香港新浪網 MySinaBlog
*♡♡小肥豬♡♡* | 30th Jul 2010 | 幸福孕記 | (141 Reads)

29 JULY 2010 (THU)

哈哈...真開心...因為由今日開始我放假啦

不過,我仲未正式放產假,嚟緊依七日(連埋星期六日)係放我本年度嘅大假,之後番多一日工,跟住就開始放我嘅產假。

雖然學校唔可以將大假連產假一齊放,要係中間返一日工,但講真我嘅工作都已經交低晒俾同事,所以嗰日返工都係HEA吓咁(相信嗰日我嘅工作都係上網..上網再上網...哈哈),所以都算可以接受。

好在LULU妹都係放假中,所以由今日開始佢就嚟左我屋企住,諗住有人可以陪我之餘,有乜事起上嚟都多個人照顧我嘛,所以依幾日我都應該唔會悶嘛!

由今日開始,我嘅工作就係訓...訓...訓,休息多啲等小小豬作最後衝刺呀!

 

CafeMom Tickers


*♡♡小肥豬♡♡* | 29th Jul 2010 | 幸福孕記 | (75 Reads)

28 JULY 2010 (WED)

越接近預產期,就要一個星期去母嬰健康院做檢查啦!

今次就約左十點半先去做檢查,一上到去都見到唔係太好人,就連檢查度血壓、磅重、驗小便都唔洗排隊,心諗一定唔洗等太耐,好快可以走得啦。

不過....原來唔係好似我所諗,等吓等吓都等左成個幾鐘先見助產姑娘,可能上星期先見過姑娘,所以都冇乜特別嘢同我講,只係問我有冇啲乜異樣,成個過程都唔洗三分鐘。

之後又等左差唔多成個鐘就去可以見醫生,今次見番上次嗰位溫柔醫生幫我按肚,所以都安心啲。醫生幫我按肚同聽心跳,都話小小豬好正常,頭仔已經落左盤骨位,不過就未去到最低位置,咁我都放心啲,即應該未生得住啦!

下星期三又去再政府做檢查,不過應該都係最後一次啦!

 

CafeMom Tickers


*♡♡小肥豬♡♡* | 28th Jul 2010 | 幸福孕記 | (56 Reads)

26 JULY 2010 (MON)

我地離開醫務所之後,見又末夠鐘同小豬爸食晚飯,所以我地就去行吓SOGO嬰兒部,睇吓仲有冇啲濕碎嘢未買。

點知行行吓,小豬媽就行左入HALLMARK睇衫仔同帽仔,佢話上次執俾小小豬出院著嗰套衫唔靚,要著套型仔啲先得。

就係咁小豬媽就買左啲衫仔同帽仔俾小小豬啦~

依套衫仔都幾貴,不過小豬媽話個質地好好,小小豬著上身一定好舒服,所以貴少少都值得呀!

 

CafeMom Tickers


*♡♡小肥豬♡♡* | 27th Jul 2010 | 幸福孕記 | (65 Reads)

26 JULY 2010 (MON)

擔驚受怕嘅兩星期又過左,又係時候去私家做產檢,可以見吓小小豬啦!(不過唔知點解依兩個星期過的好似好慢咁)

入醫務所第一時間當然又係要磅重,依兩個星期我總共重左三磅,俾預算中重多左一磅,但姑娘話都唔算誇張可以接受。

等左一陣就見醫生,醫生先關心吓我依兩個星期嘅情況,再睇埋我對腫豬腳,之後就同我量血壓。今次上壓係120,不過醫生話我依個周數都算正常唔太高,叫我唔洗擔心。

同醫生傾完之後,就去照超聲波睇吓小小豬個生長情況。醫生話由於子宮開始迫住小小豬,所以大得唔會好似之前咁利害,但係超聲波睇整體上生長情況都係好好,各樣情況都好滿意。頭仔就繼續向下移,不過照情況係未生得,應該係可以依照原定日子出世啦。

聽到醫生咁講,真係成個人都輕鬆咁,唔洗再驚會突然間作動啦!(不過我都會好小心咁照顧住個肚仔,等小小豬可以繼續安安全全咁吸收多啲營養,做個大隻B嘛。)

下星期就係最後一次產檢,希望一切順順利利啦!

 

CafeMom Tickers


*♡♡小肥豬♡♡* | 26th Jul 2010 | 生活點滴 | (25 Reads)

26 JULY 2010 (MON)

今日係七月二十六日,距離我生日仲有一個月,不過今日就已經收到本年度第一、二份生日禮物,兩份禮物都好鐘意,仲既驚喜又開心,因為冇諗過咁早就有禮物收嘛~

因為我返埋依個星期就開始放我大假連產假嘅假期,咁係我生日月就見唔到送禮物俾我同事,所以佢地就好有心咁提早送份禮物俾我,預早同我慶祝生日啦!

本年度第一份就係一支得意MARIE筆筆~

第二份就係一個好可愛嘅MARIE暖水袋,送禮者話好啱我生完小小豬之後用,又或者可以留俾小小豬當咕臣用呀~

哈哈...咁早就可以收到生日禮物,真係超級開心,仲感受到佢地對我嘅心意,因為真係冇諗過佢地會記得我生日,仲俾個驚喜我添!


*♡♡小肥豬♡♡* | 25th Jul 2010 | 幸福孕記 | (82 Reads)

24 JULY 2010 (SAT)

我一直都希望以母乳喂哺,不過唔知到時自己個身體狀況可唔可以做到,當然我係會迫自己盡量去做,始終母乳有益啲又對我同小小豬都有幫助啲嘛。

不過我都要為小小豬諗定一種奶粉做後備,就算我真係唔可以喂母乳,都可以即刻有奶粉俾佢唔會餓親。加上我放完產假之後都應該唔可以喂母乳,所以都要為之後日子諗定邊種奶粉。

雖然我都收到幾間奶粉公司送嚟嘅奶粉試飲,不過我一直都想小小豬係飲日本奶粉,感覺上安全啲又健康啲,起碼唔洗敢會有問題出現。

不過日本奶粉實在太多選擇,朋友推介都有好多隻,所以都幾傷腦筋,好驚會揀錯會影響小小豬生長,所以近排我好乖乖咁不停上網搵資料,又去睇吓BK媽媽嘅介紹,終於都係決定左買和光堂,今日放工仲同大肥豬去買左一罐做後備添~

比起其他牌子,和光堂算係平嗰種,我依罐都只係$135,所以買嘅時候都怕會揀錯。不過依個牌子都係日本奶粉入面最歷史悠久,又未出過事,所以我先揀佢,希望我真係冇選擇錯啦! 

 

CafeMom Tickers


*♡♡小肥豬♡♡* | 24th Jul 2010 | 生活點滴 | (28 Reads)

24 JULY 2010 (SAT)

早前係地鐵廣告見到馬仔今年書展會出新書『我的低能湊B之道』,馬仔嘅書我都有買開,加上佢今次個題目又勁啱我,所以好想入書展買呀!

當然我都只係得個想,咁多人地方大肥豬又點會俾我去呀,所以就不停咁問身邊有冇人會入去幫我買

終於係尋晚收到糖糖電話,原來糖糖媽咪尋日入左書展,仲幫我買到本『我的低能湊B之道』,嘩...真係勁開心,終於有得睇,不過就麻煩左AUNITE添,買書仲加送左個紙盒仔呀~

本書真係好攪笑,我一邊睇一邊笑出黎,都有幻想第日我湊小小豬時會唔會有依啲經歷。

唔只我,就連大肥豬都睇到哈哈大笑呀!


*♡♡小肥豬♡♡* | 23rd Jul 2010 | 幸福孕記 | (145 Reads)

22 JULY 2010 (THU)

打唔成風都知道一定會落雨,不過真係冇諗過會落得咁利害,今日由下午開始都真係冇停過,仲要係落得好大嗰種,攪到都有少少擔心唔知放工點走好。

終於等到放工,我地見個雨勢好似細左啲啲,咁當然就即刻走人。

點知同糖糖行到一半,雨勢又開始大起上嚟,我地係半路等左一陣,諗住等細雨啲先再繼續行,但見個雨勢好似唔會細咁,所以最後我都係決定為安全起見,搭的士返屋企。

糖糖幫我截左部的士之後,我先車佢落地鐵站,之後我再返藍田。

嘩....成程車都唔洗二十分鐘,就要成百二蚊,好貴呀~

我返工咁耐都係第一次直接搭的士返屋企,不過落雨濕濕為安全起見,加上依家係非常時期,所以貴少少都要啦!

 

CafeMom Tickers


*♡♡小肥豬♡♡* | 22nd Jul 2010 | 幸福孕記 | (70 Reads)

21 JULY 2010 (WED)

兩個星期又過,又係時候去母嬰健康院做檢查啦!

今次都係約左九點鐘之做檢查,不過同上次唔同係,我一上到去就見到勁多人,就連檢查度血壓、磅重、驗小便都要等左十五分鐘先到我。 

等左差唔多一個鐘左右,終於都聽到叫我個名,就入姑娘房去俾姑娘按肚。點知當我慢慢咁爬到上張床仔時,姑娘竟然同我講今次應該係由醫生按肚,叫我落番張床出去再等叫名。

依個時候都真係有啲嬲,幫我排錯隊等我白等成個鐘我都算啦,不過個姑娘真係好唔得,成個過程都係坐係佢個姑娘位,張檢查床咁高都唔扶吓我上落。唉...可能依啲就係政府特色啦!

又繼續等左差唔多半個鐘,就去見助產姑娘,姑娘話第一件事就話我已經算叫做足月,可以隨時生得,叫我有乜事就即刻去醫院,仲教我穿羊水時嘅徵狀,叫我小心啲,聽完佢講真係有啲驚驚地呀。

之後又等左差唔多半個鐘就去見醫生,依位醫生真係好好人,我上落檢查床都扶實我,仲不停叫我小心啲,又係按肚時叫我唔好介意佢對手凍,同之前個姑娘真係差好遠呀!醫生幫我按肚同聽心跳,都話小小豬好正常,頭仔向下發展緊,不過又未去到最低位置。咁我都放心啲,即應該未生得住啦!

嚟緊去就要一個星期去一次政府做檢查啦!

 

CafeMom Tickers


*♡♡小肥豬♡♡* | 20th Jul 2010 | 幸福孕記 | (111 Reads)

19 JULY 2010 (MON)

繼上次糖糖成功利用集運淘寶之後,我地又點會咁快收手,所以就又開始左我地嘅淘寶第二擊啦!

原本我都好想繼續淘吓嘢俾小小豬,但大家都叫我等小小豬出世先再繼續買,所以我就改變策略,今次淘左啲用品俾自己,不過我所買嘅嘢都係為小小豬已設呀。

首先就係買左兩套哺乳型睡衣,留返入院同係屋企坐月時著,依兩套嘅質地都唔差,仲幾抵添。

紅色短袖依套只係人仔$48~

黑色長袖依套就人仔$58~

另外我仲買左兩個袋仔, 一個係紅色嘅背包,諗住遲啲同小小豬出街時用背包好似方便啲。依個係我買咁多樣嘢最抵,因為只係人仔$39,個款好就唔在講,個質地仲唔係差,仿皮質地嚟呀~

依個袋都只係人仔$52,都係仿皮質地,係打算用嚟第日做媽媽袋呀~

哈哈...經過今次淘寶之後,應該就會停一停先,因為暫時都仲未諗到有啲乜想買。或者等小小豬出世後就再淘啲衫仔俾佢,到時又要麻煩糖糖啦!哈哈~

 

CafeMom Tickers


*♡♡小肥豬♡♡* | 19th Jul 2010 | 幸福孕記 | (43 Reads)

18 JULY 2010 (SUN)

今日幫小小豬收左一大袋禮物,真係好多好豐富,依啲禮物係住我屋企附近嘅同事B小姐送俾小小豬~

哈哈...開頭仲諗緊要買多幾頂帽仔同手襪仔俾小小豬,依家唔洗,咁我又可以幫我慳返少少買其他嘢啦!

 

CafeMom Tickers


*♡♡小肥豬♡♡* | 18th Jul 2010 | 甜蜜生活 | (53 Reads)

18 JULY 2010 (SUN)

因為要好好休息同埋整理小小豬用品,所以依個星期六日我都好乖乖咁留左係屋企訓..訓..訓,而大肥豬就繼續好乖咁洗小小豬嘅用品,大家分工合作(哈哈..因為我工作就係訓覺嘆世界嘛)。

不過訓左兩日訓到個人都傻傻地,加上個天氣又好好,所以大肥豬就帶左我落樓下公園行吓晒吓太陽,咁對我同小小豬都係好。

當然我地係唔只行吓,因為我肚仔比之前又大左啲啲,所以大肥豬帶埋相機同我係公園入面影左少少相留個紀念啦~

原本成個公園都係得我地兩個,仲諗住可以SET腳架慢慢影啲合照。點知當我地SET好之後就有幾個小朋友嚟玩,冇辦法啦....唯有影左一張就走人啦~


*♡♡小肥豬♡♡* | 17th Jul 2010 | 幸福孕記 | (146 Reads)

15 JULY 2010 (THU)

時間都差不多,係時候要開始煲薑醋啦!

依個重要任務我當然係全權交晒俾小豬媽負責(因為我唔識嘛..哈哈),小豬媽係上兩個星期開始已經密密手刨薑,一個人刨左成十五斤薑,真係辛苦晒呀。

原本小豬媽都打算嚟我屋企煲,不過為怕我地唔識會倒亂檔之餘又唔想成日嚟我地屋企睇火,所以最後都係決定係小豬媽屋企煲,等煲好大半先再拎嚟我地屋企。

經過小豬媽嘅努力,終於都整好煲好左第一批薑醋,今日仲叫左小豬爸車嚟我屋企做後加工作呀!

第一批拎嚟嘅十五斤薑醋~

有薑當然要加醋啦~

落煲啦,仲未計豬腳同雞蛋,都已經好大煲啦~

嚟緊就係我嘅工作,每四日就滾一滾,等啲薑入味啲,煲到小小豬出世咁就得啦!

哈哈...依一煲係第一批,主要係俾我食同埋招呼探我地嘅朋友。係小豬媽屋企又已經開始煲緊第二批,又嚟十五斤薑,真係辛苦晒小豬媽,所以我一定會教小小豬要好好咁錫小豬媽補數先得呀!

除左薑醋之外,小豬媽仲整左啲薑皮俾我,等我坐月時用嚟洗頭沖涼呀~

 

CafeMom Tickers


*♡♡小肥豬♡♡* | 16th Jul 2010 | 幸福孕記 | (42 Reads)

15 JULY 2010 (THU)

好在今日放一日假,如果唔係就唔可以幫小小豬收多一份禮物啦!

今次依份禮物係我一個已經移居左上海嘅中學同學寄俾我,俾啲衫仔同嚟呀~

哈哈...啲衫仔同襪仔都好柔軟,小小豬著上身一定好舒服,再一次多謝VIRGINIA呀!

講番....其實我同依位同學仔都曾經有一段時間失去聯絡,因為我幾年前搬居嘅時間遺失晒佢寫俾我嘅信,所以冇左個回郵地址,所以就咁唔可以再書信來往。

依家可以再同依位朋友仔聯絡,都真係要多謝YAHOO BLOG,因為我地一位共同朋友CARMEN係BLOG入上見到我,之後就同依位朋友你講開,就係咁我地就聯絡番啦!

 

CafeMom Tickers


*♡♡小肥豬♡♡* | 15th Jul 2010 | 幸福孕記 | (48 Reads)

15 JULY 2010 (THU)

上幾個星期收到雀巢BB會打嚟嘅問候,成個電話都冇SELL嘢成分,係臨收線時,佢地話遲啲會送兩罐奶粉俾我,等我可以俾小小豬試吓佢哦。

有免費奶粉當然唔客氣啦,所以就核對埋個地址等佢地送嚟啦!

等左幾個星期,終於今日由郵差叔叔將依兩罐奶粉送到上屋企。好在今日係放一日假,如果唔係都收唔呀~

哈哈...依家已經有三個唔同牌子嘅奶粉,加埋遲啲打算買一種日本奶粉,應該都足夠小小豬試飲啦!

 

CafeMom Tickers


*♡♡小肥豬♡♡* | 14th Jul 2010 | 幸福孕記 | (75 Reads)

12 JULY 2010 (MON)

三星期又好快咁過左,又係時候去私家做產檢,可以見吓小小豬啦!

入醫務所第一時間當然就係磅重,一上到個磅真係難以至信,因為係依三個星期我足足重左七磅,比起醫生定落嘅簡直係一個DOUBLE。嗰一刻我都真係唔知開心好定驚好,因為依幾個星期我都冇乜胃口,係我食少左嘢嘅情況吓都重咁多,好驚係有問題呀!

一見到醫生,醫生第一件事就話我重太多個情況唔太正常,話重太多係會唔健康,仲叫我飲食要小心啲(不過其實我一直都好檢點,都戒得好清啦)。之後量血壓就仲驚,我平時嘅血壓都係好正確嘛,點知今次量到我上血壓有成125,都未試過咁高,所以聽到你都唔好話唔驚。最後醫生都留意到我都有腳腫情況出現,叫我按摩吓同多啲俾對腳休息,唔好行太多路。

同醫生傾完之後,就去照超聲波睇吓小小豬個生長情況,當然小小豬個生長情況都係好好,整體上大個左好多,同平時一樣佢嘅頭仔、肚仔同埋腳仔時都比預產期周數大,尤其係個頭仔,比預產期大成兩周,個位置仲開始向下移添。

醫生總括我個情況,佢話小小豬有機會比預產期早出世,仲寫定入醫紙俾我,叫我有乜事就即刻去醫院,仲提我要執定老佬袋呀。

嗰一刻個心情真係矛盾,如果小小豬自己選擇早出嚟,咁即係佢係健康,可以早啲見到小小豬當然係一件好開心嘅事,不過如果突然間作動,好驚會處理唔到,會好『論盡』嘛!

兩星期後就會去做最後一次產檢,到時再睇吓小小豬個情況,希望小小豬可以順順利利、健健康康咁繼續生長,係我地預定個日期出世啦!

雖然我都有啲擔心,不過我都會學會放鬆,唔好太緊要,因為咁都會影響都小小豬嘛!

 

CafeMom Tickers


*♡♡小肥豬♡♡* | 13th Jul 2010 | 幸福孕記 | (41 Reads)

12 JULY 2010 (MON)

今日又幫小小豬收到一份禮物,係一份衫仔禮盒裝嚟呀~

事緣今朝返工就係桌面見到份禮物,原來係學校嘅家長教師會主席送,當時個心情都真係好複雜,因為有禮物收當然係好開心嘅一件事,不過係我印象中係唔可以接受家長嘅禮物,加上之前懷孕嘅老師都冇收過主席所送嘅禮物,都有啲受寵若驚感覺,所以嗰一刻都真係唔知點算好。

終於我都決定左將禮物事件同副校長講,等佢幫我做決定。最後副校長同校長傾過之後,叫我多謝家長教師會主席,同埋可以收左份禮物。

我都知道依個都係家教會主席嘅少少心意,不過如果唔攪清楚啲程序,好似唔係幾好咁。雖然好似攪到好大件事咁,不過依家我就可以收得安心啦!

 

CafeMom Tickers


*♡♡小肥豬♡♡* | 12th Jul 2010 | 幸福孕記 | (93 Reads)

11 JULY 2010 (SUN)

日天氣真係好好,不過冇得去街街,因為真係要乖乖留左係屋企,開始埋手整理小小豬啲衫仔啦!

成日都以為買得唔多嘢俾小小豬,不過當要整理需要洗嘅嘢時候,真係發現原來好多嘢都要洗..洗...洗,冇辦法啦..為左小小豬唔好受感染,所以全部小小豬用嘅嘢都要洗吓消毒呀!

經過一個下午嘅努力,終於洗左兩機BB衫,不過都只係洗左一部分,已經用盡屋企所有衫架啦~

計計埋埋應該仲有一機衫仔同埋兩機毛巾,仲有兩SET床仔圍欄未洗,要繼續努力先得呀~

 

CafeMom Tickers


*♡♡小肥豬♡♡* | 10th Jul 2010 | 甜蜜生活 | (74 Reads)

10 JULY 2010 (SAT)

今日放工返到屋企大肥豬又俾左個驚喜我。因為一行到我地間房門口,就見到依張POSTER~

見到我都真係打左個突,估唔到佢咁攪笑整左依張大肚LOOK POSTER。

一問之下,原來佢係網上搵到一間做POSTER又平又靚,所以佢就貪得意整番張嚟試。

冇錯...係試...因為佢話如果效果好的話,第日就可以將我地嘅一家三口全家幅同埋小小豬嘅得意相晒成大張嘅POSTER貼係屋企不同角落。


*♡♡小肥豬♡♡* | 9th Jul 2010 | 幸福孕記 | (40 Reads)

7 JULY 2010 (WED)

今次幫小小豬收左好多禮物,簡直係可以話大豐收呀!

首先就係學校收到一位老師嘅禮物仔,係一張好得意嘅西瓜被仔嚟呀~

夜晚就返左小豬媽屋企食飯,個驚喜真係可以話一浪接一浪,幫小小豬收左好多禮物呀~

有LULU妹送嘅TEE(因為LULU妹話鐘意個公仔,所以就買定俾小小豬,等佢大個時先著。不過真係好大件,相信要等一段時間先可以著到啦...哈哈!)另外,小豬媽同LULU妹每人都買左一對初生BB襪仔俾小小豬。

不過最估唔到嘅係小豬爸突然預早俾左封大..大...大...大...利是俾小小豬,叫我留番用嚟買嘢俾小小豬。

哈哈...小小豬未出世都已經咁多人錫啦!

 

CafeMom Tickers


Next