香港新浪網 MySinaBlog
*♡♡小肥豬♡♡* | 31st Oct 2009 | 好友與我 | (20 Reads)

30 OCTOBER 2009 (FRI)

今晚大肥豬要OT原本要一個人寂寞咁過,不過當LUNCH同糖糖講開我嘅慘況時,糖糖又知道時代廣場好似有啲得意嘢影,就係咁我地就好快咁約好放工之後出銅鑼灣玩啦!

時代廣場空地對出原來分左兩部分,首先我地係古怪傢俱影吓先,不過真係勁多人,又有啲人坐晒係度,所以都只可以影幾張呀~

之後我地就入去左面間小屋仔,原來嗰度先係好玩所在,雖然屋仔細細,但入面有好多唔同款式嘅頭飾俾我地玩,我地兩個不停玩..不停影~

玩到熱又玩到攰,我地就去醫肚。當我地食飽飽之後路經東角中心一帶,竟然俾我地見到有幾隻鬼鬼派糖仲同人影相,我地當然唔執輸,玩埋一份啦~

今晚真係多嘢玩,玩得仲好開心添,真係多謝糖糖陪我,等我唔洗寂寞有得玩啦...哈哈!


*♡♡小肥豬♡♡* | 29th Oct 2009 | 靚太廚房 | (52 Reads)

29 OCTOBER 2009 (THU)

我耐都冇出是日晚餐,因為煮嘅餸都係大同小異,所以唔POST出嚟,廢事獻醜嘛。今日有新嘗試,所以就同大家分享吓啦!

睇吓今日依個是日晚餐~

首先就係青瓜炒肉片,依個煮左好多次,冇問題啦~

登...登...登...登....依個先係今日主角,煎紅衫魚~

係唔係煎得都幾靚呢?哈哈.....其實我都係第一次煎魚,係買左條魚時我都15/16蒸定煎好,但我又想試吓,所以最後都係決定煎左。

一向好怕彈油嘅我,等埋大肥豬放工返嚟先開始煎魚,有佢係度陪我煎,好似冇咁驚咁嘛。哈哈~

係煮嘅時候都打定輸數會煎到甩皮甩骨冇條魚形,不過煮煮吓又好似得得地,最後竟然可以煎到咁靚,食落都熟仲好好味添,嗰吓真係勁有滿足兼自豪感呀!


*♡♡小肥豬♡♡* | 29th Oct 2009 | 我的玩具 | (152 Reads)

29 OCTOBER 2009 (THU)

我又嚟買左新玩具,真係開始覺得自己越嚟越敗家,成日都買買埋埋咁多玩具。

今期新寵就係萬勝節版SONY貓啦!(雖然知道佢係叫做TORO,不過都係鐘意見佢做SONY貓多啲..哈哈)~

原本都冇打算買依款公仔,不過係上星期旺角見到一對買$199時,覺得好似好抵,就有啲衝動買嚟影相玩吓,但考慮過後都係冇買到,因為依排都真係買左幾多玩具,屋企冇位放。

尋日同同事史迪哥哥傾開玩具經時,知道佢買左,仲係以$80友情價就買到。我見咁抵....當然叫佢幫我買番啦。

史迪哥哥仲好快手,尋日放工就幫我買左,等我今日就有得玩添。(真係麻煩晒呀~)

隻SONY貓真係好得意,同佢影住幾張相先啦~

依家攪到心思思想買埋黑色嗰隻添,不過算啦..有機會先啦,因為依排咁多玩具,佢地要排隊俾我影呀!哈哈~


*♡♡小肥豬♡♡* | 26th Oct 2009 | 好友與我 | (18 Reads)

25 OCTOBER 2009 (SUN)

有左張海洋公園全年入場証之後,當然成日都心思思想入去,剛好早排小肥肥相約我同糖糖去玩,所以今日就三人行去玩番日啦~

可能係假期加上星期日關係,成個海洋公園都勁多人,不過我都又唔係玩機動遊戲,所以對我地嚟講影響都唔大。

上次入嚟都係夜晚同上掛住搵鬼影相,所以好多萬勝節佈置都冇影到,今次終於影到啦~

除左影萬勝節,唔少得入啲精品店攪攪震啦~

係我地探緊樂樂瑩瑩時,見到佢地有個位置安排左吉祥公仔同遊人影相,我地當然唔放過,仲同左三隻公仔影添~

玩到差唔多六點,夜場嘅鬼鬼開始出沒,不過可能因為日場嘅人未走,所以都只係幾隻出沒~

今日雖然都唔係玩得好激動,不過行得好多路,所以都好攰,成個人都散晒咁呀!


*♡♡小肥豬♡♡* | 24th Oct 2009 | 我的D女 | (30 Reads)

24 OCTOBER 2009 (SAT)

萬勝節就到,當然都要幫DOLLCENA嚟番個萬勝節LOOK啦!

今次係個南瓜LOOK係由糖糖DIY整俾我,咁細SIZE係好難整,真係好勁..好叻呀。我就冇依個細心,曾經買過材料番嚟,整唔夠一半就放棄左。

有新衫仔,當然要即刻帶D女去影相。先係屋企樓下影吓先~

之後我同大肥豬出旺角行街街,過經新世紀廣場,見有少少佈置,所以又同D女影吓啦~


*♡♡小肥豬♡♡* | 23rd Oct 2009 | 生活點滴 | (25 Reads)

23 OCTOBER 2009 (FRI)

早排見到YAHOO又有新遊戲,就有機會得到詹SIR嘅《靚模襲地球》新舞台劇入場券兩張。見有得玩,所以又係時候發揮師奶仔本領,參加左睇吓有冇機會。

尋日係E-MAIL就收到封領獎通知書,原來我中左獎,所以今日放工就急急腳上去YAHOO辨事處領取門票~

我都未試過睇舞台劇,所以都幾期待,唔知係點呢?睇左個場地座位表,我地個座都算高高地,不過有得睇都算好,入去感受吓氣氛都幾好呀。

真係要係度再一次多謝YAHOO!


*♡♡小肥豬♡♡* | 21st Oct 2009 | 甜蜜生活 | (23 Reads)

21 OCTOBER 2009 (WED)

今日大肥豬要OT,所以又要進行一個人的晚餐。雖然一個人悶左一晚,不過大肥豬放工番嚟就俾左個驚喜我,就係買左一盒小蛋糕俾我~

係聖安娜新出嚟萬勝節蛋糕,其實我想試好耐,不過次次去到都買晒,今次終於都試到啦~

個蛋糕都幾好食,尤其係朱古力嗰款,勁正。

原來依SET蛋糕係大肥豬尋日去訂,打算等今日OT番嚟同我一齊當宵夜食,真係好開心,覺得自己好幸福呀!


*♡♡小肥豬♡♡* | 20th Oct 2009 | 生活點滴 | (14 Reads)

20 OCTOBER 2009 (TUE)

買開嗰張六合彩到期,雖然依幾個號碼都買左好幾年,都好似只係中過幾次(我指係中$20嗰啲),不過買開唔買又好似唔係幾好,所以今日返屋企路經投注站,就入去買番張。

除左買番張十期六合彩之外,我地仲貪得買左三張紀念馬票添~

哈哈...真係OUT,我都係今日先知有馬票買,仲要買左都唔知點為知中獎,最後就捉住位職員問,先知係點玩呀!

唉...抽獎永遠都與我無緣,所以期望都唔太大,買嚟都係作為一個紀念啦!


*♡♡小肥豬♡♡* | 19th Oct 2009 | 生活點滴 | (25 Reads)

19 OCTOBER 2009 (MON)

又儲齊7-11印花,所以又有得去換BB公仔。今次終於都換到檸檬茶BB啦~

原本我所抽到嘅唔係依款,當我係7-11拎左個盒之後,當然即刻拆開嚟睇,點知......係一個啤酒BB,我都已經有一個,所以都有少少失望。

就係依個時候,有一個女中學生行過嚟,問我可唔可以同佢交換。一見佢手上嘅檸檬茶....當然唔洗考慮,即刻同佢換。

哈哈...檸檬茶BB到手,我可以收手唔儲印花啦!


*♡♡小肥豬♡♡* | 18th Oct 2009 | 甜蜜生活 | (30 Reads)

18 OCTOBER 2009 (SUN)

今日打算留係屋企休息,突如其來大肥豬就提議去影相,由於時間有限,所以近近地再去三家村影..影...影啦!

原本我係想影沙灘相,不過當我地去到第個石灘時,見到個環境都幾好,所以今日嘅拍攝目的就係石灘~

係石灘旁有間舊鐵皮屋,上次嚟嘅時候都已經想影,不過搵唔到,估唔到今次吾打吾撞下影到~

其實三家村都真係一個攝影好地方,雖然已經係第三次嚟影,不過都好似仲有幾個景點可以影。

加上對我地嚟講又好方便,來回都有專線小巴,所以我地有機會再去影過,下次就要去入面個小沙灘影呀!


*♡♡小肥豬♡♡* | 16th Oct 2009 | 生活點滴 | (15 Reads)

15 OCTOBER 2009 (THU)

當知道7-11有BB公仔換時,見佢地咁可愛,都有一刻衝動去換晒佢。但.....屋企已經開始勁多玩具,換換埋埋咁多都冇位置安放佢地,所以就打消左依個念頭。

見其中一個BB係以檸檬茶裝扮,我又係一個檸檬茶怪魔,所以就....哈哈哈,下定決心要換佢番嚟。

終於到換PART II 嘅BB,經各位朋友仔嘅捐贈,加上LULU幫我搜羅到十幾個印花,今日就去換BB啦~

噢.....今次係換唔到檸檬茶BB添,不過依兩個BB都係幾得意。

我要繼續努力存印花,等我可以快啲帶檸檬茶BB回家先得。


*♡♡小肥豬♡♡* | 13th Oct 2009 | 生活點滴 | (15 Reads)

12 OCTOBER 2009 (MON)

SAMMI終於都再次開演唱會,作為超級粉絲嘅我,當然極度留意信用咭優先訂飛日期。終於等到今日,可以用東亞信用咭做優先訂飛~

個鐘踏正九點,即刻就開始打,但打左幾次都係打唔通。始終用公司電話打都唔係太方便,所以打左幾次之後,我就開始改用手提不停打,邊做嘢邊打,打到LUNCH時間都仍然係未打通。不幸嘅係......我手機都已經俾我打冇晒電,都仲未打到去訂飛(已經係前一晚叉足電...唉),嗰時都真係勁DOWN,因為好驚買唔到飛嘛。

就係依個時候,得到糖糖嘅仗義相助,借左部手機俾我,又可以繼續努力。經過足足五個半鐘嘅努力,終於係下午兩點半打通,訂到飛啦...嗰刻心情真係難以形容咁開心呀!

好嘢...今個平安夜有SAMMI陪我過啦!


*♡♡小肥豬♡♡* | 12th Oct 2009 | 甜蜜生活 | (23 Reads)

11 OCTOBER 2009 (SUN)

原本今日都打算去遠少少地方影相,不過因為尋晚睇完HOCC演唱會之後興奮過度,攪到今日好晏先起身,所以都唔夠時間,唯有改過另一個節目。

突然間好想去睇吓有冇啲玩具仔啱DOLLCENA同四葉妹妹玩,所以大肥豬就提議去深水埗玩具街行吓,由於屋企附近就有小巴出去,所以都好方便。

因為小巴落車站附近就係李鄭屋古墓,見我地都未去參觀過,所以就入去行個圈。不過....真係行個圈,因為古墓太細啦,所以都係到此一遊咁啦~

離開之後,見到古墓旁有個公園仔,見個環境都幾好,又人少少,所以就入去影吓相啦!

原本都只係幫DOLLCENA影吓相,不過大肥豬就話唔好浪費個環境幫我影埋。見佢咁有心,就係一個完全冇準備之下(即冇扮靚靚)影少少啦~


影完相之後,我地就去玩具街睇公仔啦!不過,睇唔啱心水,好多鋪頭都係買萬聖節用品,所以都係空手而回。

行到攰...我地就係附近好出名嘅餐廳TEA吓,想試好耐,次次見大排長龍,難得今次只係幾個人排,就有機會試啦~

叫左兩樣出名嘢....豬潤公仔麵同咖央西多士,我地都覺得唔係想像中咁好食,同普通嘅公仔麵都好似冇乜分別~


*♡♡小肥豬♡♡* | 11th Oct 2009 | 我的D女 | (60 Reads)

11 OCTOBER 2009 (SUN)

好耐都冇同我嘅至愛DOLLCENA出街街影靚相,加上前排買左件靚靚新衫,所以今日就去影相!

今日我同大肥豬去左深水埗行街,知道附近有個公園仔,所以就同D女影...影....影啦~

今日係第一次用單反幫D女影,哈哈...影出嚟又好似幾靚咁哦。

等我下次去影D女時都用單反影先得,不過一定要大肥豬在場,因為我好怕拎單反機,好重嘛......呵呵呵~


*♡♡小肥豬♡♡* | 11th Oct 2009 | 生活點滴 | (13 Reads)

10 OCTOBER 2009 (SAT)

等左三年,終於都等到HOCC再係紅館開演唱會,作為粉絲嘅我,當然一定要去支持...支持吓。已經係用信用卡優先訂飛,不過都要坐尾二行,真係.......唉,不過十月十日係梅姐嘅生日,可以買到依日都算好好啦~

今次約左LULU妹一齊去睇,係未入場時,我地每人都買左支火柴棒入場玩呀~

山頂位嚟講都算好,坐個台正面,前面又冇嘢擋係,都唔錯哦~

等左一陣,開SHOW啦,全場爆滿呀~

因為冇帶單反去,所以影左一兩張之後就全程投入睇SHOW。成晚只可以用兩個字形容~~~勁正,成晚嘅氣氛都好好,邊睇邊興奮,嗌到我喉嚨都沙埋。

係ENCORE部份真係最...最...正,先同草蜢合唱梅姐經典快歌向梅姐致敬後,HOCC再唱新歌『妮歌』,依首歌係為梅姐已唱,聽完之後真係超感動,大家有機會都可以留意依首歌。

睇完SHOW仲有下文,就係買紀念品時間。嘩....勁多人排隊,我地足足排左四十五分鐘先買到,以下就係我嘅戰利品啦~


*♡♡小肥豬♡♡* | 9th Oct 2009 | 生活點滴, 博客分享 | (32 Reads)

8 OCTOBER 2009 (THU)

剛剛收到依個E-MAIL,一開嚟睇...真係超級開心呀~

其實早前參加完哈囉喂優先場之後,仲地仲有另一個活動,就係叫我地係BLOG上同大家分享感受,就有機會得到全年入場證。

開頭都預左唔會有我份,不過今日就收到E-MAIL話我中左,雖然仲未到手,不過開心程序真係唔識形容呀!

繼之前擁有到迪迪尼全年通行証之後,今日我又終於另一個樂園嘅全年通行証,又有得去玩啦!

雖然大肥豬冇免費入場證,但佢都話會買飛陪我入去玩兩次。

不過,我又點會只入幾次,因為開心事都唔止我一個,除左我之外,原來糖糖都抽中左,所以我唔擔心冇人陪我入去玩啦!

快啲..快啲...去玩去癲嚟OCEAN PARK.....哈哈哈~

再一次多謝YAHOO BLOG同海洋公園送我全年入場證!


*♡♡小肥豬♡♡* | 8th Oct 2009 | 生活點滴 | (40 Reads)

8 OCTOBER 2009 (THU)

一向我都好少睇日本雜誌,不過自從糖糖話俾我知依啲日本雜誌好多時都會送好靚袋之後,我就開始留意,仲成日都想買添。

但一直都睇唔啱心水(我指係附送的袋仔),就算睇啱嗰個都要成百幾蚊,好似又唔係好抵,所以一直都未買到。

剛好尋日係KEKKA BLOG見到,原來11月號嘅CanCam已經出左,仲送個大SIZE嘅HOUSE of  JILL  STUART袋袋,一向鐘意花花袋嘅我當然對佢一見鐘情,仲打算搵日出旺角買。

哈哈...今日LUNCH時又去報紙鋪八卦時,俾我見到依本雜誌買,仲比原價平左幾蚊,$65就有交易啦!

就係咁....我就即刻買左啦~

買雜誌都係為左......

實物睇都幾靚,又夠大,啱晒我心水呀~


*♡♡小肥豬♡♡* | 7th Oct 2009 | 我的玩具 | (73 Reads)

6 OCTOBER 2009 (TUE)

今日就係因為佢........所以連飯都唔煮,放工等埋大肥豬一齊去約定地點帶佢返屋企。

佢係邊個.....知唔係就係四葉妹妹啦,依個仲係已經絕版嘅夏日版嚟呀~

自從早前買左兩頭版四葉妹妹之後,玩到上左引,好想買埋四面夏日版,不過都冇的起心肝去搵。

但當我個兩頭版眼睛花左之後,就勁想買番嚟玩,搵左好耐都係搵唔到。曾經都係兆萬見過,不過炒到成四百蚊,嘩...炒到咁貴又點買呀?

係我已經心灰嘅時間,我係YAHOO BID見到有人放出嚟賣$199哦,當我考慮之際,大肥豬就叫我BID左佢,仲話送俾我添,就係咁.....終於擁有左啦!

等我搵日帶依個四葉妹妹出去影靚相先得。


*♡♡小肥豬♡♡* | 6th Oct 2009 | 甜蜜生活 | (35 Reads)

6 OCTOBER 2009 (TUE)

由於今日放工約左朋友拎少少嘢,為左唔洗草草咁煮個唔係太好味嘅晚餐,所以我地就順便出街街食埋先返屋企。(哈哈...有人懶惰唔煮飯嘅藉口)

大肥豬知道我至鐘意就係打邊爐,所以就帶我去酒樓打邊爐啦~

今個晚餐係任飲任食,開頭都怕兩個人唔可以食好多嘢,不過可能我地都有啲肚餓,所以叫左好多嘢食。整體上啲嘢食都OK新鮮,只係碟炸魚皮就差少少呀~

任飲方面,就差少少.....竟然冇汽水,只係得蔗水同啤酒呀~

今餐真係食得好滿足,只係覺得貴左少少,平均一個人都要百一蚊。不過大肥豬話最緊要開心嘛.....哈哈~


*♡♡小肥豬♡♡* | 5th Oct 2009 | 我的玩具 | (54 Reads)

5 OCTOBER 2009 (MON)

尋日係我地買左紅毛蟹嚟屋企時,大肥豬就突然提意話不如將四葉妹妹都放埋入魚缸做一個裝飾。我聽到第一個反應就係:嘩......好哦...可以嚟過海底歷險記呀!

今日食完飯之後,我地就無無聊聊咁真係將四葉妹妹放左落魚缸當一個裝飾啦!

哈哈哈....點解我會捨得....因為上次清潔時,大肥豬唔小心咁導致四葉妹妹對眼花左,花嘅程度係影完相之後都好覺有眼睛有問題。為使我唔會唔開心,所以大肥豬就買過隻新嘅俾我玩。

咁多出嘅四葉妹妹唔要又好似好可惜,所以大肥豬就建議放入魚缸當裝飾,一嚟可以唔浪費,二嚟又可以等魚缸可愛啲,可以令我多啲望缸魚哦....呵呵呵~~

                       

四葉妹妹海底歷險記開始~

魚仔你地唔好行埋嚟呀..我有槍焦~焦~焦~

喲....唔對路...有啲咩行緊過嚟呀~

來者可物????唔好抓住我,我有武器呀~

仲乜由背後攻擊....HELP....唔好夾住我呀~

踼你都唔走呀~

哦...完全戰敗.....紅毛蟹大勝啦~


Next