香港新浪網 MySinaBlog
*♡♡小肥豬♡♡* | 30th Apr 2010 | 幸福孕記 | (33 Reads)

30 APRIL 2010 (FRI)

今日係我嘅補假,原本應該係好開心,因為可以連續放三日假,不過今日大肥豬要開OT,所以由朝到晚都係得我一個人,你都唔好話唔悶呀!

今日個天氣都幾好,我都唔想成日都留係屋企,搵啲嘢做吓先得,所以食完個LUNCH之後就去街街啦!

第一站就係去西灣河剪番個靚頭髮,今次依個頭可以話係我有史以來最短嘅一次,不過剪完出嚟成條頸又真係好舒服,好清爽(有機會先影我個新LOOK俾大家睇啦)。

之後就約左LULU妹陪我出太古城行個圈,其實都係想去睇BB嘢呀!

首先我地去左H&M行,因為有朋友仔話我知依家H&M有BB衫買,所以想去八卦埋一份。雖然初生BB款就唔算多,不過最後都買左兩件衫仔俾小小豬,抵嘛...$99兩件呀,個款係LULU妹揀呀~

我地就轉戰永安,開頭以為永安有做大特價,但原來只係部份嬰兒用品先有。雖然係咁,不過我都有收獲,上次係永安買左一SET帽、手襪同鞋仔之後好想買埋件衫仔,今次終於俾我揀到,仲有埋件背心仔添~

買完衫仔之後,就番左小豬爸屋企,同大家食埋晚餐先走。

 

CafeMom Tickers


*♡♡小肥豬♡♡* | 29th Apr 2010 | 幸福孕記 | (32 Reads)

27 APRIL 2010 (TUE)

離開左聯合醫院之後,我地就向下一個目的地出發,就係出佐敦童軍總會聽講座,今次依個內容係講『母乳餵哺及初生嬰兒護理』~

雖然今次個講座內容都唔算太長,集中都係講母乳餵哺嘅好處,對初生嬰兒護理都只係提左好少部分,不過都有學到啲嘢呀!

原來母乳嘅營養真係好多,BB會少啲病痛同強壯啲,仲有就係BB會同媽咪關係好好,就算到大個啲都會成日跟住媽咪同錫媽咪多啲呀。另外,對媽咪身體好之後,仲會對產後身體復原好好添(醫生話仲係最有效嘅產後修身方法,哈哈...係就真係發達啦)。

雖然好處都有好多,不過都有啲其他問題,如果餵得唔好,媽咪就有機會有損傷或發炎情況發生,講座上醫生都有SHOW啲相俾我地睇,睇完都真係驚驚地,不過醫生話會發生嘅情況都唔算好大呀!

其實我一直都想係以母乳餵哺,因為睇左啲網頁講食母乳嘅BB係會健康啲同對媽咪嘅身體都會好,但就會辛苦啲,因為食母乳比食奶粉嘅餐數係多啲。

聽埋今次講座,我更改決定要餵母乳,只係怕到時自己唔可以堅持到,同埋身體狀況唔許可,不過為左小小豬可以健康成長,我都會盡量堅持,辛苦少少都係值得。

 

CafeMom Tickers


*♡♡小肥豬♡♡* | 28th Apr 2010 | 幸福孕記 | (151 Reads)

27 APRIL 2010 (TUE)

今日下午請假去聯合醫院做產檢,由於上次姑娘都有講過今次可以聽到小小豬個心跳,所以都比較期待。

約左三點鐘,等左成半個鐘先可以見醫生,不過個醫生都真係唔係好NICE,一入到房就已經見佢黑黑地面,醫生都只係同我講上次驗血報告係正常,又唔詳細解釋吓。之後就幫我做婦科檢查,不過又係好快咁完成,仲要係我唔知情嘅情況下俾左小小豬個心跳我聽(佢唔講都唔知已經聽左心跳添),總之成個過程唔洗三分鐘兼我地嘅對話都冇十句就完成,真係效率高啦!

由於醫生將我轉介去藍田健康院做之後嘅產檢,所以又要等多半個鐘等啲文件出,等我下次去健康院時交,總之等就等左差唔多一個鐘,見醫生就只係見左三分鐘,唔知依啲係唔係就係政府產檢特色呢?

最後抽血做血糖測試報告就走得,不過我都真係勁黑仔,幫我抽血嗰個係抽血學員,感覺到佢幫我抽血時係拮左我兩吓,仲係我抽緊血嘅時候聽到佢叫左一聲『哎呀』,當抽完之後,我個針口唔知點解好痛,仲痛左好耐添,幾次抽血都冇咁情況發生,真係勁慘呀!

今次同上次嘅政府產檢真係好大分別,上次嘅姑娘真係好溫柔同好好人,今次就......,好在我去政府CHECK都係想去睇吓產前講座同買多一個保險,如果叫我真係係政府度生,我諗我真係有排驚兼擔心,所以話私家雖然係貴啲,但起碼都係令到自己安心啲嘛(好在我都冇揀錯)!

依家醫生轉介左我去健康院,我都仲考慮緊去唔去好,或者我都會再去多一次,睇吓去健康院檢查係做啲乜先再決定啦!

 

CafeMom Tickers


*♡♡小肥豬♡♡* | 27th Apr 2010 | 幸福孕記 | (46 Reads)

25 APRIL 2010 (SUN)

當我地離開清水灣海灘之後,當然係搭番去程小巴走啦,因為路線問題,今次就唔經屋企附近直出觀塘,不過對我地嚟講都算係好方便,所以都冇乜問題。

就係落車地點,我冇意中就見到一個廣告宣傳板,話附近有個樓上鋪係買嬰兒用品,一見有BB嘢睇就由原本攰攰地立即精神晒,叫大肥豬陪我上去八卦一番。

一上到間樓上鋪,都有少少失望,因為見到好多都係用品都係俾大個啲嘅BB,只有好少衫仔係俾初生用,不過一場嚟到都睇吓啲衫仔啦。

雖然可以睇嘅嘢唔多,不過都俾我睇中左兩樣嘢,都真係唔可以唔佩服我自己幫小小豬買嘢嘅能力呀..哈哈哈。

首先就係一SET麵包超人公仔嘅帽、手襪同口水肩~

之後就係依件麵包超人嘅睡袋~

依個係用嚟等小小豬瞓覺時著住,咁就唔洗怕會凍親。我都係見其他準媽媽都有準備,我先識得買,唔知WORK唔WORK呢?

 

CafeMom Tickers


*♡♡小肥豬♡♡* | 25th Apr 2010 | 甜蜜生活 | (40 Reads)

25 APRIL 2010 (SUN)

今日難得好天氣,所以又俾大肥豬捉左出街,要我行吓晒太陽。

大肥豬話見我上次係長洲沙灘玩得好開心,所以就帶我去沙灘行。見屋企附近有小巴可以直接去到清水灣海灘,所以我地就向目的地出發啦!

出門口嘅時候陽光都幾好,但一入到清水灣海灘,太陽伯伯就收埋左,啲風又大左好多,不過都冇影響我地個心情,先係沙灘行個圈(扮晒浪漫),之後就周圍影..影....影。

先嚟影吓石景(大家放心,我企嘅地方全部地都係平地,所以冇危險呀)~

之後又影吓海景~

最後當然唔少得SET腳書架影吓合照,影吓啲大肚FEEL相啦~

由於啲風越來越大,大肥豬怕我吹到,所以影完啲合照就走,冇機會落沙灘玩沙添。

不過去依度嘅交通對我地嚟講都算方便,所以大肥豬話等天氣好就再嚟過。


*♡♡小肥豬♡♡* | 23rd Apr 2010 | 幸福孕記 | (30 Reads)

22 APRIL 2010 (THU)

繼早前收到兩份BB會禮物之後,今日收到第三份啦~

哈哈...今次份小禮物就係一條口水肩,都幾好幾合用,因為依啲係BB必須用嘅嘢,都真係唔錯呀!

不過,我見其他嘅準媽媽收到嘅禮物都好似好好多,有衫仔又有奶粉.....好豐富咁,唔知我幾時都可以收到類似禮物呢?

不過算啦,都係唔好太貪心,有依啲小禮物都已經好好啦!

 

CafeMom Tickers


*♡♡小肥豬♡♡* | 21st Apr 2010 | 幸福孕記 | (30 Reads)

21 APRIL 2010 (WED)

早前同好友C小姐傾計時,話佢公司依家開始做埋童裝出入口,如果見到有啲啱初生BB又靚嘅衫仔貨版就拎啲俾我,等我可以慳啲啲咁話。

估唔到咁快C小姐就係今日俾左三件夾衣件俾我啦~



C小姐話因為佢公司俾初生BB嘅款式唔多,所以都只可以俾啲普通款我,等再有靚款先再俾小小豬。

但其實依兩件衫仔我都覺得好靚,雖然話係貨版,不過個質地都唔差呀。

哈哈...真係要同C小姐講聲多謝,等我可以慳啲錢之餘,小小豬又多幾件衫仔,都真係勁好呀!

 

CafeMom Tickers


*♡♡小肥豬♡♡* | 19th Apr 2010 | 甜蜜生活 | (35 Reads)

18 APRIL 2010 (SUN)

原本今日有一個好好嘅神秘節目,不過因為買唔飛關係,所以活動就取消左(都有啲失望冇得去玩)。

冇左個好節目,大肥豬就帶我去另一個地方玩,就係去海洋公園。雖然好多GAME我冇得玩,不過我有AP係免費,都只係買大肥豬一張飛,所以計落都抵呀~

一入到海洋公園,就見到馴龍記嘅宣傳,雖然唔算大,不過都叫做新嘢,所以我地就去行個圈影吓相啦~

亞洲動物天地附近有幾個草草公仔好得意呀~

之後就入去睇動物,大肥豬帶左部新DV,話影低啲動物留返俾小小豬睇,所以相我地就影得唔多~

當然唔少得同吉祥公仔影吓相,因為我地係入面逗留左都幾耐,所以同到幾隻公仔影相呀~

係等睇天上王者雀仔SHOW時,見到有好多好可愛公仔椅,當然唔放過機會影埋一份啦~

睇SHOW啦....因為啲雀仔飛得實在太快,所以跟本影唔到相。不過整體上都覺得麻麻地,都見唔到係電視介紹嗰啲珍貴動物,所以都有啲失望~

之後我地就過去機動遊戲嗰邊,當然玩就冇我份,都係去行吓同聽吓人地嘅尖叫聲(哈哈..)。邊行邊入去啲精品店拎啲毛公仔影吓相啦~

最後我地就去睇今期新介紹嗰啲變色龍,不過真係勁失望,隻隻都好細隻,有啲仲係個缸入面搵嚟搵去到睇唔到,所以好快咁行左個圈就走。

今日我地都算係悠悠閒遊海洋公園,雖然我地係園入面時間唔多,不過都幾好呀...睇吓動物當做胎教嘛!


*♡♡小肥豬♡♡* | 17th Apr 2010 | 生活點滴 | (18 Reads)

17 APRIL 2010 (SAT)

今日我地學校舉行運動會,全校所以職員都要出席。我當然都唔例外,不過我都係做啲文書嘅工作,工作量都唔太多,所以都唔算太辛苦。

不過最辛苦嘅就係要一早七點幾去到運動場,咁我就要晨咁早五點幾就要起身,搭頭班巴士去目的地。對我依個懶訓嘅人嚟講都真係勁慘呀!

忙左一個上午,其實就唔算好攰,就只係覺得好眼訓。

完成運動會之後,先同同事們去飲茶,之後就出約大肥豬出尖沙咀買嘢。

好唔好彩...原本我想買嘅嘢就買唔到,既然出到尖沙咀,所以就周圍行吓。

可能唔夠訓,加上依家啲普通時裝店基本唔會有衫啱我著,所以都真係冇乜心機行街街,行左一個鐘左右就想返屋企。

不過係臨走時,經過一間鋪頭有好多袋袋做緊大特價,所以就入去八卦一吓。原本都只係打算八卦,但我睇睇吓就又睇中左個袋仔,原價都要成五百幾蚊,依家半價都唔洗,所以都勁心思思想買。

就當我仲15/16嘅時候,大肥豬就已經叫左個職員拎個新嘅出嚟買俾我啦~


*♡♡小肥豬♡♡* | 13th Apr 2010 | 幸福孕記 | (506 Reads)

13 APRIL 2010 (TUE)

由於一開始都已經決定左去私家醫院生,所以我都冇去到政府醫登記。不過早排大肥豬建議我去埋政府登記,可以多一個醫護人員去睇住成個懷孕過程,同埋又可以參加醫院所舉辦嘅產前講座。

原本我都唔太願意,但諗諗吓都覺得多一個檢查好似好啲,又可以聽吓啲講座,所以個多月前我就去左聯合醫院約時間,終於等到今日去做正式登記啦!

今朝一早大肥豬就陪埋我一齊去醫院,我地係最早嗰一個所以開頭都以為好快就完成成個登記,不過最後都要逗留左係醫院差唔多三個幾鐘先走得。

當完成啲基本檢查(量高、磅重、驗小便)之後,就見姑娘講吓啲我嘅病歷資料,就係差唔多結束時,姑娘就話轉頭安排我去照結構性超聲波。

完全冇諗過今次嘅登記就可以照超聲波,仲要係做照結構,所以嗰一刻都真係打左個突,可能姑娘見我剛好夠時間照結構,所以就安排埋俾我啦。

雖然係私家已經照左,有得再見多次小小豬,我又點會介意照多次結構呢....哈哈。不過我都到等左差唔多一個鐘先輪到我照超聲波(算啦...政府醫院就係有排等啦)。

係超聲波機入面睇到小小豬當然又係好活躍郁嚟郁去,姑娘都好細心咁幫我照左約唔多二十分鐘,不過佢有佢照....我地有我地睇,好少解釋佢當時係睇緊邊一個位置。

姑娘話整體上小小豬都係健康正常,個SIZE同都預產期一樣。最後問我係私家照超聲波時有冇照到小小豬性別,當時我就問可唔可以幫我睇吓。

姑娘話性別就會太在意幫我地睇,因為主要都係幫我地檢查BB個結構是否正常,不過見我地咁想知就幫吓我地睇睇。就係咁..姑娘就好細心咁幫我睇機,最後話俾我地知係仔仔嚟。

哈哈..其實上兩次私家醫生都照到係仔仔,再經今次姑娘確定多一次,咁就可以完全確定係男仔嚟啦!(對我嚟講仔女都冇所謂,最緊要就係小小豬健健康康嘛!)

之後抽血同約下次見醫生時間就走。

再去醫院覆診就係兩星期後,下一次就可以就係由醫生檢查同可以聽小小豬心跳,所以都應該會再去。

經過今次都覺得私家同政府兩邊一齊做檢查都幾好,起碼可以知多啲小小豬個生長情況。當然我始終都係對私家醫生信心大好多啦,不過都會因應情況去多幾次政府檢查。

 

CafeMom Tickers


*♡♡小肥豬♡♡* | 11th Apr 2010 | 幸福孕記 | (36 Reads)

10 APRIL 2010 (SAT)

早排睇BABY KINGDOM知道APITA依個星期做緊嬰兒展,所以今日放工就約左大肥豬一齊去行吓,睇吓有冇特價貨入定啲。

不過...去到真係有啲失望,佢地個展場真係好細,款式及可以選擇嘅牌子又唔多,所以我地都冇收獲咁走人啦!

見仲有時間,所以就過埋永安行個圈,原來永安都有個小型嬰兒展,雖然都只係做緊九折,不過有好多BB衫仔睇,所以我又行去睇埋一份。就係咁...睇睇吓,我又買左少少嘢俾小小豬啦!

買左帽仔、手襪仔同腳套仔,最衰就係我搵唔到同款嘅衫仔,咁就一SET啦~

另外我又買左件長袍仔,今次終於唔洗淨係買藍色,可以多啲唔同顏色啦~

哈哈....雖然好似買左好多衫仔咁,不過我總係覺得係未夠,等下次再有特價時就再買多啲先得,因為買衫仔嘅時候真係好開心呀!

除左衫仔之外,其實我都仲有好多BB嘢未買,不過嗰啲又好似唔係太急咁,等再有嬰兒展做大特價時先買都應該可以。

如果各位朋友仔知道邊度有嬰兒展記得通知我呀...麻煩晒!

 

CafeMom Tickers


*♡♡小肥豬♡♡* | 8th Apr 2010 | 生活點滴 | (20 Reads)

6 APRIL 2010 (TUE)

今日係復活節假期最後一日,雖然我仲有兩日假期,不過大肥豬聽日就要返工陪唔到我,又要自己一個人過啦!

原本大肥豬提意趁最後一日假期同我去海洋公園行吓睇吓動物,不過一早起身就見個天氣唔係太好,地下仲濕濕地添,所以就取消左個節目,全日留係屋企HEA吓。電視都睇到悶悶地,所以就落去商場行吓順便買餸。

我地入左冒險樂園玩,仲唱左十個嚟玩擲彩虹。最後我地都贏左一個獎品返嚟呀~

依個係擲彩虹中綠色獎嚟(即第二大獎嚟),我地都係第一次贏到大獎品,真係覺得好LUCKY呀!

大肥豬話要將個公仔留番俾小小豬玩添....哈哈!


*♡♡小肥豬♡♡* | 7th Apr 2010 | 幸福孕記 | (59 Reads)

5 APRIL 2010 (MON)

同小M佢地分道揚鑣之後,我地就先去SOGO宴會廳,想買趁特價買多幾件衫仔俾小小豬。

原來打算買啲長袍同夾衣,不過可能係最後一天關係,好多款都冇晒,所以最後都只係買多兩短衫仔,實在太抵啦,買多兩件俾小小豬替換都好呀~

因為大肥豬想買部DV好耐,佢話買嚟影低小小豬成個成長過程(當然包括影低我大肚時個醜怪樣啦),所以次次行街都一定會去攝影用品睇睇。

原本都冇打算咁快買(因為我個肚仔都未算大,打算大多少少先),不過大肥豬睇睇吓就見到部佢心儀嘅DV機,拎上手玩左一陣,所以最後都抵擋唔住...買左啦~

講真...部機都比我預期中貴左少少,買嗰時都真係有啲肉赤。不過諗番起可以留低小小豬成個成長過程,都覺得係值得啦!

最後就路過燕窩店,醒起小豬媽之前講過依家可以開始食燕窩,等小小豬可以吸收。為左小小豬,所以就買左樽嚟食,等我每朝早都食一匙,咁就可以長胎啦~

今日真係大破財日,不過樣樣嘢都係為左小小豬,所以都係覺得開心同值得啦!

 

CafeMom Tickers


*♡♡小肥豬♡♡* | 6th Apr 2010 | 好友與我 | (30 Reads)

5 APRIL 2010 (MON)

因為電影『歲月神偷』關係,之前電視成日都介紹永利街,覺得都好似好特別(可能都係俾電視洗左腦啦),都有啲興趣去行吓影吓相,所以就約埋大小M一齊去影相啦!

去到目的地就已經見到好多人係度影相,當然我地都唔例外,不停係度影...影....影啦~

不過條街真係好短,由街頭行到街尾都唔洗五分鐘,我地邊行邊影都只係用左差唔多半個鐘左右就影晒啦!

見時間尚早,所以大M就帶左我地去附近個青年會紅磚屋影吓啦~

之後就周圍行,原來上環都有好多懷舊地方,真係唔行都唔知呀~

由於晚上我要同屋企人食飯,所以影完相之後一齊搭地鐵出銅鑼灣後就各自SHOPPING,就係咁我又過左一個好開心嘅下午啦!


*♡♡小肥豬♡♡* | 5th Apr 2010 | 好友與我 | (31 Reads)

4 APRIL 2010 (SUN)

早排突然間好想去BBQ,所以就約班朋友仔一齊去BBQ,順便慶祝復活節假期兼兒童節啦!

今次去返上次去過嘅小欖燒烤樂園,貪嗰度交通都算方便同埋啲嘢都算好食。可能假期關係,今日真係好多人,所以我地個位置都唔算太好,不過都冇所謂,各有各燒,最緊要就係同朋友仔玩得開心嘛!

一入到場,就開始燒..燒...燒啦~

以下只係我地食物嘅一部分,因為之後幾次拎嘅嘢食,我地都掛住食同玩,唔記得影相呀~

除左大會提供食物之後,我地仲帶左少少食物去燒,有棉花糖、士多啤梨、蕃茄仔、蕃薯同埋金菇呀~

邊食邊玩邊傾計,真係玩得好開心,不過因為朋友仔們唔方便出鏡,所以唔POST佢地啲相出嚟啦~

我地由二點開始燒,玩到八點先走,真係玩得勁開心。唔知下次再一齊BBQ會係幾時呢?不過都應該要等小小豬出嚟之後嘅事啦!


*♡♡小肥豬♡♡* | 3rd Apr 2010 | 幸福孕記 | (43 Reads)

1 APRIL 2010 (THU)

睇完醫生,行過見到SOGO個宴會廳做緊兒童及嬰兒展,我地當然唔放過睇BB嘢嘅機會,上去八卦一吓啦!

一入到展場發現俾初生BB用嘅物品都唔算多,我地想睇啲BB車嘅款式都唔多,所以最後我地都係集中睇BB衫仔。

最後...當然又係抵擋唔住啲得意衫仔嘅引誘,又買左啲衫仔俾小小豬。不過又真係好難唔買,因為依個牌子啲衫質地真係好好,加上本身都係屬於貴貴地,依家都只係做緊半價,實在太抵啦~

依兩件衫仔加手襪仔就係LULU妹送俾小小豬呀~

依兩套就係我買俾小小豬,一SET有埋褲仔,好得意呀~

買完返到屋企先覺得好似買得少,等有機會係復活節假期再去SOGO入多啲貨先得!

 

CafeMom Tickers


*♡♡小肥豬♡♡* | 2nd Apr 2010 | 幸福孕記 | (54 Reads)

1 APRIL 2010 (THU)

又到左每月產檢嘅時候,又可以見到小小豬,真係等到頸到長晒。今次都係大肥豬、小豬媽同埋LULU妹陪我一齊去,因為大家都係好想見吓小小豬呀!

一入到醫務所,姑娘先幫我磅重先。唉....估唔到我同上個月一比,都係重左一磅咁多。一聽到依個磅數,我都真係有啲擔心,好驚小小豬唔吸收,生長得唔健康。

等到終於見到醫生,醫生首先就好解釋返上次驗血報告。原來上次驗血係第二階段OSCAR化驗(哈哈..我都唔知係驗乜添~),醫生話個數值非常好,完全冇問題。

聽完報告之後,就去照超聲波機見小小豬啦!

今次見小小豬都有大個左,但就冇上次得咁利害,平均比預產期大三日左右。開頭我都好擔心,不過醫生話小小豬生長都係正常,太肥都唔係一件好事,咁我都安心啲。

係超聲波機見到小小豬,佢真係好活躍,不停咁郁動。當醫生講解到手仔時,佢就郁吓啲手指仔,好似同我地SAY HI咁,真係好得意呀!

睇完小小豬,就問醫生我好擔心嘅我個磅數問題,醫生話BB係健康成長緊,叫我唔洗太擔心,總之KEEP住食多啲有營養嘢就得!

話快唔快,小小豬已經係我肚仔入面20WEEKS,都已經係成過懷孕過程嘅一半,好想快啲過埋依一半,可以好快見到小小豬,真係好期待呀!

 

CafeMom Tickers