香港新浪網 MySinaBlog
*♡♡小肥豬♡♡* | 30th Dec 2009 | 甜蜜生活 | (36 Reads)

28 DECEMBER 2009 (MON)

係聖誕假期依幾日,因為都唔係好舒服,所以日日都係屋企訓...訓...訓。

訓左咁多日,見精神都叫做好少少,加上請左幾日大假又唔想浪費,所以今日就同大肥豬去海港城影相啦!

睇其他朋友仔嘅相就覺得海港城啲小天使好靚,不過今日去睇...可能係白天關係冇開燈,感覺上好似冇咁靚呀~

影完之後,我地就向另一個目的地出發,就係行入去海港城另一商場,去影MIFFY啦!

雖然要俾$40入場,不過做善事都冇所謂啦。可能我地係平日嘅下午入去影,所以都冇乜人,我地仲影左好耐添~

入場都有張即影即有送,仲有包M&M送添,朱古力就當然即場俾老公KO左。原本仲有條MIFFY手機繩送,不過嗰日剛好送晒......蝕左~


*♡♡小肥豬♡♡* | 27th Dec 2009 | 生活點滴 | (27 Reads)

24 DECEMBER 2009 (THU)

等左一咁耐,終於都等到平安夜,可以去睇SAMMI演唱會,我個心情真係勁興奮同期待。雖然今日冇得放早,不過我個心已經一早飛左去紅館啦!

終於等到放工,約左大肥豬係尖沙咀簡簡單單咁係附近食個晚餐,之後就向紅館進發。

時間剛剛好,行到去紅館就可以入場。當然係入埸時要做啲重要嘢,就係買螢光棒。依支螢光棒唔係係大會指定地方買,出自街邊小販店。真係識做生意,貼埋張LABEL上去~

今次個場係四面台嚟呀~

等左一陣,終於開SHOW啦~

廿四味出場,只係唱左罪與罰~

之後到陳奐仁....信者得愛....勁正呀~

嘩...華仔做嘉賓,全場勁HIGH~

SAMMI重點介紹嘅陳奐仁,佢唱英文歌真係幾正哦~

完SHOW後SAMMI再出嚟清唱唯獨你是不可取締~

係有限資源下(唔可以用閃燈、冇腳架、唔係太長嘅長鏡同埋山頂位),影到咁多相都已經算好好啦!

SAMMI成個SHOW真係勁正...好睇...好興奮,不過唯一美中不足就係SAMMI成日都背住我地,好少行去我地嗰面呀!


*♡♡小肥豬♡♡* | 24th Dec 2009 | 生活點滴 | (21 Reads)

24 DECEMBER 2009 (THU)

今日係平安夜,祝大家平安夜快樂、聖誕快樂!

剛好天氣已經回暖,咁大家就可以過一個好WARM 好SWEET嘅CHRISTMAS啦!


*♡♡小肥豬♡♡* | 23rd Dec 2009 | 生活點滴 | (17 Reads)

23 DECEMBER 2009 (WED)

屋企附近開左一間拉麵店,見到開左成個月有多都未幫襯過,加上又就嚟聖誕節我條懶根又出左嚟,唔想煮飯,所以今日嘅晚餐就去試食啦~

紙巾都都有豬豬公仔,都幾可愛呀~

講起依間食店,真係有開心又有唔開心。先講啲開心嘢先,就係間鋪嘅嘢食真係幾好味,個湯底又味之餘仲冇乜味精,拉麵又幾彈牙,整體上都唔差呀~

開心過後.....就要講吓唔好地方,幫我地落ORDER嗰位服務員啲態度真係勁差。

基本上佢地餸嘅款式都唔算多,不過唔同就係有不同味道嘅湯底,但係短短幾分鐘我地又點可以睇熟晒本MEAN呢,所以我就係落ORDER時問那位服務員有什麼湯底啦,點知得到個答案係:(態度串串的)依度咪寫好晒囉,你想叫乜麵講個NO俾我知就得啦!

嘩....一聽到即刻火到嚟,依啲係乜服務態度,我唔清楚當然要問啦。

唉....雖然依間啲拉麵又真係幾好食,不過我估我都應該唔會再去。食飯唔係應該開開心心,冇理由要受氣嘛,所以我地都已經BLACKLIST左佢啦!


*♡♡小肥豬♡♡* | 20th Dec 2009 | 好友與我 | (15 Reads)

19 DECEMBER 2009 (SAT)

回想起......我都好耐冇收到聖誕卡,上年嘅聖誕都好似冇收過,估唔到今年就有得收啦~

哈哈....依張聖誕卡應該係早幾日收到,不過因為依幾日我都冇去開信箱,所以到今日先知有卡收,真係唔好意思。

係度多謝CARMEN送俾我嘅聖誕卡,我收到啦.....多謝晒!

雖然依家係一個互聯網世界,每逢節日都係SEND E-CARD,不過收到傳統嘅聖誕卡個感覺又真係好唔同,會開心啲呀!


*♡♡小肥豬♡♡* | 16th Dec 2009 | 甜蜜生活 | (30 Reads)

15 DECEMBER 2009 (TUE)

今日放工路經APM時,見商場將個台開放左出嚟,只要捐錢就可以入去個台上面影相。

我地見有時間,所以就貪得意咁捐左$20入去玩吓。可能我地仲係早,又或者冇人好似我地咁傻捐錢入去影相,所以成個場都只得我地兩個,簡直係鐘意點影就點影,唔洗同人迫呀~

 

係差唔多走嘅時候,在場職員幫我地影左兩張即影即有相。原來我地捐左$20,就會送兩張俾我地呀~

係個台上面影相都幾好玩,不過就覺得有少少尷尬,因為係上面樓層嘅人會成日望落嚟,好似望住你影相咁,都有啲唔自然呀!


*♡♡小肥豬♡♡* | 15th Dec 2009 | 生活點滴 | (15 Reads)

15 DECEMBER 2009 (TUE)

首先感謝幾位報料人仕嘅情報,不過我都因為實在太遲,都係換唔到水杯,真係估佢唔到咁快會換清光...唉!

原本都打算等吓,睇吓會唔會返貨,不過問左幾間OK都話唔會再入貨,我仲傻到打左去客戶服務中心問,不過都係同一答案~~~唔會再返貨。

既然我都已經有200FUN,如果再等落去,我怕就連公仔都換唔到。為左唔好浪費,所以就換左兩隻細BEAR BEAR公仔啦~

雖然始終都係覺得杯實用啲,不過依200FUN都係C小姐送俾我,所以換到公仔都已經好好啦!哈哈~~


*♡♡小肥豬♡♡* | 13th Dec 2009 | 靚太廚房 | (1368 Reads)

11 DECEMBER 2009 (FRI)

係我剛入伙嘅時候,小豬媽俾左包花膠仔我看門口,等有朋友上嚟食飯嘅時候都有好嘢招呼。

不過,我地嘅朋友仔次次上嚟都係打邊爐用唔著,印象中都好似係煮過一次,之後就收埋左係某一格廚櫃入面,差啲仲唔記得有依一包好嘢嘅存在!

早係上星期我執廚房時發現依包好嘢,見已經擺左好一段日子,為免再繼續擺到唔知幾時,所以決定煮左佢俾我地自己食。

依幾日好努力咁上網搵食譜,不過好似好難好複習咁,有啲又話要燉盅,所以一直都未開工煮花膠。

不過係尋日我終於搵到個易易地嘅食譜,所以就即刻開工,先係尋日將啲花膠發起,再等到今晚煮依個甜品。

登..登...登....登.....我依個滋補甜品就係...花膠煲鮮奶啦~

係唔係好多花膠呢?可能我落少左糖,所以個味就好似淡左少少,但啲花膠就好好味呀!

雖然個味道都唔係差,不過我都係鐘意咸食多啲,等我下次用啲花膠仔嚟煲湯先得。

材料:
- 花膠 3片
- 水 1升
- 北海道3.6牛奶 1升
- 紅棗 10粒
- 冰糖 隨自己口味

做法:
1. 花膠洗淨,發好,出水備用。
2. 水煲滾後,加入花膠及紅棗以中大火煲滾後,以細火煲1小時 。
3. 下冰糖調味,因為會再加牛奶,所以可以甜少少。
4. 加入牛奶,煲至再滾起即可。

 


*♡♡小肥豬♡♡* | 12th Dec 2009 | 好友與我 | (13 Reads)

11 DECEMBER 2009 (FRI)

之前我去左好幾個商場影啲聖誕佈置,影左幾個之後,就俾公司個史迪哥哥笑我:點解唔去埋新翠商場影,應該汁到撈埋先得嘛!

由於新翠嗰個佈置都真係麻麻地,不過既然史迪哥哥叫到,到係時間撈吓汁。所以今日利用LUNCH時間,食完飯之後就同糖糖一齊影吓!

講真....真係可影地方唔多,最可愛都係依一個雪人公仔~

仲有啲聖誕樹仔啦~

哈哈......雖然好似有少少無聊,不過地方咁近又加上都叫做係聖誕佈置,所以影吓都冇壞,感受吓少少嘅聖誕氣氛都好呀。

雖然冇乜特別嘢影,不過勝在完全唔洗同人迫,所以我地都話會搵日又再利用LUNCH時間,帶公仔落去影番輯!


*♡♡小肥豬♡♡* | 11th Dec 2009 | 生活點滴 | (15 Reads)

11 DECEMBER 2009 (FRI)

早係十月嘅時候,經過五個半鐘嘅苦戰,終於都訂到SAMMI演唱會,不過一日飛未到手,始終都係心掛掛,唔知會唔會有乜問題,攪到冇得睇。

今日開始就唔洗擔心,因為終於都收到飛啦!有飛在手,個人都即刻定啲,哈哈~

一睇個行數....OMG.....同上次睇HOCC一樣又係尾二行,唉...即刻有少少DOWN添。

不過,算啦.....我咁遲先打得通個電話,可以訂到平安夜嘅第一場都已經好好,我有啲朋友仔想訂都訂唔到呀!

呵呵呵...平安夜去睇SAMMI.....依家個心情都勁興奮呀!

 

同場加映:
等左好耐....SAMMI終於都出全新CD,我依個超級FANS當然好想去買啦!今日放工行左一陣藍田嘅商場,發現成個藍田都冇CD鋪,買唔到SAMMI新碟添。

原本都以為要等聽日出觀塘先買到,不過今日放工老公就幫我買左番嚟啦~

哈哈.....超級開心,今日收到演唱會飛同新CD,真係SAMMI DAY呀!


*♡♡小肥豬♡♡* | 9th Dec 2009 | 生活點滴 | (14 Reads)

9 DECEMBER 2009 (WED)

原本我都冇打算去換OK鬆弛熊物品,有一次同大肥豬見到隻杯又幾鐘意,所以我就開始多左少少去OK買嘢...但直到依家都只你得嗰45FUN,有排都未換到啦!

不過早排好友C小姐話佢有FUN多,因為佢冇打算換,所以將啲FUN俾晒我。

尋晚終於係收到佢俾我嘅FUN,嘩...估唔到原來佢俾左200FUN我,夠換兩款BEAR BEAR杯啦~

今日LUNCH就即刻走去換當然即刻走左去換,竟然柴灣兩間都冇晒。之後放工又再去觀塘問,都係同一答案...換完。

可能我都算遲換啦,依家攪到有FUN都冇用武之地。

唉....唔知有冇朋友仔知道邊度仲有得換嗰兩隻BEAR BEAR杯呢,有就記得通知我一聲呀...麻煩晒!

雖然仲未有杯在手,不過我都要係度多謝C小姐嘅捐贈。


*♡♡小肥豬♡♡* | 8th Dec 2009 | 好友與我 | (18 Reads)

6 DECEMBER 2009 (SUN)

終於嚟到今日最後一個節目,原本都只係打算BBQ完之後就各自回家,但係燒烤途中,大家都諗有乜地方可以去影吓聖誕佈置嘅時候,糖糖就醒起葵芳新都會有個藍寶石王子佈置都可以去影吓,所以就決定BBQ之後就去探吓藍寶石王子啦~

除左主場景之外,四周都擺左好多藍寶石王子嘅圖畫,都幾靚呀~

講真...我對藍寶石王子嘅印象都唔係太多,細個都好似冇乜點睇過依套卡通。不過睇完依個展覽之後,我有一個問題:究竟藍寶石王子係男仔定女仔呢?睇名就好似係男仔,但睇展覽上嘅圖畫加埋佢個樣,又真係好似女仔哦。

唔知有冇朋友仔可以解答我呢...哈哈~


*♡♡小肥豬♡♡* | 7th Dec 2009 | 好友與我 | (15 Reads)

6 DECEMBER 2009 (SUN)

當決定好今日一齊出去玩時,我同糖糖都諗有乜新攪作時,糖糖就話不如我地都BBQ,好快地又介紹左個又平又好嘅地方俾我地,所以就實行嚟個三人BBQ啦!

今次我地就去小欖燒烤場,係朗豪坊附近有小巴入元朗會途經依個燒烤場,交通都算真係勁方便。除此之外,每人都係$78,包一罐飲品同一支水,啲嘢食就雖然少啲花款,不過個味道都唔差呀!

我地入到去都差唔多一點半,大家都開始肚餓,所以即刻就去拎嘢食燒燒燒啦~

燒完一輪..再嚟第二輪~


(仲有啲相係小肥肥度,等佢俾埋我先再同大家分享啦!)

邊食邊燒邊傾計,唔覺唔覺我地都真係食到飽飽,基本上好似係冇停過咁燒。真係快樂不知時日過,轉眼原來我地都已經燒左五個幾鐘,原本仲打算燒燒吓去附近個沙灘玩,不過都冇時間,唯有等下次再有機會一齊再去沙灘玩啦!

當我地走嘅時候,一踏出燒烤場門口,就有紅色小巴接客人出市區,真係勁方便呢!

BBQ完畢,我地又好忙碌地再向下一個目的地出發啦!


*♡♡小肥豬♡♡* | 6th Dec 2009 | 好友與我 | (19 Reads)

6 DECEMBER 2009 (SUN)

今日大肥豬去佢同事屋企BBQ,由於目的地將會有幾隻大狗狗,為免我驚而玩得唔開心,所以大肥豬唔洗我一齊去啦!

我當然唔會一個人係屋企咁寂寞,所以就約左糖糖同小肥肥陪我去玩吓。

今日我地個節目都真係勁豐富,首先我地約係旺角朗豪坊集合,去得朗豪坊...我又點會唔上去影吓貓貓呢!

由於兩位妹妹仔之後都已經去影過,所以今次主要都係幫我影啦~

時間早就真係有一個好處,成個場地都唔係太好人,都幾好影。不過當我地影到尾段,有一邊門開始封,可能為晏啲節目準備。

就係依個時候我地都離開朗豪坊,向下一個地點進發啦!


*♡♡小肥豬♡♡* | 5th Dec 2009 | 甜蜜生活 | (29 Reads)

5 DECEMBER 2009 (SAT)

已經有好多朋友仔去左德福影聖誕BEAR,我都想去左好耐,終於今日到我去影啦!

啲BEAR BEAR真係好靚,就係因為太靚關係,所以都有好多人一齊影,想搵個有利位置都幾難。不過我就一於唔理咁多,有位就行埋去影。最衰就圍到好開,想近啲同BEAR BEAR影都唔得~

行去二期途中見到有BEAR BEAR可以作近距離接觸,當然要玩陣啦~

去到二期個BEAR BEAR火車站,不過勁多人,所以都只係同入面嘅BEAR影呀~


*♡♡小肥豬♡♡* | 3rd Dec 2009 | 甜蜜生活 | (91 Reads)

3 DECEMBER 2009 (THU)

轉眼間又嚟到123依個重要日子,我地結婚兩周年啦!

雖然大肥豬今日放假,不過由於我要返工關係,所以都冇乜特別節目,都係簡簡單單食個晚飯同行吓街咁慶祝。

大肥豬嚟接我放工之後我地就去玩,第一站就先去時代廣場影幾米,不過超勁多人(係啲內地人),所以影到都冇晒心機,隨意影吓就走~

差唔多次次慶祝都係去食日本嘢,不過大肥豬話今次攪攪新意思,帶我去食餐好嘢。哈哈...食乜好嘢...原來就係去名苑酒家食魚翅鮑魚燕呀~

先嚟兩杯飲品慶祝吓先~

上菜啦,有菜單上話有足三兩嘅魚翅,都OK多翅啦~

之後就到另一主角鮑魚出場~

嘩...我都係第一次用刀叉食鮑魚,雖然唔算大隻,不過個味道都唔差呀~

仲有其他餸菜,大致都OK好食,不過係個份量好似少左啲~

最後就係甜品燕窩糕同蛋白杏仁茶,唔太甜都幾好食~

雖然一向我都唔太好中菜,不過今餐又真係幾滿意,真係要俾個叻叻大肥豬,搵到個好地方,等我可以食左個滿足嘅兩周年晚餐。


*♡♡小肥豬♡♡* | 2nd Dec 2009 | 甜蜜生活 | (31 Reads)

1 DECEMBER 2009 (TUE)

今日做左個乖乖老婆,放工去左等大肥豬放工,原本係打算去到公司樓下接大肥豬之後再一齊去街街,不過當我行到去又一城時,見到有少少聖誕佈置,當然唔執輸要影吓,所以最後就叫大肥豬過嚟JOIN我啦!(我都去左佢公司附近,都算叫做去接佢.. 哈哈~)

又一城都主要係依棵又高又大嘅聖誕樹出名,不過咁多年我都未嚟影過添~

剛好去到時有聖誕樹燈光音樂表演,著晒燈仲靚呀~

 

除左聖誕樹之外,仲有個有關音樂嘅佈置,雖然唔算太靚,都叫有啲特式,所以都周圍影吓~

等到大肥豬嚟到,當然到影我啦,不過大肥豬話啲公仔唔太靚又冇乜聖誕FEEL,所以影幾張到此一遊咁啦~

哈哈...今日隨意又影左一個聖誕佈置,我都PLAN好左之後幾個地方,希望好快就可以去海港城影天使、德福影BEAR BEAR、朗豪坊影貓貓,仲有時代廣場嘅幾米。

如果大家發現仲有其他靚嘅聖誕佈置,記得話我知,等我地都去影多啲,感受聖誕氣氛呀!


*♡♡小肥豬♡♡* | 1st Dec 2009 | 生活點滴 | (22 Reads)

30 NOVEMBER 2009 (MON)

今日經過商場,見到樣得意嘢,所以就又忍唔住要即刻買左佢~

依個其實係一對保溫襪仔,當然唔係用嚟著出街,係留係屋企著,等腳仔可以保暖呀~

哈哈...其實係上排天氣等番十度嘅時候,我見到嘅時候都已然好想買,不過可能個個都去買保暖物品,所以嗰時就冇啱我嘅SIZE。估唔到今日返左貨,仲比上次見到平啲。

今日洗白白之後就即刻著住通屋走,又真係幾舒服,對腳仲覺得到好暖添,真係啱晒我依啲怕凍嘅人。