香港新浪網 MySinaBlog
*♡♡小肥豬♡♡* | 30th Apr 2007 | 生活點滴 | (11 Reads)

尋日嘅開放日雖然我係好唔開心,不過係將近結束嘅時候,都有一件好攪笑嘅野。

係開放日嘅跳蚤市場入面,都有一D唔同類型嘅嘢買,除左有之前講過花花買之外,有玩具、電器....好多嘢賣,因為我成日都要係售票處當值,加上自己心情唔係好好,所以都冇去睇過。

但當我係差唔多完結嘅時候,竟然俾我執到一樣唔知係唔係好嘅野~~就係一部蒸面機。

依個蒸面機好抵呀.....係剛開始嘅時候,佢開價係$200,之後一路減...到$150......最後減到$50,當係$50嘅時候,仲同SELL我個學生講笑話要減價到$25。當然學生話唔到事,冇得減啦,都算....又唔係真係勁想要,都係同個學生打算玩吓。

點知,當我當值完嘅時候,我都跳蚤市場八卦吓啦!我見部蒸面機仲未賣出,就貪玩同個老師講吓價....開頭都係要$30先成交,後來我個同事幫我口講價,最後我就以$20買左啦!

雖然唔知係唔係真係得,不過$20又真係幾吸引。如果唔WORK都唔係好傷呀!

我今晚就會試吓啦,試完之後到時話俾大家聽呀!


*♡♡小肥豬♡♡* | 29th Apr 2007 | 生活點滴 | (15 Reads)

終於都忙晒依幾日嗰D大型活動,雖然今日個開放日都算完成左,但我一D都唔開心,仲係超唔開心....點解會係咁...其實都可以話係由星期五開始。

之前都講過,可能因為有幾日大型活動,個個都心火盛。我係受害者之一,連續繼日都俾人話,仲要係帶有針對性成份,又點會開心呀!

今日仲有一件超不公平對待嘅事,我真係覺得好唔開心...

事緣我地學校開放日有一個跳蚤市場,佢地將昨日收到嘅蘭花盆景、盆栽拎出嚟買,都要成$150一盆呀!

因為我之前係負責收花,所以有幾盆蘭花都好鐘意,都有少少興趣,同埋媽咪成日話好想擺盆蘭花係屋企,所以就同一個工友姐姐傾吓抵唔抵啦!點知係依個時候,第一批花已經俾老師內部應購晒啦!心諗算啦,咪下次去花墟買啦!

之後係臨開始嘅時係唔知係邊度又再有幾盆蘭花,有一盆細細地,工友姐姐咪叫我去睇吓啦!

正當我拎起上手時,仲同工友姐姐講:幾好....唔知我媽咪鐘唔鐘意呢?買唔買好呀!

之後,聽到一把好嚴肅嘅聲(一D都唔似同係講笑)話:係唔買就放抵啦!

同時間又用一把開玩笑嘅聲音同一個老師講:你係唔係要呀,快D諗清楚啦!人地又睇中左啦!

當佢講完之後,我同個工友姐姐都立刻都打左個突....我就好激氣地擺番低盆蘭花,衝左入廁所.....終於忍唔到喊左一場。

成件事上我根本就係冇錯,點解要咁唔公平呀!我喊並唔係因為我買唔到盆花,只係覺得被受歧視,飽受不公平對待。

日日都係咁,我自問冇做過任何野得罪過你呀~~點解呀!我都係學校內職員...唔通老師就係人,我地依D小職員就乜都唔係......

真係好唔開心....


*♡♡小肥豬♡♡* | 28th Apr 2007 | 生活點滴 | (9 Reads)

今日係我地學校嘅祝聖紀念日,因為係天主教學校關係,佢地請左陳日君主教嚟學校做主禮嘉賓。就係因為依個原因,學校上上下下嘅人都好緊張,好驚會出錯。好在都好順利完成左,當然會都有少少問題,不過唔關我事,所以都好開心。

我開心並唔係見到陳主教或者係個RUNDOWN好順利......我覺得開心係因為我自己負責嗰D工作冇任何出錯,冇打碎D香賓杯(因為我負責派香檳俾嘉賓)、冇行錯位....雖然我知道總會有人覺得我做得唔好,唔理佢啦...我覺得OK就得啦!不過...今日真係企足成日,好倦呀!

聽日又係OPEN DAY,又要忙..忙...忙....不過都好少少,聽日只係做賣遊戲券,唔洗咁辛苦,但又唔可以訓餐飽,都係要等到星期二放假先可以大覺訓啦!


*♡♡小肥豬♡♡* | 27th Apr 2007 | 生活點滴 | (13 Reads)

今日真係好唔開心...好煩,攪都成個人都好忟憎!

心情真係很差很差,情緒仲好低落,唔知自己想點。真係好想大叫大喊一場!

我都係做番我自己本分,點解樣樣野都好似係我做錯.......點解要咁偏心呀!

.....點解呀!

 

有時諗.....有問題嗰個唔係我,人地對我係點我唔可以阻止,只要做好自己本分就夠啦!

總之我覺得自己冇錯就得啦!

人地係點...真係唔理好理咁多.....


*♡♡小肥豬♡♡* | 26th Apr 2007 | 生活點滴 | (10 Reads)

今日唔知仲乜係食LUNCH嗰時,突然間好想飲莞茜皮蛋湯。可能因為我塊面又開始有少少粒粒,諗住飲番依個湯可以下吓火啦!

不過...因為今日好忙,做到眼花花,所以成個下午都冇時間打俾媽咪落ORDEN,心諗算啦~~~聽日飲都OK,所以冇理啦!

點知...返到屋企,諗住走入廚房攪攪震嘅時間,俾我發現左媽咪原來滾左個湯,就係.....莞茜皮蛋湯睇到嗰時,真係覺得好好笑...仲同媽咪講我今日係好想飲,但冇時間同佢講。點知媽咪又好攪笑話:我係佢生,當然同佢有有心靈相通啦!真係攪笑呀!

不過..其實係媽咪佢係個嘴角位生左非滋,都係想飲D下火湯,先滾依個湯呀!


*♡♡小肥豬♡♡* | 25th Apr 2007 | 生活點滴 | (11 Reads)

之前見到匯豐信用咭有迎新禮品送相機呀!諗諗吓....我地六月又係要大洗錢,加上媽咪成日都想買部自己用,所以未貪吓依D小禮物就去申請啦!

嘩~~我上個星期一寄出申請表,今日就收到領咭通知書。佢地效率真係快,真係要俾個叻佢地先得呀!

哈哈~~三個月後就新相機玩,仲有可以有藉口去SHOPPING,諗起都開心呀!


*♡♡小肥豬♡♡* | 25th Apr 2007 | 生活點滴 | (17 Reads)

尋晚同契嫂食飯嗰時講起減肥,佢話原來用麵包做早餐係最肥呀!(因為佢曾經試過睇醫生減肥,所以佢知道。)之後就話醫生話最健康嘅減肥早餐就係蛋,最好就係白恰蛋.....佢有講過原因俾我知,不過我唔記得左呀!

平日我都係以白麵包做早餐,聽完都有D怕肥..所以同媽咪講話不如試吓啦!

點知....今日一早起身就係廚房見到有三個白恰蛋。

見到嗰時真係好開心又感動.....因為尋晚我地好夜先返屋企,今朝媽咪又要一早起身準備去旅行(搭7:30船~~好早呀!),仲可以抽時間整蛋蛋俾我食....真係好開心呀!

我食左兩隻做早餐,真係好好味~~依家留番一隻今晚食埋佢。

等媽咪去完旅行番嚟,真係要錫啖佢先得。


*♡♡小肥豬♡♡* | 24th Apr 2007 | 生活點滴 | (15 Reads)

尋日放工去到做FACIAL嗰度,唔洗五分鐘就已經進入左睡鄉,要個姐姐叫醒先識得起身。之後就傻吓傻吓咁搭車返屋企食完飯!

平日飯完飯我都會去電腦度上網同巡BLOG,點知尋晚坐都落張電腦枱度,就已經好想去訓覺,完全冇晒心機,終於都支持唔住....未夠十點就已經去左做覺覺豬啦!(媽咪仲以為我唔舒服!因為我真係冇試過咁早就訓呀!)

到今日食完LUNCH之後,我開頭都係打算係張寫字枱爬低休息吓,點知又係訓著左.....

依家...又好眼訓...好想訓,不過今晚契大佬請食飯,冇得早訓...

都唔知係唔係患左渴睡症,咁鐘意訓覺....


*♡♡小肥豬♡♡* | 23rd Apr 2007 | 生活點滴 | (17 Reads)

今日一起身就見到落大雨,個人都已經唔係咁開心!因為一落雨就好怕整濕晒D衫褲鞋襪,仲有就係好難搭車....所以我今日就一早出左門口,諗住預返多少少時間等車,唔會遲到啦!點知....都係要遲到,仲要遲左成半個鐘。真係激死我啦!

事緣就係當我上到小巴嘅時候,發覺部車行得唔係太順,當時以為個司機叔叔因為落雨關係,所以安全行車啦!點知當小巴行上紫灣斜路時,部車突然死火,之後就再開唔到啦!個司機叔叔就叫晒我地落車,之後就CALL另一部車接我地。

真係~~~落雨濕濕仲要係絛馬路邊等車,到真係幾狼狽呀!

等左一陣..就有部車嚟接我地啦!不過嗰時我對腳都已經濕晒...不過都唔理啦,返到學校先整啦!

好在我係出事後第一時間打電話返學校同佢地講聲,當老細知我遲左咁多都冇話我,好在.....

 


*♡♡小肥豬♡♡* | 22nd Apr 2007 | 靚太廚房 | (44 Reads)

今日約同埋糖糖 & ZOE兩位同事去左香港仔某間教整蛋糕地方學整壽桃蛋糕。

之前都有去學過吓整蛋糕,但因為大肥豬同媽咪都唔係太鐘意食,攪到我都冇晒動力去學。

不過之前見到有壽桃形蛋糕,覺得好得意,都好想去學吓,跟住同糖糖 & ZOE傾開,所以就打算約埋大家去學啦!

哈哈~~真係幾好玩呀!由麵粉加雞強攪吓攪吓,再焗吓...成個過程都真係唔容易,真係錯一個步驟同程序都唔得呀。

成個蛋糕我覺得最難就係做個皮,佢都我地用杏仁膏整,都幾難呀!我仲係鋪個餅面嗰時,唔小心整爛左少少,要個導師幫我執手尾。

雖然有少少缺憾,但我覺得個蛋糕都好靚,都幾有成功感呀!

今次學得都真係幾好,我覺得個導師都好用心教我地,可能都係得五個人學,佢可以落力D教我地啦!雖然係香港仔,可能遠左少少,但如果時間合都可以再去學呀!

返都屋企我已經急不及待食左啦,真係幾好味,連一向唔多鐘意食蛋糕嘅佢地都話好味呀!真係好開心同好有滿足感。不過個皮又真係好甜呀!

哈哈~~真係好有滿足感!食完之後,又再挑起我整蛋糕條引....等我有時間都去整吓蛋糕先!

 

 


*♡♡小肥豬♡♡* | 21st Apr 2007 | 婚禮籌備 | (32 Reads)

上次去會展JOIN羅浮宮嘅時候,我問過可唔可以BOOK定個攝影師同化妝師幫我,個STAFF話可以幫我MARK低,如佢地冇過去澳門做嘢就可以。

因為左依樣野,我依幾日都上左去ESD同其他朋友仔個BLOG睇佢地D結婚相同佢地D評語。

終於就揀左攝影師 - BARRY同化妝師 - LING。其實都仲有好幾個都有人讚賞,不過依兩個就多少少,所以就打算HOLD佢地啦!

頭先剛剛打咗電話去,好在佢地兩個暫時都未有人HOLD,個STAFF話好果冇特別安排,就係佢地幫我。 希望冇問題。

其實我覺得都係信心影響,基本上自己係未接觸過佢地,根本唔知佢地係唔係真係好好,但總係好似有人讚過同介紹放心D呀!(係唔係一般人嘅心態呢?)

 


*♡♡小肥豬♡♡* | 20th Apr 2007 | 生活點滴 | (19 Reads)

尋晚跟爸爸去左太古城某酒樓舉行嘅聯歡晚宴食飯,嗰D晚宴美其名就係話同D貨客聯誼開心玩吓,但實情就係...屈你一餐,等佢地賺番少少。鬼叫係要做生意,冇法啦,佢地叫係包一圍都要啦!依家都算好D,都係每年一次左右,我記得細個嗰時,基本上隔兩三個月就去嗰D酒樓食依D嘈飯,真係都幾驚...

嘩~~尋晚真係成晚都係一個超嘈嘅環境吓食,因為佢地請左一D樂隊同『美女』嚟唱歌跳舞,驚嚇指數真係有十幾級呀!佢地仲成日走去同D人握手,真係..好在我同大肥豬都冇俾佢地輕薄到。

不過...原來其中一個表演嘅『美女』就係參加過『殘酷一叮』嘅,仲話係今個星期六嗰個台主,佢介即場表演俾我地睇,其係超攪笑呀!

不過..都有D好好笑嘅嘢,就係其中有一PART係俾D客人出去跳舞...跟住成個舞池都有好多上左年紀嘅男士女士跳社交舞,有D真係有文有路,跳得幾好,有D就真係都幾佩服嗰D人咁有勇氣,我自問都好怕羞,一定唔會出去啦!

嘈左成晚,走嘅時候對耳仔都WEE WEE聲,可能唔習慣啦!


*♡♡小肥豬♡♡* | 18th Apr 2007 | 靚太廚房 | (63 Reads)

我真係一個完全唔識煮嘢食嘅人,平時都只係識得煮公仔麵或者滾熟D嘢就算啦。所以由決定結婚開始,大肥豬都已經成日叫我跟媽咪學煮餸,可能佢怕之後會冇啖好食啦!佢都叫左我好耐啦,不過一路都冇理佢。

終於係上個星期大肥豬就再一次叫我每個星期找一日跟媽咪學煮一樣....我咪隨便講話下星期三啦....點知,今日放工打俾佢,佢第一時間就問我今晚煮乜餸?見係咁所以今日決定跟媽咪入廚房攪攪震啦!

今日D餸都好簡單,都係滾冬瓜湯,豉油雞同抄菜,媽咪話只準我去整個菜,所以我就向抄菜心出發。

今次碟菜都係我自己一手包辦..洗啦、摘啦同抄都係自已一手一腳做嫁,當然媽咪都有係旁邊幫口教路啦!第一次抄都算OK啦,冇抄到變黃。

雖然..比起其他BLOG友仔,我抄依碟菜可以話係好簡單。但對我依個廚房新丁嚟講真實都唔容易呀,真係好驚嗰D油彈晒出嚟,又驚抄得唔熟,又驚好難食....好在,煮完出嚟都似似地樣,都有番少少成功感。

下星期又唔知媽咪俾我煮乜餸呢?

原來煮飯真係幾辛苦~~我煮一個好簡單嘅菜都咁驚青,所以覺得媽咪真係好叻呀!可以一次過煮咁多餸,仲要樣樣都咁好味。


*♡♡小肥豬♡♡* | 17th Apr 2007 | 生活點滴 | (14 Reads)

話說我小肥豬之前係一個行路好唔小心嘅人,就算著波鞋行街都會好容易整到...依家都可以話好少少啦,但因以前嘅恐佈經歷,都好怕怕啦!所以我多數都係著平或鞋,就算要買鞋都唔會買太高,最多都係兩吋,仲要一定係粗踭,冇咁容易跌倒嘛!

不過..由今日開始,我要向難度挑戰。

頭先同媽咪係屋企樓下商場行左一個圈,我地見對一對都算高、但又係粗踭嘅鞋,因為佢前面都高,所以行上嚟又唔係咁辛苦。

媽咪就鼓勵我買左佢,佢話叫我依家習慣吓著高鞋,到結婚嗰日要著成日高踭鞋,可以唔洗咁辛苦。

睇完媽咪講之後....諗諗吓都有道理,同埋都唔係好貴,就算真係唔習慣,都唔係好傷,所以都決定買左佢啦!(不過如果俾大肥豬知道...一定罵死我呀!)

不過..依幾日天氣唔係太好,等天氣好嘅時候就開始著吓。

其實我都有少少擔心呀....希望冇意外發生啦!


*♡♡小肥豬♡♡* | 16th Apr 2007 | 生活點滴 | (17 Reads)

今日原本遇到D唔係好開心嘅嘢,但依家真係開心番晒啦!

頭先一開電腦,就收到我同事

糖糖 送俾我嘅禮物,真係好開心!

之前見佢係自己個BLOG度畫公仔,我咪貪得意叫佢幫我畫一張。

點知....佢幫我地畫嘅一張結婚Q版公仔相,真係冇諗過...真係好鐘意呀!

我媽咪都話好CUTE呀,仲叫我留番第日結婚時用呀!

真係好開心...我知整Q版公仔一定好浪費時間又煩覆,佢咁有心機幫我整,真係好感動呀....


*♡♡小肥豬♡♡* | 15th Apr 2007 | 生活點滴 | (38 Reads)

今曰,我地約埋契大佬一齊去石澳BBQ!

我地都成二點幾先入到去,開頭到好擔心霸唔到爐,好在都唔係太多人,但免費嗰D爐就冇晒位,我地唯有就去租爐啦!不過我地都有一個好好嘅位置,睇都成個沙灘,坐係度真係好舒服。

原來章章(即我契姨甥)係未去過沙灘,所以佢一落都沙灘就好開心咁玩,我都好辛苦先同到佢影張相呀!

之後就同大肥豬出去行沙灘,扮吓浪漫嘛!我仲影左幾張靚相呀!不過最衰佢地個個都燒緊嘢食,冇人同我地影到合照啦,依個VIEW真係好靚呀!

大肥豬話依張係影到好有大師級水準,唔係話我靚,佢話佢有技術。真係俾佢激死!

不過..今次佢又有驚喜俾我!之前次次叫佢同我玩自拍,佢都唔肯,仲左推右推。點知今次佢竟然唔SAYNO,仲自己拎部相機影,真係開心死我啦!

影過咁多張,都真係好鐘意依張自拍相,睇吓大肥豬笑得幾開心!

講番燒野食先,我地除左燒一般燒烤食品之外,我地今次有個特別主角就係....燒乳鴿啦!不過...因為燒乳鴿係一樣好巧功夫嘅嘢,所以依個重任務就交左俾爸爸啦!

哈哈~依隻就係爸爸嘅成功製成品!睇吓幾靚....仲好好味呀!

我地都玩到差唔多八點幾先走呀,真係玩得好開心,計計吓都有好耐冇去過沙灘BBQ啦!

不過玩完嘅代價....就係晒左成日,塊面都立即黑左,又要做多幾次美白面膜保番數啦!
 


*♡♡小肥豬♡♡* | 14th Apr 2007 | 婚禮籌備 | (49 Reads)

一早就約左嘉汶表妹去睇伴娘衫,好在今日個頭冇咁痛,所以照去啦!其實係我自己都想去改過件晚裝同婚紗呀!

首先講吓嘉汶表妹先,佢揀左一件紫色嘅伴娘衫,都幾靚呀,簡單得嚟又好青春。不過...佢叫我唔好POST上嚟,所以大家要遲D先有得睇啦!

講吓我件婚紗先,其實我都好鐘意之前嗰件,因為我都比較喜歡一D公主FEEL嘅衫,但嗰件又真係幾太累聚,加上我應該會係婚姻註冊處註冊,嗰度地方又唔係大,著以前嗰件一家好麻煩。所以經過考慮之後,決定轉左佢....依家選依件我覺得都幾好呀!著起又好似影得我條腰瘦D,簡單得嚟又隆重,佢仲閃閃地,影相應該會幾SHARP。

之後我又再選晚裝啦!有好多姊妹都覺得我之前選第一件晚裝唔得,其實我自己都覺呀,不過媽咪成日想我著件中國FEEL嘅晚裝,所以就揀左嗰件啦!

好在個個BLOG友仔都話嗰件唔好,所以媽咪都叫我再選個另一件啦!今次我都係選左一件較中國款,條頸又有少少花款都好似幾好呀!其實我覺得依件衫個LOOK可以同掛LOOK差唔多,到時只係轉衫就得,可以唔洗點換妝同頭,可以快D,慳D時間嘛!

有好多朋友仔都叫我試吓一D直身款晚裝,不過...我真係好肥,真係唔敢俾大家睇呀!所以最係都係選左D紗型衫啦!

站定會係咁先啦,到十月先再去睇吓有冇新款啦!

 


*♡♡小肥豬♡♡* | 13th Apr 2007 | 生活點滴 | (23 Reads)

今日係黑色星期五,對我嚟講又真係幾黑仔呀!

一早起身,個頭都唔知仲乜痛到爆炸。基本上都知道自己為乜唔舒服,都唔明白點解每次係唔方便嘅日子,人地會係肚痛...但我就會係頭痛,仲要係偏頭痛嗰隻,真係好辛苦。

原本都想唔返工,但諗起仲有少少趕趕地嘅手尾要做,為有頂住去返工啦!(費事老細唔鐘意嘛!)所以就食左打孖食左頭痛藥之後,就趕返工啦!

一過做野...個頭又一過係度痛,仲好似冇好轉,仲好反胃....真係痛度完成冇心機做嘢....最後我都頂唔順,做晒手頭上趕嘅嘢之後,就同老細講話要早走

跟住又走左去睇醫生,醫生話可能係生理影響再加上有少少感冒,所以導致會有偏頭痛,佢俾左D藥我食叫我休息多D就冇事。返到屋企食完藥就一直訓到依家,好似好左少少,不過都仲係有少少痛,但我唔敢再訓啦,怕今晚會訓唔著呀!

點解做女人會咁辛苦嫁!不過媽咪話當生完BB之後就唔會有依D情況呀!都唔知係真定假....希望真係會有改善,因為依D痛真係好辛苦呀!


*♡♡小肥豬♡♡* | 11th Apr 2007 | 生活點滴 | (16 Reads)

都唔知仲乜,依排對眼好鬼死腫,成個假期都做左咁,攪都成個人都好冇精神!

開頭以為同臨訓前飲水有關,但依幾日我已經唔係訓覺前一個鐘頭飲水,但個情況都係一樣,都唔知點算好啦!我對眼應該冇事...都唔知係乜事!真係好煩呀!仲要老細唔會我好眼訓..

死啦...再係咁,真係驚會影響五月尾影結婚相呀!你知啦~係最後一次,我真係要以最佳狀態嘛!

有冇人可以幫吓我呀....教吓我有乜好辦法去攪番好對腫眼呀!


*♡♡小肥豬♡♡* | 10th Apr 2007 | 生活點滴 | (22 Reads)

真係話咁快就放完五日假,真係有D好唔捨得呀!依家返緊工都好似係度遊雲…冇乜心機做野…點算好~~~真係要快D收拾心情先得啦!

之前諗可以趁依個假期可以訓餐飽,同狂煲碟。點知…日日都要一早起身,之後要到夜晚返到屋企…真係仲忙過返工呀! 雖然係好忙,但依幾日都真係幾開心呀!

不過...唔知點解,平日要返工嗰時,明知已經夠鐘都唔願起身,都要懶吓床先安樂,就算梳洗都好唔清醒。但放假呢...到差唔多八、九點就自動自覺起左身,仲要好精神唔想訓

我諗我都係一個怪人...有得訓就唔願訓,唔訓得就要訓!


Next