香港新浪網 MySinaBlog
*♡♡小肥豬♡♡* | 30th Mar 2011 | 小小豬篇 | (19 Reads)

26 MARCH 2011 (SAT)

今日我地一家落街食完早餐返屋企嘅時候,俾屋企個管理員叫住,話我地有份包裹未拎。

開頭都諗係啲乜包裹,一睇之弄下,原來係CARMEN姐姐送嚟嘅包裹,係好靚嘅衫仔嚟呀~

兩件衫仔都好得意,尤其係件THOMAS衫仔真係好攪笑。今個暑假我地就應該開展我地嘅迪迪尼之旅,到時如果有機會就著住依件衫仔,約埋CARMEN姐姐一齊去玩呀!

最後真係要多謝CARMEN姐姐,佢真係好錫小小豬成日都送啲驚喜禮物呀!

 


*♡♡小肥豬♡♡* | 27th Mar 2011 | 小小豬篇 | (40 Reads)

22 MARCH 2011 (TUE)

早係一月時,因為小小豬嘅濕疹好嚴重,所以就經醫生建議之下,轉飲左能恩1號。飲左都有三個幾月,小小豬嘅情況都尚叫做有好轉,起碼唔再係嚴重到成塊面都又紅又腫咁肉痛呀!

雖然係有好轉,不過都唔係完全好番,間唔中某啲位置就會紅腫,尤其係咀角,加埋小小豬嘅強勁口水,可以話由新年到依個都仍然有個紅印,好似個鬍鬚佬咁。

依幾日個身又開始出疹疹,成個身都好多紅粒粒,摸落又好鞋手,真係睇見到好肉赤。記得醫生話過,如果低敏嘅能恩1都唔得,就要轉飲豆奶。

已經問左醫生,佢話豆奶都有足夠營養俾BB,但總係覺得豆奶好似營養冇咁好。雖然我都一萬個唔想,不過希望啲濕疹可以斷尾,所以最後我都決定轉飲豆奶~

 

其實真係唔知係邊方面問題,究竟係奶嘅問題定係天氣影響,還時我地對小小豬有啲乜係疏忽左?

有時我會好自責地諗,係唔係我陀住小小豬時食左啲唔好嘅嘢令到小小豬係我肚入面已經有濕疹?係唔係我遺傳左啲差皮膚俾佢?真係寧願有濕疹嗰個係我,咁小小豬就唔洗成日都忟忟憎憎,訓覺又訓得唔好辛苦咁啦!

依家只希望真係奶粉問題,轉飲左豆奶之後真係有改善啦!


*♡♡小肥豬♡♡* | 25th Mar 2011 | 小小豬篇 | (29 Reads)

22 MARCH 2011 (TUE)

早前同大家講小小豬所參加嘅「Huggies BB四圍走」係銅鑼灣時代廣場對出的電車站有一個大型廣告牌,請大家去搵吓小小豬嘅蹤影。

雖然我前日都出過銅鑼灣,不過就因為帶住小小豬,加上又係剛剛放工時間,成個電車站都係人,所以就唔方便帶埋小小豬入車站影,就係咁我放棄左個機會啦!

不過.....因為今日收到BLOG友仔幸福小郭王話我知,佢有去到電車站搵小小豬,仲幫我影左幾張相送依個驚喜俾我呀~

嘩....真係好感動,估唔到真係有朋友為左小小豬已幫我去影呀,所以真係要再一次講聲THANK YOU先得啦!

係今個星期六開始,個廣告版就會係銅鑼灣地鐵站向時代廣場個隧道出現,嗰度地方好好多,所以如果時間就到我一定會帶小小豬去影返張先得呀!

當然....如果大家有時間,都可以去幫我影低佢呀,等我留個紀錄嘛....哈哈!


*♡♡小肥豬♡♡* | 24th Mar 2011 | 小小豬篇 | (11 Reads)

21 MARCH 2011 (MON)

今日我又幫小小豬收到一份禮物,依個小小豬真係幸福,有咁多人錫,成日都有禮物收,就連我依個媽咪都好羨慕呀...哈哈哈!

之前朋友仔送嘅禮物,都係由我地幫佢拆包裝,今日當我俾份禮物小小豬睇時,佢就好興奮咁望實份禮物,所以就決定係我地嘅教導吓,俾佢自己拆左份禮物啦!

成個拆嘅過程好似係鐘意張花紙多過個玩具,乜都鐘意放入口,就連花紙都唔放過,拆左少少就放入口,真係俾依個豬豬激親呀~

哈哈...依個音樂波波小小豬都不知幾鐘意, 可能係一按鈕就會出音樂,所以特別吸引注意,睇嚟依個貪新鮮嘅小小豬依排又會轉換好朋友啦!

*♡♡小肥豬♡♡* | 23rd Mar 2011 | 小小豬篇 | (16 Reads)
20 MARCH 2011 (SUN)

唔知點解依排小小豬鬧情緒,間唔中就忟憎扭計,成日又傻傻地係度自己玩,我地引佢又或者同佢玩都係好勉強咁笑少少,都真係有少少擔心。

不過,今日係臨訓嘅時候,LULU妹入房同小小豬SAY GOODNIGHT嘅時候,小小豬突然間係度傻笑,仲笑到咔咔聲,真係勁攪笑呀~

見到小小豬笑得咁開心,我嘅擔心真係即刻冇晒,就連自己都開心晒呀!

 

 


*♡♡小肥豬♡♡* | 22nd Mar 2011 | 生活點滴 | (24 Reads)
19 MARCH 2011 (SAT)

哈哈哈...今日真係一個好特別嘅日子,就係我同大肥豬嘅拍拖十二周年紀念,不過剛好撞著今日要返工,再加上又係食素,所以我地都冇乜特別慶祝,一家三口留係屋企食飯睇電視,不過咁都唔會唔開心,因為有大肥豬同小小豬係我身邊,我都已經好滿足!

除左拍拖紀念日之外,今日都有另一件事發生,就係我個租左嗰格仔小鋪今日到期我都唔再租啦~

哈哈哈...做左格仔三個月,原本都想繼續做,不過依幾個月真係唔係好得,所以都係放棄啦!

都叫做做個吓老板仔,雖然都有係蝕錢收場,仲攪到屋企好多貨,不過依個都係一個好好嘅經驗,睇貨...入貨...計成本...諗擺位...仲有睇吓賣唔賣得出,都好多嘢要做,好多嘢煩。

我只係一個小格都咁多嘢做,所以真係覺得開一大間鋪嘅人係好叻叻呀!


*♡♡小肥豬♡♡* | 21st Mar 2011 | 小小豬篇 | (16 Reads)
16 MARCH 2011 (WED)

自小小豬擁有部烈火戰車之後個駕駛技術真係越嚟越高超,除左唔識得真正向前行之外,一坐落車車就好開心咁周圍走,可能依個小小豬好鐘意自己周圍去。

其實我地都唔係俾佢坐好多,每日最多都係30分鐘,又或者小豬媽需要行開埋時去,就俾佢坐車車。

就係今日小豬媽要入廚房整少少嘢時,小小豬就嚟左一個搗蛋之作~

真係俾依個小小豬激親,都唔知佢點解有咁大力,可以將疊A4紙散成咁,唔怪得之小豬媽話係廚房入面完全聽唔到佢有聲音,原來係搗蛋中。

人仔越大就越喜歡搗蛋,真係要睇緊啲先得啦,不過食個搗蛋豬豬又真係幾可愛呀!


*♡♡小肥豬♡♡* | 19th Mar 2011 | 小小豬篇 | (25 Reads)

14 MARCH 2011 (MON)

尋日小豬媽買左隻學習杯俾小小豬之後,當然要即刻教小小豬用啦,所以今日小豬媽就開始教啦!

小豬媽係小小豬面前試飲過一次之後,小小豬就即刻有樣學樣,試左兩次左右,就識得雙手足住杯杯放埋入個口仔度添~

睇吓佢飲得幾肉緊~

第一次試用,小豬媽就開左少少甜甜俾佢,等鐘意用學習杯,估唔到佢就飲左小半杯,真係叻叻呀!


*♡♡小肥豬♡♡* | 18th Mar 2011 | 小小豬篇 | (13 Reads)
18 MARCH 2011 (FRI)

又嚟打個尖先出依個POST先,因為又係想請大家幫個忙嘛,希望大家唔好覺我煩啦...哈哈!

繼之前係FACEBOOK參加過兩個『讚好』活動之後,我都知道我得獎嘅機會係唔大,因為我唔夠勝出嘅人多朋友,佢地隨便都有成千幾人『讚好』,真係勁。所以我都唔打算再參加依啲『讚好』GAME呀!

不過見今次『我愛MAMA』有一個招募廣告模特兒活動,勝出可以有機會係雜誌出現。最好就係除左多『讚好』之外,會有15名 BB 會由《我愛Mama》評審選出,所以又幫小小豬參加埋一份啦~

雖然係咁,不過如果大家都覺得小小豬可愛嘅話,咁就快啲幫幫手,投下你地神聖一票,支持一吓小小豬啦!

投票方法好簡單,大家先到「我愛MAMA」(http://www.facebook.com/woaimama)的FACEBOOK群組 內「讚好」,小小豬張相(http://www.facebook.com/login/setashome.php?ref=genlogin#!/photo.php?fbid=187919854584863&set=a.187917721251743.42285.146437522066430&theater)「讚好」,咁就可以投票支持啦!

請大家多多投票,支持...支持啦!哈哈哈哈~~


*♡♡小肥豬♡♡* | 17th Mar 2011 | 小小豬篇 | (32 Reads)

14 MARCH 2011 (MON)

首先多謝各位投小小豬嘅一票,雖然入唔到TOP60,冇得做巴士名星,但 Huggies將所有參賽的BB相放在銅鑼灣時代廣場對出的電車站及地鐵站的廣告牌上。咁即話小小豬張相都可以出現係依個戶外廣告版,咁都可以做有一個小小嘅紀念呀!

哈哈...咁多個BB 加埋一齊,當然張相係好細細張,我搵左好耐先搵到小小豬呀~

依家至四月二日個廣告版就係銅鑼灣時代廣場對出個電車站~

三月二十六日至四月十五日就會出現係銅鑼灣地鐵站往時代廣場A出口行人隧道~

 

唔知有冇機會可以帶埋小小豬去個廣告版度影張相留個紀念呢?

大家見到又有時間,睇吓見唔見到小小豬(應該係第一張POSTER嘅中下排位置),如果可以的話麻煩大家幫我影低佢,等我留個紀念呀!


*♡♡小肥豬♡♡* | 16th Mar 2011 | 小小豬篇 | (21 Reads)

13 MARCH 2011 (SUN)

小小豬飲飽奶奶轉埋片片,就要做訓覺豬。雖然係咁,不過我地嘅行程仲未結束,我揹住熟睡嘅小小豬嚟個SHOPPING TIME啦!

不過我地SHOPPING嘅目的都係為左小小豬,因為皇室堡有一層賣嬰兒衫嘅鋪頭好多都做特價同埋開始有啲夏天衫賣,所以我地就幫小小豬買定啲換季。

首先就係MIDES,依間衫我都係第一次買,不過摸上手都好柔軟,所以都買左幾件轉季衫~

依件係LULU妹送嘅~

我地仲買左一頂好有型嘅帽仔同一批口水肩,因為小小豬啲口水真係多到好驚人,成日連件衫仔都整濕埋,希望依批真係會防水啦呀~

 

係小豬媽幫手睇啲口水肩時,我同LULU妹見到有副BB黑超,所以就幫小小豬試戴。嘩...真係好有型呀~

 

不過就係試載完之後,小豬媽就罵我地亂俾嘢小小豬載,話唔衛生呀。哈哈..我地下次唔敢啦!

之後我地就去HALLMARK入貨,又買左四件衫仔~

 

最後我地就去左SOGO,小豬媽送左隻學習杯,打算開始教小小豬用啦~

唉...今日我真係大出血,買左好多衫俾小小豬,邊個叫小小豬有依個富貴病(濕疹),著平啲同埋質地差啲嘅衫都唔得,啲粒粒又會起返。

基本上我已經唔敢再俾係淘寶買嘅衫俾小小豬著,屋企所以衫都已經係HALLMARK貨 (買到我都就嚟做都升級VIP啦),所以我自己平日真係要慳先得,將自己嘅買衫錢留埋俾小小豬先得啦!


*♡♡小肥豬♡♡* | 15th Mar 2011 | 小小豬篇 | (26 Reads)

13 MARCH 2011 (SUN)

行完花展之後,我地見小小豬塊面仔紅卜卜,係時候要去啲冷氣地方休息一吓,所以我都就去左皇室堡間Haagen Dazs嚟個甜品時間~

哈哈...一坐低小小豬就急不及待睇MENU想自己選雪糕食啦~

因為我地張單漏左,所以要等成差唔多四十五分鐘先有得食。算啦,我都又唔趕時間,當係俾小小豬休息,等佢降吓溫都好啦!

終於有雪糕食,小小豬一見到就急不及待想拎起隻匙羹想食呀~

睇吓小小豬個眼神,自己都已經飲緊奶奶,仲眼定定咁緊到實一實,真係一隻為食豬嚟呀~

又要餵奶,但又要食雪糕,所以我就同小豬媽發明左一個新式餵奶方法,我都覺得自己好利害,咁都俾我諗到...哈哈哈~

由於小小豬飲飽奶奶之後就要做啲必須事,所以我地急急口咁食埋啲雪糕就要走去換片片,冇得慢慢嘆添。

不過小小豬係我地成個甜品時段都好乖乖又冇扭計,所以都係要俾個叻叻佢,等佢大個仔啲就再帶埋佢一齊食過啦!


*♡♡小肥豬♡♡* | 14th Mar 2011 | 小小豬篇 | (20 Reads)

13 MARCH 2011 (SUN)

今日難得好天氣,但因為大肥豬拎左啲文件返屋企做,所以冇得去街街,真係有啲失望。不過依個心情就俾小豬媽一個電話打消左,因為小豬媽打電話嚟約我地去街街呀!

開頭仲驚大肥豬唔俾我單拖出街,不過有小豬媽係度,佢當然完全放心,所以我就單拖一個人帶住小小豬搭地鐵去天后會合埋小豬媽同LULU妹一齊去行花展啦!

無驚無險,加上小小豬嘅合作全程冇扭計,終於到達目的地啦~

可能今日係星期日關係,真係勁多人,每一個展區都俾人包圍住,我都好辛苦先可以影到幾張相呀~

行左一轉到冇,小小豬塊面仔都已經紅卜卜,雖然佢都冇扭計只係冇乜笑容,不過小豬媽怕小小豬晒親會辛苦,所以我地行左唔夠半個鐘就走啦!

雖然都未影夠喉,冇辨法啦為左小小豬,我地浪費少少入場費都冇計。出年啦...到時小小豬都歲半,應該可以慢慢影呀!


*♡♡小肥豬♡♡* | 13th Mar 2011 | 小小豬篇 | (19 Reads)

13 MARCH 2011 (SUN)

依排當我地係窗邊等小小豬晒太陽兼訓練佢企嘅時候,小小豬對我地窗前嘅晾衫設置就好有興趣,好鐘意捉實佢嚟跳跳跳咁,係我地想帶走佢嘅時候,仲扭計唔肯走要繼續跳,真係俾佢激C呀!

唔通小小豬咁細個就想有一個志願,就係要加入國家隊,成為雙槓能手李小鵬接嘅班人~


*♡♡小肥豬♡♡* | 10th Mar 2011 | 小小豬篇 | (42 Reads)

10 MARCH 2011 (THU)

唔經唔覺又過多一個月,小小豬又大一個月,已經係七個月人仔啦~

依個小小豬係唔扭計嘅時候真係越嚟越可愛,玩得開心時就會開心笑咪咪咁,依家仲識得嗲人,會係你抱住佢嘅時候,就會好情深咁伏係頸旁,有時會強吻你(即用佢利脷仔LAM你個嘴或者面仔),真係冧C人呀!

不過亦都因為小小豬越來越大個仔,依家佢個扭計神功真係越嚟越叻,尤其係佢唔飲奶奶、眼訓或者唔合佢心水嘅時候,佢嘅扭計力量真係好驚人,真係好擔心佢大個會係一個曳曳嘅小朋友。

小豬媽話小朋友扭計係正常,可能小小豬準備出牙仔,所以個人就會忟憎。加上依家先開始慢慢懂性,有好多嘢都係未識亦唔會明白,所以好多事係唔識表達,唯有扭計同喊,等我地大人留意。

小豬媽話教小朋友係唔好心急,要慢慢教同做個好榜樣,小小豬一定係個乖乖仔嚟呀!

為左小小豬做一個好乖乖,我一定收起我嘅脾氣(盡量啦..哈哈)加多啲耐性,慢慢教好佢,等佢成為一個人見人愛嘅好孩子。


*♡♡小肥豬♡♡* | 7th Mar 2011 | 小小豬篇 | (27 Reads)

6 MARCH 2011 (SUN)

原本打算今日都帶小小豬落公園仔玩,不過今日個天氣唔係太好冇乜太陽,所以就冇得去玩留係屋企,留係屋企冇嘢做,最好當然就係覺覺豬啦!

係下午槑小小豬訓覺嘅時候,唔覺意就連自己都訓埋。就係依個時候俾大肥豬影低我地個訓覺樣(真係好衰趁人地訓左先嚟影)。

雖然影到我好樣衰衰,不過我真係好鐘意,所以醜樣啲都好想同大家分享,因為影得我地好溫馨呀~

哈哈哈...小小豬隻手絕對冇經修飾,係佢發自內心咁抱住我,冧到我呢...真係勁愛我依個心肝椗呀!


*♡♡小肥豬♡♡* | 6th Mar 2011 | 小小豬篇 | (37 Reads)

5 MARCH 2011 (SAT)

早前係FACEBOOK嘅我愛MAMA個團購活動見到有一個便便器買,我見小小豬都開始大個仔,係時候教佢用便便器,所以就訂埋一份,等左一段時間,終於係今日收到啦~

其實我係唔識依個牌子,只係見到幾抵,咁就學人訂埋一份,所以都冇諗個質素會係點(成日都覺得個個便便器都係差唔多)。

不過今日收到一睇,雖然都係白雪雪冇乜款,不過個質地又真係幾好,摸上手都好滑溜,應該都幾舒服,就連小豬媽都對依個便便器有讚冇彈呀!真開心,起碼覺得自己冇買錯嘢。

雖然依家未用的,今日我地貪得意都有俾小小豬試坐時,小小豬好似好鐘意咁,仲攪笑到以係依部係佢嘅戰車,不停向前推呀~

依個便便器仲可以拆出嚟放入洗手間用,咁即話如果唔爛的話係可以用好多年,咁咪好抵用!

等小小豬大個多少少,可以自己坐得穩啲、耐啲嘅時候,就可以開始教佢用,希望到時可以順順利利,咁我就可以慳返少少片片錢啦....哈哈哈!


*♡♡小肥豬♡♡* | 5th Mar 2011 | 小小豬篇 | (26 Reads)

3 MARCH 2011 (THU)

因為今日要幫小豬媽去電訊公司攪佢個手提電話合約,所以我趁我放工嘅時候,帶埋小小豬一齊去攪手續(哈哈哈...小小豬都算嚟接我放工呀!)

我地處理好手續之後見餓餓地,所以就去左KFC食個TEA。唔知係唔係小小豬第一次去KFC,所以好似好新奇咁周圍望,仲發輝佢個搗蛋同為食精神,不停掃我地枱面啲嘢食呀~

次次見到嘢食,小小豬都會好似好想拎啲食物咁,真係俾依個為食豬激親呀!不過咁都好,可以訓練一吓佢嘅手力嘛,小小豬都幾叻叻,可以拎得起個籃呀!

我地TEA完之後就返屋企,小豬媽話見小小豬咁鐘意周圍望,所以就嘗試將小小豬向前揹~

哈哈....一揹上身,小小豬就手舞足動咁周身郁,一定係好歡喜咁樣揹啦。當然啦....因為又可以八公仔周圍望嘢嘛!


*♡♡小肥豬♡♡* | 4th Mar 2011 | 小小豬篇 | (15 Reads)

2 MARCH 2011 (WED)

越嚟越多人話坐學行車係會令BB學壞腳,好易有『O型腳』或者係『芭蕾舞腳』,所以我身邊嘅朋友都唔鼓勵我買。開頭我都有一刻諗過唔買,都好驚小小豬會變到好似佢地口中所講嘅壞腳。

不過諗深一層,我細細個時都係坐學行車大,依家對腳都唔覺有啲乜問題,加上小小豬大個仔,開始不甘於只坐係HIGH-CHAIR或者床仔度,成日都要扭抱住周圍行,等佢可以周圍望嘢。

為左照顧小小豬,小豬媽已經整傷左個手效位,所以我地就決定買部車仔,起碼都叫做可以減輕小豬媽嘅辛勞。

我地趁前幾日吉吉島嘅嬰兒節有特價,所以就幫小小豬買左部烈火戰車啦~

今日一收到貨,我地即刻進行大清洗,之後就俾小小豬試坐。可能係新奇事,所以開頭小小豬都唔係好識郁,不過坐多一陣就開始識得向後行,再過多一陣,又識得打橫行,仲玩到好開心添~

到小小豬玩得咁開心,我真係比佢仲開心。

小豬媽仲讚小小豬好叻叻,咁快就識控制部車仔。雖然係咁,不過我地都唔會成日俾佢坐,暫時每日加埋坐大約30分鐘左右,等大個多啲先慢慢加時間啦!


*♡♡小肥豬♡♡* | 2nd Mar 2011 | 小小豬篇 | (46 Reads)

1 MARCH 2011 (TUE)

唔知由幾時開始,小小豬就好鐘意睇電視,尤其係啲有歌仔或者係奶粉嘅廣告,一聽到就會即刻眼定定咁望住個電視。

有見及此,我都買左啲幼兒教ABC嗰嘅DVD俾小小豬睇,等佢唔好睇咁多電視目,睇啲有益啲嘅節目。不過,我地都係每日俾小小豬睇大約15MINS左右,唔想睇太耐會影響眼睛嘛。

雖然小小豬都應該未明白碟入面講乜,不過等佢早啲接觸到啲英文都幾好,依家小小豬一聽到ABC歌就會哈哈大笑,可能真係聽得多啲成果呀!

除左買左啲幼兒DVD之外,依排我見好多BABY KINGDOM媽媽都推介一SET幼兒教學套裝『YOUR BABY CAN READ』,佢地都話依個教材套好好,比迪士尼嗰SET實用好多,仲介紹我地去淘寶買平好多添。

我見又唔係貴,所以又學人買左一SET,睇吓係啲乜嚟。我上星期六訂,今日就已經收到,真係勁快手呀~

睇左入面啲教材,我就覺得好似深左少少同埋幾認真左啲,同我之前買嗰啲歌唱學英文嘅完全唔同,我覺得比較適合返幼稚園小朋友學。

不過大肥豬睇左入面嘅介紹,話原來係BB三個月就可以開始進行教學,加上原來好多8月嘅BK媽媽都已經開始緊,我地都算遲啦!(真係誇張~)

依家我就將教依個重任交俾大肥豬,慢慢試吓教,睇吓小小豬個反應。不過如果對依個階段嘅小小豬起唔到作用,到時就再等大多幾個月先嚟過,始終教學嘅嘢都係要慢慢嚟,唔想小小豬太早會覺得辛苦嘛!


Next