香港新浪網 MySinaBlog
*♡♡小肥豬♡♡* | 31st Aug 2008 | 甜蜜生活 | (21 Reads)

有新相機再加個新腳架,當然唔放過機會去影相啦!

今日我地個目的地就係大埔海濱公園,其實我係想去依個公園好耐,不過次次PLAN話去,嗰日都係會落雨。好在,今日終於都去到啦!哈哈~~

依個公園都幾大,都有好多地方可以影相,我地邊行影,都真係影左好多相,仲有好多合照添。哈哈..有腳架真係好好多,可以影好多合照呀!

一場去到,當然要去個回歸塔度影張到此一遊相先啦!

之後我地行上天橋,見冇人就用腳架影左好多古怪相。

最後我地又去左大草地影相。

我地真係影左好多靚,基本上有三分二係合照(哈哈~~真開心..)。我地仲勁到影到部新相機冇晒電,好在大肥豬出門口時提意帶多一部去做後備,如果唔係就冇咁多相啦!

今日全日都係好開心,不過都有一件激氣事。就係當我地行到去回歸塔時,見有個餐廳就打算入去飲杯野休息一陣,一入到去就見佢地個餐牌都幾貴,一罐可樂都要成廿蚊(迪迪尼都係一支先廿蚊)。

雖然好貴,不過我地都想坐吓休息陣,咁就打算貴貴地都叫一罐可樂兩份飲啦,點知...佢地唔俾,話兩個人一定要叫兩樣野。見唔對路,我地嬲嬲地走人啦!

嘩....乜餐廳嚟呀...仲貴個迪迪尼,唔怪之得冇人幫襯啦!


*♡♡小肥豬♡♡* | 30th Aug 2008 | 好友與我 | (14 Reads)

尋晚我個節目就係約左小M飯局聚一聚啦!

哈哈~~今次個飯局當然就係食我地都鐘意食嘅日本嘢啦,所以小M就帶左我去和民啦!話事話...和民都HIT左好耐,我都係第一次去食,真係大鄉理。

不過...我真係低估左和民嘅威力,可能係星期五啦,好多人等位,原本我都打算早少少去搵定位。點知,去到真係勁多人,都要等成廿幾張枱先到我地呀!

等左一陣,終於有位啦。雖然係耐左少少,不過我地座嗰個卡位又幾舒適,自成一角咁唔會俾人阻住傾計嘛!

我地今日個晚餐都好豐富,仲食左好多野添。小M真係冇介紹錯,樣樣都好好味,尤其係個魷魚軟骨,真係好正呀~

係食嘅途中當然我地兩個又係唔停咀咁傾計啦,乜都傾得一餐。我自己就傾都唔知時間,當走嘅時候我仲以為好早添,真係快樂不知時日過呀~

係飯局途中,小M就送左份生日禮物俾我,係一個MARIE電話座。真係好得意,好鐘意呀!

原來上次大小M上嚟我屋企打邊爐時,留意到我個電話只係放係枱面,所以就送個電話座俾我啦!哈哈...佢地真係細心,不過係白色關係,真係唔捨得用呀!


*♡♡小肥豬♡♡* | 29th Aug 2008 | 生活點滴 | (19 Reads)

今晚有節目,諗住靚靚地所以就帶隱形眼鏡返工啦!點知又再一次証實左『黑仔之王…是我』。

今朝戴隱形眼鏡上左眼嘅時候,都覺得怪怪地,不過因為時間關係,所以冇理到,趕住出門(因為我已經會miss左班車啦!)。

真係估中左,我一落到街就遠遠望住巴士離開,之後我就用九秒九速度,沿住條長樓梯行落山腳搭小巴。又熱又趕時間,真係行到成身濕晒!

一邊行就覺得左眼越來越唔舒服,一直都以為係有野入眼,所以一上到小巴就闔眼休息,諗住會好番啲啦!(不過都係好似冇改善呀~)

一返到學校乜都唔做,就即刻拎支眼藥水衝入廁所,諗住除出嚟洗吓佢再戴過。點知除左嚟睇,原來副隱形眼鏡裂左,仲裂得好勁,再戴唔番上眼。所以成朝都係單起隻眼做野,睇野勁辛苦,都唔係好敢用電腦,仲有少少暈暈地添。(嘩…好黑呀!)

好唔容易等到lunch,就立即衝去眼鏡88配番副隱形眼鏡。佢地都冇我個度數嘅現貨係度,不過嗰位職員知我苦況,就讓左其他客人訂左嘅俾我先。錢到未俾就即刻換晒成對,真係舒服晒.......眼前一片明亮呀!

經過今次黑仔事件之後,真係學識一樣野,就係放定啲隱形眼鏡係學校同埋化妝袋仔度,有乜問題都可以有得救,唔洗盲嬷嬷咁嘛!


*♡♡小肥豬♡♡* | 28th Aug 2008 | 甜蜜生活 | (25 Reads)

話說今年生日,大肥豬分別送左一對相片鎖匙扣同埋一個腳架俾我,我都已經好開心,因為依兩樣野都係我想要左好耐嘅野嘛。

點知....今日大肥豬返到屋企,就拎左一份禮物出嚟,俾左一個極大嘅SUPRISE我,真係攪到我非常開心呀!

登..登...登....登.....依份禮物就係一部相機

哈哈哈.....真係冇諗過依份禮物會係一部相機。部相機都幾好,個LCD又大,最好就係用AA電得嚟又唔重,真係可以唔洗驚影相影到冇電啦!

原來大肥豬聽我講過之前我隨身帶住嗰部信用咭換嘅相機影得唔係太好,所以就諗到買部相機俾我,等我可以隨身都影到靚相。

大肥豬今次又真係非常抵錫,估佢唔到又會咁細心,真係再一次俾我感受到活在幸福中呀~~

哈哈....有新相機同腳架,又係時候PLAN吓星期日去邊影相啦!


*♡♡小肥豬♡♡* | 28th Aug 2008 | 生活點滴 | (19 Reads)

今日打開信箱,我同大肥豬都分別收到兩封信。一打開,嘩...好多COUPON啦!

哈哈...兩封信分別有五張焗豬扒飯COUPON呀~

上排見廣告話用PPS KILL BILLS,再上網登記就有得抽獎。作為一名師奶仔,有著數當然唔執輸,即刻叫本身有用開PPS交費嘅大肥豬即刻上網登記啦!

都登記左成個幾月,一路都冇收到E-MAIL通知(因為佢地要我地必須填上E-MAIL),都估冇行多啦!

係冇心理準備下,收到依五張COPUON,真係開心...

哈哈,雖然我對豬扒飯興趣都唔係太大,不過有COUPON哦,當然唔好浪費,嚟緊幾餐LUNCH又可以慳D啦!


*♡♡小肥豬♡♡* | 27th Aug 2008 | 生活點滴 | (14 Reads)

因為要返工關係,我同大肥豬都話唔特別係依日去街街慶祝。最後大肥豬就提意帶我去打邊爐....哈哈~~我鐘意呀!

我地去係去左屋企附近嘅酒樓打邊爐,仲要係任食嗰隻呀!除左我地兩個之外,仲叫埋LULU妹一齊去打邊爐添。

雖然依間酒樓嘅選擇都唔算多,都係食D大路野,不過都幾新鮮,一行三人打邊爐,我地都叫左好多野食,食到好飽飽呀!

返到屋企,大肥豬就俾左個驚喜我啦!哈哈~~就係送左一個生日蛋糕俾我呀!

雖然打邊爐食得好飽飽,不過當然要即刻切埋個生日蛋糕啦

哈哈....婚後第一個生日就係咁好開心地過左,雖然好似好簡簡單單咁,不過開心就得啦。如果過得開心,日日都係生日日啦,最緊要係俾我知道其實身邊都有好多人好鍚我呀~~

今年我其中一個生日願望就係希望我身邊所有嘅朋友都可以開開心心咁就好啦~~(仲有一個願望唔可以講住,等我願望成真後先話俾大家知啦~~哈哈!)

最後...要再一次多謝各位朋友仔嘅祝福。


*♡♡小肥豬♡♡* | 26th Aug 2008 | 生活點滴 | (13 Reads)

離開左學校之後,就去商場匯合小豬媽TEA一TEA啦!(其實係想係今日依個重要日子見吓小豬媽,因為N年前嘅今日,就係佢辛苦生我嘅日子嘛!)

我地如常去飲珍珠奶茶,如常傾計......點知,當我係手袋搵野嘅時候,小豬媽突然係佢手袋拎左盒嘢出嚟,係送俾我嘅生日禮物!

我當然係好驚喜,因為真係冇諗過小豬媽會送禮物俾我(因為之前幾年都係俾利是我嘛),一打開....真係嚇左一跳,原來係一對耳環呀!

粒石仔真係又大又閃,好靚呀~

當然即刻換左佢,真係好FIT我對耳仔(因為我耳珠比較大),唔大唔細,個SIZE剛剛好。

小豬媽仲好驚我唔鐘意個款,但我真係好鐘意呀~~~

不過對耳環應該都唔平,所以都真係.......唔知點講啦,總之真係好多謝小豬媽啦!


*♡♡小肥豬♡♡* | 26th Aug 2008 | 生活點滴 | (14 Reads)

哈哈...到啦~~到啦!今日就係我小肥豬嘅生日啦!

首先...多謝各方好友先,今日收到好多朋友仔嘅SMS、E-MAIL嘅祝賀。仲有依幾日各位BLOG友仔嘅祝賀留言,真係令我好開心..好開心....真係多謝大家呀!

今日雖然係生日,不過都係要返工。唉...冇法啦,因為就嚟開學,唔可以請假呀!

生日哦....當然打算放工就可以即刻走啦(因為約左小豬媽嘛)!點知....今日下午開個會竟然OVERTIME,攪到我要遲放工,都有少少唔開心呀~

不過,係我衝入OFFICE時,見到幾位同事都冇走到,仲係我枱面上放左個生日蛋糕,個心情即刻開心晒,仲有D唔好意思,要佢地等我...攪到大家要遲放工添!

之後大家就快快手咁食左幾張相留念,食蛋糕同我慶祝啦!哈哈~~

依個就係同事們送俾我嘅生日蛋糕

切蛋糕啦....(由於唔係太方便放與同事嘅合照上嚟,所以大家都只可以見到好開心嘅小肥豬呀!)

除左有蛋糕之外,同事們仲送左好多禮物俾我呀!

真係份份都好鐘意呀~~(不過要佢地花錢就真係唔係幾好意思呀!)

係度真係要再次同一班好有心嘅同事講多次:多謝晒呀!我真係好開心呀!


*♡♡小肥豬♡♡* | 25th Aug 2008 | 生活點滴 | (36 Reads)

今日原本打算同大肥豬去街街影相,點知一起身就見到落好大雨,真係成個人都即刻DOWN晒,知道冇得去影相啦!

之後,大肥豬見個天氣都好似好左,所以就建議去旺角行吓街。都好啦....因為我都打算買幾個殼俾蟹仔。

第一站當然就係金魚街啦.....行左一陣,就買到三個蟹仔殼,同埋一支椰子樹。不過唔知係唔係養蟹仔嘅熱潮已過,買依D蟹仔用品平左少少呀!(咁就好啦...等我再買嘅時間又可以平D嘛!)

之後我地就去左花墟行左一個圈,當我地行到去繽紛三層嗰間鋪頭時,見去過咁多次都未入過去,所以就入去行個圈啦!(其實係想入去涼吓冷氣,過冷河呀!)

佢地入面真係有好多地方佈置得好靚,有靚景當然唔好浪費啦!所以我地就拎起部相機係度影...影...影啦!(係完全冇心理準備下,今日個LOOK好似唔係好得添,不過唔理,影相要緊嘛!哈哈~~)

哈哈...點解我地敢影相?原來佢地佈置得咁靚,都係建議我地影相呀!睇吓.....

玩完一輪之後,我地就去左太子商場行吓。就係依個時候,大肥豬提早送左份生日禮物俾我啦!

登...登....登.....登,就係一支腳架啦!

終於俾我買到支腳架,可以周圍影相,唔洗再等人幫我地影合照啦!睇落支腳架好似好專業咁,同部傻瓜機好似有少少格格不入.....不過唔理啦,可以影到合照就得啦!

依家有支腳架,又係時候諗吓去邊度影相啦!大家俾D建議我地呀~~(真係諗起都開心呀!)


*♡♡小肥豬♡♡* | 24th Aug 2008 | 生活點滴 | (10 Reads)

話說尋晚好開心咁一家人去左食韓燒,個心情當然係超好啦!

點知......一返到屋企就見到個好驚嚇嘅場面,真係勁想喊出嚟,心諗:唔係呀...送份咁『好』嘅生日禮物俾我呀?

我嘅習慣就係一返到屋企,都會望吓兩隻小蟹,睇吓佢地有冇失蹤左。點知.....一見到阿癲,佢成隻蟹身出左個殼度,整佢又唔郁,完全冇反應。第一時間就大叫,喊住將依個消息話俾大肥豬知。

我嘅舉動,真係驚到大肥豬即刻走去個缸前面睇吓個情況。當我地都估佢已經死左嘅時候,準備拎起阿癲個身體時,又有新發現。

阿癲蟹身完來係得一半,當我地睇清楚時,我見到阿癲個蟹腳仲係個殼入面,仲有少少郁哦,咁即時開心晒,原來阿癲只不過係脫皮呀!哈哈...放心哂啦!

依個就係阿癲脫出嚟嘅皮,成隻好完整嘅蟹咁,又好難怪我會誤會佢嘛!

依家阿癲脫皮,即證明佢又長大左啦!哈哈.....

不過,阿癲係蛻皮期間會變得很脆弱,如蛻皮失敗就會引致死亡(真係有少少擔心!)。所以LULU妹就教我將阿癲放入隔離病房。

等佢完成整個蛻皮過程,活躍番先放可以放入去同阿臣一齊住個十八吋豪華洋缸呀!


*♡♡小肥豬♡♡* | 23rd Aug 2008 | 生活點滴 | (14 Reads)

今日係農曆七月廿三日....係乜日子呢?哈哈...就係小肥豬我嘅舊曆生日呀!其實我地年輕人,當然係等到新曆生日先會去慶祝啦!

當未結婚時,每年舊曆生日都係屋企普普通通食飯,都唔會特別慶祝,有時都唔會提起。不過...唔知係唔係結左婚關係,今年特別想同佢地出去食飯,之前大家又提過想去食韓燒,所以就決定左食韓燒自助餐慶祝啦!(其實都係搵個藉口去玩呀!)

所以就約左小豬爸、小豬媽、LULU妹、細佬同埋細佬女朋友,一行七人去左食韓燒慶祝。

可能今日係星期六關係,真係勁多人等位。我都已經BOOK左位,但係都要等成半個鐘有多先有位呀!

一坐低,我地都急不及待去拎嘢食。不過最興奮嘅唔係我,就係小豬媽啦....佢一嚟就拎左好多牛肉...金菇...魷魚....,仲不停炒好多俾我地食呀!哈哈~

食到中段,又係大家都要休息一陣(因為都開始飽飽地),所以又係影相好時候啦~~

原本今餐我打算由我作東請大家,不過小豬爸就話等佢嚟,當同我慶祝生日,所以仲更加開心!

其實仲有一件事令我好感動,就係小豬爸其實今日係唔舒服,佢仲食緊藥。當我知道時,都有話不如改食其他嘢,不過小豬爸食左幾次藥已經好好多,話冇事可以繼續去。其實我知道小豬爸係唔想掃我地興先唔改地點。好在......我見到小豬爸係成晚都冇唔精神,仲食好多嘢,我先安心D呀!

今日真係好開心,一家人可以開開心心咁食飯,真係好鐘意依個感覺。唔知係唔係結左婚,所以特別覺得同屋企人一齊,齊齊整整嘅時候係最開心呢!(我未婚前都係鐘意痴屋企呀!哈哈~~)。


*♡♡小肥豬♡♡* | 22nd Aug 2008 | 靚太廚房 | (44 Reads)

嘩哈哈~~終於俾我恨到啦!隻鸚鵡嚟到香港,掛左成日風球,又可以放假一天啦!雖然聽日要返工,冇得連放三天,不過有多一日休息都已經好好啦~

今次醒目啦.....一早起身就開電視睇,仲好留意佢個風向。當知道會打續漸靠近香港,都知道仲有排掛,所以就即刻跳番上床繼續訓啦!

真係好好訓...訓到成十二點幾先識起身,都真係覺得自己勁呀!見都唔係好大風,所以就同大肥豬落街食嘢同埋上少少貨買餸煮晚餐。

一入到街市,俾我想像中少人,可能我地都算遲入貨。

不過都唔知煮乜好,又懶懶地唔想煮飯,所以最後都買左少少丸丸同菜,煮埋奶奶上次俾我地嘅白麵,就變左我地今日簡單嘅晚餐啦!

雖然係簡單左少少,不過都食得好飽飽呀!間唔中食吓依D晚餐都唔錯呀!(又係俾自己偷懶嘅藉口..哈哈哈!)


*♡♡小肥豬♡♡* | 21st Aug 2008 | 生活點滴 | (14 Reads)

我買左幾支泡泡浴劑之後,雖然我都唔係日日浸,買左番嚟都浸左幾次,不過我真係愛上左浸浴啦!

當D泡泡包圍住時,真係好似睇電視咁,D泡多到睇唔到個身體,個感覺好得意呀!

因為當你浸緊泡泡嘅時候,成個人都真係好RELAX,好舒服呀!我一浸,就浸到D泡泡冇晒我先肯起身,由熱水變到涼水(都有成個鐘呀~),所以間唔中大肥豬都有拍門,因為怕我暈左係廁所哦!

嗰一刻...真係將你D唔開心嘢暫時忘記晒。所以每當我有唔開心事嘅時候,我都去浸泡泡,等自己開心番嘛!

哈哈....好攪笑,就係大肥豬都試過浸一次泡泡浴,不過佢就話唔鐘意,仲話唔再浸。所以買左返嚟嗰三支泡泡浴劑就係我全部擁有啦!


*♡♡小肥豬♡♡* | 20th Aug 2008 | 生活點滴 | (11 Reads)

今日返左小豬媽屋企食飯,仲約埋嘉汶表妹一齊返去添,因為........哈哈哈~~~我又有手信啦!

上個星期嘉汶表妹去左泰國旅行,當然去玩嘅同時,都有掛住我依個表姊,仲買左依個靚靚手袋俾我呀!

真係知的心意,鐘意埋D花花嘅嘢,好鐘意呀!真係要再次多謝嘉汶表妹。

除左嘉汶表妹嘅手信之外,前日返工都收到同事送俾我嘅手信,就係台灣好HIT嘅面膜....我的美麗日記。

哈哈...又有得扮靚啦!本身我都有用開佢,不過就唔係隻隻都有試過,今次真係正好等我試吓其他款式啦!

今個星期真係開心,收到唔同地方嘅兩份手信....哈哈哈~~

不過當收到依D禮物嘅時候,又係時間俾我問:幾時到我去旅行呀?好想去玩呀......幾時到我買返手信俾佢地呀?


*♡♡小肥豬♡♡* | 19th Aug 2008 | 靚太廚房 | (63 Reads)

今日又嚟煮飯仔,依一個就係我地嘅是日晚餐,都幾豐富呀!有一個餸仲係新學整呀!哈哈~~

首先就係一碟白灼生菜,唔落油,健康D呀~

之後就係今日個新菜式,腐乳炒雞

哈哈...其實依個餸係今日同小豬媽下午茶時,小豬媽提意我整,仲即時講一次點煮。

好在.....第一次煮都冇失禮,都幾好味呀~(又有人自己讚自己啦!)

雖然今日得兩個餸,不過兩碟都好大碟,我地都係食唔晒。所以我整埋聽日個午餐便當,真係好啦....因為我好耐都冇帶飯盒呀~

 

有朋友仔問我問個腐乳炒雞個煮法,所以就POST個食譜出嚟同大家分享吓啦~

材料:
雞 一隻(我依隻係新鮮雞嚟呀...多謝小豬媽提供)
腐乳 5磚(如果想腐乳味多重,可以落多少少)
薑片、蔥段  少許
水 少許
糖    少許 

作法:
1) 先將雞切件,加生抽醃半小時
2) 少許油炒香、薑片及腐乳
3) 炒香後放入雞件,炒至轉色
4) 加水炒至雞肉熟透,加入糖炒勻....食得啦!


*♡♡小肥豬♡♡* | 18th Aug 2008 | 好友與我 | (13 Reads)

今日放工後見時間尚早,所以就係屋企樓下個商場行吓。

知道有位BLOG友係依個商場開左間小小店,真係同我好接近哦,所以成日都想去光顧,順便探吓位BLOG友仔。不過行過兩次都唔見佢,所以都未去過。終於今日見到依位BLOG友仔啦......佢就係邱太啦!

一入到小小店,邱太已經見到我,仲知道我係邊個添,嗰吓都真係好開心,好似有人識咁....哈哈!

邱太真係好細心,第一時間就拎左我之前係佢個BLOG度睇中嘅長身T-SHIRT,之後介紹左好幾件靚衫俾我,仲任我試添。真係唔係幾好意思,好似有少少攪攪震咁。

除左邱太之外,仲有另一位姐姐(相信佢就係邱太嘅另一半A小姐),佢地兩位都真係好有心機教我點著會影得瘦D呀!

最後我就買左三件衫,邱太仲俾左個優惠價我,真係好抵,攪到我勁開心呀....

我地傾左一陣,影左一陣相,我就走啦!哈哈,希望佢地冇俾我嘅傻吓傻吓嚇親啦!

依三件就係我嘅戰利品啦~

首先就係一件長身T-SHIRT

之後就係一件長衫,襯褲好有型呀~

最後就係一條夏威夷長裙,我會留番生日先著....哈哈


*♡♡小肥豬♡♡* | 17th Aug 2008 | 生活點滴 | (16 Reads)

之前見好多BLOG友仔到已經去過MEGA BOX影奧運叮噹佈置(雖然已經改左名,不過我都係鐘意叫叮噹多D。),所以其實我去個目的都係去影叮噹啦~

一去到大堂,就見到好多佈置,都真係好得意呀!於是我又係咁不停影...影....影.....

除左依D佈景圖案之外,都有幾隻毛公仔佈置,不過我就覺得依幾個公仔好似唔係太靚,好似個個都斜斜地咁。

當我影相嘅時候,見到有隻人扮叮噹出嚟,雖然都唔係好靚,不過我都唔執輸,排隊影吓啦!

影完相就係行街街時間,不過MEGA BOX都真係行嘅商鋪唔多,所以都係行吓就算。

不過行行吓,又見到有叮噹佈置啦!

原來除左叮噹之外,MEGA BOX都仲有其他公仔嘅佈置,雖然唔知係乜名,不過都唔理,又去影啦!

哈哈...今日真係影左好多靚相,又買到好多戰利品,都真係勁開心呀~~


*♡♡小肥豬♡♡* | 17th Aug 2008 | 生活點滴 | (17 Reads)

今朝訓到九點半左右,突然有人按門鐘,仲按好幾次,所以就叫醒大肥豬起身去開門啦!

不過唔知點解,突然心入面突然有個諗發依位按門鐘嘅人仕會係奶奶,所以我都出埋廳度睇,點知.....真係奶奶到訪呀!

原來奶奶前日去左拜神,所以拎D拜過神嘅生果同埋涼茶上嚟俾我地。

雖然係俾人嘈醒左,但要奶奶親自拎野上嚟俾我地真係唔好意思呀!不過奶奶都好利害,都係嚟過我地屋企幾次,竟然識得自己上嚟搵我地。

坐左一陣,之後就我地就去姑奶屋企附近飲茶。飲完茶,佢地成班就上姑奶屋企,我同大肥豬就去拍拖去九龍灣行街街啦!

當我地行去過零食鋪時,見到入面有做大特價,有好多新產品,樣樣都好平、好抵,當然就係大入貨好時機啦!(買咁多糖,依次真係肥死啦~)

我地去到德福,一見到馬莎就入去睇吓有其他泡泡浴劑。嘩...依間馬莎大好多,有好多唔同香味,我地都揀左好耐,真係隻隻都好香。不過買咁多都用唔晒,所以最後就買左兩支先啦!(依兩支泡泡浴劑好香呀...不過唔記得左係乜香味添~)

之後我地就去宜家,原本打算買個飾物櫃,不過最後睇唔合心水,所以行吓就走啦~~

我地見有時間,見有穿梭巴士去MEGA BOX,所以我地下一個目的地就係嗰度。


*♡♡小肥豬♡♡* | 16th Aug 2008 | 好友與我 | (17 Reads)

嘩...哈哈~~~今日我又去左迪迪尼玩啦!大家唔洗問,我自己都唔可以即刻答到你地我去過幾多次(要睇番D相先知道)。不過有張AP,當然一有時間就去,唔好蝕抵嘛!

不過今日陪我入迪迪尼嘅唔係大肥豬,係一位都有AP嘅BLOG友仔...就係小茵啦!我地係上次飯局已經約好左去玩,於時就約左今日一齊向迪迪尼出發啦!

今日個天氣都真係非常好,不過咁好係需要付出代價....就係好熱,真係行幾步都出晒汗呀!不過都冇影響暢遊迪迪尼個心情。

其實我地今次個目的都係去影..影....影。首先當然要係城堡前影番張到此一遊嘅靚相先啦!

第一個目的地就係夢想花園,亦都係我最鐘意環節。我地將花園入面所以人物都影晒,好在都唔算太多人排隊,所以用左個幾鐘就影晒啦!

特別一題就係今日又俾我見到Eeyore,第二次見到佢。今日隻Eeyore好活潑,有好多得意動作,真係好可愛呀!

依張就係我今日至愛....

去完夢想花園,我又利用左我張生日Fasspast去左睇獅子王慶典,坐第一行啦!真係好正...好好睇呀!

睇完之後,我地又四周影相,平時我好少同D非公仔嘅人物影相。今次見唔係太多人排隊,所以都影左少少。

我地先後玩左Winnie The Pooh同埋巴斯光年個Game,好在有生日Fasspast,都唔洗排太耐。

係巴斯光年附近多左個新景點,當然唔放過,又影吓啦!

時間差唔多啦,我地去左睇水花巡遊。開頭以為我地個位係唔會濕身,點知原來我睇錯左,所以最後攪到都有少少濕身,不過都唔緊要啦....幾好玩呀!

之後,我地就去左睇金米奇Show,第一次坐第一行,真係超正。雖然坐第一行,但我唔係影得好相呀,因為佢地好少定定地企度,所以影得都唔係太好。不過真係好好睇呀~

為左配合奧運,迪迪尼都有個新活動,當然要去睇吓啦!

睇埋依個Show,原本想去大街影相,不過所有公仔都已經走晒啦,所以我地都離開迪迪尼啦!

之後我地出左旺角別府食野,當然我地又係邊食邊傾,仲傾唔停啦...哈哈~~我地真係乜都講,都好開心呀!

今日同小茵去玩又要佢破費添,因為今個晚餐係小茵請我,預早同我慶祝生日。另外又送左個靚靚Marie電話繩俾我。真係攪到我好唔好意思呀~

真係好鐘意呀,我之前都搵過幾間精品店都冇得買,多謝晒小茵呀~~哈哈!


*♡♡小肥豬♡♡* | 15th Aug 2008 | 生活點滴 | (24 Reads)

今日係小豬爸嘅舊曆生日,所以就係酒樓同一班親戚食飯啦!

嘉汶表妹同小豬爸舊曆生日係同一日,所以就同嘉汶表妹一齊慶祝埋。生日當然最重要就係切蛋糕儀式,依個就係LULU妹俾壽星嘅生日蛋糕啦!

係未切蛋糕之前,我同小豬媽就係生日蛋糕前玩吓,話晒我都係八月壽星嘛.....哈哈~

切蛋糕又係影相嘅好時機,首先就係同小豬爸&小豬媽影番張靚相啦!

之後就嚟留張全家幅啦~

食完蛋糕,就開席啦......今晚都真係幾豐富,我都食得好飽飽呀~

不過我地成晚個話題都係圍繞住奧運,仲一齊睇女排,睇到個個都好緊張添。

隨住中國女排輸左,我地就走啦!其實大家一早食完依個晚宴,只不過係想睇埋個賽果先肯走。

最後係度祝小豬爸~生日快樂,日日都開開心心,最緊要生意越來越好...YEAH~~

 


Next