香港新浪網 MySinaBlog
*♡♡小肥豬♡♡* | 27th Feb 2011 | 生活點滴 | (26 Reads)

27 FEBRUARY 2011 (SUN)

自我睇完那位中西合壁醫生之後,小豬媽聽到醫生話我個身係勁寒涼,所以依幾日佢都有煲薑茶俾我飲,等我可以驅風,真係勁SWEET呀~

不過今日返左自己屋企,冇左小豬媽嘅愛心薑茶,唯有自己買材料自己煲啦~

我都依照小豬媽個教法嚟煲,不過唔知點解總係冇小豬媽嗰啲咁好飲,我都已經落左成大舊薑,但都只係覺得有少少薑味。可能係我唔識揀,所以買左啲唔多靚嘅薑,所以出唔到味啦!

講到唔好飲,真係不得不講我今日係超級市場買黑糖時,見新出左一隻即沖嘅薑茶,咁我就買左包嚟試,諗住如果OK都可以沖依啲嚟飲,唔洗日日煲嘛~

點知一飲之下,同小豬媽煲嗰啲簡直係天堂同地獄分別,入口只係覺得超甜(我已經落好少嚟沖),少少薑味都FEEL唔到,真係勁難食呀!


*♡♡小肥豬♡♡* | 26th Feb 2011 | 生活點滴, 博客分享 | (19 Reads)

26 FEBRUARY 2011 (SAT)

早係一月中時得到維特健靈嘅邀請,試用佢地新推出嘅OS 21 ICE-MASK~

當時用左第一次之後,都覺得用後幾舒服,塊面仔都滑滑地,不過就仲未覺得有好明顯嘅改善。依家我都用左差唔多兩個月,所以都係時候同大家分享吓我感受啦!

由於我見佢盒面寫住可以連續先用七日,再一星期用兩次,咁個效用會好啲,所以我就好乖乖咁依足佢地個程序用。

係頭嗰兩次敷嘅時候,塊面都有少少拮拮地嘅感覺,不過之後開始就再冇咁情況出現,可能係頭幾次係皮膚識應中,所以有依個感覺(我之前用其他牌子面膜都會出現依個問題)。由於需要冷敷,所以凍凍地上面時感覺都好爽,幾舒服仲有啲醒神添(可能係凍到醒左呀...哈哈哈)。

用左大約廿次左右(我都差唔多用左三分二,因為要厚敷嘛..哈哈哈),我都發覺皮膚係有明顯嘅改善,好明顯係塊面緊緻左,冇咁乾同埋毛孔細左,膚色都白左同均勻左。

敷用MASK之後,我都冇即刻再搽保濕霜,但皮膚都唔會立即有好繃緊的感覺,就算第二朝起身都唔覺繃緊,好似好多水仲留係塊面度咁呀!

整體上都覺得依隻MASK幾好,都可以同大家推薦一吓呀!


*♡♡小肥豬♡♡* | 25th Feb 2011 | 小小豬篇 | (40 Reads)

22 FEBRUARY 2011 (TUE)

前幾日小豬媽係aptia買左盒六個月BB食嘅餅仔俾小小豬食,今日我地就俾小小豬試吓啦~

開頭小小豬都唔係太想食,可能係第一次,唔知塊餅仔係食得。之後小豬媽教小小豬食少少之後,小小豬就自己識得拎住係手度自己食,仲食得好滋味添~

哈哈...依個真係為食豬仔,唔洗十分鐘就KO左塊餅餅,真係食奶都冇咁快呀!

不過依啲餅餅我地都唔會俾小小豬食太多,始終都係會怕熱氣影響便便,但如果小小豬乖乖的話,我就會獎勵請佢食一塊啦!


*♡♡小肥豬♡♡* | 24th Feb 2011 | 生活點滴 | (23 Reads)

22 FEBRUARY 2011 (TUE)

昨晚由睇戲中途開始就頭痛,所以就返左屋企休息,以為食左止痛訓醒一覺就會冇事,點知今朝早起身個頭又痛過。

原本都打算唔返工留係屋企訓覺休息,不過最後都決定係返工,所以即刻打孖食兩粒止痛藥就換衫返工。

雖然食左兩粒止痛藥,不過都好似冇好轉過,個頭都係勁痛,終於我都係頂唔順,都係要請假返去睇醫生休息。

經朋友介紹去左一間診所睇西醫, 不過依個醫生個診症方式都幾特別,係先幫我把脈又幫按摩,我睇嘅時候都真係有啲驚,驚我唔知係睇左個乜醫生。

醫生話我唔係感冒,只係身體太過寒涼,所以令到血氣唔運行,所以引致頭痛。醫生之後仲幫我係條頸做個熱敷,又俾我飲薑茶食薑枣。

佢開啲藥又唔多似平時醫生開嗰啲,真係勁攪笑~

雖然係咁,我食左一次藥訓醒一覺之後,個頭又真係冇咁痛,依個中西合壁嘅醫生又好似得得地,雖然佢醫法就怪怪地,不過佢講嘅又好有POINT,所以我都打算如果第日有啲乜唔舒服,都應該會去睇佢!


*♡♡小肥豬♡♡* | 23rd Feb 2011 | 甜蜜生活 | (77 Reads)

21 FEBRUARY 2011 (MON)

係小小豬出世之後,我同大肥豬都都好似未試過只係我地兩個拍拖去街。我地唔係唔可以去,小豬媽間唔中都叫我地去吓街輕鬆吓,只不過我地都好想用多啲時間陪住小小豬,所以大多選擇唔去街,或者係星期六日帶埋小小豬去SHOPPING。

不過今日終於都可以再嘗拍拖滋味,事緣今日下午我要去九龍塘幫學校去聽一個講座,個講座都係聽到四點左右,之後我又唔洗再返學校,所以大肥豬見時間都算早早地,所以就請早放幾個鐘,嚟接我帶我去玩呀!

聽完講座個肚仔都餓餓地,所以大肥豬就帶左我去食個HIGH-TEA先~

哈哈....依間餐廳個環境真係好正,尤其係個佈置,所以大肥豬就用個Iphone幫我影左幾張相,加埋個EFFECT,真係影得勁靚,好鐘意呀~

雖然話我地係食TEA SET,不過我叫左好多嘢食,食得好豐富完全唔似係食TEA。大肥豬真係冇介紹錯,嗰度啲嘢食都好好味,我食到好飽飽咁離開呀~

之後我地就去另一個節目,就係去睇戲啦!對上一次睇戲嘅時候就係小小豬係我肚入面時睇葉問2,計吓都有成大半年啦。原本係新年嘅時候小豬爸都叫我帶埋小小豬一齊去睇『我愛香港』,不過我怕小小豬會好扭計,所以冇最後都冇跟埋一齊去。

我地聽小豬媽佢地話好睇,所以就趁今日個時間都幾好個場次都算早,所以就去睇啦~

 

套戲我覺得就一般,笑位就好似唔係太多,不過睇場戲輕鬆吓都算啦!

難得就到半日時間可以同老公拍拖去睇戲、食飯、食雪糕,點知睇睇吓戲個頭勁痛,個胃又嚟唔舒服,之後嘅節目就係變左返屋企休息,唉....真係勁掃興,不過咁都好,我地又可以早啲返去見到小小豬...哈哈哈!


*♡♡小肥豬♡♡* | 23rd Feb 2011 | 小小豬篇 | (43 Reads)

20 FEBRUARY 2011 (SUN)

過左正月十五,又你時候可以拆利是啦!

今年係小小豬第一年過新年,雖然去拜年嘅地方就唔算多,不過原來小小豬都收左好多利是呀~

 

我地一家人收到嘅利是加埋都有幾千蚊,當然大部分都係小小豬嘅功勞,但我冇打算沒有用嚟幫補今年所派出嘅錢,我仲打算幫小小豬開個戶口,等每年收到嘅利是錢儲起佢,留番第日大個讀書時用(哈哈…好似好有計劃咁)。

不過我問左幾間屋企附近嘅銀行,佢地都冇兒童戶口,如果一段時候唔郁個戶口,都會扣錢咁話,所以依家我都煩緊去邊度開戶口好。

唔知各位媽咪有冇幫BB開兒童戶口,可唔可以介紹啲俾我呢?等我快啲的起心肝幫小小豬儲好啲錢,唔係我怕會係我不知情的情況吓用埋小小豬啲利是錢呀!哈哈哈


*♡♡小肥豬♡♡* | 22nd Feb 2011 | 小小豬篇 | (23 Reads)

20 FEBRUARY 2011 (SUN)

今日係屋企信箱幫小小豬收到一份禮物,依份又係Carmen送俾小小豬嘅,係一個好得意嘅玩具電話嚟呀~

實不相瞞,我都有打算下次去shopping時買個玩具電話仔俾小小豬玩,等佢唔洗成日都好似想拎我個嗰部嚟玩咁。所以一見到個玩具時,我個心都諗:Carmen,你真知我心意...哈哈!

不過,其實收到禮物時真係覺得唔好意思,因為Carmen成日都送啲驚喜禮物俾我地,又要佢破費添。等小小豬大個啲嘅時候,一定要帶佢同Carmen姐姐食飯,等小小豬知道有一位姐姐係咁錫佢呀!


*♡♡小肥豬♡♡* | 21st Feb 2011 | 甜蜜生活 | (76 Reads)

19 FEBRUARY 2011 (SAT)

自08年聖誕節大肥豬送左部單反相機俾我之後,我部相機終於可以『升呢』,因為大肥豬買左一部進階嘅單反機俾我啦~

其實我部初階機唔係壞左或者有問題,只係因為我地將部初階機放左係小豬媽屋企,可以等小豬媽一有時間就可以同小小豬影相,但又唔想將部影機拎嚟拎去,所以我就曾經同大肥豬講過想買多部影相,咁可以方便啲。

開頭大肥豬都唔係點理我,原來打算靜靜地買嚟俾我呀!依家有新相機,咁就可以幫小小豬影更多更多嘅相,等小小豬再大多少少,天氣冇咁凍,又可以去迪迪尼影,真係諗起都興奮呀!

雖然都係為左小小豬先買部新相機,不過大肥豬都話搵個機會同我出去影輯相先,試吓部機咁話。

哈哈哈...唔知係唔係個身份唔同左,雖然我都好耐冇去過影人像相,不過我又唔係特別想去影人像,反而我寧願想同小小豬影啲母慈子孝嘅相或者一家三口嘅溫馨相,我會覺得仲開心。等天氣好啲嘅時候,一定要帶小小豬去啲公園行吓影吓,到時一定好開心!


*♡♡小肥豬♡♡* | 20th Feb 2011 | 生活點滴 | (23 Reads)

19 FEBRUARY 2011 (SAT)

我都知道YAHOO BLOG唔可以買廣告,不過今次為左幫朋友,相信大家都唔會介意呀..哈哈!

事緣我有位朋友嘅仔仔,剛剛轉左大仔奶粉之後,發現腸胃有問題需要轉奶粉。但佢又剛剛入左一批,唯有放上網平售,點知都放左一段時間,都未有人問津,所以我就話試吓幫佢拎上BLOG度睇吓有冇回應,始終BLOG都有好多媽媽睇到嘛!

有關奶粉資料如下:

日本雪印(9個月以上適用)
行貨有5罐,購於百佳超級市場。
出售@$135
建議於藍田交收,如有其他地方亦可商議。

其實當我幫小小豬轉能恩時我都遇到同樣問題,又係剛剛買左成箱奶粉,不過好在我嗰時有個朋友BB都係食和光堂,咁就可以幫我要晒。雖然係平售,總好過有成箱唔啱嘅奶粉擺係屋企唔知點好呀,所以我都好明白我朋友仔嘅問題。始終一罐奶粉都幾百蚊,如果買左冇用真係幾肉痛,所以就試吓出個POST,希望可以幫到我朋友啦!

有興趣嘅朋友請私人留言資料給我啦~


*♡♡小肥豬♡♡* | 19th Feb 2011 | 小小豬篇 | (49 Reads)

18 FEBRUARY 2011 (FRI)

話說係小小豬初出世嘅時間,好多人都話小小豬好似我細個嘅時候,當時我地搵到一張我細個嘅相同,小小豬做左個對比,仲出左一篇網誌 ~ 餅印? (唔知大家有冇睇過呢?有需要可以CLICK返入去睇呀!)。

小小豬越大個,小豬媽同小豬爸都話個樣越大就越似我,尤其係唔笑眼定定嘅時候,唔係只係我屋企人覺得,有啲親戚嚟拜年嘅時候,佢地都會講真係好似我細個。(哈哈...聽完真係勁開心,有啲飄飄然咁添呀!)

係前幾日小豬媽同小小豬影相嘅時候,俾我發現左一張好有趣嘅相。我同小小豬個樣似就唔在講,就連小豬媽抱我地嘅手勢都係勁似呀~

哈哈...睇見依張對比相,我真係覺得好攪笑,如果小小豬個咀仔唔笑咁大,真係一樣咁呀!


*♡♡小肥豬♡♡* | 18th Feb 2011 | 小小豬篇 | (62 Reads)

15 FEBRUARY 2011 (TUE)

六個月啦...又係時候要去健康院打針啦!講真今次打針我真係好驚,因為上次打完針即晚就發燒,加上今次係打三針,好驚小小豬會好唔舒服,總之就係驚..驚..驚啦!

雖然訓醒一覺之後我個胃都好左少少,不過為左安全起見,所以抱小小豬依個負任就交左俾小豬媽,我就負責拎嘢,起碼唔會嘢到小小豬嘛!

我地第一件事就係去磅重,六個月嘅小小豬只有十六磅十四安士,比起上次四個月磅時只係重左一磅,真係勁擔心,點解會重咁少。

我就係帶住依個苦惱等見姑娘,等左個幾鐘之後,終於都我地見姑娘,當然即時問小小豬個磅數問題,姑娘話雖然小小豬嘅生長線嘅幅度係下降左半格,不過都叫做正常,總之冇下跌就冇事,叫我唔洗擔心。

之後姑娘就幫小小豬做一連串測試:

- 先用玩具試吓識唔識拎嘢~~PASS,小小豬仲唔肯俾番姑娘添..哈哈。

- 試坐~~PASS,雖然唔可以坐直直,不過姑娘話係唔扶住情況下可以坐多過十秒都已經好叻叻啦。

- 試企~~PASS,開頭小小豬以為姑娘同佢玩,係咁跳跳跳,要等冷靜一陣先肯乖乖企係度,真係爛玩豬嚟呀。

整體上姑娘都話小小豬好健康,冇乜問題。做完TEST,我地就同姑娘講想見醫生,因為想問有關濕疹同小小豬眼睛問題。原本姑娘都唔話唔需要,不過經小豬媽開口之後,終於可以安排到啦!

等左一陣就去見醫生,當然即刻問濕疹問題先,不過醫生嘅答案又係:冇辦法,要小心照顧,唔好俾佢嚴重落去,仲要有乜唔對路就去睇私家醫生。(聽完真係好似冇聽過咁..唉!)

之後我地就問眼睛問題,因為我地成日都覺得小小豬嘅眼睛好似有少少傾視。醫生做完一輪測試,都話冇問題,見我地擔心就寫轉介信俾我地去醫院再做測試。雖然我地都覺得小小豬眼睛唔算太嚴重,都比之前有好轉,不過有得CHECK清楚啲都好,所以遲啲就要同小小豬去排期,但都唔知要排到幾時啦!

見完晒醫生姑娘,終於都到左最緊張環節,就係打針啦!唔知係唔係小小豬都知道要打針,所以係等嘅時候,佢就扮哂嗲咁依住小豬媽,真係好少見到佢依個嗲樣呀~

小小豬真係一個好堅強嘅BB,因為喊得都唔算嚴重,只係姑娘打落去嗰吓喊左少少,打完晒三針踏出打針房門口就已經冇喊,真係好叻叻呀!

完成左今日打三針,小小豬又過左一關,下一關就要等一歲時再打,希望到時都可以有今次咁叻叻啦!


*♡♡小肥豬♡♡* | 17th Feb 2011 | 甜蜜生活 | (70 Reads)

14 FEBRUARY 2011 (MON)

今年真係可以詰過左一個先甜後苦嘅情人節。

首先因為聽日係小小豬打六個月針關係,我地唔敢周圍去,就連小豬媽屋企都唔返住,所以大肥豬就請左一日假係屋企做湊仔公,成日照顧小小豬。

我一放工返到屋企,大肥豬就話要落街幫小小豬買嘢,原來佢係去買個蛋糕仔同我慶祝情人節~

嘩...見到個蛋糕一刻真係嘅驚喜又興奮,估唔到大肥豬咁細心識俾啲驚喜我,真係勁SWEET呀!

由於湊住小小豬,所以都唔想攪太多嘢,簡簡單單嚟個二人邊爐宴就算。不過我個心情就隨住我的晚餐已有所改變,因為係烚左冇幾耐,我都係食左兩件雞同幾片菜咁,我就發覺個胃好唔舒服,又頂住又抽根咁,總之就勁辛苦,之後就乜都唔想食,連大肥豬買俾我個驚喜蛋糕都食唔到,真掃興!

食左胃藥之後就乜都唔理去左訓,好在大肥豬幫我收好個殘局,幫我洗晒所有嘢同槑小小豬訓覺。

大肥豬仲攪笑咁同我講,話幫我做晒啲嘢就一份情人節禮物。依份情人節禮物我真係唔係好想要哦...哈哈!

唉...情人節諗住簡簡單單咁一家三口係屋企慶祝,食吓蛋糕影吓相都係一件開心事。點知就換嚟咁樣過....真勁掃興呀!


*♡♡小肥豬♡♡* | 16th Feb 2011 | 小小豬篇 | (26 Reads)

16 FEBRUARY 2011 (THU)

好幾日冇出POST,其實都有好幾個要出,不過依個POST就要打個尖先,因為想請大家幫個忙嘛!

前係FACEBOOK嘅「HUGGIES」群組入面有個「Huggies BB四圍走」,勝出嘅相片就有機會張貼係巴士上面,等小小豬成為巴士廣告小明星,全港九,四圍走!

經過上次「我愛媽媽」舉辦嘅活動,我都知道得獎嘅機會唔大,因為依啲其實都係比賽父母的朋友多,因為多人「讚好」就會勝出,所以之後嘅活動我都冇再參加。

不過見依個活動又幾得意,如果可以係巴士上見到小小豬個樣,一定好攪笑,所以就參加左,希望有一絲機會可以入到TOP60啦!

哈哈...如果大家都覺得小小豬可愛嘅話,咁就快啲幫幫手,投下你地神聖一票,支持一吓小小豬啦~

投票方法好簡單,大家先到「HUGGIES」的FACEBOOK群組內(http://www.facebook.com/home.php#!/HuggiesHK)「讚好」,之後再係「Huggies BB四圍走」」相簿三的第四十九張小小豬張相(http://www.facebook.com/home.php#!/photo.php?fbid=177519165625859&set=a.177517052292737.43908.175747015803074&theater)「讚好」,咁就可以投票支持啦!

請大家多多投票,支持一吓,哈哈哈哈~~


*♡♡小肥豬♡♡* | 13th Feb 2011 | 小小豬篇 | (35 Reads)

12 FEBRUARY 2011 (SAT)

今日大肥豬趁住槑小小豬訓覺時,俾佢好得戚咁錄左以下短片~

小小擬似識叫DADDY,唔知大家聽唔聽得出呢?

大肥豬聽到都不知幾開心,一晚睇依條短片數百萬次,成日講語小小豬識得叫佢,真係俾佢笑C呀,哈哈哈哈

唔知係小小豬撞音定真係識得叫呢?點解唔撞句媽咪嚟聽吓哦,真係有少少呷醋添。但話雖如此,我聽到嘅時候都好開心呀。

今次我覺得係撞音就唔算數,等佢真真正正識講嘢時,到時就真係識叫我都未遲呀!(自己安慰自己中)


*♡♡小肥豬♡♡* | 10th Feb 2011 | 小小豬篇 | (48 Reads)

10 FEBRUARY 2011 (THU)

轉眼間小小豬已踏入第六個月,即已經半歲啦!

依家嘅小小豬開始識扭計,扭計要人抱、要人同佢玩,又扭計唔飲奶奶。睇住小小豬一日一日咁大,感覺到個責任就越來越大,因為開始懂事,就要教啲正確嘅道理,等佢可以學乖乖,唔好做曳豬仔。

今日都可以叫做半歲生日,所以小豬媽就幫小小豬著件靚靚賀年衫影左啲靚相啦~


*♡♡小肥豬♡♡* | 9th Feb 2011 | 生活點滴 | (25 Reads)

9 FEBRUARY 2011 (WED)

由年廿九開始至初六,我嘅八日新年假期已經結束,雖然依八日假期除左去四大長老度拜年之外,好多日都係留係屋企,不過係屋企同小小豬玩又真係好開心,仲覺得時間好似過得好快,轉眼間又過左一日咁添。

雖然依個仔仔間唔中都會扭計激嬲我,不過一見佢笑咪咪嘅樣就即刻嬲唔得落,個人都即刻開心返。

過左依八日假,就要等暑假先可以再放長假期,不過咁都好,到時小小豬都已經一歲,可以帶佢去好多地方玩,又可以去我最鐘意嘅迪迪尼,真係諗起都興奮,哈哈哈!

雖然好想繼續留係屋企同小小豬玩,今日真係十萬個唔願意返工。不過回歸事實,又要為小小豬嘅奶粉錢而努力。不過今日真係出師不利,第一日返工就因為等唔到車攪到遲左成十分鐘,好在老細未返,可以算係不幸之中嘅大幸..呵呵呵!

第一日返工嘅LUNCH當然要食餐好,所以就同糖糖仲有史迪哥哥去左一間新嘅意大利餐廳食左一個豪午餐,雖然個環境佈置就麻麻,不過嘅嘢都幾好食呀~

今日係初七,即係「人日」,人人都生日,所以我買左個生日蛋糕同大家慶祝生日,我地仲開左個小型生日PARTY添~

 

係一個開心嘅日子開工,希望嚟緊嘅工作都會順順利利,衰嘅事遠離我,開開心心啦!


*♡♡小肥豬♡♡* | 8th Feb 2011 | 生活點滴 | (18 Reads)

7 FEBRUARY 2011 (MON)

早排冇意間睇電視見到一個節目,講及好多有關「港孩」嘅教育,可能已為人母,所以特別留意入面嘅內容。係節目中訪問了兩位身為家長的女作家,分別寫了《港孩》及《怪獸家長》兩本有關現代孩子過份依賴及家長過份保護孩子的現象。

當時我都好有興趣想買這兩本書嚟睇,可以當係一個參考現今教小朋友嘅情況。

係上星期三(即年三十晚)路過書店時,行入去睇一睇,俾我見到有《怪獸家長》這本書,可能係電視效應,我買依本都已經係最後一本啦~

 

因為新年比較忙碌關係,到今日先有時間真真正正拎起本書嚟細心睇,雖然我暫時都只係睇左幾篇,但都已經覺得書中所提及嘅事都好有意義。真係值得花多啲時間去慢慢睇,感受吓文中意思。

某程度上我都有信心不會成為書中提及嘅「怪獸家長」,不過睇這本書可以當一個警惕,千萬唔好俾小小豬「港孩」。


*♡♡小肥豬♡♡* | 5th Feb 2011 | 小小豬篇 | (34 Reads)

4 FEBRUARY 2011 (FRI)

今日係大年初二,由於係昨日分別已經一早同小豬媽拜年,夜晚又去左奶奶屋企拜年,所以今日真係較為清閒,只需要今晚落奶奶屋企食開年飯。

小小豬仲係細個,所以都唔打算同圍去,留係屋企休息一吓。係屋企冇嘢做,見盆水仙花又開得咁靚,所以我地就同小小豬係水仙花前影吓相。

今日小小豬心情大好,加上大肥豬又幫手引佢,所以影左好多笑咪咪嘅相,我真係勁開心....因為終於幾張相小小豬係同我笑笑咁影呀~

唔止同我影嘅相好靚,小小豬同花花影嗰啲都好得意,笑得都好開心呀~

雖然今日就悶悶地留係屋企,不過影到咁多笑咪咪嘅靚相,即刻變左一個勁開心嘅年初二呀!


*♡♡小肥豬♡♡* | 3rd Feb 2011 | 生活點滴 | (16 Reads)

3 FEBRUARY 2011 (THU)

恭喜發財,今日日係大年初一,亦都係小小豬第一年同大家拜年呀!

我地三隻豬仔祝大家兔年行大運,各位小朋友聰明伶俐、快高長大,情侶們就繼續SWEET SWEET,個個人都開開心心!