香港新浪網 MySinaBlog
*♡♡小肥豬♡♡* | 31st Jan 2012 | 生活點滴 | (34 Reads)
30 JANUARY 2012(MON) 

一連八日嘅新年假期終於都結束,今日真係要開工大吉啦!

原來今日係開工嘅吉日,咁就真係希望我嘅工作係依一年可以順順利利,好似依三包維他奶所講啦~
 

今日除左有開工利是逗之外,有位老師請我地食蛋糕,好好味嘅ANGRY BIRD呀~


哈哈哈...希望食左啲ANGRY落肚,今年工作可以冇晒ANGRY...只有HAPPY啦!

依八日真係廿四小時同小小豬一齊,日日陪佢玩,陪佢午間小睡(次次我都係槑槑吓同佢一齊瞓埋)。全天候嘅照顧,雖然有時真係仲辛苦過返工,但就一定比返工開心幾十萬倍。

今日返工嘅時間冇小小豬係身邊,都真係唔係好習慣,勁心掛掛咁,真係好想繼續放假,又同小小豬一齊呀。依個機會要再等到八月放暑假先先可以再感受到......希望啲時間快啲過啦!

*♡♡小肥豬♡♡* | 30th Jan 2012 | 小小豬篇 | (21 Reads)
29 JANUARY 2012(SUN) 

放學之後,當然要去TEA一TEA,醫吓個肚啦!因為陪小小豬上堂都真係幾攰,尤其係最後嗰PART大肌肉訓練遊戲,又要睇住佢又要扶住佢玩,所以真係可以令個人散晒呀!

繼上次小小豬係太興練習寒冰掌玩得咁開心,所以大肥豬就又話要再去太興,等小小豬有得玩(真係慈父嚟呀!)

小小豬話要自己ORDER嘢食呀~


主角出場,睇吓小小豬見到碟冰幾開心~


其實今日天氣咁凍,我都唔多想俾佢玩,不過大肥豬都係嗰句:只要小心睇住就冇事啦! 所以小小豬就繼續有得玩。

今次同上次玩嘅唔同,因為唔再係叫小小豬係啲冰上面插來插去,大肥豬係教小小豬一粒粒咁邊數數邊執起啲冰放入個碗,等佢有得玩之餘又可以學習數量。(依啲咪就係大肥豬設計嘅活動教學之一)

小小豬都算OK,教左一次之後都識得一粒粒執起,又識得邊讀ONE、TWO、THREE…。雖然我估佢都應該未明白數數嘅意思,不過佢肯專心咁做,都可以話係叻叻啦~



玩左一陣,小小豬雙手都已經玩到好冰冷,當然要即刻停止唔俾佢繼續玩啦。

玩得正開心嘅時間阻止佢,小小豬當然唔制,要扭吓計啦~


扭完計亦都係我地離開之時, 下次有機會先再嚟玩過啦!

 

*♡♡小肥豬♡♡* | 30th Jan 2012 | 小小豬篇 | (12 Reads)
29 JANUARY 2012(SUN) 

今日又嚟返學日子,今堂終於可以明正言順咁影企小小豬上堂個情況,唔洗偷雞影相啦!(因為依間機構只可以係第三堂同最後一堂影相)

雖然有得影相,不過我地都只係用IPHONE影,同埋影得都唔係好多,因為大肥豬話叫我地要專心啲,唔好影響小小豬上堂,真係俾佢激C呀!

係上嗰兩堂小小豬個情緒都唔係咁好,怕怕羞羞得咁。不過今日真係好叻仔,上堂完全冇扭計,老師叫嘅指示全部做到,仲玩好開心添~
 

今堂俾左兩支類似啦啦球嘅棒棒俾小朋友玩,等佢地聽住音樂搖支棒棒,小小豬都不知幾鐘意,不停搖搖搖呀~


見小小豬玩得咁開心,都想自己係屋企都整返個俾佢玩吓呀!

之後第二個活動就係要小朋友伏係地上面塗顏色,話係訓練佢地用前臂支撐身體~

睇吓傻豬仔幾專心~

依幅就係小小豬嘅大作,冇塗到出界,已經好叻叻啦!不過因為支顏色係新關係,要好用力先有出到色,所以幅圖畫就好似唔多上色,其實小小豬係好俾心機咁塗呀~


之後就係食餅餅同大肌肉訓練時間,同上兩堂都係差唔多,所以冇乜點影相。

整體上小小豬今日嘅表現都真係幾好,希望嚟緊幾堂都好似今日咁就好,繼續努力啦!

*♡♡小肥豬♡♡* | 29th Jan 2012 | 小小豬篇 | (10 Reads)
28 JANUARY 2012(SAT) 

等左真係好多日,今日終於見到太陽伯伯出嚟啦!太陽伯伯出嚟,所以我地都唔好浪費個陽光,同小小豬落公園玩一陣。

唔知係唔係好耐都冇落公園玩,一入到公園,依個小小豬就已經好興奮,仲第一時間走去佢至愛個轉轉拼圖玩呀~


玩左一陣,小小豬又再周圍走~


依個百厭嘅小小豬之後就走去玩瀡滑梯,不過就唔係正確嘅方式,係由滑梯低行上去,真係俾佢激C呀~

睇吓佢兩父子幾開心~

落得公園,又點少得玩泡泡。公園入面都有好多小朋友,所以最後個個小朋友都走埋嚟一齊拍泡泡,大家都好開心呀~

小小豬見到同場其他小朋友玩瀡滑梯,所以成日都眼甘甘咁望住,所以我地開始教佢正確咁玩。

開頭仲怕小小豬會驚,點知.....驚嗰個係我,佢
越玩越大膽~


想知佢有幾大膽,請睇片~

未坐定就要瀡落嚟,真係佢唔驚我驚呀!所以我都懷疑佢係膽生毛,好似乜都唔驚咁!不過另一個角度睇,我都教左佢兩次就識自己玩,所以有時都唔知係激C定笑C!

*♡♡小肥豬♡♡* | 28th Jan 2012 | 小小豬篇 | (9 Reads)
26 JANUARY 2012(THU) 

話說依個新年小豬爸同小豬媽跟旅行團去左番禺玩三日,原本佢地都都同埋我地三口子一齊去,不過因為小小豬仲細,我地都唔放心帶佢上內地,所以今年就冇跟埋一齊去啦!

佢地其中一個目的地就係長隆動物園,小豬媽仲對個馬戲團表演十分讚賞,講到我都心思思想去睇吓。不過我都知短時間內都應該冇機會,起碼要小小豬再大多少少先啦!

佢地係長隆入面,買左份禮物俾小小豬~
 



哈哈.....依件熊貓衫真係勁可愛,今年著就大左少少,估計明年著就一定FIT晒身呀!不過原來依件衫都真係唔平,我自己都未必捨得買,所以話小豬爸真係好錫依個小小豬呀!

就係因為見件衫咁得意,所以今日去SOGO FACE都有著住嚟影左一PART,真係好CUTE,希望影出嚟嘅相都係一樣咁好啦!




*♡♡小肥豬♡♡* | 27th Jan 2012 | 小小豬篇 | (17 Reads)
26 JANUARY 2012(THU) 

雖然紅假期已經結束,不過我就請多左兩日假,直到年初八先返工。不過因為我地下午有特別節目,所以大肥豬都一齊放假多一日啦。年初一至三小豬爸同小豬媽都去左旅行,所以我地今日就返去同佢地飲茶拜年。

今日嚟左一個三口子中國裝,都幾靚呀~


小小豬去到酒樓第一件指定動作........就係拎紙同筆學人寫字啦~


睇吓佢寫得幾興奮~


食嘢時間到啦....依個為食豬真係古靈精怪呀~


小小豬主動同我地分享佢嘅食物,真係勁SWEET呀~


飲完茶我地就返小豬媽屋企同小小豬叉叉電,等佢小睡一陣就出銅鑼灣做我地嘅特別節目。

哈哈哈....我地嘅節目就係去SOGO FACE影我地嘅親子照啦!(再一次多謝朋友仔轉贈COUPON,等我地有得去影靚相。)

影左一個鐘多啲啲,感覺上冇上次咁好,上次嗰兩位哥哥好用心咁引小小豬笑,不過今次就.......同埋我係要求主要都係影三口子,不過到最後都係影晒小小豬單人,係要我講個攝影師先幫我地影合照,印象中有一套親子衫都只係影左一張相,所以都真係唔係幾合我嘅原意。

依家約左下星期三睇相,講真我都唔敢抱太大期望啦!(到我收到相再詳細同大家分享啦!)

*♡♡小肥豬♡♡* | 26th Jan 2012 | 生活點滴, 小小豬篇 | (23 Reads)
25 JANUARY 2012(WED) 

已經係屋企悶左兩日,所以今日真係唔可以再係咁,要出街走走咁先得啦!不過...個天氣又真係實在太凍,加上間唔中又落少少毛毛雨,所以都唔去得太遠,係屋企附近搵節目。

去玩但又唔想去室外,當然第一時間就諗到去冒險樂園玩,所以我地係附近餐廳食完LUNCH之後,就去玩啦!

睇吓佢兩父子玩得幾開心~


依個小小豬真係特別鐘意玩揸車車,仲玩得入晒神添~

玩左一陣之後我地就返屋企小睡一陣,夜晚就出APM搵食。

去到APM見個小龍嘅佈置,所以都影吓應一應節啦~


原本我地打算去食日本拉麵,不過真係勁多人,起碼要等成十幾張枱,為免小小豬等太耐,所以最後我地去左美食廣場嘅PEPPER RICE食我地嘅晚餐~


真係大鄉理,依間開左咁耐我都係第一次食,不過又真係幾好味,下次有機會都可以再食過。

依個為食嘅小小豬見到我地食嘢又點會唔想食呀?原本我地都一早準備左啲餅餅俾佢自己食,只不過我地見啲白飯都幾柔軟,所以我地就俾少少佢自己食。

大個仔就自己食啦..拎住個匙好似有文有路咁,不過個傻仔仔食到面仔都有飯~


食完飯飯就要食水水,睇吓大肥豬幾有心機..哈哈~


食完飯之後,我地行左商場一陣,之後就返屋企,就係咁就過左一個平淡但開心嘅年初三啦!


*♡♡小肥豬♡♡* | 25th Jan 2012 | 生活點滴, 小小豬篇 | (24 Reads)
24 JANUARY 2012(TUE) 

每日嘅早餐就係大肥豬負責,嚟個香煎蘿蔔糕,個樣都真係煎得幾OK呀~


原本都打算去行吓,唔好成日留係屋企,不過個實在真係太凍,一嚟怕凍親小小豬(因為我地之後幾日都有節目,病左就唔得啦),二嚟留係屋企開住個暖風機就最舒服,所以都係好乖咁係屋企休息吓啦...哈哈!

等到夜晚落去奶奶屋企食飯拜年。

尋日著套中國新衫個個都讚小小豬有型,所以今日就著多一日啦(其實如果唔再著就唔啱著啦),不過今日就加埋細路之前買嘅迪迪尼米奇帽,戴左之後就仲CUTE呀。依個小小豬完全唔合作,唔多願意戴住俾我影多幾張相,真係激C我啦!不過唔緊要,頂帽仔都算大,出年可以再戴過~


落奶奶度食完飯之後,因為要去吉吉島幫小小豬買啲日用品,所以我地就行左一個圈,就係咁...我地就有宵夜食啦~

哈哈哈...係唔係好似好富貴呢?有刺身做宵夜,不過真係超抵,以上三件加埋都唔洗$60,可係係因為我九點幾去到吉吉島,佢地都差唔多收,所以先咁抵,不過選擇就唔多,我買到刺生我都覺得勁好彩呀!

雖然係咁抵,不過同我平日食嘅都係一樣,都尚算新鮮,食完又冇肚痛(哈哈哈),所以都真係勁抵呀!

*♡♡小肥豬♡♡* | 24th Jan 2012 | 生活點滴, 小小豬篇 | (34 Reads)
23 JANUARY 2012(MON) 

每年嘅年初一我地都會好忙,因為上午就要同小豬媽拜年,之後夜晚就返奶奶度食飯。不過因為今年小豬媽佢地嚟左個小旅行,所以我地早上就冇節目,加上又好凍,所以我地都冇乜特別地方去,留係屋企HEA吓等到夠鐘先落奶奶度。

一早起身就見到我盤水仙花開始開花,今年應該都幾好啦~


新年又點少得煎糕,今日因係要食素,所以只係煎左年糕同馬碲糕。話時話我都好耐冇煎過嘢,不過都好在我依個新春第一煎個樣都幾好...哈哈哈~


講起年糕,今年因為時間關係,我只係隨便係美心買左一盒嚟食,不過唔食由自可,嘩....啲年糕真係甜得好利害,就連我咁食得甜嘅都頂唔順,所以出年都係去返街市入面啲自家制嘅鋪頭仔買啦!

一向我都唔俾甜嘢小小豬食,不過新年哦,所以破例一次咁多啦!我俾左一少少少少嘅一舊仔年糕俾小小豬食,等佢快高長大(放心...小小豬依一舊我蒸熟嘅,唔係煎嘅,咁就冇咁熱氣啦)~


等到夜晚,我地就換件靚靚新年衫,去嫲嫲屋企拜啦~


哈哈...件中國衫係上年朋友仔送,今年著就剛剛好,好醒目呀!



*♡♡小肥豬♡♡* | 23rd Jan 2012 | 生活點滴 | (19 Reads)
23 JANUARY 2012(MON)

農曆新年啦!今日就係大年初一!

我們這一家祝大家龍年快樂、
身體健康、一團和氣、笑口常開
財源滾滾、心想事成、萬事亨通 

最緊要係....行運一條龍...恭喜!恭喜!



*♡♡小肥豬♡♡* | 22nd Jan 2012 | 小小豬篇 | (19 Reads)
21 JANUARY 2012(SAT)

今日我地提早同小豬媽食團年飯,嘉汶表妹同姑媽都有嚟一齊食,人多啲開心啲嘛!

不過....今日最開心嗰個都應該係小小豬,因為嘉汶表妹帶左份大禮物嚟送俾小小豬。依個小小豬一見到盒大禮物,我地都未講佢就好似知道係佢咁,爬左上左攬住份禮物啦~

 
嘩....拆左嚟睇,係張兩用枱,可以玩LEGO之外,亦可以反轉另一面做枱俾小小豬平日玩玩具或者寫字用,真係超鍾意(其實大肥豬都想買好耐啦)~

哈哈哈....有新玩具哦,依個小小豬當然好開心咁即刻玩啦~
 
哈哈...依個小小豬又霸佔小豬媽屋企一個空間,不過相信為左小小豬,小豬媽同小豬爸係非常樂意呀!


*♡♡小肥豬♡♡* | 21st Jan 2012 | 生活點滴 | (23 Reads)
19 JANUARY 2012(THU)

新年要著新衫,所以我嘅艾瘋都有新衫換~

我覺得都算OK,拎起手個手感幾好,只係覺得張相望落去淡色左少少。

講起依個電話殼都真係有啲唔開心,件事都應該係追溯返上年十月,嗰個月因為LULU妹生日,所以佢換左部IPHONE 4。既然有新電話當然要買返個新電話殼,當時正好係其中一個團購網有得整DIY電話殼,所以我就訂左兩個,一個就整俾LULU妹當生日禮物,另一個就緊係整小小豬張相。

我依住佢個日期SEND相俾佢地,收到E-MAIL回覆話十個工作天之後就會整好,點知我等到成大半個月都完全冇消息,最後打左不下幾十次先搵到個負責人,佢話批貨有問題要十二月初先有。唉..咁都算啦,當埋聖誕禮物啦!

等到過埋元旦都仲係未收到,咁當然係即刻打俾個負責人,點知又話批貨有問題要再做,真係等到人都傻呀!

終於係今日收到,前前後後都等左成四個月先有,真係呢...我上次嗰個都係經團購整,都唔洗等咁耐,可能係依間公司問題啦!

不過團購整又真係平好多,原本我都想係快圖美整,不過要成一百六十幾蚊,我依家整兩個都唔洗依個價,所以都唔好要求咁多啦!

*♡♡小肥豬♡♡* | 20th Jan 2012 | 小小豬篇 | (17 Reads)
18 JANUARY 2012(WED)

就係因為尋晚電視『勁食日本一』介紹左啲又大又靚嘅士多啤梨,所以今日小豬媽同大肥豬都不約而同咁買左啲士多啤梨返嚟做飯後果,真係粒粒都又紅又大,好味呀~

有好嘢食又點少得為食嘅小小豬,佢係我個肚入面嗰時都已經食唔少,不過到左今日先真真正正第一次食士多啤梨,亦都因為係第一次食,所以唔敢俾太多佢食,只係揀左一粒最大又最紅嘅俾佢,等佢試吓先。

因為係新嘢,所以開頭都好似好斯文咁慢慢食~

食左幾咬之後,知道係好味道,就狼吞虎咽咁~

仲食到好似血淋淋咁,唔講都唔知佢只係食緊士多啤梨呀~

雖然小小豬表現得好鐘意食咁,食完依一粒之後都好想我地再俾佢食,始終都係因為第一次食,唔知小小豬個腸胃受唔受得,又或者會唔會引起啲濕疹起,所以我地都唔敢俾佢食多,等佢試左依一次之後,過幾日都冇事,下次先再俾多幾粒佢食啦!

雖然士多啤梨都係有益生果,不過...始終都係小心啲好嘛!

*♡♡小肥豬♡♡* | 19th Jan 2012 | 生活點滴 | (12 Reads)
17 JANUARY 2012(TUE)

早前係FACEBOOK LANEIGE專頁有一個『LANEIGE Water Sleeping Pack_Ex 水漾奇蹟分享』活動,分享你用依個Sleeping Pack嘅感想,就有機會得到禮物一份。

其實除左用SKINFOOD之外,LANEIGE都係我另一個常用嘅品牌,尤甚係佢個Sleeping Pack我一直都有用開,因為真係超方便,只需要係睡前十五分鐘左右薄薄塗上一層就可以去瞓,等到第二日用清水洗淨後都FEEL都好潤,真係超啱我依啲懶人。

我鐘意用Sleeping Pack另一個原因就係,我唔太鐘意用紙面膜,因為曾經試過做緊面膜時小小豬突然起身,為免俾佢見到個白面人已嚇親,唯有即刻除左塊面膜,就咁就浪費左。但用依隻面膜就冇依個問題,所以就KEEP住用啦!

既然用開,又有遊戲玩拎禮物,當然又要發揮師奶仔本色玩埋一份啦!

哈哈哈…好好彩地我抽中左一盒呀~

 
依個就係我小小嘅分享~


有得玩遊戲贏禮物嘅遊戲真係好,希望多啲咁等我地玩多啲拎多啲禮物啦....哈哈哈!

*♡♡小肥豬♡♡* | 18th Jan 2012 | 小小豬篇 | (19 Reads)
17 JANUARY 2012(TUE)

今日小小豬又表演左一件醒目事俾我地睇,就係換完片片之後,自己自動自覺將條片片去掉垃圾桶~

事緣尋日小豬媽幫小小豬換完片之後,小豬媽仲忙跟執返好啲棉花、水、同凡士林嗰啲嘢之際,就見到小小豬已經拎起條片片,行緊入廚房準備拎去掉。

當小豬媽講我聽時我都真係唔能夠相信,半信半疑,咁我返屋企之後又再試多兩次,小小豬一樣都係識得自己去掉,睇見佢依個狀況,我真係又忍唔住,小小豬真係好叻叻呀!

我地之前都冇教過佢,真係完全估唔到佢識咁做,所以真係一個大驚喜呀!

我地估可能係見得我地做得多,所以就學識左依件事。不過咁都好,之後嘅片片都會叫佢自己掉,等佢自己負責返佢自己嘅嘢,亦都開始訓練一吓自理能力都好呀!(當然...便便嗰啲係唔會俾佢咁做啦!)

但亦都因為依件事,令我地都覺得小小豬嘅觀察同模仿能力都比我地預期中強,雖然我地係佢面前都已然好檢點,不過以後都係要繼續小心啲,唔可以做一個壞榜樣俾佢睇呀!


*♡♡小肥豬♡♡* | 17th Jan 2012 | 小小豬篇 | (12 Reads)
15 JANUARY 2012(SUN)

放學之後,我地就去醫肚先,都因為落雨關係,所以我地都唔有太選擇,近近地去左太興食個下午茶餐。雖然以下午茶嚟計太興都算係貴左啲啲,不過勝在坐得舒服,唔洗迫迫夾夾咁,所以貴都有道理呀!

係成個下午茶時段小小豬都好乖乖,我俾塊餅餅佢就自己企係度食。不過隨著佢見到大肥豬杯飲完嘅冰鎮奶茶之後,情況就有少少改變。

小小豬用左好多方法去捉摸嗰碟冰,總之就古靈攪笑乜都出齊。最後大肥豬話等佢嘗試接觸不同種類嘅物質,所以就俾啲冰佢摸吓。

開頭都以為小小豬會怕凍只係摸一摸咁,點知...佢一啲都唔怕,仲好開心咁將隻手插嚟插去,好似練緊寒冰掌咁呀~





依個小小豬真係完全唔怕凍呀~
 
雖然我都唔係幾想佢玩啲凍,不過大肥豬又講得幾啱,俾佢接觸唔同嘅物質,感受唔同嘅感覺,都係一件好事嚟,只要我地小心睇住,咁就唔會出事啦!

*♡♡小肥豬♡♡* | 16th Jan 2012 | 小小豬篇 | (15 Reads)
15 JANUARY 2012(SUN)

今日上幼潛第二堂,不過因為天氣唔好,攪到我地搪唔到車,所以遲到添,小小豬就咁錯失左個玩玩具時間,下次一定要早啲出門口先得。

今堂終於都由我陪小小豬上堂啦!大肥豬仲幫我偷影到上堂情況添...
哈哈哈!

今日第一個活動就係將三份不同種類嘅玩具砌同除,小小豬都做到指示,不過就係砌嗰度就要教幾次先得~


之後就到另一個活動,就係做勞作,老師俾啲水彩小朋友點點點,又俾啲貼紙貼係上面~


依一個就係小小豬嘅勞作,靚靚花燈~

依一PART我真係幾唔鐘意,首先要我地係張膠地毯上面做勞作,要小朋友烏低個身嚟整好似唔係咁好,嗰度都有好多學生枱,都唔明白點解佢地唔用。另一個就係佢地嘅水彩好難先洗得乾淨,用啲濕紙巾不停咁抺都仲有啲顏色係手度,雖然老師話係安全,不過都好似唔係咁好嘛。

之後都餅餅時間,由於隻仔都有啲顏色印,所以我都唔俾小小豬食咁多。不過依個為食小小豬一食完一粒就即刻舉手同老師拎多一粒,前後都舉左三次手要添食呀!

最後就同上星期一樣,玩遊戲訓練大肌肉,可能上星期已經做過,所以小小豬已經做幾好,仲可以好開心咁自己一個人玩添。

整體上,小小豬個表現比上次好左啲,當然仲間中有少少扭眼瞓咁,仲有少少怕怕羞羞咁,不過都算肯合作,希望下次上堂可以再好啲啦!





*♡♡小肥豬♡♡* | 15th Jan 2012 | 小小豬篇 | (31 Reads)
14 JANUARY 2012(SAT)

今日我地又去interview啦!講真...經過上兩間面試嘅經驗再加上個結果,我地都已經唔再緊張,只係當一個活動,等小小豬可以去玩吓見識吓。

我地今次就去跑馬地IN,不過遲啲就會搬入小西灣,所以我地冇乜留意個學校環境。其實我地選擇依間都係因為佢有直屬小學,依個係我地考慮最大因素呀!

一入到去就排隊登記同交報名表,好在都唔算太多人,唔洗等得太耐。登記左之後,係playground玩左一陣,有小小豬最鐘意嘅車車呀~
(因為唔可以影相,所以我偷偷地影呀..哈哈哈)


玩左一陣,就要入課室面試啦!

班房入面有四張枱,放左好啲玩具俾小朋友玩。其實佢地主要都係觀察家長同小朋友嘅互動。之後有一位老師嚟同我地傾計同要小小豬做指示,好彩佢都好合作,都算做足晒,只係開頭老師問問題時俾天花上面啲吊飾吸引住,不過好快就可以乖乖番。尤其係老師叫佢名時,佢好快咁舉手,真係要讚佢叻叻呀!
 
整體上,我覺得小小豬今日都算好聽話,同老師有互動,玩玩具時都好投入,當收玩具時又可以自己收兼冇扭計,所以都係very good啦!

等兩個星期左右就會收到信知道個結果,經過上兩次嘅失望,我地都唔抱太大期望。有嘅就當然開心,唔收都唔會太緊張,因為收與唔收到有好多因素,始終佢係細仔,只要我地知道小小豬表現好就足夠啦!

*♡♡小肥豬♡♡* | 14th Jan 2012 | 博客分享 | (10 Reads)
12 JANUARY 2012(THU)

九月時得到JESSICA BABY雜誌嘅的邀請,想我參與Blogger's Pick有關試用愛麗她的用後感。我當然好乖乖咁試用完之後,將我小小嘅感想SEND返俾佢地。
 
過左幾個,都冇收到佢地嘅回覆,我仲以為係我嘅文章寫得唔好,佢地唔打算登出嚟,為免我失望所以唔通知我。

就當係我冇左件事嘅時候,今日LUNCH完行過7-11見到有本雜誌,見個標題係講關於「寶寶睡眠」,所以就買左一本嚟睇~

睇睇吓.....點解有張相咁熟口熟面,原來係我同小小豬張相,同埋我嘅小文章都刊登左係依期度。係完全冇心理之下睇到自己係雜誌出現,個心情真係勁興奮呀~

雖然都只係細
一段唔係寫得幾好嘅文章,不過見自己係雜誌出現,都真係幾開心(哈哈…有少少虛榮心添),再加上又有一種失而復得嘅感覺,總之係開心啦...呵呵呵!
 
係度真係要再一次多謝JESSICA BABY嘅邀請,希望嚟緊仲有機會可以再嘗試。

*♡♡小肥豬♡♡* | 13th Jan 2012 | 小小豬篇 | (15 Reads)
11 JANUARY 2012(WED)

基本上如果天氣唔凍,小豬媽都會帶小小豬出去飲茶..買餸,等小小豬可以活動一吓,唔洗成日都困係屋企,又可以見多啲嘢唔洗對周圍嘅事物咁陌生。

通常係會由小豬爸渣車車佢地,所以依個小小豬都已經識得到小豬爸部車,每次一見到就會好開心咁一支箭行去車度。當然,除左知道一上車就代表有街去之餘,亦都有另一個原因,就係一上車就有嘢玩啦!

因為工作關係,小豬爸車上面一定有好多紙仔同筆,所以小小豬一上到車就會問小豬爸拎啲紙筆嚟寫只有佢明白嘅字/符號。

今日如常地一上車就要拎啲紙筆嚟寫,小豬媽見小小豬玩得咁開心,所以就即刻影低佢WHATAPP俾我(哈哈...原來出郭IPHONE俾小豬媽最大好處係成日可以WHATAPP小小豬最新動態俾我睇)。我地睇見到真係覺得勁搞笑,所以都要同家分享吓。

小小豬十足一個小伙記咁幫我地落單叫嘢食~

請問你食乜呢?

喂...我好忙哦...仲唔快啲ORDER~

好啦...等我寫低先~

冇問題...啲嘢食好快到啦~


哈哈...依個傻仔仔唔扭計時又真係幾可愛,啲古靈精怪表情真係氹C人呀!

Next