香港新浪網 MySinaBlog
*♡♡小肥豬♡♡* | 30th Mar 2010 | 幸福孕記 | (32 Reads)

29 MARCH 2010 (MON)

繼上星期收到第一份BB會禮物之後,今日又收到另一個奶粉公司嘅禮物,就係一本孕婦需知小冊子同兩條紗巾仔啦~

雖然條紗巾仔就好似冇乜花款,不過依啲都係BB嘅必需品,多多都用唔完,所以都係一樣好好用嘅物品嚟呀!

唔知下一次再收到嘅禮物係乜呢?

 

CafeMom Tickers


*♡♡小肥豬♡♡* | 29th Mar 2010 | 幸福孕記 | (49 Reads)

28 MARCH 2010 (SUN)

自有左小小豬之後,我一見到啲嬰兒用品店都會入去行,睇吓有冇嘢啱小小豬。

晚飯過後,我地就係鑽石山廣場行個圈。見到鴨仔專門店,當然又要入去行吓啦!

係鋪頭入面真係睇中左好多衫仔(因為我都幾鐘意鴨仔公仔),記得之前小豬媽講過唔好咁快買咁多衫仔,因為未知小小豬係屬於什麼SIZE BB,驚太快買會唔合身。

不過.....見依兩樣都唔算貴,我真係忍唔到手,所以都買左兩樣嘢俾小小豬~

一對手襪仔同一件初生BB嘅袍仔,件衫仔係紗質地,個職員姐姐話好合夏天著呀。

哈哈...啲BB衫真係勁得意,真係好想快啲再去覆診,到時就可以知道小小豬個SIZE,咁我又可以去買衫仔啦!

 

CafeMom Tickers


*♡♡小肥豬♡♡* | 28th Mar 2010 | 甜蜜生活 | (44 Reads)

28 MARCH 2010 (SUN)

今晚要去鑽石山同大肥豬屋企人食飯,我地下午又冇乜嘢做,加上見個天氣都幾好,所以又捉左我去晒太陽(因為大肥豬話晒得太陽多對小小豬會好哦)。

既然今晚要去鑽石山,所以大肥豬就提意同我去南蓮園池行吓順便晒太陽。

大肥豬知道我係唔會乖乖地去行公園晒太陽,所以就帶埋相機出去,叫我邊影相邊晒太陽啦~

不過唔知點解總係覺得自己冇乜MOOD,所以都係覺得自己影得唔靚(可能成日都覺得自己個樣醜怪左),反而係大肥豬就好有心機咁幫我就住靚角度嚟影。

唉.....依家我地兩個真係交換左攝影態度,不過咁都好,大肥豬有心機幫我影相我都係一件好事嘛!


*♡♡小肥豬♡♡* | 27th Mar 2010 | 幸福孕記 | (31 Reads)

27 MARCH 2010 (SAT)

早排見BABY KINGDOM有一個《全方位認識胎兒成長及需要》免費講座,當然都有報名,希望去聽吓,知多啲BB成長過程嘅資訊嘛。

終於前兩日收到入場卷,可以有得入場,所以今日食完LUNCH之後我地就向灣仔會展出發~

係我地搭地鐵時,俾我遇到一件開心事,第一次搭車有人讓座俾我,估唔到我個小肚仔都有人睇到。嗰一刻既驚喜之餘仲有少少尷尬,不過真係好多謝嗰位男仕。(唔知幾時再有人讓座俾我呢...哈哈~)

講座大部分時間講解懷孕時嘅營養,食乜對BB好,有乜要注意,所以都真係得益良多,起碼知道要多啲食乜會對BB吸收會更好。

講座完之後又有禮物收,今次禮物好豐富呀~

聽完講座,見仲有陽光,所以大肥豬就帶我去會展旁個灣仔海旁行吓...浪漫吓哦。

雖然都有少少攰,不過散吓步、吹吓海風又真係幾舒服~

 

CafeMom Tickers


*♡♡小肥豬♡♡* | 26th Mar 2010 | 好友與我 | (17 Reads)

25 MARCH 2010 (THU)

今年花展原本都以為冇得去影相,因為大肥豬話星期六日去會好多人驚會有危險,所以唔同我去。

哈哈...不過我終於都有得去啦!今日大肥豬要OT,所以就約左糖糖放工之後入去行個圈影吓相。

我地入到場都係五點多啲,所以天色都仲算幾好,加上依個時間又唔多人,所以都行得好舒服~

一入到場就當然即刻不停影...影...影....啦~

唔知係唔係已經展覽左好幾日,加上前一日落過雨,所以好多花花都已經謝謝地。同埋總係覺得個花展佈置同上年好似係差唔多,冇乜特別大驚喜。

話雖如此,但我地都影左好多相,影到天到黑晒先走呀!


*♡♡小肥豬♡♡* | 25th Mar 2010 | 生活點滴 | (21 Reads)

24 MARCH 2010 (WED)

之前都講過為左小小豬我要慳啲唔好亂買嘢,所以都有一段時間禁止自己去睇衫,怕係會忍唔到手會大SHOPPING。

忍左咁耐,終於都係今日破戒,唉..真失敗!

原本只係打算放工去商場買對襪仔,點知經過平時買開衫嘅鋪頭時,個心癮又嚟,所以就忍唔住入去行左個圈。

唔行由自何....一行嘅話就忍唔到手買左兩條裙仔啦~

 

依兩條裙仔除左個款靚之外(又係我鐘意嘅花花款..哈哈),都算比較鬆身,可以等個肚仔再大啲嘅時候都著到。

唉....當依兩條係為左等個肚仔再大時買嚟著,計落都有可以接受啦(又有人係度自己安撫自己)!


*♡♡小肥豬♡♡* | 24th Mar 2010 | 幸福孕記 | (41 Reads)

23 MARCH 2010 (TUE)

哈哈...今日又幫小小豬收到一份禮物,就係一張好靚靚嘅包被仔啦~

係今日小豬媽同LULU妹去行嬰兒用品部嘅時候買,張包被仔真係好得意,有隻兔仔耳呀,質地又好舒服(過得小豬媽眼光都知係好嘢嚟啦..哈哈),入面仲有層妙布,係好適合係夏天出世嘅小小豬用呀!

我第一眼望嘅時候都已經覺得好熟面口,返屋企再睇之前買過嘅衫仔,原來係同小豬媽之前買嘅夾衣仔同一個款。件夾衣仔就有個兔仔PAT PAT,包被仔就有對兔仔耳,到時小小豬一SET咁著一定好得意....哈哈!

 

CafeMom Tickers


*♡♡小肥豬♡♡* | 22nd Mar 2010 | 幸福孕記 | (38 Reads)

22 MARCH 2010 (MON)

早排見好多準媽媽都分別JOIN左唔同嬰兒用品公司嘅BB會,見嘅BB 會除左有好多資訊俾準媽媽之外,仲有好多迎新禮物送添!

有著數我當然又發揮師奶仔精神,JOIN埋一份。不過由於有太多BB會,我都唔係JOIN左太多,大多數都係JOIN左奶粉...尿片公司,因為依啲好似比較實用嘛!

等左一陣,終於收到第一份迎新禮物啦~

哈哈....唔知幾時會再收到其他嘅小禮物呢!

 

CafeMom Tickers


*♡♡小肥豬♡♡* | 21st Mar 2010 | 甜蜜生活 | (42 Reads)

21 MARCH 2010 (SUN)

難得好天氣,大肥豬話唔好浪費,唔俾我再留係屋企覺覺豬,要我出街晒太陽,所以就帶左我去西九海濱長廊行吓影吓相啦。

唔知係唔係好耐都冇去過影人像相,加上又唔敢做太大動作,所以總係覺得自己影得唔係太在狀態,不過一場嚟到,點都要影吓呀~

之後我地就行吓海邊,見到有個鞦韆就玩埋一份,我當然係只係坐上去扮玩啦~

行左一個圈,我地係海旁邊搵到個靚位,所以就SET腳架影吓合照~

影完海旁,見長木台嗰邊冇乜人,所以又繼續影..影...影啦~

今日影單人相就真係冇乜狀態,好多都唔見得人,反而同大肥豬嘅合照就張張都好鐘意呀!

下次再出街影相,都一定要帶埋腳架影合照先得,不過就難為左大肥豬要拎好多嘢去街啦...哈哈~


*♡♡小肥豬♡♡* | 19th Mar 2010 | 幸福孕記 | (46 Reads)

19 MARCH 2010 (FRI)

今日係我同大肥豬拍拖十一周年紀念,不過我地冇去食餐好慶祝,反而做左另一個活動,就係去聽BB講座。(哈哈...咁慶祝都算幾特別呀!)

早排睇BABY KINGDOM時,無意中俾我CLICK左一個網站,見有一個叫『準父母湊B全攻略』免費講座,師奶仔嘅我當然貪得意都走去報名,去聽多啲BB講座對日後都有幫助嘛!

起初都擔心免費冇好嘢,怕好多時間係介紹佢地公司嘅產品。不過係講座進行兩個鐘入面,都只係講解好多湊BB嘅注意事項,冇乜點SELL嘢。我好留心聽姑娘講解,所以都學左少少嘢,不過學左第日識唔識用番,就另一回事啦....哈哈!

原來聽講座都有禮物收,依啲就係今日收到嘅小禮物啦~

聽講座又有嘢學,又有禮物仔收,等我多啲留意仲有冇同類講座,參加吓都真係唔錯呀!哈哈~

 

CafeMom Tickers


*♡♡小肥豬♡♡* | 17th Mar 2010 | 幸福孕記 | (111 Reads)

16 MARCH 2010 (TUE)

當我知道有左小小豬之後,所有嘅婆仔鞋、BOOT都唔著得,因為我係一個行路極度唔小心嘅人,好容易就會扭到腳,又怕嗰啲好易滑到,所以我就日日都著住我嗰幾對CONVERSE頂住。

可能CONVERSE嘅鞋底唔夠厚,所以早排我對腳成日都好痛,小腿又好易抽筋。小豬媽就建議我買對有氣墊嘅鞋著,可以等我行路時減壓,行得舒服啲。原本都打算早早地走去買鞋,不過因為仲係新正頭關係,唔買得鞋住,所以就唯有等過左正月先去買。

係等買鞋嘅過程,大肥豬都有去啲討論區睇吓有冇啲好嘅孕婦鞋介紹,所以就俾佢就知道DR.KONG有專為孕婦出嘅鞋,就等到今日過左正月帶我去買啦!

其實孕婦鞋嘅款式同顏色真係唔多,有啲個款仲有啲娘,所以係冇乜選擇情況下,我就買左依款~

雖然話個款唔係好得,但著上腳又真係好舒服,個職員仲話對鞋係防滑防震,仲有三對鞋墊等到時雙腳係不同情況吓水腫時更換,咁就可以著到生啦!

雖然係好舒服,不過我都覺得貴左少少,折左之後都要成四百蚊,見大肥豬俾錢時我都有啲肉痛。但大肥豬話只要我著得舒服,貴少少都係值得。

 

CafeMom Tickers


*♡♡小肥豬♡♡* | 16th Mar 2010 | 幸福孕記 | (151 Reads)

6 MARCH 2010 (SAT)

尋日係吉之島BB展睇中左張大床仔之後,返到屋企即刻度SIZE,好在個位置剛剛好放得入我地間房,所以大肥豬都已經決定買依張床仔啦!

既然都已經決定左,所以就趁有大特價買,依家買都平左成四、五百蚊,慳慳埋埋又可以買多啲衫仔俾小小豬嘛,所以今日放工就再同大肥豬去吉之島買床仔。

就係依張MINIMOTO櫸木嬰兒大床仔,我地揀左木色,因為襯番我地張床嘛~

張床仔有成49吋長,仲有三段高度調校,小豬媽話應該可以夠小小豬瞓到三歲。依家買仲送吋厚嘅太空棉床褥,真係好抵呀!

除此之外,我地仲配埋依個牌子7件套裝嘅BB床圍用品。我地買左藍色嘅,當然係唔包圖入面隻BEAR BEAR啦..哈哈~

由於我地都唔算趕,所以就安排遲啲送貨。我地都唔會咁早就安裝放入房度,不過大肥豬話送左貨之後都會安裝一次,睇吓有冇問題,所以到時再同大家分享個現貨樣子啦! 

買完依兩件貨品之後,原本都打算再行多一陣,不過因為係星期六關係,成個吉之島BB部都迫滿晒人,加上我又興奮過度攪到好攰,所以我都冇心機再行,等下次再有BB展先再掃平價BB用品,不過到唔知係幾時啦!

 

CafeMom Tickers


*♡♡小肥豬♡♡* | 15th Mar 2010 | 幸福孕記 | (69 Reads)

5 MARCH 2010 (FRI)

檢查完之後,我地見時間尚早,又未夠鐘約小豬爸食晚飯,所以就去左行吉之島,睇吓BB展嘅物品啦!

其實去行個BB展都打算睇床仔,見廣告有好多BB床都做大特價,八折完九五折,好似平好多咁哦。我地都係要買床仔,雖然依家好似係早左少少,但趁做大特價買,不過可以慳啲嘛。

一入到吉之島第一時間就去睇床仔,其實我地都唔太識揀,好在有小豬媽係度幫幫眼,都大約睇中左一場大床仔,不過因為怕 SIZE唔啱放入房度,所以等度好晒位置先買。

就係咁我地就轉移視線,向衫仔進發。原本都冇諗住買住,不過衫仔實在太得意,加上小豬媽話有個日本牌子啲衫仔質地好好,好識合初生BB嫩嫩嘅皮膚。我見有八折都,所以就買左啲衫仔俾小小豬啦~

除左我買之外,小豬媽同LULU妹都分別買左啲衫仔俾小小豬,依啲就係小豬媽送嘅~

仲有LULU妹買嘅~

我地真係幫小小豬揀衫仔揀到唔知時候,要小豬爸打電話嚟吹我地先識走,真係有啲意猶未盡。等有機會就再約小豬媽去行街街買衫仔先得。

 

CafeMom Tickers


*♡♡小肥豬♡♡* | 14th Mar 2010 | 幸福孕記 | (76 Reads)

5 MARCH 2010 (FRI)

終於又等到每月一產檢嘅時候,又可以見到小小豬,真係等到頸到長晒。今次除左大肥豬同小豬媽之外,LULU妹都陪埋我一齊去,因為佢地好想見吓小小豬呀!

一入到醫務所,醫生首先就好詳細咁解釋我兩份驗血報告,所有結果都係正常,尤其係OSCAR嗰份,醫生話個數值非常好,聽完真係完完全全放心晒。

聽完報告之後,就到左緊張環節,可以去見小小豬啦!

係超聲波機見到小小豬又大個左,醫生話小小豬生長得好好,量度頭仔、肚仔同腳仔都比預計大一星期左右,醫生仲話左俾我知小小豬嘅性別添。(為保持神秘唔同大家講住,不如大家估吓啦!)

知道小小豬係好健康生長緊,真係比我知道佢性別嚟得開心。因為開頭仲擔心我體重輕左對小小豬有影響,原來係小小豬幫我吸收啲營養,等我唔洗重太多,咁快變大肥婆。雖然係咁,我都會迫自己食多啲嘢,變做大肥婆都唔緊要住(最多生完慢慢減),等小小豬繼續吸收....吸收,等佢繼續健健康康咁生長。

睇完醫生就再去化驗所再做多一次抽血,不過今次對依個報告冇咁緊張,因為我知道一定唔會有問題....哈哈!

 

CafeMom Tickers


*♡♡小肥豬♡♡* | 13th Mar 2010 | 甜蜜生活 | (44 Reads)

13 MARCH 2010 (SAT)

自從有左小小豬之後,我就食多左好多生果(有益嘛),不過食嚟食去都係橙、奇異果、提子.....食到都有啲悶。

前排睇電視見到啲士多啤梨,條引就突然出左嚟,攪到我勁想食,但去街市又搵唔到啲靚嘅士多啤梨,所以都好心思思咁。

等左幾日,今日終於都食到,仲係大肥豬專登行去超級市場買俾我食呀~

真係粒粒都係好大粒呀~


雖然依盒士多啤梨貴貴地,不過又真係勁甜勁有士多啤梨味,真係好好食呀!


*♡♡小肥豬♡♡* | 11th Mar 2010 | 生活點滴 | (27 Reads)

9 MARCH 2010 (TUE)

上星期細路去左日本旅行(勁羨慕中~),今日就收到佢送俾我地嘅手信啦!

首先就係一盒章魚小丸子味嘅燒餅,真係好有小丸子嘅味道,仲幾好食添。好在唔係太甜,所以我就唔洗怕唔食得,可以慢慢食晒佢啦...哈哈~

另一份都算係一份驚喜禮物,估唔到小小豬都有禮物收,就係依一件好得意嘅衫仔~

(前面)


(背面)

哈哈..真係好得意...係度代小小豬同舅父講句多謝先。


*♡♡小肥豬♡♡* | 9th Mar 2010 | 幸福孕記 | (39 Reads)

8 February 2010 (MON)

唔經唔覺小小豬都已經三個月大(其實我係覺得時間過得好慢就真,好想時間再繼續快啲,快啲見到小小豬呀),係我懷孕過程,原來大肥豬都有自己去睇啲BB討論區,佢就知道左係三個月開始就聽一啲胎教音樂,對BB嘅腦部發育有幫助。

就係因為依個原因,今日放工大肥豬就去左CD鋪買左一SET四隻的莫扎特效應~

套碟要成二百幾蚊就好似貴左少少,不過係話可以由胎兒開始聽到十歲左右,計落都算值得。

由今晚開始我就晚晚聽住嚟訓覺,剛剛聽左幾首都音樂都覺得好舒服,雖然唔知小小豬係咪會聽到,對佢有幫助唔知有幾大,不過如果邊聽邊訓都應該對我都幾好,起碼都會易啲入睡啦!

 

CafeMom Tickers


*♡♡小肥豬♡♡* | 7th Mar 2010 | 好友與我 | (23 Reads)

7 MARCH 2010 (MON)

早排見小M介紹左一個好得意嘅地方,叫做『港文化 港創意』,見到佢地嘅得意相,攪到我都好想去玩吓..影吓相。原來除左我之外,糖糖同小肥肥都有睇到小M個介紹,所以就約埋我一齊去玩啦!

個展覽其實都做左一段時間,加上今日天氣又唔係太好,所以開頭都以為唔會太多人去。點知一去到目的地就見到都有好多人係度影緊相,不過可能係因為個展覽係做埋依個星期,所以個個爭取最後機會影。

個展覽都真係幾多嘢睇,但有啲房間又佈置得好似有危險咁,大肥豬唔俾我行入去影,所以我都唔係影左好多相,先係室外影啲先~

再係室內又影吓~

到我最鐘意嘅地方,有好多好得意嘅豬仔呀~

今日仲影左張好特別嘅相,就係依一張啦~

成日都唔覺得自己個肚長大緊,見到依張相就睇到,真係勁開心呀!

大肥豬話等我個肚再大多少少,就再同我去影大肚相,係不同時段都去影吓留個紀錄。不過佢話到時一定要去啲公園影,因為佢始終對依啲展覽興趣不大哦。只要佢肯俾心機幫我影相,去邊當然係攝影師話事啦.. 哈哈~,


*♡♡小肥豬♡♡* | 6th Mar 2010 | 幸福孕記 | (78 Reads)

6 FEBRUARY 2010 (SAT)

今日短周唔洗返工,如常地都係留係屋企休息,正當我下午熟睡緊嘅時候,就俾大肥豬個電話嘈醒左。

原來依個電話係姑娘打嚟,當時我都聽唔得好清楚大肥豬同姑娘嘅對話,只係知道係講返俾我嘅OSCAR TEST驗血報告。

當佢地講完電話之後,大肥豬就即刻入房話我知,姑娘剛剛收到我個驗血報告,知道我地心急所以就打嚟話我地知已經通過左個TEST啦!

嘩...聽到依個好消息真係勁開心之餘仲安心晒呀!

 

CafeMom Tickers


*♡♡小肥豬♡♡* | 4th Mar 2010 | 幸福孕記 | (112 Reads)

5 FEBRUARY 2010 (FRI)

由於我係一個有嚴重驚恐嘅人,對好多事都會缺乏信心,所以當知道有左小小豬之後,我同大肥豬都已經決定全程由我睇開依位醫生幫我跟進,同時亦都會去私家醫院生啦!

係上次做完產檢嘅時間,姑娘提我要係新年前去醫院交訂金。既然我地都決定好,唔再考慮咁多,所以今日就叫左小豬媽陪我去醫院交錢啦~

其實我都知道去私家醫院生會洗多好好好多錢,不過對我嚟講生BB係一個好重要嘅事,真係要對個醫生同醫院有好大信心先放心將我同小小豬交俾佢地嘛!

為左小小豬可以係一個好嘅環境出世,所以平日要我地慳慳地,我都係覺得值得呀!

 

CafeMom Tickers


Next