香港新浪網 MySinaBlog
*♡♡小肥豬♡♡* | 30th Dec 2010 | 小小豬篇 | (32 Reads)

28 DECEMBER 2010 (MON)

成日聽人講這三個月嘅BB就識得轉身同埋頸仔就好有力,不過唔知點解小小豬都已經成四個幾月人仔,到依家都仲未識。雖然上次去健康院都話小小豬一切都係正常情況下生長緊,不過始終都有啲擔心嘛!(我真係乜都可以擔心一餐呀!)

自買左張地膠之後,小小豬活動空間大左,所以我都就成日都教佢轉身。終於係我地努力嘅教導吓,小小豬開始叫做識轉身(我地幫佢側少少身,小小豬就自己轉埋佢)同抬起個頭仔啦~

唔知小小豬幾時可以自己轉身,唔洗人幫呢?不過依家都叫做一個好大進步,慢慢一步步嚟啦!哈哈~


*♡♡小肥豬♡♡* | 29th Dec 2010 | 好友與我 | (21 Reads)

28 DECEMBER 2010 (MON)

由小小豬出世至今,我都未試過自己約朋友去街街,因為一放工就要飛返屋企見小小豬嘛。不過今日終於都要試一試,因為約左一班靚太出嚟食飯呀!

唔知點解當我出發搭車嘅時候,覺得好似遺棄左小小豬去玩,好有罪惡感呀!

今次出嚟靚太有小M、KEKKA同BB YEE,印象中我地都真係好耐冇出嚟傾計,對上一次都應該都有成年,當時小小豬仲係我肚入面只有幾個月。

我地目的地就係THE ONE嘅FALL/HALF~

嗰度嘅嘢食都算OK,不過就細份量左少少,但佢嘅甜品真係勁好食又唔算太甜,尤其係嗰個士多啤梨乳酪,真係可以推介呀~

雖然只係短短嘅兩個鐘飯局,不過我地又傾計生仔經...旅行經咁,都過得好開心,所以大肥豬叫我間唔中約朋友仔去吓街,等我可以輕鬆吓哦!

係今個飯局,我仲幫小小豬收到份禮物,就係BB YEE送嘅波鞋仔,好得意呀~


*♡♡小肥豬♡♡* | 28th Dec 2010 | 小小豬篇 | (28 Reads)

27 DECEMBER 2010 (MON)

自從買左張地膠之後,小小豬就已經愛上左係地膠上面玩,唔肯坐再坐係HIGH CHAIR度玩啦!

依個小小豬真係乜都玩得一餐,總之放啲物件係地膠上面,佢一拎到就可以玩,就連俾佢用嘅枕頭仔都唔放過,仲玩得好開心添~

大家放心,係玩枕頭嘅時候小豬媽係全程睇住,所以係唔會有意外發生呀!

雖然未可以話碌嚟碌去,但都可以訓係地膠上面自己玩成個鐘都冇扭計,總之有人係佢身邊行嚟行去,咁就得啦。依個真係一隻不可以寂寞的豬豬呀!(咁咪即係好似我囉..哈哈~)


*♡♡小肥豬♡♡* | 27th Dec 2010 | 生活點滴 | (23 Reads)

26 DECEMBER 2010 (SUN)

今個聖誕節都真係冇乜節目,平平淡淡咁就過左啦!

冇辦法啦,因為我唔舒服,只識得係屋企訓,加上天氣凍凍地,唔敢帶小小豬周圍去,所以一家三口都係留係屋企最好呀!

由廿四號晚開始,加加埋埋我都訓左兩日,今日見精神好左好多,所以就帶埋小小豬落屋企附近個商場做特別任務。

哈哈...就係去佈置我個格仔鋪啦~

我問個朋友仔拎左啲貨,加上大肥豬嘅支持(當然包括金錢上啦...哈哈),所以就貪得意咁學人租左個格仔,學人做個老板仔。

雖然啲利潤真係好少,加上都唔知買唔買得出,不過都希望可以回本,如果可以賺到啲少少,幫補吓啲奶粉錢就仲好啦!(好明顯有人發夢中...呵呵呵~ )

請容許我賣個廣告先,鐘意砂糖兔嘅朋友仔記得嚟支持吓呀,我個格仔鋪就係:藍田匯景廣場5樓92號鋪A5格。雖然個位置就低左少少,不過就係廚窗嘅左下角嗰個,都好易搵到呀!


*♡♡小肥豬♡♡* | 24th Dec 2010 | 生活點滴 | (18 Reads)

24 DECEMBER 2010 (FRI)

今日係平安夜,亦即係小小豬過嘅第一個聖誕節,不過因為佢仲細細個,加上天氣又開始轉冷,所以都唔敢周圍去,只係留係屋企睇電視慶祝。

印象中年年平安夜都係去街街慶祝,今年就係屋企過,雖然係平淡左少少,不過有小小豬陪我地一齊過,即刻變得好溫馨。等出年小小豬一歲,可以帶佢去睇燈飾、帶佢去玩啦!哈哈~

最後,代小小豬祝各位有一個開開心心,甜甜蜜蜜嘅聖誕節~


*♡♡小肥豬♡♡* | 21st Dec 2010 | 小小豬篇 | (28 Reads)

19 DECEMBER 2010 (SUN)

小小豬都已經四個幾月,不過到依家都未完全識得轉身,好多時都只係轉到一半(下半身),上半身就可能仲未識將手仔移位,所以就仲未轉到。

小豬媽話可能佢成日都坐係HIGH-CHAIR或者瞓係床仔,郁動地方唔多冇得練習,所以就到依家都仲未識啦!

原本我建議將小小豬放係大床,咁咪多啲空間可以郁動,不過小豬媽話大人床始終都唔會係好乾淨,有時帶左啲塵上去都可能唔知,加上如果睇唔緊的話,碌左落床就大件事呀!

小豬媽就建議買張地膠,等小小豬可以係地下練習碌碌神功。所以今日我地去SHOPPING時,路經玩具反斗城,小豬爸就買左一包送俾小小豬啦~

一返到屋企,我地就即刻分批工作,又拖地又清潔地膠,整理好就砌俾小小豬玩啦~

依一個就係小小豬嘅小天地,睇嚟佢地好鐘意呀。

依家有個咁大地方,希望小小豬快啲識轉身,唔好做隻冇用豬啦!


*♡♡小肥豬♡♡* | 16th Dec 2010 | 小小豬篇 | (35 Reads)

15 DECEMBER 2010 (WED)

今日小豬媽係執冬季衫時,俾佢係櫃底執到依個寶物,係我滿月時著住嘅包被嚟呀~

嘩...真係勁攪笑,之前都冇聽小豬媽提過有依件被仔,估唔到小豬媽仲將依件衫仔保存的咁好。

小豬媽話滿月著過嘅衫係好有意頭,所以當時就將件被仔好好保存,留返俾我個BB咁話。 因為小小豬滿月是係夏天,所以冇刻意拎出嚟俾小小豬,等轉季嘅時候先拎出嚟用。

依件被仔真係好有紀念,所以我都打算俾小小豬用完之後,就再繼續好好保存,留俾小小豬嘅仔仔用,一代傳一代咁,好有意思呀!

經小豬媽一提,我都要將小小豬滿月時著過嘅靚衫仔同包被好好收埋,留番俾我個孫仔先得...哈哈!


*♡♡小肥豬♡♡* | 14th Dec 2010 | 小小豬篇 | (44 Reads)

13 DECEMBER 2010 (MON)

又到左一個重要嘅時刻,就係小小豬要去健康院打針。今次同上次一樣都係要打兩針,應該都係每邊大脾仔各打一針。今日我同大肥豬一齊放假帶小小豬去打針,俾多啲支持小小豬嘛!(其實係俾多啲支持我就真,因為我真係好肉痛之餘仲好驚小小豬會唔舒服呀!)

我地第一件事就係去磅重同度頭圍,小小豬已經有十五磅十三安士,頭圍就有四十幾厘米。印象中兩個月去健康院磅時好似係十三磅,即係兩個月只係重左二磅多啲啲,真係有少少擔心點解重咁少。

唔知係唔係小小豬知道要打針,所以係等見姑娘時都冇乜表情呀~

今日真係好多人,所以我地都等左成個鐘先見姑娘,一見到姑娘當然即時問小小豬個磅數問題,姑娘話依小小豬嘅生長情況非常好,依個磅數都同佢生長線幅度配合,叫我唔洗擔心,聽到姑娘咁講都叫做放心啲。

之後姑娘就幫小小豬做左一連串的測試,首先睇吓識唔識跟住物件移動郁吓個頭仔,再嚟俾個玩具睇吓識唔識提起手仔拎嚟玩,最後就檢查埋小小豬頸仔同腰的力量。好在所有測試小小豬都合格,姑娘仲讚佢叻仔添。當睇見小小豬係姑娘帶動下試得拎起個玩具玩,我都好開心,陪小小豬叫埋一份...哈哈。真係要去買啲同類玩具俾小小豬玩先得。

見完姑娘就到等打針,我一見到姑娘就已經好驚同腳震(冇錯係我),姑娘叫我抱住同埋捉住小小豬個大脾仔,我都唔敢望住姑娘打針,只係識將小小豬抱到實一實。當姑娘打第二針時,姑娘又嚇我話依針會利害啲痛啲,所以我一聽到小小豬嘅喊聲,我又都忍唔住喊埋一份。不過小小豬比佢媽媽我更堅強,因為一踏出打針房門口就已經冇喊,好快就又做番一個叻叻BB啦!

可憐的小小豬兩個脾仔又多兩個針口啦~

上幾次打針小小豬都冇發燒,不過今次終於都發燒,即刻俾佢食退燒藥同貼退熱貼啦~

小小豬都係第一次發燒,所以我都好緊張,眼見小小豬個發燒辛苦樣,好似俾人割左啲肉咁,真係好肉痛!

(今日嘅小小豬已經退晒燒,仲變返一個開心仔仔樣啦,真係放心晒啦!   14/12/2010)


*♡♡小肥豬♡♡* | 12th Dec 2010 | 小小豬篇 | (39 Reads)

11 DECEMBER 2010 (SAT)

今日放假見天氣又唔係太差,所以就帶埋小小豬近近地去左德福SHOPPING,活動吓嘛!

一去到德福都見到有以童話故事為主題嘅聖誕佈置,當然唔放過影埋一份。不過因為當時有部分地方做緊活動都幾多人,所以我地都係隨便影就算啦~

影完相就繼續SHOPPING,其實今日行街街最主要目的就係想買個放濕器,等乾燥嘅時候屋企唔會咁乾,咁小小豬塊面仔就唔洗咁爆啦!

行左幾間,終於都買到啦~

有醒哥介紹,應該冇買錯啦....哈哈哈~


*♡♡小肥豬♡♡* | 11th Dec 2010 | 小小豬篇 | (68 Reads)

10 DECEMBER 2010 (FRI)

小小豬又長大多一個月,今日就係四個月啦!

日子一天一天咁過,小小豬又一天一天咁成長,佢真係越來越大個仔,由初時一舊飯咁,到依家識玩手指、玩口水,仲開始識撩人傾計,真係好得意。依啲種種成長嘅過程,真係要好好記住先得呀!

不過...成日聽人講三個月就識轉身,到依家小小豬都仲未識,唔知幾時可以自己轉身呢?但係...如果一識轉身就真係要更加好好睇住佢,真係矛盾的心情。

小豬媽話今日係四個月嘅大日子,所以就紅紅地幫小小豬著左件靚衫影左啲相~

見到小小豬笑得咁開心,真係成個人都開心晒呀!


*♡♡小肥豬♡♡* | 7th Dec 2010 | 甜蜜生活 | (48 Reads)
7 DECEMBER 2010 (TUE)

今日真係勁開心,因為大肥豬俾左個大驚喜我,送左一份遲來的結婚周年禮物加提早的聖誕禮物俾我,就係迪迪尼全年通行證嘅禮卷呀~

記得係兩年前張AP到期之後,大肥豬曾經應成過我,等小小豬出世之後就會買AP,咁我地就可以成日帶小小豬再入去玩。估唔到佢仲記得,咁早就買左俾我,所以我嘅開心程度真係難以形容呀!

雖然有AP在手,不過我都應該唔會依個聖誕去開AP住。雖然我係好想即時入去玩,不過因為小小豬仲咁細,怕佢依家入去會辛苦,所以應該最快都等新年嘅時候先入去,到時小小豬都六個月大,起碼到時同公仔影相都靚啲嘛(頓時間覺得自己好識諗添..哈哈)!

嘩哈哈..雖然唔係即刻有得去玩,不過諗起都勁開心呀!


*♡♡小肥豬♡♡* | 6th Dec 2010 | 小小豬篇 | (26 Reads)
5 DECEMBER 2010 (SUN)

今日係吉吉島最後一日嘅大減價,所以小豬媽就約埋我一齊去SHOPPING,睇吓有乜平嘢執。

可能係最後一日關係,周圍都係多人,攪到行都冇心機,原本都打算係嬰兒部買啲日用品俾小小豬,不過一見到條人龍長到呢......真係嚇親,所以最後都買到。

雖然我冇買到嘢,不過小小豬都有收獲,仲係提早收到嘅聖誕禮物嚟呀!

第一份就係LULU妹送呀~

因為小小豬依家開始鐘意玩毛巾,所以LULU妹就買左一盒顏色好鮮艷又柔軟嘅手巾仔,俾小小豬玩之餘仲可以訓練一吓手力呀!

第二份就係小豬媽送嘅有機枕頭~

小豬媽話其實想買左好耐,不過次次都買晒。今日見到之餘仲有折,當然即刻買俾小小豬啦!

折左之後都係貴貴地,不過小豬媽話值得,等小小豬有個靚枕頭可以訓得好啲。依個枕頭又真係幾好,有不同S高度嘅枕俾你加厚度,個售貨員話可以用到五歲,咁計番條數都算抵呀。

哈哈...小小豬第一年過聖誕,剛剛踏入十二月,就已經收到兩份咁好嘅禮物,真係令我依個媽媽都羨慕呀!


*♡♡小肥豬♡♡* | 5th Dec 2010 | 甜蜜生活 | (76 Reads)
3 DECEMBER 2010 (FRI)

開心嘅日子真係過得快,轉眼間又過左一年,今日就係我地結婚三周年嘅開心日,今年多埋小小豬就真係仲開心。

今年都係第一年三人行,所以原本都打算去攪啲慶祝活動。不幸地早幾日知道今日要OT,所以即刻DOWN晒,冇再計劃去邊度玩!

雖然冇得去玩,不過大肥豬話依個大日子都要去食餐飯慶祝一吓,所以我地就同埋小豬爸、小豬媽仲有LULU妹一行六人近近地去出左太古城和民食個豐富大餐啦~

雖然好似簡簡單單咁,由結婚周年活動就變左一個家庭飯局,不過一家人開開心心食晚飯,都係一件我覺得最開心嘅事嚟呀!


*♡♡小肥豬♡♡* | 3rd Dec 2010 | 小小豬篇 | (31 Reads)
2 DECEMBER 2010 (THU)

今日一早起身見依個情景,真係嚇左一跳,有邊個小朋友可以懶訓成咁呀~

哈哈...訓到踼開晒張被唔在講,睇吓佢個枕頭,倒轉左之餘,個枕頭袋都俾扯到分開了(右手拿住的就是枕頭袋),個睡姿真係美妙到唔知點形容,小小豬真係一名懶訓豬嚟呀!

 


*♡♡小肥豬♡♡* | 2nd Dec 2010 | 小小豬篇 | (28 Reads)
1 DECEMBER 2010 (WED)

早幾日小小豬塊面仔紅卜卜,真係令我既緊張又擔心,不過好在依幾日塗左之前醫生開俾看門口嘅藥膏之後,已經好左好多,所以我都放下心頭大石。

哈哈...變返靚豬仔,加上又買左套新衫仔,所以小豬媽又幫小小豬影左靚相,啲相真係勁攪笑呀!

先嚟啲古靈精怪嘅BB樣先~


再嚟一個ROCK友LOOK,唔知小小豬唱緊乜歌呢~

最後依個真係超型仔~

依張相真係勁鐘意,睇落真係好大個仔,大家睇吓小小豬個眼神、表情同埋動作,成個......葉問上身...哈哈哈呀!