香港新浪網 MySinaBlog
*♡♡小肥豬♡♡* | 30th May 2009 | 甜蜜生活 | (41 Reads)

30 MAY 2009 (SAT)

今日真係一個難得嘅日子,就係終於都有個星期六係我放假,但大肥豬就要返工啦!哈哈...咁我就可以等大肥豬返左工之後霸晒張床訓覺覺豬啦!

話雖如此,不過我都唔係訓得好晏。因為大肥豬都係返半日工,所以我就做左個乖乖老婆仔,去接大肥豬放工啦!

之後大肥豬帶左我去九龍城一間居酒屋食左一餐豐富既午餐。食飽飽當然就要搵節目啦,所以大肥豬就提意帶我去近近地嘅九龍城寨公園影相。

雖然之前都去過城寨公園,不過我依個影相怪又點會放過機會呢,所以就去影靚相啦~

原本以為冇腳架就冇得影合照,不過好在嗰度間唔中在啲高高地嘅石柱,所以又可以影合照啦~

是日最愛就係依張相,係大肥豬偷影我呀,不過又影得我幾可愛哦...呵呵~

成日都覺得自己戴眼鏡個LOOK唔好睇,所以平時去影相我都一定唔會戴眼鏡。不過今次係突然去影相,所以都冇乜點扮靚同第一次戴眼鏡去影人像。

好在影出嚟都幾靚,可能係新眼鏡關係,影得我好似斯文啲,大肥豬仲叫我多啲戴眼鏡去影相添。不過....意見接受,態度照舊,我都係鐘意唔戴眼鏡多啲。

哈哈....間唔中啦.....都要聽吓大肥豬話,戴吓新眼鏡影,如果唔係佢影得我唔靚就慘啦!


*♡♡小肥豬♡♡* | 29th May 2009 | 靚太廚房 | (53 Reads)

29 MAY 2009 (FRI)

今晚柴九大結局,當時邊度都唔去,留係屋企等睇電視啦!既然留係屋企,就係煮飯仔嘅時間,依個就係我地個是日晚餐~

今日又嚟整個腐乳炒雞!哈哈...因為係小豬爸同小豬媽幫我準備嘛。依隻仲係新鮮雞嚟,當然要即日煮左佢啦~

煮左咁多次,最好味就係今次呀,除左我技術好左之外(哈哈...又有自大狂..自己讚自己啦..),今次我用左小豬媽買俾我嘅廖孖記腐乳炒,所以真係香好多,好味好多呀~

所以話呢...今日真係慳好多,只係買左幾蚊菜就煮左一個好味晚餐,真係正啦!哈哈~~


*♡♡小肥豬♡♡* | 28th May 2009 | 我的D女 | (37 Reads)

28 MAY 2009 (THU)

還記得前幾日路過灣仔玩具街時,幫DOLLCENA買新衫仔,不過一直都未有心情同掛住睇碟,所以一直就放埋一邊未有時間玩。

見今日放假又係落雨天冇地方去,被迫留係屋企,所以就有好多時間幫D女換個新LOOK同佢影靚相啦~

哈哈....粉紅色嘅裙仔真係好可愛呢!今日影住幾張先,等我下次去街街才帶埋D女去影過靚靚相啦!

雖然係大件左少少,不過$5真係勁抵,等我下次有機會再去幫D女掃貨先得!


*♡♡小肥豬♡♡* | 26th May 2009 | 生活點滴 | (33 Reads)

25 MAY 2009 (MON)

係前排放假嘅時候,起身開電視就睇到無線播緊黃真伊依套韓劇,睇左一集後,又覺得幾好睇哦,演員著嘅衫同成個場景都靚。可能我鐘意中國舞關係,所以我覺得最好睇嘅係佢地跳舞嘅情節。不過由於個播放時段又係早上,所以都冇得睇啦!

睇完嗰一集之後,成日都想買番套依套劇嚟睇,好想知個結局係點,不過唔知係唔係版權問題,依家少地方有韓劇買,好多地方都改晒買台劇同大陸劇,所以都一直買唔到。

今日去我買開碟嗰間鋪頭問佢有冇,原來佢將啲韓劇收埋晒,要問佢先有得買呀!早知就早啲問佢,咁我就可以早啲有得睇啦!

剛好今晚大肥豬又要OT,所以我就可以霸住個電視嚟睇碟~

今日睇左兩集,都係仲講緊主角個少年時期,女主角仲未出場,不過都幾好睇,就連返嚟睇左少少嘅大肥豬都話幾有劇情,讚好睇添。

之前佢講過叫我唔好搵佢一齊睇依啲女士戲,不過相信嚟緊日子佢都係會陪我一齊睇啦....哈哈~

雖然依家先嚟睇依套劇好似OUT左少少,不過好睇嘅劇集又點可以錯過呢?相信依幾晚我都一定會好忙,因為睇完柴九之後就要睇真伊啦!呵呵呵~~~


*♡♡小肥豬♡♡* | 24th May 2009 | 甜蜜生活 | (33 Reads)

24 MAY 2009 (SUN)

今日成日都係落好大雨,攪到冇得去街街,真係有啲掃興添。

大肥豬話驚我成日都留係屋企,怕我會悶到傻左,所以我地食完LUNCH之後,就去屋企附近嘅商場睇吓嘢,順便去街市買餸煮飯仔。

唔知係唔係落雨關係,個商場好少鋪頭開左,就算有都係剛剛開門,唔好意思入去睇嘢,所以好快咁行左一個圈就走人,再去超市入貨。

係我地行完超市時,過路見到眼鏡88,大肥豬就入去請啲職員幫佢教一教個眼鏡。

依個時候,我見到鋪入面有自助COUNTER,咁我就行去八卦吓,貪玩咁揀幾個嚟試吓啦!

當我戴起依副眼鏡時,大肥豬就話:幾好睇呀...你副都戴左好耐,依家又有特價,咁咪配左佢,當配多副後備都好呀!

就係咁,我就係完全冇心理準備下,配左依副靚靚膠框眼鏡啦~

等多四日就有新眼鏡戴,不過最開心嘅都係...依副眼鏡係大肥豬送俾我呀!呵呵呵~~~


*♡♡小肥豬♡♡* | 23rd May 2009 | 靚太廚房 | (116 Reads)

23 MAY 2009 (SAT)

前幾日同大肥豬行過糕點鋪嘅時候,問我識唔識整砵仔糕。我之前都冇整過,所以就唔理佢繼續行啦!

哈哈....大肥豬都好少主動叫我整小食俾佢食,我次次整糯米滋、蛋糕仔,佢都係一粒起兩粒止。唔係我整得唔好食,只係佢唔太『好』依幾樣嘢食。

難得佢想食,我當然要試吓整俾大肥豬食啦,終於今日就整左我第一次嘅砵仔糕啦~

始終都係失敗左,食落個味係唔錯,大肥豬仲話有啲似街買嗰啲,但個質感唔知點解粉粉地,一啲都唔實。

我都已經照住個食譜嚟整,都唔知係乜問題,唉....望住依幾個失敗嘅砵仔糕,都攪到唔係幾開心呀!

不過...我唔會放棄,既然買晒材料,我一定會再試,希望下次成功啦!


*♡♡小肥豬♡♡* | 22nd May 2009 | 我的D女 | (28 Reads)

22 MAY 2009 (FRI)

今日實行左半天工作,因為校長安排左我參加一個工作坊,所以LUNCH之後就要向灣仔出發去上堂啦!

原來個上堂地方係好近玩具街,所以完成左個工作坊之後,當然唔會浪費依個行街好機會啦!

之前去玩具街嘅目的都係主要搵DOLLCENA,雖然我個D女王國都已經齊齊整整,但唔知係唔係習慣左,我第一時間都係睇下有冇D女。不過依家嘅玩具街真係冇乜D女啦,只係得番唐老鴨款,其他都冇晒啦!

問頭行街係打算買部遙控跑車俾大肥豬,不過就睇唔啱款所以冇買到,但我竟然就有收獲,就係兩件啱D女著嘅衫仔啦~

原本都想搵多幾件俾有玩DOLLCENA嘅朋友仔,不過行晒成條街都係得兩條,都唔知點解得咁少貨,所以唯有下次再見到先啦!

可能今日上堂用晒啲心力同精力,所以今日冇幫D女們試衫,等我有心情先再幫佢地著身衫影靚相俾大家睇啦!


*♡♡小肥豬♡♡* | 21st May 2009 | 生活點滴 | (37 Reads)

21 MAY 2009 (THU)

今日係農曆四月廿七日,正是小豬媽嘅舊曆生日。

一向我地都係新曆生日先約埋一班小豬媽朋友去酒樓食飯慶祝,好少慶祝舊曆生日。

不過係前幾日同小豬媽TEA嘅時候,佢就講過吓係今日舊曆生日。就係咁,我就決定今晚返屋企同小豬媽食個開心舊曆生日飯啦!

今日除左我地一家之外,仲有姑姐一齊食飯,真係好熱鬧啦!我地個晚餐都好豐富,小豬媽仲煲左個我至愛嘅青紅蘿白豬骨湯添~

係咁多樣餸入面,其中依個芝士什菇西蘭花係我煮呀,大家都讚好味,真係勁開心呀~

生日哦....又點少得生日蛋糕呢!依個生日蛋糕係我地俾小豬媽嘅少少驚喜,因為之前完全冇講過話會買蛋糕同佢慶祝呀~

今日就食住蛋糕先,等新曆生日先送份大禮物俾小豬媽啦!哈哈~


*♡♡小肥豬♡♡* | 19th May 2009 | 靚太廚房 | (65 Reads)

19 MAY 2009 (TUE)

今晚真係乖啦...因為又嚟煮飯仔,不過今餐依樣餸都係第一次煮呀!

依個就係我地嘅今日晚餐~

哈哈....我地今日個主菜就係炒飯啦!

其實大肥豬係好鐘意食炒飯,成日都叫我整,但我都未試過炒,所以一直都唔敢試。見大肥豬講左咁多次,好啦...就試吓整啦!

不過見係第一次整,所以唔敢買啲貴材料,用普通嘅腸仔、火腿、什豆試吓先,諗住就算失敗左都冇咁慘嘛....哈哈!

係我開始炒飯嘅時候,大肥豬突然走入廚房,話要炒埋一份,之後就直頭搶左我個鑊鏟不停炒,所以話...依碟炒飯係大肥豬出品,不過冇我教路佢又點識炒呢~

我地第一次炒飯又真係唔錯,係啲飯好似唔太乾身,不過第一次嚟講都唔錯,都算成功啦!既然成功,下次等我買啲海鮮返嚟整個海鮮炒飯先得。


*♡♡小肥豬♡♡* | 18th May 2009 | 靚太廚房 | (52 Reads)

18 MAY 2009 (MON)

今晚又嚟煮飯仔,睇吓我地嘅是日晚餐~

今次煮依個日式咖哩豬頸肉,經小豬媽教路,用南瓜代替薯仔,又真係唔錯,可能係我鐘意食南瓜多啲啦。

仲有今次個汁比上幾次整得好,唔再係杰杰咁,所以大肥豬都讚呀,哈哈~

雖然都只係簡簡單單煮左兩樣餸,不過都已經食得好飽飽...好滿足啦!


*♡♡小肥豬♡♡* | 18th May 2009 | 我的D女 | (40 Reads)

17 MAY 2009 (SUN)

雖然我係赤柱就冇影過相,不過今次去街街都有帶埋我嘅D女一齊去影靚相。

今次嘅主角就係我至愛嘅MARIE呀~

我都好耐冇帶D女出街影相,今次竟然唔記得帶企架,所以同D女影嘅相POSE唔多呀,下次一定要記得帶先得!

題外話:
係赤柱行街街嘅時候,我地見到一隻勁可愛又勁乖嘅狗仔~


佢可愛嘅程度就連我驚狗仔嘅都敢行埋去同佢玩,小豬媽仲同佢握手仔添,真係勁攪笑呀~


*♡♡小肥豬♡♡* | 17th May 2009 | 生活點滴 | (26 Reads)

17 MAY 2009 (SUN)

今日一早就俾小豬媽嘅電話嘈醒左,原來係小豬爸想約我地今晚入去石澳食泰國菜。

哈哈...有得食我當然唔執輸,所以同大肥豬下午食完LUNCH之後就返小豬媽屋企等出發啦!

見時間尚早,所以小豬爸就先車我地入赤柱行左一陣。由於之前都係赤柱影過相,所以今次主要都係陪小豬媽佢地行吓。

時間差唔多啦,我地就向石澳出發食晚餐啦!

今次我地就係去左依間食泰國菜~

係等食嘅時候,當然影吓相啦~

玩完一輪....開餐啦~

真係樣樣都好好味,尤其個咖哩蝦同芒果糯米飯,真係好味都唔識形容呀!

今日食左一個既開心又美味嘅晚餐,真係好滿足呀!


*♡♡小肥豬♡♡* | 16th May 2009 | 甜蜜生活 | (32 Reads)

16 MAY 2009 (SAT)

今日原本我有個好好嘅節目,因為大肥豬有事所以我去唔到,都有少少唔開心呀!

當陪完大肥豬做嘢之後,大肥豬就話見我著得靚靚,所以就提議同我去近近地嘅地方影相補數。

嘩~~~去影相哦,我當然冇問題啦,就係咁...大肥豬就帶左我去鑽石山嘅南蓮園池啦!

其實依個地方之前都曾經去過,不過當時都只係行左一陣同埋未有單反機,所以影相唔多,今次終於可以慢慢影啦~


係見到個小瀑布嘅時間,大肥豬都唔知幾開心,因為又可以影依啲動感水流相哦~

係南蓮園池影完相,我地過左去志蓮淨苑行吓。不過覺得係佛門聖地,影相好似唔係咁好,所以只係門口影幾張當到此一遊啦~


*♡♡小肥豬♡♡* | 14th May 2009 | 生活點滴 | (26 Reads)

14 MAY 2009 (THU)

今日我著左一條靚靚白色花點連身裙,係同小豬媽TEA嘅時候,都大讚我條裙仔靚啦!

由於今晚返左小豬媽屋企食飯,所以我地就一齊買完餸返屋企。

當返到屋企時,係我地坐係梳化休息嘅時候,小豬媽同小豬爸講我條靚裙時,小豬爸就講左一句:唔好諗,條裙唔啱你啦!

就係為左依一句,小豬媽就拎左一條佢新買嘅衫仔俾我著住先,之後就叫我換左條裙仔出嚟俾佢試。

係依個時候,我同小豬媽都分別換左衫,大家分別著左上身都覺得幾好睇哦,所以小豬媽就提意同我交換衫仔啦!

難得小豬媽鐘意,我當然冇所謂啦!我仲好添,因為用條著過二次嘅衫仔就換左件全新衫仔,有著數呀!

依件就係小豬媽換俾我嘅衫衫,係唔係好靚呢!哈哈...


*♡♡小肥豬♡♡* | 12th May 2009 | 靚太廚房 | (61 Reads)

12 MAY 2009 (TUE)

今日天氣真係好熱,攪到都冇乜胃口,係依個時候諗煮乜都幾頭痛。諗左成個下午,終於都決定簡簡單單煮瓜粒湯飯,夏天好食湯飯真係一個唔錯選擇嚟呀!

雖然煮湯飯好簡單,不過要將啲材料切成細細粒,都有少少麻煩(可能係我懶惰啦...嘻嘻)。

開飯啦~

一個簡單瓜粒湯飯又何來富貴呢?

其實就係今日約左小豬媽一齊去買餸時,小豬媽知道我煮湯飯,係路過海鮮檔時,就叫我買份又平又靚嘅鮮鮑魚.......仔,等個湯飯甜啲~

加左鮑魚仔,仲唔係富貴瓜粒湯飯...哈哈~


*♡♡小肥豬♡♡* | 11th May 2009 | 生活點滴 | (12 Reads)

11 MAY 2009 (MON)

今日放工約左小豬媽TEA一TEA,就係見面嘅時候,小豬媽分別幫兩個人送禮物俾我,真係勁開心呀!

首先就係嘉汶表妹去韓國買俾我嘅手信啦!原本只係托嘉汶表妹幫我買MASCARA,但係禮物中多左兩支靚靚指甲油同耳環添~

哈哈....嘉汶表妹真係知我心意,買晒我鐘意嘅粉紅呀!等我由今日開始留指甲,咁下次去影相就整個粉紅靚甲先得。

另一份就係契嫂俾我嘅相機背囊(其實應該係俾大肥豬,因為通常都係佢拎相機嘛)~

哈哈...有咁多啱心水嘅禮物收,今日真係開心啦!

係度都要再講多次........多謝晒!


*♡♡小肥豬♡♡* | 10th May 2009 | 靚太廚房 | (48 Reads)

10 MAY 2009 (SUN)

原本係約埋幾位大伯同奶奶食飯慶祝母親節,不過佢地都突然唔得閒,所以最後得番我地同奶奶三個人食晚飯。

今晚出街食飯都係又貴又有排等位,既然係得我地三個,所以大肥豬就建議留係屋企煮飯俾奶奶食。

我當然冇所謂,所以食完LUNCH之後就同大肥豬拍拖去街市買餸啦!

經我係廚房閉關一陣,我地個晚餐就完成啦~

蕃茄薯仔排骨湯~

西芹炒肉片~

梅菜蒸魚腩~

蒸水蛋~

可能都唔係第一次煮飯俾奶奶食,所以都唔再緊張,只係擔心啲餸唔啱奶奶食。

好在大家都滿意我今日依餐,奶奶仲讚我個蒸水蛋蒸得夠滑添,真係聽到個心都飄飄吓呀!哈哈~~

同場加映:
係我地送奶奶走嘅時候,見到有新款史迪仔扭蛋,大肥豬竟然俾我去扭,仲幫我扭到個最鐘意個款添...哈哈~


*♡♡小肥豬♡♡* | 9th May 2009 | 生活點滴 | (19 Reads)

09 MAY 2009 (SAT)

原本計劃左今晚我地同奶奶三個人出觀塘嘅鋪頭食齋,不過唔知點解放工見到大肥豬之後計劃有變,冇端端大伯同姑奶佢地都一齊JOIN埋,攪到原本由三個人變左九個人一齊食飯。

咁多人食飯,冇理由要大家陪我食齋,所以最後就入左將軍澳一間酒樓食飯啦!

食完飯見時間尚早,所以就係新都城行吓街。行行吓,竟然俾我見到有太平清醮嘅平安包電話繩,見唔算貴,所以就買左一對俾我同大肥豬。最衰買唔到白色,不過唔洗入長洲都買到,已經開心啦~

一直都平安冇事,不過當我地係二期個大堂嘅美食攤位買完包花生糖之後,竟然唔見晒其他人,行左個圈都唔見,所以就打俾姑奶問。原來佢地過左三期睇傢俬,所以我地咪慢慢行過去JOIN佢地。

點知,當我地見到佢地嘅時候,發現唔見左奶奶,問大伯同姑奶都唔知佢去左邊,奶奶又冇帶電話,又唔知佢係乜事唔見左,之前奶奶又講過佢對腳唔係太舒服,所以都真係驚驚地。

因為大伯佢地買緊梳化,所以我就同大肥豬就四周圍行,周圍搵啦!

我地由三期搵到二期,再由二期去番三期,可以話係成個新都城行左好幾十個圈,但都係搵唔到,最後我地搵埋商場職員開咪搵(我都係第一次開咪搵人,諗番都有少少唔好意思呀),都搵唔到,你都唔好話唔驚。

隨住大伯買完梳化,我地又搵左成個鐘,都係冇結果,佢地估奶奶可能自己返左屋企,所以我地就離開將軍澳啦!

係搭地鐵返屋企途中,我同大肥豬都仲係擔心,所以我地就決定番奶奶屋企等。

好在,係奶奶屋企樓下就見到佢同緊朋友傾計。一見到佢就即為放心晒,之後陪佢係屋企坐陣,先返屋企。

唉...經過今次個經驗,下次再有咁多人去街嘅時候,都係寸步不離咁跟實奶奶,希望唔好再發生依啲驚人事件啦!

PS:係我搵奶奶途中,隱約聽到好似有人叫小肥豬,所以我估可能係有BLOG友仔見到我。不過當時我係擔心中,所以冇理會,希望嗰位BLOG友仔唔好介意啦同埋唔好俾我個傻樣嚇親啦!


*♡♡小肥豬♡♡* | 8th May 2009 | 生活點滴 | (29 Reads)

08 MAY 2009 (FRI)

由於今日放工要出旺角整啲野,當然又借機約埋大肥豬去行街食飯啦!

雖然今日個心情都仍未平覆番晒,不過有得SHOPPING就點都會有心機。哈哈~~

當我行過間首飾店時,竟然俾我見到條恨左好耐嘅手鐲,就係一條有噹噹嘅手鐲,見到隻鐲...真係考慮唔夠幾分鐘就買左~

其實我係一個噹噹狂徒,任何噹噹嘅飾物都勁鐘意,曾經試過買過一條手鏈係成串噹噹咁,嗰時仲成日俾大肥豬笑我扮細路仔添。

之前都買買埋埋好多噹噹手鏈、腳鏈咁,但好多都已經斷左,所以好耐都冇戴過噹噹首飾。加上近依幾年我都好少見到噹噹首飾,就算有....都真俾小朋友戴,俾大人嘅真係好少啦!

所以一見到又點會唔心動,好在有拆扣,如果唔係又大破產。不過見到心頭愛,貴少少都值得.....呵呵~


*♡♡小肥豬♡♡* | 7th May 2009 | 好友與我 | (21 Reads)

07 MAY 2009 (THU)

今晚又約左小M同小賢嚟個靚太飯局聚一聚啦!

我地今次又去左APM食和民。其實都係貪嗰度可以慢慢坐、慢慢傾,仲有就係知道DBS信用卡又有優惠嘛!

上嗰幾次嘅聚會小賢都JOIN唔到我地,所以我地都好耐都冇見佢,所以係時候約佢出嚟俾我地見吓啦!哈哈~

我地成晚邊食邊傾,唔知點解總係有多傾唔完嘅話題,乜都傾得一餐,由七點幾開始傾.......傾都成十點幾先散,真係開心呀!

原本我今日係放工時都發生左大插曲,攪到心情真係唔係幾好,DOWN DOWN地,不過一見到佢地就開始心情好好多,食左一個好開心嘅飯局之後,都將所有唔開心野唔忘記左啦!


Next