香港新浪網 MySinaBlog
*♡♡小肥豬♡♡* | 31st Oct 2011 | 小小豬篇 | (16 Reads)
30 OCTOBER 2011(SUN)

上幾次落公園玩都冇帶埋支泡泡槍落去,所以冇得玩,今日終於都記得帶,小小豬又有泡泡玩啦!

落左公園仔玩幾次,依個小小豬都已經認得行去公園條路,睇佢知道行去公園仔時個樣幾開心~

一入到公園仔又係度偷笑,緊係知道有得玩開心啦~

開始玩泡泡啦,睇佢玩得真係好開心~

超鐘意依張相,好有FEEL呀~

可能我地晏落去,所以冇其他小朋友,只有我地一家人玩,所以冇其他小朋友一齊玩泡泡。如果有其他小朋友一齊玩多啲互動,相信小小豬應該仲開心呀!

不過原來泡泡相真係好難影,顧得小小豬個樣時,又冇晒泡泡,當有好多泡泡時,又影唔到個樣,所以話都真係好難。唔知有冇朋友仔可以教吓我地點先可以影到啲靚嘅泡泡相呢?

*♡♡小肥豬♡♡* | 30th Oct 2011 | 小小豬篇 | (17 Reads)
26 OCTOBER 2011(WED)

基本上小小豬一歲嘅時候,我地係屋企幫佢修一修短啲髮腳之外,都未正式剪過頭髮。原本都冇打算咁快帶小小豬去剪頭髮,不過因為佢啲頭髮越嚟越長,加上又好大汗,每次食飽飽或者玩得激烈嘅時候,都會攪到成頭大汗,真係睇見佢都覺得辛苦,所以都係決定帶小小豬出去剪頭髮。

係未入去剪之前,我都只係打算修吓個型、剪短少少咁,不過因為小小豬成日出街都俾人叫做『妹妹』,所以最後就叫髮型師幫小小豬剪個男仔頭啦!

開頭小小豬都好乖乖咁係我腳上坐定定~

 
 不過....當髮型師用電刨(放心..係BB專用的)幫佢收後面同兩旁的髮腳時,小小豬情緒開始失控,不停咁喊,最後要小豬媽抱住剪埋下半場~


 
依個就係小小豬新髮型嘅背面,因為佢最後都唔係太合作,所以個尾就收得唔係咁好~

 
算啦....第一次剪係咁啦...不過正面睇都幾好呀!剪完之後真係即刻大個仔左好多,完全唔似BB啦~

 
同場加映:依個小小豬真係一名為食豬嚟呀,睇吓佢有得食蘋果個樣幾開心~

 
 

*♡♡小肥豬♡♡* | 29th Oct 2011 | 小小豬篇 | (13 Reads)
25 OCTOBER 2011(TUE)

天氣開始涼涼地,所以都要幫小小豬著返啲長衫,等佢唔好凍親。不過因為上年小小豬啲冬天衫基本上都已經唔啱著,要幫小小豬添置返啲冬天衫,所以今日放工就約左小豬媽一齊為小小豬SHOPPING買新衫。
 
小小豬大個仔啦,要自己揀衫仔啦~

 揀完衫又係度攪攪陣,真係俾佢激C呀~



經過我地半個鐘嘅努力,就幫小小豬買左好多靚衫啦~
 
件件衫都好鐘意,最好就係做緊大特價,買左咁多件都係一千蚊左右,平均一件都唔洗一百蚊,都算抵啦!

今日小小豬就大豐收,不過我就荷包大出血。不過我一啲肉痛嘅感覺都冇,仲買得好開心添...哈哈!

相信依度少少衫係唔足夠小小豬一個冬天著,睇嚟我又要慳自己多啲,留返彈藥買衫俾小小豬先得啦!

*♡♡小肥豬♡♡* | 28th Oct 2011 | 小小豬篇 | (17 Reads)

23 OCTOBER 2011(SUN)

話咁快就嚟到最後一堂,今日因為小小豬係巴士上面瞓左,到PLAYGROUP就醒左,都應該係瞓唔夠,所以入到課堂都唔肯自己玩玩具,要平靜一陣先肯去玩呀~

好在到唱遊時都叫做好啲,開始精神啦~


今堂老師都認識腳指,分別俾左牙刷同海綿俾佢地擦擦腳。小小豬都叫做OK肯做,仲對支牙刷好有興趣添~

之後就到玩彩虹傘,雖然小小豬就冇乜表情,不過佢都好肯自己去搖呀~

食完茶點之後,今堂老師俾小朋友塗顏色,可能之前係屋企都試過俾小小豬劃圖畫,所以都叫做OK。佢係自己塗,我地只係幫手按住張紙,等佢易啲塗~


仲要叫小朋友自己貼啲貼紙上去,我地教左小小豬兩次,佢就可以自己貼啦~


依個就係小小豬嘅勞作,都叫做OK啦...哈哈~

之後老師就教除橡筋圈,等佢地訓練一吓手眼。手仔就好易,小小豬一除就除到,不過腳仔就困難啲,要老師教一次,之後自己試幾次先得呀~

學埋依個,玩埋泡泡就放學啦!

因為今日係最後一堂,所以老師就叫我地留低,幫小小豬做評估。經過短短嘅評估時間,老師都話小小豬整體上都表現得幾好,不過正式報告就要等幾日先有得拎,真係好緊張,唔知小小豬各方面合唔合格呢?真係好想快啲收到呀!





*♡♡小肥豬♡♡* | 27th Oct 2011 | 小小豬篇 | (14 Reads)
22 OCTOBER 2011(SAT)

講左話帶小小豬入迪迪尼感受一吓哈囉喂氣氛,終於等到今日就成行啦!今日個天氣真係幾好,唔太熱得嚟又有少少風,啱晒怕熱嘅小小豬入去玩。好在我之前都為小小豬準備多一套骷髏骨衫仔,咁都叫啱天氣得嚟又可以配合個氣氛。如果著南瓜仔入去,我都怕小小豬會好熱好辛苦呀!

今次除左我地一家三口之外,我地仲請埋小豬媽入去一齊玩,再加上又有AP嘅小肥肥,一行五人入去玩啦!

由於小小豬係MTR時開始瞓左,到入到樂園都仲未醒,所以我地就先行吓SHOP先啦~

行到去南瓜佈置,原先打算幫小豬媽影啲相先,等小小豬醒左先再同佢影過。點知我地影左兩張相之後,小小豬就已經醒左,可以同我地一齊影靚啦~

叉足電嘅小小豬真係好唔同,做左好多古靈精怪表情,真係愛C佢呀~

超鐘意依一張.....勁冧呀~


係影緊依個南瓜景嘅時候,小小豬眼睛不停咁望向木馬嗰邊,又成日指住啲木馬講嘢咁,所以小豬媽就話帶小小豬去玩木馬。依個小小豬都係第一次玩,不過全程都好ENJOY咁,一啲都唔驚啦~

玩完木馬,我地就繼續去南瓜佈置影相啦~


上兩次入迪迪尼都係要抱,今次小小豬終於都可以自己周圍行,仲行得幾好添~

之後我地就排隊影公仔,就係依個時候,Carmen姐姐都入左嚟,所以可以JOIN埋我地一齊影相。小小豬成日都收到好多Carmen姐姐嘅禮物,今次終於都可以親身見到姐姐啦!(不過因為唔太方便,所以唔POST姐姐同小小豬影嘅相啦~)

因為都唔算多人,所以我地都影左好多公仔,唔知係唔係小小豬太鐘意佢地,所以每一張相佢都只係掛住同佢地玩,完全唔合作地望相機,真係俾佢激C呀!






原本都打算留晏少少影埋DUFFY,不過因為怕小小豬玩得太攰,所以最後我地六點半左右就走。今日真得勁開心之餘,相信最開心一定係小小豬,因為有得玩又有禮物收嘛!

依兩份係小肥肥送俾小小豬嘅~


Carmen姐姐送嘅餅餅~


小豬買揀款我買嘅毛巾仔,等小小豬時洗白白用~

最後就係小豬媽買嘅一套靚衫,真係好有型呀~


*♡♡小肥豬♡♡* | 26th Oct 2011 | 小小豬篇 | (29 Reads)
22 OCTOBER 2011(SAT)

之前同小小豬報名交幼稚園表都係寄去多,親身去交嗰兩間都唔洗排隊,所以見好多朋友仔話要去為交表大排長龍嘅情況真係未感受過。不過,今日終於都到我嘗試排隊依個滋味啦!

睇通告話幼稚園收表時間係九點,一心諗住八點半到應該都唔洗點等太耐,點知...我地去到都已經係第二百五十幾個,後面仲有好多人嚟緊,真係好誇張呀~

雖然話係多人,不過佢地啲老師工作效率又真係幾快,我地等左差唔多一個鐘之後就到我地。其實今次都只係做個簡單交表格手續,不過我一見到啲老師就好緊張呀!

交完表格我地就參觀學校,雖然間學校都唔算新,都屬於傳統嘅學校,不過勝在地方好大,可以有好多地方做唔同嘅活動,個環境仲好舒服。透個當日老師講解同睇佢地嘅短片介紹,我覺得教學理念同教法都好好。不過唯一缺點就係遠左啲,第日如果入到依間就要搭校車啦!

依家安排左十一月中就要去面試,未面試就已經開始緊張,因為知道都應該幾難入到,最低限度都應該係八選一,唉....小小豬都屬於係細仔,所以都知道應該入到機會唔大啦!

雖然係咁,我地都要開始教一教小小豬一啲基本嘢,等佢係面試時可以有好少少表現,雖然做唔到最好嗰個,都唔好係最差嗰個嘛!

我已經同自己講,當今次面試係一個俾小小豬開吓眼界機會,得嘅當然好開心,唔得嘅咪當一經驗,平常心面對。不過講就係咁講,都其實係好緊張。唔知依個反應係唔係正常呢?不過我估應該個個家長都會係啦!

為左保護小小豬嘅返學事,所以之後我分享有關小小豬嘅學校事情,我都唔講係邊間,同埋啲相會做少少手腳。如果大家憑一啲蛛絲馬跡睇得出係邊間嘅時候,都請大家幫幫手唔好講出嚟,好讓小小豬有一個愉快同安全嘅校園生活呀!

*♡♡小肥豬♡♡* | 25th Oct 2011 | 小小豬篇 | (18 Reads)
20 OCTOBER 2011(THU)

自從淘過兩套親子裝之後,我都話過要戒淘寶。我都好乖咁有一段時間冇再上去睇,又冇買嘢,不過忍左咁耐,終於都要破戒!

事緣當知道有得去影多一輯SOGO FACE之後,我就開始諗定到時著乜衫好(雖然我到依家都未去BOOK,都唔知正式拍攝會係幾時...哈哈),就係依個時候,小豬媽就引誘叫我上去淘寶睇吓有冇啲新款衫。

就係咁.....我又忍唔到手淘左一套衛衣親子裝啦(不過我都算好忍手,只係買左依樣嘢落嚟)~


依個青蛙裝我開頭都好驚大肥豬會唔鐘意唔肯著,點知佢一見到件衫之後,就話好靚添,聽到我都放下心頭大石。

件衫就係幾靚,不過佢都算厚厚地,所以相信短時間內都係著唔到,唯有等到冬天真正來臨先著,到時一家三口著住,相信真係勁攪笑呀!

*♡♡小肥豬♡♡* | 24th Oct 2011 | 好友與我 | (18 Reads)
20 OCTOBER 2011(THU)

知道藍灣半島個佈置轉左做馬仔嘅我的哈囉喂之道,加上我又有啲嘢整入一入藍灣整。所以今日放工就蛇左一陣,入去整嘢之餘,又約糖糖去影馬仔啦~

哈哈..雖然係地方細細,不過依個哈囉喂版嘅馬仔又真係幾得意,所以我地短短五分鐘都影左好多相呀~

影完相我地就走人,糖糖就送左個小禮物俾小小豬~


其實原本係叫糖糖幫手去換麥記嗰隻錶,不過糖糖話Hello Kitty唔啱男仔,所以就搵左隻CARS 2俾小小豬啦...哈哈!

*♡♡小肥豬♡♡* | 23rd Oct 2011 | 生活點滴 | (27 Reads)
18 OCTOBER 2011(TUE)

早前係Baby Kingdom見到有好多媽媽介紹,話可以於網上申請一個新日本牌子的護膚品 - Domohorn Wrinkle的試用產。有著數當然唔執輸,就走申請埋一份啦!

申請左到唔夠一星期,今日就已經收到件貨,到收到都唔洗兩日,個包裝真係好精美,最後就係佢地免費用宅急便送嚟,唔洗我地去門市部拎,依個服務真係一流,值得一讚再讚。

雖然過係送Sample,不過佢嘅份量真係一啲都唔少~


有齊精美說明書~

我自己就打算過兩日先開嚟試用,不過今晚小豬媽就急不及待試用左,佢話都幾ok,只係個洗面比較乾啲!

原本打算同大家分享,叫大家都一齊去拎個試用裝嚟用,不過可能反應太激烈,佢地已經停止送出,真係唔好意思,下次有好嘢我會即刻同大家分享啦!

*♡♡小肥豬♡♡* | 22nd Oct 2011 | 好友與我 | (18 Reads)
16 OCTOBER 2011(SUN)

今日放學之後,我地就急急腳咁走人,因為我地有另一個節目,就係約左Brenda係地鐵站拎嘢啦!

對上一次見Brenda應該係小小豬剛剛滿月,佢專登嚟藍田探我地,估唔到咁耐先有機會見第二次,真係可以話......我地成年冇見啦~


事緣我屋企係明年三月有喜慶事,原本我都有諗過去租衫著吓,不過諗諗吓..嗰時小小豬都只係歲半左右,都仲係要好貼心照顧,如果我有乜唔小心整污穢條裙,都唔知點賠好,所以我都係決定自己買衫啦!

早係上個月Brenda係Facebook Post左佢弟弟結婚當日嘅相,我見到佢條裙仔都幾靚,所以就問吓佢係邊度買,諗住去睇吓有冇啲心水款啱。當我地之後繼續傾計時,Brenda話條裙其實佢都唔會再著,所以就話唔好浪費俾我咁話。

Brenda肯割愛,我當要唔介意,因為可以買一條靚靚嘅裙都起碼要五百幾蚊,依家可以摼左,我緊係開心。再加上條裙又真係好靚,我好鐘意呀~

不過....因為我個身型就仲係肥左少少,條裙著上身就窄窄地,應該就要拎去改。依家等我慢慢咁開始減少食量(我指係零食),等到明年二月應該都可以唔洗改太多,希望到時會著得靚,唔係就浪費左Brenda嘅心意啦!




*♡♡小肥豬♡♡* | 21st Oct 2011 | 小小豬篇 | (17 Reads)
16 OCTOBER 2011(SUN)

今日我地人強馬莊咁,一行三人帶小小豬返學。其實原本只係得我同小豬媽帶,大肥豬要去尖沙咀幫小小豬交申請表。點知原來嗰邊辦公室係休息,所以大肥豬又跟埋嚟一齊上堂啦!

由於今日有小豬媽係埋度,所以影相依個重任就交左俾佢,我就專心同小小豬一齊上堂。

一開始嘅玩玩具時間,唔知係唔係小豬媽係度,所以小小豬開頭只係黏住小豬媽,唔肯自己去玩,係到差唔多完先肯自己玩玩具,真係俾佢激C呀~

好..上堂啦...當然又係嚟唱遊時間啦~

今日老師教小朋友識認腳仔,之後就圍圈大踏步行同埋行障礙賽~

今堂小小豬又俾老師請左出去做小老師做示範,示範單腳企係積木度呀~

到左小小豬最鐘意嘅茶點時間,有得食嘢佢就真係特別古靈精怪呀~

最後就教用匙羹向假BB餵食物來訓練手眼協調,小小豬都叫做可以完成指示,只係用匙羹時未算做得好,仍有待改善啦~

最後幾分鐘,又係玩泡泡時間,依個小小豬真係好鐘意玩,不過因為我地拍左DV,冇影到相所以同唔到大家分享小小豬當時個開心樣。見佢咁鐘意泡泡,真係要帶佢去多啲公園玩先得啦!

嚟緊下一堂就係最後一堂,希望小小豬可以好似今堂咁表現咁GOOD GOOD先得呀!

*♡♡小肥豬♡♡* | 20th Oct 2011 | 小小豬篇 | (19 Reads)
15 OCTOBER 2011(SAT)

自上次買左件好得意嘅南瓜衫仔之後,我都冇打算再幫小小豬搵個另一個哈佬喂LOOK,諗住都係同佢扮南瓜仔入迪迪尼玩。

點知,今日放工經過屋企樓下商場間童裝度,見到佢地SHOW左一件骷髏骨衫仔衫出,加上只係幾括蚊又唔係貴,所以我二話不說就買一件~

哈哈....依家骷髏骨衫又真係幾有型,仲係夜光添。

唔知我地入迪迪尼玩當日個天氣係點呢?因為依排啲天氣真係是好是壞。所以我都決定左如果熱熱地就著依件,凍呢就著南瓜仔。咁就任何天氣,小小豬都有靚衫仔入迪迪尼影靚相啦!

真係依家諗都咁開心,如果入樂園一定勁興奮,真係好期待同小小豬入去玩呀!
 
 

*♡♡小肥豬♡♡* | 19th Oct 2011 | 生活點滴 | (16 Reads)
15 OCTOBER 2011(SAT)

一年前貪得意開左個微博,都叫做玩過一個月左右,不過之後都冇乜點玩,係因為我已經唔記得左個Login嘅E-mail Account同Password.。

終於都手痕痕開過另一個微博,我會Post我自己或者小小豬嘅趣事同大家分享,所以如果大家有興趣,快啲嚟關注我啦!

 http://weibo.com/2416670181

*♡♡小肥豬♡♡* | 18th Oct 2011 | 生活點滴 | (25 Reads)
14 OCTOBER 2011(FRI)  

早係上星期睇到介紹知道《新Monday》會出一條Hello Kitty x Catalog 嘅相機帶,見到時都已經勁鐘意花花嗰條,仲話過推出嗰日要早啲出門口去便利店買返本。不過.....經過左一個星期當然就已經忘記左,唔係搭車時睇到CARMEN 個FACEBOOK我都唔記得左。

CARMEN 知道我都想買,所以就幫我再去便利店搵(因為我已經返到公司,所以唔可以出去啦),不過...佢行左五間都只係得返黑色,所以最後都幫唔到我買。

原本都以為同條花花相機帶冇緣份,點知史迪哥哥突然打電話回校,問我地有冇興趣買返本,就係咁....佢將店內最後兩本送花花相機帶嘅《新Monday》買左俾我同另一位KITTY迷同事~


條花花相機帶真係好靚,不過相信如果換左落部單反度,大肥豬一定唔肯拎相機呀~


LUNCH時我都有周圍再去搵,諗住搵返條俾小肥肥,點知行左好多間都只係得返黑色,花花嘅威力真係利害呀!

可以擁有心頭好當然好開心,不過都真係要特別鳴謝史迪哥哥幫我買到,亦都感謝今早Carmen幫我周圍去搵!
 
 

*♡♡小肥豬♡♡* | 17th Oct 2011 | 小小豬篇 | (14 Reads)
13 OCTOBER 2011(THU)  

今日小小豬又收到份大禮物,依一份係公公同婆婆送嘅,係一部士的車嚟呀~

睇依依個八卦豬,一見我地打開左部車就走埋嚟,不過唔係要坐....係要推,真係俾佢激C啦~

 
 
我地用開部車仔都冇壞,點解又會買多部車仔呢?咪又係因為小小豬兩頭住家關係。之前小豬爸媽帶小小豬出街嘅時候,大多數都係抱住或揹住,前幾個月都冇乜問題,不過近依幾個月小小豬都叫做有啲斤兩,所以抱得太耐佢地都會手痛。有見及此,小豬媽就話買部簡簡單單嘅士的車,可以方便帶小小豬出街時用。
 
為免佢地辛苦,所以我都打算放假去街買,不過....說時遲那是快...小豬媽比我更早行動,今日就去左買返嚟啦!

小豬媽話見APITA有八折,部車仔折左都係四百蚊左右,所以就即刻行動咁話。

依部士的車都算幾穩陣,個座位都算大,小小豬坐落都應該幾舒服。 不過最重要都係小豬媽覺得好,因為真係唔想佢因為照顧小小豬已攪到周身骨痛嘛!
 
 
 
 
 

*♡♡小肥豬♡♡* | 16th Oct 2011 | 小小豬篇 | (20 Reads)
12 OCTOBER 2011(WED) 

自上個月去完聯合醫院,醫生話小小豬OK可以去返健康院打返支德國麻疹針之後,又等左成個月,終於今日可以打針啦!(其實當時都真係有啲擔心,隔左成兩個月先打會唔會有問題,不過政府嘢就係咁,只有一個字『等』..唉!)

原本今日只有我同小豬媽帶小小豬去打針,剛好因為LULU妹今日生日放自己一日假,所以就陪埋我地一齊去,一行四人去健康院,依個小小豬都真係幾人強馬壯呀..哈哈!
 
一入到健康院先嚟磅豬仔,兩個月前磅同今次磅,都係重左啲啲(真係好啲啲),仲俾小豬媽話小小豬依幾個月白食添! (其實小小豬都真係食好多嘢,都真係好唔明白點解冇乜點增磅。)
 
今次都叫做算快,等左唔洗廿分鐘就可以見姑娘,一入到去當然係問個磅數問題。姑娘話小小豬生長都算好,KEEP到係中上碼BB,叫我地唔好擔心。之後就做返手指仔測試,今次小小豬勁叻,左右手都係一次過就拎到粒星星餅。姑娘仲測試埋行路,雖然未完全穩陣,姑娘都讚小小豬行得幾好呀。 最後就睇聯合醫生嘅打針轉介信,睇完之後就話因為有轉介信,所以唔洗等見醫生,可以直接去打針(心諗..唔洗見醫生就好,次次話要見醫生都要等成半個鐘以上)。

滿心歡喜見到姑娘將小小豬個FILE拎左入打針房,以為唔洗等可以即刻打。

點知...姑娘行返轉頭話,都係要見一見醫生先打得,就係咁...我地又開始等,等到我同小小豬都瞓左啦~

終於等左四十五分鐘就到我地見醫生,點知入去都真係兩分鐘都冇,就話可以出去等打針,醫生同我地講嘅嘢都係同頭先姑娘都係一樣。嗰一刻真係火都嚟埋,都唔知入去見醫生為乜,白白浪費左我地四十五分鐘。

等左一陣就打針,小小豬都叫做OK,只係打嗰一吓喊左一陣,好快就收左聲,只不過就識得伏係小豬媽身上撒嬌。

唉..打依支德國麻疹針都真係幾經波折,聽好多媽媽朋友仔都話依支針都幾利害,好多小朋友都會燒。希望小小豬唔好有太大反應,因為真係好唔會佢太辛苦啦!
 

*♡♡小肥豬♡♡* | 15th Oct 2011 | 小小豬篇 | (21 Reads)
11 OCTOBER 2011(TUE)

今日收到一份好驚喜嘅禮物,就係依一張SOGO FACE嘅攝影COUPON啦~

事緣上幾個星期收到一位小小豬的小FANS嘅留言(佢係咁自稱),話佢手頭上有一張COUPON冇用,身邊又冇合適嘅朋友可以用,所以第一時間就諗起小小豬,就想轉贈俾我,等我帶小小豬去影啲好SWEET SWEET嘅家庭照。

初時我都覺得唔好意思接受,所以都曾經婉拒,不過小FANS實在太厚愛,經佢說服左之後,最後都接受左佢個美意,所以小FANS就寄左俾我啦!

哈哈...真係超級開心,又有機會去影多一輯家庭照啦!剛剛打左去問,因為佢地BOOKING都FULL,所以都應該要等出年二月先有期去影,到時小小豬都歲半,應該都係另一個樣啦!

真係好期待,等我快啲上SOGO FACE換返張正單,約埋個期,咁就真係等影靚相啦!

最後都要同小FANS講:真係好多謝你份心意,你對小小豬實在太好啦!

*♡♡小肥豬♡♡* | 14th Oct 2011 | 小小豬篇 | (21 Reads)
10 OCTOBER 2011(MON)

又一個月啦,小小豬踏入第十四個月啦! 其實你問我,我真係覺得時間過得好快,真係好似轉眼間就十四個月。前幾日係屋企冇嘢做,係FACEBOOK睇返小小豬由剛出世到依家嘅相,真係覺得有好大轉變,好似每一日個樣都唔同咁(當然依然係咁可愛啦!) 。

今日小豬媽同佢影左啲相,真係發覺小小豬大個左好多,古靈精怪咁,都係黑人憎到呢..真係越嚟越愛佢...哈哈哈~

除左啲好嘢之前,當然佢嘅百厭嘢都係一樣好叻,睇吓佢個百厭樣~

我相信依一個係每一個小朋友都會必經階段,只要唔太過分,我都唔理佢,等佢撞吓板咁先知道咁係錯嘛!(好明顯我唔係一名慈母)

依一個月我覺得小小豬變化都幾大,我覺得佢學嘢都真係幾好,好多嘢都只係教二至三次,就可以話掌握到,可以做返出嚟俾我地睇。當然唔少得識認左好多英文字母,依一件事真係令我好開心呀!

嚟緊嘅日子,我地要加陪教導咁好好教導小小豬,一嚟就嚟要去啲幼兒園面試,要有個好表現俾老師睇。不過最重要就係依個歲數開始係學習嘅黃金時期,等小小豬好好利用依段時間慢慢學習,有一個好根基咁就唔怕第日返學會辛苦啦!
 

*♡♡小肥豬♡♡* | 13th Oct 2011 | 小小豬篇 | (19 Reads)
9 OCTOBER 2011(SUN)

PLAYGROUP已經進入倒數,今日已經係第八堂,即仲有二堂就完成晒成個課程啦!

一入課堂就例行活動,先玩玩具WARM-UP吓先~

之後就點名唱遊時間,依個小小豬真係好攪笑,唱歌仔時又唔肯坐定定,不過每唱完一首歌仔,佢都係最快拍手嗰個,真係俾佢笑C呀!

今堂第一個活動就係教識認頭仔,老師俾左個汽球,教佢地用個頭仔嚟頂。唉..見到個汽球班小朋友又點會乖乖咁只係頂個波波呀,基本上個個小朋友都完成唔到依個動作,因為佢地只係想用手去捉住個波波呀~

第二個活動就係行障礙賽踢波波。前幾堂小小豬都好叻叻咁可以行好多次個障礙賽,仲越行越開心。今日真係唔係好在狀態,行左幾個圈之後就唔肯行,仲開始扭計添~

之後就到左小小豬最開心嘅時間,因為就係茶點時間啦!依個小小豬有得食嘢真係特別開心呀~

最後一個活動就係訓練小手指,將啲貼紙貼係小朋友身上面,等佢地自己搣返出嚟,依個小小豬都算幾專心,好快就完成晒啦~

最後,老師同小朋友玩吹泡泡,睇吓小小豬玩得幾興奮,佢真係好鐘意啲泡泡呀~

今日整體上小小豬表現都唔係幾好,可能係因為冇瞓晏覺,加上又開始出牙仔,所以就忟忟憎憎又有少少扭計啦!仲有兩堂,希望嚟緊會好啲,俾心機學埋佢啦!

*♡♡小肥豬♡♡* | 13th Oct 2011 | 博客分享 | (15 Reads)
9 OCTOBER 2011(SUN)

唔知大家聽過《女人愛晒》呢?相信如果有睇開我地生活誌嘅朋友仔,都應該有睇過之前我所分享過嘅POST,我地好榮幸得到《女人愛晒》嘅邀請,成為佢地嘅一份子,所以係佢地嘅《女人愛晒iBlog App》、《女人愛晒Website》同《女人愛晒Facebook》都會見到我地嘅蹤影。
 
做得佢地一份子,當然要幫手推介吓佢地啲活動啦!近日於《女人愛晒》新出了一個活動,名為Summer Summer夏日愛晒美白面膜大比拼~

 
這個活動就是揀選心水面膜進行投票。各投票者亦有機會得到好豐富獎品,包括了10份Organic Beauty 尊貴護理療程(價值$1840)、2份skinPro提供美容服務、5盒 Fancl補濕淨白面膜(總值:HK$760)、DHC α-arbutin十倍淨白面膜(總值$520)……等等。 如投票人數越多,反應熱烈,獎品則會加碼!

有興趣嘅朋友可以去依下網址睇多啲比賽資料http://www.hkmiss.com/vote.php

去完《女人愛晒》網站投票後,有用iPhone嘅朋友可以玩埋佢地個app game仲可以額外中獎!

大家都快啲去參加…投票贏大獎啦!

Next