香港新浪網 MySinaBlog
*♡♡小肥豬♡♡* | 30th Aug 2010 | 小小豬篇 | (68 Reads)

18 AUGUST 2010 (WED)

今日收到網友仔PRINCESS YOYO寄來的一份禮物,主要係恭賀我地個小小豬出世呀~

YOYO真係好有心思,除左買左對粉藍免兔仔鞋同一個豬仔沐浴公仔俾小小豬之外,仲親手造左張BB咭添。

真係要再次感謝YOYO嘅禮物同心意!


*♡♡小肥豬♡♡* | 29th Aug 2010 | 小小豬篇 | (114 Reads)

17 AUGUST 2010 (TUE)

今日約好左私家醫生返去醫務所覆診,睇吓我個傷口之外,亦都幫小小豬個健康同黃疸情況。

有小豬媽同LULU妹陪我一齊去,為怕我整到個傷口,所以一個幫我抱住小小豬,一個幫我拎住大大個媽咪袋,所以我都好輕鬆。

抱住小小豬我地當然唔去迫地鐵,所以就搭的士去銅鑼灣。話事話依排都真係成日搭的士過海,冇辦法啦..之前因為肚仔大大怕迫親,今次又為左小小豬,不過相信都係最後一次啦...哈哈!

上到醫務所,等左一陣就到我地見醫生啦!

醫生先幫小小豬檢查身體,經過一輪檢查,醫生話小小豬身體好好,就連黃疸指數都繼續下降。我成日都好驚自己唔識照顧小小豬,攪到佢唔舒服,聽到醫生咁講,都真係放心晒呀!之後醫生就幫我做檢查,我個傷口及身體進展情況都唔錯。

雖然傷口好好,不過我就有另一個問題,就係由小小豬出世至今都已經有七日,不過仍然未有任何谷奶嘅感覺,所以同醫生傾過之後,都決定放棄餵母乳。雖然都有啲唔開心,不過都冇辦法,唯有俾多啲心機用奶粉餵小小豬,等佢到可以吸收到好好嘅營養啦!

睇完醫生又飛的士返屋企,返到屋企係小小豬訓覺時,小豬媽就幫小小豬扮阿拉伯王子~

不過,原來小豬媽咁打扮係有原因,雖然房個冷氣位係唔會直接吹到小小豬,但怕房入面嘅冷氣吹到,所以用紗巾仔包住,擋吓啲風,唔好吹到個頭仔。哈哈...真係攪笑之餘又幾好哦!


*♡♡小肥豬♡♡* | 26th Aug 2010 | 生活點滴 | (68 Reads)

26 AUGUST 2010 (THU)

哈哈...又要打尖出左依個POST先,今日係另一個重要日子,知唔係就係我生日啦!

雖然今年生日要留係屋企坐月,冇得出街慶祝,不過今年有啲唔同,第一年以媽咪身份嚟慶祝,多左小小豬同我一齊過,所以都特別開心。

既然係生日,當然唔放過同今年收到最好生日禮物...我寶貝仔影番幾張相啦~


可能開始扭眼訓,所以小小豬眼睛唔望鏡頭,不過唔緊要小小豬真係表情多多,好攪笑呀!

大肥豬今日都俾左個超級大驚喜我,佢返到屋企第一時間就送左一扎好靚嘅花花同蛋糕俾我,完全冇諗過佢會去買花花送俾我,真係超級開心,大肥豬真係好鍚我呀~

晚飯之後,小豬媽、小豬爸仲有LULU妹就陪我一齊食生日蛋糕同我慶祝,小豬爸仲俾左封大利是我添~

雖然今年生日平平淡淡咁過,不過成家人陪我一齊慶祝,我真係過得好開心呀!


*♡♡小肥豬♡♡* | 25th Aug 2010 | 好友與我 | (55 Reads)

16 AUGUST 2010 (MON)

由於入左醫院都有成個星期,今日終於可以睇吓依幾日收到嘅信,係咁多封信入面就發現左有一封掛號信通知書,所以就叫左LULU妹幫我落郵局拎。

原來係好友CARMEN送俾我嘅生日禮物,有好多MARIE呀。仲有一份係迪迪尼買嘅衫仔送俾小小豬呀~

哈哈...真開心...又有禮物收,係度再次同CARMEN講多謝先得啦!


*♡♡小肥豬♡♡* | 24th Aug 2010 | 生活點滴 | (56 Reads)

24 AUGUST 2010 (TUE)

仲有好幾篇有關小小豬嘅網誌未打,不過依一篇係要打尖先,因為今日係小豬爸嘅農曆生日呀!

往年小豬爸嘅農曆生日我地都會約埋好多屋企人同小豬爸去酒樓食飯慶祝,今年當然都係一樣,唯一唔同就係因為我仍在坐月關係,所以我地一家三口就未能出席。

雖然我地冇出席,不過我都有表示,仲係一個大驚喜,就係以小小豬名義送左個生日蛋糕俾小豬爸。

小豬爸第一年以公公身份接受生日蛋糕,相信佢一定好開心呀~


*♡♡小肥豬♡♡* | 24th Aug 2010 | 小小豬篇 | (144 Reads)

15 AUGUST 2010 (SUN)

尋晚係屋企食晚飯嘅時候,經小豬媽提醒,原本有一樣好重要嘅嘢我地係冇買,就係一個嬰兒對講機。

因為小小豬張BB床放左係我地間房入面,當我地食飯時,為怕嘈到小小豬,所以就把門關上。但原來我地係廳食飯時係會心掛掛怕小小豬會突然間喊,所以成日都會係房行出行入,睇吓小小豬個情況,所以就醒起要買部嬰兒對講機,等我地可以透過對講機聽到喊聲先入房照顧小小豬。

由於我正在坐月唔可以出街買,所以在場嘅嘉汶表妹就即刻話幫我去買,仲好快係今日買嚟送俾小小豬啦~


*♡♡小肥豬♡♡* | 23rd Aug 2010 | 小小豬篇 | (170 Reads)

14 AUGUST 2010 (SAT)

唔知係唔係知道有得出院關係,所以成朝都覺得時間過得好慢咁,好唔容易先等到十點醫生嚟巡房同我做檢查(其實醫生日日都係咁嘅時候嚟啦....只係我勁心急呀...哈哈)。

一見到醫生就得嚟一個好消息,就係小小豬黃疸指數都好理想,即話我地可以一齊出院返屋企。聽到個消息真係開心到連醫生幫我拆線都唔覺得痛呀!

聽到依個好消息,大肥豬即刻就去左同姑娘跟進賬單,我就快手快腳咁執埋個包袱,換好晒衫準備出院。

不過唔知係唔係勁多人出院,我地等到小豬媽趕到嚟時,張賬單仲係計緊,就連小小豬都未幫好換衫,真係等到人都傻左。最後到要等到差唔多二點幾叫先攪好啲手續,等埋小小豬換衫,離開醫院時都三點幾啦!

返到屋企真係人到精神晒,完全唔覺得攰,見小小豬又冇訓到覺,所以就要影番張靚靚全家幅先。上次係醫院嗰張我個LOOK實在太唔得,今次依張靚好多,最重要係小小豬都有望鏡頭嘛~

係我同小小豬玩遊戲時,係LULU妹偷影左我,不過我又幾鐘意哦~

雖然有得出院真係一件好開心嘅事,不過亦代表有生B蜜月期會正式結束,唔可以有乜事可以搵姑娘求救,小小豬將會24小時係我身邊,我要學識好好照顧佢,一個新的挑戰正式就開始了。

不過我身邊有大肥豬同小豬媽嘅幫手,我相信一定可以做到呀!


*♡♡小肥豬♡♡* | 22nd Aug 2010 | 小小豬篇 | (178 Reads)

13 AUGUST 2010 (FRI)

今朝早醫生嚟做檢查時表示我傷口及身體進展情況都好好,可以係明天出院。

不過確實有冇得出院就要睇小小豬,因為小小豬都算有少少黃面,雖然做左黃疸測試都唔算太嚴重,但都要係明天出院前再做多一次測試,冇問題先可以一齊出院。

聽到醫生咁講都有少少擔心,不過既然醫生講唔算嚴重都應該冇問題,加上小豬媽話每一個BB都會黃嘅情況,都屬於正常,只要唔好嚴重到要照燈就得。

已經係第五日,都唔知點解我仲上奶,就連谷奶嘅感覺都未有,所以都未真正有俾小小豬飲到母乳,姑娘教就先要俾奶粉補吓先,唔係就會餓親小小豬呀~

依幾日小豬爸同LULU妹都有日日嚟醫院探我同小小豬,不過就未抱過,佢地話小小豬太細粒,怕會整親。但今日係小豬爸生日,所以小豬媽就幫手擺好位置,等佢可以抱吓小小豬同埋影番張相,當同小豬爸慶祝生日啦~


*♡♡小肥豬♡♡* | 21st Aug 2010 | 小小豬篇 | (183 Reads)

12 AUGUST 2010 (THU)

今日一早起身覺得有啲唔對路,成身都忽冷忽熱,叫姑娘幫我探熱,原來我發燒,攪到成朝早都唔敢抱小小豬,唔敢帶返病房餵奶,怕會有影響。

我唔可以餵奶,大肥豬又未熟手餵奶,所以冇見小小豬成個早上都有啲心掛掛,只好去嬰兒房隔住玻璃咁望。

當小豬媽嚟到嘅時候,就係我近距離望小小豬嘅時候~

因為我仲未上奶,都係要用奶粉餵小小豬,依個工作原本係由姑娘幫手,不過當然自己人餵好啲,起碼有心機啲嘛,所以依個重任就交由小豬媽幫手啦~

小小豬飲奶時真係表情多多,好攪笑呀~

經小豬媽耐心地餵,小小豬飲左3安士奶,比平時姑娘餵多好多呀!

夜晚我嘅燒已經退左,不過就變左開始咳,一咳就影響到個傷口,攪到勁痛。醫生話係正常,因為做手術時係全身麻醉,插喉時係會導致痰多同咳,開左啲咳藥水俾我,等我可以訓得好啲。


*♡♡小肥豬♡♡* | 20th Aug 2010 | 小小豬篇 | (166 Reads)

11 AUGUST 2010 (WED)

今日一早醫生就嚟幫我做檢查,睇左我傷口之後,終於都俾我落地行吓。不過落床嗰一刻,感覺到個傷口好痛,就算有大肥豬扶住借一借力,都覺得痛。

醫生叫我行多啲,所以大肥豬就捉我周圍行,當我地慢慢行時,可能行多左路,覺得又唔係特別痛,或者係個醫生手勢好,所以漸漸都接受到同適應到,只係上落床時攪到個傷口先覺得痛,比我想像中好好多啦!

既然可以落床,我當然第一時間去嬰兒房接小小豬返病房抱吓同餵奶。

冇見一日,小小豬好似有啲唔同,塊面仔好似細左啲,不過小豬媽話咁係正常,因為BB係會收水。聽完之後都冇咁驚~

今日除左小豬媽、小豬爸同LULU妹嚟醫院探我之外,有幾位同事嚟探我同小小豬,佢地仲送左啲禮物俾小小豬,真係好有我心呀~


*♡♡小肥豬♡♡* | 19th Aug 2010 | 小小豬篇 | (225 Reads)

10 AUGUST 2010 (TUE)

雖然係食左訓覺藥,不過一個人訓係病床上始終都係又驚又緊張,所以都訓得唔係太好,可以話唔係太訓得著。

做好晒所有準備,諗住可以順順利利,可以係原定BOOK好時間迎接小小豬。

點知當我訓到半夜時分,突然好想去洗手間,就係我小解之後,我發現啲小便同平日的係好唔同,我猶豫左一陣就開始識驚,雖然個肚冇痛,不過都好怕嗰啲係羊水,所以就按鐘CALL姑娘睇。姑娘睇完之後,再同我上病床做檢查,原來嗰啲真係羊水,我係已經穿左水啦。

姑娘同我主診醫生通電話後,決定要提早幫我做手術,等小小豬早啲出世。當時真係好驚,驚到做乜都唔知,只係識得打電話同大肥豬講我個情況,叫佢即刻嚟醫院。依個時候我真係好緊張,就連手術衫都唔識得換,要姑娘邊安慰邊幫我著。

姑娘佢地好快就幫我準備好晒,推我落去做手術。當我落到手術室等候區時,終於都見到大肥豬趕到嚟,見到佢我個人都定左啲。之後就見到我主診醫生同麻醉師,唔知係唔係我太緊張關係,原本我係安排左半身麻醉,不過最後醫生們都決定幫我做全身麻醉。

我推入手術室做好晒全身麻醉之後,就開始做手術。當完成手術之後就開始醒,麻醉師啲時間真係計算得好準,迷迷濛濛醒就見到大肥豬企左係手術室門口等埋我上病房。

上到病房時個人都開始醒,當我見到大肥豬時,佢就俾左小小豬相我睇,仲同我講小小豬仔仔有七磅十五安士呀~

因為我地之前係安排左陪產,所以大肥豬都入左手術室見証小小豬嘅來臨,所以就可以影小小豬嘅第一張相,仲可以第一個抱小小豬添。(其實我真係好羨慕...邊個叫我太驚慌攪到要全身麻醉呀~)

大肥豬係病房陪左我一陣之後,由於病房係唔可以陪夜,但個時間又差唔多天光,所以大肥豬就留左係醫院大堂等,等到可以上病房時間先上嚟再陪我。

訓醒一覺就見到大肥豬坐左係我床邊,知道佢捱左成晚夜又冇覺好訓,我都真係既感動又心甜呀!

由於我唔可以落床,所以全日我都係未見過小小豬,只係識得訓同睇係小小豬同大肥豬張合照。

就連下午嚟探我嘅小豬媽同小豬爸都可以去嬰兒房見小小豬,嗰時都真係有啲唔開心。不過之後我地以餵奶之名,終於都可以見到小小豬,仲影左第一張合家幅啦~

當然唔少得我同寶貝仔影嘅合照啦~

雖然比我地原先安排嘅時間早左來臨,令我驚慌又緊張,仲要俾醫院當左做緊急服務收多啲費用。不過見到小小豬嗰一刻真係好開心,什麼都冇所謂啦~

除左小豬媽、小豬爸同LULU妹嚟探我之外,嘉汶表妹同姑姐都嚟左探我同小小豬,仲俾左封利是同BB卡我地呀~


*♡♡小肥豬♡♡* | 18th Aug 2010 | 小小豬篇 | (236 Reads)

9 AUGUST 2010 (MON)

今晚係小豬媽屋企食過晚飯之後,我地一行五行就由小豬爸車我去醫院,作好準備迎接明天小小豬來臨。

我地八點左右去到醫院,不過同時間有另外兩位孕婦正在辦理入院手續,所以都等左差唔多一個鐘先到我辦手續。雖然有都好多人陪住我,不過係等嘅過程都有啲緊張。

到我嘅時候大肥豬就同我一齊入姑娘房辦手續。原來都有好多FORM要填,仲有好多問卷同埋簽好多個名,總之攪攪吓都攪左成大半個鐘先登記好。姑娘幫我做左個簡單產前檢查之後,就準備上病房啦~

小豬媽同小豬爸等我安定左之後就走,大肥豬就留多一陣陪我,係依個時候就影埋最後一張大肚相留為紀念~

大肥豬等到姑娘趕先離開醫院,我就準備訓覺。不過,當時嘅情況又點會訓得著,所以就問姑娘拎左早前醫生開俾我嘅訓覺藥,等我可以好好訓一覺好,有足夠嘅休息迎接明天小小豬來臨。


*♡♡小肥豬♡♡* | 11th Aug 2010 | 小小豬篇 | (255 Reads)

10 AUGUST 2010 (TUE)

小小豬終於都可以同大家見面啦,不過由於仍在醫院休息當中,等我返到屋企先慢慢同大家分享。

先同大家分享我地第一張全家幅先啦~


*♡♡小肥豬♡♡* | 9th Aug 2010 | 幸福孕記 | (486 Reads)

9 AUGUST 2010 (MON)

時間話快唔快....話慢唔慢,終於嚟到最後嘅懷孕一日,因為我今晚就要準備入院,等待聽日小小豬嘅來臨。

今晚係小豬媽屋企食完飯之後,佢地就會陪我一齊入院啦!

依家嘅心情真係好緊張同擔心,仲攪到依幾晚我都訓得唔係太好,心情比起結婚前仲緊張幾百倍,終於明白到點解人地會話生仔大個天。

我都知道緊張同擔心對小小豬唔會有幫助,所以依家真係乜都唔諗,好好休息埋今日,開開心心咁等待明天小小豬來臨我身邊。

不過大家可以放心,小小豬出世之後,我會係可以情況下同大家分享,所以大家都要留意呀!

 

CafeMom Tickers


*♡♡小肥豬♡♡* | 8th Aug 2010 | 幸福孕記 | (247 Reads)

8 AUGUST 2010 (SUN)

因為工作關係,大肥豬成日都會同啲中醫師有聯絡,係早排佢同一位女中醫師傾開計,知道我就嚟生BB,所以就介紹左啲對我產後有益嘅嘢俾我地。

醫師話我產後唔係太建議飲水怕會有水腫,所以就話生完之後即刻可以飲桑寄生茶代替水,對產後會有幫助。

就係咁...今日大肥豬落街買餸時就去藥材鋪買左一盒桑寄生返嚟~

大肥豬試煲左一次,仲試飲過話個味道都可以接受。佢仲會負責依幾日都煲嚟醫院俾我飲,等我身體好啲咁話。

雖然未有得飲住,不過聽起都覺得好心甜呀!

 

CafeMom Tickers


*♡♡小肥豬♡♡* | 5th Aug 2010 | 甜蜜生活 | (65 Reads)

4 AUGUST 2010 (WED)

雖然仲有廿幾日先到我生日,不過今日又收到一份本年度嘅生日禮物,份禮係大肥豬送俾我,係一部我好想要嘅粉紅色電話嚟呀~

哈哈...依部電話仲有一個重要地方,就係一部CYBER-SHOT相機電話嚟,佢有成五百萬像數,影起相上嚟都真係幾靚。大肥豬話送依部相機電話俾我,係等我可以隨時隨地同小小豬影靚相。

雖然依部電話唔算係最UPDATE嘅款式,又唔係什麼iPhone電話,不過對我嚟講已經好滿足,因為大肥豬依份心意係比其他一切都重要嘛!


*♡♡小肥豬♡♡* | 4th Aug 2010 | 幸福孕記 | (210 Reads)

4 AUGUST 2010 (WED)

今日又去左母嬰健康院做檢查,不過今次係最後一次啦!

今次又約左十點半去做檢查,等左大約一個鐘左右就到聽到叫名俾姑娘摸肚,開頭都以為又排錯隊。後來問姑娘佢話今次唔洗見醫生佢摸就得。雖然依位姑娘都好細心咁幫我摸肚,不過當佢用力按嘅時候,都真係勁痛,好驚會整到小小豬呀!

按完肚仔後,姑娘話小小豬好正常,頭仔已經落左盤骨位,當我問佢係唔係落得好低時,佢又唔回答我,只係問我準備好走佬袋未,聽完佢咁講,擔心心情又嚟啦。

之後等左半個鐘左右就見助產姑娘,姑娘問左我依個星期狀況之後,就叫我要小心啲,因為睇我周數,真係可以隨時生得,留意平日多啲有冇作動異樣咁話。

平覆左幾日嘅心情,今日又再緊張番添,不過我知道緊張對小小豬都唔會有幫助,所以我要乜都唔諗,專心咁休息,好好迎接小小豬來臨。 

 

CafeMom Tickers


*♡♡小肥豬♡♡* | 3rd Aug 2010 | 幸福孕記 | (149 Reads)

2 AUGUST 2010 (MON)

一個星期又過,終於都嚟到最後一次係私家做產檢啦!

入到醫務所第一時間又係要磅重,一上磅都真係唔可以相信,因為我竟然係依個星期輕左,雖然都唔算多只係一磅,不過真係都開始有少少驚,驚小小豬係個肚仔入面唔健康。

當醫生見到我嘅時候,第一時間就問我仲乜事會輕左,一聽到都真係有啲擔心,好驚有事。不過醫生觀察左一陣,就話因為我對腫豬腳已經消左腫,所以減輕左鹽分,咁輕左一磅都算正常,聽到醫生咁講都冇咁擔心。

同醫生傾完之後,就去照超聲波睇吓小小豬個生長情況。醫生話小小豬整體上生長情況都係好好,各樣情況都好滿意。不過個頭仔繼續向下移,已經入左三分之二,照個情況嚟好有可能係比預期早出世。

唉....聽完醫生咁講,我個心情又真係開始緊張起嚟,好驚又會突然間作動,攪到我真係邊度都唔敢去,好驚隨時會生得呀!

我都已經BOOK好左下星期一入醫院迎接小小豬,希望小小豬乖乖地耐心等多幾日,等一切都可以順順利利啦!

不過都會以平常心去看待,最重要都係小小豬健康。

 

CafeMom Tickers


*♡♡小肥豬♡♡* | 1st Aug 2010 | 甜蜜生活 | (72 Reads)

1 AUGUST 2010 (SUN)

話咁快就已經踏入八月,之前都已經覺得八月係一個好重要嘅月份,因為我係八月壽星嘛。不過由今年開始,八月對我係極度重要,因為我嘅小小豬即將來臨,依家正式開始倒數,真係既緊張又期待呀!

因為小小豬即將來臨,所以我放假依幾日都係日日留係屋企,唔敢周圍去,就算落街,我嘅活動範圍都只係屋企附近個商場,不過為小小豬安全都冇所謂啦!

今日大肥豬係屋企陪左我成日,佢見我個肚仔又大左好多,所以就提意同我影幾張大肚相留個紀念。

當然大肥豬係唔會帶我出街影,所以就嚟左一輯自家STUDIO嘅大肚相啦~

原來我個肚仔都真係大左好多,大到連肚紋都出埋嚟,不過都算好,係臨生依個月先嚟爆,加上又唔算多,所以都叫好彩啦。

真係要好好享受埋依個懷孕倒數時間,因為都有啲唔捨得小小豬係我肚仔郁動嘅感覺呀!

 

CafeMom Tickers