香港新浪網 MySinaBlog
*♡♡小肥豬♡♡* | 29th Dec 2007 | 生活點滴 | (26 Reads)

依兩日因為大肥豬要開OT關係,所以又係返小豬媽屋企食飯嘅時候啦!

依兩日都係放工就即刻返屋企,用自己條鎖匙開門。一入到屋,又訓係梳化度睇電視,坐番平時個位打電腦等食飯......好似時光倒流,返去未結婚時咁。

依兩日剛好細佬都有番嚟食飯,咁我地又一家人齊齊整整,又開開心心咁食飯,真係覺得好開心...好滿足呀!

個感覺真係奇怪,以前都成日一家人食飯,但都冇依種感覺。唔知係唔係嫁左之後,特別珍惜同佢地一齊嘅時候呢!

食完飯,大家又坐番平是坐開嘅位置睇電視,雖然電視節目都唔係太吸引,不過總覺得依個時候係好開心呀!如果唔係小豬爸提我,我都唔知道已經好夜要走啦!(兩晚都係小豬爸提我走,我知佢並唔係唔想見到我,只係擔心我一個人夜走有危險,其實我知道佢係好唔想我走呀!)

嗰一刻.....真係好想時間停留,咁我可以留多少少時間呀!

依兩次都係自己一個人走,大肥豬就係車站接我。係返去途中,車上面又諗起好多之前嘅野,都有少少眼濕濕呀.......都係嗰句啦....唔捨得佢地呀!

之前都覺得佢地好錫我,不過依家覺得佢地仲錫我呀!


*♡♡小肥豬♡♡* | 28th Dec 2007 | 生活點滴 | (31 Reads)

依幾日掛住POST番結婚嗰日嘅情景,所以就唔記得左講番聖誕節做過乜。

好啦~~就等我依家講番啦!

24/12 平安夜

我地一班校務處同事開左個小型大食會。

糖糖整左凍雞腳同藍莓芝士蛋糕,另外又有工友英英炒左一D粉麵....之後我地又叫左PIAZA,總之好多野食,食到個個都好飽飽呀!(掛住食唔記得左影相添!)

除左食之外,當然唔少得抽獎交換禮物啦!原來我地都有好多份禮物....


最後我抽到由糖糖提供嘅叮噹茶壺SET,留番係新屋用,都幾合好呀!

講起禮物,我依個大頭蝦差D唔記得左拎D禮物番學校呀....好在大肥豬係我臨出門口返工前提我拎,如果唔係就冇得玩抽獎啦!

冇得放早....(好慘呀!),食飽飽之後,做多一陣野,等到五點就即刻走人,去旺角同大肥豬去街街啦!

一出到旺角,都見到周圍都都人,為左唔想太多人食飯,所以大肥豬就提意早少少食飯。咁我地就去左我至愛食嘅野.....壽司啦!可能我地早啦,所以都完全唔洗排隊,仲可以係好舒服環境吓食飯呀!

食飽飽之後,我地就四周圍行吓,準備買禮物聖誕節去小豬媽屋企玩交換禮物啦!

買晒我地D禮物之後,都非常之倦啦...所以就番屋企啦!

由於之前我地都決定唔買禮物俾對方,想留多D錢買野入新屋。但大肥豬都買左件衫仔俾我,等我都有禮物仔收呀!真係開心呀!

就係咁.....過左我婚後第一個極度平淡嘅平安夜啦!不過有時平平淡淡都幾好呀~~最緊要兩個人過得開心嘛!

25/12 聖誕節

下午約左小豬媽去行商場,睇吓有冇特價野買嚟準備放入新屋,點知...要新一年先有得做特價。不過我都睇中左新洗衣機,等一月一號做特價就去買,平成幾百蚊嘛。(真係師奶仔啦!)

之前就去左專賣梳化地方睇野,大肥豬終於都抵受唔住,買左佢張DREAM梳化啦!(真係開心到佢呀....有聖誕禮物收呀!)

行完晒街街,就陪小豬媽買餸準備聖誕打邊爐餐啦~~

我地約埋契大佬一家打邊爐,睇吓佢地幾開心....


(掛住影相...小肥豬冇得入鏡呀!)

食飽飽之後,當然就係抽獎時間啦!

唔知係唔係知我就嚟有新屋,抽到嘅禮物都係好合新屋用。

大肥豬就抽到兩隻大碗....(由章章負責扮獎)

我就抽到一SET浴室用品。(由於時間關係...又唔記得同自己影相呀!)

就係咁....過左一個好開心又有好多禮物收嘅聖誕節啦!


*♡♡小肥豬♡♡* | 27th Dec 2007 | 大囍日子 | (274 Reads)

嚟到婚宴最後一個環節,換埋最後一套晚裝啦!就係為左依件晚裝,我的起心肝去減肥。好在最後著到依條A-LINE裙,都唔係太肥。

換完衫當然又係影相時間啦!


不過因為時間關係,我地影想影得太高興,同埋又要同親戚影相,所以攪到有部分來賓走時我地冇送到佢地,真係唔好意思呀!

影完相之後,就趕住去送客啦!

送客都係好開心,不停係咁多謝...握手....都好好玩呀!

隨住來賓陸續咁離開,我地個晚宴就結束啦!

依個時候成個人都好似散晒咁,大肥豬就去埋單,我就番入新娘房換衫,咁我地個婚禮就順利完成晒啦!

 

仲有部分送客時影嘅相,放左入婚網相簿入面,Click 嚟睇下啦!


*♡♡小肥豬♡♡* | 27th Dec 2007 | 大囍日子 | (224 Reads)

換好左敬酒晚裝之後,當然又係我地兩個影番張相嘅時候啦!

係我地影相途中,小豬媽又走左上台要同我地合照,因為依件紅色晚裝係小豬媽最鐘意呀!

影左一陣相就到敬酒環節啦!原來敬酒都幾好玩,又好高興....行埋去都叫人飲多杯,都好開心呀!好在我地D朋友都算斯文,冇人迫我地飲酒,如果唔係都唔知點好,因為我地都完全唔識飲。

敬完酒之後,當然要分別同四大長老影相啦!

之後我地就四圍同D來賓影相。係依個時候先知原來有好多來賓係席前係冇影到相,好在有依個時段補番呀!

差唔多同每枱影完相之後,就又係換送客裝嘅時間啦!

 

仲有部分敬酒時影嘅相,放左入婚網相簿入面,Click 嚟睇下啦!


*♡♡小肥豬♡♡* | 27th Dec 2007 | 大囍日子 | (261 Reads)

係換衫進場時,自己都已經十分..十分...十分緊張,因為都未試過係咁多人面前做主角,仲要上台講野,所以一路整頭我就一路腳震,係換鞋時仲震到著唔到鞋,要等一陣先著到呀!

酒樓職員安排我地係後面等進場,不過當套成長片開始播時,個心仲跳左出嚟咁,好驚..好驚....

當司儀叫我地出嚟時,第一吓真係唔知自己做緊乜,只係識笑...同跟住大肥豬行。

大肥豬仲扮晒明星向人揮手,真係俾佢笑死呀!

終於都行到上台,切蛋糕影相啦!

之後我地就交杯!

我地講感謝說話啦!大肥豬開頭都話完全唔會準備係依個環節講乜,點知就講左好多野...

我自己呢!原先都有諗過講乜,不過到上頭要講野時個腦就一片空白,完全唔記得左講乜....最後連大肥豬都唔記得多謝。(一落台就俾佢話我唔多謝佢呀!)

係依個環節好出奇地我又冇大喊,只係眼濕濕咁啦!不過竟然LULU妹俾我整喊左呀!後來俾我知道原來小豬爸同細路都俾我整到眼濕濕,小豬媽就忍住唔喊。因為小豬媽知道如果佢一喊,我就一發不可收拾,我就會好醜怪呀!當知道成家人都有為我感動時.....我自己都真係好感動呀!

講完之後....就同來賓祝油之後,就入席食野啦!

不過我都好似冇乜點食野....食完片乳豬之後,又要補敬茶同影相..之後又要換衫準備敬酒啦!

 

仲有部分進場時影嘅相,放左入婚網相簿入面,Click 嚟睇下啦!


*♡♡小肥豬♡♡* | 26th Dec 2007 | 大囍日子 | (233 Reads)

終於都到我最愛嘅晚裝出場啦!

換完衫就即刻進行左一個簡單又隆重嘅切蛋糕儀式啦!

切蛋糕之後,由於D親友仲未嚟,所以攝影師就叫我地去『愛情大道』影相。影出嚟個效果真係好正,估唔到會咁靚呀!真係好鐘意依幾張相呀!最緊要影得我好FIT呀!哈哈哈~~

影完一陣相,又要開始敬茶同來賓影相。原來依件晚裝真係影左好多相呀!

係依個時間,大肥豬的所有家庭成員終於到齊,影左一張大合照呀!除左大嫂同佢三個仔女冇嚟之外,所有都嚟晒呀!

不過因為LULU妹同細佬留左係RECEPTION幫手,所以依件晚裝冇得影全家幅,只可以同小豬爸同小豬媽影呀!

之後又繼續同來賓影相啦......

影到又係酒樓職員叫我換婚紗準備進場先識去換衫呀!

 

仲有部分席前時影嘅相,放左入婚網相簿入面,Click 嚟睇下啦!


*♡♡小肥豬♡♡* | 26th Dec 2007 | 大囍日子 | (297 Reads)

係香港公園影完相之後,就即刻返我地婚宴嘅酒樓啦!

我一上到酒樓就即刻要換番件掛,準備要開始敬荼俾其他親戚。

雖然我地換衫嘅時間唔多,不過化妝姐姐真係好快手就幫我整好,仲同朝早個掛LOOK好唔同,有另一個睇法,我地都鐘意呀!

由於我地換衫換得快,所以見有時間就當然唔放過嚟影相啦~~

我地間酒樓有一條好靚嘅走廊,佢地叫做『愛情大道』,我地又係咁影影影啦!

不過依幾張相唔係我地個攝影師影呀,因為佢地去左休息未返到酒樓,依幾張相係其中一個兄弟用佢部專業機幫我地影。佢真係好在心呀,係主動提意帶相機幫我地影多D相呀!

玩左一輪,攝影師都係預定時間返嚟,所以又係時間影相啦!

當然要影番張單人照先啦!

因為大肥豬家族未齊,所以同老爺奶奶影住先

我們這一家

我一班好姊妹

影完先發現原來我地個攝影師冇幫我同大肥豬影係個LOOK合照呀...真係唔抵啦!

不過我地都忙到唔知自己做緊乜,不停咁影相...敬荼...,連要換衫切蛋糕都唔記得左,要酒樓職員提先識呀!

 

仲有部分酒樓掛妝時影嘅相,放左入婚網相簿入面,Click 嚟睇下啦!


*♡♡小肥豬♡♡* | 25th Dec 2007 | 大囍日子 | (249 Reads)

我地註冊之後,就係香港公園影左一陣外景相。就係因為打算係結婚當日影多一輯結婚相,所以我地先決定係紅棉路註冊。

不過唔知我地結婚嗰日係唔係勁好日,所以行過都有好多對新人係度影相,真係都好熱鬧呀!

由於預左係公園入面嘅時間唔多,不過攝影師傅都好好,一見有地方就叫我地影相。都係拎左相先知原來我地係短短四十五分鐘,都有影左成六十幾張相....真係勁呀!

有好多相我都好鐘意,尤其係樹底下面嗰批,再加埋個太陽光打落去,真係好浪漫呀~

 

仲有好多香港公園影嘅靚相,放左入婚網相簿入面,Click 嚟睇下啦!


*♡♡小肥豬♡♡* | 24th Dec 2007 | 大囍日子 | (217 Reads)

由於車程相當順利,入去紅棉路個停車場亦十分順利,所以比我地原定時間仲早左去到。當然有時間多,又係影相嘅時間啦!

行緊上去註冊處又影,好鍾意依張相,因為可以影埋我條靚靚婚紗尾。

係註冊處等門口又影...個攝影師真係好呀,成日都教我擺個POST,等我可以影埋條裙尾呀!



影左一陣相,個時間就差唔多啦!我地開始入去登記處等啦!依個時候我就開始緊張啦!

係等入註冊房時,又影相啦!

真係好開心,除左我地嘅屋企人之外,仲有一班好有心嘅BLOG友仔專登請假嚟參加我依個註冊儀式,好感動呀!

夠鐘啦~~要入註冊房等啦!不過嗰時真係開始有少少腳震,唔知點解...可能知道就嚟真真式式簽紙做人老婆,個心開始緊張啦!

等到個儀式開始啦!首先當然就係交換介指先啦!

之後就宣誓同簽紙啦!開頭都估自己又會變喊包,唔知係唔係緊張個頭,竟然唔識喊,只係識驚.....

但大肥豬就緊張個頭...連拎支簽名筆都調轉左呀...哈哈哈

完成左成個儀式啦~~~終於都做左大肥豬太太啦!

完成左依個重要時刻,當然要同四大長老仲有一班觀禮者影相留念啦!

離開個註冊場地,所有來賓分兩行拍手掌送我地出去,個感覺真係好正呀!

最後我地去左附近個圓形花園影大合照啦!

影左一陣之後,親友們就陸續離開啦....咁我地兩個就留左係香港公園影外影相啦!

仲有部分註冊時影嘅相,放左入婚網相簿入面,Click 嚟睇下啦!


*♡♡小肥豬♡♡* | 23rd Dec 2007 | 大囍日子 | (274 Reads)

經過半個鐘嘅車程,好快就去到大肥豬家啦!

一入到屋當然要同老爺奶奶影番張相先,第一次改口叫老爺奶奶,仲要好大聲咁叫,真係好唔習慣呀!

之後就開始拜神,不過就因為我地預先冇預計需要都幾多時間,所以都攪到有少少失去預算。你地都唔知我嗰時個心幾驚...怕時間唔夠呀!

完成左拜神儀式,就要敬茶啦!

原本大肥豬個家族都幾大,因為佢係排第八。不過因為嗰日早上好多哥哥都要返工,所以早上都係敬茶俾老爺奶奶同一位做兄弟嘅阿哥,其他就留係夜晚酒樓先敬茶啦!

完成儀式,當然又要影番張靚相啦!

好在完成晒所有儀式同影相之後,個時間都俾我預期中遲左少少,所以就同埋班兄弟姊妹急急腳去酒樓食LUNCH。

我就利用依個LUNCH時間,留左係酒樓入面間新娘房換婚紗啦!好在大姈姐都有拎少少點心俾我食,但嗰時都真係冇乜胃口食啦!

不過因為時間關係,攪到化妝姊姊都冇乜點食野就要幫我轉妝,又幫我換衫,等做伴娘嘅嘉汶表妹可以食多D野.....真係唔好幾好意思呀!

仲有部分回男家相,放左入婚網相簿入面,Click 嚟睇下啦!


*♡♡小肥豬♡♡* | 22nd Dec 2007 | 大囍日子 | (328 Reads)

終於收齊晒D相啦!等我慢慢打POST番D大日子嘅相,順便等我回味一吓先。

仲記得係嗰晚完成左上頭儀式之後,執多少少嘢就去訓啦。開頭都以為自己會緊張都訓唔到,但竟然出奇地可以大覺訓...真係估唔到呀!

由於約左化妝姐姐六點半就上到屋企,所以五點幾就要起身準備啦!

一早起身,小豬媽就煮左個公仔麵俾我同嘉汶表妹食,因為知道我地兩個一定成日冇乜得食,俾我地打定底。雖然個時真係開始有少少緊張,唔係太有胃口食,不過小豬媽嘅心意真係唔可以浪費,所以我都好快晒食晒呀!(嗰時真係覺得好WARM呀!)

食飽飽之後,首先就係嘉汶表妹化妝先,之後就到我啦!

我揀左用新鮮紅玫瑰做為頭花,因為總係覺得用鮮花襯掛係好靚呀!整好晒就等大姈姐姐幫我換掛,之後就等接新娘啦!

當然係等接新娘前,同一班姊妹影相先啦!

依個時候大肥豬亦都嚟到屋企樓下,係上嚟之前就同一班兄弟影相啦!

一入到屋,當然就係玩新郎時候啦...

首先就係玩瑜伽,睇吓大肥豬做個動作幾攪笑。

之後就係玩食提子,要係一分鐘入面食晒99粒,俾條口水肩等佢地唔好整污件衫...其實都係想睇吓佢地個BB樣。


當然唔少得愛的宣言同唱歌仔啦!(多謝嘉汶表妹整左份靚靚愛的宣言。)

玩完一輪遊戲,當然到最重要環節,俾開門利是啦!

係依個時候就由小豬爸由房帶我出嚟,係我完全唔知情吓,一行出廳就有班兄弟開花炮,個氣氛真係好好呀!後來問番大肥豬,原來係其中一位兄弟準備,連大肥豬事前都唔知呀....

小豬爸就將我交左俾大肥豬。

接到新娘,就當然開始敬茶啦~~~

開頭我都好怕依個環節,因為我估計我一定會變喊包。不過...我一直強忍,唔俾自己喊(因為小豬媽講過要我一定要開開心心咁敬茶俾佢,唔準我喊),最後都只係有少少眼濕濕,不過都忍得幾辛苦呀!

敬茶之後,就送禮物時間啦!小豬媽同小豬爸分別將買俾我嘅嫁妝幫我戴上,真係又令我好感動呀!

小豬媽仲買左手錶送俾大肥豬呀!

係依個時候,小豬媽又俾左一個驚喜我!就係拎左兩張迪迪尼全年通行証送俾我地,仲要係任何時候都可以去嗰種,真係開心到唔知點形容呀!

完成所有儀式,就嚟影番張全家幅啦!

之後影左一陣相,等到夠鐘就出門啦!

係屋企樓下,係花車前影左一陣相。(真係好鐘意對花車公仔呀!)

影完相之後,我地就出發回男家啦!

仲有部分接新娘相,放左入婚網相簿入面,Click 嚟睇下啦!


*♡♡小肥豬♡♡* | 21st Dec 2007 | 生活點滴 | (48 Reads)

原本話大日後嘅十日內就可以拎到我地嘅靚相,不過一直都等..等...等.都仲未收到佢地電話叫我去拎相,終於都忍唔到尋日打電話去追。

俾我地追吓之下,終於都係今日拎左我地嘅相啦~~~哈哈哈,真係開心啦!

原來我地成日都影左約一千七百幾張相....唔知算唔算多呢?我地JOIN個PLAN係拎番晒D數碼FILE,自己拎去晒。諗起依度就真係有少少擔心...因為有排晒相同分相呀!不過..依D係開心事,冇計啦!

返到屋企就即刻放入電腦睇相啦....不過有少少唔開心就係其中一個晚宴FILE開唔到,睇唔到我晚宴嘅相呀.....有少少吊引,回味唔到晚宴個情況。

聽日又要去多次拎埋其他底片啦!

等我收齊晒之後,就可以UPLOAD上嚟俾大家睇啦!大家要等我呀!


*♡♡小肥豬♡♡* | 20th Dec 2007 | 生活點滴 | (27 Reads)

之前經糖糖介紹,係FACEBOOK開左一個ACCOUNT,不過..一直都開左係度,冇乜點理佢…因為都真係冇乜時間去究竟係點玩。

隨住依家已經冇咁忙,所以每日除左上BLOG外,依排都成日去FACEBOOK睇吓,究竟吓!

睇睇吓,開始識識地玩,所以依排都成日上去收吓禮物,又SEND吓野俾人...又好似幾好玩哦!

除左依樣,我仲發現佢地個相簿原來可以放好多張相入去,咁又好似幾好哦。

依家先開始玩會唔會好OUT呢?大家有興趣就ADD吓我啦!哈哈~~


*♡♡小肥豬♡♡* | 19th Dec 2007 | 生活點滴 | (30 Reads)

今日成個人都已經俾D藥攪到渾渾噩噩,唔知自己做緊乜....

點解要係依個時候俾D咁嘅剌激我.....真係唔知俾乜反應好呀!

雖然,依樣嘢.......係可以唔洗理會,同埋完全冇根據,根本可以唔當一回事。不過...始終講嗰個係你長輩,唔通完全唔理佢.....總之就係煩煩煩啦!

好在今次我地兩公婆嘅意見同態度都係一致,冇受任何嘢影響到我地個決定。

話雖如此,真個心情都攪到極度唔好....好想快D解決晒D野.....

都係嗰句:快...快.....快啦!


*♡♡小肥豬♡♡* | 18th Dec 2007 | 生活點滴 | (16 Reads)

今日一早起身就勁頭痛,又周身骨痛。仲唔知...個肚又係咁『咕嚕咕嚕』,真係幾辛苦呀!

原本都已經洗晒面,準備換衫返工,不過最後都係頂唔順,跳番上床訓訓訓,唉....所以就冇返工啦!

訓醒之後就去睇醫生,依個都有少少問題,就係唔知去邊度睇醫生好。之前都會去慣左屋企附近間醫生睇,不過依家搬左過海住,都唔知邊個醫生好,都有少少煩惱呀!最後問大肥豬先知去邊度睇醫生。

睇完醫生,都係因為轉天氣,所以攪到感冒入腸胃,真係慘...

不過食左兩次藥,訓左成個下午,依家好好多啦!起碼精神左D同冇頭痛,但食左藥就攪到個人好吽,完全唔知自己做緊乜呀...

依家D天氣真係唔係太好,時凍時熱,大家都真係要小心身體呀!


*♡♡小肥豬♡♡* | 16th Dec 2007 | 生活點滴 | (32 Reads)

今日我地間新居拜神啦!

原來新居拜四角都係一個好重要嘅儀式,因為係你第一次真真正正入屋,拜完神間屋就係屬於你呀!加上小肥豬我仲係一個幾迷你嘅人,所以拜完神之後又好似十安心D呀!

不過可能係第一次自己負責,真係好多野要準備,好在小豬媽之前都幫我買定D,不過都有好多野呀....

原來拜神都真係有一門學問,都有一個次序同禮儀。好多野都唔識呀....不過好在今次有契大佬,因為我地都唔係太識有關拜神同淨化間屋嘅野,所以佢今日就幫我手去攪,真係麻煩晒呀!

咁拜完神之後....就可以開始動工啦!攪埋D裝修就得啦!

都全嗰句~~~希望可以快快快啦!


*♡♡小肥豬♡♡* | 14th Dec 2007 | 生活點滴 | (27 Reads)

經過一輪銀行同律師樓嘅文件處理,終於都係今日完成晒所有野,可以拎我地新居鎖匙啦!

今日拎新居嘅鎖匙,身為女主人嘅小肥豬都應該出席依個咁重要時刻。原本都PLAN好左放工就即刻飛去會合大肥豬,一齊去感受做業主嘅一刻。不過諗就係咁諗,因為今日有某同事嘅不合作...吹極都唔交齊文件俾我,所以都攪到唔可以準時放工,仲要好遲先走得,真係激死我呀!好唔開心呀......真係好嬲呀!

就係因為依個原因,所以依個重要時刻就交左俾大肥豬一個人做啦!好在一切都好順利,簽左一輪文件就攪好,拎到鎖匙啦!

依家拎左鎖匙,咁就可以攪裝修、買傢俱、其他濕碎野...咁就可以入去住,咁就有我地嘅小天地啦!

真係希望所有野都可以..快...快....快啦!

 

 


*♡♡小肥豬♡♡* | 14th Dec 2007 | 生活點滴 | (21 Reads)

由於大肥豬屋企部電腦都已經好OUT..OUT..OUT,所以依幾日想裝番個MSN玩都唔得…所以日日都係睇吓自己個BLOG之後,就冇乜做其他野玩(因為部機又真係LOAD得幾慢,攪到冇晒心機),所以都幾悶呀!

不過由今晚開始就可以唔同啦~~因為大肥豬已經買左一部新電腦俾我,仲係尋晚安好晒D野,等我有得好ENJOY咁玩啦!

我第一時間就即刻安番個MSN,咁大家又可以見到我ONLINE,同D朋友仔傾計...真係開心呀!

其實我地一早都有打算買新電腦,不過開頭都打算係新屋先買,費時搬來搬去嘛!

不過大肥豬知道我平日好鐘意玩電腦,依幾日見我冇得玩怕我會超悶,所以就提早買俾我,仲要買左番嚟先話我知呀!

哈哈~~大肥豬今次真係抵錫呀!


*♡♡小肥豬♡♡* | 13th Dec 2007 | 生活點滴 | (22 Reads)

尋晚返左小豬媽屋企食飯,印象真係好深刻,真係好唔捨得呀!

其實婚後都已經係第二次番屋企食飯,上次可能因為同埋契大佬一家一齊食,所以大家一齊有講有笑咁走,個心都冇咁唔捨得。

不過尋晚走嗰時係得我地兩公婆,所以攪到我諗起好多野,諗起小豬媽同小豬爸平日點錫我、平日我係屋企嘅生活…同佢地一齊生活嘅野都一吓間湧現係個腦入面 - 一放工返屋企就可以好FEEL咁訓係梳化度睇電視,一係就玩電腦玩到等食飯,之後又繼續玩..繼續睇,食飯時又成日有講有笑,又有小豬媽日日都幫我整愛心飯盒俾我返工食...夜晚等整人番屋企先訓得安心,仲有好多好多野..

終於都係搭車途中忍唔住喊左出嚟,個吓都嚇親大肥豬,仲要佢不停咁安慰我先,個心情先叫好少少呀!

雖然我差唔多日日都可以見到小豬媽,因為我日日放工都約左去TEA吓先番奶奶度,平日分手時都總有少少唔搭得。

但係唔知點解尋日自己會咁,可能真係仲未完全習慣冇左屋企人係身邊,尤其係由自己屋企離開,真係好唔捨得呀!

真係要多D返屋企食飯先得啦!


*♡♡小肥豬♡♡* | 12th Dec 2007 | 生活點滴 | (20 Reads)
今日收到第一張聖誕咭,不過...應該話係做左依份工咁多年收到嘅第一張咭,所以都真係好開心呀!個學生真係好叻,冇寫錯我名呀!哈哈~~


可能因為我地成日STAY係校務處,所以同學生嘅感情唔會特別好好。(因為通常入嚟校務處都唔係有乜好野,有時仲會俾我地話,所以感覺上一般學生都有少少怕我地)

所以今次收到依張聖誕咭都真係好開心同驚喜...因為真係冇諗過會有學生送聖誕咭俾我。雖然都只係一張少少嘅咭,不過都覺得好有意義呀!起碼表示依個學生對我嘅一份心意呀!

真係要好好KEEP住依張咭先得啦!



Next