香港新浪網 MySinaBlog
*♡♡小肥豬♡♡* | 30th May 2011 | 小小豬篇 | (22 Reads)

28 MAY 2011 (SAT)

今日放假兼有個好天氣,當然唔好放過,要帶小小豬去吓街街,吸收吓陽光先啦。我地近近地去左九龍公園行吓,影吓相啦!

還記得對上一次嚟九龍公園時係星期日,勁多菲傭姐姐,差啲以為自己唔係香港。不過今日係星期六,公園入面真係唔多人,所以都真係幾好行,加上個天氣又幾好,有太陽得嚟又唔太熱,所以都OK幾舒服呀!

我地一入到公園,先俾小小豬WARM-UP吓先,俾佢企定定睇啲紅鶴。依個小小豬真係好留心咁睇呀(雖然唔知佢係唔係識睇,不過真係企到好定咁呀)~

 

跟住我地就周圍行,行吓又住吓咁~

 

之後就去左個公園仔,我地仲教小小豬玩滑梯添~

 

玩到係時間飲奶奶,原本我地打算去九龍公園入面嗰個探知館嗰度個OUTDOOR地方餵奶,不過當我地行到入探知館時,當我去完洗手間之後,佢地就有個職員行過嚟主動開個嬰兒房俾我地用,個嬰兒房又夠大又有齊各項設備方便換片片同飲奶,最好就係有埋冷氣嘛,我地係入面都過左差唔多大半個鐘呀~


 

飲飽奶奶嘅小小豬特別醒目,所以我地係個探知館OUTDOOR影左好多相,好多張都勁鐘意呀~


今日雖然只係去左一個好簡單嘅地方,不過我都已經好開心,可以一家三口周圍行吓,我都已經好滿足啦!

但我有一個問題,點解依家啲公園係冇鞦韆,我都帶小小豬去過幾個公園,都唔覺有鞦韆。係乜問題呢?唔通覺得有危險所以唔再有得玩?我都真係有啲想帶小小豬去玩,如果大家見到九龍區邊度有,記得通知我呀!

睇返今日影嘅相,我真係覺得小小豬越嚟越大個仔,尤其係著依啲兩件頭衫時,真係覺得佢係一個可愛嘅小朋友呀!


*♡♡小肥豬♡♡* | 29th May 2011 | 生活點滴 | (24 Reads)

27 MAY 2011 (FRI)

上星期五同糖糖食飯嘅時間,佢不停咁介紹佢買左一盒『我的美麗日記~甜蜜午茶迷你組』,佢對支PEELING簡直係有讚冇彈(唔係佢講我都唔知我的美麗日記有出洗面嘢添),見佢講都咁好用,攪到我都心郁郁去左買盒嚟試用呀~

$39.9有兩塊MASK同兩支洗面SAMPLE,都真係幾抵呀~

 

包裝盒上的產品簡介~

原本都打算即刻開嚟用,不過自己又唔係好舒服,所以冇心機扮靚,所以買左之後就等到今日先試(我真係一名懶女人嚟呀...哈哈)!

首先用支洗面膏加少少水攪到起泡洗面,個感覺都幾爽唔笠。之後就用支泡泡去角質,真係好似糖糖咁講,一吱出泥就好似蛋糕CREAM,之後當PEELING嚟摔,過水嘅時候真係冇一條條摔完既污物黏著塊面,塊面完全乾淨呀!

之後我就FULL左塊黑松朱古力MASK, FULL完我冇用洗水,只係按摩咁等皮膚吸收埋啲精華,之後唔洗塗面霜,塊面潤得嚟又唔笠呀!今

次糖糖真係冇介紹錯,等我用多幾次之後睇吓皮膚有冇敏感先,如果可以的話,都可以考慮轉用依隻洗面產品呀!


*♡♡小肥豬♡♡* | 28th May 2011 | 小小豬篇 | (20 Reads)

26 MAY 2011 (THU)

早係大半個月前都已經FELL到小小豬下額的一隻牙仔出緊嚟,不過當時都係冇乜嘢睇,所以冇同大家分享依個喜訊。

係上星期又發現下額第二隻牙仔都開始出嚟,成日都好想影低佢,不過次次一拎起相機,小小豬就緊閉個口,所以一直到冇機會。

今日睇見佢兩隻牙仔真係好明顯左好多,剛好小豬媽同小小豬玩得咔咔大笑,所以我地就合力影低左佢對牙毛仔啦~

哈哈...真係見得好清楚呀!睇見佢對牙毛仔,真係感覺到小小豬開始大個啦!

不過唔知點解佢依幾日流口水嘅情況真係勁嚴重,唔洗個幾鐘佢條口水肩都已經係全濕,一日可以換成十幾條,真係有啲嚇人呀!

之後係準備出下額兩隻牙仔時都曾經出現過依個情況,今次再係咁,唔知係唔係準備出上面嗰對呢?好驚張,真係要密切留意下先得啦!

 


*♡♡小肥豬♡♡* | 27th May 2011 | 小小豬篇 | (13 Reads)

24 MAY 2011 (TUE)

今日小豬媽同小豬爸見天氣都好好,所以就帶埋小小豬一齊去街市買餸,等小小豬唔洗成日困係屋企,俾佢見多啲人同物,對學習都有啲幫助。

小小豬都唔係第一次去街市買餸,不過今日小小豬就做左一件好乖乖嘅事,就係當買完餸之後,小小豬就幫手拎住包餸~

小小豬真係拎得好實,兩隻手仔一齊捉住呀~

嗰包餸其他係一斤重嘅冬菇,所以都有一定重量,佢地由西灣河行返屋企,全程小小豬都係拎到實一實,真係要俾個叻叻佢呀...哈哈!


*♡♡小肥豬♡♡* | 26th May 2011 | 小小豬篇 | (19 Reads)

24 MAY 2011 (TUE)

繼早前買左一套米老鼠嘅親子裝打算下次入迪迪尼時著,我地今日又嚟多一套CLOLUR SHAPE啲嘅親子裝啦~

依套親子裝其實係為我為左去影樓影相而準備,原來都打算著米老鼠親子裝去影相,不過有睇過佢地嘅相,見有啲背景都係白色,而我地套又係白色,怕撞左色影出嚟會唔靚,所以就去搵過另外一套,準備到時著啦!

雖然依套都係淘淘買,不過個質地都尚算幾好,都係棉質嚟,小小豬著住都OK。

雖然就好似單調左少少,不過套衫咁COLOURFUL,到時應該都會影出嚟會好睇掛,不過都仲有時間,下個月中先去影,所以我都仲有時間慢慢去睇吓有冇啲更加靚或者特別嘅親子裝先得。


*♡♡小肥豬♡♡* | 25th May 2011 | 小小豬篇 | (23 Reads)

23 MAY 2011 (MON)

今日婆婆又買左一份大玩具俾小小豬,就係依一部好靚嘅車車啦~

係婆婆清潔緊部車仔時,依個小小豬一見到部車仔時,佢對眼好似發左光咁望到實一實,好似知道一定係俾佢玩咁,真係好攪笑呀!

清潔好晒之後,我地就開始放小小豬落去玩,唔知係剛剛瞓醒定有少少驚,開始佢成日都好想捉住我地,又好似想落車咁~

不過之後我扶住佢行左一陣車,佢就開始鐘意部車車,仲唔肯落車添~

依個真係傻豬仔,調轉頭玩都一樣咁開心~

依款車車小小豬都係第一次玩,我地都冇正式教佢點玩,就已經識得自己向前行。雖然係姨姨用左個包包嚟引佢,不過都已經算叻叻呀~

暫時嚟睇依部車仔都算大左少少,隻腳仔仲唔完全到地下,不過我地小心啲陪佢玩,一定唔會有問題呀!

哈哈...依部車車主要都係打算同小小豬落公園時玩,今日見佢玩得咁開心,相信去到公園一定會仲開心呀,真係好想快啲星期日可以落公園玩呀(當然要等太陽伯伯開工先啦)!


*♡♡小肥豬♡♡* | 24th May 2011 | 小小豬篇 | (12 Reads)

21 MAY 2011 (SAT)

今日大肥豬話我知佢幫仔仔做左一件好事,就係幫佢參加左一個慈善攝影比賽「第三屆Canon x 聖基道全港精靈BB選舉大賽」,我地捐少少錢可以做善事之餘,如果勝出嘅話就會有豐富禮物,同埋相片更會刊印在2012年BB慈善掛曆,以及有機會刊印在聖基道兒童院及Canon的宣傳品上。

所以我、大肥豬同小豬媽都分別搵左張相去參加比賽。其他都係志在參予吓,當為小小豬做慈事啦!

我都知道大獎係唔會有我份,不過佢地仲有一個網上投票嘅人氣獎,我諗依個都可以有少少機會掛,所以我就想係依度拉吓票,等大家投下係地神聖一票呀!

依張就係大肥豬就揀嘅得戚食餅餅樣~


http://bbphoto.skhsch.org.hk/vote_form.php?RegistrationBabyPhotoID=1144

我就係揀左小小豬依個古靈精怪攪笑樣~


http://bbphoto.skhsch.org.hk/vote_form.php?RegistrationBabyPhotoID=1189

小豬媽就利害啦...佢揀左張好激出浴照(不過冇三點睇呀..哈哈)~


http://bbphoto.skhsch.org.hk/vote_form.php?RegistrationBabyPhotoID=1188

每個人都可以係不同相片投票一次,所以大家都可以分別係依三張相投票呀!

投票方法好簡單,先按下相片下的LINK,之後就依照資料填寫,之後按投票~


填妥資料之後就出現此畫面~


之後要去返自己個E-MAIL,點擊佢地提供嘅連結,咁先確定到個投票~

出現以下版面就即係完成晒所有程序啦~

雖然程序多左少少,不過相信大家係唔會介意,會嚟支持小小豬呀!


*♡♡小肥豬♡♡* | 23rd May 2011 | 小小豬篇 | (13 Reads)

20 MAY 2011 (FRI)

今日返屋企時又俾管理員叫住,原來因為我有份小郵包,想叫停我簽收呀!

一拆開個小郵包,原來係CARMEN送俾小小豬嘅兩套靚衫仔呀~

 

其中紫色嗰套我上次SHOPPING時都已經睇中左,不過冇小小豬個碼先冇買左,CARMEN真知我心意...哈哈!『CARMEN:星星款都係我杯茶嚟呀!』

小小豬又有新衫著,我又可以慳返啲啲啦...呵呵呵!

CARMEN真係好鍚小小豬,成日都買小禮物俾佢豬,攪到我都唔係幾好意思添,所以遲啲嘅生日飯,一定要叫小小豬請CARMEN姐姐食飯先得呀!


*♡♡小肥豬♡♡* | 22nd May 2011 | 小小豬篇 | (184 Reads)

20 MAY 2011 (FRI)

係小小豬細細個嘅時候都買過一張COMBI HIGH CHAIR,隨著方便小豬媽用嚟照顧小小豬,所以張HIGH CHAIR已經過左小豬媽屋企。

之前都冇諗過要係自己屋企都買張HIGH CHAIR,因為小小豬多數時間都係小豬媽屋企嘛。但依家我地多數俾小小豬坐係張HIGH CHAIR度食粥粥同睇電視。

係我地自己屋企冇HIGH CHAIR就真係好唔方便,所以經我地認真諗過,都係決定買多一張HIGH CHAIR放係自己屋企。(邊個叫小小豬有兩頭住家,真係唔慳得依啲錢呀!)

我行都去過吉吉島、荷花嗰啲睇過,如果普通唔洗瞓嗰啲款一係就好貴,平嗰啲又好唔靚,最後有朋友叫我係YAHOO拍賣場睇吓,睇左好耐,又考慮左好耐,終於都決定買左依一張HIGH CHAIR啦~

 

整體上張HIGH CHAIR都幾好,不過好明顯個圖案同我係網上睇係唔同,再加上佢地個售後服務就真係勁差,要俾一百個差佢呀!

事緣我係上星期五已經過左數俾佢,仲SEND埋E-MAIL俾佢留低聯絡電話俾佢,點知等到星期日都仍然未收到佢嘅來電,咁我就依照拍賣場所提供嘅電話打俾佢,點知打左成日都冇人聽,最後我係星期一下午就收到佢係拍賣場俾我一個好評短訊。

跟住我即刻打電話俾佢問啦,今次終於有位男仕聽,我再向佢問清楚有關送貨細節啦,佢就話已經安排左星期四送貨,到時下午送貨公司就會再打俾我地確定個時間,叫我到時等送貨公司電話啦!

係依個時候我都真係嬲嬲地,乜佢唔係應該問左我幾時OK先安排送貨?佢又知我屋企嗰日有人收貨?不過都算啦,叫自己唔好激氣,總之張星期四可以收到貨就算,我地自己就時間啦。

咁星期四我就叫大肥豬留意個電話,約好個送貨公司等收貨。點知等到六點幾都仲未收到任何電話,我見都好似唔係好對路,所以就打番電話去賣椅嗰位男仕問清楚,點知佢一句答我:我已經交左俾運輸送貨,我都唔知乜問題,你等佢地聯絡你啦,如果七點後都冇,就要應該要明天先到啦!

聽完之後真係勁嬲,點解佢咁不負責任,張椅係我同佢買,佢係唔係都應該幫我跟進一吓呢,唔係將個責任交俾個運輸公司。

雖然張HIGH-CHAIR終於都係今日收到,不過都真係極度不滿依間公司囉,相信我之後唔會再幫襯佢呀!(真係唔明白點解佢係YAHOO拍賣場可以咁高評分呀)

講真,我都好少係BLOG度寫啲負面嘢,不過佢真係激到我成肚都係氣,要發洩吓先得呀!

雖然佢係衰,不過如果係度公開佢個名,好似唔係咁好,俗語都有話『斷人衣食、尤如殺人父母』,所以如果大家想知係邊間公司,可以留言問我呀。


*♡♡小肥豬♡♡* | 21st May 2011 | 小小豬篇 | (15 Reads)

19 MAY 2011 (THU)

食左三日藥,雖然小小豬都應該好返晒,只係仲有啲鼻水同咳,不過因為之前醫生開左啲坑生素關係,所以今日又要去旺角霍醫生度覆診啦!

一上到醫務所放抵條揹帶,依個小小豬又開始展示佢個曳樣,係張椅上周圍行(好在當時診所都冇乜人,如果唔係就失禮晒呀),睇見佢個樣就知佢冇事啦~

仲學人整個惡樣出嚟添~

霍醫生話仔仔個康復程度都幾好,今次又係有四支藥水,不過醫生轉左兩種藥,相信都為收鼻同化痰,另外仲開多三日抗生素,成晒成個療程就應該OK,唔洗再返去覆診。

唔知係唔係食左成個星期藥,攪到啲便便好差,醫生叫我地俾西梅汁小小豬飲,所以即刻落萬寧買左依一隻啦(不過真係幾貴...依六支嘢要五十幾蚊呀)~

我都唔知依隻好唔好,不過見佢牌子係GERBER,應該都OK。(或者有冇朋友仔可以介紹一吓好嘅西梅汁俾我呢?)

希望食埋今次啲藥,又飲完西梅汁,小小豬真係可以完全冇事啦!


*♡♡小肥豬♡♡* | 20th May 2011 | 小小豬篇 | (22 Reads)

18 MAY 2011 (WED)

我地準備係端午節帶小小豬去游吓龍舟水,所以就買左件小蜜蜂泳衣仔,等小小豬游水時有得著。

之後經朋友仔提醒,原來我都未買水泡仔,所以就開始睇吓搵個靚款,襯留件小蜜蜂泳衣。

我都有去SHOPPING時睇過啲款,貴得嚟個款又真係好麻麻,所以最後都未買到。

剛好前排睇BABY KINDOM嘅時候,見有個媽媽介紹左佢係淘寶買左嘅戰利品,我見佢有一個麵包超人嘅船仔都好得意,所以我又淘左一個俾小小豬啦!

今日收到貨,個船仔又真係幾靚,既得意又夠色彩,只係對小小豬嚟講就大隻左少少,不過相信我地陪住佢玩,係唔會有問題呀~

 

除左淘左隻船仔之外,我仲淘左一套玩沙嘅玩具,依套真係勁抵,十六蚊人仔就有咁大個,個質素都唔係差,係香港又點得呀~

 

哈哈....依家買齊晒啲嘢,只係等待端午節嘅來臨,希望到時天氣好,小小豬又冇病冇痛,咁就可以俾玩個痛快啦!


*♡♡小肥豬♡♡* | 19th May 2011 | 小小豬篇 | (16 Reads)

18 MAY 2011 (WED)

之前話過唔會再係FACEBOOK玩鬥多LIKE嘅遊戲,因為知道根本我係冇機會贏到嘛!

不過係FRISO 見有個叫「Friso 130年傳承信賴家庭照大募集」,除左有一名係最多LIKE勝出之外,佢地仲會選出130名BB相做六月之星,張相可以放係「美素佳兒寶寶用品旗艦店」。

剛好知道有比賽嗰日又幫小小豬試著件小蜜蜂泳衣影左幾張得意相,所以就貪得意拎左依張相去比賽~

 

其實都知唔會贏,所以冇係度同大家拉票。我都只係睇吓有冇機會入到130名。

今日公佈個結果,係1000多名參加者中,小小豬竟然入到130,真係超開心呀~

雖然就冇禮物,不過小小豬張可愛相可以由六月一號開始SHOW係「美素佳兒寶寶用品旗艦店」,為期一個月,都幾好呀!

不過間旗艦店係荃灣愉景新城屈臣氏入面,對我嚟講就好似遠左少少。唔知有冇機會帶小小豬去影番張相留念呢?

如果大家行街街時見路經荃灣愉景新城屈臣氏,又見到小小豬的話,麻煩你地幫我影低佢呀...唔該晒....哈哈!


*♡♡小肥豬♡♡* | 18th May 2011 | 小小豬篇 | (21 Reads)

18 MAY 2011 (WED)

食左兩日藥,小小豬都叫做好左啲,流鼻水同咳嘅情況都大有改善,只係仲有少少,應該可以好快好返啦!

昨晚依照各朋友仔嘅方法,搵厚嘢墊高個枕頭位置,小小豬又瞓得幾好,只係半晚醒個三次左右,好快又可以槑返佢瞓,比起前兩日都叫做好左好多,令我都有番小小好覺瞓呀!

依個剛病好嘅小小豬,一有返少少精神就嚟頑皮,成晚都要扶住張HIGH-CHAIR企係度,仲推嚟推去咁,真係激C我。不過見佢都識曳,咁都安心好多啦~

 

食完藥嘅小朋友應該係好攰成日瞓,不過唔知點解依個小小豬次次食完藥之後都唔願瞓,仲精神過我添,真係有理由相信醫生係開左啲興奮劑俾佢,等佢情緒咁高漲呀..哈哈(當然我係講笑啦)!


*♡♡小肥豬♡♡* | 17th May 2011 | 小小豬篇 | (35 Reads)

16 MAY 2011 (MON)

尋日成個早上小小豬都冇再發燒,仲以KEEP住食化痰止咳藥就會冇事好快好返。

點知到左下午二點幾,小小豬又開始燒返,仲不停咁流鼻水同打乞嚏,個心情又低到落低。因為去醫院睇醫生時冇流鼻水, 所以醫生係冇開鼻水藥俾我地 。 病左嘅小小豬又特別『痴』我,所以唯有不停咁抱佢,等佢有安全感,可以安心咁睡,訓醒就會冇咁辛苦啦!

夜晚我地返到小豬媽屋企之後,小小豬都仲識得玩,又識笑,只係仲有鼻水,我地都以為好左好多。

點知,一到左夜晚十一點幾,小小豬就喊醒,仲不停咁喊,就係算我或者係小豬媽槑都唔得,仍然係好辛苦咁喊唔停。

小豬媽話小小豬係因為啲鼻水同痰困住,所以呼吸得唔暢服,所以就不過咁喊。

依一刻我個心都真係實晒,點解小小豬會攪成咁,係唔係我照顧得佢唔好,真係寧願有病嗰個係我。 為左等小小豬可以好訓啲,所以我成晚都抱住佢嚟訓,等佢可以訓直個人仔,咁呼吸就會暢服。

成晚都抱住小小豬訓,加上前一晚又要去醫院睇醫生,所以都真係又攰又眼訓,不過我點辛苦都唔及病左啲小小豬,所以依一刻我真係只希望小小豬可以快啲好。

今朝早上見小小豬仲係一個病樣,仍然鼻水不停,真係十萬個唔願意返工,好想留係屋企照顧小小豬,不過為左個飯碗,所以就將照顧小小豬個任務交俾小豬媽 (其實有小豬媽係度,我都算放心,不過總係心掛掛呀)。

原本都打算帶小小豬去柴灣睇開嗰個醫生再睇多一次,不過嗰位醫生又放假,真係激C我呀!最後小豬媽就帶左小小豬去睇旺角霍醫生,雖然係遠左啲,不過始終佢都係兒科醫生,同埋上次睇過都OK。

霍醫生都話小小豬係感冒同埋喉嚨發炎,開左三日藥~

食左兩次藥,小小豬都好似好左啲,起碼流鼻水同咳嘅情況有所改善,不過食左啲藥就好散,吽吽哣哣咁,希望食完真係會好快好返啦!


*♡♡小肥豬♡♡* | 16th May 2011 | 小小豬篇 | (42 Reads)

15 MAY 2011 (SUN)

去完街街返到屋企仲係好精神,如常地繼續洗白白、飲奶奶同覺覺豬。

點知到左半夜小小豬開始好反訓,所以大肥豬就由BB床抱左上嚟同我地一齊晒,諗住咁會好啲。

點知訓訓吓,我就感覺到小小豬成身都好似發滾咁,個人又忟忟憎憎,見唔對所以就幫佢探吓熱,點知..原來小小豬發燒,真係嚇C我,發燒依家嘢都真係可大可少,又怕佢會燒壞個腦,所以我地唯有半夜三點鐘飛的士去九龍城法國醫院睇醫生啦~

 

我地去到醫院,剛好個夜診醫生又去左巡房,所以都等左半個鐘先有得睇,睇吓個豬仔個辛苦樣,真係肉到赤晒。好在佢都仲識笑,所以心情都未致去到谷底~

 

醫生話小小豬係感冒所以喉嚨發炎導致發燒,安排姑娘幫小小豬塞PATPAT,之後又俾左啲退燒藥同化痰止咳藥俾我地。

可能係塞左PATPAT關係,所以小小豬返到屋企都已經退左燒,雖然都係係訓得唔好,不過見佢冇發燒我都已經安心左啲啦。

一見小小豬個辛苦樣,我都攪到六神冇主,真係唔好再俾依啲驚嚇我啦!


*♡♡小肥豬♡♡* | 14th May 2011 | 小小豬篇 | (67 Reads)

14 MAY 2011 (SAT)

由於大肥豬公司係同一時間都有好幾位BB嘅出生,所以就約埋一齊聚吓,等啲BB可以一齊玩,所以就約左今日上大肥豬其中一位同事屋企玩啦!

今日我地都三個小BB(一個係同小小豬差一日出世,另一個就六個月)同一個大BB(二十個月),仲有十個大朋友,所以都幾熱鬧。

大家都主要係同啲BB玩吓影相,所以都幾開心(因為我地冇帶大機去,用傻瓜影左嘅相好多都唔對焦,加上又唔方便同大家分享其他同事嘅BB,所以唔放上嚟啦)。不過原本我地嘅係主要等BB們互動一齊玩,但唔知點解佢地玩左一陣(真係一陣),之後就各自拎住自己鐘意嘅玩具各有各玩。

我個小小豬仲因為扭眼訓,所以活動量大減,仲不時發出忟憎聲音(好在都唔算大聲),真係失禮晒呀! 雖然扭眼訓,不過眼見咁多玩具,小小豬又點肯訓呢,佢對部學步車真係情有獨中,坐係車仔上面幾開心~

見小小豬玩得咁開心,我都有啲心思思想買部俾小小豬玩呀!

今日真係好多謝大肥豬同事嘅款待,另外幾位嘅BB都好可愛,不過如果佢地可以多啲互動,相信會更加開心呀!

不過經過今日活動,我發覺小小豬係好似怕人多地方,一去到唔熟悉嘅地方,就會細膽起上嚟,好似怕怕羞咁,所以都真係要開始諗吓點解決依個問題,或者真係要認真考慮帶佢去PLAYGROUP,等佢同多啲朋友仔玩先得啦!


*♡♡小肥豬♡♡* | 13th May 2011 | 小小豬篇 | (16 Reads)

12 MAY 2011 (THU)

小小豬都九個月大,開始要俾多啲益智嘅玩具俾佢,等佢訓練一吓,所以我就買左個彩虹圈,等佢可以訓練吓手仔~

洗乾淨咁之後就開始教小小豬玩,點知佢唔係玩,當左啲圈圈係冬甩咁咬,真係笑C人啦~


仲當係電話添~

哈哈...依個小小豬又嚟CHOK樣啦~

最後又嚟返個可愛BB樣啦~

始終小小豬都係第一次,所以都慢慢嚟啦,只要教佢多幾次,相信好快就識玩呀!


*♡♡小肥豬♡♡* | 12th May 2011 | 小小豬篇 | (15 Reads)

10 MAY 2011 (TUE)

今日係假期,又係小小豬九個月大嘅好日子,所以我地就帶左小小豬做啲新鮮事,就係去公園仔玩啦!

其實之前我地都帶過小小豬去屋企樓下個小公園,但當時主要都係等小小豬曬吓太陽,同埋等佢見吓啲小朋友玩。

今次我地見小小豬大個仔啲啲,所以俾佢係公園仔入面玩吓!

可能係第一次真真正正入埋去玩,所以小小豬有啲好奇又驚張,所以全程都冇乜笑容,不過就成日都望住周圍玩緊嘅小朋友~

係回程時先識得做啲古怪樣,真係激氣呀~

算啦...始終小小豬都仲係得九個月人仔,可能對新事物都慢熱啲。慢慢嚟啦,好快佢就可以好似公園內嘅小朋友咁走嚟走去,好開心咁玩呀!

睇佢今日嘅表現,我都決定左多啲帶佢去公園玩,等佢見識多啲,咁就可以做個大膽嘅小小豬啦!


*♡♡小肥豬♡♡* | 10th May 2011 | 小小豬篇 | (33 Reads)

10 MAY 2011 (TUE)

小小豬又大多左一個月,今日就係九個月人仔啦!睇吓佢依一身嘅打扮,幾似女仔...哈哈哈~

 

係過去依一個月真係覺得小小豬大左好多,個樣醒目左就唔洗講(又讚自己個仔..哈哈),仲識得自己係床仔扶住起身,之後扶住床欄由床頭行到床尾,再嚟又識得拜拜手(我地冇刻意教,可能係睇DVD學到啦!),真係好似學識好多嘢,但就仲未識得爬爬,只係可以慢慢一步步咁爬,爬幾步跌低。

不過我都唔擔心,因為學習係要慢慢嚟唔可以心急嘛,總有一日係會識爬爬呀!(其實唔咁快都好,因為一識爬爬,就會通屋爬,到時好似看牛仔咁睇實,仲辛苦呀!哈哈哈~)

牙仔方面,到依家九個月都仲未有一隻睇吓,只係牙肉中隱約見到有小小白色,相信係開始爆緊出嚟。好多人都話牙仔越遲出對父母就越好,所以我都心急,慢慢出啲靚牙仔啦!

不過唔知係唔係因為出牙仔關係,小小豬依排都好忟憎,又成日扭計,仲會發脾氣添,見到咁都真係好激氣又嬲。

一見佢發脾氣或者做啲曳曳嘢,我就會打佢手仔或者PAT PAT(當然唔係好大力啦)。因為佢依家開始懂事,唔可以一發脾氣就讓佢,要開始教佢乜好唔啱,所以我唔忍心都要打一吓,等佢知道咁係錯唔可以再係咁。

雖然都真係好肉赤,不過為左教好小小豬,狠心啲都要啦!

當然小小豬都只係間唔中曳曳,好多時都係一個好乖乖,好識得逗我地開心,一見佢個招牌『月亮眼』,真係即刻暈晒浪呀!


*♡♡小肥豬♡♡* | 9th May 2011 | 生活點滴 | (25 Reads)

9 MAY 2011 (MON)

我依個厚厚嘅短髮一長左之後,就開始好難打理,加上我又唔識吹靚佢,所以就攪到成個波波頭,好醜樣呀!

雖然我都好想留番長把頭髮,不過每次去到依個情況都忍受唔到。今次都唔例外,所以最終都係決定剪吓佢。

今日放工去平時幫我剪頭髮位姐姐,主要都係打算修吓佢。我同髮型師姐姐講話想剪左頸對上啲頭髮同埋修番靚個型,點知...最後佢就幫我剪成咁啦~

嘩...剪到咁短,返屋企小小豬會唔會唔認得我呀!

我都係第一次剪到咁短,講真...真係有好唔鐘意,因為個髮型勁男仔頭,又影到我塊面勁肥,我下個月就要同小小豬去影家庭照,咁嘅髮型又點會影得好哦,真係十萬個唔開心,好想買個假髮戴住呀!

不過唔剪都剪左,唯有同阿Q啲自己講,剪短左清爽啲,又細路女啲,都幾好呀!

依家唯有等啲頭髮快啲長,唔知大家有冇好方法可以介紹啲俾我,等我可以快啲變返好啲呀!


Next