香港新浪網 MySinaBlog
*♡♡小肥豬♡♡* | 30th Sep 2011 | 小小豬篇 | (17 Reads)
27 SEPTEMBER 2011(TUE)

離開左聯合醫院之後,我地就出左APM,今次係到醫我同小豬媽個肚,因為等左咁耐,真係攪到勁肚餓呀!

一去到APM,我地第一時間就去洗手間幫小小豬換片片先。就係我地入到洗手間時,小豬媽將小小豬放係張大枱時,依個小小豬一見到塊大鏡時,就好興奮咁企起身,仲好似個自戀狂咁,係鏡面前古靈精怪呀~



依個小小豬真係古古怪怪,間唔中都會俾啲驚喜令我地開心,真係令人愛C佢呀!

*♡♡小肥豬♡♡* | 29th Sep 2011 | 小小豬篇 | (42 Reads)
27 SEPTEMBER 2011(TUE)

小小豬去健康院打一歲針嘅時候,因為其中一支德國麻疹針入面有蛋白成份,小小豬對雞蛋好似有敏感,所以當時就冇打到,要去醫院見吓醫生,等佢地決定幾時同點打。所以今日下午我就請假,同小豬媽一齊帶小小豬去聯合見醫生啦!

去到醫院,先去觀察房做啲普通檢查,開頭以為只係度高磅重,不過原來仲要量血壓,姑娘用左一個迷你版血壓計,真係勁攪笑呀~


哈哈...小小豬當然一切正常,體重仲有增長添。

離開左觀察房之後,就係漫長嘅等待時間。雖然唔算好多人,不過真係勁耐先叫一個人入醫生房,都已經有成三間房,都唔明白點解要成大半個鐘先叫一個人名,真係等都等到傻傻地。

好在係等嘅時候,小小豬都唔算百厭,只係間唔中要企係張椅度玩,又擺出古靈精怪樣~

終於都等到見到醫生,開頭仲以為會驗吓乜乜,做吓啲乜測試咁,原來醫生都只係做啲好簡單嘅口頭問卷(其實啲問題都係健康院問過晒),只係問左平日小小豬發濕疹嘅情況,飲食習慣咁依啲普通問題。最後,醫生認為小小豬對蛋嘅敏感唔嚴重,所以會轉介我地返健康院打德國麻疹針。

唉....等左醫生差唔多兩個鐘,見就只係幾分鐘,仲要乜都冇做過,只係問左我幾個問題,就叫我返健康院打針,真係有點兒失望,好似浪費左好多時間咁。不過睇左都好,如果第日有乜問題,起碼知有記錄嘛!

一離開醫院,我就即刻打去健康院登記,依家BOOK左十月中去打針,希望到時冇時發生啦!

*♡♡小肥豬♡♡* | 28th Sep 2011 | 小小豬篇 | (16 Reads)
25 SEPTEMBER 2011(SUN)

今日係星期日,原本應該係小小豬又返PLAYGROUP嘅日子。原本打算叫LULU妹同大肥豬兩個帶小小豬返學,不過大肥豬話PLAUGROUP都唔係咁重要,返少一堂都可以,又怕我一個人係屋企唔得,所以最後.....唯有犠牲左小小豬,做左逃學豬豬一日咁多啦!

雖然話唔係咁重要,不過都係因為我所以令小小豬冇左一個學習機會。不過冇辦法啦....邊個叫我自己唔爭氣,所以為左小小豬,我一定要更加好好咁照顧自己,因為學大肥豬:唔養好自己個身體,又點會有力氣精神照顧小小豬呢!

今日冇返PLAYGROUP,不過大肥豬都有同小小豬練習行路呀~
雖然都只係慢慢行幾步,可能比同年齡小朋友都算慢,不過每一個小朋友嘅成長歷程都唔同有快有慢,所以我都唔會同其他人比較,只要小小豬係按著正常咁生長就足夠。

睇見佢每學識一件事,我地都真係好開心呀!

*♡♡小肥豬♡♡* | 27th Sep 2011 | 小小豬篇 | (17 Reads)
24 SEPTEMBER 2011(SAT)

早幾日收到封掛號信,開頭都唔知係乜,所以就趁今日星期六,就叫左大肥豬幫我去拎,睇吓係啲乜呢。

原來係之前係FACEBOOK參加左美素佳兒抽獎有嘅牛牛衫仔呀~


哈哈...件牛仔衫真係好CUTE,不過因為太厚,唔敢俾小小豬試著住(因為怕熱嘅小小豬一定頂唔順,唔會ENJOY咁同我影相)。依家等我洗乾淨先,再多一排天氣凍啲先同小小豬著嚟影靚相啦!

*♡♡小肥豬♡♡* | 26th Sep 2011 | 生活點滴 | (21 Reads)
24 SEPTEMBER 2011(SAT)

期待已久,終於到左今日去海洋公園嚇鬼之旅,基本上今日全日都冇乜心機做嘢,因為個心都已經飛左去玩,興高采烈咁等放工就可以去玩。

點知...係差唔多放工時,成個人都開始謝謝地,個胃又勁唔舒服,仲有啲頸頭暈。開頭以為都係肚餓所以攪成咁,所以放工就約左糖糖去食少少嘢先出發。不過,邊食就覺得唔對路,冇胃口之餘,成個人都勁唔舒服。

開頭都以為自己頂得到,所以就繼續行程。點知一出到金鐘,真係頂唔到覺得好辛苦,想嘔又嘔唔出,仲要糖糖陪我坐係巴士站旁休息。原本我都有打算等小肥肥入嚟JOIN左我地,我先返屋企(因為係我同糖糖兩個早入去先,我唔想留低糖糖一個人自己入去)。不過.......最後我都係頂唔順,要由金鐘飛的士返屋企。

返到屋企以為瞓吓就會冇事,點知成晚我總共嘔左五次,最後都係唔得得,要LULU妹過嚟幫我地照顧小小豬,大肥豬就帶我去睇醫生。醫生話我係腸胃炎,可能係早上食左一件唔太乾淨嘅吞拿魚三文治影響。

唉....又要食藥啦~


不過食左一次藥之後,真係冇再嘔,有覺好瞓啦!

大肥豬話好在我冇頂住入,因為我又暈又嘔,啲人唔知以為我係入鬼屋驚成咁,之後分分鐘俾白車送入醫院呀....哈哈哈!



*♡♡小肥豬♡♡* | 24th Sep 2011 | 小小豬篇 | (39 Reads)
23 SEPTEMBER 2011(FRI)

仲記得上年見到有啲好得意嘅南瓜衫仔同骷髏骨衫仔,嗰時都已經好想買俾小小豬著,不過因為當時小小豬仲細未啱身,加上又唔知小小豬今年會係乜尺碼,所以冇買到,諗住今年先去買。

我最想就係買一件南瓜衫仔俾小小豬,等佢可以著入迪迪尼應一應節,一定勁得意。

唔知係唔係早左少少,我係屋企附近啲鋪頭仔都仲未有得賣。有朋友仔都建議我去淘寶睇,不過都係搵唔到,因為件件都好似好厚咁,依個怕熱嘅小小豬一定頂唔順,

就係我打定輸數買唔到時,今日放工路過啲街邊小檔,竟然俾我見到一件南瓜衫仔,仲要係最後一件,所以真係覺得好好彩呀~


哈哈...因為未洗,所以唔敢俾小小豬著住,不過依件衫件真係好得意,相信下次同小小豬著入迪迪尼,一定勁正呀!

*♡♡小肥豬♡♡* | 23rd Sep 2011 | 小小豬篇 | (17 Reads)
23 SEPTEMBER 2011(FRI)

今日飯後小豬媽叫我拎起部手機,叫我準備拍片,就係咁..我就拍左依一條片啦~
嘩...小小豬真係好叻仔,識得聽到自己個名就舉手,開頭都以為你撞彩,不過試左好多次突然間叫佢個名,又試過係佢玩嘅途中叫佢個名,次次都可以俾到反應我地,小小豬真係識得聽自己個名就舉手。
 
原來小豬媽依個星期開始教小小豬依個舉動,早係教嘅第二日,小小豬都已經可以完全做到,不過就間歇性因為掛住玩唔肯做依個動作,所以趁佢今日狀態大好,就表現俾我地睇啦!

睇見小小豬識得依個動作,真係極度興奮,真係好叻仔,覺得佢又大個仔左呀!

雖然小小豬叻叻,不過不得不感謝小豬媽,花咁心機幫我教小小豬,俾依個驚喜我地。唔知下一次再有啲乜驚喜呢...哈哈哈!

*♡♡小肥豬♡♡* | 22nd Sep 2011 | 小小豬篇 | (12 Reads)
21 SEPTEMBER 2011(WED)

今日大肥豬一返嚟就拎左一個盒仔出嚟,話係送俾小小豬嘅禮物。

一打開嚟睇,點解成個盒都係周杰倫,唔通係CD嚟(心諗:周董好似冇出過有產品係關於小朋友哦)~

之後打開嚟睇,原來係一部由周董做代言人嘅MP5~

大肥豬仲已經將小小豬平日睇開嘅DVD轉左入去部機仔入面添~

大肥豬話原本都有考慮過買Ipad,不過覺得小小豬依家仲細,都應該未識用,再加上又怕佢會爛,咁就真係肉到痛埋,所以依家平平地買住依部MP5先。不過依個螢幕都有成七吋,都應該夠小小豬用啦!

其實依部機仔都主要都係俾小小豬係屋企下午時有個私人影院,等小豬媽可以播啲ABC佢睇時,又可以唔洗阻到小豬爸睇電視。

另一個用途就係當等小小豬去街街時用,不過大家放心,係街上面我都唔會成日俾佢睇,都只限小小豬百厭唔肯坐定定定時先用依個秘密武器對付呀..哈哈哈!

雖然依部機仔都只係六百蚊左右,不過個畫面同埋個聲都幾好,都十分清晰(佢話係用左高清設計),又夠大聲,操作又好方便,平平玩買嚟用,都不失為一個好好選擇呀!

又再一次証明,大肥豬真係一名廿四孝爸爸。不過依個真係平、靚、正,所以又真係抵讚呀!

*♡♡小肥豬♡♡* | 20th Sep 2011 | 生活點滴 | (25 Reads)
19 SEPTEMBER 2011(MON)

記得我細細個跟小豬媽去超市SHOPPING時,如果我地乖嘅話,小豬媽都一定會買一款雪糕蛋糕俾我地食(當然係成日食啦...因為我地乖嘛..哈哈)。我仲記得小豬媽有時會將支中蠟燭放上去,當係一個生日蛋糕咁俾我地吹前完切嚟食,依家諗返起都覺得好開心呀!

不過...依款雪糕蛋糕推出左一段時間就已經銷聲匿跡,想再回味都冇機會啦!

今日路過惠康時,醒起前幾日係BABY KINDOM見到有媽媽話係惠康見到有得買,所以就入去八卦一吓。開頭搵左好耐都搵唔到,不過當我正想放棄嘅時候,唔知點解一眼就望到,所以即刻買左一盒返屋企,一家人一齊分享啦~

唔知係心理作用,真係覺得好好味,一食入口嘅感覺,就好似同N年前冇分別,都係一樣咁正呀!

有興趣嘅朋友快啲去買嚟試吓啦!

*♡♡小肥豬♡♡* | 19th Sep 2011 | 生活點滴 | (15 Reads)
18 SEPTEMBER 2011(SUN)

自從上次同糖糖影完馬仔之後,我都發覺我部傻瓜機都係唔得,個對焦對得好慢,影相好容易OUT FOCUS,係時間要換部新啦,所以趁今日放學去左百老匯一轉,打算買過部相機。

原本我都想買可換鏡頭嗰啲數碼相機,不過諗深一層,我地都已經有兩部單反機,如果去街都應該係會帶單反,好似唔多需要用可換鏡頭數碼相機,加上大肥豬又睇中左一部高一級嘅單反,都係留返啲錢買單反機或者鏡頭仲好。

加上我平日都係同朋友仔去街先用傻瓜機,所以都係簡簡單單,最緊要方便嘅機就啱我(因為我懶...我自已一個係唔會帶單反出街..哈哈)。

最後,就平平地買左依一部嚟玩啦~

依部機雖然係做緊優惠價,不過整體上都幾好,拎上手又唔太重,又簡單易用,加上影出嚟都好似幾OK,都應該幾啱我依啲懶人。等星期六去哈囉喂玩時就可以試清楚部機啦!

最後....都要講一句:多謝老公...哈哈!

*♡♡小肥豬♡♡* | 18th Sep 2011 | 小小豬篇 | (23 Reads)
18 SEPTEMBER 2011(SUN)

唔覺唔覺....今日已經係第五堂,成個課程上左一半啦!

今日因為我論盡,記錯返學時間(因為之後有職員打便我話改時間,原來係由十月開始),所以今日我地遲左少少,一返到課室已經過左玩玩具時間,宦所以小小豬冇得玩啦!

上堂啦....唱歌仔時間~


之後就訓練行路,沿住個膠碌碌行去拋波波入筒,小小豬好乖乖咁完成晒呀~


之後就要搬橷仔,依個小小豬自己(當然要我地扶住啦)搬完之後,又要自己爬上去坐,真係百厭豬呀~

老師今日教認識舌頭,俾左薑同檸檬俾小朋友試吓刺激脷仔,同埋要小朋友呻條脷出嚟。小小豬好快就可以呻條脷出,就連身旁另一位家長都話叻叻。當然啦....因為小小豬係一名為食豬,佢只不過以為有嘢俾佢食,所以脷仔出嚟啦~


試完味覺,終於到茶點時間,今次小小豬好叻,識得自己拎住杯杯飲水,唔洗我地提添呀~


今堂新玩意就係老師教撕紙之後用手將槳糊貼係圖畫紙上面,以訓練小朋友手指靈活。撕紙當然冇問題,因為小小豬成日都撕紙(因為我地想多訓練佢手力),不過估唔到小小豬勁鐘意槳糊,係老師教左一次之後,就不停要將手插入槳糊盒上面,仲要自己塗添。佢都係第一次接觸槳糊,開頭我都怕佢唔肯接觸呀~

依一幅就係小小豬嘅勞作,都OK啦...哈哈哈~

今日可能一去到就上堂,冇左個WARM-UP時間,加上成朝早都唔肯瞓,只係搭車時瞓左一個蚊滋覺,所以小小豬嘅情緒都唔係太好,係上堂時都間唔中有尖叫,臨完堂時又開始扭計,真係失禮晒。我地真係要注意吓依個問題,下星期迫都要迫佢瞓個好覺先返學,咁應該會好好多呀!

*♡♡小肥豬♡♡* | 17th Sep 2011 | 生活點滴 | (17 Reads)
16 SEPTEMBER 2011(FRI)

早係上個月,見FACEBOOK個Milk B專業入面有Kidinc. Tee抽獎,所以就貪得意玩埋一份。一直都冇講個得獎名單,所以就連我都已經唔記得左我曾經參加過依個抽獎。
 
不過,今日睇信箱先知原來我抽中左,仲寄左份禮物嚟呀~

佢有四款係隨機派發,我抽中左套親子裝,件衫好攪鬼呀~


件衫暫時唔可以著住,因為小小豬嗰件就大左啲,我嗰件又細左啲,所以都係要等吓,睇吓有冇機會可以著到啦!

依份係抽獎抽返嚟,如果真係著唔到,KEEP住嚟做過留念都好,因為.....真係覺得SO LUCKY呀!

*♡♡小肥豬♡♡* | 16th Sep 2011 | 好友與我 | (20 Reads)
15 SEPTEMBER 2011(THU)

因為要幫糖糖做信差,今日放工又蛇左一陣先返屋企,入左小西灣一轉幫佢拎嘢。

入得小西灣,當然要入埋藍灣半島,因為知道有馬仔嘅我的中秋節之道,所以都想去影吓!

雖然佢個佈置都唔係好多,主要都係紙板,只有一個公仔係度,不過都幾得意,所以都影左唔少相呀~

哈哈...依家藍灣半島好似變左我地另一個影相地方,冇法啦...因為近我地嘛, 又可以借啲意同糖糖聚一聚,唔知下次有冇乜靚佈置可以又去影呢!

*♡♡小肥豬♡♡* | 15th Sep 2011 | 小小豬篇 | (18 Reads)
14 SEPTEMBER 2011(WED) 

依排唔知點解小小豬好鍾意望窗,佢可以望住個窗做出好多唔同嘅動作,有時就會企定定好興奮咁吱吱喳喳講佢啲BB話,仲要講到有文有路,好似同人傾緊計咁、有時就會好似滿懷心事咁眼定定望出窗,間唔中又會對住個窗傻笑,睇見佢真係勁攪笑!

今日下午當小豬絲槑小小豬覺覺豬嘅時候,小小豬突然間又嚟爬起身,原來又係想去望窗。今日小小豬心情大好,做左好多唔同嘅表情,真係古靈精怪呀!
 
先嚟一個嬌嗲樣,真係冧C人呀~ 

嚟多個飛吻先~


整多個古惑眼神~


再嚟個多愁善感樣~

 
最後終於情緒高漲完畢,回覆傻豬樣啦~

 
睇見小小豬一日一日咁長大,佢又會學識做啲古靈精怪樣令我地開心,唔怪之得全屋嘅人都俾佢左俘虜啦!

*♡♡小肥豬♡♡* | 14th Sep 2011 | 小小豬篇 | (22 Reads)
13 SEPTEMBER 2011(TUE)

小小豬嘅生日都已經過左一個月,估唔到今日都仲有禮物收到,真係開心啦!

事緣今日下午,大肥豬有個朋友(係我地結婚時都有幫手做兄弟)打嚟約左出去飲嘢,返嚟嘅時候,就帶左依一份禮物~

其實大肥豬依位朋友仔都好有我地心,雖然唔係成日見面,不過每逢啲節日,都一定約我地出嚟食飯,或者上嚟屋企探我地。今次佢話知道我地會成日同小小豬影相,所以就諗到買數碼相架俾我地,等我地可以放啲相入去慢慢睇。

哈哈.....我收到時仲即刻擺左好多相入去相架啦~

因為屋企都已經有電腦可以睇相,所以原來都打算拎返學校,等我放係枱面,咁就可以不停見到小小豬嘅靚相(因為我部電腦係俾人鎖左,就連WALLPAPER都唔可以整呀)。不過...諗諗吓,都係費時俾人話,所以最後依個相架都係留係屋企啦!

*♡♡小肥豬♡♡* | 13th Sep 2011 | 小小豬篇 | (16 Reads)
12 SEPTEMBER 2011(MON)

今日放工之後,即刻返小豬媽度接走小小豬,因為今日要返奶奶屋企做節呀!(真係慘...冇得放早,不過做學校都預左啦...唉!)

我地食完晚飯後,就同埋奶奶一齊陪小小豬落樓下公園仔玩吓應吓節。原本我地都有帶燈籠仔俾佢玩,不過可能前一日LULU妹教識佢玩螢光棒,所以佢係公園見到啲哥哥姐姐玩時,表現得不知幾興奮,吱吱喳喳咁不停講佢嘅BB話。

因為始終都怕螢光棒危險,所以我地都冇準備買俾佢玩。就係依個時候,奶奶撞到佢啲朋友又係帶孫仔落公園玩,所以就俾左啲啲俾小小豬玩,睇佢有得玩個樣幾開心~


原本奶奶都想我地玩耐啲,不過因為都開始大風,所以我地玩左半個鐘左右,小小豬係走時都好乖咁俾返哂啲螢光棒俾哥哥,完全冇扭計話唔俾,所以都要俾個叻叻佢呀!


*♡♡小肥豬♡♡* | 12th Sep 2011 | 小小豬篇 | (19 Reads)
11 SEPTEMBER 2011(SUN)

今日放左學,我地就返小豬媽屋企食預早的中秋節飯啦!

今晚嘅真係好豐富呀~

今年小豬媽都收左好多盒月餅,不過全部都係冰皮嚟。依啲就係我地今晚嘅甜品,真係好多咁呀~


迎月夜當然要帶小小豬落公園仔玩吓燈籠啦,不過因為天氣唔係咁好,所以都係落樓下公園仔玩。雖然係咁,不過小小豬都玩得好開心,緊係啦....佢一個人玩就有我地七個人陪佢,真係少爺仔呀~


開頭都係玩自己個燈籠,後來LULU妹俾左啲螢光棒佢玩,又要玩埋一份呀~


不過因為越嚟越大風,所以我地都係玩左廿分鐘左右,咁就返小豬媽屋企啦!我地真係好好彩,係我地返到屋企之後,就落好大雨呀!

今年小小豬都係推住部豬仔車咁行嚟行去,出年啦...應該可以拎住我燈籠自己慢慢行(可能係走度咁行),到時應該仲開心呀!

*♡♡小肥豬♡♡* | 11th Sep 2011 | 小小豬篇 | (12 Reads)
11 SEPTEMBER 2011(SUN)

唔知係唔係返左PLAYGROUP之後時間好似過得好快,好似快又到星期日,又要返PLAYGROUP。

可能已經係第四次返學,所以小小豬都已經熟習環境,一入到課室就識得去中間玩玩具啦~

 
唔知係唔係上星期行平行木行得好開心,所以玩玩吓玩具就爬去個平行木度,好在小小豬只係企係個平行木入面,冇扭計話要玩,如果唔係就失禮C 啦~

 
開始上堂,今日多左幾個新同學,所以都好熱鬧。開始時都係唱遊時間,之後就有新玩意啦!

今堂老師話要訓練小朋友嘅平行力,所以就玩波波。小小豬一見到個波波就勁興奮呀~



 
老師用左三種方式嚟訓練,小小豬好叻仔,可以好乖乖咁完成晒呀~

之後就到認識器官,今次都鼻子,老師教用鼻嚟嗅味覺,俾左朱古力蛋糕同橙俾小朋友嗅。不過因為小小豬有濕疹關係,只可以嗅唔可以食,仲要佢睇見其他小朋友有得食,你都唔好話...真係幾慘呀~


見佢咁可憐,所以就俾佢咬一啖粒橙過吓口引,睇吓佢個心急樣~


今日老師仲俾左啲麵團俾小朋友玩,等佢感受吓個手感同埋插啲通粉落去,又可以訓練手力。小小豬做得唔錯,都可以做到要求,又好專心哦,仲俾老師讚添~



最後又到玩具時間,今次小小豬唔再拎住份玩具自己玩,開始鐘意係同學仔群中玩,不過就仲未學識一齊分享地玩。可能平日都係佢自己一個係屋企玩啦,所以要訓練多啲先得呀~


睇見小小豬每上完一堂就好似又識多啲嘢咁,希望嚟緊幾堂表現都要好啲,繼續努力啦!

*♡♡小肥豬♡♡* | 10th Sep 2011 | 小小豬篇 | (19 Reads)
10 SEPTEMBER 2011(SAT)

每一個月嘅10號都係一個重要日子,因為係小小豬又大多一個月嘅日子嘛。唔經唔覺.....小小豬已經13個月人仔啦!

係過去嘅一個月可以話又開心又擔心,開心嘅當然係同小小豬舉行左幾個慶祝活動,又帶左佢去影樓影靚相,仲開始上PLAYGROUP添。

擔心嘅係基本上由八月尾開始,小小豬好似未停過唔舒服,唔係傷風完就咳,仲試埋腸胃炎,睇見佢食藥真係驚。唉...其實我地都已經好小心照顧佢,都真係唔明白點解會係咁,唯有繼續加陪照顧啦!小豬媽都話小小豬過左一歲人仔,可以俾多啲好嘢佢食,等佢食多啲,抵抗力好啲,咁就冇咁易病啦!

講起影樓,我仲未同大家分享我地係SOGO FACE影嗰輯靚相。其實早係八月頭時我已經拎左,不過當時因為日日都有好豐富節目,所以都冇即時同大家分享,只係將其中兩張相用嚟做左BANNER同PROFILE相。趁今日小小豬13個月咁好嘅日子,就同大家分享吓啦!

其實依一輯相我地主要都係影FAMILY,所以單獨影小小豬嘅唔多,最後就只係得三張單人照~


 
不過...我加錢買左一張特效相,好得意呀,我仲做埋即刻用左嚟做BANNER添~


先嚟紅卜卜嘅三口子的溫馨照~




再嚟叮噹親子LOOK~

成輯相都係得一張我同小小豬嘅合照,大肥豬仲要冇得影,唔知係唔係佢地咁安排呢~

嗰日小豬媽都有同埋我地一齊去影相,原先小豬媽都只係打算同小小豬單獨影幾張。不過攝影師哥哥間唔中就會叫埋小豬媽一齊影大合照,所以變左小豬媽都影左好多張。依個小小豬真係呢.....每一張有小豬媽在場嘅相,佢都笑得特別開心,真係冧到小豬媽呢....哈哈哈~

小豬媽仲勁過我,因為佢有兩張同小小豬嘅合照,兩張小小豬都笑得好開心呀~


整體上我都幾滿意SOGO FACE依一輯相,所以如冇意外會等小小豬兩歲時會再去影輯家庭照...哈哈哈!


*♡♡小肥豬♡♡* | 9th Sep 2011 | 小小豬篇 | (17 Reads)
9 SEPTEMBER 2011(FRI)

上次同小豬媽行MEGA BOX時,見到新開左一間童裝店,嗰間SHOP叫乜名我就唔記得,不過全店都係賣日本貨,仲有一部分係專賣RODY馬仔嘅精品。我就係俾啲RODY吸引左,所以就入去八卦一番。

唔入去都冇事,不過一入去就大破財。事關我同小豬媽都不約而同睇中左件TEE,個款得意之餘,啲質地都真係唔錯,又柔軟又舒服,最慘就係佢仲出埋大人SIZE,即可以做親子裝。

不過依件TEE都算幾貴,大小同價每件都係二百幾蚊,所以我都考慮左好耐。最後經小豬媽引誘,加上SALES姐姐俾左個折扣我,於是都係敗左兩件,等我同小小豬嚟個母子裝~
 

哈哈…兩母子齊變身做大西瓜,下次去街街同小小豬一齊著,一定好攪笑呀!

Next