香港新浪網 MySinaBlog
*♡♡小肥豬♡♡* | 30th Nov 2008 | 好友與我 | (21 Reads)

我個病都病得七七八八,但可能仲食緊啲藥,所以攪到個人好吽咁,成日都想訓。

不過....因為知道迪迪尼已經換左聖誕佈置,我又勁耐冇入去,攪到我勁想入去玩。加上小M佢地又相約一齊入去玩,所以我今日就飄移咁入左去迪迪尼啦!(點解叫飄移...因為食左藥都幾散,攪到個人會飄飄吓嘛)

哈哈哈...有得玩我就精神晒。不過今日影相影到我好肥腫難分,希望唔好嚇親大家啦!

我地今日個目的都係主要影靚相,第一個地點當然係米奇大屋啦!

印象中好似同上年新年嗰個差唔多,入面個佈置都係靚,我地都影左好多相。不過....因為我唔記得較用防紅眼閃光,所以影出嚟有好多紅眼呀!

真係好唔開心,下次再去影過時一定要小心CHECK吓部機先入去影相。

之後我地就當然去搵卡通人物影相啦!


哈哈..應該所有聖誕版嘅人物都已經影晒,係冇同聖誕老人影。唔知點解...總係覺得同卡通人物影係開心啲呀!

影完公仔,我地就走去搵個有利位置等睇巡遊。巡遊過後大街就開始飄雪,個感覺真係好正呀!

好鐘意依對米奇米妮雪人公仔

之後我地就睇左個公主王子SHOW(唔記得左乜名),雖然我地個位置唔太正中,不過都OK幾好睇呀!

我地食飽飽之後,係未開始煙花之前,就拎左個雪人眼鏡出嚟影。哈哈哈...影左好耐,我終於都影到個雪人燈燈,真係幾得意呀!

睇埋煙花我地就同迪迪尼SAY GOODBYE!


*♡♡小肥豬♡♡* | 27th Nov 2008 | 生活點滴 | (17 Reads)

上次因為感冒導致氣管收縮,食左幾日藥以為已經好番晒。

點知........尋晚又嚟過,胸口又嚟痛過,條氣又嚟唔順,真係唔知自己想點。等左好耐先叫做好啲,可以訓到。

可能係我尋晚個動靜真係嚇親大肥豬,所以一早就約我放工帶我去.......又睇醫生。

好在有大肥豬一早幫我去拎籌,所以我都唔洗等太耐。不過,入去見醫生就見左好耐。因為個醫生都好有心機咁幫我聽呼吸聲,又好詳細咁問左我好病程,都好似幾專業。

經醫生診斷,我都係因為氣管問題,話聽得出我氣管較弱,當感冒再加上轉天氣就會出現依個情況。

唉...又要食藥,仲要食足五日,今次真係有排吽啦!


*♡♡小肥豬♡♡* | 26th Nov 2008 | 生活點滴 | (27 Reads)

今日一早起身就做左件『瘀』事,就係一上到巴士拍咭俾車錢先發現張八達逍原來已經負左錢。

係個都未算,仲要發現自己少少散紙都冇,成個錢包最細面值都係得張五十蚊。冇理由一程車要俾多四十幾蚊嘛,所以就極『瘀』地周圍問人唱散紙啦!(我都真係未試過叫人幫我唱錢,唱俾人就有好多)

點知....問左幾個都冇人幫到我,有啲仲當我冇到,真係人情冷暖。

好在,有一位熱心女仕主動叫幫我,我先有錢俾車錢呀!真係唔該晒~

不過就係依個時候,我仲發現左一件極度冇人情味嘅事。

其實當我周圍問人唱錢時,都發現有個人好熟面口,不過佢塊面極側去睇窗,所以睇唔清楚唔敢肯定。

但我行去位熱心女仕唱錢時,坐左係熱心女仕嘅隔離,竟然就係好熟面口嘅人仕,睇清楚就係我地學校一位新學期先入職嘅老師。

我成個唱錢過程,佢當然理都唔理我,全程都勁將塊面極側去睇窗啦!(不過佢動靜我係知道佢見到我呀)

依啲係乜人呀.....雖然同佢唔熟,話晒都係一場同事,又唔係拎你啲錢,洗唔洗咁呀!為人師表哦.....係唔係應該咁呢......真係好CHEAP囉!


*♡♡小肥豬♡♡* | 25th Nov 2008 | 靚太廚房 | (42 Reads)

今日大肥豬開始放大假,所以約好左等埋我放工就係街市等,一齊去買餸,準備今晚煮飯仔。

大肥豬知道我唔太精神,叫我唔好煮太多,食一品窩就得,所以我地就買左啲丸丸、菜同烏冬麵做我地個晚餐啦!

返到屋企,我就走去訓左一陣。訓左個幾鐘左右就醒左。

當我入去廚房準備煮晚餐嘅時候,已經見到大肥豬差唔多煮好個一品窩,仲唔洗我幫手,叫我出去等食添。

豋..登..登....登...依個就係大肥豬主理嘅愛心晚餐啦!

食完晚餐之後,大肥豬仲負責執碗同洗碗。哈哈哈~~~

真係覺得我係一個幸福小女人呀.....


*♡♡小肥豬♡♡* | 23rd Nov 2008 | 我的D女 | (35 Reads)

訓左兩日,訓到成個人都痴痴呆呆,所以大肥豬話我唔可以再訓,就帶左我去近近地嘅地方行吓,等我精神番。

我地知道APM已經有聖誕佈置,所以就帶聖誕JACK女去影靚。交收完ALICE之後,就向APM出發啦!

今年APM個佈置又真係幾靚,雖然係少少嘅地方,但我地都幫聖誕JACK影左好多相。

睇吓...大肥豬又嚟上鏡呀

哈哈....依張個感覺好得意呀!

因為我個樣勁殘,所以都冇乜點影相,不過APM又咁近,所以等我個樣好啲啲嘅時候,一定會再同大肥豬再去影過相,到時就只係影我地啦!呵..呵...呵


*♡♡小肥豬♡♡* | 23rd Nov 2008 | 我的D女 | (24 Reads)

今日我個D女王國又嚟多左一位新成員,依位就係我勁鐘意同好難搵嘅愛麗詩~

我搵左佢都好耐,不過一直都搵唔到,只係係拍賣站見到有人將佢炒到四百幾蚊,咁貴當然唔抵啦!

不過,有一日我又上左拍賣網睇下有冇DOLLCENA時,就見到有人放左愛麗詩出嚟,個價都係百幾蚊,當然諗都唔諗就咁即刻BID左佢。

一早就約左今日係屋企附近交收,所以大肥豬就陪我去帶依隻ALICE番屋企啦!

帶埋個兔仔手袋就仲可愛

真係越睇越鐘意,所以下次跟我入迪迪尼嘅就當然係我依個新寵啦...呵呵呵!


*♡♡小肥豬♡♡* | 22nd Nov 2008 | 生活點滴 | (38 Reads)

首先多謝各方好友嘅關心,經過我昨天嘅足不出戶,只係識訓嘅情況下,我已經好番好多,氣管都順暢左好多啦!

講番我個睇醫生奇遇先,事緣前日因為都辛苦,所以放工之後就去左睇醫生。因為藍田啲醫生感覺上都唔係太得(可能唔夾我啦),所以就去平日睇開個醫生度,諗住都會好呀!

點知....一入到去,醫生聽吓個心跳同呼吸之後,話CHECK唔到我係乜事,叫我即刻去急症室照肺。個醫生仲嚇我話如果唔快啲去照,怕唔知會有啲乜隱藏病呀!

一聽到話要照肺,當然係勁驚啦.....即刻打俾大肥豬求救。最後我就難開醫務所,帶住勁驚心情搭車去聯合醫院急症室啦!

一去到急症室,嘩...真係勁多人。不過個醫務所醫生話我個CASE都會好快輪到,所以我就照樣登記等..等...等。當我準備入分流室時,大肥豬就趕到,見到佢...我個人先定啲呀!

見完分流室姑娘,我被評為第四類(即次緊急),再睇需輪候時間.......係四個鐘呀!我地等左一陣,估計都應該有排先到我,所以就去食啲野先啦!

點知,食完野番嚟一睇......需輪候時間係五個鐘。原本我都打算繼續等(可能俾醫務所醫生嚇親啦!),不過大肥豬話等唔過,最後就帶左我去私家醫院睇。

終於我就去醫院睇病,可能係私家關係,真係好快就睇完,醫生話我係感冒導致氣管收縮,所以依排我條氣都唔順暢。食藥多休息就好,唔洗照肺咁嚴重呀!

一聽到個醫院醫生話我只係感冒引起,真係成個人都鬆晒。

不過,我對嗰位醫務所醫生真係勁反感。我只係感冒,就講到我咁嚴重。叫我去急症室,又唔寫轉介紙俾我,等分流室姑娘唔信我係睇過醫生,又白白浪費左我係急症室等三個幾鐘呀!


*♡♡小肥豬♡♡* | 21st Nov 2008 | 生活點滴 | (19 Reads)

唉......我又打敗打仗,病左好耐,終於都要請病假啦!

尋晚大肥豬陪我去睇醫生,醫生話我係感冒導致氣管收縮,所以依排我條氣都唔順暢。

訓左成日,食左啲藥,依家都好左好多,條氣都順順地,冇抖唔到氣啦!不過,可能食左啲藥攪到個人傻吓傻吓咁,只係識訓訓訓。

講起尋日去睇醫生都真係嬲嬲地,我放工之後竟然可以到過三個睇醫生嘅地方,我都覺得自己好利害。

等我精神啲再同大家分享我個奇遇啦!


*♡♡小肥豬♡♡* | 20th Nov 2008 | 我的D女 | (30 Reads)

今日無無聊聊就拎相機張SD咭CHECK吓,發現有啲相係未SAVE入電腦度。係咁多相中,原來曾幾何時我都帶過POOH女去飲茶,仲影左幾張相添。

哈哈...所以又同大家分享吓我嘅傻瓜攝影師相片啦!

依幾張相應該都係剛剛買D女回家時帶佢地出去影相,即可以話.......POOH女係咁多位成員中第一位出街影靚相。

呵呵...雖然係遲左少少,不過POOH女又真係幾得意呀!


*♡♡小肥豬♡♡* | 18th Nov 2008 | 甜蜜生活 | (27 Reads)

之前講話行完九龍公園,見時間尚早,所以我地就諗去第二個地方再去玩。

諗左一陣,大肥豬就提意去科學館睇吓野,所以我地就向科學館出發。

點知當我地行到去科學館時,見仲有個幾鐘就閉門,加上每人又要俾$25入場費,得好少時間玩,好似唔係太低咁,所以就冇入去行,留番下次多啲時間先入場玩。

不過係門口佢地有個恐龍標本,我地就睇左一陣。原本依個標本係真,所以都影張相留念吓。

之後我地就行過對面,見仲有大把時間玩,所以就轉戰歷史博物館啦!

其實我地之前都去過,不過見時間就再去玩吓。都好抵呀.....十蚊就可以暢遊香港嘅歷史啦!

好啦...開始啦....不過要買飛先!

雖然細細地,不過都幾多好玩,我地仲影左好多相呀!不過又係唔俾用腳架,冇得影合照,全日都係得依一張。



尋日去左兩個地方,真係好好玩,仲影左好多相添。不過可能仲係病病地,個樣就殘殘地。等我精神番晒,一定要再去影靚相。


*♡♡小肥豬♡♡* | 17th Nov 2008 | 甜蜜生活 | (26 Reads)

依排去街都係掛住同D女去靚影相,我自己就真係影少左好多相,就算上次入迪迪尼我自己都係影左十張相左右,都真係未試過影咁少呀!

好耐冇影相,加上大肥豬見我病左幾日都應該出去行吓精神吓,所以我地尋日就去行街街影靚相。

原本大肥豬係話帶我入迪迪尼玩,等我一入到迪迪尼就可以藥到病除(哈哈..佢好少主動提出呀!),不過因為我都倦倦地,唔想去咁遠,所以最後我地就去左近近地嘅九龍公園行吓影吓相啦!

唔知係唔係星期日關係,九龍公園真係勁多人,有好多菲籍人仕係度,佢地仲霸左好多位置,所以係公園入面真係唔多地方影相。

不過好在,公園入面都有一個文化館(唔記得左個名添),個環境真係唔差。影左好多相,不過當我地SET好腳架影左幾張相之後,有個職員行嚟話唔可以用腳架,真係即刻DOWN晒,我係打算今日影好多合照嘛,唯有叫依個職員幫我地影番張合照啦!

文化館入面有棵大樹,大肥豬又發揮佢個傻瓜攝影師才能,同我影左幾張藝術相。開頭我都覺得怪怪地,不過番到屋企睇...又真係唔錯,幾張都好鐘意呀!

我地係九龍公園入面都唔係留左好耐,離開嘅時候見時間仲早,所以就去左另一個目的地再去玩過。

我地去左邊........轉頭話俾大家知啦!


*♡♡小肥豬♡♡* | 16th Nov 2008 | 我的D女 | (43 Reads)

今次去影相唔係為左D女先而去,係我見依排我都好少去影相,就叫大肥豬帶我去影吓相。我地個目的地就係九龍公園。

見去影相,我地都有帶埋D女一齊去呀!

我地啲相要執執先可以POST出嚟,因為可能仲有少少唔舒服,我個樣.......唔好做成驚恐呀!

依家俾今日嘅配角靚相俾大家睇吓先啦!

哈哈...影得都唔差,我就越來越鐘意帶D女出去影相,同埋已經習慣左俾人望住你影添。

所以..我同大肥豬都決定每次去影相都帶埋D女去玩吓呀!


*♡♡小肥豬♡♡* | 15th Nov 2008 | 靚太廚房 | (80 Reads)

因為今日想留係屋企等睇『JOE爸』拎視帝關係,所以一早就打算今晚留係屋企食。就係咁...大肥豬就提意叫埋奶奶上嚟一齊食。

冇所謂啦....不過就好緊張,好驚整左啲餸唔啱奶奶食,所以成個下午都係度諗煮乜。放工又即刻去街市買餸,一番到屋就即刻開工,總之就係冇停過手啦!

經過一段閉關,我地個晚餐終於完成,都好豐富呀!

西芹炒豬扒~~~因為奶奶鐘意食西芹,所以行左個街市兩個圈先搵到。

麵豉豆角炆花膠~~~啲花膠係小豬媽買俾我,買左好耐都未煮過。見今日奶奶嚟食飯,當然要整啲好嘢俾佢食啦!

梅菜魚腩~~~我地平時都唔煮魚,因為我真係好怕洗魚同淋熟油個時刻,真係好驚。不過奶奶嚟食點都要煮,頂硬上啦!

今日依三個餸都係第一次煮,開頭我都好驚會失敗,所以煮嘅時候都好緊張。好在....大家都讚好食,奶奶仲添飯食左好多餸,真係覺得我自己好叻呀!(哈哈..又有人自己讚自己啦!)

另外,大肥豬又讚我今日準備嘅餸好好,樣樣都好配合奶奶口味。哈哈...真係攪到我飄飄吓呀!


*♡♡小肥豬♡♡* | 14th Nov 2008 | 靚太廚房 | (49 Reads)

今晚又係煮飯仔嘅時候啦.....我都好耐冇正正式式煮飯,好在大肥豬冇話我!哈哈哈~~

講番今晚兩個餸先,依兩個餸都係第一次整呀!好在...都尚算OK啦!

首先就係....粟米汁西蘭花

依個都幾好味,送飯一流,不過我就落少左水,攪到杰左啲啲。

另一個係....蜜汁排骨

依個我係用左李錦記嘅方便調味包煮,真係幾方便,個味仲唔差添。我仲買左另外幾種味,打算下次再試整第二個味。

唉...我要繼續努力學多啲新餸先得。大家有乜又方便又易整嘅餸就教下我,等我可以煮多啲新菜式俾大肥豬食呀!


*♡♡小肥豬♡♡* | 13th Nov 2008 | 我的D女 | (42 Reads)

係上星期去旺角行街街搵公仔嘅同時,我都搵吓有冇衫仔可以俾D女們換吓。

不過..原來俾D女著嘅衫仔真係唔多,一般都只係俾小B同小P著,我搵左好耐先見到有一間有得賣呀!

哈哈..我就係買左依件和服啦!

其實我係好鐘意日式和服,感覺上係好靚好斯文,自己冇得著,就當然買嚟俾D女著啦!

有請莎莉示範

雖然同D女換衫仔係好得意,不過我應該唔會再買住啦,因為大肥豬話D女換左衫之後,冇左迪迪尼個FEEL,加上啲衫仔又唔係平,叫我留番啲錢去儲整成套D女仲好哦!

大肥豬又講得啱,所以衫仔一件就夠(除非俾我見到啲『好』靚啦!),我個目標係慢慢可以儲到一SET DOLLCENA。呵呵呵~


*♡♡小肥豬♡♡* | 12th Nov 2008 | 生活點滴 | (38 Reads)

唉..真係都唔知依家啲天氣想點,突然間凍起上嚟,攪到都拎唔切啲冬天衫換出嚟,就係咁失敗嘅我又嚟中招啦!

依兩日個頭到痛到爆,又不停流鼻水,食左啲藥都叫做好少少,不過就成個人傻吓傻吓咁,總之就係慘..慘..慘啦!

因為冇冬天衫著關係,大肥豬趁我去洗白白時,竟然幫我係床下低拎左幾袋冬天衫出嚟,叫我拎住幾件著住先,但我又未有心情換季住..所以依家屋企俾我攪到成個雜物屋,幾大袋冬天衫擺晒係廳。

其實之前睇天文台話星期尾會回暖,所以我先唔換季住,真係好怕過多幾日天氣又會反常,到時又要換番啲夏天衫。

真係啲乜天氣呀,真係好煩呀...換又煩..唔換又煩!

依家啲天氣冇常,早晚就凍,中午又熱熱地,大家都要小心身體,唔好學我呀!


*♡♡小肥豬♡♡* | 11th Nov 2008 | 我的D女 | (46 Reads)

D女王國又有新成員,仲一次過有三位成員添,真係開心啦!

依三個DOLLCENA唔係我搵到,係小豬媽買嚟送俾我呀!

其實之前小豬媽曾經打過電話問我有冇依三隻,當時我問佢仲乜,小豬媽又唔答我。我都覺得古古怪怪,原來神神秘秘咁買左俾我,哈哈....

萬聖節版MARIE(唔睇個介紹都唔知佢係MARIE,不過又真係幾靚,尤其係面上個星星)

妮露(好有夏威夷FEEL)

米妮(睇相就覺得麻麻地,不過睇到個實物,覺得好靚,特別係佢個黃色頭髮)

哈哈..我個D女王國已經有十六位成員啦!


好迫呀.(呵呵~~)搵日要將佢地分開兩格放先得啦!

不過..都應該係得咁多個,因為其他款應該都好難搵,所以都好整儲齊佢地呀!


*♡♡小肥豬♡♡* | 10th Nov 2008 | 生活點滴 | (44 Reads)

今日由於大肥豬要OT關係,所以我就一個人返左小豬媽度食飯。

我地見天氣都開始凍凍地,所以就食我最鐘意嘅嘢...打邊爐啦!

小豬媽預備左好多餸,睇吓我地幾豐富~

買左好多海鮮,樣樣都係我至愛呀~

當然唔少得必備嘅丸丸同肉啦~

多嘢食都仲有啲菜冇影到相添~

今餐真係勁豐富,我地邊食邊睇電視,慢慢食都用左成兩個幾鐘先完成個邊爐宴,真係好飽飽呀!


*♡♡小肥豬♡♡* | 9th Nov 2008 | 甜蜜生活 | (42 Reads)

仲有三個幾星期先係我同大肥豬嘅結婚一週年紀念,依排我先開始諗當日去邊度慶祝(因為我冇得放假,所以都應該冇乜做啲特別嘅慶祝活動啦)!

係我仲諗緊送乜禮物俾大肥豬嘅時候,我今日竟然收到份禮物,係大肥豬預早送俾我嘅結婚一週年禮物,真係超開心。。完全估佢唔到。。好驚喜呀!

依份禮物就係。。。NOTEBOOK一部啦~~

哈哈。。終於都有屬於自己嘅NOTEBOOK啦!

因為大肥豬知道我勁鐘意玩電腦,話如果有NOTEBOOK就可以時時刻刻咁玩,又可以訓係張床度玩,就係依個原因就買左俾我啦!

原本大肥豬打算結婚一週年紀念當日先送俾我,不過因為要睇吓部機會唔會有問題,所以就早少少送俾我,叫我試機啦!(仲好啦。。等我可以早啲有得玩呀!)

哈哈。。基本上屋企依家部電腦都係我,再加埋依NOTEBOOK,咁我就有兩機在手啦!


*♡♡小肥豬♡♡* | 8th Nov 2008 | 我的D女 | (42 Reads)

嘩哈哈~~D女們今日又去街街影靚相,我地個目的地就係旺角嘅繽紛啦!

之前我地無意間知道繽紛個場地係可以俾我地影相,所以趁今日出旺角行街,大肥豬就提意帶埋D女去影吓相。

最後我就帶左D女王國嘅兩位新成員去影靚相啦!(俾大肥豬話我貪新忘舊呀...哈哈!)

係繽紛入面玩左半個鐘左右,真係攪攪震冇幫襯,影得都唔錯....(又有人自己讚自己啦!)

不過...原來一次過影兩隻D女都有少少難度,好難兼顧佢地個POSE呀。


Next