香港新浪網 MySinaBlog
*♡♡小肥豬♡♡* | 31st Aug 2007 | 生活點滴 | (19 Reads)

今日終於都擁有一部NDS啦~~

成日都15/16,好想買嚟玩,不過又怕好大洗錢...都考慮左好耐啦!加上次次講話想買,大肥豬都話唔好,所以都冇買到。

係前幾日LULU妹話想買時,我又多口問左大肥豬一次,今次佢竟然話俾我買呀!真係超乎我想像....

竟然佢話俾,所以今日放工就同大肥豬出去買我依部NDS啦~~~真係好開心呀!

終於都加入左NDS行列啦~~

大家有乜好GAME記得介紹俾我依個新丁呀!


*♡♡小肥豬♡♡* | 30th Aug 2007 | 婚禮籌備 | (72 Reads)

成日都好想整個婚網,因為可以多一個地方記錄我地個婚禮!

其實好多野都已經係BLOG上記錄左,但因為都有好多我自己嘅私人事,好多野都唔係太方便俾自己嘅親人同朋友睇,所以都係要SET番一個婚網俾親戚朋友睇,好似好D嘛!

不過一向唔叻整網頁嘅小肥豬,話整話整都好似整唔到,因為都唔知點去SET-UP。原本都有打算用 ESD個版面整,不過佢地又唔可以放太多相上去…攪左好耐都唔成功,真係有少少失望呀!

當我想放棄嘅時候,就收到ARWIN嘅好介紹啦~

尋晚ARWIN介紹左一個新關係籌備婚禮嘅網頁俾我,我見有一個類似BLOG嘅地方就去睇下。整整吓,我又UP晒兩輯婚紗相上去,咁就俾我整左一個出屬於自己嘅婚網出嚟啦!

雖然個網頁原意係以一個BLOG形式,不過我唔理啦,當左係自己個婚網呀!

依家可以將依個俾D個網址俾各位親戚朋友睇啦~真係開心呀!

依家雖然仲係好簡陋,大家有時間都去參觀下啦!記得開埋喇叭,有正歌聽呀!

俾D意見我呀~

記得要留埋言俾我呀~

http://www.darizi.com/hk/blog/yanyan_hinghing/

 


*♡♡小肥豬♡♡* | 29th Aug 2007 | 生活點滴 | (20 Reads)

我地一向都有買六合彩嘅習慣,因為希望有朝一日可以大到獎嘛!為免唔記得左買,所以我地都習慣一次過買三十期。我嗰條號碼就係我結婚日子嚟呀~~

今日放工大肥豬話我知我地D六合彩已經到期,所以大肥豬路過就幫我買新三十期啦!

頭先路過馬會,見冇乜人,咁就貪得意入去CHECK吓張飛啦,到期望唔大啦!因為剛剛過左嗰三十期我都有對過吓,唔覺得有中過!

點知當我俾左張飛個職員入機CHECK時,嗰個職員姊姊就俾左$40我。

原來我都中左2次3個字呀!

真係...中左獎都唔知呀!好在我貪得意去吓CHECK,如果唔係都MISS左啦~~

我將依$40換左2張電腦飛,希望好幸可以繼續KEEP住啦!


*♡♡小肥豬♡♡* | 28th Aug 2007 | 生活點滴 | (25 Reads)

今日一返工就去左幫老師做會議記錄,開頭都好地地,只係個人完全唔知做緊乜係度遊雲,可能未訓醒啦!成個會都唔知自己寫左D乜,唉....最衰個會又開得好耐,都唔知算,有排作番篇記錄啦!

不過我一路寫野,就唔知點解越嚟越覺得唔舒服,感覺由心凍出嚟,仲起晒雞皮呀!我估係把風扇係正我頭上面吹,仲要個風都幾大呀~~可能就係咁吹病左啦!

唉~~所以成個下午都唔係好舒服,D鼻水不停咁流.....真係好慘!

放工返屋企就跳左上床訓,訓到食飯先起身,依家都呆吓呆吓。

今晚真係要食粒感冒藥早D訓先得啦!


*♡♡小肥豬♡♡* | 27th Aug 2007 | 生活點滴 | (16 Reads)

其實尋日都仲有一件開心事發生左呀~~

當大肥豬仲未嚟到送蛋糕時,佢就SEND左一個SMS俾我,入面係一張鄭嘉穎嘅相呀~~

我覺得好奇怪,咁就即刻打俾佢問吓啦!原來嘉穎係佢屋企附近拍劇呀!

佢話當行去搭車時,見到嘉穎自己一個係度睇緊劇本,佢見四周都冇人,就行左去同嘉穎影左依張相,仲傾左兩句同握手呀!大肥豬話因為四周冇人,所以唔可以合照,唯有幫佢影一張相俾我啦!

好羨慕呀!我都真係未見過明星,握手仲更加未試過啦!

不過真係要讚吓大肥豬呀,因為佢竟然會走埋去同嘉穎講野,仲要影埋相....怕羞嘅佢平時都唔會做依樣野,可能見我係生日,想俾一個驚喜我啦!因為佢都知我係鐘意嘉穎呀!如果係其他明星,我估佢都唔會行過去呀!所以都真係好開心呀!

如果我當時在場就好啦~~咁我就可以同嘉穎合照啦!不過依家有一張獨家照,都好滿足啦~


*♡♡小肥豬♡♡* | 26th Aug 2007 | 生活點滴 | (18 Reads)

今年生日真係好開心呀~~

首先就係當昨晚剛剛過左十二點時,有兩位朋友仔係MSN同我講生日快樂(仲早過大肥豬同我講呀)~~真係好多謝佢地兩位,佢地真係好有我心呀!

今朝一早起身,大肥豬就拎左一個蛋糕仔俾我啦!不過因為趕住去街街,所以留番去完街街先食啦~~

依條腳手鏈就係大肥豬送俾我嘅生日禮物啦!

點解會係腳鏈?因為我之前曾經睇過一個電視節目,話戴腳鏈係可以有助聚財,咁我就同大肥豬講啦!咁就有左依份禮物啦!不過我戴都係為左幫佢聚財呀!(哈哈!)

我地今日主要節目就係去山頂蠟像館,我一直都好想去,不過一路都冇藉口去,所以今日就當係一個生日節目啦!我地同埋LULU妹一齊去,因為佢好想去同TWINS影相呀!我覺得到唔緊要,因為生日唔一定要過二人世界,最緊要就係大家一齊開心嘛!

當我地一入到蠟像館,就不停咁同D明星影相啦!不過都係我同LULU妹影多,因為大肥豬話唔想同D蠟像影!

係蠟像館入面有好多唔同國藉嘅明星,我地都係鐘意同我識嘅明星影,所以好多都係香港明星呀!不過有好多明星都唔係太似樣,都係得幾個似呀~~但我地都唔理,影晒先算啦!我同LULU妹都好勁咁影左百幾張相呀!

我覺得最似就係依幾個呀~~

黎明~~不過好似黑左少少!


基仔~~我覺得最似就係佢,不過最衰KUBI唔可以拎起嚟影!

寶珠組~~真係幾似呀,等我扮埋大戲造手先!

千嬅~~一般似啦,佢會無端端發出D笑聲,唔知都幾驚呀!

衛蘭~~最新蠟像,不過都係麻麻地似呀!

行完蠟像館之後,行左山頂一陣,就走啦!

之後就去左北角食日本野,講真間野又真係麻麻,不過好在唔多人,感覺都幾好呀~~

大家食飽飽之後,就番屋企食蛋糕祝願啦~

我今年嘅願望就係希望大肥豬心入面嗰兩個問題可以好快解決,佢可以開開心心!因為佢好就即係我好嘛!

今年生日真係好開心...好開心.....好開心呀!真係覺得好有好多人錫呀!有一班好好嘅朋友,有一班好好嘅同事,又有好好嘅屋企人,當然仲有好錫我嘅大肥豬....我真係覺得好幸福呀!


*♡♡小肥豬♡♡* | 25th Aug 2007 | 婚禮籌備 | (46 Reads)

今日放工就去左旺角拎番我SCAN左嘅羅浮宮依輯靚靚婚紗相啦~

今次去左旺角嗰間鋪頭SCAN,真係好抵呀!不過我覺得佢地D邊位整得唔係太好,要自己慢慢整番好D位,不過唔緊要啦~~可以係整嘅過程入面睇下自己個靚靚樣呀!

真係越睇越鐘意依輯相呀~~

最鐘意依個中國造型呀!

兩次影依D民族服裝都好有驚喜,上次宮廷FEEL已經好鐘意,今次個中國FEEL就仲喜愛!

大家有興趣就可以去

婚禮倒數 - 羅浮宮婚紗相 慢慢睇啦~~

記得睇完要讚吓我呀!(真係唔知醜,迫人讚自己)

 

 


*♡♡小肥豬♡♡* | 24th Aug 2007 | 婚禮籌備 | (25 Reads)

今日放工就去左羅浮宮拎番我地D靚相啦~~

今日都只係拎左相簿同底片呀,原本仲有一張油畫,不過佢地個框做錯左,所以要再做過,唯有再等兩個星期先再有得拎啦!(不過真係要讚吓佢地個服務態度,當發現有問題時,嗰位版部同事真係好有耐心咁幫我解決個問題!)

一邊慢慢睇相簿,就發覺佢地真係整得好好呀~(比新天地整得好好多呀!)佢地除左大相簿整得好之外,連細相簿都有執過下。

當我地拎完晒D相之後,就即刻去左旺角SCAN底片,真係好,聽日就有得拎,真快手啦!所以大家就要等多一日先有我嘅靚靚相睇啦~

PS:
車車~~唔該晒你呀!
糖糖~~你星期一就要開工幫我整MV啦!哈哈


*♡♡小肥豬♡♡* | 24th Aug 2007 | 生活點滴 | (26 Reads)

雖然仲有幾日先到小肥豬嘅生日,不過今日一班同事俾左個驚喜生日會,真係冇諗過佢地會提早同我慶祝,好開心呀~~

當佢地拎個蛋糕俾我時,真係好驚喜同感動呀,攪到我有少少眼濕濕呀!(睇吓我個樣真係笑到見牙唔見眼)

睇吓我個蛋糕幾靚靚~

佢地都送左好多禮物俾我呀~~真係收獲豐富!樣樣都好鐘意呀!

首先有一張好靚靚嘅生日咭,仲要係我至愛玉桂狗呀!

佢地仲送左個好可愛嘅玉桂狗鐘俾我呀,真係好得意呀!雖然有人話送鐘唔好,不過我地新潮人冇有怕,個同事仲話左一句好有意思嘅話:依個係代表從一而終呀!

另外同事B小姐佢送左係個狗仔雪豆咕咕俾我呀~真係好軟林林,好好抱呀!隻狗仔樣好攪笑呀!

另外,有一位已經退休嘅工友姐姐,佢托同事送左一份韓國手信俾我呀!因為佢知我差唔多就嚟生日,所以送多左一個散紙包俾我呀~

仲有呀~~我老細之前去左旅行,佢買左一個琥珀老鼠仔俾我做手信呀~~

今日真係好開心呀~~仲收獲好豐富呀!真係好多謝咁多位同事呀~~多謝你地俾左個驚喜生日會我呀!

同場加映:

今日一返到工就同老細講請假去攪排期問題,唔知佢係唔係一早知道我要結婚呢?所以我一開口講時,佢都已經笑笑口,仲恭喜我呀~~真係放下心頭大石啦!

今日真係超開心呀~~


*♡♡小肥豬♡♡* | 23rd Aug 2007 | 生活點滴 | (19 Reads)

話咁快我個悠長假期就結束啦,聽日就要回歸現實(包括我D指甲油,冇得塗啦!),要一早起身返工啦~真係有D唔習慣呀!

真係好唔捨得呀~~~好唔捨得晚晚可以睇埋妙手仁心先訓,朝朝可以訓到好晏先起身,鐘意幾時去行街街都得。依D開心生活又真係幾好呀~~哈哈!

唔知幾時再可以有悠長假期呢?結婚都係晒最多請三日假左右,我諗最快都要等出年暑假啦~~

唉....

聽日一返到工就要同老細請假(9月3日去交結婚通知書呀)。今日叫糖糖幫我留意老細心情,好在都幾好,希望明天請假可以順順利利~~


*♡♡小肥豬♡♡* | 23rd Aug 2007 | 靚太廚房 | (59 Reads)

之前都曾經整過好多次曲奇餅,不過次次都唔成功!一係就濃晒唔知變左乜形狀,再唔係就完全唔鬆化....好難食呀~

今日見有時間,就再試吓整啦!基本上我都完全冇信心可以整到!不過打算整俾一個好鐘意食曲奇嘅朋友仔食,又可以幫佢試下個食譜得唔得嘛!

整整吓,又好似得得地哦,係餅時有少少難,時大時細咁!有D唔知唧到似乜,又唔要得啦!所以整左好多麵粉漿,但有整得出嚟都唔係太多呀!

但今次焗出嚟又幾OK哦~~真係有少少成功感呀!不過有幾粒就好鬼濃,我請左籮叔叔食左啦!

等凍左少少,試左一粒...又幾好味哦~~不過就好似有少少唔夠鬆,下次一定會更好味!

哈哈!終於都成功左啦!不過唔知係唔係撞手神先整到呢?

依一包就係我第一次成功整到嘅曲奇啦!我將會送俾一個係上個星期生日嘅朋友仔食,雖然係遲左少少,但希望佢唔好介意,同鐘意食啦~~(雖然係第一次整,都有少少水準呀~~哈哈!)

另外,我見整好曲奇餅,仲有少少牛油係度,所以就又整朱古力蛋糕仔啦~~

不過唔知點解次次整極都係爆裂樣....唉,不過唔理啦,好食就最重要嘛!

牛油曲奇

材料 :

高筋粉 75 g
鷹栗粉 45 g
麵粉45 g
牛油 125 g
糖霜 63 g
蛋白 30 g

做法 :
1)牛油放室溫至軟物備用
2)高筋粉、麵粉、鷹栗粉過篩,篩去粉粒
3)將牛油及麵粉用打蛋器打勻,再加入蛋白
4)最後加入所有粉類,打至完全混合
5)放入唧袋唧出喜愛型狀
6)爐溫180度,焗約30分鐘至乾身


*♡♡小肥豬♡♡* | 21st Aug 2007 | 婚禮籌備 | (18 Reads)

今日好乖咁去左大肥豬公司樓下等佢,打算俾個意外驚喜佢,就係陪佢食LUNCH!

不過...原來由地鐵站行到去佢公司條路都幾甘,加上我又著左一對三吋高嘅鞋仔...真係都幾辛苦呀!不過為左俾個驚喜大肥豬,唔緊要啦!真係廿四孝女朋友啦!(唔知醜係度讚自己!)

食完LUNCH,我就去左金鐘政府婚姻登記辦事處交我地個身份證副本啦!因為要交副本俾佢地落實個籌呀!

原本可以FAX去呀,我真係好驚佢地話收唔到我地D身份證副本,咁就唔俾個籌我地,到時都唔知算....所以都係親身交去安全D!(我見我放假又冇野做,當係其中一個節目啦!)

交完之後個職員就再一次叫我9月3日帶埋$305去揀時間。係臨走時個職員又好攪笑咁叫我帶埋雙方父母嘅中英文名去做登記。真係攪笑呀~我地當然知道自己嘅父母名啦,不過佢咁都係出於一番好意!

真係好心急呀!希望快D可以揀到時間,咁就真係可以放心晒啦!之後又可以去整帖啦!


*♡♡小肥豬♡♡* | 20th Aug 2007 | 婚禮籌備 | (37 Reads)

由尋晚開始,就已經好緊張呀~~~因為要拎籌啦!

緊張係因為CHECK過原本紅棉路係得23個註冊時間,但又係好多人都會選擇去嗰度註冊哦,你都唔好話唔擔心呀!

尋晚都訓得唔係太好,成晚都好驚訓過頭,唔知醒.....終於係七點幾就醒左,坐係電腦前面等夠鐘啦!

終於等都八點啦~~不過一入去就話我D資料已有人登記左,一問之下,原來大肥豬已經登記緊啦!

終於都係佢叻番一次啦!佢拎左一個好好嘅籌呀!

遞交結婚通知書的籌號              11
選擇舉行婚禮時段的次序           1

聽到真係好開心呀~~~雖然就係第11籌,不過揀時間可以係第一呀,真係放心左大半啦!(另外嗰一半等我揀埋時間就可以放心晒啦!)

係度真係要好多謝小賢、小M同車車呀!佢地有份幫我手拎籌呀!佢地真係好有心呀~~真係好感激佢地呀!

依家就要等9月3日去揀埋時間,就可以放心晒啦!

不過又有一個問題出現啦!因為9月3日係開學日呀!都幾難請假呀,所以我就要被迫早D同我老細講我要結婚去交擬結婚通知書同去揀時間,希望佢可以俾我請半日假,去辨手續啦!


*♡♡小肥豬♡♡* | 19th Aug 2007 | 生活點滴 | (22 Reads)

今日去左同大肥豬屋企人飲茶,飲完茶見冇乜地方去,就上左大肥豬家姐屋企坐吓啦!

原本都只係打算坐吓,點知大肥豬阿嫂就建議打吓麻雀仔,仲叫我落場『鄧』腳呀!但由於我都唔係太識打麻雀,完全唔識計幾多番同食乜,只係識打三隻一樣嗰種。不過佢地為左就我都話打細D,所以都當陪佢地玩吓啦!加上大肥豬又會陪住我打,冇咁驚呀!

點知都唔知乜事...由三點鐘開始打,打左成兩個鐘,一次都冇食個糊,仲要包人地一鋪(不過我唔知點解要包,佢地叫我俾錢就俾啦!)

真係超級黑仔王呀!見情況唔得啦,輸左幾鋪就俾番個大肥豬打嚟,都係睇人打,同D小朋友玩好D呀!

之後大肥豬又話要休息一吓,所以就又到番我打,係依個時候,終於都食左我全日嘅唯一一鋪啦,個心真係勁開心呀!

全日都輸左二百幾蚊呀!(好慘呀~~好傷呀!)但當一家人玩吓,冇乜所謂啦!我都知道佢地已經就住我嚟打啦!大家開心左一個下午都幾好呀!

原來打麻雀都幾頭痛呀,我都唔係太鐘意玩依D玩意呀!


*♡♡小肥豬♡♡* | 18th Aug 2007 | 靚太廚房 | (41 Reads)

今日小豬媽同小豬爸又去左街街,所以又可以係屋企玩煮飯仔啦!

依個就係我地今晚嘅晚餐,二餱一湯都夠三個人食啦!(因為我地等埋LULU妹一齊食呀!)

諗左好耐都唔知煮乜餸,終於就煮依幾樣餸啦!

首先就係依個西蘭花炒珍寶腸,依個餸就集合左我同大肥豬嘅至愛(我最愛嘅西蘭花,大肥豬就最愛珍寶腸),所以好好味呀!好快就清晒啦~~

之後就係依個咸酸菜炒肉片。依個餸係前幾日睇小豬媽學,係LULU妹嘅至愛所以就煮啦!

可能我將D咸酸菜浸水浸得唔夠時間,所以都幾咸呀!連LULU妹咁鐘意食咸酸菜都食得唔係太多。唉....真係失敗呀,不過人地第一次煮,都唔好怪我啦,下次一定會好D呀!

最後就係依個粟米蛋花湯啦~~真係...又係好好味,又清晒呀!(不過罐頭湯又點會唔得呀~~下次都要整D難少少嘅湯先得!)

今晚餐飯好在大家都好滿意,美中不足就係個咸酸菜呀~~~

不過有左今次失敗嘅經驗,下次一定會好好呀!

我一定會繼續努力呀!


*♡♡小肥豬♡♡* | 18th Aug 2007 | 生活點滴 | (23 Reads)

之前睇wedding more,見佢地有現代經典攝影套餐抽獎哦,咁就貪得意寄信去抽吓囉!因為佢地個南瓜車景真係好靚呀,如果有得免費影就好啦!

佢地尋日已經有打電話俾小賢問資料時,知道佢可以再進入下一階段,都好鄧佢開心。

不過同時就諗我一定冇,我連第一階段都抽唔到啦!不過唔緊要啦~~因為一向我都完全冇抽獎運,大大小小嘅抽獎同遊戲,都一定冇我份,所以都唔期望太大啦!心諗都係用$1.40郵票抽個希望,抽唔到都冇乜損失呀!

點知今朝俾一個電話嘈醒左,佢話係wedding more嘅職員,問左我幾個問題同婚期之後,又話會將D資料pass去另一個部門,如果抽到就會再有專人打俾我。

哈哈....今日真係幾一起身就有好消息,雖然未真係抽到,但都已經好開心啦!

抽到個機會我都知好微,依家起碼知道我可以入到第二階段呀!証明我開始有番少少運啦!希望嚟緊可以越嚟越好運啦!

抽唔抽到都依輯結婚相唔係最重要,(當然抽到一定好開心啦!最好同小賢一齊抽到,可以約埋一齊去影靚靚相。)

我最想就係抽嘅,就係最想要嘅一個揀樓機會,希望可以有一個好號碼,可以揀都合心水嘅靚樓啦。

 


*♡♡小肥豬♡♡* | 17th Aug 2007 | 婚禮籌備 | (37 Reads)

今日收到我第二份嫁妝啦!係唔係好得意呢?

依條豬豬鏈係小豬爸送俾我呀!真係好開心呀~~~

話說由我未決定結婚嘅時間,小豬爸已經話一定會買條豬豬鏈俾我出門。(因為小豬爸話好得意,佢鐘意左好耐啦!次次行過金鋪佢都話好得意呀!)

到決定左結婚,佢都話會買俾我,我開頭都以為佢都係講吓!點知...小豬爸話見今日金價跌左少少,所以就同小豬媽入左金鋪買依條豬豬鏈啦!

依家個心情真係唔知點形容,佢地真係好錫我呀~~


*♡♡小肥豬♡♡* | 15th Aug 2007 | 生活點滴 | (23 Reads)

繼上次整左個十字石仔花之後,玩指甲癮又嚟啦!

今日行街路過SKIN FOOD,見到有D靚靚指甲油買,所以就同小豬媽入去八吓啦!我地揀左好耐,就買左幾支特別顏色指甲油啦!

一食完飯就開始塗..塗...塗,整左半個鐘,今次加埋小豬媽嘅幫手,終於又玩左啦!

今次用左金黃色指甲油,襯粉紅色花仔,又幾好睇哦!

雖然金黃色好似激左少少,不過見放假....玩吓都冇所謂啦,返工就唔得啦!

唔知點解,覺得塗指甲真係會上癮呀~~依家真係好鐘意玩指甲呀~~我已經諗緊下次用乜顏色貼乜花花啦!

玩指甲其中一個原因就係放假可以玩吓啦!另外因為知道自己塗左指甲油,就一定唔會去剪指甲,咁就可以留長D啦!

依家諗諗吓,真係可以考慮結婚唔去整水晶甲,自己塗好D,再貼少少靚靚花仔就得啦,自己都唔係真係整得太差呀~

同埋聽人講整水晶甲同除甲都會好痛,我自己又怕痛哦,所以真係可以諗諗自己塗或者出去修甲再畫甲呀!


*♡♡小肥豬♡♡* | 15th Aug 2007 | 生活點滴 | (23 Reads)

今日同左小豬媽去金域假日酒店食Haagen-Dazs Tea Buffet。原本以為平日會冇咁多人,點知都有好多人,特別係小朋友,可能係放暑假關係啦!

我地都食左好多野呀,又壽司、刺身、冷盤、熱盤同甜品...真係都食左好多野呀!

食完一輪飽肚野之後,終於都到主角出場啦~~~我地就去左自助雪糕站食大杯雪糕啦!

我都覺得自己好叻呀!一個雪糕杯可以整晒六種唔同味落去!好耐都冇食過雪糕啦!真係好好味呀!

佢地D野食都OK,係三文魚刺身就少D,好似出左兩輪,D冷盤同熱盤都普普通通啦!不過D甜品就真係好好味同多花款,當然D雪糕....唔洗講啦~正呀!

我地因為入去食都係主要食佢D甜品同雪糕,所以我地都好滿意!依餐又真係幾抵呀,百幾蚊就食都好飽飽咁走!

不過走嗰時我地兩個都話一定要決定減肥先得啦,因為我地真係食左好多野,實又肥幾磅先得啦!


*♡♡小肥豬♡♡* | 14th Aug 2007 | 婚禮籌備 | (25 Reads)

今日真係收獲豐富,仲行到成個人散晒呀!

首先就係同小豬媽去左金都商場睇野,原本都好想去睇吓有乜玉桂狗花車公仔,或者其他靚靚公仔。不過都睇唔到有合心水嘅公仔呀!唔通真係冇得用公仔做花車?希望遲D再去睇可以有意外收獲啦!

另外就係去睇小豬媽嘅媽咪衫租啦!其實睇左都好幾間,不過小豬媽都揀唔到合心水,因為佢又唔想太誇張同太閃,所以成日話我唔係最難揀衫嗰個,小豬媽先係最難揀呀!

行左金都一陣,就入左一間專租媽咪衫嘅地方,試左幾件之後,終於都係小豬媽試左一件合心水嘅衫啦,所以就決定租依一套。雖然比其他係貴左少少,不過著上身又真係幾靚,同合晒小豬媽心水呀~

睇吓小豬媽幾靚,佢話要減番幾磅,到時一定好靚呀!

任務完成後,我就去左車車介紹嗰度買啤牌啦!雖然依家買好似早左少少,不過我見今日都出開嚟,不如買定啦,因為我都好少出旺角嘛!可能加左價啦,冇之前車車講咁平,不過依家個價都幾平呀!依D都係打算買嚟俾客人席前玩,都係幾個鐘時間,又唔洗真係買太貴啦!

我地先買一幅睇吓,睇左個質感同幾好,玩得過哦!最後我就買左15幅係婚禮嗰日用啦!其實都唔知要唔要咁多,不過買定都冇壞呀,到時如果唔夠仲弊!

最後一個收獲....就係一個靚靚介指盒啦!

其實我都想買依個介指盒好耐啦,不過係網上睇到個價都幾海鮮,都唔知係點個先抵,所以一路都冇打算去買!不過前幾日係CHRISTINA個BLOG見到佢買左,一問之吓仲發現好抵呀!所以就SEND左個E-MAIL俾個賣家買番一個啦~剛剛今日出開旺角,所以就約埋個賣家交收啦!

睇吓個BEAR BEAR介指盒,真係可以話又抵又靚呀!我終於都買到個靚靚介指盒!
(我真係想買好耐啦!好開心呀~~)

擺埋對結婚介指入去,真係幾好睇....到時係註冊處用,一定好靚靚呀!


Next