香港新浪網 MySinaBlog
*♡♡小肥豬♡♡* | 30th Oct 2010 | 小小豬篇 | (33 Reads)
29 OCTOBER 2010 (FRI)

成日都好想幫小小豬整番個萬勝節LOOK玩吓,不過搵左好耐都搵唔到啲啱小小豬嘅衫仔。

點知前幾日係吉吉島十蚊店見到個細細嘅南瓜頭箍,所以就貪得意買嚟等萬勝節嗰日同小小豬應吓節。

哈哈...原本星期日先打算玩,不過小豬媽忍唔住係今日就幫小小豬變身成為南瓜王子啦~

睇嚟小小豬都好鐘意依個南瓜打扮,睇佢笑得幾開心~

今年就帶住頭箍先,出年等我搵套南瓜衫仔俾小小豬,到時一定仲得意呀!


*♡♡小肥豬♡♡* | 27th Oct 2010 | 小小豬篇 | (39 Reads)

27 OCTOBER 2010 (WED)

雖然我依家回歸左工作生涯,少左時間用嚟幫小小豬影相,不過唔緊要,我已經將依個重任交左俾小豬媽,咁就可以等小豬媽一有時間就幫小小豬影相啦!

今日小豬媽又幫小小豬影相,啲相真係好攪笑,唔知係唔係小小豬曾經係我肚入面睇過電影葉問2,所以佢已經練得一身好武功呀!

小小豬先嚟啲可愛樣等人同佢玩先~

再唔同佢玩...佢就開始出拳啦~

之後仲出動埋醉拳添~

做完拳王...又係時候變番個可愛乖乖仔啦~

哈哈...依個小小豬真係古靈精怪又表情多多,所以真係要繼續多啲同佢影相,等日後可以留個紀錄嘛!

其實我地都已經成日同小小豬影相,不過就少啲放上嚟,我會多繼續POST多啲,繼續同大家分享啦!


*♡♡小肥豬♡♡* | 26th Oct 2010 | 小小豬篇 | (42 Reads)

25 OCTOBER 2010 (MON)

之前都有聽朋友仔講過話今年冬又將會係近幾年最凍嘅冬天,所以都打算啲幫小小豬買定啲冬天衫。

見依都仲係十月,好似唔洗咁快買定。點知睇到天文台話今個星期尾就開始會凍,為免冷親我個寶貝,所以今日就約埋小豬媽一齊去吉吉島買小小豬入貨。

其他之前都買左幾件天鵝絨嘅夾衣仔俾小小豬,所以我地今次目的主要都係買底衫。

嘩...估唔到啲底衫真係咁貴,尤其係啲羊毛底衫,一件都要二百幾蚊(仲貴過啲大人SIZE)~

我都只係買左幾件厚底衫同二件羊毛底衫,就係咁...就冇左隻金牛啦!

雖然係貴左啲啲,不過為左小小豬我係唔會肉痛,只要小小豬唔冷親病的話,買貴少少都覺得係抵呀!(終於感受到小豬媽話過,當你有仔仔之後,係唔會再捨得買衫俾自己,會將所以買衫嘅錢放晒落仔仔度。真係冇講錯呀..哈哈!)


*♡♡小肥豬♡♡* | 22nd Oct 2010 | 甜蜜生活 | (72 Reads)

21 OCTOBER 2010 (THU)

今日真係超級開心兼極度興奮,因為大肥豬俾左個超級大驚喜我,就係送左一部iPhone 4俾我呀~

嘩...依個真係一個超級大驚喜,之前都完全冇聽佢講過話對iPhone有興趣,當然更加唔會諗佢會去買啦!

大肥豬話依個驚喜係獎勵我好比心機咁照顧小小豬嘅禮物,等我可以任何時間都有的上網玩,又可以隨時隨地將小小豬古怪事上FACEBOOK同朋友仔分享。

不過暫時都仲未可以用住,要等下星期中開台成功後先可以用。睇左說明書一陣,都好似好複雜咁,我都要努力學習點用先得。

係唔夠三個月就換左兩個電話,都覺得自己有少少過分,不過依啲都係大肥豬俾我嘅驚喜心意,所以我真係覺得自己好好彩,有個好錫我嘅老公,唔會因為多左少少豬對我照顧少左,反而仲比之前多左好多添...我真係幾於做一個幸福小女人呀!


*♡♡小肥豬♡♡* | 20th Oct 2010 | 小小豬篇 | (58 Reads)

20 OCTOBER 2010 (WED)

小豬媽成日都話小小豬好似我細個時嘅樣,仲幫小小豬改左個花名叫縮水黃XX(我個中文名),但我都只覺得係個咀仔同鼻樑位似,但又未去到小豬媽所講嘅餅印一樣。

不過當小豬媽係屋企執嘢時搵到一啲我細細個嘅BB相俾我睇,原來又真係幾似,哈哈…當然小小豬一定係比我醒目好多啦!有一張直頭以為嗰個係小小豬嚟添(不過嗰張相太黑SCAN唔到)。

當年約七個月左右嘅小肥豬~

今年兩個多月嘅小小豬~

大家又覺得似唔似呢?其實都仲有好幾張都好似,等我有時候再同大家分享吓啦!


*♡♡小肥豬♡♡* | 19th Oct 2010 | 生活點滴 | (48 Reads)

15 OCTOBER 2010 (FRI)

十星期的產假終於都完結,今日開始又要回歸工作,真係好唔想返工,不過為左小小豬可以有更好生活,唯有同催眠自已,以心肝椗推做我工作嘅動力。

大肥豬要開始清假期,所以今日就請一日假負責照顧小小豬。平時大肥豬都有幫手照顧小小豬,不過得佢兩個人在家都係第一次,雖然都有少少擔心,但我相信一定冇問題。

唔知小小豬係唔係知道我今日開始返工,係我臨出門口同小小豬SAY GOODBYE時,小小豬已經醒左仲笑咪咪咁對住我。依一刻忍唔住又喊左出嚟,真係勁唔捨得出行出門口呀!

返到公司第一時間即刻將個電腦個WALLPAPER改左佢,頂住引先啦~

雖然我都勁唔捨得小小豬而唔想返工,不過一返到工就見到好多同事買左好多零食同檸檬茶俾我,即時覺得好開心,因為有一班好錫我嘅同事,返工都有返工嘅好呀!

基本上今日都要跟進番啲工作,所以都忙到唔算勁掛小小豬(當然間唔中都會諗小小豬做乜啦)。不過一夠鐘就即刻走飛快咁返屋企,一見到小小豬就即刻抱到小小豬實一實,補番啲親子時間呀!


*♡♡小肥豬♡♡* | 15th Oct 2010 | 生活點滴 | (49 Reads)

13 OCTOBER 2010 (WED)

尋日同小小豬去健康院時,姑娘俾左份問卷我填,姑娘睇完之後話根據我嘅分數,會有產後抑鬱可能,所以就建議我見專科姑娘再作詳細分析。

嘩...都已經係兩個月,又點會仲有機會有產後抑鬱,所以開頭我都覺得唔需要,不過大肥豬就叫我去見吓,所以就即刻約左今日去見專科姑娘。

去到等左一陣就可以見姑娘,主要都係同我傾計,問番我好多依兩個月嘅感覺,照顧小小豬所遇到嘅問題,又問我嘅家庭背景咁。

傾左大約半個鐘左右,姑娘話我唔算產後抑鬱,只是對事物太緊張,所以影響到情緒唔太穩定,叫我放鬆啲就得。

唉...我諗我真係要學懂放鬆,唔係到時真係緊張到有病時,又點可以好好照顧小小豬呢!


*♡♡小肥豬♡♡* | 13th Oct 2010 | 小小豬篇 | (32 Reads)

12 OCTOBER 2010 (TUE)

小小豬到左兩個月,又要接受另一個挑戰,就係去健康院打針。今次打針真係好緊張,因為要係每邊大脾仔各打一針,諗起都好肉痛。

一如過往,去到第一件事就去磅重同度頭圍。小小豬已經有十三磅,一聽到真係勁開心,証明我同小豬媽嘅努力係冇白費。

等左一陣就見姑娘,姑娘話睇小小豬磅數話生長情況好好,仲話小小豬係屬於中碼級中嘅大BB(聽到真係開心到唔識形容呀!)。之後姑娘仲幫小小豬檢查腳仔關節,叫我唔好擔心整體上都生長得好好。

傾完計就到去打針,睇見姑娘打落去小小豬大脾仔度,真係勁肉赤,只係識將小小豬抱到實一實。當姑娘打第二針時,我都忍唔住同小小豬一齊喊(我真係一個冇用的媽媽)。雖然係咁,小小豬好快都已經冇喊,又做番一個叻叻BB呀~

姑娘話打依兩支針會有機會發燒,所以俾定退燒藥我,希望唔洗用到啦~

打針完之後,小小豬兩個大脾仔都有針口,真係可憐的豬仔呀~


*♡♡小肥豬♡♡* | 10th Oct 2010 | 小小豬篇 | (50 Reads)

10 OCTOBER 2010 (SUN)

今日是2010年10月10日,係十全十美的大日子,亦即係小小豬已經兩個月嘅大好日子呀~

前日係FACEBOOK見到朋友仔有一段好感人嘅留言,我覺得好有意思,所以借嗫分享一吓~
依段時間提醒左我兩個好原始但好易俾人遺忘嘅道理:
- 人類最大嘅敵人就係寂寞,就算食得飽著得暖住得好, 都敵唔過寂寞。
- 要令你最親最愛嘅人脫理寂寞嘅煎熬,唔係要俾咩物質佢,只需要一個簡單擁抱或者親吻,又或者花時間陪佢傾下計,就可以啦!

轉眼間小小豬已經兩個月,時間真係過得好快,我嘅產假亦仲有一星期左右就完結。雖然我真係好唔想返工,不過為左賺多啲奶粉尿片錢俾小小豬,所以就算我有幾唔捨得都要回歸我工作崗位,為我嘅心肝椗努力!


*♡♡小肥豬♡♡* | 8th Oct 2010 | 生活點滴 | (23 Reads)

7 OCTOBER 2010 (THU)

因為我開刀關係,坐月嘅時候除左每日小豬媽幫我準備燉雞汁之外,都冇乜點補過(係冇乜嘢可以食嚟補身),所以大肥豬就幫我BOOK番之前睇開嗰位中醫師,打算飲中藥嚟調整番個身體。

哈哈...中醫師話我都算復原得幾好,不過都要KEEP住飲嚟補番吓先得。所以由今日開始,飲苦藥的日子又來了~

超黑嘅苦茶,真係好難飲呀~

雖然係好難飲,不過我都知道苦口良藥,為左要養好個身體嚟照顧小小豬,所以都頂硬上啦!


*♡♡小肥豬♡♡* | 6th Oct 2010 | 小小豬篇 | (38 Reads)

4 OCTOBER 2010 (MON)

我地食完一個既豐富又好味嘅LUNCH BUFFET之後,見時間尚早,加上天氣又幾好,所以就帶去香港公園行吓。

當然唔少得要同小小豬影吓相,今次有小豬媽係度,所以我地影左好多全家幅呀~


其實帶小小豬嚟香港公園都有另一個目的,就係想去我地註冊嘅地方懷念吓~

行左一陣,小小豬開始扭眼瞓,所以我地影左幾張相就走。不過係準備離開公園時,可能小小豬知道就嚟可以返屋企,又開始古靈精怪啦~

香港公園對我地嚟講都幾重要,所以小小豬大個啲會再帶佢嚟過,等佢知道依度就係佢爸爸媽媽註冊嘅地方呀!


*♡♡小肥豬♡♡* | 5th Oct 2010 | 小小豬篇 | (69 Reads)

4 OCTOBER 2010 (MON)

仲有唔夠兩個星期我就要回歸上班一族,大肥豬為怕我會唔開心,所以就建議同我去食BUFFET等我開心一吓。

不過其實依個 BUFFET最主要嘅目的就係慰勞小豬媽依幾個月細心地照顧小小豬同我,加上我返工之後都係由小豬媽幫我地照顧小小豬,所以一定要好好報答小豬媽同小豬爸先得呀!

經大肥豬研究,最後我地去左港麗酒店GARDEN CAFE食LUNCH BUFFET~

雖然話係LUNCH BUFFET,不過啲嘢食一啲都唔失禮,真係好多嘢食仲不停咁有新鮮嘢食,尤其啲波士頓龍蝦同三文魚,真係超新鮮~

除此之外,啲甜品非常好食又多種類呀~

最特別就係佢地有個叫炒雪糕,都幾得意呀~

我地都食唔停口,仲食得好開心呀~

我地食得咁開心,又點少得小小豬呢。依啲佢就未食得住,唯有自備支奶奶飲住先啦~



係小豬媽餵緊小小豬嘅時候,大肥豬見出面有個游泳池,所以同我出去影左幾張相,真係好耐都冇影過人影相啦~

今日真係過左一個又飽飽又開心嘅下午,真係要多謝大肥豬為我安排。有個好錫我嘅老公,有對好照顧我嘅父母,仲有一個乖乖仔,真係覺得自己好幸福,我一定要好好珍惜呀!


*♡♡小肥豬♡♡* | 1st Oct 2010 | 小小豬篇 | (48 Reads)

30 SEPTEMBER 2010 (THU)

今日大肥豬放工返嚟即刻俾左張卡叫我好好收埋,原來係一張屬於小小豬嘅証件嚟呀~

其實依張係大肥豬公司嘅員工家屬証,我都唔大肥豬咁早就幫小小豬申請,仲幫佢揀埋張相添。

哈哈...繼出世紙之後,依張証件就係小小豬第二個身份証明啦!