香港新浪網 MySinaBlog
*♡♡小肥豬♡♡* | 29th Jun 2008 | 甜蜜生活 | (33 Reads)

話說尋日因為我喉嚨痛到出唔到聲,所以冇去到街街,好乖咁留左係屋企。不過因為喉嚨痛得好緊要,真係頂唔順,所以迫住要去睇醫生啦!

藍田D醫生我都唔係好識,之前都睇過一個,不過又好似唔係太好,所以就去左睇第二個醫生,試吓第二個會唔會好D嘛!

點知...睇完依個醫生,食左成日藥(食左四次左右啦),都完全冇改善過,喉嚨仲仍然咁痛,仲加埋又咳又勁流鼻水。尋晚直頭都冇訓過,成晚都痛醒,都係仲辛苦過之前呀。

今朝一早起身,大肥豬見我個情況真係差左好多,就建議我再去睇醫生(當然係去睇另一個啦~)今次睇依個醫生成日都見有好多人排隊,所以都估應該係幾好。

大肥豬一早就去幫我去排隊,到差唔多到我嘅時候就打電話叫我去睇醫生,之後仲陪埋我入去見醫生,基本上成個過程都係佢同醫生對話,我完全唔洗講野。

番到屋企食左一次藥,訓左一陣都可以話好左少少啦!

原來我尋日係睇左個黃綠醫生呀......真係好慘!好慘!好慘!好慘!

雖然我唔舒服,個人都忟忟地又唔開心。不過有一件事都令我好開心,就係大肥豬真係好緊張我呀!尤其係佢同醫生交談時,成日話我太太點點點.....我太太幾會好番,又成日問住我仲有冇唔舒服。真係病都病得有價值呀!哈哈~~


*♡♡小肥豬♡♡* | 28th Jun 2008 | 生活點滴 | (23 Reads)

唱K...我好耐都冇去過啦...對上一次都有成年啦!所以一早就約好左兩位靚太今晚去唱K,因為大家都好耐冇去過唱K,所以都好期待。

點知......我尋日開始喉嚨痛,把聲都沙沙地,真係唔開心,約好晒唱K先嚟攪D咁嘅野。原本我都唔理,打算照去,最多都係唱少少。

不過...我今朝一起身個情況真係唔係我想像咁,我把聲直頭出唔到聲,喉嚨痛到直頭想爆炸咁,所以唯有SNED個SMS俾我兩位靚太朋友,要取消今次個約會啦!唱K先嚟喉嚨痛,真係....攪乜呀!

我真係覺得自己好掃興,明明約好晒,大家都好有興致好期待咁打算去唱K,我一個SMS就取消,真係唔好意思...我自己都覺得好掃興呀....SORRY!

不過,我會好快好番,好快就可以再約過,到時真係可以唱番餐飽啦!哈哈~~~


*♡♡小肥豬♡♡* | 27th Jun 2008 | 生活點滴 | (20 Reads)

今日放工又約左小豬媽去食下午茶,不過除左我地兩個之外,今日多左一位稀客,就係LULU妹啦!

因為LULU妹隻腳受左傷,所以要休息幾日,佢悶左係屋企成日,所以小豬媽就帶埋佢上嚟食TEA啦!

我地食完TEA,見時間都早早地,所以就去行吓商場。

當我地行過一間鋪頭時,因為小肥媽睇中左對鞋仔,所以我地就入去試啦....點知著上腳又唔舒服,所以就冇買。

不過就係依個時候,我地就見到佢地有靚衫就整大特價,真係件件都平成大半。嘩...平咁多,又點會唔心動呀,最後我就揀左兩件靚衫啦!

依件粉紅色衫衫我一睇到就好鐘意,粉紅色..好SHARP呀..

另外依件係小豬媽幫我揀,依件就長身少少,我就貪佢可以著返工,都幾斯文呀!

哈哈..成日話要慳,不過見到靚衫有大特價又會抵受唔住就去買,依D係唔係就係女人呢!

好野...聽日去街街有新衫著啦!


*♡♡小肥豬♡♡* | 24th Jun 2008 | 生活點滴 | (14 Reads)

大肥豬嘅生日都已經過左十幾日,除左之前係迪迪尼酒店俾左個驚喜PARTY佢之外,都冇再送其他禮物俾佢啦!

係不知不覺間,我已經做左少少野,當係送俾大肥豬嘅生日禮物。

等左一段時間,今日終於都可以送份禮物俾大肥豬啦!

哈哈...其實大肥豬一直都叫我唔好送野俾佢,因為佢暫時都冇乜想要,叫我唔好亂買野,亂洗錢。

開頭我都係打算買禮物,不過諗諗吓....加上嗰排學校又有為捐款活動,所以就以大肥豬名義捐左少少錢,作為佢嘅生日禮物。一嚟又可以幫到人,另外又好似係為大肥豬積少少福,幾有意思呀!

大肥豬收到張收據時都好開心,仲話依份禮物好有意思呀!


*♡♡小肥豬♡♡* | 23rd Jun 2008 | 生活點滴 | (21 Reads)

好耐之前講過我地想換,上一期7-11換嘅BEAR手挽袋,不過因為錯失良機,搵左好多間都冇得換。

不過..我今日終於擁有左啦~~哈哈..真係勁開心呀!

真係要好多謝傻茄茄嘅幫忙,因為由我問大家仲係邊度見到時,傻茄茄已經幫我留意,係我完全放棄嘅時候,佢就話我知幫我搵到一個,真係麻煩晒呀!

所以今日放工就約左傻茄茄去拎依個靚靚袋。

因為之後要陪大肥豬去整嘢,所以就冇進行我地嘅飯局,下次一定要坐底慢慢傾呀!

哈哈..依家有左個靚袋,就可以方便D啦,唔洗左一袋右一人袋,尤其係買餸嘅時候,可以變番一個靚太啦!


*♡♡小肥豬♡♡* | 22nd Jun 2008 | 好友與我 | (21 Reads)

今日我地兩隻大小肥豬又去迪迪尼啦!哈哈...我地張通行証回本啦~~今次仲約埋大小M一齊去玩添!

我地一入到去,就當然去搵大街幾隻公仔影相啦!

首先就係夏日版米奇米妮,真係勁多人..我地都排左差唔多成四十分鐘先到我地,不過唔緊要,大家傾吓計,時間就好快過啦!

我地仲係等影相時見到幾個台灣明星,好似係惡作劇2吻嘅主角,開頭都唔肯定,到最後見到佢地走時有班FANS追,又近左少少見,所以都應該八九成係啦。我部傻瓜機太傻啦,所以影唔到佢地(唔知大M部機影唔影到呢?),唔緊要啦..我都唔係太鐘意佢地,都係鐘意米奇多D。

排到啦...我地四個人都影左好幾張,好在冇俾人話。哈哈~~

影完米奇見到DONALD & DAISY出左嚟,當然又係排隊影相啦!

影完依兩對公仔之後,都用左好多時間,所以我地就去玩GAME啦!

我地先向小小世界出發,之後就玩小飛像...POOR POOR再去坐森林船仔,總之就係連玩幾個GAME啦!一邊玩GAME,當然又係影相時間啦~~哈哈..因為我地都好鐘意影相嘛!

時間都差唔多到今日個重點節目...水花巡遊。係等巡遊嘅時候,我都去左買D凍野降溫,因為真係好熱呀!

開始巡遊啦...原本都打算用部傻瓜機影吓相,不過因為我地係個濕身區,真係唔好睇少佢地,D水真係會噴埋嚟,所以影左兩架車之後,要收埋部傻瓜機啦!

個水花巡遊真係好好玩,我地都唔係企得咁前,見到有水噴嚟都避開,但都濕左呀!哈哈~~

之後我地知道差唔多時間史迪仔會係我地附近出現同人影相,所以我地就係度等。

點知就係依個時候見到KEKKA,我地就嚟左一張三大靚太嘅合照留念啦!

再等多一陣,史迪仔就嚟啦...上嗰幾次都唔見佢,所以今次見到佢特別開心呀!

影完相,我地又繼續去玩,又去睇GOLDEN MICKEY,之後..見仲有時間就再去小小世界玩多次。今次記得係度影相啦!

係影緊嘅時候,剛剛報時係6:15,睇到個鐘係6/15,好似係表示大肥豬生日咁,所以就即刻叫大肥豬影番張相。

原本打算去玩阿古同史迪仔,不過就過晒廣東話嘅時段,冇得睇呀!

之後我地再行多一陣,就去食晚餐,睇埋煙花先離開迪迪尼呀!

好耐都冇試過咁夜先離開迪迪尼,今日真係玩得好開心...真係盡興而歸呀!


*♡♡小肥豬♡♡* | 20th Jun 2008 | 生活點滴 | (17 Reads)

今日係屋企信箱收到張字條仔,話我地有份大型包裹寄俾我。係我估估吓嘅時候,就去左管理處拎左我地個包裹,依份就係啦...

返到屋企即刻拆左佢,原來就係兩本DARIZI MAGAZINE

打開嚟睇....睇左幾頁之後,終於......見到自己張相登左係本雜誌入面呀...仲係 NO. 1呀,哈哈~~

個感覺真係好攪笑,見到自己張相係雜誌上出現,雖然係少少的一張相,不過都真係好開心呀!

點解佢地會登我地出嚟?

就係因為佢地個編輯SEND左個留言俾我,請我推介吓佢地個網頁,如果好...就會登出嚟。

哈哈...終於是我就貪得意寫左少少心聲俾佢地,之後一路都冇再收到佢地通知,都估唔得啦!

估唔到今日收到本雜誌,又真係登左,真係好開心呀!

大家有興趣都可以去我個婚網睇吓http://www.darizi.com/hk/blog/yanyan_hinghing/,有興趣都可以好似我咁,用佢地設施,整返個婚網呀!


*♡♡小肥豬♡♡* | 19th Jun 2008 | 甜蜜生活 | (40 Reads)

當我睇緊電視嘅時候,大肥豬就用依個時間用上網CHECK E-MAIL同睇報紙。

點知當我睇嘉穎睇到好入神時,大肥豬突然好嚴謹同我講~~~請留意以下對話!

大肥豬:老婆,聽日你會有幾千個朋友嚟香港呀!
小肥豬:咩呀?你講乜呀?

大肥豬:我話你有四千幾個朋友嚟香港拍賣呀!
小肥豬:咩朋友呀?都唔知你講乜...好快D講清楚呀?

大肥豬:你D朋友呀.....
小肥豬:(?????)

因為完全唔知佢睇緊D乜,一時見佢睇YAHOO NEWS,一時見佢睇E-MAIL,有又時見佢睇緊我個BLOG,所以都唔知佢仲乜冇端端咁講,所以就即刻衝去電腦睇佢做緊乜。(開頭係以為我個BLOG有乜特別留言令到佢咁講。)

終於知道係乜事啦...原來大肥豬睇緊RTHK新聞,佢見到以下新聞....

....

........

..........

..............

http://www.rthk.org.hk/rthk/news/expressnews/news.htm?expressnews&20080619&55&499425


明 日 約 4200 隻 活 豬 可 供 拍 賣
2008-06-19 HKT 21:03
食 物 及 衞 生 局 發 言 人 表 示 , 今 日 運 抵 屠 房 的 活 豬 數 目 為 3967 隻 , 當 中 3763 隻 為 內 地 進 口 活 豬 , 204 隻 為 本 地 豬 。 活 豬 批 發 價 介 乎 每 擔 1333 元 至 1750 元 , 平 均 價 為 1484 元 。 國 家 商 務 部 預 計 , 明 日 約 有 4100 隻 內 地 進 口 活 豬 , 而 本 地 豬 約 有 100 隻 , 明 日 可 供 拍 賣 的 豬 隻 合 共 約 有 4200 隻 。

 

我一睇到依篇新聞,大肥豬即刻笑唔停口。我就當然即刻勁打佢啦...咁衰...玩我!真係唔知俾佢笑死定激死呀!

不過,佢地唔係我朋友,係大肥豬好友就真.....話我係豬,佢自己咪又係一隻名正言順嘅大肥豬.....哈哈哈!


*♡♡小肥豬♡♡* | 18th Jun 2008 | 甜蜜生活 | (28 Reads)

今日係放工時,收到大肥豬電話問我離開左學校未,講左幾句,就好似收唔到咁,仲收左我線添。打番電話俾佢手提,又冇人聽。開頭都有少少擔心,不過當打去公司冇人聽時,就估佢可能做野嘢,所以都放心晒。

之後就執埋d野,準備放工啦!

當我準備離開學校時,當然又再打電話俾大肥豬,點知..又係冇人聽。不過係依個時候,學校對面有一個男人企左度,睇睇吓好面善呀...原來就係大肥豬,佢嚟接我放工呀!嘩...真係勁開心呀!

原來大肥豬今日幫公司去左灣仔整文件,早左完成又唔洗返公司,所以就嚟接我放工,俾個驚喜我呀!

當我問佢仲乜唔聽我電話時,佢就好鬼馬咁話係突登唔聽,費時俾我知道佢係邊。哈哈..真係唔知好嬲定好笑,又唔知唔聽我電話會令人擔心呀!

之後我地就返屋企,我就食左藥要休息一吓,大肥豬就睇電視。到差唔多食飯時間,大肥豬又俾左一個驚喜我啦!

原本打算等我休息一陣,就煮麵俾大肥豬食。點知大肥豬已經係我休息時,負責煮好左我地嘅麵餐,真係又一件令我開心嘅事。

哈哈..今日真係開心事一浪接一浪,剛剛大肥豬又搾左一杯鲜搾橙汁俾我(話飲多D橙汁對身體好D呀),真係勁歡喜呀!

今日真係勁開心,覺得自己勁幸福,大肥豬真係好鍚我呀!


*♡♡小肥豬♡♡* | 17th Jun 2008 | 生活點滴 | (18 Reads)

首先多謝各位嘅關心,我因為皮膚有毛病(放心..唔會傳染呀!),所以有少少唔舒服,已經去左睇醫生啦!不過因為食藥都食到個人吽吽地,所以都冇乜心機呀!

今日當我放工返到屋企附近條天橋,係我一上到天橋時,已經有一個女仔走埋嚟(係可以話衝埋嚟)我身邊。原來佢係某間減肥公司嘅職員(好似胡杏兒嗰間),一見到我就不停sell我減肥course,又話點有效....點成功。

我當然唔理佢,話唔需要,仲行快多兩步啦....點知佢又跟我行快,完全keep住我個步速,邊行邊sell,我已經講過好多次唔需要,佢都好似聽唔到咁...仲不停sell(基本上係重覆內容)。自己已經唔舒服,加上又俾佢煩住,真係攪到成個人忟晒呀。

最後我就唔理佢一支箭咁走入商場,終於擺脫左佢啦!

我都好明白佢係職業所需去sell人,不過又洗唔洗sell得咁緊要呢。我已經講左好多次唔需要,仲不停咁sell,佢嘅做法只會令我產生反感呀!

乜我真係好肥得咁利害....好需要佢地服務咩???(真係嬲嬲地呀!)


*♡♡小肥豬♡♡* | 16th Jun 2008 | 靚太廚房 | (55 Reads)

今日真係冇乜心機,所以都諗唔到煮乜晚餐好,加上又有少少唔舒服,冇乜胃口食野,所以就整左一個懶惰的晚餐啦!

依個就係我嘅晚餐~

今日都只係煮左一個瘦肉粥,我都係第一次煲粥俾大肥豬食,好在...佢都話OK好味!

為左怕大肥豬只係食粥唔飽,所以係返屋企之前去左吉之島買左一盒炒麵同一盒炒腸粉。雖然係現成,不過我都係食之前整熱左先食,都算有做過野呀!

今日都真係覺得自己懶惰左少少,好在大肥豬唔介意。大肥豬仲好好咁,知道我唔舒服,佢就幫我手洗埋D碗,真係好感動呀!


*♡♡小肥豬♡♡* | 15th Jun 2008 | 生活點滴 | (16 Reads)

今日係大肥豬嘅生日,往年都會係我地二人世界,去吓街街食飯嚟慶祝。

不過今年就有D唔同啦,因為今年又係父親節,所以大肥豬就建議同老爺奶奶參加嗰D屋村舉辦嘅遊船河,同老爺奶奶去玩吓!佢生日哦...當然冇所謂啦...最緊要係大肥豬開心。

今日一早去觀塘碼頭等上船啦!不過因為我地早左去到,所以就係碼頭度影吓相啦~

等左一陣,我地就係搭依隻船仔,進行我地嘅環港遊啦!

講真..因為係屋村舉辦關係,都真係幾多公公婆婆,所以我地上到船都等左好耐先開船呀!不過唔緊要啦,我地都利用依個時間影吓相,都唔悶呀!

真係要講吓依張相,因為依張相係老爺幫我地影,佢真係第一次用相機影相呀!哈哈...都真係唔錯呀~

終於等到開船啦....船開左一陣,我就同大肥豬上左船嘅上層影吓相,不過唔知點解,個天都唔係特別光,但好刺眼,對眼都睁唔大呀,所以都影得唔係好靚,好多都矇晒眼呀!

不過個VIEW又真係唔錯,有D海風吹埋嚟,好舒服呀!

今日唯一同大肥豬影嘅合照~~

之後我地就轉去室內影相,起碼隻眼仔可以睁大呀!哈哈~~

影左一陣相,就返去個位陪番老爺奶奶啦!係依個時候,大會就安排左抽獎同一D小遊戲。我地都有玩,但就抽唔中獎,不過大肥豬玩BINGO就中左$100百佳COUPON,都好啦,當有個意頭嘛!即時將個COUPON送左俾奶奶啦!

玩完就係食自助餐嘅時間啦,但我就覺得佢地D野食麻麻,不過百幾蚊就係咁,唔好要求得咁多呀!

依個時候,可能浪都幾勁,隻船都幾飄,所以奶奶暈船浪呀!我自己都有少少暈,不過就唔想大肥豬要擔心兩個,所以我都係落船先同佢講呀!

食完個自助餐,原來已經係差唔多要回程啦!最後三點多就落船,咁就玩左一個下午啦!

我地送左老爺奶奶返屋企之後,就返自己屋企休息。原本都打算係食飯時間同佢地食飯,不過奶奶想休息多一陣,唔同我地食。

最後我就同大肥豬落左屋企樓下間元祿食壽司,慶祝佢嘅生日啦!

雖然今個生日係平平淡淡,不過大肥豬都話好開心!


*♡♡小肥豬♡♡* | 14th Jun 2008 | 生活點滴 | (19 Reads)

今日係小豬媽嘅生日,所以我地今晚就去左酒樓同小豬媽慶祝啦!

今晚除左我地嘅家人之外,小豬媽仲請左佢一班朋友仔嚟,所以大大話話都有成三十人,真係好熱鬧呀!

生日咁緊要,當然唔少得切蛋糕儀式啦~~

同壽星媽影張相先~

除左今日係小豬媽生日之外,聽日就係大肥豬同埋我表弟嘅生日,所以小豬媽叫埋佢地一齊切蛋糕啦~

最後當然要同一班朋友仔影相啦~

今次個蛋糕係唔係好靚呢?係LULU妹送俾小豬媽嘅生日禮物嚟呀

食完蛋糕就差唔多開飯啦!係未食飯之前小豬媽就四圍同佢地朋友仔影相,我當然又要影埋一份啦~~

係成晚都想同我契大佬個仔影相,不過佢就有少少鬧情緒,係開始時完全唔睬我地,都後其先肯同我地玩,同我地影相。係差唔多走嘅時候,仲同佢玩到傻左呀!

小豬媽冇講,不過我都知佢今日係勁開心...有咁多朋友仔同佢慶祝生日,一定係好難忘呀!

見到小豬媽咁開心,我自己都會開心埋一份呀!


*♡♡小肥豬♡♡* | 14th Jun 2008 | 生活點滴 | (13 Reads)

今朝九點幾就俾醫院打電話嚟嘈醒。開頭都有少少緊張,因為睇電視都有講,醫院打嚟都唔會有好嘢啦!

不過..好在...原來醫院打嚟俾通知我地奶奶可以出院啦!真係開心啦~~

因為大伯話唔洗咁多人去醫院接奶奶,所以我地就留係屋企等電話,到差唔多時間就去奶奶屋企等啦!

奶奶係一個好傳統嘅人,認為去醫院依D地方都唔係好嘅地方。所以係未返屋企就去左髮型屋洗頭,仲SET左一個靚頭,之後仲用D葉仔沖涼。

等奶奶整好晒野之後,我地就同佢去左食下午茶。陪佢傾左一陣,跟住我地就走啦!(因為今晚有特別節目)

見奶奶依家咁精神,醫生都話奶奶個情況係OK,都放心晒啦!

不過奶奶真係好攪笑,因為我地買左飛聽日下午同佢、老爺去遊船河食自助餐。當大肥豬問奶奶聽日係唔係仍然去遊船河時,奶奶竟然好緊張咁話:仲乜唔去呀?有得去當然去啦!

可能奶奶係醫院悶左兩日,係時候要去玩吓先得啦!


*♡♡小肥豬♡♡* | 13th Jun 2008 | 生活點滴 | (13 Reads)

首先真係要多謝各位朋友仔對我奶奶嘅關心,睇到你地嘅回應都真係好開心。多謝晒你地呀!我會向奶奶轉違你地嘅心意呀!

講番我奶奶今日個情況先。

因為我今日要位OT到七點,所以都去唔到醫院睇奶奶,所以依個任務就由大肥豬負責啦!

大肥豬探完奶奶返嚟,就話大致上一切都正常,但因為剛剛轉左新藥,所以要睇下反應,暫時唔可以出院。

要等明天大伯見完醫生之後,睇吓個情況,如果冇問題就可以出院啦!

希望乜問題都冇,可以出院啦!


*♡♡小肥豬♡♡* | 12th Jun 2008 | 生活點滴 | (27 Reads)

係仲有半個鐘就放工嘅時候,收到大肥豬阿哥打嚟(因為大肥豬冇帶電話返工,所以將條線飛左去我手提度),佢語帶緊張話奶奶入左院,仲話低晒床位,叫我通知大肥豬去睇奶奶。

當我聽完個電話後,個人都開始有少少緊張,因為又唔知奶奶係乜事,個情況又去到邊。大肥豬又冇帶電話,加上今日又出左外做野,又通知唔到佢,所以成個人都急急地。等到夠鐘放工就走人,趕去醫院睇吓乜情況。

去到醫院因為未夠鐘到探病時間,所以都等左一陣先可以入去睇奶奶。係依個時候,大肥豬終於到打俾我,我當然就叫佢即刻嚟醫院啦!講完俾大肥豬,好似鬆左一口氣咁!

終於夠鐘探病,我就即刻去左奶奶個床位睇佢啦!見到奶奶座左係床度,都OK精神,我都放心左D。陪左奶奶一陣,大肥豬同大伯都分別嚟到,咁我地就一齊陪奶奶傾吓,等佢冇咁悶。

係傾計時,原來今次奶奶入院係因為今日下午做身體檢查時,發現心律有少少唔正常,所以醫生就建議入院做一個全身檢查,睇吓係乜問題。

聽日先開始抽血...驗野..等等,暫時都未知係邊方面出現問題,所以都未知幾時可以出院。不過見奶奶都精神,我相信都應該OK冇事!

希望驗出嚟係冇乜大問題,奶奶可以快D出院啦!

題外話:
今日係我準備入醫院時,竟然俾我撞到一位BLOG友仔,就係ii。當我見到佢時,都覺得依位朋友你好面善,不過一時間又諗唔到佢係邊個。最後都係要ii先作介紹,我先知道...真係唔好意思啦...有少少失禮添!


*♡♡小肥豬♡♡* | 9th Jun 2008 | 好友與我 | (28 Reads)

南生圍聽就聽得多,睇相都睇過好多,不過自己就未去過。

成日都好想去,但我地又唔識路,聽人話係冇車直到目的地,所以我到依家都係未去過。不過..今日終於都去到啦!

今日我地又參加左M&M攝影團,一齊去南生影相。有大小M帶路,所以好快又方便就去到目的地啦!

一去到目的地,就不停係咁影..影...影,天氣真係好好,完全係藍天與白雲,所以成VIEW都好靚呀!

行到一半見到間士多仔,所以我地就入去休息一陣,不過嗰度個環境都幾有特式,又係一個影相嘅好地方呀!

入到南生圍,當然要去個必到點,小木橋啦,成日見好多人係度依個位影結婚相,所以我地都影左好多相呀!(幻想吓自己著緊婚紗嘛!)

最後,我地仲去埋片大草地影,影出嚟綠悠悠,都幾靚呀!

係一片愉快嘅心情吓,加上相機滿滿(因為我地真係影左好多相,我部傻瓜機都影左二百幾張呀~),我地就離開南生圍。

之後就去左元朗市中心嘅酒泉食日本野,依間鋪頭又真係幾好,樣樣野都好大碟,又抵食,所以我地都食到好飽飽咁走人....

今日真係好開心,真係多謝大小M帶我地去左一個咁靚嘅地方,又幫我地影左咁多合照。原來有朋友一齊影相,影合照係方便好..好...好多呀!HEE HEE,幾時我地再一齊去影相呀?

PS:大家有冇留意到有幾張相係長方形?
就係因為大肥豬將部傻瓜機教左做16:9嚟影,開頭我都唔鐘意,叫大肥豬唔好攪攪震。不過原來有好多張佢都偷偷地教左,影出嚟又真係幾好哦,可以影個境寬D..靚D。今次又真係時候讚吓佢啦!


*♡♡小肥豬♡♡* | 8th Jun 2008 | 靚太廚房 | (59 Reads)

上次去左學整曲奇之後,一直都好想自己係屋企試整。不過成日都抽唔到時間,今日終於都有機會啦~~

今晚要去奶奶度做節,所以就可以趁依個下午有時間就整曲奇啦!

首先我就整左依個朱古力杏仁曲奇,依住MISS個食譜,係廚房閉關左一段時間,終於整好左個麵團,可以入爐焗啦!

唔知係唔係我切得太厚,一D都唔似曲奇....一舊舊咁。

好難睇嘅曲奇終於出焗

試左一小塊,得出個答案係....失敗!大肥豬話個口感唔似係曲奇,同埋個朱古力味好似濃左好多,唔好味!

見都開左個焗爐,所以都整埋牛油曲奇。

可能我個喞咀唔係幾得,所以整到佢地個形式唔係幾好,都細細粒咁,都唔係好睇到個花呀!

出爐啦~~

出奇地..又整得幾好味,個口感都OK,不過就係有少少燶燶地,但我都覺得已經成功左一半啦!

唉...都未算完全成功...又失敗,都唔知係乜問題,我都依晒MISS個程序嚟整啦,究竟我係邊方面出現問題呢?

真係對整曲奇冇晒信心呀!次次都失敗.....


*♡♡小肥豬♡♡* | 7th Jun 2008 | 生活點滴 | (8 Reads)

依幾日成日都係電視睇到迪迪尼個小小世界嘅廣告,真係唔明白點解佢地依家先出廣告,好似遲左少少哦~~

我對依個新廣告就唔係太鐘意,唔係咁鐘意佢將首好好聽嘅『小小世界』改成左一個好ROCK 版,好似同成個環境唔多MATCH,都係原本嗰首好聽好多~~

不過睇依個廣告我會攪到我好想去迪迪尼!我都真係中左迪迪尼毒...仲要係中毒太深啦!哈哈~~

睇左好多次,都睇唔到唱歌嘅三個女仔係邊過,如果有朋友仔知道就話我聽啦~


*♡♡小肥豬♡♡* | 5th Jun 2008 | 生活點滴 | (15 Reads)

今日係屋企煮飯仔,七點半左右就可以開飯啦!

由於都係煮嗰幾樣餸,所以冇POST上嚟,等我學煮多D其他新餸先POST啦!今日都食得好飽飽呀....

不過唔知點解睇睇吓電視,突然間好肚餓,好似個胃完全空空嘅感覺。

開頭都唔打算食野..咁夜食野好易肥嘛!不過真係頂唔順(大肥豬係度引誘我食野),所以最後大肥豬就整左個杯麵俾我。依個杯麵仲係今日大肥豬買雜誌送呀!

原本係打算同大肥豬兩份食,食少少都唔會太肥,又可以有少少野食落個胃度會舒服D,點知..食吓..食吓,成碗麵俾我食晒,自己都覺得好過分呀!

弊啦...都唔知係唔係生大食積,食咁多野....

成日都話要減肥,但又不停咁食嘢,唉..想減肥都難啦!

依家都覺得自己肥左好好多,真係要的起心肝迫自己唔好食咁多野先得啦!努力呀....


Next