香港新浪網 MySinaBlog
*♡♡小肥豬♡♡* | 28th Feb 2008 | 生活點滴 | (21 Reads)

今日大肥豬放早,所以等埋我放工就去行吓街街先返奶奶度食飯。

之前我地用信用咭換左幾張COUPON,見今日有時間未去睇吓衫,因為我想買情侶裝去日本著。

點知....行左一陣,完全冇件衫係合我心水,反而大肥豬就睇中左幾件衫,既然佢合心水,當然買左俾佢啦!D衫仲可以留去日本著呀!情侶裝遲D先再買過啦!

真係好抵,四大件靚衫.....


都係用左........$30.00

因為用晒所有COUPON都係加多$30.00呀!

哈哈...真係抵到唔識形容,都未試過用咁少錢買咁多野,原來平日D信用咭積分都幾有用呀!等我又再繼續用多D咭先(又俾藉口去買野呀~~哈哈!)


*♡♡小肥豬♡♡* | 27th Feb 2008 | 生活點滴 | (25 Reads)

前兩日小豬爸同小豬媽兩個拍拖去左澳門玩,返嚟嘅時候當然買左好多澳門嘅嘢食返嚟啦!

尋日返小豬媽度食飯,就拎左一大袋嘢食俾我地,樣樣都係大肥豬鐘意食,小豬媽真係知道我地心意啦!

我對杏仁餅嘅興趣唔太大,不過就真係要特別推介肉鬆米菓,係澳門新出嘅野食(不過唔知係唔係新出,因為我都好耐冇去澳門啦!),真係好好食,好食到我地兩個一返到屋企就唔洗半個鐘可以清晒,今次又肥多幾磅先得….哈哈!

如果大家去澳門記得買嚟試吓。


*♡♡小肥豬♡♡* | 26th Feb 2008 | 生活點滴 | (29 Reads)

今日收到張帖,個感覺好特別!

因為之前收嘅帖都係俾黃XX小姐,今次個封面係...

俾人叫左夫人添,真係唔係好習慣,不過個感覺都幾得意。哈哈.....但又感覺上自己好似老左好多呀!

係未結婚時出席別人嘅婚禮,都會幻想吓自己就係個主角,會諗吓到自己結婚時會點。

依家都嫁左....冇得幻想啦,唔知婚後第一次出席別人的婚禮,個感覺會係點呢?


*♡♡小肥豬♡♡* | 25th Feb 2008 | 生活點滴 | (44 Reads)

上星期係我個婚網收到一個留言,請我分享我地嘅故事,之後就放係個網頁上作一個小小嘅分享。

當我收到個留言時,我都15/16唔知寫唔寫好。不過諗到可以有一個地方可以紀念我地嘅結婚事,所以就鼓起勇氣寫一個屬於我地嘅小小故事,仲SEND埋幾張相俾佢地啦!

因為我D文筆都唔係咁好,都打算係貪得意玩吓,估佢地未必會登出嚟!

點知今日收到佢地個E-MAIL,佢地真係登左出嚟呀!真係好開心,仲好驚喜呀!

睇番成篇網頁,個感覺真係好得意!好似睇緊一個故事,但個主角就係自己...

大家有時間就去睇吓啦!不過寫得唔係咁好就唔好笑我呀!哈哈哈~ 

請CLICK相片進入


*♡♡小肥豬♡♡* | 23rd Feb 2008 | 蜜月之旅 | (126 Reads)

經過我地睇晒D旅行社嘅資料,終於我地都決定左跟縱橫遊。因為我地今次主要都係去玩..玩...玩,依間旅行社去嘅樂園係最多,所以我地就JOIN依間啦!

竟然決定左就要去報團,所以一放工就去左報團啦!因為我地早報,仲可以減$200,雖然唔係好多,但都可以幫補吓嘛!

當個職員一幫我出單時,我真係由心笑左出嚟,唔知有冇嚇親個職員呢!哈哈~~

等我講吓我個蜜月旅程先:

第一天
香港 → 東京 ~ 橫濱麵包超人專賣店 ~ 橫濱未來21新港區:宇宙世界樂園~ 皇后購物廣場群

第二天
富士箱根國立公園 ~ 富士急動感樂園 ~ 箱根 ~ 平和公園賞櫻花 ~ 小涌園溫泉水上樂園世界

第三天
HELLO KITTY LAND ~ 淺草 ~ 彩虹橋PALETTE ~ TOWN:豐田汽車未來城、古典汽車博物館、維納斯名店坊 ~ 銀座購物大道

第四天
東京迪士尼迪士尼樂園

第五天
新宿御苑賞櫻花~ 新宿商店街 ~ 電器催賣中心 ~ 歌舞伎町 → 香港

依家真係好想快D到3月25日,可以上機啦!

東京..東京...我嚟啦! 


*♡♡小肥豬♡♡* | 22nd Feb 2008 | 生活點滴 | (46 Reads)

今年新年因為個天氣好凍,所以好多花都唔開。我第一次係自己屋企擺嘅水仙花都好怕唔開呀!

當我係年初一嘅時候,我盆花花都未開,不過就一直標高,咁都有唔會好失望。

不過依幾日佢就不停咁開花啦...仲長得好高,真係又香又靚呀!


小豬媽話水仙花係旺夫,如果盆花開得靚,咁個老公今年就會好好呀!

哈哈~~我盆水仙花咁靚,今年大肥豬一定會好旺啦!


*♡♡小肥豬♡♡* | 21st Feb 2008 | 靚太廚房 | (36 Reads)

今日除左係元宵節之外,都係奶奶嘅生日,所以我地一家人就去左酒樓食飯慶祝。

今日係元宵節,即係中國情人節啦,點都會同大肥豬應吓節呀!

今個晚餐我地都食得好飽飽,不過我返到屋企都有煮湯圓俾大肥豬食。雖然唔係自己包,不過我都煮得好好味,唔係好甜呀!哈哈~但食完又肥多幾磅啦!

煮湯圓都係跟吓傳統咁啦,等我地可以團團圓圓,恩恩愛愛呀!

係度都祝各位繼續甜甜蜜蜜、開開心心啦!


*♡♡小肥豬♡♡* | 20th Feb 2008 | 生活點滴 | (20 Reads)

依幾日都沉迷左去做兩件事:

第一件事就係追電視劇,依兩晚一到九點半就好乖乖咁坐係電視機前面等睇『最美麗的第七天』,真係好耐都冇試過追劇集啦!睇左兩集..真係好好睇,當然嘉穎真係又幾有型呀!

哈哈…嚟緊依十八晚我都要好乖乖咁留係屋企等睇電視呀!

第二件事就係依排愛上左打麻雀…唔好誤會,我唔係爛賭,我打嘅只係facebook有個新麻雀game。

其實我都唔係好識打麻雀,真嗰D我就唔係好鐘意玩,因為真係好大壓力咁,打得慢又怕悶親人,又怕打錯牌…平日都只係親戚朋友唔夠腳先叫我去打,不過次次都係輸錢多,打完個頭又好鬼痛,所以都唔係太鐘意打真嘅麻雀。

不過係網上玩就好玩好多,起碼唔洗咁大壓力,當係一個GAME好玩好多,我地仲約埋幾個同事一齊上網玩呀,大家聯誼吓感情嘛!所以依幾晚都日日上去玩啦!

哈哈~~有facebook嘅朋友有時間都一齊上去玩吓啦!


*♡♡小肥豬♡♡* | 19th Feb 2008 | 靚太廚房 | (45 Reads)

搬左入新屋都只係煮過一次飯俾老爺奶奶食,我地兩口子都未試過煮餐飯撐枱腳。

今日冇乜野做,所以就決定玩煮飯仔啦!

放工第一個目地又係街市...不過今日買餸先發現到一個問題,就係屋企附近依個街市買餸都幾貴呀!可能係依幾日買野貴,過左新年可能會好少少呀!

講番今日我煮嘅晚餐先,有蠔油忟雞翼、火腿炒芽菜、蕃茄炒蛋。

依次晚餐全部都係我自己諗,煮好左出嚟之後,望住整好嘅餸,真係有少少覺得自己幾叻(哈哈~~又係度自己讚自己)。

開頭都會以為會食唔晒,不過最後大肥豬都幫我清晒...見佢食晒(當然佢不停話好味啦!),依個感覺真係幾好...好開心呀!

雖然今餐大肥豬對我嘅評分好高,都算係成功左。

不過我都要繼續努力....因為我始終覺得個味仲係差左少少,希望可以一次比一次煮得好食,同埋學煮多D唔同款式!


*♡♡小肥豬♡♡* | 18th Feb 2008 | 靚太廚房 | (45 Reads)

今日大肥豬約左幾位朋友仔嚟我地新屋企拜年,因為天氣都凍凍地,加上又可以邊食邊傾,所以都係決定打邊爐啦!

放工就即刻走左去街市買餸,買左好多餸番嚟。都買到一袋二袋咁,真係成個師奶咁呀!唉....

一返到屋企就開始好忙,又要執吓間屋仔,又要洗埋D餸,真係做到連大肥豬返嚟都冇時間理佢呀!

好在...我都可以係朋友仔上嚟之前整好晒D野。真係時間剛剛好,朋友仔一上嚟就可以食啦!

一邊整時都怕怕會唔夠食,怕客人嚟唔夠食唔係幾好。不過好在,到最後都可以全部清晒,個個朋友仔都食都飽飽咁走呀!

睇見佢地個個都食得又飽又開心,真係連我自己都好開心呀!

當大肥豬送完朋友仔走之後,一返到屋企又即刻讚我叻同乖。

由佢個笑容睇得出佢今日真係好開心,見佢咁開心...真係忙左成晚都係值得呀!


*♡♡小肥豬♡♡* | 18th Feb 2008 | 生活點滴 | (19 Reads)

今日一早就返到學校,第一時間就拎左封請假信俾老細,想係復活節要放五日假。

原本都以為要等幾日先知個結果,但好開心咁係下午就好快知道個結果,就係...老細已經批左我個假期啦!

當我知道批左之後,即刻同話俾大肥豬知。原來佢又係剛剛知道個假期批左,即係話我個復活節蜜月旅行可以去到啦!

依家真係要努力..努力去搵個好團嚟報呀!

哈哈哈~~~真係好開心呀!依家未報團,個心都已經飛左去日本啦!

等我報埋團之前就真係日日發夢都係日本呀!哈哈哈~~


*♡♡小肥豬♡♡* | 16th Feb 2008 | 甜蜜生活 | (26 Reads)

哈哈~~今日我地又入左迪迪尼啦!

唔知係唔係星期六關係,真係唔係太多人,排隊同公仔影相都唔洗等好耐。不過就因為依個原因,佢地好少公仔出嚟呀,只係新年嗰幾隻出嚟同人影相!

激死我....又搵唔到MARIE呀!

我地一入到去就見高飛,我就一支箭咁飛去排隊,依隻高飛真係好攪笑,我地影幾張相都唔同動作呀!


影完高飛,就係等睇巡遊時,又去左影依D特別佈置啦!

除左高飛之外,我地每一隻新年打扮嘅公仔都有影到呀!不過始終都係冇得同DONALD & DAISY一齊影。

行行吓見到依三個人,又冇乜人排隊,咁就又走去傻吓傻吓去影,不過始終好似唔係好夾迪迪尼依個FEEL!

我地又入左新嗰個米奇屋企睇,件件佈置都好靚,真係好得意呀! 

因為大肥豬怕我病仲未完全好番晒,所以今次我地都係主要入去影相,冇玩到機動遊戲呀!所以我地都影完相就走啦!不過係臨走時,又係大門口影左幾張相啦!(真係唔放過任何機會呀!)

原本我地今次都冇打算買野,不過當我地行過精品店時見到有D衫做減價呀...所以我地就買左情侣裝啦!

 


*♡♡小肥豬♡♡* | 15th Feb 2008 | 生活點滴 | (62 Reads)

今日好乖咁返左去同奶奶食晚飯。

當我地食完飯想趕番屋企睇大結局,係我地差唔多出門口時,奶奶竟然叫我地留多一陣,因為有好野俾我地飲....就係符水啦!

原來奶奶今日去左拜神求左幾道符番嚟,叫我地飲D符水可以保平安呀!

嘩~~符水哦...都係第一次飲,係度睇見符係碗水入面燒成灰,真係...有D怕怕,但又唔可以唔飲。

好在...後來我地都係飲左一啖就可以啦(仲避開晒D灰嚟飲呀)!雖然係一啖,但飲完都成口大濃味呀!

話雖如此,但奶奶都係保我地平安先叫我地飲,都應該係一件開心事呀!


*♡♡小肥豬♡♡* | 14th Feb 2008 | 生活點滴 | (16 Reads)

一年一度嘅情人節又到啦!

係度祝各位情侣每日都甜甜蜜蜜!

已婚者就繼續溫溫馨馨,幸福滿載!

未有對象者在今年搵到理想意中人啦!

 


*♡♡小肥豬♡♡* | 13th Feb 2008 | 生活點滴 | (15 Reads)

今日係年初七,即係人日,人人都生日。首先祝各位生日快樂!

我就已經收到一份唔係幾好嘅生日禮物,就係依D五顏六色嘅藥丸。

唉...又要宣佈我已經被感冒軍隊攻佔左啦!真係失敗..新年又走嚟病!

其實由年三十晚開始都已經唔舒服,不過新年嗰幾日都KEEP住時好時病,加上日日又掛住玩 (有得玩就乜病都唔記得啦!),所以都係夜晚食吓傷風藥就算!

不過由尋日開始D感冒軍隊好似越來越利害,攪到成日係咁咳,喉嚨又好痛,講野都變埋聲。原本都想過多幾日先去睇醫生,始終仲係新年,好似咁早就睇醫生唔係咁好。

不過係食LUNCH時真係覺得頂唔順,所以食埋碗粥就走去睇醫生。

醫生話我感冒同喉嚨發炎,開左D勁藥俾我食3日,就會好番哦!唔知係唔係D藥勁過頭,食完之後就勁眼訓,都幾辛苦呀!

希望可以快D好就得啦!


*♡♡小肥豬♡♡* | 12th Feb 2008 | 生活點滴 | (12 Reads)

為左要攪間新屋,同埋第一年新年要係香港過,所以我地都未去渡蜜月,唉…見到好多同我地差唔多日子結婚嘅朋友仔都已經去完旅行番嚟,仲POST晒上網,都有少少唔開心呀!

不過.....一諗起就今年個復活節假期就超級開心,因為我地個蜜月旅行決定左會係依個假期去啦!哈哈哈~~

係新年前我地都去行過吓D旅行社,睇吓個行程,不過就好似未有心水同個價錢都未出,所以打算過左新年再去睇。

依家過左新年假期,所以又可以去睇吓D 旅行社嘅行程啦!

但之外睇過,間間都好似差唔多,同埋我地都唔係太熟識,所以就想問吓大家有乜好介紹啦!

我地暫決定去東京,不過就一定係跟團(因為我怕自由行唔識路呀!),主要都係想去玩..玩..玩,有乜樂園好介紹呢?有乜地方係去東京必定要去呀?同埋跟邊間旅行社好呀?大家俾D意見我啦!唔該晒!

不過..仲有一關未過,就係我老細啦!唔知佢批唔批我成復活節假期都放假,真係有少少擔心,希望冇問題啦!要等佢星期一返嚟先可以問佢呀!

唔理住啦,揀定團先,都時一OK就去報名!

真係...諗起都開心呀!


*♡♡小肥豬♡♡* | 11th Feb 2008 | 生活點滴 | (17 Reads)

經過四日忙碌嘅假期生活,終於要返工啦!

今朝起身真係完全唔想起身,因為依幾日都係日日都早出晚歸。雖然係幾倦,不過日日都好開心呀!

因為今年都結左婚,所以都估計唔會有利是收,點知...哈哈哈~~今日返工都有利是收,真係返工都返得開心D呀!

新一年返工就有一件『魚』事,就係竟然唔記得帶我枱櫃鎖匙,(因為條鎖匙放左入小豬媽屋企嗰串度,依幾日都冇帶依串鎖匙呀!)。不過好在今日要做嘅野都唔係櫃入面,所以開唔到都冇所謂。

哈哈~~真係大頭蝦啦!依家將條櫃鎖匙放左入新屋串鎖匙,咁就一定唔會再唔記得啦!

最後,祝所有人都可以係鼠年工作順利...個個都又升職又加薪啦!


*♡♡小肥豬♡♡* | 10th Feb 2008 | 生活點滴 | (15 Reads)

原本都冇打算出街,諗住留係屋企休息吓,收拾好心情明天返工。唔知點解小豬爸好有興趣話要入大佛市集行街街,咁我地今日個節目就係入大嶼山啦!

開頭都想搭360上大佛,不過因為上去時都好多人排隊,最後我地都搭左巴士上去,打算走時先去試搭(我地都未搭過360,好似有少少OUT添)。

我地先去行吓個市集,比我地預期中少人都唔太迫。我地行店鋪睇野,不過D野就真係唔係我地買,因為比市區貴好多,所以只係睇完就算啦!

係市集中途有棵心型樹葉樹,我究竟好耐先知係假,仲俾大肥豬笑我呀!

之後行完市集就行去大佛啦!係途中見到有熱辣辣粟米賣,為食嘅小肥豬當然又係咁食...食...食,不過又真係好甜好好味呀!

行左寶蓮寺一陣,之後我地就走啦!

係回程時我地個個係咁你推我讓話去搭360(其實個個都仲擔心有危險,唔係好想搭!),最後都係維持搭巴士走。

係臨走之前去覽車附近影張相,証明嚟過就算啦!

哈哈哈~~真係又冇得搭360,不過都係遲D先再考慮去搭啦!始終都仲有少少驚驚地呀!


*♡♡小肥豬♡♡* | 9th Feb 2008 | 生活點滴 | (23 Reads)

每年年初三小豬爸都有一個習慣,就係一家人揸車入新界行吓,行個大運呀!今年當然唔例外,我地一行七人去新界行個大運啦!

第一站我地就去左林村探吓許願樹,可能冇得拋寶碟,所以唔係太多人。我地行左一陣D鋪頭仔,食吓D懷舊小食就走啦!

之後我地就去左士多啤梨園,原本我地都冇打算去摘,諗住八卦吓就算,不過我地又見到其他人摘到好多又紅又大粒嘅士多啤梨,我地當然摘埋一份啦!個場又冇乜人,我地鐘意點摘都得。

嘩~~真係有好多士多啤梨,我地一邊摘一邊玩,好似尋寶咁,見到又紅又大粒就衝去摘,真係好好玩呀!

依盤就係合我地七人摘出嚟嘅成果,唔好睇少佢呀,都有成三磅幾呀!依家留番星期一小豬媽佢地上嚟我屋企食。不過偷食過....真係好甜呀!

玩完一輪,就陪小豬媽入去附近嘅雲泉仙觀行左一陣啦!

之後我地就去流浮山進發,因為小豬爸話請我地食海鮮呀!好野...萬歲!

入到流浮山見時間仲早,所以就行左一陣,跟進我地就一齊去買海鮮,準備食餐飽啦!

我地真係冇野玩,係小豬媽揀海鮮時,我地就拎左D海鮮嚟玩,哈哈..真係八厭啦!

今晚個晚餐真係好豐富,都幾好味呀!食都個個都好飽飽咁走呀!

首先就係依個豉油蝦,好味指數真係好高呀!

椒鹽瀨尿蝦,我嘅至愛....

西式辣酒煮蜆,賣海鮮位姐姐介紹咁煮,整出嚟又幾好味!

一人一隻鮑魚仔,我地仲用刀叉食,個感覺幾好feel呀!

清蒸紅瓜子魚,『紅瓜子』係條魚名嚟,都係第一次聽呀!

仲有粉絲象蛂蚌,依個比起其他就麻麻地啦!

最後當然要食碟菜同抄飯啦!

食飽飽就走人,埋單都唔係太貴,都幾抵食。不過唯一美中不足就係加一問題,sell我地嗰位姐姐話冇加一,但最後竟然有收,真係.....原本我地都想理論吓,不過小豬爸話新年就算。

今日就係咁過左啦!真係都又好玩又好食嘅一日,不過肯定又係勁肥嘅一日,因為為食嘅我真係冇停過口呀!


*♡♡小肥豬♡♡* | 8th Feb 2008 | 生活點滴 | (18 Reads)

又要一早起身,因為要入去新界錦田同大肥豬婆婆拜年!

好在依家交通都算方便,坐車入去都好快,不過成程車我都只係訓覺,所以實質車程幾耐都唔知呀!

入到婆婆度真係好凍,凍到我都唔想四圍行,只係留左係屋入面睇電視,其他人就出左去空地打麻雀,真係好佩服佢地好似唔怕凍咁,完全明白乜叫打麻雀能醫百病呀!哈哈哈~~

我地坐到差唔多四點就走人,返去奶奶度食飯。

食完飯就陪D小朋友玩吓魚蝦蟹,都知今年冇乜運,玩幾毫子一鋪嘅,都可以輸十幾蚊。唉...真係黑仔王是我。

不過唔緊要,最緊要大家開心嘛!


Next