香港新浪網 MySinaBlog
*♡♡小肥豬♡♡* | 28th Nov 2010 | 小小豬篇 | (30 Reads)
26 NOVEMBER 2010 (FRI)

小小豬剛出世嘅時候都算多頭髮,不過都已經三個多月大,佢啲頭髮好似都冇乜點長過,都係維持同剛剛出世時的一樣,我見好多8月BB嘅頭髮都已好濃密又長,都真係唔明白點解小小豬仲係得幾條頭髮毛毛。依排仲開始有脫頭髮嘅情況添,真係又令我擔心。

不過小豬媽叫我唔洗擔心,話脫頭髮係正常,因為等佢脫晒啲胎髮之後,就會出過啲靚頭髮。小豬媽仲話我細過時同都係同小小豬一樣係冇乜頭髮,依家啲頭髮咪又黑又粗,所以叫我唔洗驚,仔仔唔會變光頭仔。

哈哈..咁又係哦...我睇返啲細個相我真係冇乜頭髮,依家啲頭髮真係多到嚇親人,所以小小豬都應該係似我一樣咁呀!

雖然係得幾條頭髮毛毛,不過今日小豬媽就幫小小豬整左個型仔洋蔥頭LOOK,真係幾攪笑呀~

放工返屋企見到小小豬咁攪笑,當然即刻要同佢影相啦~

 


*♡♡小肥豬♡♡* | 25th Nov 2010 | 小小豬篇 | (27 Reads)
24 NOVEMBER 2010 (WED)

唔知由幾時開始,小小豬開始有啜手指習慣,但佢啜嘅情況都唔算係嚴重,一日大約啜一至兩次左右,所以都應該唔洗擔心會養成左依個壞習慣。

不過小小豬啜得都幾特別,唔你啜一隻隻嘅手指,而係鐘意成個拳頭咁啜,真係勁攪笑!

等左好幾日,終於俾小豬媽捕捉到成個啜拳頭惰況!

先嚟脷仔錫吓個拳頭先~

啱位啦..咁就可以慢慢放拳頭啜啦~

我今晚仲俾我見到小小豬食拳頭食到啜啜聲,即刻拎到部電話拍低佢呀~

哈哈..依個小小豬真係越來越靈精怪,我越嚟越愛佢呀!


*♡♡小肥豬♡♡* | 21st Nov 2010 | 小小豬篇 | (22 Reads)
21 NOVEMBER 2010 (SUN)

吉吉島舉行感謝日,買嘢會有九五折,雖然折頭唔算多,不過見小小豬用開嗰隻衣服柔順劑就嚟用晒,所以就帶埋小小豬去Mega Box間吉吉島行街街順便影相啦!

住左咁耐都係今日先知原來屋企樓下就已經有巴士可以直達Mega Box,真係超級方便,所以第日如果要帶埋小小豬去街,就多一個選擇啦!

係未去SHOPPING,當然去左影相先啦,因為前幾日睇雜誌都見已經有介紹左依個聖誕佈置,先去左九樓影吓BEAR BEAR同聖誕樹先~

我地再轉四樓影企鵝,係我地準備影相時,撞到BLOG友仔ANSON&WINSON媽媽,所以大家就傾左一陣BB經,仲左影張相呀~

之後我就同小小豬一齊影企鵝~

今次小小豬好叻,好多張都望鏡頭,只係唔識笑...哈哈!

經過兩次去街街影相嘅實習,小小豬都已經應該已經熟習面對不同環境,所以嚟緊又可以帶小小豬去多啲唔同地方影聖誕佈置啦!(當然係揀啲唔算太多人嘅地方,因為始終都怕人多地方會令小小豬容易唔舒服呀!)


*♡♡小肥豬♡♡* | 16th Nov 2010 | 小小豬篇 | (18 Reads)
15 NOVEMBER 2010 (MON)

早前係FACEBOOK嘅「我愛MAMA」群組入面有個「最愛星級BB選舉」,勝出者將會有SOGO FACE嘅攝影套餐。

雖然明知道得獎嘅機會唔大,不過作為一名師奶仔嘅我,當然唔放過依個機會,因為好想帶小小豬去影樓影相嘛!我用左依個南瓜王子裝參加比賽,係唔係好可愛呢~

哈哈...如果大家都覺得小小豬可愛嘅話,咁就快啲幫幫手,投下你地神聖一票,支持一吓小小豬啦!

投票方法好簡單,大家先到「我愛MAMA」(http://www.facebook.com/woaimama)的FACEBOOK群組 內「讚好」,之後再係「最愛BB相選舉」相簿一的第二張小小豬張相(http://www.facebook.com/home.php?#!/photo.php?fbid=155372531172929&set=a.155124427864406.29979.146437522066430)「讚好」,咁就可以投票支持啦!

請大家多多投票,支持...支持啦!哈哈哈哈~~


*♡♡小肥豬♡♡* | 14th Nov 2010 | 小小豬篇 | (29 Reads)

13 NOVEMBER 2010 (SAT)

自上次帶小小豬去過香港公園之後,都冇再去過街街。上幾個星期因為天氣唔隱定,所以唔敢帶小小豬去街,怕佢仲細細個易凍親。

依家都已經三個月人仔,加上見今日有太陽又唔大風,所以就有得去街街。我見海港城都已經有啲聖誕佈置,所以就近近地出尖沙咀行吓啦!

係我地行去海港城前,路過鐘樓位置,大肥豬就建議係度休息一吓,順便影吓鐘樓。可能小小豬剛剛瞓醒,所以都唔算太精靈,都唔係好識笑,不過佢肯有幾張望住鏡頭影都算好啦~

影完鐘樓就再去海港城影聖誕佈置,不過小小豬唔知係唔係鐘意望人,佢成日都周圍望,唔肯俾個正面樣我地影,好辛苦先叫做有幾張相見得吓人呀~

不過我最嬲就係竟然當大肥豬同佢影時,可以影到咁靚,又望鏡頭之餘仲整個個攪笑樣,真係嬲嬲地呀...哈哈~

其實我都知小小豬咁細個又點識得望鏡頭,只不過是撞啱個位置咁先會有張靚相,不過我都覺得小小豬對鏡頭幾敏感,唔知係唔係我胎教嘅成效呢...哈哈哈!

係我地影完相嘅時候,見小小豬片片有啲濕,所以就入去海港城個BABY CARE換片片,嗰度真係勁大勁乾淨,仲分左飲奶奶區同換片片區,又有整清潔同消毒用品俾我地用,真係唔錯,下次再出尖沙咀都記住有依個好地方呀!


*♡♡小肥豬♡♡* | 12th Nov 2010 | 小小豬篇 | (39 Reads)

11 NOVEMBER 2010 (THU)

剛剛踏入三個月,小小豬就有一個新開始,就係轉用M碼片片啦~

其實早係上星期都已經留意到小小豬脾仔開始箍到紅紅地,不過嗰時都唔算嚴重,加上仲有包半S碼片片,所以都未有打算轉。

不過,尋晚開始就發覺緊嘅程度嚴重左,除左箍到紅左之外,仲箍到脾仔有橡根痕,見到都幾肉痛。

所以都決定唔再等啲S碼片片用晒,今日放工即刻去買包M碼片片,等小小豬唔洗俾箍到唔舒服呀!


*♡♡小肥豬♡♡* | 11th Nov 2010 | 小小豬篇 | (49 Reads)

10 NOVEMBER 2010 (WED)

小小豬終於都踏入三個月,好似轉眼間就由一個細細粒軟綿綿,變到依家都叫做幾抵打(只係條頸仔仲係好似冇乜力咁),時間好似過得好快,有時睇返小小豬剛剛出世嘅相,真係覺得有好大變化,好似成個樣唔同晒咁,所以話真係要無時無刻要留意,睇住佢嘅生長先得呀!

依家小小豬每朝早起身一見到有人,就會笑咪咪咁大笑。次次見到小小豬笑到咁,我都會好開心,仲唔捨得返工添~

今日係小小豬三個月,小豬媽話係一個重要日子,所以就帶左小小豬去拜神,仲點左盞聖燈,保佑小小豬平安健康,快高長大。雖然鄉下冇習例,不過小豬媽話男仔點都要點返盞燈,咁先好呀~

除左去拜神之外,小小豬都收左封利是,估唔到封利是係小豬媽帶小小豬去拜神時嗰位管理員叔叔俾呀~

 三個月哦...當然又係時間要影吓相啦~


*♡♡小肥豬♡♡* | 10th Nov 2010 | 生活點滴 | (21 Reads)

9 NOVEMBER 2010 (TUE)

今日收到一個驚喜,小豬媽送左份禮物俾我,係一個全球獨一無二嘅電話殼,超靚呀~

其實之前見朋友仔整左一個DIY嘅電話殼時,都心思思想整個,不過因為大肥豬唔讚成,所以最後我都冇整到。

可能小豬媽聽到我地嘅對話,加上佢有個朋友又剛剛整左一個,所以小豬媽就托佢朋友整一個嚟送俾我。唔怪之得早排小豬媽古古怪怪咁問我最鐘意小小豬邊張相,原來係打算整個電話殼俾我,真係世上只有媽媽好呀。

哈哈...就係咁又可以無時無刻將小小豬帶係身邊啦!


*♡♡小肥豬♡♡* | 9th Nov 2010 | 生活點滴 | (27 Reads)

7 NOVEMBER 2010 (SUN)

有好幾位朋友仔都問我點樣淘寶個集運方法,其實我都係初哥一名,所知嘅唔多,不過大家問起,我當然好樂意同大家分享啦!

淘寶戶口

先去淘寶開左一個戶口(http://www.taobao.com/),填妥佢地需要資料後,會收到一個確認的E-MAIL,需要點擊激活E-MAIL內的超連結,填妥所需資料後,便能即時使用戶口於淘寶網內購買,程序與YAHOO拍賣相似,但你可以利用旺旺系統即時與賣家查詢。

付款程序我就係用支付寶付款(感覺上比用VISA卡安全些),程序如下(以下係參考BK媽媽的指引):

1.到「淘點」登記成為會員(http://www.taodot.com/)

2.可以選擇於香港入數 / 過數到匯豐銀行 / 中國銀行的指定帳戶,再於「淘點」輸入入數資料及上載入數紙的圖片作參考,「淘點」就會於辦公時間內約一小時將有關款項按當日兌換率換成人民幣,存入你的帳戶。

3.你可以再返去淘寶網登入你的帳戶,再登記「支付寶」,成功登記「支付寶」後,就可以選擇用「支付寶」支付貨款,系統就會直接將款項由「淘點」轉到「支付寶」,費用全免。

4.賣家亦會收到付款通知,並依照你於「淘寶網」登記的地址發貨

5.你收到貨後,確認貨品沒有任何問題,你就可以「確認收貨」,之後賣家才會正式收到貨款,此舉是避免賣家收款後不發貨。

有關集運方面

1. 先決定找那間集運代收有關商品

2. 查詢發往香港收費,再與集運公司傾用用快遞還是EMS。(一般快遞到住宅需收取上門附加費)

3. 向集運提取(收件地址、姓名、區號、電話),因需把你訂購的商品發往那裡代為收取。選購心水商品,收件地址是(集運的地址) ,收件人是(集運的人姓名+轉發香港(你的旺旺ID)) 。

4. 買的時候,利用旺旺向集運公司職員查詢大約多少天能收到有關商品,到差不多時間便可到我的淘寶---己買到的寶貝---(所訂購的商品一行)查看物流,就會看到是否己簽收好。

6. 假設有5包件代收,而你又自行查好己簽收,你便可以利用旺旺通知集運公司那5包的快遞號碼,並請他們量重及處理發貨。

7. 集運量好會通知你重量、應付運費金額。你拍下集運提供的網址,並請集運修改運費,附好通知集運出貨便可。

以上係我依一名初哥嘅小小知識,希望可以幫到大家啦!如果我又錯嘅地方,請各高手指教指教呀~


*♡♡小肥豬♡♡* | 6th Nov 2010 | 生活點滴 | (33 Reads)
6 NOVEMBER 2010 (SAT)

之前都試過幾次係淘寶網買嘢,次次都係由糖糖幫我跟進,我選擇好晒等佢幫我攪,我只係負責俾錢,煩少好多嘢。

依排一有時間就上去睇嘢,就連小豬媽都俾我感染到,愛上左睇淘寶買嘢,又免令糖糖煩上加煩(因為係我加埋小豬媽兩個人煩佢...哈哈),所以都係時間自己都整番個ACCOUNT買嘢先得啦!

終於係糖糖教路,加上勁睇BABY KINGDOM啲媽媽分享提示,我都SETUP左個ACCOUNT,仲同小豬媽開展左個出血行動。短短幾日我同小豬媽都攪到個購物車FULL晒,不過第一次自己淘寶都唔敢買太多嘢,所以就買住幾間試吓先,仲試埋用集運添。

等左幾日終於都收到貨,拆禮物時間到啦,不過因為啲貨寄左去小豬媽屋企,所以依個重任就交左俾佢(包括幫啲貨物影相...哈哈)~

買左啲小米米物品同對靚鞋仔俾小小豬~

再嚟買左啲冬天必備嘅睡拖,依個我係睇BK媽媽介紹,真係冇介紹錯幾舒服哦~

之後就買左件毛毛斗篷,質地就一般,又唔算太差,幾拾蚊嚟講都叫OK啦(特別鳴謝神秘人幫我示範...哈哈)~

最後又買左幾條靚靚立體頸巾俾自己,我係屋企樓下見到同類型嘅款式都要成$160左右一條,依家我一條都係$60左右,抵成咁又點忍得手呀~

第一次自己淘寶咁成功,就表示我嘅大...大...大出血行動即將開始。

不過淘還淘,我都會有適當嘅節制,唔會買得太誇張。(希望做到啦...哈哈~)


*♡♡小肥豬♡♡* | 4th Nov 2010 | 小小豬篇 | (41 Reads)
3 NOVEMBER 2010 (WED)

今日返工途中收到小豬媽打俾我,話小小豬整損左個額頭仔。雖然唔係好嚴重,不過聽完個電話之後真係勁冇心機做嘢,個心已經飛左返屋企,好想快啲見小小豬。

返到屋企即刻睇吓小小豬個情況,原來係小小豬玩自殘,當佢忟憎卒面時俾佢自己啲指甲整到呀~

唉...我都已經密密咁幫佢剪同修番平滑啲指甲,都唔知點解都會整到,係鼻上嗰個傷痕都係因為咁整到。

見到小小豬個醜樣嘢,真係勁肉痛呀!為避再有同類情況,我都真係要更加小心,更加密咁睇緊啲小小豬指甲,咁就唔會變醜怪豬啦!

同場加映:依排小小豬開始玩口水,睇吓佢...成日係度玩口水波波,唔洗一陣就攪到啲衫濕晒啦!