香港新浪網 MySinaBlog
*♡♡小肥豬♡♡* | 27th Apr 2009 | 甜蜜生活 | (32 Reads)

今日放工打俾大肥豬,佢就古古怪怪咁話有份神秘禮物俾我,話係用嚟影靚相用。

心諗係乜呢?唔通係靚鏡頭?不過又冇可能,因為佢都話過有支定焦靚鏡之後,短時間內都唔再買鏡,所以係返奶奶屋企途中,不停係度諗究竟係乜啦!

於時一見大肥豬,就迫係拎份神秘禮物出嚟!原來就係.......

依本書係專講我地部SONY單反嘅應用技巧,大肥豬話等佢學識晒書入面嘅技巧,仲話之後去影相都要帶埋本天書,咁就真係可以影到靚相啦!嘻嘻.....真係唔知好嬲定好笑!

不過都好,起碼大肥豬會俾心機去學影相,咁我之後嘅相應該會靚啲啦,有得益嘅都算係我呀....哈哈!


*♡♡小肥豬♡♡* | 26th Apr 2009 | 靚太廚房 | (207 Reads)

糯米糍我自己都整過好多次,真係冇一次係成功,所以都攪到冇晒信心,唔敢再整。

不過前幾陣子見到糖糖又整糯米糍,見佢整得又靚又好味,所以又再心思思再想自己就去整。於是買整材料,就開工整啦!

依照糖糖個食譜,係廚房閉關左一陣時候,終於整好左自家制芒果糯米糍啦~

開頭我以為切大粒啲芒果,會易包啲。但原來包起上嚟真係唔容易,所以有啲個樣好醜樣,有啲又大又少咁。當然有啲都包得幾靚~

哈哈....雖然個賣相她似差左少少,但終於都算成功左,大肥豬仲讚話最好食係依一次呀!我自己都覺得唔錯,都幾好味呀!

今次仲整左一啲聽日拎俾小豬爸食,如果佢地都覺得好食,就真係真正嘅成功,咁我又會再有番心機去整其他唔同款嘅糯米糍啦!

芒果糯米糍

材料:

芒果汁       250 ml – 我用維他芒果汁
糯米粉       1 用番維他個紙盒,一盒滿
              3茶匙 – 睇下大家鐘意嘅甜度加減
芒果           1
椰絲           適量

做法:

1)將芒果汁、糖攪拌

2)將糯米粉加入至芒果汁內,攪至冇粒粒 (要小小咁落,唔好一次過,會好難攪呀!)

3)放入薄碟蒸大約15分鐘

4)待約二十分鐘稍涼後(微暖時最不痴手),戴上手套(手套一定要擦一層薄牛油,以防痴手)隔住取 一撮芒果糯米粉團,於手心壓平,加入芒果粒搓圓

5)再將糯米糍舖上椰絲即成


*♡♡小肥豬♡♡* | 25th Apr 2009 | 生活點滴 | (18 Reads)

大肥豬早排睇見到萬寧有得換OTO腳底按摩機,為免我地一個個咁買嘢換印花,所以上星期我就係YAHOO拍賣場BID左30個印花,打算換個按摩機啦~

當收到啲印花時,大肥豬又話15/16唔知買唔買好。所以我就叫佢KEEP住啲印花,等佢自己決定買唔買啦!

今日放工返到屋企,就見到部腳底按摩機,真係換左啦......哈哈~~

哈哈...大肥豬仲唔等我,自己玩先啦~

當然我都有份玩,仲覺得幾過癮,做完之後仲好舒服,對腳好似輕鬆晒啦。

哈哈...依家有部按摩機係屋企,咁去完行街街就可以返屋企做機舒服番啦!


*♡♡小肥豬♡♡* | 22nd Apr 2009 | 靚太廚房 | (43 Reads)

今晚又嚟煮飯仔啦,睇吓我地是日晚餐,係唔係好豐富呢~

首先就係菜芯炒肉片~~

依個比起之前煮好左好多,起碼個賣相靚啲嘛!但其實個味道都唔錯,大肥豬仲讚個菜芯好味呀。

之後就嚟個蟹柳蒸水蛋~

其實我想煮蒸水蛋好耐(我好鐘意食蒸水蛋),不過知道蒸水蛋係一樣好難整嘅餸,因為好容易會蒸老左,又會變蒸到好以蜂巢咁,所以考慮左好耐先決定今餐試煮啦!

雖然係煮之前我都睇左好多有關嘅食譜,但都好擔心會整衰!

蒸好啦.....一打開個鑊睇,見到碟水蛋個面好靚仔,冇變蜂巢,已經好開心,食落仲好味又香又滑,真係有啲似豆腐花咁,好食到唔停得口呀~

第一次整嘅蒸水蛋成功左啦,今日依餐飯真令我好開心,好有成功感呀!哈哈~


*♡♡小肥豬♡♡* | 21st Apr 2009 | 生活點滴 | (40 Reads)

之前買買埋埋都好幾盒我的美麗日記面膜,日日FULL都應該可以用個幾月...哈哈~~

原本都打算禁止自己再買,等用咁啲先再入貨,點知今日去萬寧買嘢時,見新出左一款草莓優格面膜,仲做緊特價$58添,所以又買左返屋企。

不過對我嚟講係免費,因為趁大肥豬俾錢時放埋係收錢處,所以就.......多謝大肥豬啦~

剛剛試用完,個感覺係.....冇朱古力咁香,但用完又FEEL到塊面唔乾,好乾淨咁,唔通依啲就係『零油光』嘅效果(佢係咁寫呀..哈哈)。

講起我的美麗日記面膜,記得之前有位BLOG友仔留言話我知,香港嚟講只係得萬寧同7-11獨家發售,直接係台灣既廠出品。其他地方買嘅都係水貨,好似係深圳制做。

雖然唔知係唔係真,不過為安全計(對內地產品都冇乜信心),都係去返萬寧買正貨,好似有信心啲。同埋萬寧間唔中都會做特價$58,比起其他嘅都係貴幾蚊!

對我嚟講都係安全至上好啲~


*♡♡小肥豬♡♡* | 20th Apr 2009 | 我的D女 | (30 Reads)

尋日去帝苑嘆TEA BUFFET,咁好嘅地方,又點少得我嘅DOLLCENA呢,所以今次就帶埋POOH女一齊去玩啦!

哈哈…今次幫POOH女影左唔係好多相,不過都幾靚呀~

是日至愛~~冥想中的POOH女 

除左我之外,CARCAR同小M都帶左D女同JUN兔一齊去影相~

依家好似同公仔影相變成我地聚會活動之一,咁都好呀,一齊幫公仔影相都係好開心呀!

不過因為環境所限,所以我地都唔係影得好多公仔CROSSOVER相,下次我地一定要再一齊影過呀!


*♡♡小肥豬♡♡* | 19th Apr 2009 | 好友與我 | (44 Reads)

繼上次迪迪尼HIGH TEA之後,我地今日又嚟食過,去帝苑酒店嘆TEA BUFFET啦!

TEA BUFFET我就好少食,不過聽BB YEE同CARCAR介紹都話好正,所以我都幾期待。

一入BUFFET餐廳,就已經俾佢地嘅CAKE吸引住,所以坐底一陣嘢都未食,就即刻出去影..影...影啦~

我地先食熱食,再食CAKE,真係冇介紹錯,啲嘢食真係錯。尤其係啲CAKE,好味得嚟又唔太甜,總之就係勁好味啦~

我地都邊食邊傾計,當然唔少得影影相啦~

隨住個TEA BUFFET個時間係兩個鐘,所以今次我地個約會係短短地,不過都已經係好開心。

食得開心之外,仲有禮物收添。就係CARCAR嘅泰國手信靚靚蝴蝶袋,我好鐘意呀,真係多謝晒~

哈哈~相信我地好快就會再嚟聚過,不過下次要時間長啲呀!


*♡♡小肥豬♡♡* | 16th Apr 2009 | 靚太廚房 | (97 Reads)

依排我都好乖乖咁成日都煮飯仔,因為我識煮又煮得好食嘅唔多,所以次次煮都諗一陣先知煮乜好。

煮左幾日中餐,都係時候整啲新花款,所以今日就整左個意粉餐。哈哈...都幾豐富呀~

個肉醬意粉我好比心機整呀,我係用新鮮豬肉同蕃茄整呀,大肥豬都話好食。不過我自己就覺得個汁就整得少左啲啲,下次一定會再更加好味呀~

除左個意粉,當然唔少得整啲雞翼啦~

一向我都好怕煎嘢,好怕啲油彈上身,都幾痛呀!不過冇理由怕左而唔去做,所以最後都決定煎雞翼。

真係冇講錯,煎雞翼真係彈油彈到飛起,仲彈到落手度,真係勁痛,依家都紅左呀!

係我邊叫救命邊煎雞翼嘅時候,大肥豬就走左入廚房,搶左我個鑊鏟.....於是就由大肥豬煎埋下半場,所以話依碟煎雞翼係我地兩個嘅合力傑作,所以特別好食呀...哈哈!


*♡♡小肥豬♡♡* | 15th Apr 2009 | 靚太廚房 | (78 Reads)

今日放工如常約左小豬媽TEA一TEA先返屋企煮飯仔。不過係我地TEA完之後,見到有好多引誘,好多鞋鋪同衫鋪都做緊特價,我地當然唔執輸睇吓,就係咁睇晏左添。

同小豬媽分開後,我就急急腳咁返屋企煮飯仔啦!

好在一早就諗好晒煮乜,所以好快就買好晒餸,返到屋企又好快咁洗..洗..洗...同煮...煮...煮,最後用左四十分鐘整好左兩餸一湯嘅簡單晚餐啦~~

今日個晚餐主角就係依個腐乳炒雞,依半隻雞仲係小豬爸俾我,話等我有好野食呀~

哈哈....第二次煮依個,不過今次就重手左,落多左腐乳,所以攪到辣左啲,但都過得去。

除左仲有飯後果添,就係兩個小豬媽拜過神嘅大芒果~


*♡♡小肥豬♡♡* | 14th Apr 2009 | 甜蜜生活 | (61 Reads)

尋日係復活節假期最後一日,一早起身就見勁好陽光,為左唔好浪費咁好嘅天氣,所以就決定去影相。

由於時間關係,要搵個近近地嘅地方,最後就決定去荔枝角公園影番輯靚相啦!

係出發時都好地地,行到入公園都冇乜事,係個天開始冇咁好太陽,不過都唔理,不停係度影影影~

點知當我地行到去嶺南之風嗰個位置時,開始行雷同落雨,真係激氣,攪到要入去啲亭避雨。

不過咁都係,因為係個亭入面避雨時,冇嘢做就可以有多啲時間慢慢影相嘛~

仲有時間SET埋腳架慢慢就位影合照添~

雖然個天氣唔係太好,不過我真係幾鐘意依輯相,尤其係依兩張,真係唔可以唔讚下大肥豬,影好有FEEL之餘,仲影得我幾靚呀~(哈哈..又有人自己讚自己啦!)

雖然我地都未行得晒,影得晒成個公園,不過見雨細啲啲嘅時候就走啦!唯有等下次有機會就再影過啦~

點知...當我地行到去MTR時,竟然太陽又再一次出嚟,仲幾好天添....真係激氣。再一次証明.......超級黑仔王是我!


*♡♡小肥豬♡♡* | 13th Apr 2009 | 好友與我 | (34 Reads)

哈哈...係時候講番我地個澳門之旅啦!

由於我地係澳門一天遊,啲時間都趕趕地,所以我地一早就搭九點幾嘅船出發啦~

我都係第一次搭船去氹仔碼頭,所以第一個感覺係...點解咁似貨櫃碼頭,就連過關嗰度都勁有內地FEEL,都好似香港海關職員同服務好啲。

過關之後,就搭SHUTTLE BUS去威尼斯人渡假村出發~

威尼斯人真係好靚,我地行左一陣之後,誤打誤撞之下,竟然入左去賭場。我地就少少地玩左一百蚊,當然係...算啦,玩吓嘛!

之後我地就周圍行,同圍影相。不過可能成個環境都係室內,好多都好似唔足夠光,所以都影相影得唔係太靚,得幾張見得下人呀~

影完相之後,我地就繼續行吓。冇得去泰國都買到蝴蝶袋,因為入面有間曼谷包包店,所以我地幾位女仕就失守....勁買嘢添~

我地真係滿載而歸咁離開威尼斯人,不過佢地成個環境真係好豪華...好靚,大肥豬仲話有機會就同我嚟訓番晚呀!

午餐去朋友仔介紹嘅氹仔食豬扒包~

好大支可樂呀....個樽仲好重手,係香港都冇見過添~

嘢食到,靚女當然食燕窩蛋橽...男人就食葡橽。個燕窩蛋橽係有燕窩,不過就淡左少少,但個葡橽大肥豬就勁讚好食~

四大個豬扒包,塊豬扒真係好大,個麵包夾唔得晒,個味道都OK呀~

食飽飽就向下一個目的地出發....漁人碼頭

係漁人碼頭除左睇B女展之外,當然唔少得影靚相啦~

下一個目的地就係大三巴

原本我地打算去食紅屋碗仔翅,不過一去到真係勁多人,所以就冇排隊,改行吓就算啦!

係我地行緊手信街時,見到有阿蘇之前介紹過嘅車仔雪糕,就試吓啦,點知係又貴又唔抵嘅雪糕,$13都係得嗰少少,勁唔開心呀~

晚餐就去氹仔食好出名嘅誠昌飯店,真係好多人等位,我地已經一早BOOK左位,都要等好左差唔多四十五分鐘。

我地叫左幾個招牌菜嚟食,首先就係全店主力推介~水蟹粥,真係幾好味呀~

接力推介~酥炸墨魚丸,都幾好~

仲有~白灼豬腰肝腸,依個就麻麻地,可能我唔太鐘意食內臟啦~

最後叫左個~鮮魷西蘭花,一般啦~

食飽飽之後,我地再行一陣,就搭船番香港啦!

雖然係趕左少少,但個感覺都唔差呀!唯一就係可能假期關係,真係勁多人,好多地方都要排隊,攪到我地好多野想試都唔得呀!

依個澳門之旅我真係玩得好開心,第一次朋友離港旅行,希望佢地都玩得開心,對我SET依個行程滿意啦!


*♡♡小肥豬♡♡* | 13th Apr 2009 | 生活點滴 | (27 Reads)

其實係我地個澳門之旅入面,有一個重要嘅節目,我地都係因為依個原因先考慮去澳門玩。

就係去漁人碼頭睇BLYTHE展~

依個展覽其實係當地嘅B媽敘集埋一齊攪,所以個個B女都好有特式,同原裝嘅真係好唔同,好靚呀~

真係唔可以唔讚下咁多位B媽,佢地好勁呀...好有心機幫囡囡扮靚,比我就一定冇依份心機呀!


*♡♡小肥豬♡♡* | 12th Apr 2009 | 我的D女 | (31 Reads)

係未同大家分享我個澳門之旅前,先同大家分享D女嘅相先啦!其實係因為影我嘅相影得我實在太肥,所以要少少時間去睇吓有冇啲冇咁驚嚇嘅先俾大家睇呀!

係臨出發嘅時間都考慮左一陣帶邊個D女,終於都決定左帶魔女版MARIE去~

睇完先發覺原來我同D女都係影得唔係好多相,係威尼斯人直頭唔記得拎D女出嚟添。唉.....都係怪我自己掛住玩啦!


*♡♡小肥豬♡♡* | 10th Apr 2009 | 生活點滴 | (33 Reads)

今日一早就陪奶奶入西貢去大肥豬阿哥屋企,雖然唔係第一次入去坐,不過今次我地去嘅時候剛好係潮脹,所以望出去係一進冇制嘅大海,成個VIEW真係勁靚,個感覺好舒服呀~

原本係打算入去幫大伯整電腦,不過唔知點解冇端端就變左BBQ。

唉...原本BBQ係冇問題,我仲好鐘意添,不過咁橋今日係初十五,所以真係有得睇...冇得食。冇理由叫大家就我唔BBQ嘛,所以都冇辦法,當陪佢地玩啦!好在我都有啲燒粟米同蕃薯救我一命。哈哈~~

食得一半,我就落左樓上同姪女玩,姪女都好有斤兩,所以都唔敢抱佢,同佢玩吓車仔就算啦~

之後見大伯屋企有張大按摩椅,所以就貪玩試吓。個感覺係........唔舒服,好似俾人打咁,都係玩一次就夠啦~

大家BBQ完,之後整完電腦就走啦。就係咁我就過左假期嘅第一天啦!


*♡♡小肥豬♡♡* | 10th Apr 2009 | 我的D女 | (26 Reads)

到啦...到啦...終於都到復活節,可以放四日假去玩啦....哈哈!

大肥豬話已經買唔到我至愛吉百利蛋蛋,所以就買左盒出奇蛋俾我,當係應節哦。(有得食我又點會介意呢!)

有復活蛋又點少得兔仔同呢?所以就搵左BENNY兔嚟影左幾張相,感受吓復活節氣氛啦~

最祝各位 :復活節快樂,假期時盡情咁玩得開心啲啦!


*♡♡小肥豬♡♡* | 9th Apr 2009 | 生活點滴 | (31 Reads)

原本都冇打算係依個復活節期間去其他地方玩,都係打算留港消費,振興經濟。不過依個計劃就係尋日改變左啦!哈哈~~

事緣係尋日朝早,同事話有去澳門嘅平來回船飛,大家都見好幾抵,所以好快就決定約埋係星期六一齊去玩。最後我地係一行四人,我、大肥豬再加埋糖糖 & ZOE一齊去玩番一日啦!

今日船飛到手,我地個失驚冇神澳門遊可以成行啦~

講番起我地勁耐冇去過澳門,對上一次都係金沙開幕同小豬爸一齊去玩過,什麼漁人碼頭....威尼斯人....睇相就睇得多,自己就未去過,所以都好期待呀!

我地都只係一天遊,不過都總係好想PLAN好啲,好想去晒出名嘅地方,食晒出名嘅野食,仲要盡情要影多啲相呀!(好在有朋友同行,今次應該可以同大肥豬影多啲合照啦!呵呵~~麻煩晒糖糖同ZOE啦!)

雖然係近近地嘅澳門,不過都係去玩呀,所以個心都已經飛走左,攪到冇乜心機做野添,成朝都係諗我地個行程。哈哈~~仲有兩日就有得去玩啦!


*♡♡小肥豬♡♡* | 8th Apr 2009 | 生活點滴 | (33 Reads)

用開支洗面CREAM差唔多用晒,所以今日放工就先去SKIN FOOD行個圈。

原本都只係打算只係買洗面CREAM,點知.....睇睇下,又失守,買多左幾樣野添!

原先決定買嘅洗面泡泡~

點知最後買多左SET護膚品~

依SET係新出嘅FRESH JUICE系列,係啱依個春夏天用,仲有強勁美白效用哦。唔知用完之後會唔會變白雪雪呢。

其實我都有考慮左一陣(係一陣咁多啦~),見屋企用開嗰SET都差唔多用晒,加上轉天氣時又係時候要換吓,所以就買左啦!不過都好抵呀....因為新系列有特價,所以都唔係太傷。

有時諗...女人錢係最易賺錢呀!哈哈~~


*♡♡小肥豬♡♡* | 6th Apr 2009 | 靚太廚房 | (69 Reads)

好耐都冇將煮飯仔嘅傑作出同大家分享啦,我唔係懶惰呀...只不過成日都係煮嗰幾樣,唔好係度獻醜啦!

依個就係我地今晚嘅晚餐,兩餸一湯都幾豐富呀~

今日個晚餐個焦點係落左係第一次煮嘅洋蔥豬扒~

其實之前係小豬媽屋企食過依個餸,大肥豬嗰時都話好味。既然佢鐘意食,當然要學吓整啦!

第一次煮依個餸,開頭都怕整得唔好食。不過好在大肥豬邊食邊讚好,又話我整得又淋又入味,仲叫我下次可以再煮依個餸,真係聽得我飄飄吓,勁開心呀!

依家真係越嚟越鐘意煮飯仔,好鐘意見到大肥豬笑住口嚟食飯嗰個樣,所以我真係要努力學多啲唔同但又好好味嘅餸先得。


*♡♡小肥豬♡♡* | 5th Apr 2009 | 生活點滴 | (17 Reads)

今日我地一行六人去睇左由積分所換嘅新宿事件。

好在係免費,因為覺得都唔係太啱睇,個劇情又有啲唔合情理,又冇乜勁打交場面。最重要就係成套戲唔係講國語就係日文,真係成套都係掛住追字幕嚟,都有少少辛苦呀!唔只我..我地一行六人都覺得麻麻地,都係覺得成龍做警察故事嗰啲戲好睇啲。

之後見到有宣傳,知道太古城有個玩具展,所以我地睇完戲之後就行左一陣。有好多玩具我都未見過,有啲都幾得意。有啲玩具小豬爸話係佢個年代有得玩,所以邊行邊講俾我地知係乜,都幾開心呀!

不過因為個環境影響下,係個玻璃櫃入面再加上射燈,所以好難影得多靚相,我都係隨意見得意先影呀~

睇完一陣,之後細路就請我地就食晚飯就各自回家。

就係咁....我又過左一個好開心嘅家庭日啦!


*♡♡小肥豬♡♡* | 4th Apr 2009 | 生活點滴 | (22 Reads)

仲有一個多星期先到復活節,不過我今日已經收到一份小小嘅復活節禮物,就係依包我至愛嘅朱古力復活蛋~

唔同顏色嘅細細粒朱古力,真係好食都唔停得口呀~

我都算係一個為食嘅人,平日都好鐘意食朱古力,但唔知點解由細到大都特別鐘意食依款朱古力,總係覺得同平時食嘅朱古力唔同味道,真係好食啲呀!

記得之前間唔中都見超市有得買,我一見到就會買番包嚟食,不過近依幾年都只見吉百利只係復活節先推出,所以就算好鐘意食,每年都只係復活節先有得享受啦!

唉....真係要趁依家,冒住肥嘅危險,買多啲嚟食先得啦!哈哈~


Next