香港新浪網 MySinaBlog
*♡♡小肥豬♡♡* | 29th Jan 2008 | 生活點滴 | (19 Reads)

隨住新屋都攪得七七八八,所以又係時候同大家暫別幾日呀!

哈哈~~唔好誤會.....我唔會掛住想快D過二人世界,而放棄個BLOG!其實因為剛剛申請左轉條寬頻線去新屋,所以依幾日都唔可以上網呀....

依家約左星期六上新屋安線,都唔知有線點做野呀..要等咁多日先嚟整,真係等到人好心急呀!

依幾日冇得上網...真係怕唔習慣呀!不過咁都好,迫自己快D執埋間屋佢,唔洗有其他野令到我分心嘛!

好快啦~~大家等我幾日,相信下一篇網誌應該會係新屋啦!


*♡♡小肥豬♡♡* | 28th Jan 2008 | 生活點滴 | (18 Reads)

首先講個好消息俾大家知先...就係我個新居裝修已經整好晒啦,咁就即係可以係新屋過新年.....真係好開心呀!

就係因為依個好消息,所以依兩日都係去左新屋抺..抺...抺,又開始執..執...執,真係做到成個人都散晒!

一路都以為抺屋唔難,係咁用D清潔劑整吓就得,不過原來都唔係咁簡單,可能我又剛剛裝修好,個地方都幾污穢,真係整左好耐先攪得好呀!

尋日都用左成個幾鐘先算整番好個廚房...真係倦都唔識講啦!成對手都好似唔屬於我呀!

嚟緊都仲有排整...又排抺.....不過為左我地個新屋冇法啦!

唯有同自己講~~~努力..加油,為小天地努力呀!


*♡♡小肥豬♡♡* | 27th Jan 2008 | 生活點滴 | (37 Reads)

今日大肥豬約左朋友食飯,依兩位朋友仔都係有幫手做兄弟,所以我都算熟熟地,我冇野做當然就跟埋一齊去啦!

一坐落就收到第一份新居禮物,依份禮物係當日結婚時個伴郎送呀....哈哈哈....就係一對好得意嘅杯。

真係有少少唔好意思,屋都未整好,又未請人上去玩,就要人送野....真係唔知點講啦!不過都係開心呀~

等入左伙之後,真係要即刻請伴郎嚟坐吓先得啦!

不過依一日會好快啦...


*♡♡小肥豬♡♡* | 24th Jan 2008 | 生活點滴 | (26 Reads)

經過兩日嘅低落,個心情都已經好左好多呀!相信我嘅晴天好快就會到啦!

經過今次,真係令自己諗通左D樣野...所以我唔會再為依D人唔開心,我要做個開開心心嘅靚太,有屋企人同老公錫就夠啦!

另外,真係要好感激一班對我好好嘅BLOG友仔,當我有唔開心時,你地都會俾D鼓勵我,支持我。令我覺得除左屋企人之外,都仲有好多人關心我,真係好WARM呀!

真係要再同大家講:多謝你地呀~~我會努力啦!

 

 


*♡♡小肥豬♡♡* | 23rd Jan 2008 | 生活點滴 | (34 Reads)

黑暗嘅日子幾時先完結....

點解心情一日比一日低落,究竟係乜問題?

仲乜要成日針對我.....點解一早就要串我....洗唔洗成日都兜個圈嚟話我,係唔係我真係好蝦!

點解樣樣衰野都似係向住我,仲乜要係咁哦!

我知我應該要學識唔好理,扮聽唔到,扮見唔到,扮時運高。不過......又真係好難做到。真係要努力學習....做人應該係為自己開心過,唔好再為冇關重要嘅人影響到自己心情!

俾自己唔開心埋今日,鬧情緒埋今日....之後就要開心番,因為唔可以俾依D冇關重要嘅人得勝。佢想我唔開心,我遍要開開心心,激吓佢都好呀!


*♡♡小肥豬♡♡* | 22nd Jan 2008 | 生活點滴 | (26 Reads)

今日個心情又真係唔係太好,都真係唔知係乜原因,做乜都總係好似提唔起勁.....唔知點解!

點解好似樣樣野都唔係我想像入面...點解總係有問題嗰個係我....點解其他人要咁樣.....係唔係我好唔出聲代表我好蝦?

好多個點解,不過冇一個係可以搵到答案。

究竟係我過份敏感,定係根本問題出係我身上,還是根本冇問題存在,只係自己多心。真係好想知道,不過相信只有時間先可以知道。

算啦~都係唔諗啦!根本唔可以阻止人地點諗同點對你,只要自己覺得自己冇錯就得啦!

今晚早D訓,訓醒就乜都唔記得,聽日又係新一天開始。(希望可以做到啦!)

大家唔好唔會,以上嘅野係唔關大肥豬事,佢仲好就我咁俾左好多空間我呀!只係一D其他事攪到我咁....只係想借個地方發洩一吓呀!


*♡♡小肥豬♡♡* | 21st Jan 2008 | 大囍日子 | (142 Reads)

經過我嘅努力究竟,終於都識得係我套DVD抽出其中一條片段嚟啦!真係攪到頭都痛晒呀!不過依D都係開心事,值得呀!哈哈~~

我將攝影公司幫我地用當日結婚精華片段做成嘅MV同大家分享先啦!

佢地都整得幾好,不過我就唔係太鐘意佢地原本首英文歌(因為都唔知係乜歌呀!)。所以我又好叻咁將佢原先整左嘅英文改左做另一首歌。因為要就番原本個長度,所以就揀左好耐先搵到首差唔多長度,又有意思嘅歌。

整左出嚟又幾MATCH哦~~哈哈!真係要讚吓自己先得。


*♡♡小肥豬♡♡* | 19th Jan 2008 | 生活點滴 | (28 Reads)

係尋晚靚太飯局仲講緊我D婚禮VIDEO未拎得,點知今朝就收到攝影公司個電話話可以去拎啦!心急嘅我因為要返工唔可以自己去拎,所以下午就派左大肥豬去攞喇!

一返到屋企就即刻叫大肥豬播俾我睇,經過攝影師剪接,成日嘅活動就用左兩隻DVD整晒。我地約用左兩個鐘時間睇晒,唔知算唔算多呢?攝影公司都係俾番兩盒MASTER TAPE我地,係唔係差唔多呢?

我地兩公婆係房用電腦睇,都好回味當日嘅細節,有D場面都好好笑,成個感覺都好好呀!睇完都好想再睇多次,不過我地冇咁做,因為留番之後同屋企人一齊再睇啦!

成套碟都整得幾好,好多片段都有係個DVD度睇到,個角度都幾好,佢地真係唔錯。不過唯一有一樣我唔係太滿意,就係佢地用左一D英文歌做BACKGROUND,我唔係太鐘意依D歌呀,早知佢地會咁做,我就俾自己音樂佢地啦!

依家我努力嘗試將一D片段整上嚟,想同大定分享。希望可以成功啦!


*♡♡小肥豬♡♡* | 19th Jan 2008 | 好友與我 | (26 Reads)

其實依個約會應該係聖誕節前舉行,不過嗰次因為我唔舒服,所以就改左期(真係唔好意思啦!)。不過終於係今日我地個『靚太飯局』終於都開左啦!

好耐之前我地都已經PLAN好左第一次嘅『靚太飯局』去食日本野(因為我地都好鐘意食!),不過小M諗到小賢剛剛去完日本,所以就提意去意粉屋啦!

我地一坐低,小賢同小M就分別送左佢地旅行嘅手信俾我。佢地去旅行都有掛住我,真係開心呀!不過就有少少唔好意思,收咁多禮物!真係多謝晒呀!

小M嘅禮物,真係知我心意,係玉桂狗呀!仲有小M結婚嘅小禮物,真係好得意呀!

另外,小M仲俾左隻我結婚相嘅CD。原來當日係我註冊時,小M有幫我影低交換介指同宣誓時嘅片段。返到屋企仲即該播左幾次嚟回味番呀!哈哈哈~

小賢嘅禮物,好好味嘅糖糖!

係我地個飯局入面,都傾左好多野呀!不過講得最多當然就係北海道,因為佢地兩個都係去依個地方HONEYMOON,知佢地玩得咁開心,都真係攪到我都好想去呀!

係差唔多走時,我地已經開始PLAN下次嘅活動啦!我地暫定左下次約埋同埋老公去一齊影相,我諗一定好好玩呀!希望可以快D去啦!


*♡♡小肥豬♡♡* | 18th Jan 2008 | 生活點滴 | (35 Reads)

結婚之後,因為仲未有自己嘅廚房俾我整飯盒,當然又唔會叫奶奶幫你準備,所以都好耐冇帶過飯,日日都要出街食LUNCH,食嚟食去都係嗰幾樣野,有時真係好悶呀!

係依個時候就特別掛住小豬媽牌嘅愛心飯盒。(其實話係我日日都掛住小豬媽煮嘅餸就真,因為真係太好味啦~~)

其實之前返去食飯都已經好想開口話整飯盒,不過次次都係食完飯先記得,D餸都俾我食得七七八八啦!(因為我返去就會食好多餸呀!)

終於係尋晚返去小豬媽屋企食飯時,忍唔住係一入屋就開口叫小豬媽幫我整個愛心飯盒。小豬媽就即刻搵番我D舊飯盒出嚟幫我整,留左好多餸俾我,仲留左一大隻雞脾俾我呀!真係開心....

唔知點解係頭先食嗰時個心情會特別開心,有一種好幸福嘅感覺呀!

有時諗....之前都有曾經試過唔想日日帶飯,總係好似間唔中出街食開心D。一到依家,日日都冇得帶飯,要出街食時,又好想日日都有愛心飯盒食。

唉..都唔知係乜心態啦!

不過唔理啦,下次返去食飯都叫小豬媽幫我再整愛心飯盒先得。


*♡♡小肥豬♡♡* | 17th Jan 2008 | 甜蜜生活 | (33 Reads)

今日係食LUNCH打電話同大肥豬傾計,點知佢突然間爆左話買左一份神秘禮物俾我,問極都唔肯講係乜,真係攪到我成個下午都心思思,冇晒心機做野,不停係度諗係乜禮物。

咁返到屋企當然第一時間問佢拎禮物啦!原來係一對WEBCAM呀!

真係完全冇諗過會係WEBCAM,都有少少好奇點解會係依份禮物,仲要買一對。不過一問之吓,原來係有一個好深意思呀!

就係因為大肥豬知道我成日都好掛住小豬媽佢地,就諗到買依份禮物俾我,等我地按左之後,就教LULU妹用,咁我就可以係掛住佢地嘅時候叫佢地開機,等我可以見到佢地啦!

聽到佢咁講,真係唔知講乜好啦!真係嘅開心又有少少感動呀!真係估唔到平日粗心大意嘅大肥豬會咁細心呀!

剛剛試左部,都好清呀!聽日就返去小豬媽屋企幫佢地按埋啦!咁就可以想見佢地時見到佢地啦!

真係...又係時候俾個叻叻大肥豬啦!

 


*♡♡小肥豬♡♡* | 16th Jan 2008 | 生活點滴 | (32 Reads)

仲有唔夠一個月就到新年啦!今年新年個感覺好唔同,因為係第一年派利是呀!諗起都有少少肉痛(哈哈哈~~)不過依D都係開心事,一年都係一次,同埋諗到收利是嘅人個開心樣,唔緊要啦!

係咁多年幫小豬媽入利是嘅經驗,係需要有幾款利是封,封唔同嘅涵,俾唔同嘅人。

普通款已經叫小豬媽幫我去銀行拎 (慳番D嘛!),至於其他特別人仕,當然係想買D靚靚利是封等佢地收利是時更加開心啦!始終係第一年派利是關係,當然想特別少少啦!

依排都成日行商場睇吓D利是封,不過都搵唔到合心水款,又冇玉桂狗賀年款,唉!

不過依幾日終於俾我買左D靚利是封啦!真係開心~~~哈哈哈!

首先就係依兩款靚靚迪迪尼利是封

依幾包利是封係我上次入迪迪尼行精品店買,見佢好特別又好靚,最好就係只係迪迪尼入面先有得買,又唔係太貴同出面款都差唔多,所以就即刻買左佢啦!

第二款就係前日去睇演唱前行商場見到,一入到精品店就見到有MARIE新年利是封。當然諗都唔諗就即刻買左佢啦!

買左依幾包應該都夠啦!

哈哈哈~~希望收利是嘅朋友仔見到D靚靚利是封會開心啦!


*♡♡小肥豬♡♡* | 15th Jan 2008 | 生活點滴 | (18 Reads)

尋晚我地兩個拍拖去左睇KARY演唱會嘅尾場,都係得一個字 – 正!

第一次去STARHALL睇演唱會,環境、音響等各樣都幾好(起碼新嘛!),不過佢地張櫈就差少少,坐落去唔係太舒服呀!

由開始到完場都冇悶嘅感覺 (可能佢D歌我都幾熟啦!) 成個氣氛好好,加上KARY真係唱得幾好,唱LIVE完全冇走音,KEEP都個水準,仲冇乜見佢飲水休息(通常見D歌星唱完兩首歌之後都要飲水嘛!)。

最勁就係當佢唱快歌時,可以大跳勁舞時都唱到個水準(好夠氣呀!),仲連跳四首歌都冇停過,唱得完全冇問題,好正呀!

最精彩當然係跳娜姐舞蹈嗰PART,雖然我對英文歌唔太有好感,不過KARY真係跳得好好睇,真係見到佢落足心機練習過嘅。

嘉賓方面一早估到會係側田,因為佢地成日合作嘛!最估唔到就係第二位嘉賓竟然係基仔,可能尾場先係咁安排啦!不過佢地兩個都真係唱LIVE好正呀!

個演唱會真係好好睇,又邊彈邊唱、又大跳勁舞、又打鼓,唱慢歌又好有感情,真係估唔到佢第一次個人售票演唱會會咁好。雖然只係STARHALL舉行,不過睇今次反應咁好,相信好開就會去紅館開,到時我一定會再入場支持呀!


*♡♡小肥豬♡♡* | 14th Jan 2008 | 生活點滴 | (17 Reads)

結左婚一個月多少少,我都已經去左迪迪尼兩次..真係覺得自己勁呀!不過仲會成日去呀.....因為今次我地仲登記埋小豬媽送俾我地張全年通行証,咁我就可以由尋日開始我就可以係依一年成日入去玩,諗起就仲開心.....哈哈哈~~

其實今次我地都主要係帶LULU妹入去玩,因為佢見到我上次有同胡迪影相,又有好多GAME佢冇玩過,所以好想入去玩。當然冇問題啦,所以就係又向迪迪尼出發啦!

大肥豬負責幫我同LULU妹係門口影張靚靚相先啦!

之後排隊買飛又影!原本LULU妹話佢自己買飛,不過一向鍚佢嘅大肥豬姐夫又點會俾佢自己買,最後就當然係姐夫請入場啦!睇吓LULU妹幾開心!

入左場之後,就係門口個大米奇花花影相啦!原來去過咁多次,都冇係依個地方影過相,原來影出嚟咁靚呀!

我地入去迪迪尼個目的就當然係影...影....影啦!計計吓,我地都同左好多公仔影相呀!可以話由朝影到晚呀!

唔知係唔係樂園入面唔係太多人,排隊同公仔影都唔係要等好耐,不過就唔係太多公仔出嚟...始終都搵唔到MARIE...有少少失望呀!

我地除左同公仔影相外,就帶左LULU妹玩馳車天地同史迪仔啦!當我地玩緊馳車天地時,為左係跑道上可以幫LULU好影相,我就停左一吓影相,點知俾D職員開咪話,真係好『魚』呀!不過影到相就唔緊要啦!

係等巡遊時,我地就入左去畫廊學畫唐老鴨。

我自己真係完全冇畫畫天份,睇吓我畫都成隻怪鴨咁,好醜樣呀!

反而大肥豬就畫就好靚又似。

睇完巡遊就繼續去玩,原本LULU妹都話玩過山車,不過當排到佢時,就話唔驚玩,真係.....哈哈哈!

之後行精品店,見有野玩,當然唔放過拎嚟晒相啦!

玩左成日都真係幾倦....不過玩得又真係好開心..好開心。

不過嚟緊相信好快會再去,因為佢地由22/1-24/2開始有新年佈置,到時又要入去影影影呀!


*♡♡小肥豬♡♡* | 13th Jan 2008 | 生活點滴 | (29 Reads)

去完睇B女展,就醒起便便餐廳就係對面,咁我地就上左食野啦!

其實我都想去好耐,不過次次當我地想去嘅時候,都係有D野攪到我地去唔成。反而係冇計劃情況下,竟然可以去到,真係攪笑呀!

一入到去就見到佢地個佈置真係好似成個廁所,就連杯碟都係..真係好得意呀!

我地係野食未嚟前就係入面四周影相,好在D職員冇話我地,仲係野食到時通知我地,又真係幾好呀!

我地ORDER左一客咖喱雞飯同雪榚刨冰,都幾好食,不過個量就好大份,我地兩個人都食唔晒呀!

唔知點解UP唔到相上BLOG,所以就整左個SLIDE俾大家睇吓我地玩得幾開心啦!


*♡♡小肥豬♡♡* | 12th Jan 2008 | 生活點滴 | (21 Reads)
今日出左旺角睇傢俬,路過朗豪坊知道佢地今期舉行左B女展,咁見有時間就上去睇吓啦!
 
開頭我都唔知B女有幾利害(因為我對佢都唔算認識深,係糖糖介紹我先識佢呀!),不過一上見到有好多人係度同佢影相,就知原來佢好紅呀!
 
我都慢慢咁睇...不過佢地show出嚟嘅都真係好靚,每個B女都有唔同嘅衫,有D仲好靚呀!攪到我都忍唔住同B女影左幾張相呀!不過因為真係太多人,唔可以影晒所有B女呀....咁我就揀左我鐘意嘅嚟影啦 !
(其實...應該話係可以迫入去影嗰D,因為真係好多人呀~~好難個個都迫入去B女前面影呀!)
 
B女真係好似一個人仔咁,個個都有唔同造型,好靚呀!

*♡♡小肥豬♡♡* | 11th Jan 2008 | 生活點滴 | (23 Reads)

俾小豬爸吹吓之後,終於都著手去處理我嘅結婚相啦!

經過我幾晚嘅努力,終於都揀好晒乜相,因為有好多都係差唔多,只係近鏡同遠鏡分別。由原本嘅千幾張,揀到晒八百幾張,係前日拎左去晒....今日終於都拎左啦!

唔覺唔覺...原來我都晒左好多相呀~~

因為有D要晒返俾小豬媽,又要晒返俾親戚朋友,所以都有咁多呀!

不過...又係一個重要任務開始,要分番D相俾大家。真係要努力加油....先得啦!

P.S:
珍珍 ~~ 嗰幾張相晒左出嚟個效果都好好呀!真係唔該晒你呀!


*♡♡小肥豬♡♡* | 10th Jan 2008 | 生活點滴 | (20 Reads)

頭先收到電影公司SEND嚟嘅E-MAIL!

睇完《27宜嫁》嘅電影預告,答中題問就有機會贏到芝柏婚紗攝影套餐啦!有好介紹當然要話俾各位姊妹知啦!

我都已經參加左啦!如果抽到就好,真係好鐘意佢地個玫瑰教堂,咁就可以去影結婚相啦!

我都知機會好微,不過試吓冇壞呀!

你地都快D參加,20號就截止啦!

http://www.foxmovies.com.hk/game/question.aspx


*♡♡小肥豬♡♡* | 9th Jan 2008 | 生活點滴 | (19 Reads)

依幾日都唔知仲乜成日都眼眉跳,都已經跳左成兩三日,仲要唔係跳幾吓,好似閃眼咁,都唔知仲乜....唉!

不過跳來跳去都係同一個位置,係左眼嘅眼角上面...真係攪到唔係好舒服,我指係心理上呀!

因為之前成日聽人講眼眉跳個位置可以知吉凶,不過就唔知係『左凶右吉』定『左吉右凶』。依家我個眼眉跳情況都唔知係好定唔好,攪到都有少少驚驚地。

成日都怕係件唔好嘅事,最大問題就係唔係只係跳一兩吓,都跳左成幾日啦......

希望只係醜嘅唔靈,好嘅靈......冇乜特別事會發生啦!

不過講起,唔知眼眉跳正確講法係『左凶右吉』定『左吉右凶』呢?有冇朋友仔知道呀!


*♡♡小肥豬♡♡* | 7th Jan 2008 | 生活點滴 | (17 Reads)

2008年已經過左七日,不過係OFFICE張枱就仲有一樣野未買,就係一個08年嘅座枱月暦啦!

其實係上年年尾都已經想買定,不過因為一直都搵我嘅最愛- 玉桂狗嘅月暦,(我上兩年都係用佢呀!)

搵左好耐都搵唔到,終於都放棄唔再搵玉桂狗,打算買第二最愛- MARIE啦!

不過都唔知點解,唔想買嘅時候就有好多地方有得買,當我想買嘅時候就搵極都冇....真係奇怪呀!

終於都係今日俾我係一間小店舖買到,仲做緊特價,哈哈哈....當然就即刻買左佢啦!

好野...OFFICE張枱終於有月曆啦!

不過話事話,依幾日冇月暦用真係唔係好方便,每次要填日子時,都會習慣個頭轉向之前放月曆個位...原來一個小小嘅月暦位置,都真係會成習慣呀!


 


Next