香港新浪網 MySinaBlog
*♡♡小肥豬♡♡* | 31st Oct 2008 | 生活點滴 | (13 Reads)

今日我做件小小嘅善事,就係帶左兩隻BEAR BEAR返屋企啦

雖然我都覺得幾可愛,不過今次換公仔竟然係大肥豬提意,次次睇到電視播麥當當嘅廣告時,都話啲BEAR BEAR好靚。

見佢鐘意又係做慈善,所以就買左杯可樂加四十蚊換左依兩隻嚟送俾大肥豬!

原本我都打算換晒五款,不過實在唔夠手拎,唯有下次再去換埋其他嗰幾個,等大肥豬開心吓先得。唔好等佢成日話只係我儲公仔,次次都冇佢份。哈哈~~

睇吓佢地兩個幾FRIEND。(紅色嗰隻係華仔設計,綠色就係EASON設計)

原來衫仔背後都有圖案,不過我都係鐘意紅衫華仔個設計!

咁大隻都係二十蚊,加上又係做善事,所以如果大家有興趣就快啲帶隻返屋企啦!


*♡♡小肥豬♡♡* | 30th Oct 2008 | 甜蜜生活 | (32 Reads)

雖然依家嘅數碼相係方便,可以係電腦睇就得。不過,我都係始終鐘意晒相放入相簿,等一有時間就拎啲相出嚟睇,可以諗番影相時開心嘢,唔洗成日開電腦嚟睇咩!

就係因為晒左好多相,儲儲埋埋有好多5R相嘅贈卷就嚟到期。為左唔好浪費,就將啲平日生活照晒左出嚟。

晒左咁多相放係邊好呢?哈哈....就係貼左係梳化上的牆上面,咁就可以時時刻刻睇到我同大肥豬嘅靚靚相啦!

依家都唔係有好多相,不過...慢慢就會貼滿,因為我一有時間就要捉大肥豬同我去影靚靚相啦!呵呵呵~

不過一提,我依個做法都係參考車車。我第一次上去佢屋企時就已經覺得開心牆好靚,仲話第日有機會都學吓佢先...終於今日我又整左啦!(希望佢唔好介意我嘅抄考啦!)


*♡♡小肥豬♡♡* | 29th Oct 2008 | 我的D女 | (34 Reads)

經我廣發英雄帖之後,各方好友都幫我留意其他DOLLCENA嘅行蹤。

早排我嘅朋友仔K小姐見到有白色裙仔嘅公主,於是就即刻幫我訂左。原本都要半個月左右先可以到手,點知....好快就番左貨,所以....我又多一隻D女啦!

哈哈哈~~真係有少少覺得自己過分,半個月內可以買咁多隻。不過...聽聞佢地已經唔再出啦,市面上都好少地方有得買(除非係俾人炒嗰啲啦),所以依家如果見到都未俾炒高價時,都真係要見一隻買一隻啦!

睇下公主幾高貴~

公主仲同其他D女唔同,就係...化左妝同戴左耳環,又真係幾得意呀!


*♡♡小肥豬♡♡* | 29th Oct 2008 | 我的D女 | (20 Reads)

上次路過APM見到有啲HALLOWEEN嘅佈置嘅時候,雖然都同左牛女影左少少相,不過始終覺得如果個主角係JACK女會襯好多。

於是....尋日係未上奶奶屋企食飯時,見有時間就帶左JACK女去左APM影左一轉啦!

有左上次經驗,都習慣左俾人睇住影公仔。不過...今日有好多學生妹係度,真係全程望住你,加上又得我一個人係度影,所以都真係幾尷尬呀!

我都覺得JACK女襯南瓜真係幾靚呀!

帶左D女去影過兩次相,真係覺得好好玩,尤其當影左出嚟好靚嘅時間,又真係幾有滿足感!


*♡♡小肥豬♡♡* | 28th Oct 2008 | 我的D女 | (27 Reads)

等左好耐..想要左好耐…今日我終於都擁有到啦,開心指數真係極高呀!

依隻MARIE真係想要左好耐,不過一直都係市面唔見有得賣,就算有都炒高咁個價錢(唔抵嘛!),所以都成日四周搵,又廣發英雄帖叫各方好友幫忙,希望有一絲希望會俾我搵到。

終於大肥豬有個朋友搵到,個價錢仲幾好添,所以就托依位朋友買左,就係咁…我個D女王國加入左依位重要成員啦!哈哈哈~~收到時真係超開心呀!

真係有少少唔想拆個盒添,不過唔拆..又點同佢影靚靚相呢~~呵呵呵

拎個手袋仔去街街先得~

配合埋小豬媽上次個幸運扭扭蛋手袋,仲靚呀~

真係越睇越靚...相信MARIE依排都會好忙,因為我會成日帶佢地街街影靚相呀~


*♡♡小肥豬♡♡* | 27th Oct 2008 | 甜蜜生活 | (43 Reads)

今日一返到屋企大肥豬就拎左一袋藥包出嚟,叫下令我一定要分三日飲晒佢呀!

點解無端端俾幾包藥我飲?

事緣唔知仲乜,依排我個鼻哥成日都好痛,仲有時會打噴嚏打到流鼻血呀。

今日食食吓LUNCH又再次打噴嚏打到流鼻血啦,都真係驚驚地,即刻打電話俾大肥豬同佢講,仲俾大肥豬罵我唔去睇醫生添。

因為工作關係,大肥豬會接觸都好多中醫師。原來大肥豬同我講完電話之後,就將我個情況講左俾中醫師知,個中醫話我可能係乾燥,所以就成日流鼻血。於是就配左三包藥粉俾我飲啦!依啲其實係川貝粉,可以沖水飲或者煮湯時加入去飲。

就係我洗白白之後,大肥豬就沖好左一杯俾我飲啦!

講真....個味道又真係麻麻地,不過飲落口又真係幾心甜。因為真係完全冇諗過大肥豬會走幫我搵藥,開頭都估佢只會捉我去睇醫生呀!

哈哈...大肥豬真係越嚟越細心同關心我,真係覺得自己越嚟越幸福呀!


*♡♡小肥豬♡♡* | 26th Oct 2008 | 生活點滴 | (23 Reads)

經過上次食左個和民半價套餐之後,真係覺得又好味又抵食。今日我又懶懶地唔煮飯,所以大肥豬就帶左我去和民再ENCORE啦!

係臨出門口時,竟然係大肥豬提我帶D女一齊去街街,所以就隨意咁帶左牛女一齊去玩啦!

為左唔想好似上次咁等左成個幾鐘,所以我地早早地就去左食,六點未夠就入左去。雖然早早地,不過都可以慢慢食,冇咁趕嘛!

係嘢食未到時,就係同牛女影相嘅時候。

嘢食到啦...由牛女負責介紹

哈哈...真係好好味,我地兩個都食得好飽飽咁走人呀!

行到去APM大堂時,見到有少少萬聖節佈置,我當然唔會放過,以一個樣衰衰嘅樣影左幾張啦!

之後我仲拎埋牛女出嚟玩添,開頭都有少少尷尬,因為都好多人會望住你影D女,不過...影影吓又幾好玩哦。

除左我影之外,仲有幾張係大肥豬負責,仲話早知有HALLOWEEN就帶JACK出嚟,配合番個氣氛嘛!

等我多啲帶啲D女出街影吓相先得!


*♡♡小肥豬♡♡* | 25th Oct 2008 | 生活點滴 | (22 Reads)

今日雖然係放假,不過都要一早起身,因為我有一個重要任務,就係去陪小豬媽去覆診。

好在....依家都算冇事,只係食藥KEEP住同定時去覆診就得,都真係放下心頭大石!

知道冇事,當然要去慶祝吓。我地先去飲茶,再去行街街買嘢啦~~

基本上我地都行左幾個銅鑼灣大商場,但係大家都睇唔啱心水,所以冇收獲。

不過...行行吓就見到好多扭蛋機,一睇之下就見到有一個新款(唔知係唔係新,不過我第一次見到),見到時第一個諗法就係細細個可以拎俾D女玩,所以就同小豬媽去扭啦!

唉...我都覺得我係黑仔,次次扭蛋都一定係扭到米奇OR米妮,永遠都唔會即刻扭到我想要嗰個款。

今次當然唔例外,一扭......就係扭到個米妮款。雖然都唔差,不過始終都唔係最鐘意嘛!

之後...小豬媽話要試多一次,今次我仲攪笑都行埋另一面,唔睇住小豬媽扭。點知.....一扭就扭到個MARIE手袋啦....真係勁開心呀!

哈哈哈...原來我唔睇住嚟扭就會扭到好嘢呀!下次想扭好嘢都叫小豬媽幫我先得。


*♡♡小肥豬♡♡* | 24th Oct 2008 | 生活點滴 | (16 Reads)

好耐都冇講蟹仔個近況,其實係因為佢都冇乜特別大舉動俾我見到。今日見我出蟹仔POST就知佢又有新嘢啦!

還記得當阿臣離開之後,我都加入左三個新成員,不過...不幸地...佢地都好快咁相繼離開,可能因為感情唔太深,所以冇話俾大家知。為左唔想要有不幸事發生,我地都冇再加入新成員,所以阿癲就一個霸晒十八吋豪華洋缸啦!

今日見我出蟹仔POST就知佢又有新嘢啦!

話說之前幫蟹仔改名,因為阿癲嗰排好鐘意換殼,一日換幾次,真係換都癲癲地,所以就改佢叫阿癲啦。

當改好名之後,佢又唔再發癲咁換殼。不過依兩日真係可以話殼王重現,阿癲又係咁換殼啦!

昨日早上...當我出門口時,見到阿癲換左個入依個殼

點知....二十四小時之後,就發現佢又換左另一個殼

唔知再過幾個小時阿癲會唔會再換個另一個殼呢?哈哈

不過...真係激氣.....換左咁多次殼,我都睇唔到個過程呀!


*♡♡小肥豬♡♡* | 23rd Oct 2008 | 我的D女 | (29 Reads)

因為大肥豬關係,今日我個D女王國又增添多一位成員啦....呵呵呵~~

依個D女我都好鐘意,除左係大肥豬送俾我嘅禮物之外(當然收到時都真係好驚喜呀),仲有就係好少見都有莎莉買。不過我知道依個公仔比起玩具街買係貴左少少呀!

拆左個盒,當然又同佢影吓相啦!唔知係唔係放左入盒好耐,個頭髮唔多直,希望遲啲會真番啲啦!

莎莉當然要同JACK一齊去玩。大家一齊拎個手袋仔去街街啦~

握握手..做個好朋友~

行得好倦,要訓吓先啦~


*♡♡小肥豬♡♡* | 22nd Oct 2008 | 我的D女 | (26 Reads)

買左D女嗰日,因為有太多D女關係(哈哈哈~~),所以都唔夠時間續一幫佢地影沙龍。

最後為左配合大肥豬部戰車,所以就揀左身穿短裙仔嘅萬聖節版米妮,嚟個香車美人啦!

睇吓米妮幾嬌美~

突然間化身為銷售小姐向你SELL名車

整張視覺效果先....睇吓佢個燈色頭髮幾SHARP

同場加影........D女大戰巴斯光年

同D女影相真係幾好玩,自己鐘意邊擺就點擺。哈哈...等我一有時間就幫佢地影吓相先得。


*♡♡小肥豬♡♡* | 21st Oct 2008 | 生活點滴 | (34 Reads)

我地用緊個手提電話台合約仲有一個月多就過期,所以早排我地都成日去睇吓有冇啲抵嘅台,想拎著數嘛!

經過我地嘅研究,最後我地都仍然維持用番PCCW,因為佢地俾左個幾好嘅優惠,除左維持我地用開個月費,仲俾我地零機價出新電話呀~~

今日PCCW仲送左兩部新電話去大肥豬公司,就係咁.....又有新野玩啦!

雖然都唔係新款,不過都算有新電話玩吓,加上又係用情侶機,都幾好啦~~哈哈哈!


*♡♡小肥豬♡♡* | 20th Oct 2008 | 我的D女 | (47 Reads)

尋日同大家講左大肥豬買左部戰車,我當然唔執輸,都有戰利品啦!

原本尋日我地係出旺角,睇吓有冇MARIE女。當然,我地係連條貓尾都見唔到。唉.....

不過可能係旺角關係,我地見到其他造型D女都真係貴好多,仲要隻隻都唔同價錢,見過最貴一隻要成$198,但依一隻我係玩具街見過都係買$49,真係貴好多呀!

因為我一見到就講依個貴幾多...所以大肥豬就建議同我去玩具街,買多幾隻俾我玩啦~

就係咁..我地即刻搭車向灣仔進發啦!

一入到去間鋪頭,我就即刻走去D女個位置,左揀右揀,諗住帶邊俊返屋企啦......就係依個時候,大肥豬就話:咁平,買晒佢啦,當送俾我嘅預早聖誕禮物。

所以..........我就帶左佢地返屋企啦!

基本上玩具街有嗰幾個款我都買左啦....哈哈!又真係幾抵。因為太好人物啦...未有時間幫佢地影沙龍,等我有時間就慢慢影啦!


加埋我之前個JACK,已經有八隻啦!

不過咁多隻...都冇我最想要嘅MARIE.......MARIE MARIE WHERE ARE YOU ?

我都已經中毒太深冇得救啦,好在隻隻都咁抵,所以都抵玩。加上又有大肥豬嘅支持.....所以希望慢慢可以儲整成套啦!


*♡♡小肥豬♡♡* | 19th Oct 2008 | 生活點滴 | (20 Reads)

今日放假,所以就同大肥豬去行街街,睇吓有冇機會搵到MARIE女啦!

點知.....就係咁....大肥豬就買左隻戰車啦!

部車都幾型呀!哈哈哈~~~

大肥豬一返到屋企,就急不及待砌車,睇佢專心砌車個樣都真係好好笑。完成後仲即刻掃地(唔好整污濁佢部靚車哦),之後就開始片車啦!

其實大肥豬想買車仔好耐啦,因為佢成日都想買啲車仔放係玻璃櫃入面,唔洗俾我霸晒。不過一直都搵唔到心水車仔,終於今日都可能係個櫃度佔一席位啦!

大肥豬已經愛上左部車仔,仲話有時間買多部車仔同我片番轉哦!


*♡♡小肥豬♡♡* | 18th Oct 2008 | 我的D女 | (51 Reads)

自從帶左JACK女返屋企之後,真係越睇越鐘意,仲極度想帶埋MARIE返屋企添。

就係咁,依幾日我就成日上網搵,睇吓有冇人知道邊度有MARIE買(當然唔係炒高晒價嗰啲啦~)。

唉...都係暫時未有消息。不過,我誤打誤撞吓,竟然俾我搵到個日本網。一睇之下...真係勁靚,仲個個都好可愛,有啲都真係未見過呀!

原來依個娃娃係由DISNEY同TOMY公司一齊出,仲有個名叫DOLLCENA,簡稱D女。其實都已經出左好多隻,好多都好鐘意,好想帶MARIE、史迪仔同埋愛麗思返屋企。

不過都係恨多啦....又點會咁容易呀!唯有睇住圖片加屋企隻JACK女解渴先啦!


*♡♡小肥豬♡♡* | 17th Oct 2008 | 生活點滴 | (38 Reads)

今日又嚟手痕痕,又嚟整吓不織布先....

之前整兩個小手工都冇大肥豬份,所以今日依一個製成品係一早打算整俾大肥豬。

因為大肥豬唔鐘意掛公仔係個袋度,所以就整個細細地嘅電話繩,等佢可以成日都見到....

登...登....登...登....麵包超人電話繩出場啦!

講真,我自己就覺得整得麻麻地,仲有少少大細眼添,依一個就係樣衰衰嘅麵包超人。不過都要叫大肥豬用住先,等我整個靚靚嘅先換左佢啦!

原來比起上嚟細細真係難整啲,剪又好難剪得圓,都係大大地嘅好整好啲...哈哈~~


*♡♡小肥豬♡♡* | 16th Oct 2008 | 我的D女 | (43 Reads)

今晚約左班同事食飯,放工之後見時間尚早,所以就約埋糖糖去行街街,我地個目的地就係灣仔玩具街。

比起上次去行,今次真係好行好多,完全唔迫人,可能我地都算早早啦!行左一陣,終於有收獲,就係依一個JACK女啦!


睇吓佢...眼仔碌碌幾靚女~

拎個小狗手袋去SHOPPING啦~

HALLOWEEN就到,帶番個面具嚇吓人先~

依個JACK女係我嘅第一個小娃娃,其實我想買好耐,不過無奈B女實在太貴....唔捨得買呀!見依個JACK女好抵($50有找,放心..唔係老翻嚟呀!),咁我帶左佢返屋企啦!細細地玩住先啦....下次可能會帶埋佢地影相呀!

哈哈...係唔係好得意呢?但其實我最想買嘅都係MARIE娃娃,不過依家都已經好少見到,就算有...都要成百幾蚊(俾人炒高晒),同一系列公仔特別買得貴,好似唔多值咁。


(此相片在網上借用)

唉....真係好後悔之前見到六十幾蚊都唔去買,依家想買都買唔到啦!


*♡♡小肥豬♡♡* | 15th Oct 2008 | 甜蜜生活 | (48 Reads)

今日當我同大肥豬拍拖行去奶奶屋企時,我地傾傾吓.....傾傾吓,唔知講開啲乜,大肥豬突然講左一句:咁不如我地開始計劃2009年去北海道玩吓啦!

嘩...一聽到真係開心到彈起,竟然係佢主動提出(當時我地個話題係冇講任何去旅行嘅野)。我都好驚係我聽錯,仲問左幾次添。哈哈....

雖然都唔依個約定可唔可以成行,不過聽到我都已經好開心。因為大肥豬本身都唔係太鐘意去旅行,我好耐之前提過吓話想去台灣,佢都話唔好。依家就主動提意去我好想去嘅地方,真係勁開心呀!

佢有依個心我都已經好開心,當然.....約會成真的話就仲開心呀!

希望依個約定真係可以成真啦!為左咁....我都要慳啲,儲番多啲彈藥先得!


*♡♡小肥豬♡♡* | 14th Oct 2008 | 生活點滴 | (30 Reads)

話說好耐都冇煮飯仔,自己都覺得有少少過分。為左要做番個好老婆,所以一早PLAN左今晚要整啲好餸俾大肥豬食。

一放工就好乖乖咁去行街市買餸,仲一返到屋企仲洗左一機衫,執吓嘢.....之後就開始洗洗...切切啦!

一路都好正常,但當開罐頭午餐肉時,就出現一個好大問題.......就係開唔到罐頭。

通常罐頭午餐肉就係用條附加鎖匙扭扭扭咁打開,點知當我扭左少少之後,條鎖匙仔突然斷左....唔上唔落,用罐頭刀、較剪都係開唔到,都開始忟忟地。

後來發現屋企仲有多一罐細嘅午餐肉,咁都打算開罐細,起碼都有得食呀!點知....開開吓,又有同樣問題,嗰吓都真係好忟..好忟...好嬲自己,對住兩罐開唔到嘅午餐肉,真係喊左出嚟!

收拾好心情,係大肥豬安慰吓,煮埋另外兩個簡單餸,就開飯啦!大肥豬見我唔開心,仲好乖咁主動負責晒執碗..洗碗。

真係覺得自己好冇用,點解好好地想煮餐飯都唔得。少少野都做得唔好,真係.....唔知點講啦,繼續努力先得啦!


*♡♡小肥豬♡♡* | 12th Oct 2008 | 生活點滴 | (22 Reads)

今日係LULU妹生日,我同大肥豬當然有特別節目同佢慶祝,就係去一個好開心又奇妙地方…迪迪尼啦!

哈哈~~其實依個係LULU妹自己提意,因為佢好想去玩鬼屋仲有同JACK影相。原本我都唔多讚成,因為LULU妹又冇AP,要自己買飛入去,好似唔多抵咁,不過見係佢生日,加上我又未玩過日間黑色世界,所以依個就同佢入去玩吓..影靚相啦!

一入到去,當然第一時間帶壽星女去CITY HALL拎個生日襟張先,仲即刻扣落件衫度啦!唉..依個襟張我都冇呀..邊個叫我正日要返工,入唔到嚟拎呀..好羨慕添~

見人物仲未出嚟,我地先嚟飛左一轉太空山,之後我地過吓冷河行吓精品店,再去探險世界搵南瓜人影相,又去整布偶JACK啦!

之後我地就去做最主要嘅活動…搵特別版公仔影相啦!哈哈..真係勁開心,我地搵齊晒佢地影呀!

開頭都好驚影唔到JACK,話晒LULU妹都係為左JACK先入嚟,好在...第一個就同到JACK影,仲有埋SALLY一齊添。呵..呵...呵~


 

影完晒人物就再向另一個目標進發,我地去左大街酒店,LULU妹都係第一次入依啲鬼屋,所以佢都真係幾驚,我仲俾佢捉到手臂好痛添。原本我都以為自己都入過一次,唔會點驚,不過可能我地係先頭步隊,再加埋LULU妹嘅影響,所以都攪到我驚驚地。

就係因為咁..我地都冇再去另一個鬼屋啦..怕怕呀!玩完剌激玩意之後,就去玩小小世界同咖啡杯,都係依啲合家歡適合我地多啲。

依個時候都差唔多睇夜光巡遊,我地都玩都倦倦地,所以係大街搵個位坐度等睇啦!不過就係依個時候,你未坐街嘅時候,我同LULU妹都有收穫,LULU妹就買左個小JACK公仔,我就買左個小甘。哈哈..其實我好幾次嚟都好想買,不過怕大肥豬會話我又買公仔。點知今日無端端講起,大肥豬竟然話送俾我,真係勁開心呀!

哈哈哈~~ 睇完巡遊我地就走啦!今日都真係玩得好開心,希望LULU妹都一樣,有個開心嘅生日啦!

仲有啲靚相,大家有時間就去睇吓啦~~~> *去相* 


Next