香港新浪網 MySinaBlog
*♡♡小肥豬♡♡* | 30th Nov 2006 | 生活點滴 | (13 Reads)

忙左一個晚上,終於都做晒手頭上嘅野啦~~

今日媽咪同佢朋友出街,所以就留低我地幾個係屋企食飯.....原本我都諗住煮飯俾佢地食,不過爸爸口就話唔洗我咁辛苦,但其實佢對我冇信心。其實我對自己都冇信心呀!

最後大家都決定左一個最快、最方便嘅方法,就係打邊爐啦~~~

不過今次媽咪就買好晒餸,我放工番去就洗洗、切切同煲個湯底。整好晒就等埋細路同LULU妹番嚟開餐。

忙完洗野之後,先記得原來今日係月尾,要幫爸爸埋數。

所以話今日真係好忙呀!由放工做到依家,不過依D忙都係開心呀!


*♡♡小肥豬♡♡* | 29th Nov 2006 | 生活點滴 | (19 Reads)

今日放工番屋企,見到個奇景呀~~~

一打開度門,見到媽咪成身都圍住白色垃圾袋......原來係爸爸幫佢染髮!

因為媽咪今個星期要返大陸飲,爸爸成日都話佢個頭好多白頭髮,俾人見到唔靚哦,所以就幫媽咪染髮啦~

其實媽咪話佢唔介意有白頭髮(佢話個女都就嫁啦~年紀都唔細啦~仲扮細呀~),唔係咁想染髮。不過佢見爸爸誠意拳拳,同埋爸爸好少咁有落手落腳去做,就順佢一次啦~

我睇住爸爸幫媽咪染髮個樣,真係好唔同。因為平日爸爸俾我個感覺係好MAN,但佢頭先個細心樣,真係好唔同。原來爸爸都有溫柔嘅一面。睇到佢地,真係覺得好SWEET SWEET呀~

唔知第時我同大肥豬會唔會好似佢地咁SWEET 呢?


*♡♡小肥豬♡♡* | 28th Nov 2006 | 生活點滴 | (13 Reads)

今日起身都唔係好舒服,不過都如常執番D眼耳口鼻,換衫番工。

但係出門口嗰刻真係發覺自己頂唔順,個頭痛到好似就爆,成個人都冇晒力。終於都係打左個電話番學校請左病假啦

之後就換番衫再訓過,到十點幾就去睇醫生。都唔知係唔係天氣唔好,勁多人等呀!我都等左成半個鐘先到我睇,跟住又等十幾分鐘先有藥拎,真係慘啦~

醫生話我係上呼吸道感染,食左藥,打左針,訓左成個下午,依家好好多啦~

今晚我都係要早食完藥訓先得啦!

大家都真係要小心身體呀!

 

 


*♡♡小肥豬♡♡* | 26th Nov 2006 | 生活點滴 | (12 Reads)

今日執完野之後就冇野做,最好就係上網睇吓BLOG 同MSN啦~~

點知......我玩玩吓,電腦竟然無端端自動熄機,整極都唔得。我心諗死啦~唔好好似上次電腦壞樣,係塊底板燒左,冇晒D野(我好多相都冇晒)。

我嗰時幾驚,好驚D野又冇晒,於是就叫LULU妹陪我拎部電腦去樓下商場整。

好在~~原來只係隻火牛燒左,用左$200就攪好。嗰個職員好快幫我換左(行個圈就得啦),仲CHECK埋部機有冇問題。

今日真係執番身彩~~唔洗大出血


*♡♡小肥豬♡♡* | 26th Nov 2006 | 生活點滴 | (12 Reads)

忙左成朝,終於都攪完啦~~~

今朝一早起身,見冇乜野做,加上依家都開始凍,所以就抽起條根幫自己D衫轉季啦~

喺我執D夏天衫嗰時,一邊執就發覺原來自己有好多衫,有D只係著過幾次,有D仲好似冇著過,真係誇張。最攪笑就係我番工,著嚟著去到係嗰幾套,仲以為自己好少衫,仲成日走去買衫。

 

執好晒D冬季衫之後,我又覺得自己好似好少冬天衫,幾個櫃都唔滿,又可以借D機去買衫啦。

依D係唔係就係女人最愛購物狂呢?

不過執好冬天衫之後,有少少擔心,依家D天氣真係時凍時熱,好驚之後又走番去三十幾度,我就唔知點好啦~~~


*♡♡小肥豬♡♡* | 25th Nov 2006 | 生活點滴 | (19 Reads)

原本打算跟媽咪番大陸按摩,不過我仲未病好,所以都係冇去。今日我由朝訓到晚,真係夠休息啦~~

好在大肥豬下午開始過嚟陪我,所以我都冇咁悶。佢有佢博殺,我有我執整,發牛豆.....

講番我地嘅晚餐先,我本來諗住去食壽司,不過大肥豬話我唔舒服,所以就唔俾食。後來都諗住玩煮飯仔,又話唔好。終於就決定買少少野番屋企打邊爐啦~

四點幾嘅時候,我就自己一個人落街去買餸。原來買餸係一件好頭痛嘅野,又驚唔夠食,又驚食唔晒。最後我都買左D菜、丸丸.....都好多野,成四五袋呀,都真係幾重嫁。

最後等埋LULU妹番嚟,我地就開餐啦~~大家都食得好開心,我地三個人竟然食得晒D野,大肥豬仲話我揀個粒蘿蔔同粟米好味,真係開心死我啦~

今晚依餐雖然唔係我煮,但由買、揀、洗都係我自己一手一腳做,所以都幾有滿足感。

下一次我就要試吓真真正正煮飯仔。


*♡♡小肥豬♡♡* | 24th Nov 2006 | 生活點滴 | (14 Reads)

今朝九點幾媽咪打電話俾我,古古怪怪問我今日點番工。我都心知不妙,但又諗唔到衰乜~我咪話好似平日搭小巴啦。跟住佢又係度笑~~~後來先問我點解冇銀包都可以番工?叫我CHECK吓個手袋。

原來...我尋晚同媽咪去睇醫生嗰時,個銀包放左入佢個手袋,返到屋企又大家都唔記得左有依件事。媽咪今去食早餐先發覺。

哈哈~~原來我今日係冇帶銀包呀!好在我張八達通放左入散子包,如果唔係上到車冇錢俾,真係好魚呀!!

今日真係可以做到『零』消費。LUNCH有媽咪愛心飯盒,依家仙都唔仙吓,冇錢買野,真係可以做一日慳妹啦~

不過我冇身份証呀!好在我唔似大陸人,應該唔會俾人查身份証,放工都要立即搭車留屋企先得啦~

我真係好少晒失敗,可能未病好,個人傻吓傻吓.....好在星期六短週,真係訓番夠本呀!


*♡♡小肥豬♡♡* | 23rd Nov 2006 | 生活點滴 | (13 Reads)

記得細個小學嗰時,好多兒童課外書訂(紅蘋果、白羚羊......)。不過每一次拎D訂購表番屋企,媽咪都話唔訂。見到D同學仔有得睇,都有少少羨慕佢地。(不過我都明白媽咪唔俾我訂原因,佢覺得除左課本之外,其他書都係冇益,所以我嗰時都冇唔開心。)

今日終於一次過睇晒我細細個冇睇過嘅兒童刊物啦~

因為今朝仍然係嗰間細房仔收小一,其實只係得番十幾個未嚟,但都要等......最慘嗰間房又冇電腦,都幾悶呀!之後見到房仔出面有幾個書櫃,有好多兒童課外書,於是我就成疊拎去睇.....都睇左消磨左個幾鐘呀。

原來依家D兒童刊物都幾IN呀!有軍曹、又有HELLO KITTY.....所以話依家D出版商真係識計數呀!

 


*♡♡小肥豬♡♡* | 22nd Nov 2006 | 生活點滴 | (19 Reads)

依排D天氣真係......好容易病,我都好似中左招,成日都病吓病吓

經過尋晚一放工就返屋企大昏迷後,今朝起身又好似又左少少。不過係返工途中又開始嚟,又傷風,又忽冷忽熱,都唔知仲做乜

原本都想唔番工,不過......今日我要幫小一新生註冊,應該到唔可以請病,所以都為有返工啦~~

今日成朝係間細小而又密封嘅房入面幫D家長收表,開風扇又冷,唔開又好似冇空氣,真係幾唔舒服。D家長又好似係約埋一齊,一係就冇人嚟(我冇野做,),一係又成班一齊嚟,真係玩死......

今日真係幾辛苦,今晚為有早D食完藥去

大家都要小心身體呀!


*♡♡小肥豬♡♡* | 22nd Nov 2006 | 婚禮籌備 | (37 Reads)

今日收到一個好消息~~~已經請到大妗姐啦~

之前媽咪個契仔傾開我結婚D野,問我有冇大妗姐(當然係未啦~~仲頭痛緊嘛)。

跟住佢就介紹左之前幫佢嗰位大妗姐俾我,佢地係鄰居識左都好耐。雖然嗰位大妗姐唔係專職嗰隻,係佢話係佢地結婚嗰日大妗姐姐真係好幫手,又NICE、又PRO。

於是契大佬就拍心口話幫我揀嗰位大妗姐啦~

今日契大佬話大妗姐已經冇問題,只要係結婚前再提吓佢,等佢請假就得啦~~

好野~~好似又攪好一樣啦~~

 


*♡♡小肥豬♡♡* | 19th Nov 2006 | 生活點滴 | (20 Reads)

依家係大肥豬嘅博殺期,佢好忙做功課同溫書,我地都好耐冇見啦~~

今日佢仍然係好努力返學校做功課,我就同媽咪去行街街。當我地買好晒夜晚嘅餸,返到屋企嘅時候,大肥豬就打電話俾我,佢話已經做好晒,走啦~問我想唔想同佢食飯。我緊係扮晒左話唔好.......點知佢話已經係搭緊車嚟緊啦~

我聽到真係幾開心。不過媽咪話我地買嘅餸唔多,驚唔夠。之後我說諗諗吓叫大肥豬上嚟前去街市買少少瘦肉同冬瓜,用來滾栗米湯。我開頭都怕大肥豬唔肯,因為佢未試過自己一個人去街市買野,我怕佢唔想呀!

點知......佢一口答應,仲幾好,買埋燒肉加餸。

今日真係好驚喜,一來冇諗過佢會來食飯,二來佢竟然自己去街市買餸呀!


*♡♡小肥豬♡♡* | 18th Nov 2006 | 生活點滴 | (20 Reads)

依幾日心情都真係唔係幾好,都唔知係乜事......可能我傻傻地成日亂諗野,影響啦!

不過有一件事攪到我真係超唔開心,心情仲DOWN晒。

事關前兩日,姑媽、姑姐同嘉汶表妹嚟我屋企食飯,食完之後見有DD時間,咪播番嘉汶表妹畢業嗰盒DV睇啦!點知......睇睇吓,我個姑媽突然間講左一句『呀欣,真係幾似大肚婆呀!你依件衫唔好掉呀,留番大肚嗰時著呀!』講完仲不特止,仲要走去電視機圈住我個肚。我之後就話『係呀!我成間房D衫都係留番我大肚時著嫁。』依個時候成屋都靜左一間(好明顯我係有少少黑面)。

我嗰日係著左件娃娃裝嘅雪紡衫,依家好多人都你咁著啦!我都仲未嫁,仲乜話人似大肚婆呀!

人地又唔係真係好肥,我依D係叫小肥是福呀!

你話呀!我又點會開心呀~~好似俾人踏到落地下。

好煩呀!越諗越唔開心呀!


*♡♡小肥豬♡♡* | 17th Nov 2006 | 生活點滴 | (13 Reads)

有獅子座流星雨睇呀~~

睇報紙話係11月14日至21日為獅子座流星雨的活躍期,高峰時間為11月18日凌晨4時50分,預計每小時流星的數量可達一百顆以上,雖沒有1999年之極盛,但會比過去幾年為佳。而天文學家推斷出每約三十三年就會出現一次高峰期,故天文學家預計今年過後,獅子座流星雨便會全面歸於平淡,要等待二十八年後(2034年)才會再發光芒。

話說係1999年嗰次嘅流星雨我都有同大肥豬去睇嫁,我都約埋幾個同事去石澳睇。不過個次都幾慘,成晚凍冰冰坐係度,望住個天,都唔見有流星雨,只係得嗰幾粒少流星。睇到成四五點終於頂唔到返左屋企訓覺啦~

第二日仲冷病左呀!真係慘.....

所以今年流星雨我就唔會去啦~


*♡♡小肥豬♡♡* | 16th Nov 2006 | 生活點滴 | (20 Reads)

今日學校學生去旅行,我都有份去呀!我都未試過同D學生去旅行,次次都留係學校聽電話,因為今日學校去大停電做維修,所以老細叫埋我地校務處職員一齊去。

都OK幾好玩呀!我地自己成班STAFF約埋一齊BBQ,有好多嘢食......有雞翼,有棉花糖又有好多丸丸,正呀!又有時去偷吓學生D野食,真係好好玩呀!。我好鐘意BBQ,好好玩,自己鐘意點燒就點燒,燒燶笑完又再燒過。

今日天之氣好好,又唔太熱,又唔太冷。好在今日冇落雨,前日成日都係埋落雨,我都有少少擔心仇日冇得去呀。好在......

不過諗諗吓我都好耐冇燒野食,今日時間到唔係咁多,有少少唔夠喉,真係要再去玩餐飽


*♡♡小肥豬♡♡* | 15th Nov 2006 | 生活點滴 | (11 Reads)

我一向都冇玩開MSN,有D同事同朋友都問我,點解我唔開個MSN呀!一來SEND野又方便D,二來又容易D傾計,唔洗成日等E-MAIL。

其實我自從個ICQ俾人盜用左之後,就冇再玩類似嘅玩意,加上大肥豬又唔係咁鐘意我玩,所以就冇刻意整。

不過成日都心思思想玩吓,終於今日我冇乜野做情況下就試吓啦~~點知我一整就OK左,DOWNLOAD完整吓整吓又得左。

哈哈~我係真聰明啦!不過如果依家先開始玩會唔會俾人話OUT呢?


*♡♡小肥豬♡♡* | 14th Nov 2006 | 生活點滴 | (18 Reads)

今日一返到工發生左一D唔係咁開心嘅嘢(好煩嘅嘢,唔好再提啦),攪到自己心情唔係咁好,所以今日跟住都冇乜心機做野,所以一到LUNCH就即刻走去食飯,諗住出去走吓放鬆吓自己,等自己心情好D。

我一落到商場,就立即諗都唔諗衝入去壽司店,食我最鐘意嘅壽司。因為我做嘢做得咁辛苦都係為左食,所以一於放縱自己,自己開心就最緊要。

一個人食迴轉個心情好似怪怪地,想食多D嘢但又怕食唔晒,可能之前去都係同LULU妹食,有人同你踭食,好似開心D。

食完之後個心情都真係開心番啦~不過,以一餐LUNCH嚟講,就貴左少少啦!

今日我唔覺唔覺都食左四碟,唔知算唔算多呢?


*♡♡小肥豬♡♡* | 13th Nov 2006 | 生活點滴 | (22 Reads)

今日我聽到兩件喜事

首先LUNCH收到一個舊同事打嚟電話,真係有D驚喜,因為我地一路都以E-MAIL聯絡。佢先問我結婚D野攪成點呢(因為佢有睇開我個BLOG),之後佢同我講佢都係出年年尾結婚,不過就仲未擇好日子。真係又超好開心呀!因為我同依個舊同事係同月同日出(當然我係大過佢啦),可以一齊結婚就緊係好啦,最好係同一日,仲有意義!但有少少唔開心就係如果佢又係年尾,我地咪唔可以出席對方嘅WEDDING PARTY。不過唔緊要,最緊要就係大家都開開心心做個靚新娘。

第二件喜事就係我媽咪個舊伙十二月一號記娶新抱,請我媽咪返大陸飲呀!我媽咪同佢感情都幾好,所以佢係會返去飲,不過我就唔會去啦!原來喺大陸係男女家分開請飲,佢地加加埋埋都有成80圍,真係勁!


*♡♡小肥豬♡♡* | 12th Nov 2006 | 婚禮籌備 | (30 Reads)

今日終於有得左睇相版啦~我就同大肥豬、媽咪、嘉汶表妹一齊出發。我地滿心歡喜去揀張啦!點知.....我自己覺得唔係太好,但佢地話OK。唔知係唔係我要求高呢!

婚紗LOOK方面:有好多我地係影個時會好靚嗰D相都冇左(尤其係我最鐘意嘅木馬景)。仲有好多宮廷婚紗LOOK個D都唔係好得(但我最鐘意嗰個LOOK),唔知係唔係大肥豬係影嗰時攝影師叫左除左絛呔,影出嚟個效果我地唔係咁LIKE,所以都冇乜點揀。所以我地都揀左好多花花LOOK婚紗嘅相啦!

晚裝方面:大部分都OK,好多都好滿意,不過一D室內影就差少少啦~

民俗服飾:我地揀左宮廷晚裝,嘩~~第一眼睇就真係好唔得,隻手臂肥到......真係有D驚人。

最後我地都揀左58張相,有三分一係我單人,大肥豬只有5張單人(唔係我唔俾佢揀,係佢自己唔要呀!不過佢要左嗰幾張都好好嫁)。

經過今次經驗,原來揀結婚相真係好頭痛,我諗我都唔會話再去影啦!煩一次就夠啦~

我地最後借左6張相版,SCAN落電腦,用嚟止吓渴先。要到出年3月中先有得取呀!





*♡♡小肥豬♡♡* | 11th Nov 2006 | 生活點滴 | (34 Reads)

尋日係嘉汶表妹嘅大好日子,佢完成左個大學課程行畢業典禮啦~真係好開心呀!我地由細個開始D感情都好好嫁,加上佢又乖又叻,我同媽咪都好錫佢呀!不過最衰我要返工,出席唔到佢個畢業典禮,有少少遺憾,所以今日我同媽咪就陪佢番學校去影相啦~

一踏入學校門口,已經見到好多個著晒畢業衫,又拿花又拿公仔,見到佢地個個都好開心,自己都感染左D大學生心境呀!

嘩~~原來科大真係好大呀!我地由山上行到去海邊,行到邊影到邊,去左好多地方,影左好多靚相。

最後,我地去到圖書館影完相之後,我就叫嘉汶表妹俾件畢業衫我玩吓,等我扮吓嘢呀!真係好攪笑,我同媽咪都玩到傻左,以為自己真係大學畢業。

最後同嘉汶表妹講句:恭喜~~恭喜


*♡♡小肥豬♡♡* | 10th Nov 2006 | 生活點滴 | (15 Reads)

剛剛睇完睇無線頒獎禮,真係好開心呀 因為最住男主角係~~~~鄭嘉穎。

當阿姐話個得主係嘉穎嘅時候,我同LULU妹真係尖叫左出嚟,聽佢講得獎感受時,好感動呀!我地都有少少眼濕濕呀! 真係好鐘意佢喺天幕下的戀人嗰個LOOK,真係好型,有幾場我都好感動呀~(真係好想無線快D番做或者出VCD)

雖然佢今次得獎一定會俾人話佢係無線親生仔,一定會俾佢啦~但真係唔可以抺殺佢曾經付出過嘅努力,由谷底向上爬都幾辛苦嫁~

希望嘉穎繼續努力,再做好多好戲俾我地睇,繼續攞最住男主角。


Next