香港新浪網 MySinaBlog
*♡♡小肥豬♡♡* | 28th Jun 2010 | 幸福孕記 | (51 Reads)

27 JUNE 2010 (SUN)

今日又收多一份BB會禮物,又係惠氏送嚟嘅一盒包被仔,今次仲係搵專人速遞到屋企,服務真係唔錯呀~

雖然話係贈品,不過個質地都幾好,係軟毛巾質地都算幾厚身,又柔軟,仲可以當冷氣被添,用落都應該幾舒服呀~

哈哈...原來惠氏都已經係第三次送BB會禮物俾我,兩份禮物都好實用,唔知有冇機會再有禮物仔收呢?

 

CafeMom Tickers


*♡♡小肥豬♡♡* | 26th Jun 2010 | 幸福孕記 | (66 Reads)

23 JUNE 2010 (WED)

今日上午請左半日假去母嬰健康院做檢查,當我一踏悍健康院樓下,已經有好多唔同機構嘅BB會職員圍住,俾左好多BB會入會表格我仲話交完表格有禮物送番俾我,見話有禮物拎,所以就拎左啲表格填啦~

今次約十點鐘,我已經早左十五分鐘左右去到,諗住可以早少少去少人啲啦。點知一上到去,已經見到勁多人,想搵個坐座都好難,我仲係排第68呀~

係好困難之下先叫做搵到個位,不過依個時候又聽到叫名,心都知道冇理由咁快到我,原來我俾抽樣要做依個調查呀~

係房入面做左個問卷調查之後,又再繼續等,終於等左差唔多一個鐘先到我俾姑娘按肚。

姑娘先幫我按肚,佢話小小豬個頭仔都已經向下,情況都唔錯,真係覺得佢地好勁,輕輕按下就知道BB嘅位置。按完肚仔就到聽心跳,今次唔係聽幾吓就算,聽一分鐘就知道小小豬有一百四十幾吓心跳,姑娘話個數字都幾好冇乜問題。

之後又再繼續等,等左半個鐘左右就可以見助產姑娘,其實都係問番我依幾個星期有乜問題,傾左五分鐘唔夠就走啦!

唉...等左兩個幾鐘,加埋見姑娘都唔夠十分鐘,真係等到個人都傻傻地。下次再檢查就係兩個星期後,今次要醒目,帶定啲嘢去消磨吓時間先得。

離開健康院時交番啲入會表格,又收到兩樣禮物仔啦~

 

CafeMom Tickers


*♡♡小肥豬♡♡* | 24th Jun 2010 | 甜蜜生活 | (43 Reads)

21 JUNE 2010 (MON)

係銅鑼灣做完產檢,所以當然唔少得去時代廣場行個圈,去影吓最新嘅反斗奇兵啦!

我地六點去到,原本都以為唔會太多人,可以慢慢影,不過銅鑼灣始終都係人流好旺嘅地方,加上又有好多學生放早左,所以我地影嘅時候都已經係好多人。

就係因為人太多,大肥豬怕我俾人撞到,所以都只係隨便影左少少~

除左啲大型公仔外,會場仲展示左啲特別三眼仔公仔,不過真係太多人,所以都冇睇到就走啦!

唔緊要,安全要緊,有機會再出銅鑼灣又唔太多人嘅時候先再睇過啦!


*♡♡小肥豬♡♡* | 23rd Jun 2010 | 幸福孕記 | (61 Reads)

21 JUNE 2010 (MON)

等左三個星期,又係時候去做產檢啦!

入醫務所第一時間當然就係要磅重,係我心驚驚嘅情況下上磅,雖然今次都係重左三磅半,不過係三星期重三磅半已經係算達標之餘,仲多左半磅添,聽到真係勁開心呀!

第一時間見到醫生就問個肚仔問題,因為我成日都覺得自己個肚仔算細,怕會有問題,不過醫生話我個肚仔唔算細係正常,太大反而唔好,聽到咁講都放心啲。同醫生傾計左一陣,就去見照超聲波見小小豬啦!

係照超聲波機見到小小豬真係大過左好多,醫生話都生長得好好,個頭仔都係正常情況下繼續向下。當度腳仔、肚仔同埋腳仔時都比預產期周數大。聽到醫生咁講,真係勁開心,放心晒呀!

三星期後就再去覆診,希望到時我同小小豬都KEEP住向好方向繼續啦!

 

CafeMom Tickers


*♡♡小肥豬♡♡* | 23rd Jun 2010 | 幸福孕記 | (89 Reads)

21 JUNE 2010 (MON)

自從上次經BABY KINGDOM媽媽幫我係淘寶網淘左啲小米米用品之後,真係覺得淘寶網啲嘢好抵,好想繼續淘多啲嘢。不過我自己又唔識點玩,所以就威迫利誘糖糖幫我手攪攪佢。

經過一段時間嘅努力,終於俾糖糖研究成功,知道成個淘寶程序,所以我地就開始加入淘淘淘。由於都係第一次試淘,所以都係小試牛刀,每間都買左少少嘢,糖糖真係好叻,第一次就識得用集運,都慳左啲啲郵費呀!

等左一陣,終於貨到手。上次就全部都係淘俾小小豬,今次終於都有買嘢俾自己,就係一條大肚西褲,個質地都唔錯,最重要就係真係好平,我上次係孕婦店睇同類西褲都要成兩百蚊一條,依家49蚊人仔就買到呀~

 

另外兩樣就係買俾小小豬,一件CARTER'S 衫仔,見依個牌子好多媽媽都介紹,見都係29蚊人仔,所以就買左件嚟試,個質地又真係唔錯,不過我就貪心左少少買大左,要等小小豬大啲啲先著到啦~

另一個就係買嚟俾小小豬瞓覺時用嘅,可以等佢固定個位置,唔知有冇用,不過又平(都係28蚊人仔)又好得意,買嚟玩吓呀~

經過今次糖糖成功淘寶之後,相信我地嘅淘寶活動係會陸續有嚟,糖糖今次真係有排忙啦...哈哈哈!

 

CafeMom Tickers


*♡♡小肥豬♡♡* | 22nd Jun 2010 | 甜蜜生活 | (56 Reads)

20 JUNE 2010 (SUN)

聽完講座之後,我地就向下一個目的地出發,依個目的地就係上幾個星期都因為落雨攪到去唔成嘅沙灘。

由於我地係灣仔出發,所以就揀左去淺水灣沙灘,因為有車直接去到,都算方便嘛!

我地入到淺水灣都已三點幾,雖然個太陽仲係好強烈,但加埋啲海風又覺得唔太辛苦,仲幾舒服添。

休息左一陣,個太陽開始冇咁勁,大肥豬就開始幫我影相啦~

今次除左影背心裙仔相之外,仲有一個大突破,就係影左啲露肚仔嘅相。

其實之前我都掙扎左好耐影唔影,但又想將自己大肚LOOK留返個紀念,加上又係大肥豬鼓勵之下,所以就唔理咁多,影就影啦!

原本都唔敢POST出嚟,咁大個女都係第一次影泳衣相,都有少少怕羞兼怕嚇親大家。不過大肥豬話既然影左就要同大家分享吓,所以最後揀左一張合照俾大家睇,希望唔會做成好大驚嚇,嚇到大家唔敢再嚟我個BLOG啦~

我真係好鐘意去沙灘玩,好鐘意玩沙同玩水,所以等小小豬出嚟之後(當然等佢大個啲先啦),一定要帶佢去唔同嘅沙灘玩呀!


*♡♡小肥豬♡♡* | 21st Jun 2010 | 幸福孕記 | (46 Reads)

20 JUNE 2010 (SUN)

今日一早我同大肥豬就一早出發,去灣仔會展聽BB講座啦~

活動個係由BABY KINGDOM同JOHNSON主辦,講題係《了解寶寶睡眠情況及提升睡眠質素》。

雖然依個講題對我嚟講好似早左少少聽,不過我覺得BB嘅睡眠係好重要,起碼關乎我第日有冇睡好訓,所以早啲去聽多啲了解,對日後都有幫助嘛!

今次個講座時間都幾長,仲有超時添,不過就好似所提及嘅都係以數據為主,只係講左少少令BB睡得好嘅方法。總括醫生係話要令BB係六個月前養成定時睡眠習慣,同埋唔太建議係中午俾太多午睡,要留待晚上可以一覺到天光咁。

學就學左啲啲,不過就唔知到時用唔用到啦!

講座完又有禮物派,今次嘅禮物真係又大袋又豐富呀~

 

CafeMom Tickers


*♡♡小肥豬♡♡* | 20th Jun 2010 | 生活點滴 | (28 Reads)

17 JUNE 2010 (THU)

係上次大肥豬生日食嗰餐東寶都覺得幾好味,就同小豬媽推介一吓,但原來之前小豬媽到聽過朋友介紹,不過一直都冇機會嘗試,所以今日就提意帶佢地去依間食晚餐,一家人同小豬爸提早預祝父親節。

雖然已經預先訂好坐,不過可能係父親節前夕,好多人都好似我地一樣預早慶祝,所以真係勁多人,都要等一陣先有位呀~

等左十分鐘左右就有位(都算好彩唔係等太耐),第一時間就ORDER左支啤酒俾三位男仕飲,其實都係貪佢個碗仔得意先叫呀~

上次因為得兩個人,所以都唔係試左好多樣,不過今次人多啲,就可以叫左好多特式餸啦~

哈哈...樣樣餸都真係好好味,大家都讚不絕口,咁我都放心啲,起碼証明我冇介紹錯嘛!


*♡♡小肥豬♡♡* | 17th Jun 2010 | 幸福孕記 | (95 Reads)

17 JUNE 2010 (THU)

今日一個人去左美心食LUNCH,當我買完飛嘅時候,有個職員主動走埋嚟,叫我搵個位座好,佢幫我去拎嘢食。

嗰一刻真係有啲受寵若驚,仲覺得好窩心,估唔到佢地咁細心同體貼呀!

有左小小豬都咁耐,都係第一次遇到咁窩心待遇,第一次感受到少少嘅孕婦特權。

講起特權同待別待遇,只係睇嗰個人幫唔幫你。因為唔係個個人都會主動樂意去幫你,就算一個同你相識嘅人都未必樂意去幫你,反而有時一啲陌生人可能會仲會留意你嘅感受。

其實我都覺得好好幸運,遇到一位自發地關心別人嘅好職員,真係要表揚吓佢先得呀!

 

CafeMom Tickers


*♡♡小肥豬♡♡* | 15th Jun 2010 | 甜蜜生活 | (68 Reads)

15 JUNE 2010 (TUE)

繼尋日小豬媽生日之後,今日又到我身邊另一位重要人物生日,知唔係我個老公大人...大肥豬啦!

大肥豬每年生日都會DAY OFF休息一吓,不過由於我工作關係冇得請假,所以佢自己一個人係屋企休息,等夠鐘就嚟接我放工去食飯。

係未去食晚飯前,先進行我地第一個節目,就係遊吓電車河,因為大肥豬鐘意慢慢坐車睇吓街景嘛!

每年生日都一定去食日本嘢(主要都係因為我鐘意食),不過今年有左小小豬關係,所以都要改一改。最後大肥就建議去北角街市入面好出名嘅菜館食啦~

未嚟餸之前,大肥豬叫左支啤酒自己飲,平時都唔太鐘意佢飲酒,不過見佢生日就破例吓啦~

間菜館係俾碗嚟飲,隻碗仲勁得意添~

主菜到啦~

碟碟餸都好有睇頭,份量又足個味道仲唔錯,所以我地兩個都食到飽飽咁離開~

除左嘢食好味之外,唔好睇職員都係好似好粗魯嘅男人,但原來佢地真係好細心。當我地搵到坐之後,有兩位男職員即刻同我換張好坐啲嘅椅之餘,仲將我地張枱推開少少,等我坐得舒服啲,服務態度真係好過好多大型食店呀!

之後又去做另一樣大肥豬鐘意嘅事,就係去遊船河。我地係北角碼頭坐船去紅磡碼頭,再轉巴士返屋企。

我今日做左成日嘢都好攰,所以就簡簡單單陪大肥豬做啲佢鐘意嘅事嚟慶祝生日。雖然係平淡左少少,不過我地兩個都已經好開心啦!


*♡♡小肥豬♡♡* | 14th Jun 2010 | 生活點滴 | (38 Reads)

14 JUNE 2010 (MON)

今日係小豬媽嘅生日,我地尋日已經一家人都去左韓燒同小豬媽預祝生日。

不過今日係正日生日,LULU妹話要請小豬媽食晚飯,所以就約埋我地同小豬媽慶祝一番。今次去番上次母親節食過嘅石澳泰國菜,因為小豬媽鐘意食嘛!

其實今日依餐生日飯除左係LULU妹請小豬媽之外,仲係同埋大肥豬預祝生日呀(LULU妹真係好有佢姐夫心啦)。

既然係慶祝生日,又點少得生日蛋糕呢?我地預早買定個小蛋糕,係食完晚飯之後就切蛋糕慶祝一吓啦~

當然唔少得一張大合照啦~

今年小豬媽生日慶祝活動比起往年好似簡單左,希望佢都覺得開心啦!

最後係度再祝小豬媽生日快樂,日日都開開心心。


*♡♡小肥豬♡♡* | 13th Jun 2010 | 幸福孕記 | (46 Reads)

12 JUNE 2010 (SAT)

早前係BABY KINGDOM見到有獎遊戲,有著數當然玩埋一份。

哈哈....估唔到係參加完遊戲第二日就已經收到佢地SEND俾我嘅E-MAIL通知我去拎禮物啦!

見個換領日期就到,加上又換領地點又係近近嘅觀塘,所以今日趁大肥豬放假,所以就叫佢幫我去拎,份禮物係一個食物盒同埋一條圍裙~

依份禮物就好似大左少少,要等小小豬大個啲先可以用到。不過唔緊要啦,依啲都係必需品,到算係慳左少少啦!

 

CafeMom Tickers


*♡♡小肥豬♡♡* | 12th Jun 2010 | 幸福孕記 | (60 Reads)

11 JUNE 2010 (FRI)

今日又收BB會寄嚟嘅禮物啦!

今次都係惠氏BB會寄嚟嘅小禮物,有會員咭、BABY-MO雜誌換領卷一張、仲有嬰兒潔淨濕棉試用裝同埋嬰兒潔淨乾棉試用裝~

哈哈...計計吓都已經係第七份啦,唔知仲會唔會陸陸續續收到其他小禮物。

我見有好多準媽媽都話有收到奶粉,不過到依家我都仲未收過,只係上兩次聽講座收過,唔知啲BB會幾時會送奶粉俾我呢?(哈哈...請容許我做一名師奶仔啦)

 

CafeMom Tickers


*♡♡小肥豬♡♡* | 10th Jun 2010 | 幸福孕記 | (101 Reads)

8 JUNE 2010 (TUE)

係上星期六去左化驗所做血糖測試,等左幾日終於到左出報告嘅日子。

根據一向醫生做法,如果報告有問題先會打俾我。當然冇收到電話係一件好事,不過始終都係心掛掛,所以終於都係忍唔住,食完LUNCH之後就打電話去醫務所問個報告。

姑娘話剛剛收到我份報告,我個報告顯示一切正常,血糖冇高,等下次產檢時醫生先再慢慢解釋我聽。

聽到真係勁開心,由我知道有左小小豬之後,我都好怕會有妊娠糖尿(因為我之前係勁鐘意食甜嘢),所以都已經戒晒所有甜食,就連我至愛檸檬茶都唔敢飲。依家知道個報告正常,都覺得咁辛苦戒口都係值得呀!

雖然係冇問題,不過我都會繼續小心飲食,繼續戒口,等小小豬可以有一個好環境繼續生長!

 

CafeMom Tickers


*♡♡小肥豬♡♡* | 7th Jun 2010 | 甜蜜生活 | (64 Reads)

6 JUNE 2010 (SUN)

原來都冇打算今日再出街,諗住係屋企休息休息。不過因為樓上個單位裝修,間唔中就發出啲鑽牆聲,攪到想休息吓都唔得。

為免啲鑽牆聲影響到小小豬,所以大肥豬就帶我出去行吓,我地去左邊,就係入左迪欣湖行吓影吓相啦!

迪欣湖我地都唔係第一次去,上幾次入去都係為左去玩水上單車,但今次先算係正正式式行左個公園一圈。

由於個公園都好大,所以開頭我都好驚會行到勁攰,不過我地邊行邊影相,行吓就坐吓休息咁,加上個天氣都算唔錯,所以都唔算太辛苦。

原本係想影大肚相,不過著錯左條鬆身裙仔,攪到都唔似大肚添~

我地仲係迪欣湖見到有好多家庭一家大細係度野餐,見到啲小朋友係度玩吹泡泡同踏單車,睇佢地玩都覺得開心呀。

雖然就好似遠左少少,不過依個迪欣湖又不失為一個家庭樂嘅好地方,所以第日都會帶小小豬嚟依度玩先得。


*♡♡小肥豬♡♡* | 6th Jun 2010 | 幸福孕記 | (139 Reads)

5 JUNE 2010 (SAT)

之前成日見好多準媽媽都係淘寶網站買左好多BB衫仔,見佢地講到好抵,攪到我都心郁郁好想淘埋一份,買啲平嘢俾小小豬,但我都係識睇唔識玩,所以一直都係得個睇字,冇得買。不過我終於都可以嘗試到淘寶嘅平嘢啦!

事緣早前係BABY KINGDOM有位八月媽媽問我地有冇興趣一齊去淘寶買MINIMOTO嘅用品,我見都真係好抵,所以就託佢幫手買埋一份。

等左一個星期,終於約好左今日係旺角交收啦!

哈哈..真係麻煩晒依位八月媽媽,因為我原來買買吓都買左九樣嘢呀!

首先就係想買左好耐嘅竹碳BB床席同BB車席~

BB頸枕~

一SET三條嘅口水肩~

一大一細嘅隔尿墊,一張留番出街用,大嗰張就用嚟墊住張床褥~

仲有兩包唔同SIZE紗巾~

除左MINIMOTO用品之外,我仲貪得意買左條多用途背帶添~

買左咁多樣嘢都係兩百幾蚊,加上啲質料都真係唔差,同吉之島買嗰啲都係一樣咁,所以唔怪之得有咁多人話要去淘寶啦!

 

CafeMom Tickers


*♡♡小肥豬♡♡* | 5th Jun 2010 | 幸福孕記 | (133 Reads)

5 JUNE 2010 (SAT)

係上次產檢時,醫生已經幫我BOOK左今日去化驗所做血糖測試,所以今朝一早就同大肥豬向銅鑼灣出發飲糖水啦!

一上到化驗所,就即刻抽第一次血同留第一次小便,之後姑娘就俾左杯有75G嘅萄葡糖水我飲啦~

講真係未飲嘅時候都好驚,因為有啲準媽媽話甜到嘔左左出嚟,所以我望住杯糖水嘅時候都有猶豫左一陣,最後都鼓起勇氣開始飲第一啖。

飲落又唔係想像中會飲到嘔咁難飲,只係覺得勁甜同飲完之後覺得喉嚨唔係咁舒服咁,都可以接受呀!

之後就我地就落街行咗一個鐘,依個時候就陪大肥豬去食早餐。由於我個測驗未做完唔可以飲食,所以只好睇住大肥豬食嘢。

等到夠鐘就再上化驗所去抽第二次血同留第二次小便,完成後又再落街行一個鐘,再上去抽第三次血同留第三次小便。

終於都可以完成晒成個測試,換嚟嘅就係兩手針口啦~

抽三次血分別係左手抽一次,左手抽兩次,雖然係抽左三次血,但都唔算好痛,仲冇瘀添,所以話都係私家好呀!

報告要等到下星期二先出到,希望一切正常,我可以PASS到個TEST,咁小小豬就可以健康咁繼續生長啦!

 

CafeMom Tickers


*♡♡小肥豬♡♡* | 4th Jun 2010 | 生活點滴 | (28 Reads)

4 JUNE 2010 (FRI)

係新年期間買左個AGNES B靚袋袋之後,都有一段時間阻止自己唔買日本雜誌袋,想慳番啲錢買嘢俾小小豬嘛!

雖然話唔買,不過成日行過7仔同OK都忍唔住入去睇,好在依排出嘅日本雜誌袋都唔係我杯茶,所以都未有破戒。不過....終於係今日抵受唔住,買左個靚靚花花袋啦!

事緣今日糖糖拎左個新出嘅靚花花袋返工,一見到就好鐘意,加上佢又屬於大SIZE同埋個質地幾好,所以就勁想買。

於是趁LUNCH時段就即去7仔睇,好彩仲有一本係度,所以見到就立刻買左啦~

個袋袋真係好靚呀(哈哈...聽日開始又有新袋用啦)~

除左袋袋之外,今期仲加送PANTRNE洗髮水及護髮素試用裝添~

今次買MORE有咁多嘢送又真係好抵,所以破戒一次都係值得呀...哈哈! 


*♡♡小肥豬♡♡* | 2nd Jun 2010 | 幸福孕記 | (87 Reads)

31 MAY 2010 (MON)

又到一個月去做產檢嘅時候,又可以見到小小豬啦!

一入到醫務所第一時間就係磅重,上個月我係可以達到醫生嘅預期重左五磅,不過今次就冇咁好,只係重多左三磅半。唉...又重唔夠磅,真係好擔心呀!

等左一陣就見醫生,先同醫生傾計我今個月個身體狀況,之後就去見照超聲波見小小豬啦!

當照超聲波機見到小小豬手仔腳仔不停咁郁,好活潑呀!今個月小小豬又大個左,當醫生度頭仔時,睇到係比預產期周數大,原來小小豬係一個大頭仔嚟呀。之後度腳仔、肚仔都生長得好好。另外,仲睇到小小豬個頭仔已經轉左向下。開頭都好驚,因為聽人講BB轉頭就好快生,不過醫生話七個月開始轉頭係正常,因為BB係需要時間慢慢再繼續長大叫我唔好擔心。

睇完小小豬就到問我個體重問題,醫生話整體上BB生長正常就可以放心,可能係BB比我仲吸收,要我放鬆啲唔好緊張。

踏入七個月就開始三星期去覆診一次,咁又可以早一個星期見到小小豬,真係好期待呀!

 

CafeMom Tickers