香港新浪網 MySinaBlog
*♡♡小肥豬♡♡* | 31st May 2008 | 生活點滴 | (18 Reads)

之前見匯豐信用咭又有PROMOTE,新申請有相機送,所以又發揮師奶仔本色去左申請。雖然自己都有相機,不過總係有優惠唔好放過嘅心態。

今日大肥豬放假就去左幫我去拎依份迎新禮品啦!

個外型都幾好,手感都唔錯,佢個幕都OK大,FUNCTION都好似幾多,都好似都幾好咁。但就因為免費關係,冇其他顏色揀,只係得銀色,如果有粉紅色就好啦,一定靚爆呀!

哈哈...依家充電中,留番星期日去街街試機!


*♡♡小肥豬♡♡* | 30th May 2008 | 生活點滴 | (15 Reads)

每年小豬媽生日,我都會送嗰年嘅生肖金擺設俾佢,唔覺都已經送左十隻啦!

小豬媽六月中生日,我地見D金價依幾日回落左少少,加上大肥豬今日又放假,所以今日就同小豬媽一齊去左金鋪,預早送生日禮物俾佢啦!

去到金鋪,真係可以選擇嘅唔多,一係就好細隻,一係就隻老鼠仔唔可愛,所以我地三個人都睇中左依隻添,仲好快咁決定買依隻呀!

依隻又OK可愛啦,仲拎住一桶金,幾好意頭呀!

 


*♡♡小肥豬♡♡* | 29th May 2008 | 靚太廚房 | (34 Reads)

今晚大肥豬又要OT,九點幾鐘返屋企,所以我就等埋佢返嚟先食我地嘅晚餐。

就係咁...所以我都煮左烏冬麵加碟菜,簡簡單單咁啦,因為晏左食飯,唔好食得太飽嘛!

不過...我今日除煮左簡單晚餐之外,我仲整多左個甜品。話時話,依個甜品都用左我好多時間呀!

因為我前幾日煮西米露時仲有一大包,開左我又唔想浪費,所以尋日就麻煩左我個好同事糖糖幫我買紅豆蓉同借D碟仔俾我,今日一返到屋企就整依左個紅豆西米糕啦!

整呀整...終於都浸好左西米,加埋紅豆蓉,鋪好晒準備蒸啦!

因為第一次整關係,我唔知幾時先熟,所以都企左係個爐前睇火,真係好鬼熱呀!

蒸左好耐...終於都蒸好啦!紅豆西米糕出場啦....個買相都好似幾好咁哦~

第一個完成作品當然係俾大肥豬食啦,不過佢都未係出面食過,所以唔知同出面有乜分別,但就話淡左少少。真係有少少失敗添....下次要再努力先得!

唉..仲諗住拎D俾同事食,都係唔好啦...等我成功左先啦,唔好嚇親佢地呀!哈哈~~


*♡♡小肥豬♡♡* | 29th May 2008 | 生活點滴 | (13 Reads)

今日同放工又約左小豬媽飲下午茶,當我一見到小豬媽時,就收到兩份禮物。

依兩份禮物就係我個嘉汶表妹(即我個伴娘仔~)上星期去日本旅行時,買俾我嘅手信。

哈哈...真係好開心,估唔到表妹仔去旅行到有掛住我。

返到屋企第一時間睇吓我嘅禮物,首先就一個好靚靚嘅玉桂狗小食包,個袋真係好靚呀!

之後就仲有一盒日本空運到港嘅士多啤梨,頭先偷食左一粒,真係好甜呀!

係度真係要同嘉汶表妹講句:好鐘意,多謝晒你呀!


*♡♡小肥豬♡♡* | 28th May 2008 | 靚太廚房 | (34 Reads)

今日又嚟煮飯仔啦~~

煮多幾次餸,就真係開始明白原來諗『今晚食乜餸』都真係幾頭痛。想餸多D唔同種類嘅野,不過識煮嘅野又唔多。當諗好左煮乜時,又會因為去到街市見到想買嗰樣野唔靚,唔買..又要即時諗過第二樣。

原來買餸煮飯都係一種學問,都真係有排學呀!

好啦..講番今晚餐飯先。因為上次開左半盒日式咖哩,為左唔好浪費,所以今日又煮日式咖哩啦!

不過聽左上次大肥豬嘅意見,今次我就煮日式咖哩雞扒。

大肥豬話好味,個口感比雞翼好,可以啖啖肉呀!

另外就係清炒黃芽白

不過唔知點解我買左兩粒黃芽白,煮左之後變左咁細碟!

我仲整多左D餸留左做明天個LUNCH BOX呀!哈哈..好耐都冇帶飯,又可以慳番少少啦!


*♡♡小肥豬♡♡* | 27th May 2008 | 靚太廚房 | (47 Reads)

今日大肥豬要OT都成九點幾,所以我自己就返左去小豬媽屋企食飯。不過我食完飯就早左少少走,因為我有一個重要任務呀!

下午當我打電話問大肥豬要唔要煮D野俾佢食時,佢就話開OT前會食左野先,不過返嚟有特別野食就好啦!

係電話度我當然話唔彩佢,但其實都開始諗整乜俾佢食呀!

突然間諗起之前買左包西米,所以我就決定整一個簡單嘅糖水~~椰汁西米露。

不過我都係第一次整,所以都唔係太識。好在...我有小豬媽教路,聽落都好似好易,所以放工陪小豬媽買餸時買埋我所需要嘅材料啦!

一返到屋企就即刻開始煲西米....煲椰汁....希望可以係大肥豬返到屋企時完成,俾個驚喜佢呀!(為左要睇火,我都冇乜點睇電視呀!)

經過一輪努力,我嘅愛心西米露完成啦!

大肥豬見到就當然好開心,大讚好味,仲食左兩大碗呀!我地仲留左兩碗聽日凍食....真係正呀!

雖然係簡簡單單,但見大肥豬食得咁開心,我自己都好開心、好有滿足感。真係好有動力去學整多D野呀!


*♡♡小肥豬♡♡* | 26th May 2008 | 甜蜜生活 | (25 Reads)

去完迪迪尼,我地就去搭七蚊巴士去迪欣湖啦!真係唔抵,車程唔洗三分鐘,就去到目的地。依程車就真係貴,不過冇法啦...邊個叫我地懶唔行去呀!哈哈~~

今次去迪欣湖嘅目的就係去玩個腳踏船。因為之前CHECK過原來我張全年通行証係可以免費租用,有優惠當然唔執輸,所以一去到迪欣湖就即刻去玩啦!

係未上船之前就先著救生衣



著完救生衣,聽救生員講吓一般安全措施同教我地操作船仔,之後就上船啦!真係都幾緊張,因為我係第一次玩呀!

一上到船仔就用力咁踏都真係好倦,不過又真係勁好玩呀!

我地仲踏到去湖中水個噴泉附近,個噴泉真係勁,D水花飄過嚟,攪到我成身濕哂。大肥豬仲話要玩幾次飄水,所以我成個頭都差唔多濕晒,不過個感覺又真係勁正,勁好正呀!

踏到好倦,我地就係個湖中心飄浮,慢慢感受吓D湖光山色,又影吓相啦!

我地都係個湖玩左成個鐘,雖然係好倦,成對腳都好似冇晒力咁,不過又真係勁好玩。大肥豬仲話玩得好開心添!

原本打算玩完船仔四處影相,不過我地真係用力過度,真係好倦,所以冇去影,搭車走啦!下次先再去影相啦!

開頭都以為只可以免費一次,一問之下,原來張全年通行証係可以成年免費租用,咁我地下次去完迪迪尼,又可以有多一個節目..就係嚟玩腳踏船啦!


*♡♡小肥豬♡♡* | 25th May 2008 | 甜蜜生活 | (22 Reads)

原本今日有野做,不過臨時取消左,見有時間又諗唔到有乜特別地方想去,所以我地又去左迪迪尼啦!(哈哈~~我地張全年通行証要回本嘛!)

不過...當我地搭地鐵去到迪士尼站時,突然間落好大雨,真係好驚要即時要回程。大肥豬話應該係過雲雨,建議我地係迪士尼站時等左一陣先再決定走唔走。

好在..我地等左十分鐘左右就停左雨啦!我當然即刻出閘,衝入迪迪尼啦!哈哈~~

雖然已經停左雨,不過間中都總係有少少毛毛雨,可能因為咁..今日成日都冇乜人,真係未試過係大街影相冇其他人呀!



一入到迪迪尼,當然第一時間去同公仔影相啦!不過..我又係見唔到MARIE~~~唉!算啦..已經放棄啦!

可能落雨關係,真係冇乜人,我地係影公仔花園唔洗半個鐘就已經影晒咁多隻公仔,真係未試過。每個公仔都影左幾張,冇人吹你影快D,個感覺真係勁正...我仲同米奇影左兩次呀!哈哈~~

影完相就當然去玩GAME啦!我地今次又有新嘢玩,就係依個哈囉阿古!

開頭我都唔知已經出左依個GAME,見有其他人行去就跟住行,原來就係去玩個GAME,依個就同史迪仔個GAME差唔多,都係一個玩互動嘅,都OK幾好玩呀!大肥豬仲俾阿古捉左做訪問添。哈哈~~

之後我地就去玩SPACE MOUNTAIN,唔多人排隊,我地仲連續玩左兩次,真係勁好玩呀!

當然我地又再去玩小小世界啦!真係勁正...我地包船呀!哈哈~~今次我地又有新坐法,就係我坐第一行,大肥豬坐第二排,咁就可以影到多D靚相啦!哈哈~

玩完出嚟大肥豬就買左杯可樂冰俾我飲...解凍呀!

真係開心到飛起呀!哈哈~~

 

因為成日都冇乜人,好快就玩晒我地想玩嘅GAME。所以就去四圍影相,不過我地搵唔到人幫我地影合照,但就好多都係單人相(其實都係得我一個影。)我影左好多單人相,仲學人擺POSE添~~

最後我地又行精品店,又見到有T-SHIRT做半價,所以我地又買左兩件情侶裝,留番下次再去迪迪尼著呀!

行完街街之後,我地就早早地離開迪迪尼,再向迪欣湖出發啦!


*♡♡小肥豬♡♡* | 24th May 2008 | 生活點滴 | (21 Reads)

前幾日返小豬媽屋企食飯,唔覺唔覺竟然俾我攪到係N年前,小豬媽帶我去影影樓輯相嘅底片。

依一輯影樓相係我十八歲生日時小豬媽送俾我嘅生日禮物,我仲記得當時係剛剛係香港開始興起去影樓,所以影依輯相都幾貴吓呀....諗番起都幾肉痛呀!

其實我一直都KEEP得個菲林幾好,不過為左可以再保存好少少,我拎左去SCAN左做VCD,希望可以再KEEP得好D嘛!

話晒影嗰時都係青春美少女(真係嘔..哈哈!),又係一個重要嘅年歲相...十八歲...成年啦!哈哈~~

見放左入電腦,就俾幾張大家睇啦~~

唔睇唔知...都已經係N年前嘅事啦!自己睇番都有少少驚嚇,所以唔敢放太多出嚟(怕大家太驚訓唔著呀!),每個LOOK一張啦!

唉...真係時間令人有老了的感覺呀!


*♡♡小肥豬♡♡* | 23rd May 2008 | 生活點滴 | (20 Reads)

今日分別收到兩個朋友仔唔係幾好嘅消息,聽完之後都真係....唔開心。

雖然件事唔係發生係自己身上,但唔知點解一聽到個心總係戚住戚住,個心又真係唔係好舒服。

我係一個不善言語嘅人,自己又唔知點幫佢地好,好怕會講錯嘢,明明想安慰開解佢地,點知又令到佢地更加唔開心....都真係唔知點好啦!

依家唯一可以做就係靜靜地坐埋一邊,唔好問...當冇事發生,等待需要時盡我能力去幫啦!

真係希望依兩位朋友仔嘅情緒可以好D,件唔開心事可以快D離開佢地....可以開開心心咁過每一日!


*♡♡小肥豬♡♡* | 21st May 2008 | 生活點滴 | (21 Reads)

今日一朝返工就真係激死我....攪到成朝都真係完全冇心機.....仲乜次次都係我哦!

學生唔舒服,請家長嚟學校接...有錯嗎?
點解好似講到我好似趕個學生走咁,唔舒服當然要返屋企休息啦....我又唔係醫生,點知個學生係唔係嚴重,學生有事當然要通知家長啦!一間有乜事就又係我有問題....我都係職責所在...有錯嗎?

學生冇返學...我打俾你...有錯嗎?
我唔打俾你,我又點知個學生真係有事唔返學定係自己途學呀?我都係工作上需要先打俾你地,仲乜要講到好似我打嚟嘈醒你咁呀!我都係工作上需要....有錯嗎?

我都知我嘅人工有三分一係包受氣,如果真係我有問題,我OK囉...不過我都冇做錯...仲乜次次都係我呀?好唔開心....


*♡♡小肥豬♡♡* | 19th May 2008 | 生活點滴 | (9 Reads)

中國國務院昨宣佈,今日起一連三天為全國哀悼日,全國及駐外機構下半旗,今日下午2時28分全國默哀三分鐘!

希望大家能參與一同為四川大地震遇難同胞默哀三分鐘。

天災無情,人間有情,活於幸福者,更應珍惜所有。

救助四川大地震同胞的捐款資料:

請大家幫忙將以下每個慈善機構捐款方法的圖檔廣傳開去,方便更多善長可以捐助中國受難同胞

有錢出錢  有力出力

              













以上各個慈善機構的戶口資料均在其網站節錄

如對捐款方法有疑問

請到各大慈善機構網站了解更詳盡資料

希望大家盡能力踴躍捐輸 為災民出一分力 

*♡♡小肥豬♡♡* | 18th May 2008 | 生活點滴 | (19 Reads)

尋晚係奶奶去完泰國旅行返香港,所以今日就陪奶奶飲茶。

其實飲茶都係其次,主要都係聽吓奶奶今次旅行嘅事。聽吓佢話嘅有趣事,都幾得意呀!

奶奶未去旅行時,都已經叫左佢唔好買手信俾我地,唔好要佢洗錢嘛!不過今日我就有一大袋手信,都真係好開心呀!

有飲得嘅...芒果乾同花花蛋糕

一個手袋仔

仲有一個泰國公仔擺設

某程度上,收到咁多禮物當然係好開心,不過要佢老人家洗咁多錢,又真係唔係幾好意思呀!


*♡♡小肥豬♡♡* | 17th May 2008 | 生活點滴 | (69 Reads)

今日係婚後第二次參加別人嘅婚禮,不過今次個主角係我表妹。

今次個晚宴就係尖沙咀文化中心間映月樓,其實依間酒樓我嗰時都有考慮過,不過...最後因圍數佈置問題,所以冇係依度擺。

我地同小豬媽行左一陣街街,之後等埋LULU妹就一齊去酒樓。當我地行到去文化中心,我就醒起附近有奧運佈置,我當然唔放過去影相啦!

先同福娃影...

再同火炬棒影...

影完相就去酒樓,我地先同對新人影相,之前就係坐係度等開席啦!係等嘅時候,見都出面有D幾靚嘅佈置,咁又走左去影相。


今日依條裙就係小豬媽送俾我,係唔係好靚呢?

不過..唔知係條裙影響定我真係肥左好多,竟然有位舅父問小豬媽我係唔係有左....真係激死我呀!

唔通我真係肥左好多,唉...真係要的起心肝減肥啦!(不過都係應該得個講字呀!哈哈~~)


*♡♡小肥豬♡♡* | 16th May 2008 | 靚太廚房 | (35 Reads)

今日又係煮飯仔嘅時候,諗左成朝都唔知煮乜好...因為好似煮嚟煮去都係嗰幾樣,想煮D新野嘛!

突然醒起大肥豬之前去食日本嘢時話過D日式咖哩好好味,叫我有時間試吓整。

就係咁,我地今晚嘅晚餐就係...

日式咖哩雞翼

蠔油菜心

第一次整依個日式咖哩雞翼,真係都有少少驚驚地,好驚整得好難食。好在...都算成功,大肥豬話個味同出面D汁係差唔多。不過唯一唔好就係依個汁應該配雞柳或者豬扒,即係一啖肉連汁一齊食,咁應該仲好食哦!

哈哈...下次一定會再改良下先得。

開頭都怕依個餸好難整,好在都真係幾易。只要買一盒日本咖哩,當個餸差唔多熟時放三小塊就成功啦!哈哈~~

原來日本咖哩都有好多唔同嘅牌子同口味,我係吉之島都揀左好耐先決定買依盒,好在冇買錯,都好好味!


*♡♡小肥豬♡♡* | 15th May 2008 | 生活點滴 | (15 Reads)

依幾日大家嘅話題總係離不開四川地震,佢地都真係好慘。

曾經睇過一個片段,見有位媽咪抱著佢個小朋友嘅屍體不停咁喊。嗰吓我自己都…跟住喊埋一份。

所以依家我都盡量避開睇有關地震嘅消息,我並唔係唔關心依一件大事,只不過係....因為我自己比較眼淺,加上睇完依D新聞之後,一定會好唔開心,會間接影響到自己嘅情緒。

所以好多時當電視播有關節目或片段時,我都會轉台,或者走入房,唔俾自己見到災民嘅慘況。

有時諗…其實我地生處於香港都幾好,起碼唔會受到依個天災威脅呀!真係我地已經好幸福,真係要知足呀!

今日我地學校都享應左明愛個籌款活動,為災民籌款。短短嘅一日,已經籌到二萬幾蚊,都真係比其他籌款活動多呀!我自己都捐左少少,雖然唔多,都希望可以幫到少少呀!

除左明愛之外,坊間都有好多籌款活動(不過記得去有信託嘅慈善機構),大家都快D去捐,善款可以多得一蚊得一蚊,可以幫到災民重建家園呀!


*♡♡小肥豬♡♡* | 14th May 2008 | 好友與我 | (30 Reads)

今日跟左小M去左整曲奇。出去學整蛋糕都試過,不過整曲奇就第一次。

其實我都想學好耐,因為次次整到失敗,都依足個材料去整,但都係唔得。整左幾次都係叫做有一次係成功呀!所以見有今次依個機會,就去學吓,睇吓自己衰係邊嘛!

今次我地學整左依款曲奇,兩款都係用左唔用嘅方法去整。整嘅過程都算易,所以我同小M一有時間就去幫我地嘅製成品影相呀!

首先就係牛油曲奇~~

唧花原來都好考功夫,我唧得時大時細,不過都似係花形呀!哈哈...

之後就係朱古力杏仁曲奇~~

依個就要雪凍佢切片咁焗...個賣相我都覺得唔係幾好呀!

經過兩個鐘嘅課堂,終於完成左兩盆小肥豬牌曲奇啦!

睇吓個製成品係唔係好似街買返嚟呢?

當然唔少得同小M影番張相啦!

今次去學曲奇都真係好好玩,好開心呀!當見到自己整嘅曲奇焗好之後(雖然好多時係MISS幫手),都真係好有滿足感呀!

返到屋企當然第一時間俾大肥豬食啦!佢我未去學整時,佢都叫唔好整咁多,因為冇人(即係佢)食。哈哈...點知佢今次竟然讚好食,仲話:將D曲奇拎哂返學校請同事食,咁我未冇得食?

聽到佢咁講都真係勁有滿足感...勁開心呀!

原來我之前有D方法用錯左,同埋買錯材料,所以先失敗。依家知道錯左嘅地方,咁我就可以試吓整,希望有今次嘅水準啦!我仲可以叫埋小M一齊上嚟要整餅呀!哈哈....


*♡♡小肥豬♡♡* | 13th May 2008 | 靚太廚房 | (44 Reads)

因為聽日要去街街,所以今日好乖乖咁煮飯仔啦!

今日一放工就約左小豬媽去買餸,開頭都唔知煮乜好,最後就由小豬媽提意,煮左兩個既簡單又好味嘅餸。

經過我嘅努力...終於開飯啦!

今晚依餐飯,都真係幾易整,我由洗到煮好再開餐,都係用左一個鐘左右。哈哈..真係覺得自己幾快手呀!

等我介紹下我依兩個好味嘅餸先~

首先就係...咸蛋雞蛋蒸肉餅乾

之後就係....清炒黃芽白

今晚又可以清晒D餸啦!哈哈..好好味,真係覺得自己嘅煮藝開始有進步呀!

(今日嘅相片由大肥豬提供...大家最緊要睇第一張相!真係好好笑呀~)


*♡♡小肥豬♡♡* | 12th May 2008 | 生活點滴 | (15 Reads)

今日雖然係期假,我地真係仲忙過返工。話雖如此,不過都真係忙得好高興。

首先就係一早七點幾就起身,因為小豬媽去左街街,所以要去幫小豬爸做嘢。其實我地都冇乜點幫手,只係幫小豬爸跟車送貨,幫佢看看車。不過....今次係大肥豬第一次跟車呀!哈哈~~~

做完晒野之後,我地就陪小豬爸去飲茶啦!

飲完茶,小豬爸就去匯合小豬媽,咁我地就返去自己屋企啦!

唔知係唔係倦倦地,所以一返到屋企抖左一陣,唔覺唔覺就訓著左啦!

真係訓醒就食....我地六點幾就去左樓下商場一間食泰國嘢,嗰度都幾好食,不過就好似迫左少少,坐得唔係好舒服呀!我地叫左三樣嘢,都係百幾蚊,都OK抵啦!

海鮮炒飯~

串燒豬肉~~

蝦醬炒通菜~~

食完飯就上左奶奶屋企,因為奶奶聽日就去泰國旅行,我上去幫佢執吓行李。哈哈...大肥豬都讚我乖呀!

陪左奶奶一陣,就一齊去OK便利店幫佢增值,等佢明天方便搭車嘛。

我仲係OK便利店見到上次同事請我食嘅士多啤梨冰

雖然佢係用奶油做,不過真係好好味,所以就買左一大盒去返屋企慢慢食啦!(今次實又肥幾磅啦!)


*♡♡小肥豬♡♡* | 11th May 2008 | 生活點滴 | (15 Reads)

因為結左婚關係,今年嘅母親節係我第一年陪奶奶過,做乖乖新抱。

我地都幾忙碌,首先我地就負責去酒樓搵位飲茶。真係勁多人,我地十點幾開始等,到成十二點幾先有位。我地有位之後,酒樓又要求我地只可以坐個半鐘。唉...真係節日飲茶就係會咁啦!

我地一抬八人飲完茶之後,就陪奶奶行吓商場。係行商場時,我見到依支公仔筆,真係好得意呀!我考慮左好耐都唔知買唔買好,最後大肥豬就送左俾我啦!哈哈...真係好鐘意呀!

係玉桂狗 x BB呀!我係日本都有未見佢有出筆,所以嗰時只係買左電話繩呀!

我買完禮物之後,大伯話想去睇吓D地產公司,所以之後嘅活動就係去行地產,都真係行到幾倦,不過冇法啦,當陪奶奶嘛!

行到差唔多時候,就去左奶奶屋企樓下嘅屋村酒樓食飯。

食完飯,因為另一位大伯同奶奶去行商場,我地咁都一齊去。行左一陣,食埋糖水就走啦!

返到屋企都成十點幾啦,大肥豬仲攪笑話今日係朝十晚十陪奶奶呀!


Next