香港新浪網 MySinaBlog
*♡♡小肥豬♡♡* | 31st Jan 2009 | 生活點滴 | (16 Reads)

原本打算趁今日仲係放假出去影靚相,不過因為個頭痛痛地,攪到冇乜MOOD,都係留左係屋企休息...訓訓覺。

訓到點幾鐘,我地都覺得悶悶地,最後大肥豬就建議去行吓街啦!

我地首先去左西九龍中心,去到時剛好有班英皇藝員攪簽名會,真係好迫人,想去八卦都唔得。

我地行吓個商場,行左一陣都冇乜特別野睇。不過,行行下,竟然俾我見到個好得意阿甘電話繩,大肥豬就買左嚟送俾我,仲幫我即刻換左個電話繩呀!

哈哈..真係越嚟越鐘意阿甘呀~

行左一陣西九龍中心,見都冇乜野睇,所以我地就轉戰鴨寮街。

行左一陣,大肥豬終於俾其中一檔吸引住,睇左好耐,依一個就係買模型鋪啦!

原本大肥豬係睇緊模型車仔,不過睇睇吓又睇到有好多遙控直升機。見佢咁鐘意,又唔係太貴,所以就用左尋日贏左嗰少少新年財買左啦!

大肥豬真係勁鐘意佢個新寵,一番到屋企就即刻進行第一次起飛,玩都好似幾得咁哦........哈哈!


*♡♡小肥豬♡♡* | 30th Jan 2009 | 生活點滴 | (25 Reads)

今日係年初五,終於都有人嚟我屋企拜年啦!

今日嚟屋企拜年嘅就係我嘅小豬家庭成員、姑姐、嘉汶表妹仲有契大佬兩父子,加加埋埋都有成十幾個人,好耐都冇試過咁多人光臨啦!

為左準備今晚個晚餐,我一早就去街市買餸,返到屋企又忙住洗洗切切,希望可以預備一餐好好嘅晚餐俾大家。

幾十人嘅晚餐我當然仲未可以煮到好好,加上又有小豬媽依個高手係度,所以我都係為大家準備一個豐富邊爐宴。

等齊人....我地就開餐啦!

哈哈....我地仲留番初三摘嘅蘿蔔同生菜嚟打邊爐,可能係新鮮摘關係,到今日食都好好味,個蘿蔔仲好甜呀!

大家食飽飽之後,一齊玩吓、發吓新年財啦!我地又玩魚蟹蝦,又玩啤牌,當然大家都係小小地玩吓咁啦!

玩到最後小肥豬我竟然做左大贏家,贏左百幾蚊,真係勁開心,都係第一次贏咁多呀......哈哈

今晚大家都玩得好開心,個個都開開心心咁走,見佢地咁我就更加歡喜啦!

嘩...今晚原來我都收左幾盒賀禮,偷偷地睇到樣樣都係我鐘意食嘅,今次真係有排食啦!


*♡♡小肥豬♡♡* | 29th Jan 2009 | 靚太廚房 | (36 Reads)

經過三天嘅新春活動,日日都要早起身,都有少少攰呀!

今日我同大肥豬都仍然係放假,我地都冇特別嘅節目做,所以可以訓番晏啲休息吓啦!

起身之後,我就開始準備我地個早餐...其實係午餐先真...哈哈。

新年哦.....當然唔少得煎吓年糕同蘿蔔糕,應吓節啦。

其實係小豬媽同奶奶屋企都食左好多,不過自己就未煎過。今次仲係我第一次煎年糕同蘿蔔糕呀!

哈哈...好在都煎得有板有眼,都唔係好燶,大肥豬都話好味呀~


*♡♡小肥豬♡♡* | 28th Jan 2009 | 生活點滴 | (22 Reads)

今日係年初三,我地個節目就係由小豬爸負責渣車車我地入新界行大運啦!

我地個節目都好豐富,第一站就係去林村許願樹。

由於我地上年去到時都好靜冇乜特別野睇,所以原本都唔打入去,不過我同小豬爸都分別睇到電視話有林村有棵特制許願樹可以拋,所以我地就即該就決定去玩吓啦!

我地真係好好彩,一入到林村個停車場就搵到個靚車位,所以好快就可以入去玩啦!

今年林村真係比上年熱鬧好多,除左一棵膠許願樹之外,仲有一個嘉年華會,好多攤位遊戲玩。

我地先行吓個嘉年華,不過我地就覺啲攤位遊戲好似唔係咁得,所以都冇興趣去玩,都行吓影相就算。

行左一陣,我地終於去膠許願樹度玩啦!

我地買左幾個豆袋形嘅橙仔開始拋啦~

睇吓我地拋得幾開心~

我個嗰拋左好幾十次都拋唔到上樹,大肥豬幫手都唔成功,最後拋到攰都係掛係樹上面呀~

我地幾個就以小豬爸最利害,拋一次就可以拋上樹啦!

行完林村之後,就去第二個目的地....雲泉仙觀啦!我地入去行吓影相咁啦~

之後我地就去左附近個士多啤梨場玩啦!真係勁失望,啲士多啤梨真係勁細粒,完全摘唔落手。

冇士多啤梨摘,不過我地都有新野玩,就係去左隔離個場掘蘿蔔同生菜。

依個蘿蔔係我自己掘出嚟呀~

依個生菜都係我自己摘呀~

我們的戰利品~

玩完一輪之後,我地就向布袋澳出發,入去食海鮮,不過嗰度真係好凍呀~

我地今個晚餐真係勁豐富,樣樣都係我至愛呀~

隨著依個好味晚餐完結,我地就就行左一個新春行大運啦!走嘅時候,小豬爸仲車我到屋企樓下添。

哈哈...今日真係過左一個又開心又好玩嘅年初三呀!


*♡♡小肥豬♡♡* | 27th Jan 2009 | 生活點滴 | (22 Reads)

今日係年初二,每一年嘅習慣都係依日陪老爺奶奶入錦田同婆婆拜年。今年當然都唔例外,所以我地又一早起身入新界啦!今年好幾位大肥豬嘅哥哥都一齊入,所以都幾熱鬧。

我地入到錦田同婆婆拜年之後,因為哥哥們佢地攻打四方城,我同大肥豬就出去行吓感受大自然,順便影相啦!

其實我地一早已經估到會有好多時間影相,所以就帶左支50MM新鏡頭入去影,因為未試過係戶外用依支鏡嘛!

靚鏡頭下...影菜仔都靚啲呀~~哈哈

婆婆屋企係村入面,所以真係好有農村FEEL。我地四周圍行邊行邊影,都影得幾多相,仲有好幾張都好鐘意添。

郊外地方個溫度又真係凍好多,所以影完左一陣相之後就番去婆婆屋企睇電視,等食埋晚飯就走啦!

我今日係婆婆屋企發現左依個物體....

依個應該都係一支絕版嘅陳年舊款可樂樽,真係好少見。相信都放左係度有一段好...好....好....長嘅時間,所以都真係影完就算...唔敢掂呀!


*♡♡小肥豬♡♡* | 25th Jan 2009 | 生活點滴 | (15 Reads)

今日已經係年三十晚啦!

係度先祝大家牛年樣樣事都順順利利,

身體健康,個個都越賺越多,

總之想嗰樣有嗰樣啦!


*♡♡小肥豬♡♡* | 24th Jan 2009 | 我的D女 | (23 Reads)

今日DOLLCENA又有新攪作,個獅頭帽幾靚。

依個新LOOK幾有賀年氣氛,係唔係好得意呢?

同靚靚水仙花影吓相先~

其實依個舞獅頭係今晚番小豬媽屋企食團年飯時,記起之前買左三個舞獅擺設,不過小豬媽一直都冇拎嚟用。所以當我搵到嘅時候,小豬媽送俾我拎番屋企佈置啦!

哈哈....但係我見到嘅第一時間,我就諗到拎俾D女當帽仔。

返到屋企即刻幫D女換新妝啦!估唔到又幾啱SIZE,好有新年FEEL,不過如果換埋新年衫仔就仲正呀!呵呵呵..


*♡♡小肥豬♡♡* | 23rd Jan 2009 | 生活點滴 | (16 Reads)

今日係奶奶屋企食飯之後,就去左行花市。不過我地去嗰個唔係維園,都只係回家路經嘅觀塘花市。其實我都幾怕人多地方,所以就揀今日早早地入去行個圈,冇咁迫人嘛!

可能地方細關係,真係冇乜特別嘢睇,同往年嘅分別都唔大。唯一就係乾貨區好似全部都係啲學生嚟SELL我地,有啲都幾瘋狂,攪到到都驚驚地唔敢行埋去呀!

今次行花市都幾舒服,完全唔迫人,仲有空間俾我地影少少相添!

天氣都凍凍地,我地行左一陣就走啦!原本我想買個風車同牛仔,但睇唔合心水,有啲都仲未減價,好似唔係好抵咁。

返到屋企,我就好乖乖咁清潔廚房同廁所,年廿八要洗邋遢,應下節啦!

好在間屋平日都唔係太DIRTY,所以都好快整好晒。不過...清潔完之後真係勁攰,依家又要大覺訓啦!哈哈~~


*♡♡小肥豬♡♡* | 22nd Jan 2009 | 甜蜜生活 | (18 Reads)

尋日出左旺角新世紀影波兒之後,今日我地又去左影相啦!

之前睇見小M係MEGA BOX影左啲新年迪迪尼佈置覺得好靚,所以趁今日要去九龍灣整啲野,就順便入去行一轉影靚相。

一入到MEGA BOX,已經見到好多迪迪尼佈置,我地先上左去五樓中座影相,個佈置又真係幾靚,好有新年氣氛呀!

一入到去就俾個米奇公仔吸引住,冇得同迪迪尼嘅米奇影,同依個影都唔錯,我地又係度影..影..影啦~

之後我地就去地下個佈置場影,我就比較鐘意依個多啲,個米奇頭波波花真係好得意呀!

依度都有米奇米妮公仔,不過唔知點解總覺得個米妮好似怪怪樣咁,當然我都唔理佢..照影啦~

可能我地都算晏入去,MEGA BOX真係人都唔多個。雖然係好在唔洗等就可以即刻影,仲可以霸住個公仔影好耐,不過就好難請人幫我地影合照呀!


*♡♡小肥豬♡♡* | 21st Jan 2009 | 甜蜜生活 | (23 Reads)

今晚大肥豬要去旺角整少少野,所以我就陪埋佢一齊出去旺角啦!哈哈..其實係我知道新世紀廣場有波兒展覽,想去影相呀!

其實我都未去睇套電影,不過見好多廣告,睇到波兒真係好得意,所以知道有得影,就好想去影啦!

我地食完飯之後,一入到新世紀,就去搵波兒啦!

波兒真係好得意,所以都有好多大小朋友係度等埋位影相,所以都要等一陣先搵到個靚位影相。



*♡♡小肥豬♡♡* | 19th Jan 2009 | 生活點滴 | (18 Reads)

今日先收到朋友係SEND番俾我嘅相,所以依家先可以寫番上星期六迪迪尼請我地優先睇嘅『3D超級零零狗』啦!

因為有四張飛關係,所以大肥豬就約埋佢嘅朋友仔一齊去睇。由於係不設劃位,所以我地就早左少少去,諗住會有個較理想嘅位置。我地都已經比電影開場時間早左廿分鐘去到,但都已經見到好多人已經排緊隊等入場啦!

等左一陣,終於都入得場啦,我地就急急腳搵個靚位,不過因為成場都有好多小朋友,所以好多靚位置都已經滿晒,不過唔緊要啦...我地唯有向高空發展,都算搵到個好位。

今次都係第一次入戲院睇3D電影,所以當職員派個3D眼鏡俾我地時,都幾興奮,仲不停係度影相,攪到個職員走嚟話戲院係唔可以影相先識收機呀!哈哈~~我地真係大膽啦!

開場啦...講真套電影又真係唔錯,加埋配音真係勁攪笑,好多位我都笑到傻左。個3D效果都好正,好立體呀!

可能戴住副3D眼鏡成個幾鐘,睇完真係有少少頭痛。

成套戲都好好,不過我有少少唔明白,點解宣傳上主要集中介紹係由學友同王祖藍配音,就連欣宜唱嘅半首主題曲都有介紹,但幫貓貓配音嗰位就隻字不題。我邊睇邊估係邊個配音,最後終於都聽得出,加上朋友嘅確定係劉玉翠配音啦!

其實貓貓係成套戲第二個出得最多嘅,都算係主角之一,加上又配得唔差,都好攪笑,點解唔作介紹呢?唔通個藝人唔紅就唔洗介紹?唉...依個社會真係現實。


*♡♡小肥豬♡♡* | 18th Jan 2009 | 生活點滴 | (46 Reads)

今日約左小豬爸同小豬媽仲有契大佬去還神,我地去左好多地方,包括沙田車公廟同埋荃灣玄圓學院。

當我地去到最後一站時,小豬爸見時間尚早,所以就渣車入左新界嘅花場,睇吓有冇靚靚年花買啦!

個花場入面真係有好多靚靚年花~

見到咁多靚花花,雖然唔係買,但都影吓相啦~

我地都係主要買水仙花,因為水仙係旺夫嘛,所以一定要擺番盤水仙花係屋企,旺吓大肥豬先得啦!行左一陣,又影左一陣相,終於到我地揀花花啦!

其實啲水仙花係放左係地上一盤盤咁買,當然一盤入面係有靚有唔靚,為左要揀啲靚花花,所以我地都不顧儀態咁係度不停揀..揀..揀,揀到靚為止。哈哈..好在老細見到都冇話我地呀!

揀左好耐,終於都揀好左我盤靚靚水仙花啦,當然係小豬爸同小豬媽幫我揀多啦,我其實都唔識.....哈哈~

食完飯番到屋企第一時間就同大肥豬一齊將盤水仙花放入個靚靚盤入面。開頭都唔識,不過整整下又好似得得地,都好似有少少層次,都幾靚呀!

等我聽日去買埋條紅絲帶,咁就靚晒啦!

希望佢地可以唔遲唔早,時間剛剛好咁係初一就可以開花開得好靚,咁大肥豬係牛年就可以旺...旺...旺啦!


*♡♡小肥豬♡♡* | 17th Jan 2009 | 甜蜜生活 | (21 Reads)

今日下午去左銅鑼灣睇迪迪尼請睇嘅超級零零狗優先場,所以就帶左相機出去,打算睇完戲去試新鏡啦!

出銅鑼灣除左時代廣場之外,都諗唔到仲有邊度可以影靚相,所以睇完戲之後就去影相啦!

一見到時代廣場依個新嘅新年佈置,都真係有少少失望。因為都唔太特別,只係得啲金色有燈嘅柱,比起聖誕個佈置又真係失色。

不過,既然都帶左相機,加上又要試新鏡頭,所以就不停影..影...影。

係樓下廣場外又影,不過嗰度真係好多人係度等人,所以都唔係太好靚呀!

係廣場大堂又影,其實係同樓下差唔多,只不過多左棵冇桃花嘅桃花樹~

之後行左一陣,再行番去樓下廣場外,見到係啲燈柱又光左,加埋個天黑黑地,個FEEL又好似幾好,所以又嚟影多次啦~~

哈哈...今次用左支新鏡,我地仲未完全掌握到,以第一次嚟講都唔錯啦,影得到幾靚哦!


*♡♡小肥豬♡♡* | 16th Jan 2009 | 生活點滴 | (21 Reads)

真係好快...仲有個幾星期就到新年啦!

仲記得上年派利是都真係幾興奮(哈哈..派錢都咁開心?),今年已係係第二年派利是,講真...興奮程度又真係冇上年咁,不過有得派利是都係一件開心事嚟呀!哈哈~~

依幾日都已經唱左啲新銀紙,不過派利是又點少得靚靚利是封呢!

繼上次入迪迪尼買左啲靚靚利是封之外~

小豬媽都俾左啲好可愛嘅利是封俾我~

除左可愛之外,最好當然就係費用全免啦!哈哈...其實依啲係小豬媽係相熟嘅金鋪拎,因為實在太可愛啦,所以小豬媽就全部俾晒我,咁我又慳番啲啦。

不過,真係冇諗過金鋪都出依啲咁得意嘅利是封呀~~


*♡♡小肥豬♡♡* | 15th Jan 2009 | 甜蜜生活 | (25 Reads)

買左部單反冇耐,今日就擁有第一支較為靚少少嘅鏡啦!哈哈哈~~

其實買機時個BOX-SET係包左一支長鏡同短鏡,次次影相都係用支短鏡,支長鏡真係冇攪過,所以我都冇打算咁快買鏡頭。

點知有一次當我地影影吓相時,大肥豬話佢留意討論區有人介紹一支又靚又抵嘅鏡頭,仲有好多人讚好添。

真係俾佢講到有少少心動,所以今日就走左去買我地第一支鏡啦~

講真...我真係唔多識依支係乜,只係知道佢光圈大啲會影相好啲。不過見大肥豬真係講到似層層,好似好專業咁,我估都應該係好野嚟呀!

買完依支鏡,我估短時間內都真係唔會再買鏡頭,因為一支短短嘅鏡都真係幾貴下,加上我又未完全學識用部相機,所以都真係等我(其實係大肥豬)學識先再考慮買其他野啦!

哈哈....搵日去影相試下支新鏡先得~


*♡♡小肥豬♡♡* | 14th Jan 2009 | 好友與我 | (23 Reads)

今日我又約左班BLOG友仔出嚟食吓飯、傾吓計啦!今次出席嘅有我、小M、KEKKA、BB YEE同小茵,真係一次比一次多人,一次比一熱鬧呀!

我地今次就去左旺角嘅樓上POM CAFE食,我自己就好少去依啲CAFE食,計埋今次都係第二次去CAFE餐廳。

依間CAFE嘅野食又真係好似麻麻地,最重要就係啲野食好似唔多熱(可能天氣太凍影響到啦 ~)。 不過我地都唔係志在食野,都係貪佢可以坐耐啲傾耐啲計咁啦!

唔覺唔覺.....我地都係間CAFE坐左成三個幾鐘,大家乜都講吓,又諗番起大家結婚時嘅趣事,都真係幾開心。最後當然要整番張大合照啦~

除左影合照之外,我地仲係度玩自拍,哈哈...都幾得意呀~

係一片歡樂笑聲吓,我地個敘會就結束啦。係臨走時大家都掛住我地個BBQ活動,所以過左新年之後,我地一定要攪番BBQ先得。


*♡♡小肥豬♡♡* | 12th Jan 2009 | 甜蜜生活 | (27 Reads)

拎完免費戲飛之後,終於去尋日個主要目的地啦!

因為過幾日我地張AP到期,已經唔打算再續,尋日就係最後一次我可以入迪迪尼嘅日子,所以當然唔放過依個最後機會,同大肥豬兩個入去行個圈。

哈哈..大家除左留意場景之外,記得睇埋我地套衫。因為依兩件冷衫都係由我...小肥豬織嘅溫暖牌嚟呀!

雖然仲有成個星期先係新年,不過好在今次入去都有少少新年佈置,咁都好似有啲新野~

其實今次我地都係打算以影相為主,可能上個星期都已經同屋企人玩時同左好多公仔影相,所以我地冇專登搵佢地,只係隨意搵幾隻嚟影吓相~

我地今次影得最多嘅地方就係城堡,次次入去都真係好少影,所以趁今次就不停影..影…影~

我地真係可以話去到邊影到邊,行左好多地方,就連平日少行嘅火車站都影得一餐,影相都影到好攰~~

原本都打算睇埋煙花先走,不過因為越夜越凍,再加上小豬爸CALL我地番屋企食飯,所以六點幾就走啦!

我嘅一年快樂迪迪尼AP就咁已經完結左啦!講真…走嘅時候都有少少唔捨得,仲好似有少少失樂感。

本來大肥豬都俾我續多一年,但最後我都放棄左依個權利。因為我想留番下次買AP時係可以帶埋仔仔一齊再入去玩(哈哈~~不過依一日都唔知要等幾耐哦)。

不過,大肥豬都答應我,今年內都會買飛再嚟玩兩次,咁都開心啲啲。(希望唔係空頭支票啦~)

話事話…今次又不得不讚大肥豬,因為又真係影得我幾靚,有啲仲玩吓效果添。原來佢係之前成日都上教影相個網站睇,話想幫我影多啲相哦!哈哈哈~~咁我之後要再去多啲地方影靚相先得。


*♡♡小肥豬♡♡* | 11th Jan 2009 | 生活點滴 | (27 Reads)

今日真係節目豐富,首先就係路經香港站去拎我地嘅禮物。

我地行去香港站途中,就見到有HELLO KITTY賀年佈置。雖然少少地,但都幾得意,所以唔放過,影左幾張相。

影完相就繼續行去拎我嘅禮物啦!哈哈...我去拎乜?

事緣早幾日收到迪迪尼SEND E-MAIL俾我同大肥豬,送最新嗰套卡通片係今個星期六嘅優先場戲飛俾我地。

有禮物就當然要去拎啦,所以今日第一個節目就係去香港站個迪迪尼售票處拎啦!

哈哈....星期六又有好節目啦!不過依啲戲飛係不設劃位,到時又要早啲去搵個靚位啦!


*♡♡小肥豬♡♡* | 9th Jan 2009 | 我的D女 | (50 Reads)

前日我將上年麥當當出嗰隻生肖羊仔拆左個頭出嚟俾D女當帽仔戴,又真係幾得意嫁~

今日又有新攪作...就係D羊羊出世啦!

係唔係好得意呢?上次只係拆左個羊仔帽時,已經好想將個身都拆埋當衫仔,不過一向手工都唔係太好嘅我就一早已經失敗左啦!

今次依件衫仔係糖糖拆左佢屋企隻羊仔之後整,我一見到就勁鐘意,叫佢今日帶返工借俾我隻DOLLCENA著吓先。

就係咁...我個D女就著住件羊仔衫,真係勁MATCH呀!

真係不得不讚吓糖糖有咁好嘅手工同耐性去拆左隻羊仔,睇嚟我都要落足心機自己拆埋另外兩隻先得啦!(真係拆野拆上癮呀..呵呵)


*♡♡小肥豬♡♡* | 8th Jan 2009 | 靚太廚房 | (53 Reads)

數數手指....都真係勁耐冇煮飯俾大肥豬食啦!(好在大肥豬都唔介意我依個懶惰小肥豬~呵呵呵)

為左要做番個乖乖老婆仔,所以就今日就嚟個09第一煮先,都有三個餸呀!哈哈哈~~~

今日煮左豆豉雞,腸仔炒蛋,仲有炒黃芽白。雖然個賣相就好似麻麻地,餸又簡單左少少,不過都整得唔差,仲可以清晒啲餸添(又有人自己讚自己啦~)。

今日我就做左乖乖小肥豬,不過大肥豬都係好乖,就係放工主動約我,陪埋我一齊去街市買餸。

唔知點解,總係覺得大肥豬陪我去街市買餸,又幫我拎晒啲餸,覺得自己都幾幸福,真係煮飯仔都煮得特別開心呀!


Next