲。

自上次參加完WORLD FAMILY BLOGGER EVENT之後,見小小豬玩啲教材玩得好開心,所以都好想買嚟俾佢玩,等佢邊學邊玩,吸收力都快啲。所以就周圍問啲朋友仔,廣發英雄帖幫我搵一套PLAY ALONG。因為發覺暫時小小豬對PLAY ALONG係最有興趣,同埋又有教具配合。

最後經朋友仔托上托上托之後,終於幫我搵到一SET PLAY ALONG返嚟,仲係今日送到添~

首先就係一套三碟嘅DVD同CD~
 


 仲有埋本歌詞書,入面仲有教你點依教具一齊玩呀~
 

 嘩...啲教材玩具嚟啦~

 
成SET齊晒啦~
 

仲有一對Forggy & Bunny添,小小豬都已經有一對,所以依家可以兩邊屋企都有得玩啦~
 
小小豬見到啲熟口熟面嘅玩具,又點會唔想拎嚟玩呀!我地都覺得唔應該隨便就俾小小豬玩,等係睇DVD時邊學邊用,一嚟等佢可以跟住嚟學習,二嚟唔會成日玩咁就唔會玩都悶嘛!

不過今日第一次見到,當然耍俾佢玩吓,睇吓佢一見到個波波就即刻捉到實啦~


依排有睇SHAKE..SHAKE..SHAKE...所以就特別鐘意玩依個,仲好專心添~



今日只係玩左依兩款,其他嘅就等睇DVD或者我地教佢時先玩啦!

雖然只係依一SET PLAY ALONG個價錢都唔弱,不過如果對小小豬學習有幫助,我都覺得值得。整體上我都覺得成SET玩具都幾好,希望小小豬KEEP住學習,對佢有得著啦!

*♡♡小肥豬♡♡* | 23rd Feb 2012 | 小小豬篇 | (24 Reads)
21 FEBRUARY 2012(TUE)

出左部IPHONE俾小豬媽之後,可以等佢成日都影低小小豬嘅相之後就UP上FACEBOOK,等我地可以係返緊工都成日睇到小小豬嘅最新相片。再係WHATAPP FRR DOWNLOAD之時,我又幫佢整左,小小豬一有啲什麼特別相,就會日即刻APP俾我睇。所以話有IPHONE真係唔幾好呀!

就係今日返工冇耐,就收到小豬媽嘅WHATAPP,SEND左依兩張相同條片俾我睇~

嘩....攪乜要婆婆揹住?依個小小豬都有返啲斤兩,揹住佢都幾係嘢呀!

原來依個小小豬唔知仲乜極度痴身(完全冇唔舒服),要痴到婆婆實一實,行開少少都唔得,所以就要揹住嚟做嘢。

睇完啲相同片我都好唔安樂(仲有少少內疚,點解幫我照顧小小豬要攪到咁辛苦),即刻打俾小豬媽,叫佢唔好理小小豬,由他扭計喊爆,唔好攪到自己唔舒服。

不過
小豬媽話實在唔忍心見佢喊得咁慘,所以就揹住佢一陣,等佢平穩情緒之後就放佢出嚟。小豬媽仲話,原來個個星期一小小豬都係特別痴身,只不過今日個情況比較嚴重。

依個小小豬真係好
曳曳曳曳曳...攪到小豬媽咁辛苦,所以話...如果依個小小豬唔好好孝順同錫晒婆婆,真係天理不容呀!

*♡♡小肥豬♡♡* | 22nd Feb 2012 | 小小豬篇 | (14 Reads)
20 FEBRUARY 2012(MON)

之前都話過要戒淘寶,雖然係好方便,不過有時落到嚟嘅質量又差左少少,所以都買左用唔著,就減少左淘寶。

不過....
左咁耐,終於都為左小小豬又破戒啦!

事緣之前大肥豬係BK論壇見到有介紹Oxford Reading Tree: Read at Home嘅故事書,加上我地又想開始培育小小豬閱讀嘅習慣,所以就依照媽媽們嘅介紹,去淘淘買左一套Stage 1返嚟啦~


雖然係淘寶,不過今次啲質量真係幾好,幾本都係硬皮面,所以都應該可以俾小小豬玩耐啲呀!

不過Read at Home Stage 1共有八本,原來仲有一本1B-Silly Races係缺貨。待我有機會搵埋佢,買埋俾小小豬睇先得。

同場加映:

今日糖糖又嚟陪我依LUNCH,仲帶埋兩份禮物俾小小豬添!

第一份就係糖糖嘅型仔衫衫,蜘蛛俠...超攪笑呀!不過大件左少少,要出年先著到呀~


另一份就係小肥肥係迪迪尼買嘅米奇杯杯~


多謝兩位姐姐對小小豬厚愛!



*♡♡小肥豬♡♡* | 21st Feb 2012 | 小小豬篇 | (14 Reads)
20 FEBRUARY 2012(MON)

今日係粥粥時,小小豬又心情勁好,係邊食粥時又整啲古靈精怪表情,所以小豬媽見狀就即刻影低佢。

先嚟扮吓惡先~


豬嘴...請留意埋隻腳仔,好粗魯呀...哈哈哈~


又嚟招牌CHOK樣~


自我淘醉中~
 

依個小小豬唔知話佢有衣食好定為食好,當有啲飯粒粒係手底者枱面時,佢地會拾起佢放返入口食~

當然....我地係會好小心睇住佢,係情況許可之下,先會俾佢咁做,跌係地就一定唔會俾佢咁做啦!

小朋友轉變真係好快,成日都會唔同樣,又會做啲古怪動態,所以真係要無時無刻相機(電話)跟身,可以隨時影低啦!

*♡♡小肥豬♡♡* | 20th Feb 2012 | 生活點滴, 小小豬篇 | (34 Reads)
19 FEBRUARY 2012(SUN)

離開左圓玄學院之後,原本我地就打道回府。不過因為小豬媽嘅心血來潮,所以我地就入左流浮山行街同食海鮮啦!

入到流浮山,必定食佢嘅街間炸生蠔,真係勁好味呀~

好多生晒蠔呀~

小豬媽忍唔到手買左啲~

行左一陣,加上小小豬又係時候食粥粥,所以我地就去搵間酒樓食飯啦!

係我餵粥粥嘅時候,小豬媽佢地就出去揀海鮮~
 
嘩...今餐好豐富呀~

我地就大魚大肉,小小豬又點會冇嘢食呢!小豬媽依家每逢外出,都會為小小豬準備左一盒菜菜,等大家都有得食~

雖然剛剛食完一大碗粥,不過為食嘅小小豬見到菜菜都不停咁食,仲食得幾滋味添~

哈哈哈...大家都食得好開心呀~





玩左成日嘅小小豬都已經好攰,又要嗲吓小豬媽先得啦~

今日真係開心,尤其係食左一餐既開心又豐富嘅海鮮餐。

今日未算整人,小豬媽話要搵日約埋小小豬嘅舅父仔同準舅母一家人再入嚟食餐勁呀!

*♡♡小肥豬♡♡* | 19th Feb 2012 | 小小豬篇 | (23 Reads)
19 FEBRUARY 2012(SUN)

我地今日又做逃學威龍,冇返PLAYGROUP,已經連續冇返兩堂,希望下星期返學小小豬唔好怕怕羞羞咁扭爆啦..唉!

今日點解又唔返學,原因一就係小小豬啲痰仲未清得晒,間唔中又會咳幾聲,大肥豬擔心返到去再同啲同學仔交叉再感染會攪到有排都好唔得晒,所以就決定休息埋今日,等完全好返晒精精神神咁返學仲好。

第二個原因就係,因為小豬媽佢地今日入新界拜神,所以我地都跟埋入去一齊拜,希望保佑小小豬聰明健康。

第一站拜完神之後,見到有風車,所以買個俾小小豬,仲要自己揀添~


睇佢幾鐘意個風車,上到車都要拎住唔放手~

第二站就係去附近嘅圓玄學院行個圈,依個小小豬一有得落地就周圍走,跑跑跳跳咁,玩得都好開心呀~


~~續待~~



*♡♡小肥豬♡♡* | 18th Feb 2012 | 小小豬篇 | (15 Reads)
18 FEBRUARY 2012(SAT)

今日放工返到屋企之後,就見到小小豬拎住大肥豬部MP4扮晒講電話咁,佢個表情都真係勁攪笑,古古惑惑咁,真係好似係度講緊電話呀~

 
據大肥豬解話,依部MP4原本係打算入啲歌仔俾小小豬係出街時聽,不過小小豬一見到就拎左嚟睇,相信佢係以為係我地嘅IPHONE 4,所以就成日都揸住唔肯放,成個下午係度煲電話粥呀!

依個小小豬講起電話上嚟又真係好攪笑,真係好似同人講緊嘢,仲用佢啲外星話對答如流咁,加埋佢啲扮認真嘅表情,真係好可愛呀~

呵呵呵...小小豬鐘意玩依部「電話」就好啦,咁佢就唔會成日想搶我地啲電話嚟玩啦!

不過佢講嚟講去都係嗰幾句,唔知佢想表達啲乜呢?唔知有冇儀器係識得解依啲外星話呢?哈哈哈!

*♡♡小肥豬♡♡* | 17th Feb 2012 | 生活點滴 | (61 Reads)
16 FEBRUARY 2012(THU)

唔知係唔係上星期係運動場吹親,所以由嗰日開始個頭就勁痛,食頭痛藥都叫做好啲,不過藥又唔可以KEEP住食,所以都真係幾頭痕。 同小豬媽講佢話我可以係個頭入風,叫我飲吓薑茶驅風。

原本都打算自己煲,不過又成日唔記得去街市買老薑,加上又諗到煲左一大煲之後又怕飲唔晒好浪費,所以一直都未實行。 剛好係BK見到有媽媽介紹黑糖薑母磚,見佢地講咁有成效加上又好方便,一焗就飲得,所以就訂左兩包嚟試吓,今日仲叫大肥豬幫我去拎返嚟添~

依個包裝真係幾好,獨立包裝,又方便又衛生~

我用左一磚焗杯嚟飲啦~

飲完一杯先發現原來有啲薑片喺黑糖磚入面,又幾真才實料哦~

嘩...真係冇介紹錯,個味道真係唔錯,唔太甜得嚟又夠濃同好有薑味,因為都係第一次飲,所以唔知可唔可以去頭風,不過飲完之後成個人好暖,個胃都好舒服,所以都可以KEEP住飲。

介紹仲話當係月事前三天開始飲,可以減輕經痛。如果係WORK就好啦...唔洗咁辛苦嘛!

依家香港都好似冇門市有得賣,都係只有網上訂啲貴貨,所以都真係好想去台灣旅行,咁就可以等我大量入貨啦!

*♡♡小肥豬♡♡* | 16th Feb 2012 | 生活點滴, 小小豬篇 | (25 Reads)
14 FEBRUARY 2012(TUE)

情人節原本都冇安排節目,打算都係簡簡單單係屋企渡過。不過就係因為小豬爸提意出街食飯,所以就有一個小小嘅慶祝活動,就係一行六人入石澳食泰國菜啦!

情人節當然要同我嘅為食小情人影張相先啦~

今日我地ORDER左好多餸,樣樣都好好味,食到個肚飽飽咁走呀(不過因為露天關係,場地光線唔多夠,所以影得唔係咁好)~

食完一餐勁豐富晚餐,返到屋企又繼續有得食,因為大肥豬為我準備左一個情人節蛋糕同我慶祝呀~

依張相睇小小豬個樣,又真係幾似我細個呀...哈哈哈~


小情人一吻....真係冧C呀~


簡簡單單咁過情人節,又幾配合我依啲簡單嘅人,最重要就係至愛係你身邊,咁就係最好又開心嘅情人節啦!







*♡♡小肥豬♡♡* | 16th Feb 2012 | 小小豬篇, 博客分享 | (21 Reads)
13 FEBRUARY 2012(MON)

好開心可以得到WORLD FAMILY嘅邀請,參予佢地嘅體驗派對。其實我地都有俾WORLD FAMILY嘅DVD俾小小豬睇,尤其係PLAY ALONG,特別鐘意入面兩位主角FORGGY & BUNNY,所以知道有得去玩嘅時候,我地都好興奮呀~


雖然只係一個活動,不過WORLD FAMILY都預備一個好靚嘅名牌俾我地,真係好窩心呀~


一入到場地,小小豬就俾一個係PLAY ALONG嘅波波吸引住,攬到個波波實一實呀~



又俾兩個大米奇吸引呀~


第一PART就係由負責員先簡單介紹WORLD FAMILY嘅功效,我地好乖乖咁留心聽呀~


係個小小豬又點可以留心聽咁耐,所以分另同兩位美語姐姐玩,估唔到小小豬唔驚佢地,仲玩得好開心添~

介紹完畢,就開始由美語姐姐帶住我地玩遊戲啦~

玩左都有大半個鐘,基本上小小豬都可以好專心又興奮咁玩,一見FORGGY & BUNNY又會好開心咁叫出嚟。不過最後個遊戲因為小小豬開始攰,所以都開始扭計啦!

今日真係又食又拎,因為除左有茶點之外,大會仲有一份禮物送俾我地,真係勁正呀~


今日真係玩得好開心,唔止我同小豬媽,就連小小豬都好興奮到極點,比平時返PLAUGROUP仲投入同開心,可能因為屋企成日都有得睇,所以都熟悉晒入面啲人物。

真係要再一次多謝WORLD FAMILY,希望有機會可以再參加其他活動啦!






*♡♡小肥豬♡♡* | 14th Feb 2012 | 小小豬篇 | (15 Reads)
12 FEBRUARY 2012(SUN)

睇左醫生又食左一日藥嘅小小豬,雖然都已經已經退左燒,不過都仍然好似冇乜精神,加上又怕傳染俾其他小朋友,所以今日就做冇返PLAYGROUP。

大肥豬話唔想小小豬成日都困係屋企,所以就話帶小小豬去圖書館行吓,等佢吸收吓啲書卷味,順便借啲圖書返屋企同小小豬講故事。

其實小小豬今次都係第二次去圖書館,上次係大肥豬單拖帶佢去。可能去過一次,小小豬一入到圖書館就識得自己行去兒童閱讀位置,又可以自己去圖書架拎啲書睇,真係好似模似樣咁呀~

拎左本書就會行埋嚟搵我地一齊睇添~

今日感覺小小豬真係大個仔左,唔只係識得自己,都會係玩嘅時候掛住我地,當唔見我地係佢身邊附近,佢會叫「DADDY」「媽媽」咁搵我地,見到我地嘅時候又會展現佢嘅月亮眼,真係冧C人呀!

同場加影:返到屋企就第一時間搵位坐,睇吓隻豬仔霸左公公個電視位,仲要坐到咁歎,笑C人啦~


*♡♡小肥豬♡♡* | 13th Feb 2012 | 小小豬篇 | (28 Reads)
11 FEBRUARY 2012(SAT)

今日我地又去面試,不過相信依一次亦都係最後一次,因為我之前都冇意識到原來考幼稚園係咁困難同咁多考慮因素,所以都唔係報左好多間,只係報左啲我地心儀嘅學校,加加埋埋都只係五間左右,其實都真係比年其他小朋友少。

今日我地去左北角某幼稚園,依間幼稚園係分左兩個星期嚟IN。其實應該係下星期先到我地,不過因為我下星期要返工,所以打左改期。開頭都冇唯意佢地點解分兩星期,去到之後就明白晒。

今日我見其他IN嘅小朋友都好大個,之後聽到原來好多小朋友都已經兩歲多,今日應該全部都係大仔IN,所以都心知都不妙,唯有繼續以一個平常心嚟IN,當俾小小豬一個經驗啦!

唔知係唔係太早起身(今日要8:30到學校,平日冇9:00小小豬都係唔起身呀!),所以小小豬都好吽吽哣哣,冇嚟神氣。不過好在開頭小小豬嘅表現都真係幾好,唔洗抱自己拖住我可以行兩層樓梯,入到課室又識得自已行埋去座位拎玩玩具。

第一部分係由老師觀察我地玩玩具嘅情況,相信依一PART唔會有問題,因為小小豬都好專心咁玩,又讀出玩具嘅顏色,又數數玩具咁,同我都有互動。

不過一到第二PART集體遊戲時,小小豬開始唔對路,好似好驚咁多人咁,一圍圈坐時都已經唔肯坐要扭計抱,咁我就抱住佢一齊坐。當時都覺得小小豬個身好熱,所以同佢除左件外衣後就繼續玩遊戲,不過玩嘅時候都係有啲扭計唔投入。係尾段當老師要收返個沙鎚時,小小豬就喊起上嚟,加上當時佢個身又好熱,所以都已經唔可以繼續,等老師講埋個注意事項就走啦!

開頭以為佢因為佢喊得利害所以攪到成身都好熱,不過係返屋企途中佢情緒都已經平靜左,但個熱度都冇減少到,都真係驚驚地,所以即刻返屋企同佢探熱,原來小小豬發燒,唔怪得佢今日表現唔正常,因為真係未見過佢扭成咁。

其實係唔係我唔夠精明、唔夠細心,小小豬唔舒服我都睇唔出,如果一早睇得出,我真係寧願唔去面試,即刻帶佢去睇醫生呀!
 
今日個結果唔洗等信我都知道一定冇機會,算啦...可能係我嘅黑仔王力量影響到小小豬,唔係都唔知點解近依兩次去面試都係唔舒服,影響到小小豬個表現....唉!

*♡♡小肥豬♡♡* | 12th Feb 2012 | 小小豬篇 | (15 Reads)
10 FEBRUARY 2012(FRI)

話說上星期五小小豬因為有咳、多痰,就連把聲都變左,所以我地帶左佢去睇醫生。

藥都已經食晒差唔多有一星期,前幾日都見做好啲,不過由尋日開始又發覺小小豬又開始有啲痰困住。

因為上次食藥攪到小小豬好幾日都冇便便,有便便嘅時間都係要好辛苦咁先去到,見到佢個辛苦樣但又幫唔到佢嘅時間,都真係好冇助、勁肉痛。諗返起小小豬個辛苦樣,所以我地都15/16唔知帶唔帶佢去覆診好。

小豬媽話可能係食太多西藥,所以攪到躁躁地唔到便便,所以去佢今日就買左依盒返嚟~

其實之前我睇BK媽媽介紹過,佢地好多都話依隻候棗末係好得,食左兩支之後就可以清到大半嘅痰,有效得嚟又冇味,小朋友都唔會抗拒。睇完佢都介紹都有打算買盒嚟看吓門口,不過一睇...嘩...成兩千幾蚊一盒,都真係好似貴左啲,所以當時冇即時買到,諗住考慮清楚先。

不過見依幾日小小豬啲痰仲未清晒,為左小小豬都唔可以慳依啲錢,所以都打算買盒嚟。說時遲那時快就俾小豬媽早我一步買左啦!

依個小小豬一見到個盒就以為係新玩具要拎嚟玩,不停咁拎住個盒係度又玩又錫,唔知嘅以為佢賣緊廣告添~

因為未食,所以唔知個成效係唔係真係咁得,希望真係WORK啦,因為成兩千蚊一盒,平均一支都要成二百幾蚊,仲貴過一罐奶粉呀。不過如果食得好..真係貴一貴都要買啦!

*♡♡小肥豬♡♡* | 11th Feb 2012 | 小小豬篇 | (22 Reads)
10 FEBRUARY 2012(FRI)

話咁快就歲半啦,時間過得真係好快好快,不過亦都可能因為係開心既時間過得特別快,真係都真係要
多謝小小豬帶俾我地咁多歡樂,等我地真係可以話快樂不知是日過!

原本都冇打算有啲什麼慶祝活動,不過係LUNCH時見到有蛋糕特價,所以就買左一條,小小地當同小小豬慶祝一吓啦~



希望小小豬可以繼續健健康康、開開開心心成長。雖然係我地嘅心肝椗,不過都一定要好好教佢好,唔可以俾佢做港童呀!

*♡♡小肥豬♡♡* | 9th Feb 2012 | 生活點滴 | (17 Reads)
9 FEBRUARY 2012(THU)

今日係我地學校舉行運動會嘅日子,作為小小小小小書記嘅我,當時走唔甩要幫手,所以一早天未光就要出門口,搭車入運動場啦!

今日我嘅工作就係留係司令台幫手計分同紀錄文件,其實都唔係啲什麼差嘅工作,所以都唔算係苦事。不過...我覺得苦嘅原因係個司令台係安排左係一個勁通風路口,係勁凍嘅情況下,加上運動場又勁大風,由八點開始做到二點,所以真係吹到人都傻。

雖然已經打行抵,不過啲風吹埋嚟都真係幾係辛苦,今日扮都成個愛斯基摩人咁都唔得,真係凍到入心呀~


慶幸嘅就係今日都冇落雨,如果落埋雨都唔知點算啦!

吹左成半日,放工都覺得頭赤赤,又有少少鼻水,所以都係食定啲藥打打低,唔可以整病自己,因為咁就冇得同小小豬玩呀~


依一篇網誌名為『苦中一點甜』,咁件甜事係乜呢?

就係有個好姊妹雖然已經唔係同我一齊工作,不過當佢知道我今日要會入去運動場做嘢時,就早左起身陪我食早餐(仲要係條街度等左我一陣..因為我遲左少少到..HEE HEE),自己食完早餐之後就再返屋企等夠鐘就去返工。

我真係好開心又感恩,可以識到依位好姊妹......多謝你...糖糖!

Next