香港新浪網 MySinaBlog
*♡♡小肥豬♡♡* | 28th Sep 2010 | 小小豬篇 | (45 Reads)

24 SEPTEMBER 2010 (FRI)

小小豬由滿月前一星期面仔就出左啲紅粒粒,上次去健康院都有問過姑娘,姑娘話係屬於BB瘡,好多初生BB都會有,唔會有問題。不過見都過左成半個月,啲粒粒都好似冇乜改善,都有啲心急。

記得上次去健康院姑娘話如果有問題可以再約時間見佢地,加上又好想知道小小豬依家有幾重,所以就打電話約時間。

姑娘話上午仲有位,叫我半小時後到。住係健康院對面真係幾方便,所以我同小豬媽就快快手執行裝出發啦!

基本上去到都唔洗點等,好快就去左磅重。今次磅小小豬已經有11磅6啦,哈哈...好開心呀!

等多一陣就見姑娘,姑娘見完小小豬見仔之後,叫我地放心,話啲BB瘡唔算好嚴重,只要冇發炎嘅情況都唔洗擔心,叫我地用室溫水洗面仔,保持清潔就得。

解決左問題,不過就俾姑娘話我地用手套包手仔係唔好,唔可以俾手仔活動,叫我地要幫小小豬剪指甲,放鬆吓手仔咁。

聽完姑娘咁講,所以我地返屋企就即刻幫小小豬剪指甲,小豬媽幫手捉住手仔,我就負責剪~

我用指甲夾剪完,再磨番平,應該都唔會利,唔會整到小小豬塊面仔。不過剪嘅時候真係好緊張,好驚剪痛小小豬,所以都用左好多心機同時間呀!


*♡♡小肥豬♡♡* | 25th Sep 2010 | 小小豬篇 | (44 Reads)

22 SEPTEMBER 2010 (WED)

每年中秋節都去奶奶屋企過節,不過今年就有少少唔同,因為多左小小豬同我地一齊過嘛!

上次奶奶嚟屋企探我地嘅時候,小小豬瞓左所以都冇影相,今次當然要幫小小豬同嫲嫲爺爺影相先啦~

食飽飽之後,我地就一家三口返屋企樓下公園行吓賞月,雖然就見唔到月光,不過既然係小小豬第一個中秋節,當然要帶埋佢感受吓氣氛啦!

唔好睇小小豬人仔細細,第一年過中秋就已經有兩個燈籠,一個係小豬爸送嘅兔仔燈籠,另一個就係LULU妹買嘅叮噹車仔燈籠,用嚟佈置部BB車幾好氣氛~

雖然有得玩,不過小小豬同平時一樣,一出街就覺覺豬,仲瞓得好冧添~

今年就我地幫小小豬玩住先,出年就可以自己玩,到時應該仲開心,小小豬可以周圍走啦!


*♡♡小肥豬♡♡* | 24th Sep 2010 | 小小豬篇 | (158 Reads)

18 SEPTEMBER 2010 (SAT)

一個人帶住小小豬出街嘅時候,推BB車總係好唔方便,冇理由落街買少少嘢都要推車仔。之前都已經買左一條揹帶,不過對初生BB就唔多合用,所以成日都想買番條初生用。

早幾日係FACEBOOK見到有位朋友仔買左條COTTON CANDY KIDS嘅單肩揹帶,我見都好方使咁,所以都想買條試吓。

終於今日托朋友幫我去買,一收到就即刻試吓~

其實就係類似印尼揹帶,當然個款式就IN啲,用落都好易又方便,基本上一個人都已經可以用到啦(當然我依個新手都要試幾次先成功)。


*♡♡小肥豬♡♡* | 22nd Sep 2010 | 小小豬篇 | (55 Reads)

18 SEPTEMBER 2010 (SAT)

因為今日我要返私家醫生度覆診,所以就叫小豬媽係屋企幫我照顧小小豬,大肥豬就陪我去覆診。

有小豬媽睇住,出門口嘅時候我都好放心,不過依個感覺就由食緊早餐時改變。食食吓就開始有啲唔習慣,總係覺得身邊好似少左啲嘢,有啲心掛掛嘅感覺,開始有啲掛住小小豬。

去到醫務所人個感覺就仲強烈,因為等左成個鐘先到我見醫生,係咁得閒嘅情況下,不停咁諗小小豬依家做緊乜,好想即刻飛返屋企呀!

終於都睇完醫生,醫生幫我做完產後檢查話我復完得幾好,叫我KEEP住做產後運動就得。一睇完醫生,我地就一支箭咁飛返屋企。

返屋企見到小小豬第一時間就錫左一啖,真係好掛住佢呀!

唉....今日離開小小豬只係一個上午,我都已經咁心掛掛,仲有唔夠一個月我嘅產假就放完,到時返工就唔可以成日見到小小豬,一定超掛住,都唔知點算好,真係好想小小豬成日係我身邊呀!


*♡♡小肥豬♡♡* | 20th Sep 2010 | 小小豬篇 | (56 Reads)

17 SEPTEMBER 2010 (FRI)

去院健康院檢查之後,我地就帶埋小小豬過海返小豬爸屋企整理啲文件。幫小豬爸做完嘢之後,我地就出左吉之島行街街,買左啲日用品俾小小豬。

行完街街之後,剛好到晚飯時間,所以就搵地方醫肚。諗左好耐,終於小豬媽同LULU妹引誘之下,我地最終決定左去元氣食壽司。

係成個懷孕過程都係入過壽司店一次,都只係食啲熟食嘢,所以我都真係好耐都冇食過壽司啦!

雖然坐完月可以話係一個解放,不過壽司始終都係唔敢食太多,只你食啲熟嘢,當然都有食幾件魚生壽司,真係忍唔到口,食兩件都應該冇問題...哈哈~

成餐飯小小豬都瞓,就連走嘅時候都係瞓得好甜。LULU妹見小小豬咁甜,所以就忍唔住幫我地影左張靚相,小小豬仲好似笑咪咪咁呀~


*♡♡小肥豬♡♡* | 19th Sep 2010 | 小小豬篇 | (47 Reads)

17 SEPTEMBER 2010 (FRI)

今日小小豬又要去健康院做一個耳力測試。

開頭以為好似平日咁要等磅重見姑娘先去做測試,不過原來只需要等入測試房做TEST冇得磅重。啲職員話因為磅重今日冇姑娘當值,所以冇得磅。仲諗住可以去磅重知道小小豬有幾多磅添,唉...要等兩個月去打針嘅時候先可以知道小小豬有幾重啦!

今日嘅健康院主要都係做產後檢查,所以都唔係好多BB,我都等左唔洗十分鐘就叫名入測試房。原本係我同小豬媽一齊陪小小豬入房做TEST,不過姑娘話要係一個極度安靜環境吓先做到,所以就叫小豬媽係門口等。

仲以為耳力測試就係耳仔前俾啲唔同聲音分別,睇吓有冇反應,不過原來唔係,姑娘係利用一部儀器再將一個細形HEADPHONE放入隻耳仔到。

成個過程都真係好簡單,唔駛一分鐘就搞點,姑娘話小小豬嘅耳仔完全正常,聽力完全冇問題。

小小豬又完成左一個測試,我又放心多一樣呀!


*♡♡小肥豬♡♡* | 17th Sep 2010 | 小小豬篇 | (41 Reads)

13 SEPTEMBER 2010 (MON)

繼尋日大M、小M同小茵探小小豬之後,今日又有另一位AUNTIE嚟探小小豬啦!

AUNTIE BRENDA專程出嚟探我地同送禮物俾小小豬,佢住嘅地方離我屋企都幾遠,所以都唔好意思要佢拎住咁大份禮物嚟呀~

係禮物包入面真係好豐富,有好多衫仔同玩具俾小小豬~

仲有一份親手製嘅麵粉花擺設,啲薑醋真係做得好真實好靚呀~

BRENDA咁遠嚟到都係想同小小豬玩,不過小小豬實在太好瞓,所以又唔可以抱抱影相~

等小小豬大少少嘅時候,真係要帶佢入去同BRENDA玩先得。

係度真係要再次代小小豬同AUNTIE BRENDA講多謝呀!


*♡♡小肥豬♡♡* | 15th Sep 2010 | 小小豬篇 | (53 Reads)

12 SEPTEMBER 2010 (SUN)

有朋友仔嚟探小小豬,今日嚟探小小豬嘅就係大M、小M同小茵,其實佢地仲約好左幾位朋友仔一齊,不過大家都有事唔得閒,今次嚟唔到。唔緊要啦,仲有大把機會,小小豬會實有機會同各位ANUTIE SAY HI呀!

大家嚟探小小豬,當然想同小小豬玩,不過小小豬真係唔合作,成個下午都係掛住瞓覺,只係差唔多到食奶奶時間眼瞇瞇起身,依個時間先可以同大家影返到相呀~

隨住小小豬要飲奶奶,佢地就離開,就係咁我過左一個好開心嘅下午啦!

除左感受到佢地嘅心意之外,仲送左啲禮物俾小小豬,真係多謝晒呀~


*♡♡小肥豬♡♡* | 13th Sep 2010 | 小小豬篇 | (61 Reads)

11 SEPTEMBER 2010 (SAT)

尋日先係小小豬滿月嘅大日子,不過今日就到要收到一份唔係咁好嘅禮物,就係要去健康院打滿月後打嘅第二次乙型肝炎疫苗。

一早起身先幫小小豬洗白白,之後同大肥豬一齊出發去健康院啦!

先去幫小小豬去磅重同度頭圍,依家小小豬已經有十磅幾重,聽到依個磅數,真係勁開心,証明小小豬健康咁生長緊嘛!

等左一陣就去見姑娘,姑娘先根據小小豬磅數話佢個生長情況好好,屬於中碼BB。同埋傾左好多依個星期小小豬嘅生活情況同故我地對一個月BB要注意嘅事。

之後就到左重頭戲,等叫名入打針房打針啦!

係等嘅時候我都好緊張,好擔心打針時小小豬會好唔舒服,又驚小小豬會哭得好利害,總之就係邊等邊驚啦!

一聽到小小豬個名,我地就驚驚咁行入打針房。原本姑娘叫我捉住大脾仔,不過我實在太驚,所以將依個重任交左俾大肥豬,我就將小小豬抱到實一實。

嘩...姑娘真係好手勢,唔洗十秒鐘就已經打完,小小豬只係姑娘吉針嗰時喊左一聲,好快就已經冇再喊,所以我都唔洗咁心痛。

姑娘話依支針係好溫和唔會發燒,聽到都唔太擔心。下次再打針就係一個月後,到時要打兩針,希望都係依個好手勢姑娘幫手打,咁小小豬就應該冇咁辛苦,我又唔洗心痛呀!


*♡♡小肥豬♡♡* | 12th Sep 2010 | 小小豬篇 | (102 Reads)

10 SEPTEMBER 2010 (FRI)

唔覺唔覺小小豬終於都已經一個月大,即係滿月嘅大日子啦!

對我嚟講都係一個好重要日子,因為終於可以好暢快咁洗白白同洗頭。當小豬媽嚟到屋企時,我就即刻煲碌柚葉水去左洗白白,真係從未如此舒服過呀!其實坐月途中都有洗過白白,不過都只係用薑水淋身咁沖,都係冇淋花灑咁舒服嘛。

之後小豬媽就準備用品係屋企拜神,完成所有儀式後,小豬媽就送左份大禮物俾小小豬,係一條保平安嘅金鏈呀~

滿月就即係可以出街,所以小小豬就坐車車去街街啦~

其實都唔係去邊,只係去酒樓一家人食晚飯。滿月又點少得紅雞蛋呢?有小豬媽自家制紅雞蛋~

滿月大個仔啦,又點可以唔同小小豬影相呢~

食飽飽返到屋企之後,我同大肥豬都俾左封利是小小豬,等佢可以健健康康、快高長大、最重要就係聽聽話話~


*♡♡小肥豬♡♡* | 10th Sep 2010 | 小小豬篇 | (81 Reads)

9 SEPTEMBER 2010 (THU)

由出院到依家小小豬用左差唔多六包 NB 片片,不過由今日開始轉用 S 碼啦!

其實上星期都開始覺得NB片片都有啲緊,但又仲未用晒剛開嗰包 NB 片片,所以就等用晒先換。不過今日發覺緊嘅程度嚴重左,小小豬兩個脾仔都箍到紅晒,所以都唔等,即刻幫小小豬轉用S 碼,等佢可以舒服啲。

早前見到包麵包超人S 碼片片做特價,所以就貪得意買左一包嚟試。我拎上手就覺得比P字頭片片仲軟綿綿,我估都應該都幾舒服呀~


*♡♡小肥豬♡♡* | 9th Sep 2010 | 小小豬篇 | (39 Reads)

8 SEPTEMBER 2010 (WED)

今日小小豬又收到一份禮物,真係開心成日都有禮物收,小小豬真係多人錫呀!

今次份禮物係AUNT CHERRY送,有衫仔...帽仔..仲有封利是添~

真係要再次多謝AUNTIE CHERRY呀!


*♡♡小肥豬♡♡* | 9th Sep 2010 | 小小豬篇 | (62 Reads)

2 SEPTEMBER 2010 (THU)

係小小豬未出世之前,嘉汶表妹主動提意買張HIGH CHAIR送俾小小豬,但當時我覺得好似唔係太有需要,所以都未有去買。

不過當小小豬出世返左屋企之後,我就覺得都有依個需要,因為有時係廳食飯或者睇電視時,都可以抱小小豬落張HIGH CHAIR睇住佢,所以就即刻上網訂左張,仲好快手咁係尋日送到添~

因為送貨要收支票關係,所以就叫小豬爸先幫我寫左支票先。就係依個時候,小豬爸就話張HIGH CHAIR等佢買,就係咁....小豬爸又送多樣禮物俾小小豬啦!

尋日送貨時小小豬就訓左冇得試,今日飲完奶奶之後就試坐,估唔到小小豬都鐘意坐,仲成朝都係張HIGH CHAIR度覺覺豬添。

當佢眼仔碌碌時,小豬媽就拎起相機幫小小豬影左好多古靈精怪相呀~



*♡♡小肥豬♡♡* | 8th Sep 2010 | 生活點滴 | (27 Reads)

2 SEPTEMBER 2010 (THU)

繼BLOG同FACEBOOK之後,依家又多左樣嘢玩,就係學人地玩吓依排勁HIT嘅微博啦!

依家仲係試玩階段,所以都唔算太多嘢UPDATE,我會努力學習。

有玩開嘅朋友仔就記得多多關注我啦~


http://t.sina.com.cn/1788280724

 

 


*♡♡小肥豬♡♡* | 7th Sep 2010 | 小小豬篇 | (62 Reads)

1 SEPTEMBER 2010 (WED)

今日再一次去健康院做檢查,主要都係見醫生睇吓黃疸指數。

係未見幫小小豬做任何檢查前,我就俾叫名去見姑娘。原來係我之前做產前時被抽樣做左個關於產後抑鬱嘅調查,今次就要做番個跟進部分。

做左一輪問卷同姑娘傾計之後,姑娘話會依據我嘅報告去評定我有冇產後抑鬱,如果有問題就會再打俾我再作進一步跟進。當然我知我一定冇問題,所以都唔擔心會收到電話。

我見完姑娘之後,就到小小豬去就磅重。經過一星期努力,小小豬已經有差唔多九磅,雖然唔算係好多,不過都好安心,起碼冇輕到嘛!

醫生先檢查黃疸指數,個數字都好理想,完全冇問題,又可以順利過一關。之後醫生睇番小小豬嘅磅數,都話好好,仲話小小豬係屬於中碼BB添。

下一次再去健康院就係滿月後去打針,聽到又令我擔心起上嚟,希望當日可以順順利利,小小豬打完針之後唔好有唔舒服或者發燒啦!


*♡♡小肥豬♡♡* | 6th Sep 2010 | 生活點滴 | (138 Reads)

27 AUGUST 2010 (FRI)

由於開刀關係,所以由小小豬出世之後都唔可以食補品身,小豬媽話起碼要過多一個月先可以食藥補身。

雖然話唔補得,不過生完BB都要開始補吓,唔用得藥材,小豬媽就話燉雞汁俾我飲,清清地咁補吓個身先,等遲啲可以補得先食藥材嗰啲。

原本小豬媽話我出院之後開始每日燉雞汁俾我飲,不過我唔爭氣,係出院之後都唔係好舒服,啲咳未清晒之餘仲有少少感冒,所以一直都未開始燉。

終於到今日我好番晒,所以小豬媽就燉雞汁俾我飲啦~

依碗雞汁係成隻雞嘅精華所在,真係超甜勁好味。

小豬媽話今日開始日日飲,補身之餘仲等我就會精神啲。最好就係雞汁係好清甜又唔躁,就算日日飲我都唔會肥呀!


*♡♡小肥豬♡♡* | 5th Sep 2010 | 小小豬篇 | (111 Reads)

26 AUGUST 2010 (THU)

今日由於係我生日關係,所以大肥豬請左半日假諗住早啲返屋企陪我,不過係佢返屋企之前,就去左做一件好重要嘅事,就係幫小小豬拎出世紙(係我生日當天去拎,好似又幾有意思哦...哈哈~)。

拎左出世紙,小小豬就有一個身份啦~



有出世紙就即係小小豬已經有名啦!

中文名就係小豬媽嘅相士朋友幫我地改,個名係會夾小小豬,對佢好好咁哦。不過為左幫小小豬保留少少私隱,所以我都唔打算公開。

英文名方面,其實由小小豬未出世都已經諗好左,係我同大肥豬一齊諗,我地都諗左好耐,因為我同大肥豬英文名都係『K』字頭,所以都想搵個都係『K』字頭,終於都幫小小豬改左個幾好聽嘅英文名~~~KINSEY,解作為勝利的王子。

所以由今日開始,大家都可以叫小小豬叫KINSEY啦!


*♡♡小肥豬♡♡* | 4th Sep 2010 | 小小豬篇 | (63 Reads)

25 AUGUST 2010 (WED)

過左十二朝都係時候要派薑醋,所以今日就叫左小豬媽幫我拎返學校。學校加加埋埋都有成五十幾人,已經叫小豬媽加足料,希望夠大家享用啦!

小豬媽負責幫我拎到學校門口,之後就請糖糖同史迪哥哥幫我手分俾其他同事,真係好在有佢地幫手。

今日除左係我派薑醋之外,我同小小豬都收到禮物,係糖糖送俾我地呀。

依個得意BEAR BEAR床鈴係俾小小豬~

依件MARIE衫仔就係送俾我嘅生日禮物,暫時都未著得住,等我修番個身先,不過相信都應該好快可以著啦~


*♡♡小肥豬♡♡* | 3rd Sep 2010 | 小小豬篇 | (55 Reads)

25 AUGUST 2010 (WED)

係尋日小豬爸生日飯局上,雖然小小豬冇出席,不過都有禮物收,仲係兩份添。

依兩份禮物都係小豬媽一位朋友仔送,由小豬媽幫小小豬代收,今日嚟照顧我地嘅時候,就拎埋過嚟俾小小豬啦!

先嚟一件靚靚黃色夾衣衫仔~

再嚟一個好得意嘅玩具,暫時小小豬就仲未玩到,等佢六個月左右先可以玩。不過我開嚟睇過,又有音樂又有得拍,到時小小豬應該都鍾意玩呀~

哈哈...真係要代小小豬同依位AUNT講多謝呀!


*♡♡小肥豬♡♡* | 2nd Sep 2010 | 小小豬篇 | (248 Reads)

23 AUGUST 2010 (MON)

開頭都以為差唔多一個月要去打針前先需要去母嬰健康院幫小小豬做登記,但係BABY-KINGDOM見有其他媽媽教路,出世之後就可以去健康院登記兼做檢查,所以就即刻打電話去約今日啦!

小豬媽陪我一齊去到健康院,我先做左登記,填左FORM之後就去磅重同俾姑娘洗肚臍。

之後我地繼續等,等左一陣就入姑娘房見姑娘傾計,問左好多小小豬出世到依家嘅日常生活問題,整體上姑娘都話小小豬生長都幾好。

原來除左BB檢查之外,仲會幫媽咪做產後檢查,不過因為我係開刀關係,姑娘好有善話佢都都只係做傳統嘅普通檢查,建議我番私家醫生做產後檢查。冇所謂啦,我完全冇諗過佢地會幫我做檢查。

同姑娘傾完計之後,就去見醫生幫小小豬做個檢查,其實都真係一個小小嘅檢查,只聽吓心跳,睇吓手仔腳仔咁,不過醫生都話整體上小小豬都算生長得唔錯,聽到都安心啲。

一個星期後要返嚟再見醫生CHECK黃疸,雖然上次係私家醫生都CHECK過冇問題,但聽BABY-KINGDOM媽媽話私家同政府個黃疸指數都唔同,不過相信一定會順利過關呀!


Next