香港新浪網 MySinaBlog
*♡♡小肥豬♡♡* | 30th Sep 2008 | 生活點滴 | (8 Reads)

上星期六去睇KEKKA先生個相展,臨走時拎左一份小禮物。今日我就帶左番學校,用嚟粉飾一吓我OFFICE個位啦!

登....登....登.....登....係唔係好靚呢?

其實當收到張POSTER時,我都已經打算放係OFFICE張枱度。等我唔開心時,除左可以睇到我至愛嘅結婚相之外,亦可以望見迪迪尼,咁都開心晒啦!

今日好多老師行過我張枱,都有留意到張POSTER,個個都讚靚,仲問我係邊度買添....

呵呵呵~~我真係就嚟會變成迪迪尼狂徒啦!


*♡♡小肥豬♡♡* | 29th Sep 2008 | 生活點滴 | (21 Reads)

前幾日係一位朋友仔個BLOG知道台灣好出名嘅我的美麗日記面膜殺到嚟香港,係萬寧有得買啦!

剛好尋日同大肥豬食LUNCH之後路過萬寧,真係俾我見到有得買。

雖然款式唔多,不過有一款仲係新出。見唔洗去台灣就買到,當然入番兩盒新產品~~~黑珍珠面膜啦!

依家萬寧買緊$18兩塊,雖然比起係台灣買會貴啲,不過已經比起其他水貨鋪頭都已經平左啦!(我曾經見過有鋪頭一塊都要買成十幾蚊呀!)

前排成日都去晒住玩,真係係時候美白番先得啦!哈哈哈~~~


*♡♡小肥豬♡♡* | 28th Sep 2008 | 好友與我 | (19 Reads)

探完車厘B之後,我同小M就起程向尖沙咀出發。

我地係地鐵站JOIN埋大M,之後就去進行我地嘅第二個節目啦!

哈哈...我地個節目就係去DY CAFE食晚餐之餘,去睇BLOG友仔KEKKA先生所舉行嘅迪迪尼相展,我地仲約埋KEKKA一齊食飯添~~

雖然第一次與KEKKA進行飯局,不過我地都有好多唔同話題,當然好多都圍繞迪迪尼啦,因為我地都係迪迪尼FANS呀!

傾計之外,當然要睇吓迪迪尼相,KEKKA先生所影嘅相真係好靚,好多我都好鐘意,尤其係依張阿JACK呀~~

食完我地嘅晚餐之後,見仲有時間,就玩吓啲小遊戲啦!好耐都冇玩過飛行棋同層層疊,真係玩得好剌激呀!

隨住第二次層層疊嘅結束,我地個飯局就要結束呀!

真係好想快啲再出嚟玩過,我同小M仲計劃下次去BBQ添,不過都要等小M旅行番嚟先得啦!哈哈~~


*♡♡小肥豬♡♡* | 27th Sep 2008 | 好友與我 | (20 Reads)

當知道車厘B出生之後,再加上睇車車個BLOG,見到好多車厘B嘅靚相,真係好得意,好想快啲見到佢。

終於今日約埋小M一齊去探探車厘B,可以摸吓佢啦!

我地二點左右上到車車屋企,一入到去就見到車厘B訓覺覺個可愛樣。之後車厘B仲醒左,俾我地望吓..摸吓。

我地一邊傾就一望住車厘B,真係好多得意表情,好可愛呀!

當車厘B食奶奶之前,我地仲同車厘B影左幾張相。

我地睇埋車厘B飲埋支奶奶,就走啦!

今日真係打攪晒,又攪到車厘B冇得覺覺豬,真係唔好意思呀!哈哈~~

係度再一次祝車厘B:快高長大....越大越靚仔!


*♡♡小肥豬♡♡* | 27th Sep 2008 | 好友與我 | (23 Reads)

尋日一返到學校,糖糖就話佢突然有張迪迪尼免費飛,於是就叫埋我一齊入去玩夜場。

係原全冇心理準備下,加上又一身返工LOOK,所以開頭都15/16,因為尋日係第一日萬聖節活動,當然都想去啦!

心裡諗左好耐唔知去唔去好之際,就打去問大肥豬。點知大肥豬竟然叫我去玩,哈哈...得到大肥豬嘅支持,所以我就以一身返工LOOK去迪迪尼嚇鬼啦!(其實係俾鬼嚇先真)

我地七點左右先入到迪迪尼,我都係第一次夜遊迪迪尼呀!

一入到去.....就見到門口同大街嘅佈置,真係充滿萬聖節氣氛呀!

入到去迪迪尼,我地就匯合埋小肥肥,先去霸番個好位睇夜光鬼魅巡遊,我仲將個巡遊拍左段片添,所以我就冇影相啦!

睇完巡遊,我地就向探險世界出發,因為我地要去森魔探險嚇鬼。

係未行入去,個氣氛都令我驚驚地。行到入去,開始見到好多『朋友仔』走埋你驚你,就仲驚,不停捉住佢地兩個。最後經佢地教路之下,唔好俾佢地知你好驚,咁就好啲,終於可以同佢地影相啦!

終於都覺得唔係好驚,仲走埋去影相添,不過佢地唔會企定定同你影,係要捉呀。(當時係斯文嗰隻啦)


可能係第一日關係,兩間鬼間實在太多人,所以我地都冇入去,等埋下次一大班人先入去啦!

我地玩左幾個GAME,當然有玩SPACE MOUNTAIN啦,不過我就覺得入面唔算恐怖,只係比平時快左好多,都幾好玩~~

我地行吓行吓....行到樂園CLOSE,十一點就走啦.....

第一次夜遊迪迪尼,都幾好玩,不過就好少卡通人物出嚟影相呀。可能要等上午入場先會同到佢地影啦!


*♡♡小肥豬♡♡* | 22nd Sep 2008 | 好友與我 | (14 Reads)

尋日我又入左迪迪尼啦,嘩哈哈~~依個月都已經去左三次,自己都覺得勁呀!我真係次次去都唔好厭~

今次與我同行嘅係兩位妹妹仔,有我個好同事糖糖,同埋糖糖好友兼我嘅BLOG友仔小肥肥。同佢地去玩,都覺得自己都後生啲添。呵呵呵~

由一行到去迪迪尼售票處到樂園入面,都已經加多左好多哈囉喂佈置。特別係探險世界入面,都加左好多新野準備迎接萬聖節啦!

見到咁多新野,當然唔執輸,不停影..影...影啦~

入場前嘅燈柱

精品店入面

探險世界

 

當然唔少得我地三個嘅靚相啦,不過真係麻煩小肥肥充當左我地嘅攝影師,幫我地影左好多靚相。

今次終於可以以一身史迪仔打扮,同史迪仔影相,仲擺左好多POSE,真係勁開心呀!

唔知點解,依家開始有啲喜愛史迪仔添~我仲買左三個史迪仔擺設,打算放埋入去飾物櫃呀!原本想買埋阿甘,不過冇貨,希望下次入去可以買到啦!

 因為要做乖乖老婆,陪大肥豬食DINNER,所以玩到六點左右我自己就先離開,同唔到佢地一齊睇煙花呀!


*♡♡小肥豬♡♡* | 21st Sep 2008 | 靚太廚房 | (30 Reads)

今日雖然出左街食晚餐,冇入廚房煮飯仔。

不過...我都冇懶惰,因為食完飯返到屋企我又開始整我地個甜品啦!

依個甜品我都係第一次煮,所以一過都好擔心會唔成功俾大肥豬笑。好在.....我都幾叻女,冇失禮。

是日甜品......雪耳木瓜糖水

係唔係都幾好樣呢?個味道都好得添,啲雪耳又幾爽口。哈哈哈~~成功左啦!

大肥豬都話好食,一邊食一邊讚我,仲話比起出面嗰啲真係分量多好多。(真係聽到有少少飄飄吓)

當然啦...我落足材料,放左好多雪耳,咁先夠潤。依家嘅天氣,真係要潤吓先得嘛!

我仲整多左少少,雪凍留返明天凍食,一定仲好味!


*♡♡小肥豬♡♡* | 20th Sep 2008 | 生活點滴 | (20 Reads)

搬入新居冇耐,我地就發現有一樣對我嚟講好重要嘅傢俬未買,所以我好多野我都冇得擺。我地欠啲乜…就係一個飾物櫃。

開頭我都冇為意要買個飾物櫃,因為成日都唔想放太多大件野係屋企,攪到間屋好似好迫咁。不過當我開始執搬屋帶嚟一箱箱嘅野時候,就發現我啲ANNA SUI香水冇位擺。就由嗰日起,就叫大肥豬快啲買個飾物櫃俾我放晒我啲至愛啦!

睇左好耐,我地都搵唔合心水。最後,終於係宜家買到,今日仲送到嚟屋企啦!

一見到啲貨,大肥豬就急不及待咁開始動工砌...砌...砌。經過大肥豬嘅努力(完全唔洗我幫手),終於整好左啦。哈哈~~個飾物櫃個位又幾FIT哦!

大肥豬一整好,就到我急不及待咁將我啲至愛放晒入去啦!因為有六格開係,所以我同大肥豬會每人用三格,大家都可以擺至愛入去嘛!

第一格...暫時放啲細小公仔先~

第二格...就係我嘅ANNA SUI大家庭~

第三格...我至愛公仔天地,仲有好多野收埋左,等我有時間再放入去~

原本第四至六格係俾大肥豬擺,不過佢話整時未諗到擺乜,所以就將我放係梳化嘅公仔放晒入去。

第四格...我地對結婚公仔,大肥豬擺完又覺得幾啱位,所以..哈哈哈,佢地應該會長留此格~

第五格...另外兩個至愛公仔

第六格...真係俾大肥豬激親,擺個咁個POSE,MARIE係好善良嘛,攪到好似打交咁。哈哈~~

放晒啲心愛物入去,真係幾靚呀~

依個都係暫時安排,等我有時間,再有多啲心機再執靚佢先得!


*♡♡小肥豬♡♡* | 18th Sep 2008 | 生活點滴 | (12 Reads)

今日放工有時間,又未夠鐘去奶奶屋企食飯,所以又去左邱太小小店度大倒亂呀!

其實上幾個星期都已經好想去探吓邱太,不過因為依排學校又多野做,攪到個人都冇乜心機,所以咁遲先去倒亂。哈哈...不過今日去到有好處,因為今日開始小小店做特價,咁我又可以買到又平又靚嘅衫衫啦!

我今日真係大倒亂,試左好多件衫,又要邱太同A小姐教我點襯衫....都真係麻煩晒呀!

大家睇下我今日嘅戰利品先啦!(因為我係屋企影相影得唔靚,所以就借左邱太三張相。不過我知道邱太係唔介意呀~~呵呵呵!)

粉紅多波波長衫....我覺得有少少懷舊FEEL,著上身又幾舒服呀~

黑色連身裙....著左上身真係瘦好多,有返條腰仔呀~

一條裙仔...好耐都冇買過半截裙,因為我好懶襯衫呀~

原本以為一次過買咁多新衫,會俾大肥豬話。

不過.....大肥豬竟然冇話,仲話心情唔好,買多啲嘢咁就會轉好心情啦!哈哈哈~~


*♡♡小肥豬♡♡* | 17th Sep 2008 | 靚太廚房 | (39 Reads)

今晚又嚟煮飯仔啦!睇吓我地是日晚餐幾豐富

首先就係第一次煮嘅生菜魚肉蜆仔湯

第一次整都有番咁上吓,我見屋企仲有少少蜆仔肉,所以加埋落啲湯度煲,又幾鮮味..哈哈~~真係比起街上面嗰啲好食好多呀!(又有人自己讚自己啦~)

第二樣就係芽菜韮王炒火腿

煮出嚟都覺得似模似樣,因為都係第二次煮,估唔會有乜問題。點知..大肥豬竟然話同出面街嗰啲乾身好食啲。聽完都真係有少少嬲,不過意見就一定要接受,唔係又點會有進步呢!今次可能係我落多水左,等我下次再煮過,到時一定要大肥豬讚番我先得。

最後一個餸,就係日式咖哩雞翼

今次我用左新嘅咖哩磚整,開頭都驚唔同味唔好食。好在都冇問題,大肥豬仲食左好多隻添!

呵呵呵......又係時間去吉之島十蚊店掃咖哩磚啦!


*♡♡小肥豬♡♡* | 16th Sep 2008 | 甜蜜生活 | (31 Reads)

係上星期六我地同小豬媽去行玩具街嘅時候,當我同小豬媽好用心咁揀隻又白又靚嘅兔仔燈籠嘅時候,大肥豬完全冇理我地,俾另一樣野吸引住。

就當我地揀好兔仔嘅同時,大肥豬就係吸引住東西入面揀好左一袋,要買返屋企呀~~

究竟大肥豬買左啲乜返屋企?燈..燈...燈.....燈,就係......一大袋鴨仔呀!

一袋十隻嘅小鴨仔

哈哈哈~~~真係俾大肥豬激親。完全估佢唔到會買,佢話買多啲鴨仔陪我,等我可以洗白白時開心啲哦!

當我整好浸泡泡時,大肥豬已經急不及待幫我放晒鴨仔落去,計埋之前嗰四隻,依家加加埋埋都有成十幾隻,放晒佢地落浴缸,真係唔知佢地浸定我浸泡泡啦!

不過見到咁攪笑場面,又真係將好多唔開心嘢都放埋一邊,好好ENJOY與鴨共浴。

(原本都唔打算出依個POST,不過以上圖片全由大肥豬提供,佢好少會拎住啲嘢係度影,見佢一番心意,就寫啦~)


*♡♡小肥豬♡♡* | 15th Sep 2008 | 生活點滴 | (17 Reads)

今日我又去左迪迪尼啦!今次唔係我地兩個人玩,因為我用左今個月嘅全年通行証優惠,可以帶兩位親友免費一齊玩,所以我地就同LULU妹同埋嘉汶表妹一齊入去玩啦~~~哈哈哈!

唔知係唔係中秋假期關係,今日真係好多人,所以玩好多GAME都要排好長龍。我地都主要係玩LULU妹同埋嘉汶表妹未玩過嘅GAME,之後我地就去影相啦!

玩GAME雖然係好多人,不過排隊影公仔人又唔多,所以我地都影晒幻想公園所以公仔呀!

哈老喂未到,迪迪尼已經開始有好多哈老喂精品買啦!見到有新嘢,當然唔放過,大家影影影。

原本我對JACK唔係咁大興趣,不過今日見到咁多JACK公仔,又覺得幾得意,好想快啲到萬勝節可以同阿JACK影相呀!

今日係迪迪尼都有生日禮物收,就係LULU妹送俾我嘅依一對史迪仔頭夾啦!

哈哈...係唔係好靚呢?當我睇都依對夾夾時,都已經好鐘意,仲心大心細買邊個好。就係依個時間,LULU妹就話買晒兩個當係我嘅遲來嘅生日禮物!我仲即刻戴左女朋友仔上頭添.....下次就帶迪迪仔,真係開心啦!

除左玩得開心,有禮物收之外,我今日仲係迪迪尼分別撞到一位中學同學,同埋一位舊同事...真係攪笑呀!原來迪迪尼『真係世界真細小..小小』哈哈哈~~~


*♡♡小肥豬♡♡* | 15th Sep 2008 | 生活點滴 | (10 Reads)

我地去完德福影相之後,就返去奶奶屋企食飯做節啦!

今晚真係好多餸,不過因為係十五關係,我地係食菜菜咁,不過我都食得好飽飽呀!

我地食完飯坐左一陣就走,其實係同奶奶落樓下公園仔行吓。

公園真係好熱鬧,好多大小朋友係度玩。就係依個時候,我啲迷你燈籠就要出場。我地帶左兩個燈籠仔落去賞月呀!哈哈哈~~

我地仲邊拎住燈籠邊行返屋企,周邊嘅旁人都望住我地添。

返到屋企抖一陣,大肥豬同我帶埋兩隻兔兔去屋企樓下個公園仔賞月啦!

我地都搬左入嚟個新居半年有多,不過都係第一次周圍行。都幾好玩,沿途都有人讚我對兔兔燈籠得意呀!

行左一陣我地就返屋企,因為我個電視迷大肥豬要睇電影呀!呵呵呵~~


*♡♡小肥豬♡♡* | 14th Sep 2008 | 生活點滴 | (9 Reads)

今日係中秋佳節,夜晚要返奶奶屋企做節,所以我地兩個都冇諗住去邊,打算係屋企抖吓啦!

我同大肥豬各自忙左一個中午,因為我屋企有擺神台關係,所以就要準備少少嘢拜神。一邊準備,我仲一邊煮涼茶俾大肥豬,都幾忙呀。大肥豬就忙住打掃屋企,我地分工合作啦!

當我地做完晒野嘅時候,大肥豬就收到電話,要去九龍灣做啲公事,所以我地就順便去行吓德福。

就係完全冇心理準備吓(攪到我個樣都傻傻地),影左德福嘅新主題佈置啦!

德福之前嘅主題佈置都幾靚,不過我就覺得佢地今次好似麻麻地。其實睇其他客人反應都感覺到,因為之前嗰幾次去影,都要等一陣先影到一張,仲要好多人係度圍住影。今次真係好易就可以影到啦~

希望佢地下期佈置會靚啲啦!


*♡♡小肥豬♡♡* | 13th Sep 2008 | 生活點滴 | (13 Reads)

今日我地就陪小豬媽去左上環買嘢,行吓街咁啦!

由於我地效率太快,好快就買完我地要買嘅嘢,見有時間,我地又冇特別想去嘅地方,所以我就提議去灣仔玩具街行街街啦!

一行入玩具街,真係好多燈籠呀....大大細細唔同嘅燈籠,真係好靚呀!不過好多人都係啲鋪頭門口買燈籠,我想行入好睇嘢都好迫人,所以都係行左一陣就算啦!

睇睇吓,終於俾我見到我想買嘅細細白兔燈籠。哈哈...真係好得意,一見到就即刻唔理買番隻先啦!

原本我都係打算買一隻白色兔仔燈籠,不過小豬媽就提意咁低又咁得意,叫我買埋隻彩色。終於都係低受唔住引誘,買左兩隻可愛小兔仔燈籠啦!

哈哈哈....好多年都冇買燈籠,今年一買就買四個,真係一次過買返晒啦!

著晒燈睇吓幾靚~

依家我有個難題就係唔知聽日帶邊個出街好呢?哈哈哈~


*♡♡小肥豬♡♡* | 12th Sep 2008 | 生活點滴 | (18 Reads)

唔知係唔係短髮關係,我啲頭髮一長少少,加上我又厚底,所以好快就又會變成一個波咁,一舊嘢咁係個頭度,好醜怪呀!

原本都打算留番張頭髮,不過真係頂唔順自己個波波頭,所以今日又去左去剪頭髮啦。

今日都係打算剪番薄頭髮修短少少,點知修修吓....真係剪短左好多,真係從未如此短髮過呀!不過好在大肥豬都話好睇。

之前長頭髮嘅時候,一年都去唔到一次剪頭髮。依家短髮就要幾個月去剪一次KEEP番個型。唉...真係補番晒數,不過為左靚靚都冇法啦!

哈哈哈......大肥豬尋日都剪左頭髮,依個就係佢個新LOOK啦!

我地兩個都換左新LOOK,又係時候去影靚相啦!哈哈哈~~~


*♡♡小肥豬♡♡* | 11th Sep 2008 | 生活點滴 | (16 Reads)

仲有幾日就係中秋節啦,中秋節當然係要玩吓燈籠咁先開心嘛!

今年係第一年係新屋過中秋,所以大肥豬就建議買啲燈籠擺係屋企應吓節,順便等正日同我帶住個燈籠行街賞月。有得玩我當然好讚成啦,不過講左成個幾星期都未去買到靚靚燈籠。

今日終於係冇心理準備吓買左啦....仲係小豬媽送俾我地呀!哈哈哈~~

事緣今日放工前小豬媽打電話約我,叫我拎盒月餅俾我奶奶,就係咁...我又同小豬媽TEA吓,之後仲一齊去買餸添。

當我地差不多買完餸嘅時候,我見到街市入面嘅小鋪掛左好多燈籠,咁我地就去八卦一吓啦!

睇睇吓...我地就見到有個細細個又好得意嘅迷你楊桃燈籠。由於小豬媽又識得個小鋪東主,所以就俾左一個勁低價我地,就係咁我地就買左幾個楊桃燈籠啦!

原本我都係打算買一個俾自己,不過小豬媽話要買埋俾大肥豬,等大家都有得玩嘛。

依個就係小豬媽送俾我地嘅迷你楊桃燈籠,真係幾得意呀!

食完飯就拎對燈籠俾大肥豬睇,佢都好鐘意呀!哈哈,我地兩個仲傻傻地拎住影相添~~

依家將燈籠掛係窗前先,等中秋節當日就可以帶出街玩啦!

哈哈~~好想快啲到呀,因為我印象中已經有好幾年冇玩燈籠啦!


*♡♡小肥豬♡♡* | 10th Sep 2008 | 靚太廚房 | (36 Reads)

懶左好多日,今日終於都做番個乖乖老婆,煮飯仔俾大肥豬食啦!

依個就係我地今晚個晚餐,簡簡單單嘅兩個餸。

首先就係我嘅強項(係得一個嘅強項)~~~蠔油雞翼。

原本我係打算整咖哩薯仔雞翼,不過因為今日遲左少少先返到屋企,驚唔夠時間整淋啲薯仔。為免整得唔好食,見屋企仲有少少蠔油,所以就臨時改整依個啦!

另一個就係新學整嘅~~麵豉炆豆角

依個餸又係小豬媽度偷師學煮,第一次整都OK啦,當然冇小豬媽整得咁好食啦.....哈哈~~我要繼續努力先得!


*♡♡小肥豬♡♡* | 9th Sep 2008 | 生活點滴 | (17 Reads)

唔經唔覺都已經開左學個幾星期,依個星期都算幾忙,因為我都有好多學生資料要UPDATE,再加上又有其他新學年嘅野要做,所以日日都好忙。

手頭上仲有兩份會議記錄未做,都唔知點算好....真係要拎番屋企做先得啦!(依個唔係我習慣,因為始終覺得放左工都唔應該做公司嘢,要放鬆吓嘛!)

係忙忙嘅時候,今日又安排左我幫手TAKE會議記錄。唉....都冇法啦,唯有暫時放低工作,跟埋全體老師一齊開會啦!

其實,今日個會議都係各科匯報,都有文件嘅交代,可以唔洗一個紀錄人幫手(都唔太明白點解有咁安排,不過安排左都冇法啦!)。

既然安排左,我都有好留心聽佢地講話內容,JOT低一啲重要嘢。就係因為我寫寫寫,主席老師叫各老師將有關內容俾我,方便我寫紀錄。

不過就係依個時候,有一位老師好大聲(個語氣都唔係咁好)講:唔洗啦..個FILE都齊晒,其實都唔洗搵人做紀錄啦!

之後,好多對眼睛望住我,都幾尷尬呀!聽完之後,我真係有少少唔開心,個感覺好似俾人話我多餘咁。

都唔明今年開學仲乜,由第一日到依家都成日有唔開心嘢發生,真係做到好心淡....心淡。


*♡♡小肥豬♡♡* | 8th Sep 2008 | 生活點滴 | (16 Reads)

尋日我地一行九人入去迪迪尼玩,因為我地同老爺奶奶住得近,所以就由我同大肥豬負責帶佢地入去東涌JOIN埋其他親人先去迪迪尼啦!

係行去巴士站中途都冇乜特別,點知一上到巴士,奶奶就拎左袋嘢送俾我。

一打開嚟睇,原來係一條黑色嘅Tight Pant襯褲,個款都幾OK,係個褲腳仲有少少石仔添。哈哈~~

當我睇到嘅時候,都幾驚訝(不過係開心嗰隻)。因為估唔到奶奶識得買依啲款嘅褲,可能係佢知道我成日都著依啲,所以就買俾我啦!

雖然奶奶話係好平,不過模上手都幾好呀!其實都唔係在乎條襯褲嘅價錢,佢個心意大過一切嘛。等我聽日返去食飯著俾奶奶睇....哈哈~

點解我個標題係叫攪笑的奶奶,就係因為當我收到份小禮物時,大肥豬就話奶奶仲乜去玩都帶出嚟俾我,下次返去食飯先嘛....

點知奶奶答,等我入去迪迪尼有得換呀!(當然我知道奶奶係講笑啦!佢係心急想拎俾我就真....哈哈...)


Next