香港新浪網 MySinaBlog
*♡♡小肥豬♡♡* | 31st Jul 2011 | 小小豬篇 | (14 Reads)
29 JULY 2011(FRI)

仲有十幾日就到小小豬一歲生日,話晒都係第一個生日,當然要重視一吓啦! 我已經PLAN好左點同小小豬去慶祝,不過依家唔講俾大家知住,留返啲神秘感嘛...哈哈!

生日嗰日當要要靚仔啲啦,所以我成日都想買靚嘅新衫仔俾小小豬,同小豬媽都為依件事行過幾次街,不過都係買唔到,揀唔啱心水。

今日同糖糖食完LUNCH之後,路過DINSEY BABIES,原本都冇打算入去睇,不過...就係俾佢地櫥窗條工人褲吸引左,所以就入左去睇。

就係咁.....就買左條工人褲等小小豬生日著呀~


條褲仔除左幾得意之外,佢好嘅就係個質地薄薄地,啱晒怕熱嘅小小豬呀!

哈哈.....條工人褲紅卜卜,真係好啱生日著呀,為左生日而買,咁即算係第一份生日禮物啦!

*♡♡小肥豬♡♡* | 30th Jul 2011 | 生活點滴 | (17 Reads)
29 JULY 2011(FRI)

前日收到YAHOO BLOG嘅系統升級通知,初步都知道係話將我地玩開個BLOG轉去一個新版面,現階段就俾我地自由地選擇用新版面,到過多幾個月就會強迫我地轉用。
 
當知道依個消息時,我係打算返屋企將現有啲網誌先COPY去電腦,先再將個BLOG升級。因為睇返個BLOG原來係由06年8月開始寫,由我地拍拖寫到結婚再到小小豬出世,大大話話都寫左成五年有多,如果係個系統升級途中有乜問題,冇左啲POST咁就真係好可惜。(其實係因為睇左好多升級左嘅朋友仔BLOG,佢地都話唔係好得,有好多問題,所以攪到我驚驚地)

不過.....今日當我細心睇吓有關系統升級嘅資料時,手快快嘅我一時錯手按左『即時升級』,就係咁我係個BLOG未有任何BLACK-UP之下, 系統幫我升級緊!

嗰一刻嘅心情真係勁DOWN,勁擔心。

最後,經過二個幾鐘頭嘅擔心,我個BLOG終於都叫做順利過渡,暫時睇就冇嘢唔見左,只不過因為之前嘅POST嘅文字係用左大SIZE寫,所以攪到POST入面啲字體怪怪咁,同埋啲BANNRT...仲有 好多嘢都要SETTING過。 不過唔緊要啦,其實冇唔見啲POSE我已經覺得好好彩,等我有時間先慢慢整返好佢啦!

講返個新版面,總係覺得怪怪咁,不過可能係睇唔慣,過多一排應該會好好多。另外,我仲發現無 "昨日人次" 同 "人氣排名",相信會因為依個原因少左好多朋友仔嚟睇我個BLOG啦! 

其他方面我仍在試用中,所以都唔知轉左新版面係好定壞,希望順順利利啦,因為我真係唔想放棄個BLOG,話晒都寫左五年幾,同個BLOG都算有感情嘛!

*♡♡小肥豬♡♡* | 29th Jul 2011 | 生活點滴, 博客分享 | (17 Reads)
28 JULY 2011(THU)

早前得到護膚品牌VMV嘅邀請參加成為「VMV 零敏感試用大使」,作為一名師奶仔,有好嘢當然參加埋一份啦,所以就JOIN左個計劃,今日仲去左拎份試用產品添。今期佢地安排左Boo Boo Balm(寶寶萬用抗菌膏)俾我地試用。開頭以為係細細支嘅試用裝,不過原來佢地俾我嘅係零售裝,要成二百幾蚊呀~

以下係為寶寶萬用抗菌膏介紹:
寶寶萬用膏具抗菌保護功效,能一次過解決6大嬰兒常見的敏感問題,包括尿布疹、濕疹、皮膚炎、粟粒疹、玫瑰疹或牛皮癬等問題。且能滋潤嘴唇乾裂、手指倒刺、輕微傷口、輕微燒傷修護之用。方便隨身攜帶,適合孕婦、初生嬰兒或皮膚極敏感人任使用。

依個產品對濕疹都會有大嘅幫助,開頭大肥豬都唔太建議俾小小豬試用,因為佢對此個牌子就唔係咁熟識。不過之後我都有上網都睇過啲介紹,知道依個牌子係外國都好多人用,同埋好多反映都話用左幾好,所以我就俾小小豬試用吓,咁起碼如果起濕疹時,唔洗成日塗類回醇藥啦!

除左小小豬試用之外,我都有打算試埋一份,因`為依個產品對我嘅手指倒刺、皮膚炎咁有幫助之外,我上網睇過都有啲媽媽蚊咬都好好,依樣就係最幫到我,因為我係一名好易俾蚊咬嘅人,成日都咬到成腳都係印,但我又唔想塗啲有味嘅嘢,驚影響到小小豬,所以依個真係對蚊叮蟲咬有幫助,咁就真係好啦!

依家都係初初試用,所以都未知效果如何,等試用多兩星期,再同大家分享個結果啦!

係度要一次多謝VMV嘅邀請!
 
 

*♡♡小肥豬♡♡* | 28th Jul 2011 | 生活點滴 | (25 Reads)

26 JULY 2011 (TUE)

依排見好多朋友仔都去左行書展,攪到我都好想去行埋一份。不過帶住小小豬去又點方便呢,所以都係等小小豬識自己睇書時先同埋佢一齊去啦!

雖然我冇去到書展,不過都一樣買到新書睇呀~

哈哈...因為我個LULU妹要入去書展參加啲新書簽名會,所以就搭佢幫我買依兩本新書啦!

LULU妹話我知,原來本怪獸家長2好難搵,因為佢地個攤位唔係太突出,搵左好耐先買到呀!

除左我有新書睇之外,小小豬都有份,因為LULU妹買左三本布書仔俾小小豬呀~

暫時小小豬對依三本書仔興趣都唔係咁大,等佢玩多幾日,應該就會愛上佢呀。因為平時啲雜誌小小豬都好鐘意拎嚟玩,依三本書仔咁多公仔,佢又有乜理由唔鐘意呀!

哈哈....依排真係兩母子齊閱讀啦!


*♡♡小肥豬♡♡* | 27th Jul 2011 | 小小豬篇 | (16 Reads)

26 JULY 2011 (TUE)

唔知大家仲記唔記得小小豬係六月時去會展參加過爬行比賽,仲好叻叻咁拎左小組第一名出線呢。

係參加完比賽之後,有關機構都話過會係BABY-MO八月號刊登返有關嘅活動嘅精華相片。當時我都諗....唔知小小豬會唔會有機會上雜誌呢就?所以都好心急想本雜誌出,睇吓見唔見到小小豬嘅蹤跡。

開頭以為八月號係八月先出,不過今朝一早就收到同學仔CATHERINE通知,原來本雜誌已經出左,小小豬仲有四張相刊登左出嚟,所以一到LUNCH就即刻衝去買返本呀~

先睇EXPO特刊,爬爬比賽嘅頁有小小豬呀~


回顧整個活動頁,又有小小豬呀~


至型EXPO  BABY選舉攝影棚影嗰張相呀~


哈哈...估唔到小小豬可以有三張相刊登左係EXPO特刊,真係勁開心呀!

不過原來除左EXPO特刊之外,另外兩本都有小小豬出現。

係隨書附送嘅FRISO相冊入度,都有小小豬呀~

主雜誌其中有一頁係親子影樓賣嘅廣告,係有關陽光 Sun-Like 笑容選舉。開頭我都唔覺,不過諗諗吓...我好似有參加過依個比賽,所以就慢慢搵,終於幾經辛苦,搵到小小豬啦~


見到小小豬係啲雜誌出現,雖然都只係細細張嘅相,不過都已經好開心啦!

唔知幾時再有機會可以係雜誌見到小小豬呢?


*♡♡小肥豬♡♡* | 26th Jul 2011 | 小小豬篇 | (14 Reads)
24 JULY 2011 (SUN)

早前同小小豬係FACEBOOK參加左BABY KINGDOM嘅水著BB攝影比賽,不過依啲比賽多LIKE嘅活動我都知道贏唔到,所以就冇幫小小豬進行拉票。


不過,係冇拉票嘅情況下,小小豬都有入圍,仲排得102名(全部有200名BB參加),都算係咁啦!


知道佢地係七月二十三同二十四日係數碼港有個活動,張相會連同其他參加BB一齊做個佈置版,會SHOW係會場入面。雖然我都好想去影低嚟留個紀念,不過數碼港又真係唔係咁方便,所以打消左依個念頭。


雖然我地冇去到,不過我都有得KEEP住張相嚟留個紀念。因為WINSON ANSON HOME媽媽有去到影,仲幫我影低左小小豬張相添~

ANSON 媽:真係唔該晒你呀!

其後我係FACEBOO BABY KINGDOM都搵到個佈置版全景,因為佢地都影得好清楚,所以我放大佢慢慢睇時,仲發現左原來版上到有五張小小豬嘅相添~


*♡♡小肥豬♡♡* | 25th Jul 2011 | 小小豬篇 | (25 Reads)
23 JULY 2011 (SAT)

由於前排我預到啲好唔開心嘅事,大肥豬就主動提意帶我入去開心一吓,就係咁....我地今日就又左迪迪尼玩返日啦。

除左我地一家三口之外,今次仲約埋小肥肥一齊入,因為佢係我地一家嘅預用攝影師嘛!

原本約好左兩點幾,不過為左小小豬有好好嘅精神,係出發前俾佢瞓左一覺先去,所以我地都差唔多三點幾先入到去。

一入到去見公仔唔多人,所以我地就先去影公仔。好明顯小小豬係唔鐘意DUFFY,見到佢係冇反應呀~

睇吓....小小豬同高飛玩得幾開心~

影完相我地就行過去睇獅子王SHOW,其實開頭我都擔心小小豬會好驚,會大喊咁要中途離場。不過依個小小豬真係好叻叻,只係開頭時有少少不安情況出現,之後我就抱實佢,咁就可以睇晒全場,完全冇喊冇扭計呀!

睇完SHOW我地又去BABY-ROOM同小小豬飲奶奶叉叉電啦!

上次小小豬好鐘意米奇咁,所以原本打算同小小豬影五周年米奇,不過勁多人又截左人龍,最後我地就短短地去搵唐老鴨影。不過估唔到小小豬原來好鐘意唐老鴨,佢地仲好開心咁玩左好耐呀~

仲錫錫添~

就係因為佢太愛唐老鴨,所以影相時唔肯望鏡呀~

見個太陽開始下山冇咁晒,所以我地就係城堡影吓相。今次小小豬個表現勁GOOD,好多張都好開心呀~

有小肥肥係度,當然有啲靚靚全家幅啦~


我地今日都玩到成七點幾先走,不過整體上小小豬個狀態都好好,冇扭計又乖乖咁,好開心咁。(真係要讚吓佢先得呀!)

不過因為天氣實在太熱,所以可能下次再帶小小豬入園時都應該要等九月,到時冇咁熱,相信小小豬仲會玩得開心呀!


*♡♡小肥豬♡♡* | 24th Jul 2011 | 小小豬篇 | (19 Reads)
21 JULY 2011 (THU)

當小小豬第一次入迪迪尼,見到米奇好開心嘅時候,我就同大肥豬講,可能係屋企睇得DISNEY MAGIC ENGLISH多,所以唔驚米奇,所以我就話要買啲米奇嘅卡通片俾小小豬睇,等佢愛上米奇,咁入迪迪尼玩就仲開心。

今日大肥豬就買左兩盒米奇妙妙屋返嚟俾小小豬睇啦~

哈哈....有咁多米奇,相信小小豬一定好快愛上佢啦!

依套雖然係有教育意義嘅係卡通片,不過我地都會集中俾小小豬睇左DISNEY MAGIC ENGLISH先,有時間先睇妙妙屋啦!


*♡♡小肥豬♡♡* | 23rd Jul 2011 | 好友與我 | (16 Reads)
21 JULY 2011 (THU)

嘻嘻....唔知大家有冇留意我又轉左條新BANNER,係唔係好靚呢~

依個傑作當然唔係我整啦,因為我係冇咁多心思同精神去整。不過相信好多朋友仔都已經估到,因為我以往所有嘅BANNER同埋整相嘅嘢都係由佢幫我,冇錯...就係我好友兼同事糖糖啦...哈哈!

由設計到搵相都係佢一手包辦,等佢自己發揮,最後就得出左依個製成品。我自己就好鐘意,覺得好特別,好鐘意佢嗰句『K+K=K』,正好代表我地係K’S FAMILY呀!

不過講起糖糖,由下個月開始我地嘅關係會有改變,佢唔再係我嘅同事啦,不過依然會係我嘅好友。

因為佢返埋依個月之後,就會有另一個發展,作為同事嘅我當然係好唔捨得,因為冇陪我食LUNCH,又冇人聽我發勞騷,唔會再有人支持我,感覺好似孤獨左啲.....唉。

不過作為朋友,知道佢有更好發展,當然會大大力支持啦!

我相信我地嘅友誼係唔會因為分開左工作已有改變,因為我地都會成日約出嚟玩,所以佢依然係我好好好好嘅朋友嚟呀!


*♡♡小肥豬♡♡* | 22nd Jul 2011 | 小小豬篇 | (38 Reads)
19 JULY 2011 (TUE)

早幾日大肥豬問我有冇朋友係荷花嘅VIP,因為佢知道荷花出左一本幼稚園天書,佢想買嚟開始究竟吓啲幼稚園,話開始要物式一間好嘅幼稚園俾小小豬。

就正當我問緊周圍朋友時VIP問題時,今日大肥豬已經急不及特係7仔買左本書返嚟啦~

 

真係估大肥豬唔到,因為平時如果知道有優惠嘅話,佢都一定等吓先。不過我知道佢都係因為緊張小小豬嘅學習,先咁著急買本天書嚟睇,真係一個好爸爸啦!

其實我都有問過洗唔洗咁快開始搵定幼稚園,不過大肥話因為好多幼稚園收生都會早一年,所以依家睇定啲介紹,揀定幾間心儀嘅,到時就唔會咁急趕嘛!

我都有睇到本天書,我都有一個問題想問吓大家,希望各位媽咪可以俾啲意見我地呀!

我見有啲幼稚園話可以2歲就入學(即係幼兒班),但我印象中都好似入幼稚園係3歲,咁我地其實係唔係應該2歲就開始帶小小豬返幼兒班?幼兒班同幼稚園又有乜分別?有返幼兒班嘅小朋友會唔會對將來學習會好啲?

唉....唔怪得之好多人都話,小朋友一返學就會有咁多問題。為左小小豬嘅將來,我地一定要好好認真咁諗清楚先得啦!

好在....小小豬有一個好爸爸(我自問依方面就冇大肥豬咁有頭腦),相信一定可以幫小小豬揀到最好呀!


*♡♡小肥豬♡♡* | 21st Jul 2011 | 小小豬篇 | (22 Reads)
19 JULY 2011 (TUE)

早係上星期嘅時候,都FEEL到自己喉嚨開始好痛,當時仲以為係自己為食,食左好多荔枝攪成咁。

不過都過左成差唔多四日,個喉嚨仲係勁痛,所以係上星期五放工就走左去睇醫生。醫生只係話我鼻膜同喉嚨發炎,俾左啲消炎藥我食就算。

以為睇左醫生食左藥會冇事,點知食完仲辛苦過未食,除左喉嚨痛之外,仲多左咳(係咳到CC吓嗰隻)。依幾晚都要咳醒,真係辛苦到極點,所以今日請左一日病假去睇另一個醫生。

係依個時間,小豬媽就發現小小豬有少少唔對路,全身都有微熱,一探之下發現原來小小豬有少少發燒呀~

唉....所以我地就兩母子一齊打電話去BOOK睇醫生。

我唔舒服時都已經有做自我隔離,唔係點行去小小豬附近。不過係夜晚瞓覺時小小豬習慣左要我槑豬豬,相信亦都因為咁所以傳染左啦!

點解我會咁唔小心,真係好內疚!

好在醫生都話小小豬唔算嚴重,食兩日藥就可以好返。

(TOUCH WOOD)如果我下次再病時,真係要係屋企無時無刻咁載住個口罩,就連瞓覺都要載住,唔可以再傳染俾小小豬。


*♡♡小肥豬♡♡* | 20th Jul 2011 | 好友與我 | (14 Reads)
18 JULY 2011 (MON)

早幾日知道杏花新城有藍精靈嘅佈置,所以一早就約好左糖糖今日放工去影一轉啦!

雖然今日遇到一件好唔開心嘅事,不過既然一早約好左,大家都著到靚靚咁,所以都係照去,當散散心影吓相,暫時忘記啲唔開心事啦~

雖然藍精靈佈置嘅地方就唔係太大,不過好在我地影嘅時候唔多人,加上又可以近隔離接觸佢地,所以都OK唔錯呀!

返到屋企俾啲相小豬媽睇時,佢仲話搵日要帶小小豬去玩添...哈哈!


*♡♡小肥豬♡♡* | 19th Jul 2011 | 小小豬篇 | (14 Reads)
16 JULY 2011 (SAT)

尋日從Facebook知道今期Milk B 送Anges B. Raincoat,我見介紹圖都幾靚加上都只係$30咁抵,所以就勁想買,因為都係貪佢件雨衣買俾小小豬。

不過當我LUNCH時,同糖糖兩個人行左柴灣區幾間7仔、OK同埋雜誌鋪都唔見有,嗰一刻都真係有少少Down呀!

不過之後係Facebook睇到,好似話出貨有問題,要夜晚先可以送到,加上好似話出貨數量都唔係太多咁,所以我依個黑仔王都已經打定輸數買唔到啦!

不過原來我都未黑仔得晒,因為史迪哥哥幫我買到啦~

一本咁難買嘅雜誌,大家都係為左件雨衣呀~

雖然都只係$30,不過件雨衣仔質地都唔差,小小豬著上身一定好型仔呀...哈哈!


*♡♡小肥豬♡♡* | 18th Jul 2011 | 生活點滴 | (17 Reads)
14 JULY 2011 (THU)

因為小小豬啲牙仔餅已經食晒,所以今日放工時就路經屈臣氏行入去買啦!

最後就買唔到餅餅,不過就買左一把芝麻街靚遮,大家估吓幾多錢~

登..登..登...登....把遮都只係$15,真係抵到唔識形容,好嘅就係除左平之後,個質料又唔差,加上又足夠輕身,所以真係一個字形容『筍』呀!

不過,唔係間間都有得買,因為糖糖見到都好鐘意,諗住又買返把嘅時候,行過幾間屈臣氏都冇得買呀!


*♡♡小肥豬♡♡* | 17th Jul 2011 | 生活點滴 | (33 Reads)
12 JULY 2011 (TUE)

我係一個寒底嘅人,所以所以涼性嘢我都係唔會食,曾經都試過偷食啲比較涼嘅甜品,食完唔洗十分鐘就會有暈暈地,真係萬試萬靈!

今日小豬媽心血來潮整左個西瓜涼粉,原本我都唔打算食,不過因為我口入面生左兩大粒飛滋,小豬媽就極力游說我食少少,清一清啲熱毒,等啲飛滋快啲好。

開頭我都十萬個不情願,一嚟覺得啲涼粉黑蚊蚊一定唔好食,二嚟真係好怕暈。

不過最後經小豬媽同大肥豬極力引誘之下,咁我又想快啲攪好啲飛滋,加上諗到依家我都係屋企,如果有乜唔對路可以即刻走上床瞓覺,所以就豁出去,試食少少,當然我係多西瓜少涼粉啦!~

哈哈...我咁大個女都係第一次食涼粉,開頭第一啖都覺得麻麻地,不過食落又好似幾好味,我仲好為食咁食左兩碗添(當然係兩細碗啦)。

食完嘅代價就係...真係FEEL到有少少暈,所以就好早走左去瞓啦!

不過間唔中食一次都應該冇乜問題,當清吓熱氣嘛!


*♡♡小肥豬♡♡* | 16th Jul 2011 | 小小豬篇 | (18 Reads)
10 JULY 2011 (SUN)

由於尋日LULU妹同我一齊去海洋公園玩,所以跟左我返我屋企瞓。

今日見天氣又幾好,小小豬個狀態又唔錯,所以我地就一齊落樓下公園仔玩啦!(其實係LULU妹好想同小小豬一齊玩叮噹車同BUBBLES)

我地一落到公園,WARM-UP左一陣,就開始玩BUBBLES啦!依個小小豬真係好似好鐘意咁,仲成日想搵隻手捉啲BUBBLES呀~


當然唔少得我地嘅合照啦~

依個小小豬真係好鐘意睇BUBBLES,我又好鐘意玩BUBBLES,真係好襯嘅兩母子,應該係話貪玩兩母子先真呀..哈哈~

今日有LULU妹係度,所以可以影好多一家三口嘅溫馨照呀~


雖然只係短短半個鐘,又只係樓下嘅公園仔,不過我地都玩得好開心,又可以影左咁多靚相。所以有時都覺得係去邊度玩係唔重要,最重要就係有啲乜人陪伴呀!


*♡♡小肥豬♡♡* | 15th Jul 2011 | 小小豬篇 | (29 Reads)
10 JULY 2011 (SUN)

小小豬又長大多一個月,終於都到左十一個月,個個月都要講依一句「時間真係過的好快」!

依個小小豬個樣真係越嚟越大個仔,好似已經唔似BB啦~

十一個月嘅小小豬就越嚟越頑皮,又唔會坐定定咁,好鐘意自己爬嚟爬去,有時就扶住部車仔嚟周圍行去,探索一吓新事物。間唔中又會做啲好驚嚇嘅動作(例如:要爬上梳化,又或者爬去攪攪陣),有時見到都真係又驚又激氣呀!

不過..小朋友就係咁啦,學小豬爸嗰句:如果佢唔走嚟走去,你仲驚佢有問題啦!

雖然頑皮佢,不過依個小小豬都有好多可愛一面,就正如佢依幾日學識左錫錫,當抱起佢嘅時候,一見到你個咀咀,就會好狼C咁同你濕吻,仲唔只一次,連續咀你幾吓先肯收咀,嗰一刻真係勁冧呀!(依個情況暫只係我同小豬媽身上出現..哈哈)

仲有一次就係我唔舒服食左藥早左瞓,平時好鐘意玩嘅小小豬嗰晚成日都係我床旁邊行嚟行去,仲企定定咁同我講左好多BB話,嗰一刻個感覺真係好似小小豬知道我病左,玩都唔去,走嚟關心我咁呀,真係勁SWEET呀!

仲有一個月就一歲,除左已經PLAN好左點同佢慶祝生日之外,我地仲開始要認真諗諗點可以教好佢,就好似八月尾就開始返PLAYGROUP,係其他嘅時候多啲教佢正確嘅嘢,做錯事時就要打要教,因為唔想小小豬成為港童呀!(某程度上我都係嚴母,不過我咁做都係為小小豬好嘛!)


*♡♡小肥豬♡♡* | 14th Jul 2011 | 好友與我 | (17 Reads)
9 JULY 2011 (SAT)

前幾日睇電視知道海洋公園有夜場優惠,當時我同糖糖都話好想去玩返日,仲打算約埋成班一齊入去玩。

正當我地開始約朋友之際,見到facebook海洋公園個app有優惠,有四個指定日子可以$99入場。嘩..咁抵當然要即刻去玩返,所以我地又好快咁約左今晚入去玩呀!

由於玩夜場關係,我就冇帶埋小小豬一齊去,留低佢地兩父子係屋企搏鬥,我就好自己一個人去玩(哈哈..都係間唔中,相信佢地唔會怪我呀!)

今日我地一行六人(包括:LULU妹、糖糖、糖糖表妹、小肥肥同埋史迪哥哥)入去玩呀,不過因為有幾位唔方便上鏡,所以就唔POST佢地出嚟啦~


還記得對上一次嚟海洋公園係兩年前,當時都有海洋公園AP。不過今次一到,發覺真係好唔同,就係個入場位置都已經好唔同,大左又靚左咁呀~

原本夜場係六點先開始,不過可能開始多人,所以我地五點四十五分左右就可以入場,一入到場就當然不停影相啦~



影影咁,糖糖就話想試吓影飄浮,所以我地又嚟玩吓,又真係幾得意哦~

影完相之後,我地就搭火車上山,去玩新開嘅激流啦。整體上都唔算好多人,我地排左半個鐘都唔洗呀~


開始前~


玩完就濕身啦~

真係勁好玩,我地見唔太多人,所以一次連玩兩次。係第二次玩嘅時候,史迪哥哥仲好好彩咁仲左盤水,由頭濕到落腳,超爆笑呀!

之後我地就玩埋滑浪飛船,好耐都冇玩過啦~


玩完啲遊戲,我地就開始搭返火車落山,準備睇飛龍水花表演。

我地邊行邊影相呀~


落到山見仲有時間,所以就去睇熊貓,只係見到樂樂係度食竹,盈盈就唔見左啦~


夠鐘睇表演,因為太多人加上我地又攰,所以都只係搵到個後排位坐係度睇,所以就影唔到相。雖然坐後左睇得都唔算太清楚,不過整體上都幾好,尤其係個火海,真係好正,值得推介呀!

跟住我地就去左新個海洋館參觀,個館雖然係大左同新啲,不過總係覺得好似冇舊嗰個咁好行呀~


玩到七七八八,我地又去埋啲SHOP搗亂一番呀~


最後係個水池位影埋啲靚夜景~


就係咁,我又玩左一個好開心嘅晚上,相信下次再嚟海洋公園就一定帶埋小小豬,等佢可以見吓啲動物嘛!



*♡♡小肥豬♡♡* | 13th Jul 2011 | 生活點滴 | (16 Reads)
9 JULY 2011 (SAT)

係小小豬三個月嘅時候,小豬媽托朋友整左個I-phone電話殼俾我。

雖然係依幾個月都買左幾個殼,不過都實在太唔捨得放棄小小豬,所以就由嗰時開始就用小小豬嘅電話殼至今。不過由今日開始,我就可以換啦!

因為上個月見到有某個團購網有得訂,我見小小豬舊嗰個殼都用左有一段時間,個樣都大個仔左好多。再加上都只係幾十蚊,見幾抵咁,所以同小豬媽一人訂左一個。

等左兩個幾星期,終於今日收到啦!依個就係我嘅~


依個就係小豬媽嘅~


哈哈...我地都咁愛小小豬,當然要搵佢嚟做主角,日日帶係身嘛!


*♡♡小肥豬♡♡* | 12th Jul 2011 | 靚太廚房 | (70 Reads)

8 JULY 2011 (FRI)

早前接受成為家樂牌榮譽Blog友之後,家樂牌市務部場策劃部公關小姐係上星期打電話通知我,話有一個『星級家廚大招募』鼓勵我去參加。

其實我都有一段時間冇入過廚房,加上我煮嚟煮去都係嗰幾款餸,所以我都冇謂去獻醜。

做得榮譽Blog友當然要支持一吓,不過依個任務就交俾小豬媽,因為講到煮餸,小豬媽就叻我好多好多嘛!

經過小豬媽嘅一番心思,終於就完成左一個好啱夏天嘅醒胃之選 - 菠蘿豬頸肉,去參加比賽啦~

哈哈....唔知有冇機會會勝出呢?

醒胃之選 - 菠蘿豬頸肉

材料:
1. 豬頸肉 一塊
2. 新鮮菠蘿 四片
3. 青紅椒 各一隻
4. 薑 兩片

調味料:
1. 家樂牌雞粉 1茶匙
2. 家樂牌鷹栗粉 1茶匙
3. 麻油 少許
4. 老抽 2茶匙

做法:
1. 先將豬頸肉加入醃料醃二十分鐘
2. 菠蘿及青紅椒切粒備用
3. 熱鑊加少許油,落薑片炒勻,加入豬頸肉及家樂牌雞粉炒至轉色,蓋上鑊蓋焗五分鐘,然後加入青紅椒略炒,最後加入菠蘿快手炒幾下,埋獻生粉水即成。

大家都可以一齊參加『星級家廚大招募』,只要將你上傳自家食譜,就有機會成為星級廚神可獨得$10,000獎金,有興趣可以睇睇以下網址:

http://www.knorrtips.com/starchef.php


Next