香港新浪網 MySinaBlog
*♡♡小肥豬♡♡* | 27th Feb 2010 | 生活點滴 | (24 Reads)

26 FEBRUARY 2010 (FRI)

大肥豬知道將軍澳會係元宵節前有個元宵綵燈會,所以就話同我去行吓影吓相啦!

咁大個都未去過綵燈會,所以都幾想去睇吓綵燈會係點,所以就約埋LULU妹一齊去玩啦~

一入到會場就俾啲燈吸引住,雖然唔算好多種類,不過都好靚呀~

除左啲花燈之外,有啲古裝人同大家影相添~

仲有表演節目~

依個綵燈會雖然係細細地都幾好玩,不過可能我依家好容易攰,加上天氣又熱熱地,所以我地留左大半個鐘左右就走啦!


*♡♡小肥豬♡♡* | 25th Feb 2010 | 幸福孕記 | (66 Reads)

9 JANUARY 2010 (SAT)

今日見精神好啲又有番少少胃口,所以就煲左花膠豬骨湯俾自己補吓。

正當同小豬媽傾電話之際,小豬爸知道我煲左湯,所以就話又要嚟飲埋一份,就係咁...今晚小豬爸同小豬媽仲有LULU妹就嚟左我家作客。

由於事出突然,所以我都唔算準備太多餸,只係得花膠湯、蒸肉餅同炒西蘭花,要小豬爸外賣啲燒味嚟加餸添。

其實當我知道佢地嚟陪我食飯嘅時候,我感受到佢地嚟食飯都係其次,主要都係想嚟睇吓我同陪吓我,所以我真係好開心仲有少少感動。

當小豬媽嚟到我屋企時,我即刻帶佢入房,睇吓貼左係床邊嘅BB POSTER(依張POSTER大肥豬都搵得好辛苦,行左好幾條街先搵到)~

點知小豬媽一見張POSTER就笑起上嚟,因為原來佢懷住我嘅時時候,都係貼依一張POSTER。聽完之後大家都狂笑起嚟,因為大家都係估緊相中BB個歲數嘛!

不過我就有另一個想法..就係又會咁橋小豬媽當時又係貼依一張,咁唔知小小豬會唔會同我細個時一個樣呢?哈哈哈~  

 

CafeMom Tickers


*♡♡小肥豬♡♡* | 23rd Feb 2010 | 幸福孕記 | (119 Reads)

3 JANUARY 2010 (SUN)

聽醫生講成個懷孕過程中,最辛苦就係由第六星期開始至第十二個星期,因為會出現害喜情況,成日都會作嘔作悶咁。

我就由聖誕假期開始就個胃好唔舒服,勁冇胃口食嘢,食少少就已經頂住晒,都幾辛苦。就係依個原因我聖誕假就日日HEA係屋企冇得去玩....唉!

雖然係胃頂頂,但我都未曾試過嘔得出,不過係今日,終於都要嘗試吓。

係食完早餐,見攰攰地咁就再去訓吓休息吓,點知....一訓醒個胃就勁反,開頭都以為係同平時一樣等一陣就冇事,但最後都忍唔住....終於都要第一嘔啦!

過程雖然係好辛苦,但之後都會有一段時間嘅舒服,起碼冇嘢頂住個胃嘛。

我依家先係七星期左右,最少起碼仲有五個星期捱,不過為左小小豬,辛苦少少都要捱住,因為我作嘔作悶就即等如小小豬成長緊,所以一定要忍..忍...忍。

不過,我都希望唔好嘔咁多次,同埋唔好係街…搭車途中或者係學校嘔,如果唔係就會好醜樣啦!  

 

CafeMom Tickers


*♡♡小肥豬♡♡* | 21st Feb 2010 | 生活點滴 | (31 Reads)

20 FEBRUARY 2010 (SUN)

早排係啲日本雜誌網站知道AGNES B將會出一本SPRING/SUMMER COLLECTION仲附送一個大袋袋連心形吊鏈添~

一見到就勁想買,所以就同糖糖係網上四圍搵。不過唔知係唔係海鮮價,個價錢都好浮動,終於俾我地搵到個唔太貴嘅地方,仲立即訂左兩個啦!

等左到有成大半個月,終於今日收到個MSN通知可以去拎。由於今日我同糖糖都要返工,但又好心急想擁有個袋袋,所以就派左大肥豬幫我地去拎。可以當係我初七人日嘅生日禮物嘛...哈哈!

嘩...一打開嚟睇,個袋又大又靚,真係勁鐘意,好在係網上訂到,如果唔係就走寶啦~

但本雜誌就差少少,都冇乜嘢睇,成本都係SELL AGNES B啲嘢。不過書還是其次,買日本雜誌都係為左隨書付送嘅袋同鎖匙扣嘛!


*♡♡小肥豬♡♡* | 20th Feb 2010 | 幸福孕記 | (81 Reads)

30 DECEMBER 2009 (WED)

等左兩星期,又到左去見醫生,今次除左大肥豬陪我之後,小豬媽都有一齊去覆診添。

記得上次醫生講過今次係可以見到小小豬嘅心跳,所以係未見醫生之前我都真係好驚張,唔知個心跳會係點呢?

等左一陣就可以入去見醫生,不過好唔好彩,因為我唔係太急小小,所以個膀胱唔可以托起小小豬嚟睇,所以唯有要係醫務所入面不停灌水,等左差唔多成個鐘先見做可以去再去照超聲波。

終於見到啦.....不過唔係我親眼睇到,因為小小豬仲係好細細,我要訓定定唔可以周圍郁咁個人俾醫生照,所以都只係大肥豬同小豬媽見到。

聽佢地講小小豬真係閃吓...閃吓...好得意,我仲見到佢地兩個望住個螢幕時個開心樣,我都已經好開心,証明小小豬係健康咁生長緊嘛!

經過今日個檢查,醫生確定左小小豬個預產期,係2010年8月20日,小小豬早我6日生日,哈哈。

下一次再見醫生就係一個月後,到時就係去做OSCAR。相信小小豬一定可以順順利利通過依個TEST呀!  

 

CafeMom Tickers


*♡♡小肥豬♡♡* | 19th Feb 2010 | 幸福孕記 | (59 Reads)

24 DECEMBER 2009 (THU)

終於都等到平安夜,可以去睇SAMMI演唱會啦!

其實當知道有左小小豬之後,我都有考慮過應唔應該去睇依個演唱會,因為依家小小豬係一個重要時期,好驚去人多地方會對小小豬有影響。

既然我咁辛苦先可以訂到飛,冇理由唔去,加上唔知SAMMI幾時先會再開演唱會,所以同大肥豬商量之後,就做左一個小小自私嘅決定,同埋小小豬一齊睇SAMMI啦!

係未夠鐘入場時,路過尖東噴水池附近,見有個許願活動,我地就貪得意走去拎左張許願卡寫左個心願,掛上心願位置上面,希望願望成真啦~

講番演唱會先,為左唔好影響小小豬,所以事前我都答應過大肥豬唔會尖叫、唔興奮過度、只係好乖乖咁坐定定睇SHOW。

不過對住SAMMI我又點可以忍得到呢,就係因為太開心關係,由SAMMI唱快歌嗰PART開始覺得唔舒服,個心跳得勁快,嗰刻開始真係好乖乖坐定定睇,唔敢再亂嚟啦!

 

CafeMom Tickers


*♡♡小肥豬♡♡* | 18th Feb 2010 | 幸福孕記 | (63 Reads)

21 DECEMBER 2009 (MON)

今日我真係好失敗,一早起身都已經好唔舒服,鼻水唔停又好反胃,想嘔又嘔唔到,真係勁辛苦。

雖然我知道反胃係個正常反應,不過加埋鼻水同周身唔舒服,真係好辛苦頂唔順,所以今日返左一半工就同老細請下午假左去睇醫生。

講真...我真係好唔想去睇醫生,小小豬依家先係好細細個,我好唔想陪我一齊食藥,不過大肥豬同小豬媽都話睇吓醫生安全啲,所以唯有迫住都要去睇啦!

但好景不常,睇開嗰位婦科醫生放假,依個時侯都唔知點算好,真係好惶恐,最後小豬媽就陪我去睇平時睇開嗰位普通科醫生,叫我先同醫生講我有左BB,到時醫生就會開啲啱我食嘅藥俾我。

醫生話我係感冒,開左三日藥俾我。不過我都係食左一次藥,訓醒一覺之後,見啲鼻水收左,個人又冇咁辛苦,都冇再食藥啦。雖然話啲藥係對小小豬唔會有影響,不過始終都唔想食,始終藥都係少食為佳。

唉.....點解我會唔舒服,我真係好忟我自己,點解我要病,要小小豬陪我食藥,當我食嗰一次藥時,我真係好有罪惡感,好憎我自己。

我一定要再更加好好照顧自己,唔可以再俾自己病,唔可以再要小小豬陪我食藥,我要小小豬健健康康咁生長。  

 

CafeMom Tickers


*♡♡小肥豬♡♡* | 16th Feb 2010 | 生活點滴 | (25 Reads)

15 FEBRUARY 2010 (MON)

往年初二都要一早起身入新界去同大肥豬婆婆拜年,今年因為有左小小豬關係,所以今年奶奶都唔洗我地一齊入去。哈哈….又可以瞓晏啲啦!

雖然唔洗參與拜年活動,不過我地都有個小節目,就係又係去睇戲。繼尋日嘅《72家租客》後,今日睇嘅就到《花田囍事》~

依套戲真係差左啲,冇乜笑位之餘仲覺得有悶場,所以話我都係支持《72家》多啲,起碼好笑好多嘛!哈哈~~

睇完戲又係時間返奶奶食開年飯,由於時間尚早,嫂嫂們打麻雀又唔夠人,所以我就要幫手落場打埋一份。其實我都唔太好兼唔太識打牌,但見到係自己人又細細地咁就當夠陪佢地玩吓。

點知一玩之吓,有兩條紅衫魚遊走左之餘,仲攪到我頭痛到爆。唉...真係怕怕....下次都唔好預我啦!


*♡♡小肥豬♡♡* | 14th Feb 2010 | 生活點滴 | (26 Reads)

14 FEBRUARY 2010 (SUN)

今日係大年初一兼情人節,首先祝虎年快樂...步步高昇...心想事成...仲有就係情人節快樂,大家都甜甜蜜蜜!

往年初一都會一早起身去同小豬爸、小豬媽拜年,不過佢地今年出外渡歲,所以我地就可以懶少少,唔洗咁早起身。哈哈~~

起身之後,第一時間就煎吓年糕應吓節。雖然我煎到啲年糕賣相麻麻地,不過都幾好食呀~

食飽飽年糕之後我地就出發去玩,大肥豬為左唔想我新年都係屋企瞓住嚟過,所以就同我出去睇戲慶祝新年兼情人節啦!

出到APM見時間尚早,所以就四周行吓,我地係大堂見到有個大籤筒,我地就貪得意抽埋一份。嘩...大肥豬好利害,一抽就抽到第一籤呀~

夠鐘入場啦.....我地仲買左盒爆谷入場食添,不過我好乖食左唔係好多粒呀~

套戲都OK好笑,有好多明星睇咁啦,都算幾啱新年睇呀!

睇完戲就去奶奶屋企拜年,咁就過左一個開心嘅年初一啦!


*♡♡小肥豬♡♡* | 13th Feb 2010 | 幸福孕記 | (134 Reads)

17 DECEMBER 2009 (THU)

今日係第二次去醫生度為小小豬進行驗查,雖然都已經確定左小小豬嘅存在,不過都有啲擔心,唔知小小豬個生長情況係唔係正常。

醫生同我傾左一陣近況之後,就同我去照超聲波。上次照嘅時候因為都未確定,所以係我一個人入去,不過今次大肥豬就陪埋我一齊去睇超聲波,一齊睇住小小豬個生長情況嘛。

訓上張婦科床時,都真係好緊張...好緊張,不過當醫生同我講小小豬生長好好,依家都已經5week左右,冇宮外孕,一切完全正常,加上係個超聲波螢幕上見到由上次好似粒豆嘅小小豬大左好多,雖然都只係睇到個胎囊,不過依一刻都真係即刻安落晒。

下一次再見醫生就係兩個星期後,到時小小豬就應該7week左右,可以睇到小小豬嘅心跳,同埋確定個正式預產期,所以真係好緊張,唔知小小豬個心跳係點呢?

真係從未如此覺得時間係過得咁慢,好想快啲再見到小小豬呀! 

 

CafeMom Tickers


*♡♡小肥豬♡♡* | 12th Feb 2010 | 生活點滴 | (41 Reads)

11 FEBRUARY 2010 (THU)

之前小豬媽教過新年要擺盆水仙花係屋企,咁即表示係旺夫,所以由新婚第一年開始過年都已經擺盆水仙,實行等大肥豬可以旺一旺嘛!

其實小豬媽一早都已經幫我留意啲水仙,想幫我買盆靚花,不過依排啲天氣真係好唔穩定,攪到市面上好多年花都已經開晒,所以都好難揀到盆又靚又合時嘅水仙,冇理由買盆花返屋企未到新年就已經開晒花嘛。

原來真係好難搵,我知道小豬媽差唔多行遍成個東區有花買嘅地方都搵唔到,最後小豬媽明知會貴啲都去左到維園花市幫我搵盆靚嘅水仙花。

終於都買到啦,盆水仙真係好靚~

好多花芯之餘仲係慢慢開緊添~

睇個生長情況,時間應該會剛剛好,等到初一就會開花...咁就花開富貴,大肥豬係虎年一定會旺~旺~旺~~啦...哈哈!

除左要多謝小豬媽幫我搵到盆靚花之外,仲要多謝小豬爸,因為係小豬爸送俾我呀。


*♡♡小肥豬♡♡* | 11th Feb 2010 | 幸福孕記 | (127 Reads)

10 DECEMBER 2009 (THU)

唔知係唔係剛剛有小小豬就即刻興奮過度,我尋晚竟然發左一個攪笑嘅夢。夢見小小豬已經出左世,不過一望之下,小小豬竟然係黑漆漆咁,成舊朱古力咁呀!

一訓醒就即刻好擔心,擔心會夢境成真。好果小小豬真係黑漆漆,咁咪唔係靚BB囉!

為左小小豬個靚樣著想,雖然一向我都唔鐘意飲鮮奶,但都係時間開始飲吓鮮奶做早餐,等可以有營養之餘,小小豬又可以變得白雪雪。

市面上鮮奶選擇真係勁多,多都我都真係唔識揀啦,最後我都係決定買依隻日本奶飲啦~

雖然比牛奶公司嗰啲貴少少,不過聽人講日本奶係安全啲(好明顯我係一個祟日份子...哈哈~),起碼唔洗擔心有溝左啲三聚氰胺或者其他嘢落去嘛!

雖然啲奶唔係太鐘意飲,不過為左小小豬,由今日開始,盡量都會KEEP住早晚飲一杯,等小小豬可以健健康康咁生長啦!

 

CafeMom Tickers


*♡♡小肥豬♡♡* | 10th Feb 2010 | 幸福孕記 | (223 Reads)

7 DECEMBER 2009 (MON)

ANITE M一向都好準時嚟探我,佢嚟之前總係會攪到我個頭好痛,好冇心情兼勁生粒粒。

不過直至今日ANITE M都已經遲左好幾日,我又冇類似M前嘅唔舒服,所以就心思思咁係起身時嘗試CHECK吓,睇吓有冇BINGO啦!(不過當時都唔冇抱太大期望)

終於個結果係棒棒上出現左一條勁..勁..勁弱嘅線,我即刻叫醒大肥豬幫吓眼,佢都話條線真係好若隱若現。係我地兩個都唔肯定嘅時候,我又諗番起一啲論壇講過BINGO個徵狀,我又好冇樣似咁,所以嗰日刻都只係擔心係自己有病多過以為自己有左。

為免太過擔心,所以都係決定去睇醫生得個清楚,所以一等到醫務所開,我就即刻打俾睇開個婦科醫生BOOK時間,大肥豬都提早放工陪埋我一齊去見醫生。

一見到醫生,講左個之後情況,就叫我去照超聲波睇睇。一照之下,醫生都話睇就似係有左BB(唔係太肯定口吻),之後叫我去驗小便再進行第二個TEST。

等左十分鐘之後,再入去見醫生,終於聽到醫生講:恭喜晒...你真係有左BB。

聽到依一句話,我真係開心到眼濕濕,大肥豬當然開心到笑晒啦!醫生話我依家係4星期左右,開左啲維他命同葉酸俾我食,叫我十日後再番去覆診。依一刻我真係勁開心,我終於都可以擁有小小豬啦!

依一份真係上天送俾我嘅一份好好嘅兩周年結婚禮物。雖然遲左幾日先知道,不過3號當天都應該已經係我肚仔度,真慶幸今次大肥豬建議改去食中餐慶祝,如果去左食日本嘢,你都唔好話唔擔心呀!

由依家開始,我一定要好好照顧自己,多啲休息,等小小豬可以平平安安,順順利利咁過左依個時期。

 

CafeMom Tickers


*♡♡小肥豬♡♡* | 8th Feb 2010 | 幸福孕記 | (77 Reads)

8 FEBRUARY 2010 (MON)

原來有一個不能說的秘密係辛苦,等左咁耐終於都可以同大家分享........就係我同大肥豬之間出現左第三者,依個第三者就係~~~~~小小豬。

因為我已經成為左虎媽媽,肚入面已經有左小小豬啦!依家己經是12 WEEKS,即係三個月,所以終於可以同大家分享我依件開心事啦!

因為依幾個月身體都唔算太好,所以都少左上BLOG,好似消失左咁,不過其實我都有紀錄低依幾個星期發生過嘅事,等我慢慢POST出嚟同大家分享之餘,亦都可以當做一個紀錄,等將來小小豬可以睇番佢出生嘅過程嘛。

PS:雖然係一件開心事,不過都暫時唔方便俾太多公司同事知道,所以請各方好友如果見到依個POST唔好係公司四處張揚,大家心照就好了.....謝謝!

 

CafeMom Tickers